1-2. Ngimba lusako luliku ulu Yehova ikubapa ababombi bake?

 LINGA yumo ikubalalusya ukuti, ‘ngimba Yehova yonani winu?’ Ngimba mubaghile ukwamula bulebule? Lumo mubaghile ukwamula ukuti, ‘Yehova yo Tata wangu, yo Kyala wangu kangi Mmanyani wangu. Loli ngimba musimenye ukuti Yehova afwene itolo numundu uyu ikulonda ukuti muye nhesya wake?

² Umwalafyale Davidi afwanikisye muno buyilile ubumanyani bwa Yehova nababombi bake abasubiliwa, nubumanyani ubu bukuyapo pakati pa mwenenyumba nabahesya bake. Umwene atile: “We Yehova, ywani uyu ikwitughalagha mu hema lyako? Ywani uyu ikuyangapo pa kyamba kyako ikikemo?” (Sal. 15:1) Pivesi ili, tukumanyilapo ukuti tubaghile ukuya bahesya mu hema lya Yehova pamo ukuti bamanyani bake. Ulu lusako lunywamu fiyo.

YEHOVA IKULONDA UKUTI TUYE BAHESYA BAKE

3. Ngimba unhesya wakwanda uwa Yehova ali yonani, kangi Yehova nunhesya wake bikwipilika bulebule?

³ Bo akali ukwanda ukupela ifindu fyosa, Yehova ali mwene. Ukufuma apo, alimpelile Umwanake uwakwanda. Yehova ali bo wakwambilila abahesya uyu alinkolile unhesya wake uwakwanda mu hema lyake. Kangi ali walusekelo fiyo ukubomba isi. Ibaibolo likuyoba ukuti, Yehova ‘alinkwikyela’ Numwanake. Kangi yope Umwanake, alinkuya ‘nulusekelo mwa [Yehova] bwila itolo.’—Mbu. 8:30.

4. Ngimba bo banani abangi aba Yehova abakolile ukuti baye bahesya mu hema lyake?

⁴ Ukufuma apo, Yehova alyandile ukupela abandumi, kangi bope abakolile ukuti baye bahesya bake. Ibaibolo likubayoba abandumi aba ukuti “bana ba Kyala” kangi bikunangisya ukuti bikuhoboka fiyo ukubomba pampene na Yehova. (Jobu 38:7; Dan. 7:10) Kwa fyinja fingi, abamanyani ba Kyala bali kumwanya  kwene. Ukufuma apo, abapelile abandu pakisu, kangi bope babaghile ukuya bahesya bake. Bamo mwa bahesya bake aba yo Enoki, Nowa, Abrahamu na Yobu. Ababombi banaloli aba, bayobiwagha ukuti bamanyani ba Kyala pamo ukuti bendagha ‘na Kyala wanaloli.’—Bwa. 5:24; 6:9; Jobu 29:4; Yes. 41:8.

5. Ngimba tubaghile ukumanyilako isyafiki ku busololi ubu bukwaghiwa pa Ezekieli 37:​26, 27?

⁵ Kwa fyinja fingi, Yehova akindilile ukubakolela abamanyani bake ukuti baye bahesya bake. (Belenga Ezekieli 37:​26, 27.) Mwakifwanikisyo, mbusololi bwa Ezekieli tukumanyila ukuti Kyala ikulonda ukuti ababombi bake abasubiliwa baye pabumanyani ubununu numwene. Umwene atile, “nisakufingana nabo ulufingo lwa lutengano.” Ubusololi ubu bukuyoba isya kabalilo aka abandu aba bali nulusubilo lwakwisakwikala kumwanya nulwakwisakwikala pakisu kyapasi, bisakuya bakukolelana mu hema lyake ilyakufwanikisya pakuya “ntimo ghumowene.” (Yoh. 10:16) Syo isi sikubombiwa lino.

KYALA IKUTUPWELELELA KULIKOSA KUNO TULIKO

6. Ngimba umundu abaghile ukuya bulebule nhesya mu hema lya Yehova kangi ngimba ihema lya Yehova likwaghiwa kughu?

⁶ Nkabalilo kakunyuma, ihema ghayagha malo agha umundu atusyangamo kangi ghamfighililagha kumbelo. Linga unhesya afikile mu hema lya mundu yumo, amanyagha ukuti umwenehema ikuya pakumpwelelela kanunu. Linga twiyipile kwa Yehova nukosiwa, tukuya bahesya mu hema lyake ilyakufwanikisya. (Sal. 61:4) Tukuhoboka nifyakulya fingi ifyamwambepo kangi tukuya pabumanyani nabangi aba bope bahesya ba Yehova. Ihema lyake ilyakufwanikisya likaya pamalo ghamoghene. Linga mwabukileko nkisu ikingi ukuti mukaye nabo palukomano ulwapadela, mubaghile ukuti mwalyaghene na bandu abangi aba bikuhoboka ukuya mu hema lya Kyala. Ihema lya Yehova libaghile ukwaghiwa kulikosa kuno ababombi bake abasubiliwa baliko.—Ubuset. 21:3.

