1-2. Luendu lutshi Yehowa wana hana akombeledi enji ana gumuzumba?

 ITSHI wajiya guzuela gula muthu mumoshi waguhula egi: ‘Yehowa udi nanyi mukunda nu aye?’ Wajiya gumuwambela egi: ‘Yehowa udi Tata wami, Nzambi wami nu Futa diami.’ Uvi wana khala nji nu batitre ako. Wana gumutadila nji gifua Fumu waye ba?

² Fumu Davidi wafuanesele ufuta wana khala nawo Yehowa nu akombeledi enji ana gumuzumba nu ufuta unu wana khala mukatshi dia fumi’a inzo nu ngenji jienji. Wahudile egi: ‘O Yehowa nanyi wajiya gutamega mu tenta yaye, nanyi wajiya gukhala gu mulundu waye wagijila?’ (Ngi. 15:1) Verse eyi idi gutukuatesa ha gukotelesa egi tuajiya gukhala ngenji mu tenta ya Yehowa, yakotelesa egi gubua mafuta enji. Idi diago luendu mukunda nu esue ha gukhala mafuta a Yehowa!

YEHOWA UDI MUTSHIGINA EGI TUKHALE NGENJI JIENJI

3. Nanyi wakhalele ngenji ya thomo ya Yehowa? Luholo lutshi Yehowa nu ngenji muene adivile?

³ Gutuama egi Yehowa afuge ima yagasue, wakhalele hakhenji. Uvi gungima, wafugile Mun’enji wa somi, Yesu. Yehowa wasuangulugile muavula handaga wakhalele gifua fumi’a inzo udi mutamega ngenji yenji ya thomo mu tenta yenji. Biblia yana zuela egi Yehowa wakhalele ‘muzumba Mun’enji muavula diago.’ Mun’enji nji wakhalele ‘musuanguluga n’enji tangua diagasue.’​—Ish. 8:30.

4. Athu atshi ako Yehowa watamegele gungima ha gukhala ngenji mu tenta yenji?

 ⁴ Gungima Yehowa wafugile anjelo. Ene nji waatamegele ha gukhala ngenji jienji. Biblia yana tamega anjelo egi ‘ana a Nzambi’ nu yana monesa egi ana khala nu gusuanguluga ha gukhala hamoshi nu Yehowa. (Yobo 38:7; Dan. 7:10) Ivo yavula gutuama, Nzambi wakhalele mutamega phamba athu akhalele nenji mu dilu ha gungina mu tenta yenji. Uvi gungima wafugile athu ako ha mavu, ene nji ajiya gukhala ngenji jienji. Mukatshi dia ngenji jiene, tuajiya gutanga Enoke, Nowa, Abalahama nu Yobo. Biblia idi mumonesa egi athu ene akhalele mafuta a Nzambi handaga akhalele gumutumagela.​—Gis. 5:24; 6:9; Yobo 29:4; Yesh. 41:8.

5. Ndaga jitshi tuajiya gulonguga mu profesi idi mu Ezekiele 37:26, 27?

⁵ Ivo yavula gungima, Yehowa walanduile gutamega mafuta enji ha gukhala ngenji jienji. (Tanga Ezekiele 37:26, 27.) Ha gufezegesa, profesi ya Ezekiele idi mumonesa egi Nzambi wana tshigina diago egi akombeledi enji ana gumuzumba akhale nu ufuta wakola n’enji. Walayele egi ‘mbawukota gikotelo gia guhuima nawo.’ Profesi yene yana monesa tangua athu ana khala nu felela dia gujinga mu dilu nu athu adi nu felela dia gujinga ha mavu mbaadibungisa hamoshi mu tenta ya Yehowa ya gifuanesa gifua “hunji dimoshi.” (Yone 10:16) Tudi mujinga mu sungi yene!

