1-2. Jehofa o memela kae bahlanka ba gagwe ba botegago?

 GE E BA motho yo mongwe a ka go botšiša gore Jehofa ke’ng go wena, o ka mo araba bjang? O ka re ‘Jehofa ke Tate wa ka, Modimo wa ka le Mogwera wa ka.’ O ka ba o nagana le ka maina a mangwe ao o ka a dirišago go hlalosa Jehofa. Eupša o ka mo lebelela gape a swana le Motho yo a go memago.

² Kgoši Dafida o ile a bapetša segwera seo Jehofa a nago le sona le bahlanka ba gagwe ba botegago le tsela yeo motho yo a amogelago baeng a swarago baeng ba gagwe ka yona. O ile a botšiša gore: “Wena Jehofa, ke mang a ka bago moeng tenteng ya gago? Ke mang a ka dulago thabeng ya gago e kgethwa?” (Ps. 15:1) Mantšu a ao a buduletšwego, a bontšha gore re ka gwerana le Jehofa le go ba baeng tenteng ya gagwe. Yeo e tloga e le tokelo e kgolo kudu!

JEHOFA O RE MEMELA TENTENG YA GAGWE

3. Ke mang e bilego moeng wa mathomo tenteng ya Jehofa, gomme yena le Jehofa ba be ba ikwa bjang?

³ Jehofa o be a le noši pele a ka dira dilo ka moka. Ka morago ga nako e itšego o ile a amogela Morwa wa gagwe wa leitšibulo tenteng ya gagwe ya seswantšhetšo. Jehofa o ile a thoma go thabela go ba le baeng tenteng ya gagwe. Beibele e re botša gore Jehofa o be a ‘thabišwa’ ke go ba le Morwa  wa gagwe. Moeng yoo wa mathomo kamoo tenteng yeo, o be a “thabile pele ga [Jehofa] ka mehla.”—Die. 8:30.

4. Ke bomang ba bangwe bao Jehofa a ilego a ba mema tenteng ya gagwe?

⁴ Jehofa o ile a bopa dibopiwa tše dingwe tša moya gomme a di mema gore e be baeng tenteng ya gagwe. Beibele e bitša barongwa gore ke “barwa ba Modimo” e bile e bontšha gore ba thabela go ba kgauswi le Jehofa. (Jobo 38:7; Dan. 7:10) Ka mengwaga e mentšhi, Modimo o be a gwerana le dibopiwa tša moya feela tšeo di dulago mo a dulago gona. Ka morago o ile a oketša tente ya gagwe gomme a mema batho bao ba dulago lefaseng. Ba bangwe ba baeng bao e be e le Henoge, Noa, Aborahama le Jobo. Bahlanka bao ba botegago ba ile ba bitšwa bagwera ba Modimo, goba bao ba bego ba “sepela le Modimo wa nnete.”—Gen. 5:24; 6:9; Jobo 29:4; Jes. 41:8.

5. Re ithuta’ng boporofeteng bjo bo lego go Hesekiele 37:​26, 27?

⁵ Ke kgale Jehofa a mema bagwera ba gagwe gore e tle e be baeng tenteng ya gagwe. (Bala Hesekiele 37:​26, 27.) Ka mohlala, boporofeteng bjo bja Hesekiele re ithuta gore Modimo o tloga a nyaka gore bahlanka ba gagwe ba botegago ba be le segwera sa kgauswi kudu le yena. O tshepiša go dira “kgwerano ya khutšo le bona.” Boporofeta bjo, bo bolela ka nakong ya ge bahlanka ba Jehofa ba tloditšwego le bao ba nago le kholofelo ya go tlo phela mo lefaseng ba le ka tlase ga tente ya seswantšhetšo ya Jehofa e le “mohlape o tee.” (Joh. 10:16) Seo se a direga gona bjale!

MODIMO O NA LE TABA LE RENA GO SA ŠETŠWE GORE RE DULA KAE

6. Motho o swanetše go dira’ng gore e be moeng tenteng ya Jehofa, gona tente yeo e hwetšagala kae?

⁶ Mehleng ya Beibele, ge motho a be a le ka tenteng ya gagwe o be a ikwa a šireletšegile. Motho yo a bego a etela tente ya yo mongwe o be a ka letela gore a hlokomelwe. Ge re ineela go Jehofa re ba baeng tenteng ya gagwe ya seswantšhetšo. (Ps. 61:4) Re thabela dijo tše dintšhi tša moya le go gwerana le ba bangwe bao le bona e lego baeng tenteng ya Jehofa. Batho lefaseng ka moka ba ka kgona go ba ka tenteng ya Jehofa ya seswantšhetšo. Mohlomongwe o ile wa ya kopanong e kgethegilego nageng e nngwe ke moka ge o le moo wa kopana le batho ba bangwe bao ba thabelago go ba tenteng ya  Modimo. Tente ya Jehofa e go gongwe le go gongwe moo bahlanka ba Jehofa ba lego gona.—Kut. 21:3.