7. Nongwa yafiki tubaghile ukuyoba ukuti abandu abasubiliwa aba bafwile bikukindilila ukuya bahesya mu hema lya Yehova? (Keta kangi ikithuzi.)

⁷ Bule pakuyoba isya bandu abasubiliwa aba bafwile? Ngimba tubaghile ukuyoba mwakusimikisya ukuti bikukindilila ukuya bahesya mu hema lya Yehova? Ena. Nongwa yafiki tukuyoba bo ulu? Panongwa yakuti Yehova ikubakumbuka. Yesu atile: “Loli isyakuti abafwe bikusyuka, yope na yu Mose asinangisye pakisyanju (ikipiki iki kyakagha) pala, apa ikunjoba Yehova ukuya ‘yo Kyala wa Abrahamu, Kyala wa Isaka kangi ukuya yo Kyala wa Yakobu.’ Umwene akaya yo Kyala wa bafwe, loli wa  bumi, buno bosa itolo bumi kumyake.”—Luka 20:​37, 38.

ULUSAYO ULU TUKULWAGHA NA ISI TUKULONDIWA UKUBOMBA

8. Ngimba tukusayiwa bulebule panongwa yakuya mu hema lya Yehova?

⁸ Ihema lya Yehova likubafighilila abahesya bake ku kindu kilikyosa iki kibaghile ukonanga ubumanyani bwabo numwene, kangi ikubapa ulusubilo lwanaloli ulwa nkyeni. Linga tukukindilila ukuya pabumanyani ubwamaka na Yehova, Setano akabaghila ukubomba kilikyosa ukuti atufulasye. (Sal. 31:23; 1 Yoh. 3:8) Nkisu ikipya, Yehova isakukindilila ukubafighilila abamanyani bake abasubiliwa ukuti bangafulalagha mwambepo nakumbili.—Ubuset. 21:4.

9. Ngimba Yehova ikulonda ukuti abahesya bake babombeghe isyafiki?

⁹ Bwanaloli ukuti tuli nulusako ulunywamu fiyo ukuya bahesya mu hema lya Yehova. Tubaghile ukuya nawe pabumanyani ubwamaka kwa bwila na bwila. Ngimba tukulondiwa ukubomba isyafiki ukuti tukindilile ukuya bahesya bake? Linga babakolile ku nyumba ya mundu yumo, mubaghile ukulonda ukumanya isi umwene ikulonda ukuti mubombe. Mwakifwanikisyo, lumo abaghile ukulonda ukuti mufule isapato (ifilato) bo mukali ukwingila nnyumba kangi syo isi mubaghile ukubomba. Mwakufwana itolo, nanuswe tukulondiwa ukumanya isi Yehova ikulonda ukuti tubombeghe ukuti tukindilile ukuya bahesya mu hema lyake. Ulughano lwitu kwa Yehova lukutupangisya ukuti tubombeghe kilikyosa iki tubaghile ukufwanisya ukuti ‘tunhobosyeghe.’ (Kolos. 1:10) Bwanaloli ukuti Yehova Mmanyani witu, loli tusimenye kangi ukuti yo Kyala kangi yo Tata witu, uyu ikulonda ukuti tungindikeghe fiyo. (Sal. 25:14) Tungibwagha ifundo iyi kangi akabalilo kosa tunangisyeghe ukuti tukungindika. Linga tukumpa ulughindiko bo ulu, sikuya pakututula ukuti tungabombagha utuyilo utubibi utu tubaghile ukunkalalisya. Akabalilo kosa tukulonda ‘ukwenda mwakwiyisya’ na Kyala witu.—Mika 6:8.

YEHOVA ABABOMBELAGHA IFINDU ABAISRAELI KISITA KUSALA

10-11. Ngimba muno Yehova abombile ifindu na Baisraeli ndungalangala lwa Sinai, syanangisye bulebule ukuti atikusala?

¹⁰ Yehova atikusala linga ikubomba ifindu nabamanyani bake. (Rom. 2:11) Tubaghile ukumanyilako isi ukufwana namuno abombile ifindu na Baisraeli ndungalangala lwa Sinai.

¹¹ Bo abapokile abandu bake kubutumwa ku Egiputi, Yehova asalile abaputi ukuti babombeghe pihema. Kangi abasalile Abanyalevi ukuti babombeghe imbombo isingi pihema. Ngimba Yehova abapwelelelagha fiyo aba babombagha pihema pamo aba bali pabupipi nihema ukukinda abangi? Hayi. Yehova atikusala.

12. Ngimba Yehova anangisye bulebule kukikolo ikipya ikya Baisraeli ukuti atikusala? (Ukusoka 40:38) (Keta kangi ikithuzi.)