NZAMBI WANA GUTUHANA IMA TUDI NAYO FUNU IKHALE FUNDO DITSHI TUDI

6. Luholo lutshi muthu wana gungina mu tenta ya Yehowa? Fundo ditshi tuajiya gumona tenta yene?

⁶ Mu tangua dikulu, tenta yakhalele fundo athu akhalele muya ha guhululuga nu ha gudibamba gu funji yakola. Ngenji jiakhalele mungina mu tenta yene jiakhalele musha mutshima egi ajiya guahana ima adi nayo funu. Tangua tuana gudihana gudi Yehowa, tuana bua ngenji mu tenta yenji ya gifuanesa. (Ngi. 61:4) Tudi nu ima yagasue tudi nayo funu ha gukhala nu ufuta wakola nu Yehowa, tudi nji nu ufuta wabonga nu athu agasue ana gubua ngenji jia Yehowa. Tenta yenji ya gifuanesa ishigo phamba fundo dimoshi. Yajiya gukhala egi wayile gale gu asamble spesiale mu gifutshi giko, gu asamble ene wadimonele nu aphangi ako adi nu gusuanguluga handaga ene nji adi mu tenta ya Yehowa. Tenta ya Yehowa idi fundo diagasue akombeledi enji ana gumuzumba ana khala.​—Gumo. 21:3.

7. Mukunda natshi tudi muzuela egi akombeledi a Yehowa a gujinginyina anyi afile gale ana landula gukhala mu tenta yenji? (Tala nji gifuanesa.)

⁷ Itshi tuajiya guzuela mukunda nu  akombeledi a Yehowa a gujinginyina anyi afile gale? Ene nji ana landula gukhala ngenji mu tenta ya Yehowa ba? Ayi! Mukunda natshi tuazuela ngenyi? Handaga athu ene adi mu matangi a Yehowa. Yesu wazuelele egi: “Mu lumene lua gamutshi gakhalele mulema tshuya, Moize wamonesele egi athu a gufua mbaafuzumuga, tangua diatamegele muene Yehowa egi ‘Nzambi wa Abalahama, Nzambi wa Izake nu Nzambi wa Yakoba.’ Muene gashigo Nzambi wa athu a gufua, uvi Nzambi wa athu a monyo, handaga gu meso enji mukut’awo agasue adi nu monyo.”​—Luka 20:37, 38.

GUBONGA TUANA HETA MU TENTA YA NZAMBI NU INEMO TUDI NAYO

8. Gubonga gutshi tuana heta luholo tuana khala mu tenta ya Yehowa?

⁸ Gifua luholo gangando gajiya gukhala fundo dia guhululuga nu dia gudisuega gu funji yakola, tenta ya Yehowa nji yana gubamba ngenji jienji gu ndaga yagasue yajiya gubolesa ufuta wawo nu muene nu yana guahana felela. Gula tudi nu ufuta wakola nu Yehowa, Satana gajiyilego gukalagala ndaga yajiya gubolesa ufuta wene mayilago. (Ngi. 31:23; 1 Yone 3:8) Mu mavu ahe-ahe, Yehowa mbawubamba mafuta enji ana gumuzumba mu ndaga jiajiya gubolesa ufuta wawo nu muene nu gu gufua.​—Gumo. 21:4.

9. Ndaga jitshi Yehowa wana toga ngenji jienji ha gutshita?

⁹ Gukhala ngenji mu tenta ya Yehowa gudi luendu luakoma handaga guana gutukuatesa ha gukuata n’enji ufuta, ufuta wene wajiya gusala mayilago. Itshi tudi naye gutshita hagula tulandule gukhala ngenji njienji? Gula muthu mumoshi wagutamega gumbo dienji, udi naye gutshita ndaga jidi gumusuanguluisa. Ha gufezegesa, wajiya guguwambela ha gukatula saphata gutuama dia gungina monzo, udi naye gunemesa ndaga yene. Luholo lumoshi nji, tudi naye gukamba gujiya ndaga Yehowa wana toga athu adi mutshigina gulandula gukhala ngenji mu tenta yenji. Guzumba guetu mukunda nu Yehowa guana gututuma ha gutshita ndaga yagasue tuajiya gutshita ha ‘gumusuanguluisa diago.’ (Kol. 1:10) Idi yadiago egi Yehowa udi Futa dietu uvi udi nji Nzambi nu Tata wetu watagana hagula tumunemese. (Ngi. 25:14) Tushigo naye gujimbila ndaga eyi nga hazonda, hene tudi naye gulandula gumunemesa muavula. Gujiya ndaga eji, guajiya gutukuatesa ha gutuna gukalagala ndaga imoshi yajiya gumuhana gikenene. Tangua diagasue tudi naye ‘guwenda nu gudibulumuisa guagasue’ nu Nzambi wetu.​—Mika 6:8.

