EKICWEKA EKY’OKWEGA 23
EKYESHONGORO 28 Okuba Munywani wa Yehova
Yehova Naatweta Kuba Abagyenyi Be
‘[Eihema] ryangye niriija kuba omuribo, mbe Ruhanga waabo.’—EZK. 37:27.
ENTIMA
Okwongyera kwetegyereza eki kirikumanyisa kuba abagyenyi omu ihema rya Yehova ery’akamanyiso n’oku arikureeberera abagyenyi be.
1-2. Ni mugisha ki ogu Yehova ahaire abaheereza be abeesigwa?
YEHOVA noomutwara nk’oha? Noobaasa kugarukamu ngu, ‘Yehova ni Tata, Ruhanga wangye, kandi Munywani wangye.’ Kandi aine ebitiinisa ebindi ebi orikubaasa kumweta. Kwonka shi, noomureeba nk’Omutaayaayisa waawe?
2 Omugabe Daudi akagyeragyeranisa omukago ogu Yehova aine n’abaheereza be abeesigwa n’ogu omutaayaayisa aine n’abagyenyi be. Akabuuza ati: “[Yehova], n’oha oriraara omu ihema ryawe? N’oha orituura aha kibungo kyawe ekirikwera?” (Zab. 15:1) Ebigambo ebyo nitubyegyeraho ngu nitubaasa kuba abagyenyi ba Yehova nari banywani be. Ogwo ka n’omugisha gw’amaani!
YEHOVA NAAYENDA NGU TUBE ABAGYENYI BE
3. Omugyenyi wa Yehova ow’okubanza akaba ari oha, kandi buri omwe akaba naayehurira ata ahari mugyenzi we?
3 Yehova atakahangire, akaba ari wenka. Kwonka bwanyima y’obwire, akeeta Omwana we omujigaijo omu ihema rye ery’akamanyiso. Yehova akashemererwa munonga kumutaayaayisa. Baibuli neeyoreka ngu Omwana we niwe yaabaire ari “okushemererwa kwe.” Kandi omugyenyi we ogwo ow’okubanza akaba ‘naayesiimira omu maisho ge buri izooba.’—Enf. 8:30.
4. Ni baahi abandi abu Yehova yaikiriize kuba abagyenyi omu ihema rye?
4 Bwanyima Yehova akahanga ebihangirwe ebindi eby’omwoyo kuba abagyenyi omu ihema rye. Baamaraika nabo nibeetwa “abaana ba Ruhanga,” kandi nibagambwaho nk’abarikwesiimira omu maisho ga Yehova. (Yob. 38:7; Dan. 7:10) Kumara obwire, Ruhanga akaba aine omukago n’ebihangirwe eby’omwoyo byonka ebirikutuura omu iguru. Bwanyima, akaikiriza abantu kuba abagyenyi omu ihema rye. Abamwe omuri abo, ni Enoka, Noa, Abrahamu na Yobu. Abantu abo abeesigwa bakeetwa banywani ba Ruhanga nari abaagyenzire nawe.—Kut. 5:24; 6:9; Yob. 29:4; Isa. 41:8.
5. Nitubaasa kwegyera ki aha bunabi oburi omu Ezekieli 37:26, 27?
5 Kumara ebyasha bingi, Yehova atwire naayeta banywani be kuba abagyenyi be. (Shoma Ezekieli 37:26, 27.) Nk’eky’okureeberaho, nitwega omu bunabi bwa Ezekieli ngu naayenda ngu abaheereza be abeesigwa bagire enkoragana nungi nawe. Naaraganisa kukora “nabo endagaano y’obusingye.” Obunabi obwo nibugamba aha bwire obu entoore n’abo abaine amatsiko g’okutuura omu nsi, baraabe bari omu ihema ery’akamanyiso bari “obusyo bumwe.” (Yoh. 10:16) Ekyo nikyo kiriyo nikibaho hati!
RUHANGA NAATUFAHO HOONA AHU TURI
6. Omuntu naaba ata omugyenyi omu ihema rya Yehova, kandi eihema rye nirishangwa nkahi?
6 Omu bwire bwa Baibuli, eihema ry’omuntu rikaba riri omwanya gw’okuhumuriramu, kandi embeera y’obwire ku yaabaire ehinduka rikaba rimurinda. Owaabaire ayeetwa omu ihema eryo akaba naamanya ngu naija kureebererwa gye. Twayehayo ahari Yehova nituba abagyenyi omu ihema rye ery’akamanyiso. (Zab. 61:4) Nitutunga eby’okurya by’omwoyo bingi, kandi nitugasirwa omu kuba hamwe n’abandi abari omu ihema rya Yehova. Eihema rye ery’akamanyisa tiriri mu mwanya gumwe. Noobaasa kuba oraagire omu ihanga erindi, obundi aha ruteerane oruhango orw’omutaano, kandi okabuganayo abandi abari omu ihema rya Ruhanga. Eihema eryo niribaasa kushangwa hoona ahu abaheereza ba Yehova abeesigwa bari.—Kush. 21:3.
