1-2. Hadia wogaoni nibeʼe Yehowa khö ndra samosumange yaʼia si lö faröi?

 BA WAMAIGIMÖ, haniha Yehowa? Tola manö ömane, ”Yehowa andrö Amagu, Lowalangigu, ba si Fahuwu khögu.” Baero daʼö, tola manö so gamalalata tanö böʼö niʼogunaʼöu ba woʼamaedolagö Yehowa. Hizaʼi, hadia öbaliʼö Yehowa tobali Sokhö Omo?

² Razo Dawido iʼamaedolagö gamakhaita Yehowa ba nono mbanuania si lö faröi simane sokhö omo khö domenia. Imane Dawido, ”He Yehowa, haniha zi tola möi fatome ba nosemö? Haniha zi tola toröi ba hili niʼamoniʼö andrö khöu?” (Si. 15:1) Ayati daʼa zangoromaʼö wa ikaoni ita Yehowa tobali tomenia, mazui si fahuwu khönia. Sindruhu-ndruhu no töi sebua khöda daʼa!

OMASI YEHOWA TOBALI ITA TOMENIA

3. Haniha ziföföna tobali tome Yehowa, ba hewisa dödö Yehowa hegöi tomenia andrö?

³ Me föna, ha samösa-mösa Yehowa fatua lö iwöwöi fefu hadia ia. Aefa daʼö, iwöwöi Nononia siaʼa, amaedola itemaʼö tobali tomenia siföföna ba nosenia. Omuso dödö Yehowa ba halöwönia si bohou tobali Sokhö Omo. Iwaʼö khöda Sura  Niʼamoniʼö wa Ononia ”zabölö iʼomasiʼö”. Ba ’ero inötö falukha Nononia waʼomuso dödö föna Namania’.—Amd. 8:30.

4. Haniha nasa zi tobali tome Yehowa?

⁴ Iwöwöi ndra malaʼika Yehowa, ba ikaoni göi ira tobali tomenia. Ifatunö khöda Sura Niʼamoniʼö wa lafotöi ira ’ono Lowalangi’, ifatunö göi wa omuso dödöra wefao khö Yehowa. (Yob. 38:7; Dan. 7:10) Sagötö ba zi hauga fakhe, fahuwu Yehowa ha khö ndra niwöwöinia si toröi ba zorugo. Hizaʼi ba gafuriata, iwöwöi niha ba ikaoni göi ira tobali tomenia, duma-dumania Henokhi, Noakhi, Aberahamo, ba Yobi. Lafotöi ira si fahuwu khö Yehowa börö me ’latörö lala Lowalangi sindruhu’.—1 Mo. 5:24; 6:9; Yob. 29:4; Yes. 41:8.

5. Hadia nifaʼeleʼö ba Hezekieli 37:​26, 27?

⁵ Iʼotarai me föna, lö tebulö ikaoni zi fahuwu khönia Yehowa ba nosenia. (Baso Hezekieli 37:​26, 27.) Duma-dumania, moroi ba wamaʼeleʼö Hezekieli oroma wa omasi Yehowa na fahuwu khönia zamosumange yaʼia si lö faröi. Iwaʼö wa ’fawuʼu li ia khöra ba waʼatulö’. Moloʼö famaʼeleʼö andrö, so ginötönia dania tobali ”ha sambawa nikubaloi” ba nose Yehowa fefu niha sangokhögö tötönafö ba zorugo hegöi ba gulidanö. (Yoh. 10:16) Daʼö zalua iadaʼa!

IʼAMEʼEGÖ TÖDÖ ITA YEHOWA GOFU HEZO TORÖI ITA

6. Hewisa wa tola tobali tome zi samösa niha ba nose Yehowa, ba hadia ha ba zi sambua nahia so nose Yehowa? Tutunö.

⁶ Ba götö Zura Niʼamoniʼö, ose andrö nahia wolombase hegöi nahia wolumöʼö moroi ba deu sabölö-bölö. Niha si möi fatome ba nose, faduhu dödönia wa iʼasogö zoguna khönia sokhö omo. Ba ginötö talulu waʼaurida khö Yehowa, no amaedola tobali ita tome ba nosenia. (Si. 61:4) Fahöna gö wamati nitemada ba tola fahuwu ita ba dome tanö böʼö. Na simanö, hadia ba zi sambua nahia so nose Yehowa? Tenga. Na möi ndraʼugö ba soi böʼö, te ba wangondrasi angowuloa sebua si tohude, tola falukha ndraʼugö ba dome Yehowa tanö böʼö. Gofu hezo toröi ndraʼugö, tola tobali ndraʼugö tome ba nose Yehowa na lö faröi ndraʼugö khönia.—Fam. 21:3.

7. Hadia mbörö wa tola tawaʼö wa niha si lö faröi si no mate, lö tebulö tobali ira tome ba nose Yehowa? (Faigi göi gambara.)