YEHOWA GAKALEGELEGO ENYA ISALELE NDAGA NU KHADILO DIA GUTOMBA-TOMBA

10-11. Luholo lutshi Yehowa wakalegele enya Isalele ndaga mu mavu a luselenga a gu Sinai? Luholo lutshi ndaga yene yana monesa egi gakhalago nu khadilo dia gutomba-tomba?

¹⁰ Yehowa gana khalago nu khadilo dia gutomba-tomba tangua diana kalegela muene mafuta enji ndaga. (Roma 2:11) Tuajiya guzula malongo mu luholo luakalegele muene enya Isalele ndaga mu mavu a luselenga a gu Sinai.

¹¹ Tangua Yehowa wazolele enya Isalele mu uhiga gu Ejipitu, watombele nganga-nzambi ha gukalagala mudimo mu inzo ya tenta. Enya Levi akhalele nu ginemo gia gukalagala midimo iko guene. Yehowa wakhalele mutagenesa nzala jia athu akhalele mutshita mudimo mu inzo ya tenta nga jia athu anyi akhalele mujinga hehi nu inzo yene gubalega athu ako ba? Ndo! Yehowa gana khalago nu khadilo dia gutomba-tomba.

12. Mu luholo lutshi Yehowa wamonesele egi gana khalago nu khadilo dia gutomba-tomba tangua diakhalele muene mukalegela enya Isalele ndaga? (Guzoga 40:38) (Tala nji gifuanesa.)

¹² Enya Isalele agasue akhalele nu luendu lua gukuata ufuta wakola nu Yehowa ikhale akhalele mutshita mudimo gu tabernakle nga ndo, nu ene anyi akhalele mujinga hehi nga  gualeha nu tabernakle yene. Ha gufezegesa, Yehowa watshitshile yagasue hagula athu agasue a gu Isalele amone kunji dia tuta nu zenyi dia tshuya diakhalele holu dia inzo ya tenta. (Tanga Guzoga 40:38.) Tangua tuta diakhalele mukatuga ha guya khanda iko, nu athu akhalele mu phundo jiakhalele gualeha nu tabernakle akhalele mumona tuta diene. Gungima akhalele mukanga ima yawo, akatula tenta jiawo asendesa guya hamoshi. (Lutang. 9:15-23) Athu agasue akhalele nu luendu lua guvua matululu a phungi mbadi jia utadi wa siliva jiakhalele mudila ha guwambela athu agasue egi adi naye gusendesa gukatuga. (Lutang. 10:2) Idi yadiago egi gujinga hehi mu inzo ya tenta guakhalelego mumonesa egi muthu udi nu ufuta wakola nu Yehowa. Uvi muenya Isalele wagasue wakhalele nu luendu lua gubua ngenji ya Yehowa nu gusha mutshima egi mbawumutuameza nu mbawumubamba. Mangino nji fundo diagasue tudi mujinga tudi naye gusha mutshima egi Yehowa wana gutuzumba, wana tagenesa nji nzala jietu nu wana gutubamba.

