NKHANI YOPHUNZILA N.° 23
NYIMBO N.° 28 Tinkhale paushamwali na Yehova
Yehova otisenga kuti tinkhale alwendo ŵake
“Tenti yangu izankhale pakati pawo. Newo nizankhale Mulungu wawo.”—EZE. 37:27.
CHOLINGA CHANKHANI
Nkhani ino itiyavye kumvwisha tanthauzo yakunkhala alwendo mutenti ya Yehova komasoti vakuchita Yehova potisamalila monga Munecho wa tenti.
1-2. Kansi Yehova ofuna kuti atumiki ŵake okhulupilika achite chinji?
TIYELEKEZELE kuti munthu muyakine wakukonshani kuti, ‘Kansi Yehova niwani kuli mwewo’? Kansi mungamuyankhe kuti tyani? Payakine mungayankhe kuti, ‘Yehova ni Tata wanu, Mulungu wanu, komasoti nshamwali wanu.’ Payakine mungankhale na mayankho ayakine ŵamungapaleke okhuza Yehova. Koma kansi mungamuuje munthu wamene uyo kuti nimwe mulwendo mutenti ya Yehova?
2 Mfumu Davide elinganija ushamwali wapakati pa Yehova na atumiki ŵake okhulupilika na ushamwali wapakati pamunecho wang’anda na mulwendo wake. Yove ekonsha kuti: “Mwewo Yehova, niŵani angankhale mulwendo mutenti yanu? Niŵani wamene angankhale mulupili yanu yopatulika?” (Sal. 15:1) Mawu oujiliwa amene aŵa, otiyavya kuziŵa kuti n’vokwanishika kunkhala alwendo a Yehova—olo kuti azishamwali ŵake. Wamene uyu ni mwayi wapadela ngako! Kansi mwewo nimwe mulwendo mutenti ya Yehova?
YEHOVA OFUNA KUTI SEWO TINKHALE ALWENDO ŴAKE
3. Kansi niŵani wamene enzemulwendo woyamba mutenti ya Yehova, ndipo Yehova pamozi na yove enzekumvwa tyani kunkhala pamozi?
3 Akaliyeyamba ntchito yake yolenga, Yehova enzenkhala yeka kululu. Koma panthawe iyakine, yove elondela Mwana wake woyamba kuvyalika mutenti yake yophiphilisila. Monga Munecho wa tenti, Yehova esangalala ngako na udindo wake wanyowani wosamalila mulwendo. Baibolo yunena kuti Yehova ‘enzesangalala naye ngako’ Mwana wake. Monga vokonkhapo vake, nayesoti Mwana wake, “enzenkhala wosangalala pamenso pa [Yehova] nthawe zonse.”—Miy. 8:30.
4. Kansi niŵanisoti amene echizankhala alwendo mutenti ya Yehova?
4 Pavuli pake, Yehova echizalenga angelo, ndipo nawo angelo eyamba kunkhala mutenti yake monga alwendo. Baibolo yunena kuti angelo ni “ŵana a Mulungu” ndipo yuwonesha kuti ove osangalala chifukwa chakuti ali pamozi na Yehova. (Yobu 38:7; Dan. 7:10) Kwa vyaka vinyinji ngako, alwendo a Mulungu enze tyala angelo auzimu amene enzenkhala naye pamozi kululu. Pavuli pake, Mulungu elenga ŵanthu ndipo nawosoti eyamba kunkhala alwendo mutenti yake. Ayakine mwa alwendo a Mulungu enze Inoki, Nowa, Abulahamu, komasoti Yobu. Ŵanthu okhulupilika amene aŵa enzeitiwa kuti azishamwali a Mulungu, kapena kuti ŵanthu amene enzeyenda “na Mulungu wachendi.”—Gen. 5:24; 6:9; Yobu 29:4; Yes. 41:8.
5. Kansi tingaphunzile chinji kufumila pa ulosi wapa Ezekieli 37:26, 27?
5 Kwavyaka vinyinji, Yehova epitilija kuita azishamwali ŵake kuti ankhale alwendo mutenti yake. (Ŵelengani Ezekieli 37:26, 27.) Mwachisanzo, ulosi wa Ezekieli uwonesha kuti Mulungu ofuna kuti atumiki ŵake okhulupilika ankhale naye paushamwali uweme. Mulungu elonjeza kuti azankhazikishe “pangano ya ntendele” na ŵanthu ŵake. Ulosi wamene uyu wenzenena za nthawe yamene atumiki a Mulungu amene akuyankhala kululu pamozi na ŵanthu amene akuti azalondele chino chalo, azankhale mokatijana mutenti ya Mulungu yophiphilisila monga “gulu imozi.” (Yoh. 10:16) Ulosi wamene uyu ukwanilishiwa masiku ŵano!
