1، 2.‏ یہوواہ نے اپنے سارے بندیاں نُوں کیہڑی دعوت دِتی اے؟‏

 جے کوئی توانوں پچھےکہ تواڈے لئی یہوواہ کون اے تے تُسی اوہنوں کیہہ جواب دَوو گے؟ شاید تُسی کہوو:‏ ”‏یہوواہ میرا باپ، میرا خدا تے میرا دوست اے۔“‏ شاید تُسی یہوواہ بارے ہور وی ایہو جہیاں گلاں کہوو۔ پر کیہہ تُسی یہوواہ بارے کدی ایہہ کہیا اے کہ اوہ میرا میزبان اے؟‏

² بادشاہ داؤد نے دَسیا کہ یہوواہ تے اوہدے بندیاں وچ دوستی دا رشتہ بالکل اُنج ای اے جیویں اِک مہمان تے میزبان وچ ہوندا اے۔ اوہنے یہوواہ کولوں پچھیا:‏ اَے یہوواہ!‏ کون تیرے خیمے دا مہمان بن سکدا اے؟ کون تیرے مُقدس پہاڑ تے وَس سکدا اے؟ (‏زبور 15:‏1‏)‏ ایس ایت توں پتہ چلدا اے کہ اَسی یہوواہ دے خیمے چ اوہدے مہمان یعنی دوست بن سکنے آں۔ ذرا سوچو کہ ایہہ ساڈے لئی کِنّاں وڈا اعزاز اے۔‏

یہوواہ چاہندا اے کہ اَسی اوہدے مہمان بنئے

3.‏ یہوواہ دا سب توں پہلا مہمان کون سی تے یہوواہ خدا تے اوہدا مہمان اِک دُوجے لئی کیہو جہے جذبات رکھدے سن؟‏

³ کائنات نُوں بناں توں پہلاں یہوواہ بالکل کلّا سی۔ پر فیر اوہنے اپنے پہلوٹھے پُتر نُوں بنایا تے اوہنوں اپنے خیمے چ آن دی دعوت دِتی۔ اِنج کرن نال اوہنوں بڑی خوشی مِلی۔ بائبل چ دَسیا گیا اے کہ یہوواہ اپنے پہلے مہمان یعنی اپنے پُتر توں بڑا خوش ہوندا سی تے اوہدا پُتر وی ہر ویلے اوہدے حضور خوشی مناندا سی۔—‏اَمثال 8:‏30‏۔‏

4.‏ بعد چوں یہوواہ نے ہور کنہاں نُوں اپنے خیمے چ آن دی دعوت دِتی؟‏

⁴ بعد چوں یہوواہ نے فرشتیاں نُوں وی بنایا تے اوہناں نُوں وی اپنے خیمے چ مہماناں دے طور تے آن دی دعوت دِتی۔ بائبل چ یہوواہ دے فرشتیاں نُوں اوہدے پُتر کہیا گیا اے تے ایہہ وی دَسیا گیا اے کہ یہوواہ نال رہ کے اوہ بوہت خوش نیں۔ (‏ایوب 38:‏7؛‏ دانی‌ایل 7:‏10‏)‏ بوہت سالاں  تک صرف فرشتے ای اوہدے دوست سن۔ پر فیر یہوواہ نے زمین تے انساناں نُوں بنایا تے اوہناں نُوں وی اپنے مہمان بنن دا موقع دِتا۔ ایہناں مہماناں وچ حنوک، نوح، ابراہام تے ایوب شامل سن۔ بائبل چ دَسیا گیا اے کہ ایہہ لوک سچے خدا یہوواہ دے دوست سن کیونکہ اوہ اوہدا کہنا من دے سن تے اوہدے نال نال چلدے سن۔—‏پیدائش 5:‏24؛‏ 6:‏9؛‏ ایوب 29:‏4؛‏ یسعیاہ 41:‏8‏۔‏