MANGINO NJI YEHOWA GANA KHALAGO NU KHADILO DIA GUTOMBA-TOMBA

13. Itshi idi mumonesa egi uu nu mangino Yehowa gana khalago nu khadilo dia gutomba-tomba?

¹³ Mangino akombeledi ako a Nzambi ana jinga hehi nu biro diakoma dia Matemue a Yehowa ako hehi nu Babetele. Ako ana tshita mudimo mu mafundo ene. Ngenyi, muthu wagasue mukatshi diawo wajiya gudihana ha gutshita midimo ya gudisha yana kalegewa mu mafundo ene nu gukhala hamoshi nu athu ana tuameza midimo ya ulondegi wetu. Uvi athu ako ana gukalagala mudimo wa mutadi muwendji nga midimo iko ya tangua diagasue. Gula ushigo mukatshi dia athu ana gutshita midimo yene, wajiya gusha mutshima egi Yehowa wana zumba ngenji jienji jiagasue. Khala nji musha mutshima egi wana gugujiya muabonga nu wana gudisagesa mukunda nu aye. (1 Phet. 5:7) Yehowa wana hana akombeledi enji agasue ima ya gudia ya mu nyuma, wana guatuameza nu guabamba.

14. Mu luholo lutshi luko Yehowa wamonesele egi gashigo nu khadilo dia gutomba-tomba?

 ¹⁴ Ndaga iko idi mumonesa egi Yehowa gana khalago nu khadilo dia gutomba-tomba idi luholo luahanele muene athu agasue a ha mavu luendu lua gutanga Biblia. Thomo Biblia yasonegewe phamba mu mazuelelo thatu: Mu Hebelu, mu Alama nu mu Greke. Ndaga yene idi mukotelesa egi athu anyi ajiya gutanga Biblia mu mazuelelo awa ana khala nu ufuta wakola nu Yehowa gubalega athu ako ba? Ndo, ishigo ngenyi.​—Mat. 11:25.

15. Ndaga jitshi jidi mumonesa diago egi Yehowa ganago gukhala nu khadilo dia gutomba-tomba? (Tala nji gifuanesa.)

¹⁵ Yehowa ganago gutuzumba phamba handaga tualongugile muavula nga ndo tuana jiya mazuelelo a thomo anyi Biblia yasonegewe. Ganago nji guhana ndunge jienji phamba gudi athu alongugile muavula, uvi wana gujihana gudi athu agasue ikhale alongugile muavula nga ndo. Biblia yabalumuiwe mu mazuelelo gubalega 1 000, ngenyi athu agasue a ha mavu ajiya guheta gubonga gua malongo enji nu gujiya ndaga ajiya gutshita ha gubua mafuta enji.​—2 Tim. 3:16, 17.

LANDULA GUKALAGALA NDAGA JIABONGA HA GUSUANGULUISA YEHOWA

16. Gifua luholo Makalegelo 10:34, 35 idi guyimonesa, itshi tudi naye gutshita hagula Yehowa atuzumbe?

¹⁶ Gukhala ngenji mu tenta ya Yehowa ya gifuanesa gudi diago luendu luakoma. Handaga Yehowa wana khala nu gisemo giavula nu wana gutuzumba muavula nu udi diago muyambi wa ngenji wabonga. Luko ganago gutomba-tomba. Wana yamba athu agasue ikhale ana khala fundo ditshi, adi enya gifutshi gitshi, alongugile makhalasa aleha nga ndo, nga adi athu a gilema gitshi, giphuta, gindongo nu ikhale adi mala nga akhetu. Uvi tujimbilago egi phamba athu ana tumagela mikhuala yenji ana gubua ngenji jienji.​—Tanga Makalegelo 10:34, 35.

17. Fundo ditshi tuajiya guheta malongo ako ajiya gutukuatesa ha gukhala ngenji mu tenta ya Yehowa?

¹⁷ Gifua luholo mukanda wa Ngimbo mukhapho 15:1 udi guyimonesa, Davidi wahudile egi: ‘O Yehowa nanyi wajiya gutamega mu tenta yaye, nanyi wajiya gukhala gu mulundu waye wagijila?’ Gungima Yehowa wakuatesele Davidi ha guhana mvutu gu mihu yene mu verse jia landula. Longo dialandula mbadimonesa ndaga jiko tudi naye gutshita ha gusuanguluisa Yehowa nu ha gulandula gukhala mafuta enji.