1-2. A Jehovah ngngera el invitation a lomesterir a reblak a rengrir el mengull er ngii?

 NGERA moktek er a Jehovah er a klengar er kau? Ke locha mo onger el kmo, ‘A Jehovah Demak, Dios er ngak, e Sechelik.’ E locha ngar ngii a lmuut el bebil er a tekoi er a klengar er kau el mousbech el mesaod er a Jehovah. Engdi kau, ke dirrek el lomes er ngii el Host er kau?

² King David a ulemekesiu er a deleuill er a Jehovah lobengterir a reblak a rengrir el mesiungel el mora host me a re guest er ngii. Ngdilu el kmo: “Jehovah, ngtecha sebechel mo guest er a tento er kau? Ngtecha sebechel mo kiei er a chedaol el bukl er kau?” (Psa. 15:​1, NW) Kede suub er aika el mlukreng el tekoi el kmo ngsebeched el mo guest er a Jehovah, ngsebeched el mo sechelil. Tia ngdiak el kmal ileakl el invitation el mlara Jehovah?

JEHOVAH A SOAL A BO DE GUEST ER NGII

3. Ngtecha mle kot el guest er a Jehovah, e ngera mle uldesuel a Jehovah me a guest er ngii el kirel a tang me a tang?

³ A uchei er a lomeob a Jehovah engdi mle ngii el tang. Ngmilebii a ketengel el Sechal. Me a Jehovah mlo uai a Host el  mle invite er a kot el guest el mei er a tento er ngii, e kmal mle dmeu a rengul el meruul el uaisei. A Biblia kmo a Ngelekel a “mle uchul a deuil a rengul.” Me ngika el kot el guest er ngii a mle “blechoel el dmeu a [rengul] el ngar medal [a Jehovah].”—Osi. 8:30.

4. Ngtecha dirrek el mlo guest er a tento er a Jehovah?

⁴ A Jehovah a ulemeob er a relmuut el bebil er a anghel e dirrek el mle invite er tir el mo guest er ngii. A rechanghel er ngii okedongall el “ngelekel a Dios” me a Biblia melekoi el kmo ngdmeu a rengrir lobengkel a Jehovah. (Job 38:​7, NW; Dan. 7:10) Ngmle betok el rak el re guest er a Jehovah di mle tirke el kiei lobengkel er a eanged. A uriul e ngulemeob er a rechad er a beluulechad me te dirrek el mlo guest er a tento er ngii. Cherengel a taem e a re guest er ngii er a beluulechad a mlo uldimukl er a Enok, Noah, Abraham, me a Job. Tirka el mera el milengull er ngii a losaod er tir el kmo te sechelil a Dios e le te ullengesenges er ngii.—Gen. 5:24; 6:​9, 10; Job 29:4; Isa. 41:8.

5. Ngera sebeched el suub er a ulaoch el ngar er a Esekiel 37:​26, 27 (NW)?

⁵ Chelsel aika el betok el dart el rak e a Jehovah melemolem el invite er a resechelil el mo guest er ngii. (Monguiu er a Esekiel 37:​26, 27, NW. a) El ua tiang, kede suubii er a ulochel a Esekiel el kmo a Dios a kmal soal a reblak a rengrir el mesiungel a lebo er ngii a kmes el deleuill er tir el lobengkel. Ngtibir el kmo ngmeruul er a “telbiil er a budech el lobengterir.” Tia el ulaoch a melutk er a taem el tirke el oba omelatk el mora eanged me a re oba omelatk el di kiei er tia el chutem a mo tang e mo “tal delebechel” el ngar cheungel a okesiu el tento er a Jehovah. (Jn. 10:16) Tiang a meketmeklang er chelechang!

NGII DI EL BASIO EL DENGAR NGII E A DIOS A OMEKERREU ER KID

6. Ngmekera chad e mo guest er a tento er a Jehovah, e a tento er a Jehovah ngngar chimo el basio?

⁶ Taem er a Biblia, e a tento er a chad a basio el lebo er ngii e olengull e mukerreu er a kngtil a eanged. Me a guest er tia el tento a mo expect er a host er ngii el mo take care er ngii. Sel detibir a klengar er kid el mora Jehovah e kede mo guest er tia el okesiu el tento er ngii. (Psa. 61:4) Kede oldeu er a rengud er a betok el kall er a klereng me a dirrek el klausechelei er kid lobengterir tirke el dirrek el mla mo  guest er a Jehovah. Engdi tia el tento er a Jehovah diak el ngar er a chimo el basio. Ke locha mla omais el mora ngodech el beluu, el locha mlora special convention e meet er a redmeu a rengrir el ngar er a tento er a Jehovah. A tento er a Jehovah sebeched el metik er ngii er a ngii di el basio el lengar ngii a reblak a rengrir el mesiungel.—Och. 21:3.

7. Ngera uchul me ngsebeched el melekoi el kmo tirke el uleba blakerreng el mla mad a dirk guest er a tento er a Jehovah? (Dirrek el momes er a siasing.)