5.‏ سانوں حِزقی‌ایل 37:‏26، 27 چ لکھی پیشین‌گوئی توں کیہڑی گل پتہ چلدی اے؟‏

⁵ صدیاں توں یہوواہ خدا اپنے دوستاں نُوں اپنا مہمان بنن دی دعوت دیندا آیا اے۔ ‏(‏حِزقی‌ایل 37:‏26، 27 نُوں پڑھو۔)‏ مثال لئی، حِزقی‌ایل دی پیشین‌گوئی توں پتہ چلدا اے کہ یہوواہ دِلوں چاہندا اے کہ اوہدے بندے اوہدے قریبی دوست بنن۔ اوہنے وعدہ کیتا اے کہ اوہ اوہناں نال سلامتی دا عہد بنھے گا۔ ایس پیشین‌گوئی دا اشارہ اوس وقت وَل اے جدوں یہوواہ خدا اسمان تے زمین تے ہمیشاں دی زندگی پان دی امید رکھن والے لوکاں نُوں اِک مُٹھ کر کے تے ”‏اِکو ای گلّہ“‏ بنا کے اپنے خیمے چ لیائے گا۔ (‏یوحنا 10:‏16‏)‏ تے ایہہ اَج ہو رہیا اے۔‏

اَسی جتھے وی رہندے ہوئیے، یہوواہ ساڈی فکر کردا اے

6.‏ (‏الف)‏اِک بندہ یہوواہ دے خیمے چ مہمان کیویں بن سکدا اے؟ (‏ب)‏یہوواہ دا خیمہ کتھے وے؟‏

⁶ پرانے زمانے چ خیمہ اوہ جگہ ہوندی سی جتھے اِک بندہ آرام کر سکدا سی تے سخت گرمی، سردی تے بارشاں توں محفوظ رہ سکدا سی۔ جدوں اوہ بندہ کسے نُوں اپنے خیمے چ آن دی دعوت دیندا سی تے اوہ اپنے مہمان دا بڑا خیال رکھدا سی۔ ایسے طرحاں جدوں اَسی اپنی زندگی یہوواہ دے ناں کیتی تے اَسی اوہدے خیمے چ اوہدے مہمان بن گئے۔ (‏زبور 61:‏4‏)‏ ساڈا میزبان یہوواہ وی ساڈا بڑا خیال رکھدا اے۔ اوہ سانوں بوہت سارا روحانی کھانا دیندا اے۔ ایہدے علاوہ اَسی اوہدے خیمے چ آئے ہور وی مہماناں نال دوستی کر سکنے آں۔ پر یہوواہ دا خیمہ کسے اِک خاص جگہ تے ای نئیں اے۔ ہر ملک چ لوک یہوواہ دے خیمے چ اوہدے مہمان بن سکدے نیں۔ مثال لئی، شاید تُسی اِک خاص کنونشن تے جان لئی کسے دُوجے ملک گئے تے اوتھے تواڈی ملاقات ایہو جہے لوکاں نال ہوئی جیہڑے یہوواہ دے خیمے چ اوہدے مہمان سن۔ ایہدے توں پتہ چلدا اے کہ جے اَسی وفاداری نال یہوواہ دی خدمت کر رہے آں تے اَسی اوہدے خیمے چ اوہدے مہمان بن سکنے آں فیر بھانویں اَسی جتھے وی رہندے ہوئیے۔—‏مُکاشفہ 21:‏3‏۔‏

7.‏ اَسی ایہہ کیوں کہہ سکنے آں کہ یہوواہ دے جیہڑے بندے مر چُکے نیں، اوہ حالے وی اوہدے خیمے چ مہمان نیں؟ (‏تصویر نُوں وی ویکھو۔)‏

⁷ یہوواہ دے جیہڑے بندے فوت ہو چُکے نیں، کیہہ اوہ حالے وی اوہدے خیمے چ مہمان نیں؟ جی بالکل۔ پر اَسی اِنج کیوں کہہ سکنے آں؟ کیونکہ اوہ یہوواہ دی یاد چ زندہ نیں۔ ایس بارے یسوع مسیح نے کہیا:‏ مُردے ضرور زندہ کیتے جان گے۔ نالے موسیٰ نے وی بلدی ہوئی جھاڑی  والے واقعے چ کہیا:‏ یہوواہ ابراہام دا خدا، اِضحاق دا خدا تے یعقوب دا خدا اے۔ اوہ مُردیاں دا نئیں سگوں زندہ لوکاں دا خدا اے کیونکہ اوہدی نظر چ اوہ سارے زندہ نیں۔—‏لُوقا 20:‏37، 38‏۔‏