¹² Umuisraeli aliwesa abaghile ukuya pabumanyani na Yehova kisitakweghela ukuti abombagha pihema pamo ikalagha pabupipi nihema. Mwakifwanikisyo, Yehova apangisye ukuti ifikolo fyosa fifwanisyeghe ukulibona ibingu ilyakuswighisya nibingu lya moto ili lyali pamwanya pihema. (Belenga Ukusoka 40:38.) Linga ibingu lyandile ukwenda nukubuka ku malo aghangi, bosa bafwanisyagha ukulibona nalinga bo aba bali kubutali. Ukufuma apo, babunganiagha ifindu fyabo, bawisyagha amahema, nukwanda ukwenda pampene. (Kuba. 9:​15-23) Abandu bosa bapilikagha ukulila kwa ngangabwite ibili isya siliva  isi syabamanyisyagha ukuti bande ukwenda. (Kuba. 10:2) Linga umundu ikwikala kubupipi nihema, sikasanusyagha ukuti ali pabumanyani na Yehova ukukinda aba bikalagha kubutali nihema. Yonongwa yake, Umuisraeli aliwesa abaghile ukuya nhesya wa Yehova nukuya nulusubilo losa ukuti ikuya pakumfighilila. Mwakufwana itolo namasiku agha, kisita kweghela kuno tukwikala pakisu kyapasi, Yehova atughanile twesa, ikutupwelelela kangi ikutufighilila.

IFIFWANIKISYO FYA MASIKU AGHA IFI FIKUNANGISYA UKUTI YEHOVA ATIKUSALA

13. Ngimba njila yimo yiliku iyi yikunangisya ukuti Yehova atikusala amasiku agha?

¹³ Amasiku agha, ababombi ba Kyala bamo bikwikala kubupipi niofesi yitu inywamu pakisu kyosa iya Baketi ba Yehova pamo kubupipi niofesi ya nkisu kyabo. Bamo bikubomba ububombeli ku malo agha. Yonongwa yake abandu bo aba bikubomba imbombo nyingi kangi bikukolelana na aba bikulongosya. Bamo bakwendela idela kangi abangi bikubomba ububombeli bwa padela ubwa kabalilo kosa. Nalinga ukuti mukaya mbubombeli bo ubu, loli mubaghile ukuya nulusubilo losa ukuti muli bahesya ba Yehova kangi umwene abaghanile fiyo. Umwene ammenye umundu aliwesa pamwene kangi ikumpa isi ikulonda. (1 Pet. 5:7) Yehova ikubapa ifyakulya fyamwambepo ababombi bake bosa kangi ikubalongosya nukubafighilila.

14. Ngimba njila yiliku iyingi iyi yikunangisya ukuti Yehova atikusala?

¹⁴ Injila iyingi iyi yikunangisya ukuti Yehova atikusala, ko kuketesya ukuti umundu aliwesa pakisu kyapasi ali ni Baibolo. Pakwanda Amalemba Amikemo ghaghiwagha itolo munjobelo sitatu: Ikihiburi, Ikiaramu na mu Kigiriki. Ngimba abandu aba babelengagha injobelo isyabwandilo isya mu Baibolo bo aba bali pabumanyani ubwamaka na Yehova ukukinda aba bakabelengagha? Hayi.—Mat. 11:25.

15. Ngimba findu fiki fikunangisya ukuti Yehova atikusala? (Keta kangi ikithuzi.)

 ¹⁵ Yehova atikutukolela ukuti tuye bamanyani bake pene panongwa yakuti tumanyile fiyo pamo tumenye ukuyoba injobelo simo. Yehova ikubapa amahala ghake abandu bosa pakisu kyapasi kali bamanyile fiyo pamo hayi. Amasyu ghake, Ibaibolo, ghasanusiwe munjobelo nyingi ukuti abandu pakisu kyosa bapilikisyeghe kanunu ifimanyisyo fyake nukumanyila muno babaghile ukuyila nawe pabumanyani.—2 Tim. 3:​16, 17.

AMUKINDILILEGHE UKUYA BAHESYA BA YEHOVA

16. Ukufwana nilemba lya Imbombo sya Batumiwa 10:​34, 35, ngimba tubaghile ukukindilila bulebule ukuya bahesya ba Yehova?

¹⁶ Tuli nulusako ulunywamu fiyo ukwambililiwa na Yehova ukuti tuye bahesya mu hema lyake ilyakufwanikisya. Umwene wakisa, walughano kangi ikwambilila abahesya ukukinda umundu aliwesa. Ikyakulondiwa fiyo, umwene atikusala. Ikumwambilila umundu aliwesa kisita kweghela kuno ikwikala, ifimanyilo, uluko, inyiho, ifyinja pamo ukuti nnyambala pamo nkikulu. Loli Yehova ikubambilila bene aba bikumpilikila.—Belenga Imbombo sya Batumiwa 10:​34, 35.

17. Ngimba tubaghile ukusyagha kughu ifundo isyakongelela isyakufwana nukuya bahesya mu hema lya Yehova?

¹⁷ Bo muno pikuyobela pa Salimo 15:​1, Davidi alalusisye ukuti: “We Yehova, ywani uyu ikwitughalagha mu hema lyako? Ywani uyu ikuyangapo pa kyamba kyako ikikemo?” Yehova alimbombesyile Davidi ukwamula amalalusyo agha mu chaputala 15 kya Salimo. Munkhani iyakukongapo, twisakuyobesania ifindu fimo ifi tukulondiwa ukubomba ukuti tunhobosyeghe Yehova nukukindilila ukuya bamanyani bake.