⁷ E kuk mekerang tirke el uleba blakerreng el mla mad? Te dirk guest er a tento er a Jehovah? Chochoi! Ngera uchul me ngsebeched el melekoi el uaisei? E le te dirk chad er osengel. A Jesus a dilu el kmo: “A Moses a mle bleketakl el olecholt el kmo a rulekoad a mo mekiis el mo ngar. Ngar a ikel el bades el kirel sel kilard el kerrekar e ng melekoi er a Rubak el kmo, ‘Ng Dios er a Abraham, e Dios er a Isak, e Dios er a Jakob.’ Ma Dios a diak le Dios er a rulekoad; ng bai Dios er a re di ngar, ele ng medengei el kmo te rokui el di ngar.”—Lk. 20:​37, 38.

NGNGAR NGII A KLUNGIAOL ME A NGERECHELED

8. Ngera el klungiaol a lengai a re guest er a Jehovah?

⁸ Ngdi ua tento el basio er a ulengull e omekerreu er kid er a kngtil a eanged, a okesiu el tento er a Jehovah mesterir a re guest er ngii a ulekerreu er aike el mo melemall er tir er a klereng e mesterir omelatk el kirel a ngar medad. Sel dolemolem el kmeed er a Jehovah e a Satan a diak el sebechel el rullii a tekoi el mo uchul a telemelled el diak a ulebengelel. (Psa. 31:23; 1 Jn. 3:8) A beches el blekeradel e a Jehovah diak di bo lolemolem el omekerreu er a reblak a rengrir el sechelil er aike el mo melemall er tir er a klereng ngdirrek el mo omekerreu er tir er a kodall.—Och. 21:4.

9. A Jehovah ngera ngmengerechir er a re guest er ngii?

⁹ Ngmera el chetengakl a bo de guest er a tento er a Jehovah, el mo er ngii a kmes el deleuill er kid me ngii e sebechel el melemolem el mo cherechar. Ngkirel mo uangerang a blekerdeled a lsekum ngsoad el melemolem el guest er ngii? A lsekum a chad a invite er kau el mora blil e ngsoam el mo medengei el kmo ngngera soal me a chetil. El ua tiang, nglocha mo dmu er kau me ke medobed a oicherem er a uchei er a omsiseb er a blai, me ke orrenges a tekingel. Ngdi osisiu, ngkmal soad el mo medengei aike el longerechir a Jehovah er tirke el sorir el melemolem el guest er a tento er ngii. Bltkil a rengud el mora Jehovah odbechid el mo meruul aike el rokui el sebeched el mo “[meruul] a di blechoel el ungil er a rengul.” (Kol. 1:10) E alta kede omes er a Jehovah el Sechelid, engdi kede mtebengii el kmo ngdirrek el Dios er kid e Demad me ngrredemelel a nguu omengull er kid. (Psa. 25:14) Ngkmal diak el soad el lobes er tiang e mo melemolem el loba dmolech el omengull el mo er ngii. Tia el dmolech el omengull er kid a mo ngosukid el mo mengeroid er kid er a ngii di el omeruul el mo tomellii a rengul. Ngkmal soad el mo blechoel el “oba ngariourreng el olengesenges” er a Dios er kid.—Mik. 6:8.

JEHOVAH DIMLAK LONGETUKEL ER A LENGAR ER A KED

10-11. Ngmekera omerellel a Jehovah el mora rechad er a Israel er a ked er a Sinai e ochotii el kmo ngdiak longetukel?

¹⁰ A Jehovah diak longetukel er a re guest er ngii. (Rom 2:11) Ngkmal sebeched el suubii tiang er a omerellel el mora rechad er a Israel er a lengar er a ked er a Sinai.

¹¹ Uriul er a losobelterir er a klsibai er a Ekipten e ngtiltketerir a remo mesiou el prist er a chedaol tento. A re Levait a miltutk el mo  meruul a lmuut el bebil er a ureor er tia el chedaol tento. Me a Jehovah ngmle ungil omekerreu er tirke el milsiou er a chedaol tento me a lechub tirke el kiliei el kmeed er ngii er a rekuk bebil? Ngdiak! A Jehovah diak longetukel.

12. Ngmilekera Jehovah el Host er tia el beches el renged e ochotii el kmo ngdiak longetukel? (Exodus 40:38) (Dirrek el momes er a siasing.)

