NKHANI YAKUPFUNZA 23
NYIMBO 28 Kukhala Xamwali wa Yahova
Yahova Akukucemerani Kuti Mukhale Alendo Wace
“Tendi langu lin’dzakhala pakati pawo, [ndipo] ine nin’dzakhala Mulungu wawo.” — EZEKIYELI 37:27.
CAKULINGA CA NKHANIYI
Nkhaniyi in’tithandiza kuthumizira kutenda kwathu mcemo omwe Yahova watipasa wakuti tikhale alendo mu tendi lace lakuyezezera na bzomwe iye ambaticitira pakukhala alendo wace.
1-2. Kodi ni mcemo uponi omwe Yahova ambaucita kwa atumiki wace wakukhulupirika?
MUNTHU acikubvunzani kuti Yahova ni mbani kwa imwepo, kodi mungamutawire tani? Pinango mungamutawire kuti: ‘Iye ni Pai wangu, Mulungu wangu na Xamwali wangu.’ Yalipo pomwe madzina manango ya udindo yomwe mungacemere nayo Yahova. Tsono kodi mudakumbuka kalembo kuti ndimwe mulendo wace?
2 Pomwe Davide akhafotokoza bza uxamwali bomwe Yahova ambakhala nabo na atumiki wace wakukhulupirika, iye adandendemezera Yahovayo na mwenekaciro mui ndipo atumiki wace ninga alendo wace. Davide adabvunza kuti: “Imwe Yahova, kodi ni mbani omwe angakhale mulendo mu tendi mwanu? Mbani omwe angakhale m’phiri lanu lakucena?” (Salimo 15:1) Vesi limweri likutithandiza kubvesesa kuti ifepano tingakhale alendo mu tendi la Yahova ayai tingakhale axamwali wace. Kulewa cadidi, umweyu ni mcemo wabwino kwene-kwene omwe Yahova akutipasa.
YAHOVA AKUFUNA KUTI IFEPANO TIKHALE ALENDO WACE
3. Mbani omwe adakhala mulendo wakuyamba mu tendi la Yahova, ndipo kodi awiriwo adabva tani na bzimwebzi?
3 Pomwe Yahova akhanati kulenga cinthu ciri-centse, iye akhali yekha. Tsono iye adadzalenga Mwana wace wakuyamba. Bzidakhala ninga kuti Yahova, omwe ni mwenekaciro mui, wacemera mulendo wace wakuyamba kuti apite mu tendi lace. Yahova adakomedwa kwene-kwene na bzimwebzi. Bibliya limbalewa kuti iye ‘akhamufuna kwene-kwene’ Mwana wace. Ndipo Mwanayombo ‘akhakomedwa kukhala naye pabodzi nthawe zentse.’ — Mimwani 8:30.
4. Kodi ni mbani winango omwe Yahova adawacemerambo kuti akhale mu tendi mwace?
4 Patsogolo pace, Yahova adadzalenga anjo azinji ndipo iwo adakhalambo alendo wace. Anjo ambacemeredwa “wana wa Mulungu” ndipo ambalewedwa m’Bibliya kuti ambakomedwa kwene-kwene kukhala pabodzi na Yahova. (Djobi 38:7; Daniyeli 7:10) Padapita magole mazinji kwene-kwene pomwe alendo wa Yahova akhakhala kudzulu basi. Tsono, Yahova adadzathumizira tendi lace kuti wanthu wa pa dziko la pantsi akhalembo alendo wace. Winango mwa alendo amwewa akhali Inoki, Nowa, Abalahamu na Djobi. Bibliya limbalewa kuti iwo akhali axamwali wa Mulungu thangwe rakuti adamubvera ndipo adafamba “na Mulungu wacadidi.” — Genesesi 5:24; 6:9; Djobi 29:4; Zaiya 41:8.
5. Kodi tingapfunze ciyani na polofesiya yomwe iri pa Ezekiyeli 37:26, 27?
5 Papita magole mazinji ndipo Yahova akupitiriza kucemera axamwali wace kuti akhale alendo wace. (Werengani Ezekiyeli 37:26, 27.) Mwa ciratizo, mu polofesiya ya Ezekiyeli ifepano timbapfunza kuti Yahova an’funa kuti atumiki wace akhale pa uxamwali bwakulimba na iye. Iye akupicira kucita nawo “mpangano wa mtendere.” Polofesiyayi imbalewa bza nthawe yomwe wale omwe ana cidikhiro ca kukakhala kudzulu pabodzi na wale omwe an’dzakhala pa dziko la pantsi an’dzakhala pabodzi mu tendi lace ninga “thimu libodzi” la mabira. (Juwau 10:16) Polofesiya imweyi ikukwanisika ntsiku zino!