MULUNGU OTISAMALILA KULIKONSE KWATINGANKHALE
6. Kansi munthu angankhale tyani mulwendo mutenti ya Yehova, ndipo ni malo otyani ŵangaifwane tenti yamene iyi?
6 Mu nthawe za m’Baibolo, ŵanthu enzekatishila ntchito tenti akafuna malo kuti apumule komasoti kuti atetezeke kunyengo zosiyana-siyana. Mulwendo akafwika mutenti yotetyo, enzeyembekezela kuti munecho watenti amusamalile. Tikalipeleka kuti tinkhale paushamwali na Yehova, yove otilondela monga alwendo mutenti yake yophiphilisila. (Sal. 61:4) Sewo tili na vonse vatufunikila kuti tipitilije kunkhala paushamwali wotang’a na Yehova ndipo tili na ayasu amene Yehova eŵalondela monga alwendo mutenti yake. Ŵanthu am’vyalo vonse, angakwanishe kunkhala alwendo mutenti ya Yehova. Payakine mwewo mwelutapo kale kuyachita nsonkhano wapadela muchalo chiyakine ndipo mwefwana ayanu amene osangalala kunkhala mutenti ya Mulungu. Keno tutumikila Yehova mokhulupilika yove angatilondele monga alwendo mutenti yake viliyekanthu kuti tunkhala kuni.—Chiv. 21:3.
7. Ndaŵa yanji tinganene kuti atumiki a Mulungu okhulupilika amene emwalila, akali mutenti ya Yehova? (Onanisoti chithunzi.)
7 Tyani ponena za atumiki a Mulungu okhulupilika amene emwalila? Kansi tinganene kuti akali mutenti ya Yehova? Eye! Ndaŵa yanji tinganene tetyo? Ndaŵa yakuti Yehova akaliŵakumbukila. Yesu efotokoza kuti: “Nkhani yakuti ŵanthu akufwa oushiwa, olo Mose efotokoza munkhani yachizambwa chaminga panthawe yechinena kuti Yehova ni ‘Mulungu wa Abulahamu, Mulungu wa Isaki, na Mulungu wa Yakobo.’ Yove ni Mulungu wa ŵanthu amoyo osati akufwa, chifukwa kuli yove onse amene aŵa ali moyo.”—Luk. 20:37, 38.
Olo atumiki a Mulungu okhulupilika amene emwalila, Mulungu angapitilije kuŵawona monga alwendo mutenti yake (Onani ndime 7.)
MADALISO ŴATUFWANA KOMASOTI VATUFUNIKILA KUCHITA TIKANKHALA ALWENDO A MULUNGU
8. Kansi nimadaliso otyani ŵatufwana chifukwa chonkhala mutenti ya Yehova?
8 Molingana na tenti ngayo-ngayo yamene ingaŵe malo opumulilamo komasoti ofisalilamo chimphepo, tenti yawapeleka Yehova kuli alwendo ŵake yuŵateteza kuvinthu vonse vamene vingawononge ushamwali wawo na yove, ndipo yuŵapasa chiyembekezo ngacho-ngacho chakusogolo. Tikapitilija kunkhala paushamwali wotang’a na Yehova, paliye chinthu chilichonse changachite Satana chamene chingatiwononge mpaka kale-kale. (Sal. 31:23; 1 Yoh. 3:8) Muchalo chanyowani, Yehova azapitilije kuteteza atumiki ŵake okhulupilika osati tyala mwauzimu, komasoti kuimfwa.—Chiv. 21:4.