7. Ahabw’enki nitubaasa kugira ngu abaheereza ba Yehova abeesigwa abaafiire bakiri abagyenyi omu ihema rye? (Reeba n’ekishushani.)
7 Kandi abeesigwa abaafiire? Mbwenu shi nitubaasa kugira ngu bakiri abagyenyi omu ihema rya Yehova? Eego! Ahabw’enki nitubaasa kugira tutyo? N’ahabw’okugira ngu Yehova naakiijuka abantu nk’abo. Yesu akashoboorora ati: ‘Ebirikukwata aha by’okuzooka kw’abafu, na Musa akabyoreka omu byahandiikirwe aha byabaire aha rushaka, ahu yaayeteire [Yehova] Ruhanga wa Abrahamu, Ruhanga wa Isaaka, kandi Ruhanga wa Yakobo. Ruhanga ti Ruhanga w’abafu, kureka ow’abahuriire, ahakuba omu maisho ge boona baba abahuriire.’—Luk. 20:37, 38.
N’abeesigwa abaafiire nibakireebwa nk’abagyenyi omu ihema rya Ruhanga (Reeba akacweka 7)
NITUGASIRWA KANDI TWINE OBUJUNAANIZIBWA
8. Abagyenyi ba Yehova nibagasirwa bata ahabw’okuba omu ihema rye?
8 Nk’oku eihema riri omwanya gw’okuhumuriramu, kandi ririkurinda omuntu embeera y’obwire yaahinduka, eihema rya Yehova niririnda abagyenyi be akabi k’eby’omwoyo n’okwehwa amatsiko. Twaguma haihi na Yehova, Sitaane tarikubaasa kutuhitsyaho akabi k’obutwire. (Zab. 31:23; 1 Yoh. 3:8) Omu nsi ensya, Yehova naija kugumizamu arikurinda banywani be abeesigwa akabi k’eby’omwoyo n’okufa.—Kush. 21:4.
9. Yehova naayenda ngu abagyenyi be batwaze bata?
9 Buzima n’omugisha gw’amaani kuba omugyenyi omu ihema rya Yehova n’okugira omukago murungi nawe ebiro byona. Twine kutwaza tuta twaba nitwenda kuguma turi abagyenyi be? Omuntu yaakutaayaayisa, nooba nooyenda kumanya ebi arikukwenza. Nk’eky’okureeberaho, naabaasa kuba naayenda ngu ojuure enkaito otakataahire omu nju, kandi nookikora oyekundiire. Nikyo kimwe, nitwenda kumanya eki Yehova arikwenza abarikwenda kuguma bari abagyenyi omu ihema rye. Rukundo ei twiniire Yehova neetuhiga kukora kyona eki turikubaasa ‘kumushemeza omuri byona.’ (Kol. 1:10) Kandi n’obu Yehova araabe ari munywani waitu, twine kumanya ngu ni Ruhanga waitu, kandi Tataitwe ou tushemereire kuha ekitiinisa. (Zab. 25:14) Ekyo nikitwijutsya ngu, butoosha twine kumutiina ahabw’eki ari. Okutiina nk’okwo nikutuhwera kwetantara ebikorwa ebirikumugwisa kubi. Buzima nitwenda ‘kugyenda’ omu bucureezi na Ruhanga waitu.—Mik. 6:8.
YEHOVA AKABA ATARIKUSHOROORA ABAISRAELI
10-11. Oku Yehova yaatwariize Abaisraeli omu ihamba rya Sinai nikyoreka kita ngu tarikushoroora?
10 Yehova tarikushoroora omu ku arikutwariza abagyenyi be. (Rom. 2:11) Ekyo nitukimanya twayetegyereza oku yaatwariize Abaisraeli omu ihamba rya Sinai.
11 Yehova ku yaaherize kucungura abantu be omu buhuuku bw’Abanyamisri, akatoorana abanyamurwa kuheereza aha ihema ry’okubugabuganiramu. Abaleevi bakaheebwa obujunaanizibwa bw’okukora emirimo endiijo eine akakwate n’eihema ry’okubugabuganiramu eririkwera. Mbwenu shi abaabaire nibaheereza omu ihema ry’okubugabuganiramu, nari abaabaire nibatuura haihi naryo, nibo Yehova yaabaire naareeberera gye okukira abandi? Ngaaha! Yehova tarikushoroora.
12. Yehova nk’Omutaayaayisa w’eihanga risya eri yaabaire aherize kutandikaho akooreka ata ngu tarikushoroora? (Okuruga 40:38) (Reeba n’ekishushani.)