YAHOVA AMBATISAMALIRA KULI-KWENTSE KOMWE TINGAKHALE
6. Kodi munthu ambakhala tani mulendo mu tendi la Yahova, ndipo tendi limweri liri kuponi?
6 Kale-kale tendi ikhali mbuto yomwe munthu akhapuma na kukhala wakukhotcerereka nyengo ikakhala kuti iri lini bwino. Mulendo omwe wapita mu tendi akhakhala lini na thupo thangwe akhadziwa kuti an’samaliridwa bwino. Tikabzipereka ticikhala pa uxamwali na Yahova, timbakhala alendo mu tendi lace lakuyezezera. (Salimo 61:4) Mu tendi limweri, ifepano timbakhala na cakudya cizinji cauzimu ndipo timbakhalambo pa uxamwali bwabwino na anzathu omwe mbaalendombo wa Yahova. Bziribe basa komwe timbakhala, tentsenefe tingakhale alendo mu tendi la Yahova. Pinango imwepo mudacita kale ulendo muciyenda ku dziko linango, pinango mudayenda kumweko kuti mukagumanike pa mtsonkhano wakupambulika ndipo mudakadziwana na anzanu omwe mbakukondwa thangwe ra kukhala mu tendi la Yahova. Tendi la Yahova liri ku mbuto iri-yentse komwe kuna atumiki wace. — Apokalipse 21:3.
7. Thangwe ranyi tingalewe kuti atumiki wa Yahova omwe adafa akali alendo mu tendi mwace? (Onani cithunzi-thunzi.)
7 Tsono tani pakulewa bza atumiki wa Yahova omwe adafa kale? Kodi tingalewe kuti iwo akali alendo mu tendi la Yahova? Inde! Thangwe ranyi tikulewa bzimwebzi? Thangwe kwa Yahova wanthu amwewa akana moyo. Jezu adalewa kuti: “Pakulewa bza kumuka kwa anyakufa, Mozeji adanemba bza nkhani ya citsamba ca minga comwe cikhagaka moto. Iye adacemera Yahova kuti: ‘Mulungu wa Abalahamu, Mulungu wa Izaki na Mulungu wa Djakobo.’ Iye ni Mulungu, sikuti wa anyakufa koma wa wanthu wamoyo, thangwe kwa iye wentse ana moyo.” — Luka 20:37, 38.
Napo atumiki wakukhulupirika wa Yahova omwe adafa angawonedwe ninga alendo mu tendi lace (Onani ndime 7)
PHINDU NA UDINDO BWAKUKHALA MU TENDI LA YAHOVA
8. Kodi wale omwe ambakhala alendo mu tendi la Yahova ambakhala na phindu liponi?
8 Ninga momwe tendi limbathandizira munthu kugumana mbuto yakupuma na kuthawira nvula, tendi la Yahova limbathandiza alendo wace kukhala wakukhotcerereka ku ngozi zauzimu ndipo limbawapasambo cidikhiro cakutsogolo. Tikakhala pafupi na Yahova, Sathani angakwanise lini kuticita cinthu comwe cingatidzonge. (Salimo 31:23; 1 Juwau 3:8) Ndipo mu dziko lipsa Yahova an’dzapitiriza kukhotcerera axamwali wace ku ngozi zauzimu na ku infa. — Apokalipse 21:4.