9. Kansi Yehova ofuna kuti ŵanthu amene ali mutenti yake akochita chinji?
9 Kulaŵila chendi, Yehova watilemekeza ngako—potilondela monga alwendo mutenti yake. Sewo tingakwanishe kunkhala paushamwali wotang’a na yove mpaka kale-kale. Kansi tufunikila kuchita tyani kuti tipitilije kunkhala alwendo mutenti ya Mulungu? Keno munthu muyakine wakuitilani kung’anda kwake, mwewo mungakonde kuti muziŵe vinthu vakufuna kuti muchite. Mwachisanzo, payakine angafune kuti muvule nsapato mukaliyeloŵa m’ng’anda, ndipo mwewo mungachite vamene ivo mofunishisha. Molingana na vamene ivi, sewo tufunishisha kuziŵa vinthu vakufuna Yehova kuli ŵanthu amene ofuna kupitilija kunkhala alwendo mutenti yake. Chikondi chatili nacho kwa Yehova, chutilimbikisa kuchita chilichonse chatingakwanishe “kuti tikomukondwelesha pachilichonse.” (Akol. 1:10) N’chendi kuti Yehova nishamwali wasu, koma tuziŵasoti kuti yove ni Mulungu komasoti Atata ŵasu ndipo tuwamila kumulemekeza. (Sal. 25:14) Sewo tufunikalini kuluŵa mfundo yamene iyi komasoti tikochita vinthu vomulemekeza nthawe zonse. Ulemu wofumila pansi pantima monga niwamene uyu, uzatiyavye kupewa kuchita vinthu vamene vingamukhumudwise. Sewo tufuna kuti nthawe zonse “tikoyenda molichefya” na Mulungu wasu.—Mik. 6:8.
YEHOVA ENZECHITALINI VINTHU MOKONDELA NA NTUNDU WA AISIRAELI
10-11. Kansi Yehova enzechita tyani vinthu na Aisiraeli m’chipululu cha Sinai, ndipo vamene ivi viwonesha tyani kuti yove aliye sankho?
10 Yehova ochitalini vinthu mokondela na alwendo ŵake. (Alo. 2:11) Sewo tumvwisha mfundo yamene iyi tikawona mwenzechitila vinthu na ntundu wa Aisiraeli m’chipululu cha Sinai.
11 Pavuli pakuti wapulumusha ŵanthu ŵake ku ukapolo ku Iguputo, Yehova esankha ansembe kuti akotumikila pa tenti. Mulungu esankha Alevi kuti akololela ntchito ziyakine patenti yake. Kansi ŵanthu amene enzetumikila patenti olo amene enzekhoma matenti ŵawo pafupi na tenti yake niye enzesamaliwa mwapadela na Yehova kupambana ŵanthu ayakine? Yayi! Yehova aliye sankho.
12. Kansi mwenzechitila vinthu Yehova na ntundu wa Aisiraeli m’chipululu vuwonesha tyani kuti yove niwosakondela? (Ekisodo 40:38) (Onanisoti chithunzi.)
12 Mwisiraeli aliyense enze paushamwali wotang’a na Yehova, viliye kanthu kuti enzetumikila patenti olo yayi, komasoti keno enzenkhala pafupi na tenti ya Mulungu olo yayi. Mwachisanzo, Yehova enzewoneshesha kuti ntundu wonse wa Aisiraeli, ukwanisha kuona chipilala chankumbi wodabwisa na chipilala chamulilo palulu patenti. (Ŵelengani Ekisodo 40:38.) Chipilala chankumbi chikaima, olo ŵanthu amene enzekhoma matenti ŵawo kutali na tenti ya Mulungu enzekwanisha kuchiwona. Tetyo, ove enzekwanisha kulonga katundu wawo, kupasula matenti, nofuluka pamozi na Aisiraeli ayawo. (Num. 9:15-23) Aisiraeli onse enzekwanisha kumvwa zungo yosiyana-siyana yamabelo aŵili asiliva yenzelija yoziŵisha munthu kuti anyamuke. (Num. 10:2) Tetyo, munthu akakhoma tenti yake pafupi na tenti ya Mulungu venzetanthauzalini kuti ali paushamwali wotang’a na Yehova kupambana ŵanthu ayakine amene enzekutali. M’malo mwake, Mwisiraeli aliyense enze na mwayi wonkhala mulwendo mutenti ya Yehova nokhulupilila kuti yove akomusogolela nomuteteza. Molingana na vamene ivi, masiku ŵano Yehova otikonda, otisamalila, komasoti otiteteza mosasamala kanthu kuti tunkhala kuni.
Tenti yamene yenzepakati pansasa wa Aisiraeli, yenze umboni wakuti Yehova aliye sankho (Onani ndime 12.)