12 Buri Mwisraeli akaba naabaasa kuba munywani wa Yehova, oyihireho obujunaanizibwa obu yaabaire aine nari ahu yaabaire naatuura. Nk’eky’okureeberaho, Yehova akahamya ngu eihanga ryona niribaasa kureeba enyomyo y’ekicu n’enyomyo y’omuriro ebyabaire biri ahaiguruy’eihema ry’okubugabuganiramu. (Shoma Okuruga 40:38.) Ekicu ku kyabaire kitandika kugyenda, n’abaabaire nibatuura hare n’eihema ry’okubugabuganiramu bakaba nibabaasa kukireeba, barundaana ebintu byabo, bakuba amahema gaabo kandi bagyenda n’abantu abandi. (Kub. 9:15-23) Boona bakaba nibahurira okugamba kw’enzamba ibiri ez’efeeza kubamanyisa ngu baine kutandika orugyendo. (Kub. 10:2) Kwonka, okutuura haihi n’eihema ry’okubugabuganiramu, kikaba kitarikumanyisa okugira omukago murungi na Yehova. Kureka, buri omwe omu ihanga eri Yehova yaabaire aherize kutandikaho, akaba naabaasa kuba omugyenyi we arikuhamiza kimwe ngu naija kutunga obuhabuzi hamwe n’oburinzi. Nikyo kimwe obunaku obu, hoona ahu turikutuura nitubaasa kugira obwesigye ngu Yehova naatukunda, naatureeberera kandi naaturinda.
Entebeekanisa ya Ruhanga eya eihema ekooreka ngu tarikushoroora (Reeba akacweka 12)
YEHOVA TARIKUSHOROORA OBUNAKU OBU
13. Ni muringo ki gumwe oku Yehova arikworeka ngu tarikushoroora obunaku obu?
13 Abaheereza ba Ruhanga abamwe nibatuura haihi na ofiisi y’eitaagi nari ofiisi enkuru ey’Abajurizi ba Yehova. Abandi nibaheereza omu myanya egyo. N’ahabw’ekyo, nibeejumba omu mirimo etari emwe erikukorwa omu myanya egyo kandi nibaba bari hamwe n’abaine obujunaanizibwa. Abamwe n’abareeberezi ba saketi nari bari omu buheereza obundi obw’omutaano. Ku oraabe otari mu buheereza nk’obwo, gira obwesigye ngu Yehova Omutaayaayisa waitu, naakunda abagyenyi be boona. Kandi boona nabareeberera. (1 Pet. 5:7) Abaheereza ba Ruhanga nibatunga eby’okurya by’omwoyo, obuhabuzi, n’oburinzi oburikwetengyesa.
14. Ni muringo ki ogundi ogurikworeka ngu Yehova n’Omutaayaayisa otarikushoroora?
14 Ekindi ekirikworeka ngu Yehova n’Omutaayaayisa otarikushoroora, n’okugira ngu naabaasisa abantu omu nsi yoona kutunga Baibuli. Ebyahandiikirwe Ebirikwera bikabanza kuhandiikwa omu Ruheburaayo, Oruramaika, n’Orugriika. Mbwenu shi abarikubaasa kushoma endimi ezi Baibuli yaabandize kuhandiikwamu baine omukago guhami na Yehova okukira abatarikubaasa kuzishoma? Ngaaha, tikwo kiri.—Mat. 11:25.
15. Niki ekirikutuhamiza ngu Yehova tarikushoroora? (Reeba n’ekishushani.)
15 Okusiimwa Yehova tikirikurugiirira aha bwegyese obu twine, nari endimi ezi turikumanya. Kureka, Yehova naabaasisa abantu omu nsi yoona yaaba bashomire nari batashomire kugasirwa omu bwengye bwe. Ekigambo kye Baibuli, kivuunwirwe omu ndimi nyingi kugira ngu abantuomu nsi yoona babaase kugasirwa omu bi kirikwegyesa kandi beegye oku barikubaasa kuba banywani ba Yehova.—2 Tim. 3:16, 17.
Baibuli okuvunuurwa omu ndimi nyingi nikyoreka kita ngu Ruhanga tarikushoroora? (Reeba akacweka 15)
MUGUME ‘NIMUSIIMWA’ AHARI YEHOVA
16. Kurugiirira aha Ebyakozirwe 10:34, 35, nitubaasa kukora ki kuguma nitusiimwa Yehova?
16 Ka n’omugisha gw’omutaano kuba abagyenyi ba Yehova omu ihema rye ery’akamanyiso! Niwe Mutaayaayisa orikukirayo embabazi, rukundo n’obufura. Tarikushoroora, kureka naayakiira buri omwe atarikwihirira ahu arikuruga, obwegyese bwe, erangi ye, oruganda rwe, emyaka nari obuhangwa bwe. Kwonka, naayakiira abo bonka abarikukora ebirikuhikaana n’emitindo ye kuba abagyenyi be.—Shoma Ebyakozirwe 10:34, 35.
17. Nitubaasa kumanya tuta ebirikukiraho aha bikwatiraine n’okuba omugyenyi omu eihema rya Yehova?
17 Nk’oku kirikworekwa omuri Zaaburi 15:1, Daudi akabuuza ati: ‘[Yehova,] n’oha oriraara omu ihema ryawe? N’oha orituura aha kibungo kyawe ekirikwera?’ Omuhandiiki wa zaaburi akahwerwa kuhandiika eby’okugarukamu by’ebibuuzo ebyo. Ekicweka ekirikukurataho nikiza kworeka ebintu bimwe ebi twine kukora kuguma nitusiimwa Yehova.
EKYESHONGORO 32 Guma Ohamiire Ahari Yehova!