7. Ke ka baka la’ng re ka re batho bao ba hlokofetšego e sa le baeng tenteng ya Jehofa? (Bona le seswantšho.)

⁷ Re ka re’ng ka bao ba hlokofetšego? Na re ka re e sa le baeng tenteng ya Jehofa? Ee! Ke ka baka la’ng re rea’lo? Ka gobane Jehofa o sa ba gopola. Jesu o itše: “Eupša gore bahu ba a tsošwa go utolotšwe gaešita le ke Moshe ge a bolela pegong ya mabapi le sehlare sa meetlwa, ge a be a bitša Jehofa gore ke ‘Modimo wa Aborahama, Modimo wa Isaka le Modimo wa Jakobo.’ Ke Modimo wa ba phelago, e sego wa bahu, gobane go yena bohle ba a phela.”—Luka 20:​37, 38.

RE HOLEGA BJANG, GONA RE SWANETŠE GO DIRA’NG?

8. Baeng bao ba lego ka tenteng ya Jehofa ba holega bjang?

⁸ Go swana le ge tente e ka ba lefelo le le šireletšegilego, tente ya Jehofa le yona e šireletša baeng ba gagwe go dilo tšeo di ka ba gobatšago le tšeo di ka dirago gore ba se ke ba ba le kholofelo. Sathane a ka se re gobatše ge e ba re ka dula re hlankela Jehofa. (Ps. 31:23; 1 Joh. 3:8) Lefaseng le leswa, Jehofa o tlo tšwela pela a šireletša bahlanka ba gagwe ba botegago gore Sathane a se ke a senya tumelo ya bona le gore ba se ke ba hwa.—Kut. 21:4.

9. Jehofa o letetše gore baeng ba gagwe ba itshware bjang?

⁹ E tloga e le tokelo go ba moeng ka tenteng ya Jehofa le go thabela go gwerana le yena. Re swanetše go itshwara bjang ge re le ka tenteng ya Jehofa? Ge e ba motho a ka go mema ka ntlong ya gagwe o ka ipotšiša gore o ka dira’ng gore o be moeng yo mokaone. Ka mohlala, a ka letela gore o role dieta pele o tsena ka ntlong gomme wena o tlo dira bjalo. Ka mo go swanago, re nyaka go tseba gore Jehofa o letetše eng go baeng bao ba tlago tenteng ya gagwe. Ka ge re rata Jehofa re tlo dira sohle seo re ka se kgonago gore re mo “thabiše dilong ka moka.” (Bakol. 1:10) Le ge re lebelela Jehofa e le Mogwera wa rena, re lemoga le gore ke Modimo le Tate yoo a nyakago re mo hlompha. (Ps. 25:14) Re swanetše go dula re gopola seo e bile re mo hlomphe ka mo go tseneletšego. Go dula re dira se go tlo re thuša gore re se ke ra dira dilo tše di sa lokago. Re tloga re nyaka go “sepela” le Modimo wa rena.—Mika 6:8.

JEHOFA GA A KGETHOLLE

10-11. Tsela yeo Jehofa a bego a dirišana le Baisiraele kua lešokeng la Sinai e bontšha bjang gore ga a kgetholle?

¹⁰ Jehofa ga a kgetholle batho bao a ba memago gore ba tle tenteng ya gagwe. (Baroma 2:11) Re kgona go bona gore Jehofa ga a kgetholle ka tsela yeo a bego a dirišana le Baisiraele lešokeng la Sinai.

¹¹ Ka morago ga gore Jehofa a lokolle batho ba gagwe bokgobeng kua Egepeta, o ile a kgetha baperisita gore ba hlankele taberenakeleng. Balefi ba be ba abetšwe gore ba dire dikabelo tše dingwe tenteng e kgethwa. Na Jehofa o be a hlokomela batho bao ba bego ba hlankela taberenakeleng goba bao ba bego ba dula kgauswi le yona go feta kamoo a bego a hlokomela ba bangwe? Aowa! Jehofa ga a kgetholle.

12. Jehofa ile a bontšha bjang gore ga a kgetholle ge a be a dirišana le Baisiraele? (Ekisodo 40:38) (Bona le seswantšho.)