9. Kodi Yahova ambafuna kuti alendo wace acite ciyani?
9 N’cadidi kuti ni mwayi ukulu kwene-kwene kukhala mu tendi la Yahova na kukhalambo pa uxamwali bwakulimba na iye bomwe bun’dzakhala kuyenda na kuyenda. Tsono ninga alendo wace, n’ciyani comwe tin’funika kucita? Imwepo mukacemeredwa ku mui kwa munthu mumbadikhirira kuti iye akuuzeni bzomwe mun’funika kucita. Mwa ciratizo, mwenekaciro mui angafune kuti imwepo mucose ntsapato pomwe mukanati kupita m’nyumba, ndipo imwepo mun’dzabvuma kucita bzimwebzo. Mwakundendemerana na bzimwebzi, ifepanombo tin’funika kudziwa bzomwe Yahova akufuna kuti ticite kuti tipitirize kukhala alendo mu tendi lace. Lufoyi lathu kwa Yahova limbaticitisa kuti ticite ciri-centse comwe tingakwanise kuti ‘timukondwese kwene-kwene.’ (Akolose 1:10) Yahova ni Xamwali wathu, tsono tin’funikambo kukumbukira kuti iye ni Mulungu wathu na Pai wathu, ndipopa tin’funika kumbamulemekeza kwene-kwene. (Salimo 25:14) Tin’funika kumbamugopa kwene-kwene Yahova ticimbakumbukira kuti iye ni mbani. Kucita bzimwebzi kun’dzatithandiza kuti tileke kucita cinthu ciri-centse comwe cingamusunamise. Kulewa cadidi ifepano tin’funika ‘kufamba mwakubzicepesa’ na Mulungu wathu. — Mika 6:8.
YAHOVA ADALATIZA KUSAYA TSANKHULO KWA AJIRAYERI MU DAMBO
10-11. Kodi Yahova adalatiza tani kuti alibe tsankhulo pomwe Ajirayeri akhali mu dambo la Sinai?
10 Yahova ambacita bzinthu na alendo wace mwakusaya tsankhulo. (Aroma 2:11) Ifepano tingabvesese kusaya tsankhulo kwa Yahova tikakumbukira momwe iye adacitira bzinthu na Ajirayeri pomwe akhali mu dambo la Sinai.
11 Pomwe Yahova adatsudzula Ajirayeri ku ukapolo m’dziko la Edjipito, iye adaikha antsembe kuti ambatumikire pa tendi la mkonkhano. Alevi adasankhulidwa kuti ambacite mabasa manango pa tendi la mkonkhanolo. Kodi wale omwe akhatumikira pa tendi la mkonkhanolo na omwe akhakhala pafupi na tendi la mkonkhanolo akhasamaliridwa bwino kuposa anzawo? Ne! Wentse akhasamaliridwa mwakundendemerana thangwe Yahova alibe tsankhulo.
12. Kodi Yahova adalatiza tani kusaya tsankhulo na momwe adacitira bzinthu na Ajirayeri m’dambo? (Ekisodo 40:38) (Onani cithunzi-thunzi.)
12 Mjirayeri ali-wentse akhana mwayi wakukhala pa uxamwali bwakulimba na Yahova bziribe basa penu akhadapasidwa utumiki bwakupambulika, tendi lace likhali pafupi na tendi la mkonkhano ayai likhali kutali. Mwa ciratizo, Yahova adacitisa kuti Ajirayeri wentse akwanise kuwona bzinthu bzakudabwisa bzomwe bzikhali mtambo masikati na moto usiku bzomwe bzikhakhala padzulu pa tendi la mkonkhanolo. (Werengani Ekisodo 40:38.) Mtambo ukayamba kufamba napo wale omwe akhakhala kutali na tendiro akhakwanisa kuuwona. Tenepo, mabanja yakhakwanisa kulongedza bzombo bzawo, kuzula matendi yawo acicoka pabodzi na anzawo. (Numero 9:15-23) Ndipo wentse akhakwanisa kubva kulira kwa bzimbututu bziwiri bza prata bzomwe bzikhadziwisa wanthuwo kuti akhafunika kuyamba kucita ulendo. (Numero 10:2) Bzikuwonekeratu padeca kuti kukhala pafupi na tendi la mkonkhano kukhacitisa lini munthu kukhala pa uxamwali bwakulimba na Yahova kuposa wale omwe akhakhala kutali. M’mbuto mwace, Ajirayeri wentse angadakwanisa kukhala alendo wa Yahova acitambira malango yace na kukhala wakukhotcereredwa na iye. Mwakundendemerana na bzimwebzi, ntsiku zino Yahova ambatifuna, ambatisamalira ndipo ambatikhotcerera bziribe basa komwe ifepano tingakhale.