YEHOVA OCHITALINI VINTHU MOKONDELA MASIKU ŴANO
13. Ndaŵa yanji tinganene kuti Yehova ochitalini vinthu mokondela masiku ŵano?
13 Masiku wano atumiki ayakine a Mulungu onkhala pafupi na likulu yapachalo chonse olo na ofesi ya nthambi ya Mboni za Yehova. Ayakine otumikila m’malo amene aŵa ngawo-ngawo. Monga vokonkhapo vake, ove angankhale na mwayi wokata ntchito zinyinji zamene zuchitika m’malo amene aŵa nokata ntchito pamozi na ŵanthu amene osogolela. Ayakine otumikila monga opanamila dela olo atumiki apadela anthawe zonse. Keno mwewo muli m’gulu ya ŵanthu osaŵelengeka amene ali na mwayi wokata nawo ntchito mmalo monga ni amene aŵa, mungankhale mphela osimikijila kuti Yehova okonda alwendo ŵake onse amene ochita vinthu vomukondwelesha. Mulungu okuziŵani luweme ngako ndipo okupasani vinthu vamufunikila. (1 Pet. 5:7) Yehova opeleka chakulya chauzimu kuli atumiki ŵake onse ndipo oŵasogolela noŵateteza.
14. Kansi ninjila iyakine yotyani yakuwoneshela Yehova kuti aliye sankho monga Munecho wang’anda?
14 Yehova wawoneshasoti mwanjila iyakine kuti aliye sankho pochitisha kuti Baibolo imasuliliwe muvilaŵilo vinyinji kuti ŵanthu onse akokwanisha kuiŵelenga. Malemba atuŵa oyambilila elembewa muvilaŵilo vitatu: Chihebeli, Chialamu, komasoti Chigiliki. Kansi ŵanthu amene okwanisha kuŵelenga Baibolo muvilaŵilo voyambilila niye amene ali paushamwali wotang’a na Yehova kupambana amene okwanishalini? Yayi, niyelini mwavilili.—Mat. 11:25.
15. Kansi n’chinji chamene chuwonesha kuti Yehova aliye sankho? (Onanisoti chithunzi.)
15 Yehova otiujalini kuti tinkhale azishamwali ŵake chifukwa chakuti nise ophunzila ngako olo chifukwa chakuti tuziŵa kuŵelenga Baibolo muvilaŵilo voyambilila. Yehova wachitisha kuti mawu ŵake anzelu akopezeka kuli ŵanthu onse kuzenguluka pachalo chonse, osati tyala kuli ŵanthu amene ni ophunzila ngako. Mawu ŵake oujiliwa Baibolo amasuliliwa m’vilaŵilo masauzande anyinji; ŵanthu kuzenguluka pachalo chonse, angapindule na vayuphunzisa Baibolo noziŵa vangachite kuti ankhale azishamwali a Mulungu.—2 Tim. 3:16, 17.
Ndaŵa yanji mfundo yakuti Baibolo yamasuliliwa muvilaŵilo masauzande anyinji yuwonesha kuti Yehova aliye sankho? (Onani ndime 15.)
PITILIJANI KUNKHALA “ALWENDO” A YEHOVA
16. Mokatijana na Machitidwe 10:34, 35, kansi tingachite tyani kuti tipitilije kunkhala ovomelejeka pamenso pa Yehova?
16 Nimwayi ukulu ngako kulondelewa na Yehova mutenti yake yophiphilisila monga alwendo ŵake. Yove nimuweme ntima, wachikondi, komasoti otandaja luweme ngako alwendo kupambana munthu aliyense. Kuyangijila pamene apo, Mulungu aliye sankho, olondela ŵanthu onse mosasamala kanthu za kwakunkhala, chinkhalidwe chawo, maphunzilo ŵawo, ntundu wawo, fuko, nsinkhu, olo keno nimwanalume kapena mwanakazi. Koma ŵanthu amene ŵakulondela Yehova monga alwendo mutenti yake, ni ŵala amene omumvwila.—Ŵelengani Machitidwe 10:34, 35.
17. Kansi nikuni kwatikuti tizamvwe vinyinji pankhani yakunkhala mutenti ya Yehova?
17 Mokatijana na Salimo 15:1, Davide ekonsha kuti: “Mwewo Yehova, niŵani angankhale mulwendo mutenti yanu? Niŵani wamene angankhale mulupili yanu yopatulika?” Mulungu eujila wamasalimo kuti apeleke yankho ya makonsho amene aŵa. Munkhani yokonkhapo, tizakambilane vinthu viyakine vatufunikila kuchita kuti tikokondwelesha Yehova komasoti kuti tipitilije kunkhala azishamwali ŵake.
NYIMBO N.° 32 Nkhalani okhulupilika kwa Yehova!