¹² Baisiraele ka moka ba be ba thabela go ba bagwera ba Jehofa go sa šetšwe gore ba na le dikabelo tše di kgethegilego goba ba dula kae. Ka mohlala Jehofa o ile a kgonthišetša gore setšhaba ka moka se be se kgona  go bona leru le mollo wo o bego o le godimo ga taberenakele. (Bala Ekisodo 40:38.) Ge leru le be le tloga, batho bao ba bego ba dula kgole le taberenakele ba be ba kgona go le bona ke moka ba kgobokanya dilo tša bona, ba hlahlamolla ditente gomme ba sepela le setšhaba. (Num. 9:​15-23) Batho ka moka ba be ba kgona go kwa diphalafala tša silifera ge di lla ke moka ba huduga. (Num. 10:2) Ruri go dula kgauswi le taberenakele go be go sa re gore Jehofa o go rata kudu. Motho yo mongwe le yo mongwe o be a ka kgona go ba moeng tenteng ya Jehofa gomme a latela tlhahlo ya gagwe a ba a letela gore Jehofa a mo šireletše. Le lehono re ka kgona go ba ka tenteng ya Jehofa go sa šetšwe gore re dula kae.

JEHOFA GA A KGETHOLLE LE LEHONO

13. Lehono Jehofa o bontšha bjang gore ga a kgetholle?

¹³ Bahlanka ba bangwe ba Modimo ba dula kgauswi le ntlokgolo goba ofisi ya lekala ya Dihlatse tša Jehofa. Ba bangwe ba hlankela meagong yeo. Bao ba dulago moo ba tšea karolo dilong tšeo di diregago mafelong ao, e bile ba phela ba le gare ga bao ba etelelago pele. Ba bangwe ke balebeledi ba basepedi goba ba hlankela mehuteng e mengwe ya tirelo ya nako e tletšego e kgethegilego. Kgodišega gore o moeng ka tenteng ya Jehofa e bile o a go rata, le ge o se na tokelo ya go hlankela mafelong a kgethegilego. O go tseba gabotse e bile o go nea dilo tšeo o di hlokago. (1 Pet. 5:7) Bahlanka ba Modimo ka moka ba amogela dijo tša moya, tlhahlo yeo e tšwago go Jehofa le tšhireletšo yeo ba e hlokago.

14. Ke tsela efe e nngwe yeo Jehofa a bontšhago ka yona gore ga a kgetholle?

¹⁴ Tsela e nngwe ya go bontšha gore Jehofa ga a kgetholle ke ka go kgonthišetša gore batho ba lefaseng ka moka ba kgona go bala Beibele. Mangwalo a Makgethwa a be a hwetšagala ka maleme a mararo feela e lego: Seheberu, Searama le Segerika. Na batho bao  ba kgonago go bala Beibele ka maleme a mathomong ba na le segwera sa kgauswi le Jehofa go feta bao ba sa kgonego go bala maleme ao? Aowa.—Mat. 11:25.

15. Ke bohlatse bofe bjoo bo bontšhago gore Jehofa ga a kgetholle? (Bona le seswantšho.)

¹⁵ Jehofa ga a re amogele ka baka la ge re rutegile goba re kgona go bolela maleme a fapafapanego. O thuša batho ka moka gore ba be le bohlale bja gagwe, go sa šetšwe gore ba rutegile kudu goba ga se ba rutega. Lentšu la gagwe leo le buduletšwego e lego Beibele le fetoletšwe ka maleme a mantšhi kudu, gomme seo se dira gore batho lefaseng ka moka ba kgone go ithuta ka yena le go ba bagwera ba gagwe.—2 Tim. 3:​16, 17.

DULA O AMOGELEGA GO JEHOFA

16. Re ka dira’ng gore re dule re amogelega go Jehofa? (Ditiro 10:​34, 35)

¹⁶ Ke tokelo e kgolo kudu go ba moeng ka tenteng ya Jehofa ya seswantšhetšo. Jehofa ke yo botho, ke lerato e bile o amogela batho gabotse. Go oketša moo, Jehofa ga a kgetholle e bile o re amogela ka moka go sa šetšwe gore re dula kae, re godišitšwe bjang, re rutegile ga kaaka’ng, re ba mmala ofe, setšo sefe goba re na le mengwaga e mekae. Eupša Jehofa o amogela feela bao ba mo kwago ka tenteng ya gagwe.—Bala Ditiro 10:​34, 35.

17. Re tlo ithuta ka’ng sehlogong se se latelago?

¹⁷ Go Psalme 15:​1, Dafida o ile a botšiša gore: “Wena Jehofa, ke mang a ka bago moeng tenteng ya gago? Ke mang a ka dulago thabeng ya gago e kgethwa?” Jehofa o ile a diriša Dafida go araba dipotšišo tšeo. Sehlogong se se latelago re tlo bolela ka dilo tšeo re swanetšego go di dira gore re dule re le ka tenteng ya Jehofa.