Tendi la mkonkhano lomwe likhakhala pakati pa tsasa likhalatiza padeca kuti Yahova alibe tsankhulo (Onani ndime 12)
KUSAYA TSANKHULO KWA YAHOVA NTSIKU ZINO
13. Kodi Yahova ambalatiza tani kuti alibe tsankhulo ntsiku zino?
13 Atumiki winango wa Mulungu ntsiku zino ambakhala pafupi na likulu lathu la pa dziko lentse ayai na mthambi ya Mboni za Yahova. Ndipo winango ambatumikira m’mbuto zimwezi. Ndipopa azinji wa iwo ambathandizira mabasa yakusiyana-siyana yomwe yambacitika m’mbuto zimwezi ndipo ambacitambo bzinthu na abale omwe ambatsogolera. Winango ambatumikira ninga anyakunyang’anira dera ayai kucita utumiki bwa nthawe zentse bwa mtundu unango. Tsono penu imwepo ndimwe m’bodzi mwa azinji omwe alibe mwayi umweyu, khalani na citsimikizo cakuti Yahova ambafuna alendo wace wentse omwe adawabvumiza kukhala mu tendi mwace kuphatanidzambo imwepo. Ndipo iye an’dzakupasani bzentse bzomwe mukufunikira. (1 Pedru 5:7) Atumiki wentse wa Mulungu ambatambira cakudya cauzimu, malango ndipo ambakhotcereredwa na iye.
14. Kodi n’ciyani cinango comwe cimbalatiza kuti Yahova alibe tsankhulo ntsiku zino?
14 Cinthu cinango comwe Yahova akucita kuti alatize kuti alibe tsankhulo n’cakuti iye akucitisa kuti Bibliya ligumanike m’bzirewedwe bzakusiyana-siyana kuzungulira pa dziko lentse la pantsi. Bibliya lidanembedwa mu bzirewedwe bzitatu: Cihebereu, Ciaramaiko na Cigerego. Kodi wale omwe ambawerenga Bibliya m’bzirewedwe bzimwebzi ndiwo omwe ali pa uxamwali bwakulimba na Yahova kuposa wale omwe ambalewa-lewa lini bzirewedwe bzimwebzi? Ne, ndibzo lini. — Mateu 11:25.
15. Kodi ni umboni buponi bomwe tinabo bomwe bumbalatiza kuti Yahova alibe tsankhulo? (Onani cithunzi-thunzi.)
15 Kuti tikhale atumiki wa Yahova tin’funika lini kupfunza kwene-kwene ayai kudziwa bzirewedwe bzomwe bzidaphatisidwa basa pakunemba Bibliya. Yahova ambacitisa kuti wanthu wentse kuzungulira pa dziko lentse la pantsi adziwe nzeru zace bziribe basa penu iwo adapfunza kwene-kwene ayai alibe kupfunza. Fala la Mulungu, Bibliya, lidasanduliziridwa m’bzirewedwe bzizinji ndipo bzimwebzi bzimbacitisa kuti wanthu wentse awone kuti mpsabwino kubvera bzomwe iye ambapfunzisa acikhala axamwali wace. — 2 Timotio 3:16, 17.
Kodi kusanduliziridwa kwa Bibliya m’bzirewedwe bzakusiyana-siyana kumbalatiza tani kuti Yahova alibe tsankhulo? (Onani ndime 15)
PITIRIZANI KUKHALA ALENDO WA YAHOVA
16. Mwakubverana na Mabasa 10:34, 35, n’ciyani comwe tin’funika kucita kuti tipitirize kukhala alendo wa Yahova?
16 Ni mwayi ukulu kwene-kwene kwa ifepano kucemeredwa na Yahova kuti tikhale alendo mu tendi mwace. Yahova ni Munthu wabwino omwe ambatambira bwino alendo ndipo ngwa lufoyi. Kuthumizira bzimwebzi, iye alibe tsankhulo, iye ambatambira wanthu wentse bziribe basa komwe iwo ambakhala, cikhalidwe cawo, penu adapfunza ayai ne, mtundu wawo, dzinza lawo, msinkhu wawo na penu mbaamuna ayai akazi. Tsono wale omwe ambabvera Yahova ndiwo okha omwe ambabvumizidwa kukhala alendo wace. — Werengani Mabasa 10:34, 35.
17. Kodi tin’dzacezerana ciyani mu nkhani ikubwerayi?
17 Ninga momwe cimbalatizira cinembo ca Salimo 15:1, Davide adabvunza kuti: “Imwe Yahova, kodi ni mbani omwe angakhale mulendo mu tendi mwanu? Mbani omwe angakhale m’phiri lanu lakucena?” Yahova adaphatisa basa Davide yekha-yekhayo kuti atawire mibvunzo imweyi. Mu nkhani ikubwerayi, tin’dzacezerana bzinthu bzomwe tin’funika kucita kuti tipitirize kukhala mu tendi la Yahova.
NYIMBO 32 Khalani ku Mbali ya Yahova!