⁷ Hewisa göi niha si lö faröi si no mate? Hadia lö tebulö tobali ira tome ba nose Yehowa? Tatu manö! Hadia mbörö? Börö me auri  ira nasa ba wamaigi Yehowa. Imane Yesu, ”Sanandrösa ba wanusugi niha si no mate, no ifatunö daʼö Moze me so zalua ba gotalua ndruʼu sodoi me iwaʼö, ’Yehowa andrö Lowalangi Gaberahamo, Lowalangi Gizaʼaki, ba Lowalangi Yakobo.’ Yaʼia andrö Lowalangi niha sauri, tenga Lowalangi niha si mate. Auri sa ira fefu ba wamaiginia.”—Luk. 20:​37, 38.

TOBALI TOME YEHOWA—BUANIA HEGÖI NORO DÖDÖDA

8. Hadia mbua nitema niha si tobali tome ba nose Yehowa?

⁸ Simane ose si tola tobali nahia wolumöʼö mazui nahia wolombase, ose Yehowa göi tola möi folumöʼö moroi ba deʼala wamati ba lö taya wanötönada. Na lö tebulö ahatö ita khö Yehowa, lö siʼogötöʼö tataögö ngawalö zi lö sökhi salua khöda börö lua-lua moroi ba gamuata Zatana. (Si. 31:23; 1 Yo. 3:8) Ba gulidanö si bohou dania, lö tebulö ilumöʼö zi lö faröi khönia Yehowa, tenga ha moroi ba deʼala wamati, hizaʼi moroi ba waʼamate göi.—Fam. 21:4.

9. Hadia niʼandrö Yehowa moroi khö domenia?

⁹ No töi sebua khöda me tola tobali ita tome ba nose Yehowa ba fahuwu ita khönia sagötö faʼara. Hizaʼi, hadia zinangea tafalua enaʼö lö tebulö tobali ita tomenia? Na ikaoni ita si samösa niha ba nomonia, tatu manö taforege enaʼö tobali ita tome si sökhi yaʼia daʼö taʼoʼö zomasi zokhö omo. Duma-dumania, na iʼandrö khöda ba wangeheta sifatuda fatua lö möi ita yomo, tatu tafalua daʼö. Simane daʼö göi, enaʼö lö tebulö tobali ita tome ba nose Yehowa, moguna taʼila hadia zomasi ia. Börö me taʼomasiʼö Yehowa, taforege ba ’wangomusoiʼö tödönia’. (Kol. 1:10) Böi olifu ita, hewaʼae si Fahuwu khöda Yehowa, hizaʼi yaʼia göi Lowalangida ba Amada sinangea tafosumange. (Si. 25:14) Na lö taʼolifugö daʼö ba sindruhu-ndruhu tafosumange ia, lö omasi ita tafalua zi möi fangabu dödönia. Tatu manö ’lö fayawa ita ba wanörö lala’ Lowalangida.—Mi. 6:8.

LÖ EBUA DÖDÖ ZAMBUANA YEHOWA BA GÖTÖ NDRAONO GIZARAʼELI

10-11. Hadia zangoromaʼö wa lö ebua dödö zambuana Yehowa ba ndraono Gizaraʼeli?

¹⁰ Lö ebua dödö zambuana Yehowa ba domenia. (Rom. 2:11) Oroma daʼö moroi ba nifaluania khö ndraono Gizaraʼeli me so ira ba Danö si Mate Zinaʼi.

¹¹ Me no iʼefaʼö nono mbanuania Yehowa moroi ba wangosawuyu ba danö Miserai, ifataro ndra ere tobali sangai halöwö ba nosenia. Ibeʼe göi halöwö khö ndra niha Lewi ba nose niʼamoniʼö andrö. Hadia tohude ira ba wamaigi Yehowa börö me ba daʼö mohalöwö ba toröi ira? Tatu manö löʼö, börö me lö ebua dödö zambuana Yehowa.

12. Hadia gamakhoita sangoromaʼö wa lö ebua dödö zambuana Yehowa ba ndraono Gizaraʼeli? (2 Moze 40:38) (Faigi göi gambara.)

¹² Tebeʼe ginötö ba ndraono Gizaraʼeli ero zamösana enaʼö tobali ira si fahuwu khö Yehowa, hewaʼae na tenga ba nose Lowalangi mangai halöwö ira mazui fandröndröu nahia waʼatoröira moroi ba daʼö. Duma-dumania, no itatugöi Yehowa enaʼö fefu ndraono Gizaraʼeli tola laʼila döla lawuo hegöi töla galitö si so yawa ba dete nose Lowalangi. (Baso 2 Moze 40:38.) Na ibörögö tewuʼa döla lawuo andrö, fefu ndraono Gizaraʼeli si fandröndröu moroi ba nose Lowalangi, ahori laʼila döla lawuo andrö irege tola lafaʼanö gama-gamara, labokai nosera zamösana,  ba fao ira wofanö ba lala. (4 Mo. 9:​15-23) Tola göi larongo fefu li dorofe si dombua nifazökhi moroi ba wirö, tandra wa mofanö ira. (4 Mo. 10:2) Börö daʼö, na toröi zi samösa niha ahatö ba nose Lowalangi, tenga daʼö geluahania wa abölö aro wahuwusania khö Yehowa. Tola tobali tome Yehowa ndraono Gizaraʼeli ero zamösana ba faduhu dödöra wa ibeʼe khöra wanuturu lala ba ilumöʼö ira. Simane daʼö göi iadaʼa, iʼomasiʼö ita Yehowa, iʼameʼegö tödö, ba ilumöʼö ita gofu hezo toröi ita zamösana.