¹² Rokui el chad el kiliei er a kiamp a mla er ngii a techellir el mo kmeed el sechelil a Jehovah el diak loltirakl a ngerachel me a lechub e ngkedel er a tento. El ua tiang, a Jehovah ulterekeklii el kmo a renged el rokir a sebechel mesa chelsakl el eabed me a ngau el ngar bebul a chedaol tento. (Monguiu er a Exodus 40:38.) Mo lmuut er tirke el kiliei er a kot el cheroid er a tento me ngmle sebechir el mesa eabed sel lemengukl me ngsebechir el kutmokl a kloklir e torakl a tento er tir e merael el loltirakl er a rokui el chad. (Ule. 9:​15-23) Rokui el chad a sebechir el rongesii a ngerel a trombetang louchais el kmo ngmla mo kirir el melukl. (Ule. 10:2) Me ngbleketakl el kmo a dekiei el kmeed er a chedaol tento a diak el belkul a kmo nglmuut el mesisiich a klausechelei er kid me a Jehovah er tirke el kiei er cheroid. E ngbai rokui el chedal tia el beches el renged er a Jehovah sebechir el mo guest er a tento er ngii e ulterekokl a rengrir el kmo ngmo omekrael e omekerreu er tir. Ngdi osisiu, a ngii di el basio el dekiei er ngii er a beluulechad er chelecha el taem e kede nguu a bltkil a rengul a Jehovah, ulekerreuil, me a osebecheklel.

OLECHOTEL A KMO JEHOVAH DIAK LONGETUKEL ER CHELECHA EL TAEM ER KID

13. Ngera ta er a rolel e a Jehovah ochotii er chelecha el taem er kid el kmo ngdiak el longetukel?

¹³ A rebebil er a rechedal a Dios er chelecha el taem a kiei el kmeed er a world headquarters me a lechub e ng branch office er a Resioning er a Jehovah. Me a rebebil er tir a mesiou el ngar er aika el basio. Sei a uchul me te teloi a ureor er aika el basio e oureor el lobengterir tirke el omekrael. E a rekuk bebil a mesiou el oldingel  ongdibel me a lechub e nglmuut el ta er a bedengel a ileakl el mui el taem el omesiou. A lsekum e ngdiak mta er tir e ngkmal sebechel mo ulterekokl a rengum el kmo a Host er kid er a Jehovah betik a rengul er a rokui el guest er ngii. Ngkmal ungil medengelkau e mo meskau aike el mousbech. (1 Pe. 5:7) A rokui el chedal a Dios a ngmai a kall er a klereng, ulekrael, me a ulekerreu el lousbech.

14. Ngera lmuut el ta er a olechotel a kmo a Jehovah el Host er kid a diak longetukel?

¹⁴ A lmuut el ta er a olechotel a kmo Jehovah el Host er kid a diak longetukel, a ngii el mla rullii a Biblia me a rokui el chad el meliuekl er a beluulechad a sebechir el menguiu er ngii. A Chedaol Llechukl er a lekot el melluches e ngmle kldei el omelekoi: Hebru, Aramaic, me a Grik. Tirke el sebechir el menguiu er a Biblia el ngar er aika el omelekoi, nglmuut el kmes a deleuill er tir me a Jehovah er tirke el diak el sebechir? Ngkmal diak.—Mt. 11:25.

15. Ngera ochotii el kmo a Jehovah diak longetukel? (Dirrek el momes er a siasing.)

¹⁵ A bo doba kengei er a Jehovah e ngdiak lultuil er a skuled me a lechub e ngkid el medengei omelekoi el luluusbech er a lekot el meluches a Biblia. E ngbai a rokui el chad el meliuekl er a beluulechad a sebechir el nguu a llomeserreng er ngii, el diak el lultuil er a lengar ngii a ngarbab el skulir me a lechub e ngdiak. A mlukreng el Tekingel el Biblia a mla moiuid el mora betok el telael el omelekoi me a rechad er a beluulechad el rokir a sebechir el ngmai a klungiolir er a osisechakl er ngii e suubii el kmo ngmekera bo desechelil.—2 Ti. 3:​16, 17.

MOLEMOLEM EL OBA KENGEI ER A JEHOVAH

16. A doltirakl er a Rellir 10:​34, 35 (BT), e ngmekera sebeched el melemolem el oba kengei er a Jehovah?

¹⁶ Ngkmal chetengakl el techall el Jehovah outkeu er kid el mo guest er a okesiu el tento er ngii. Ngkot el ungil e betik a rengul el Host. Me a lmuut kung, ngdiak longetukel. Ngoutkeu er kid el rokui el diak lultuil er a beluu, basio, ulekeroul, kebliil, me a lechub e ngskuled, rekid, me a lechub a desechal me a deredil. Me nguaisei ngdi kongei er tirke el olengesenges er ngii el me guest er ngii.—Monguiu er a Rellir 10:​34, 35, BT. b

17. Kede metik er ker a lmuut el bebil er a omesodel a bo de guest er a tento er a Jehovah?

¹⁷ Ngar er a Psalm 15:1 (NW), e a David a dmu el kmo: “Jehovah, ngtecha sebechel mo guest er a tento er kau? Ngtecha sebechel mo kiei er a chedaol el bukl er kau?” A Jehovah uluusbech er ngii el David el mo onger aika el ker. A ongingil el suobel a mo mesaod a ileakl e tekoi el kired el meruul me dolemolem el oba kengei er a Jehovah.