LÖ EBUA DÖDÖ ZAMBUANA YEHOWA BA GÖTÖDA IADAʼA

13. Hadia zangoromaʼö wa lö ebua dödö zambuana Yehowa irugi iadaʼa?

¹³ Ba götöda iadaʼa, so nono mbanua Lowalangi si toröi ahatö ba gödo sebua mazui ba gödo ndraha ndra Samaduhuʼö Yehowa. So göi zohalöwö ba gödo andrö. Börö daʼö, tola fao ira ba ngawalö halöwö nifalua ba daʼö ba fariawö ira khö ndra talifusöda sondröniaʼö. So göi zangai halöwö tobali satua samasui mazui ba halöwö safönu inötö tanö böʼönia. Hewisa na lö fao ndraʼugö ba gotaluara? Yafaduhu dödöu wa iʼomasiʼö fefu domenia Sokhö Omo yaʼia daʼö Yehowa. Iʼameʼegö tödö ita ero zamösana ba ibönökhi zoguna khöda. (1 Fe. 5:7) Fefu nono mbanua Yehowa, latema gö ba wamati, fanuturu lala, hegöi folumöʼö moroi khönia.

14. Hadia nasa zangoromaʼö wa lö ebua dödö zambuana Yehowa?

¹⁴ Hadia nasa zangoromaʼö wa lö ebua dödö zambuana Yehowa? Itatugöi enaʼö fefu niha ba zi sagörö ulidanö tola labaso Zura Niʼamoniʼö. Ba wamobörö, Sura Niʼamoniʼö tesura ia ba zi tölu ngawalö li yaʼia daʼö ba li Heberaiʼo, Yunani, hegöi Aramo. Hewaʼae simanö, hadia fefu niha sangila mombaso ba li daʼö abölö fahuwu ira khö Lowalangi moroi ba niha böʼö? Löʼö.—Mat. 11:25.

15. Hadia dandrania wa lö ebua dödö zambuana Yehowa? (Faigi göi gambara.)

 ¹⁵ Ikaoni ita Yehowa tobali si fahuwu khönia, tenga börö me alawa sekolada mazui atua-tua ita ba li niʼogunaʼö ba wanura Sura Niʼamoniʼö. Itatugöi Yehowa enaʼö fefu niha ba zi sagörö ulidanö, farahu ba daʼö niha si lö sekola, tola lafahaʼö ira ba waʼatua-tuania. No mufoʼeluaha Zura Niʼamoniʼö ba zi hauga ribu ngawalö li. Fefu niha gulidanö, tola latema mbua moroi ba wamahaʼö si so ba Zura Niʼamoniʼö ba lafahaʼö ira tobali si fahuwu khö Yehowa.—2 Ti. 3:​16, 17.

TAFOREGE ENAʼÖ LÖ TEBULÖ TOBALI ITA TOME YEHOWA

16. Moloʼö Halöwö Zinenge 10:​34, 35, hewisa enaʼö tobali ita tome ba nose Yehowa?

¹⁶ No töi sebua khöda na tobali ita tome ba nose Yehowa. Yaʼia andrö Sokhö Omo fondrege zi sökhi, fondrege zebua faʼomasi, ba fondrege zoböwö. Lö göi ebua dödö zambuana ia. Ikaoni ita fefu enaʼö tobali tomenia, gofu hadia madoda, soida, hezo toröi ita, hawaʼalawa zekolada, döfida, waö-waö waʼaurida, hegöi hadia ira alawe mazui ira matua ita. Hizaʼi, ha niha sangataʼufi yaʼia nitemaʼönia tobali tome.—Baso Halöwö Zinenge 10:​34, 35.

17. Hadia nitutunöda ba artikel aefa daʼa?

¹⁷ Ba Zinunö 15:​1, manofu Dawido: ”He Yehowa, haniha zi tola möi fatome ba nosemö? Haniha zi tola toröi ba hili niʼamoniʼö andrö khöu?” Börö wanuturu lala moroi khö Yehowa, ibeʼe wanema linia Dawido ba zura zinunö si fagölö. Ba artikel aefa daʼa, tatutunö dania hadia manö zinangea tafalua enaʼö lö tebulö tobali ita tome ba nose Yehowa.