یہوواہ دے مہمان بنن دے فائدے تے ذمے‌داریاں

8.‏ یہوواہ دے مہماناں نُوں اوہدے خیمے چ رہن توں کیہڑے فائدے ہوندے نیں؟‏

⁸ اِک بندہ اپنے خیمے چ آرام کر سکدا اے تے خراب موسم توں محفوظ رہ سکدا اے۔ یہوواہ دے خیمے چ آن والیاں نُوں کیہو جہی حفاظت مِلدی اے؟ یہوواہ اوہناں نُوں ایہو جہیاں چیزاں توں محفوظ رکھدا اے جنہاں دی وجہ توں اوہدے نال اوہناں دی دوستی خطرے چ پے سکدی اے۔ یہوواہ اپنے مہماناں نُوں آرام تے سکون وی دیندا اے کیونکہ اوہناں کول چنگے مستقبل دی پکی امید اے۔ جے اَسی یہوواہ دے نیڑے رہواں گے تے فیر شیطان سانوں کوئی وی ایہو جیہا نقصان نئیں پونچا سکے گا جدا اثر ہمیشاں تک رہوے گا۔ (‏زبور 31:‏23؛‏ 1-‏یوحنا 3:‏8‏)‏ نوِیں دُنیا چ وی یہوواہ اپنے دوستاں دی حفاظت کرے گا تاکہ اوہ اوہدے نیڑے رہن تے اوہناں نُوں موت توں وی محفوظ رکھے گا۔—‏مُکاشفہ 21:‏4‏۔‏

9.‏ یہوواہ اپنے مہماناں توں کیہہ چاہندا اے؟‏

⁹ یہوواہ دے خیمے چ آنا بڑے مان دی گل اے کیونکہ اوہدے مہماناں دی اوہدے نال گُوڑھی دوستی اے جیہڑی ہمیشاں تک قائم رہ سکدی اے۔ پر یہوواہ دے مہمان بنے رہن لئی سانوں کیہہ کرنا چاہی دا اے؟ ذرا سوچو کہ جدوں کوئی توانوں اپنے گھر بلا‌ندا اے تے تُسی ضرور اوہی کرو گے جو اوہ تواڈے کولوں چاہندا اے۔ مثال لئی، جے اوہ چاہندا اے کہ تُسی جُتی لا کے اوہدے گھر دے اندر جاؤ تے یقیناً تُسی خوشی نال اِنج کرو گے۔ ایسے طرحاں اَسی جاننا چاہنے آں کہ ساڈا میزبان یہوواہ ساڈے توں کیہہ چاہندا اے۔ اَسی یہوواہ نال بوہت محبت کرنے آں ایسے لئی اَسی ہر معاملے چ اوہنوں خوش کرنا چاہنے آں۔ (‏کُلسّیوں 1:‏10‏)‏ ایہہ سچ اے کہ یہوواہ ساڈا دوست اے پر سانوں ہمیشاں یاد رکھنا چاہی دا اے کہ اوہ ساڈا باپ تے خدا وی اے۔ ایس لئی سانوں ہمیشاں اوہدا گُوڑھا احترام کرنا چاہی دا اے تے کدی نئیں بھلنا چاہی دا کہ اوہ اِک بوہت وڈی ہستی اے۔ (‏زبور 25:‏14‏)‏ یہوواہ لئی گُوڑھا احترام ساڈی مدد کرے گا کہ اَسی کوئی وی ایہو جیہا کم نہ کرئیے جدے توں اوہ ناراض ہوئے۔ اَسی دِلوں چاہنے آں کہ اَسی ہمیشاں اپنے خدا دے حضور فروتنی نال چلئیے۔—‏میکاہ 6:‏8‏۔‏

یہوواہ ہر اِسرائیلی نال اِکو طرحاں پیش آیا

10، 11.‏ یہوواہ سینا دے ویرانے چ اِسرائیلیاں نال جیویں پیش آیا، اوہدے توں ایہہ کیویں پتہ چلدا اے کہ اوہ طرف‌داری نئیں کردا؟‏

¹⁰ یہوواہ اپنے مہماناں وچوں کسے نُوں گھٹ تے کسے نُوں زیادہ اہمیت نئیں دیندا سگوں اوہ ساریاں نال اِکو جیہا پیار کردا اے۔ (‏رومیوں 2:‏11‏)‏ ایس گل نُوں ہور چنگی طرحاں سمجھن لئی غور کرو کہ اوہ سینا دے ویرانے چ بنی‌اِسرائیل نال کیویں پیش آیا۔‏

¹¹ یہوواہ نے بنی‌اِسرائیل نُوں مصر دی غلامی چوں کڈھن توں بعد کجھ کاہناں نُوں اوس خیمے چ خدمت کرن لئی مقرر کیتا جیہڑا اوہدی عبادت لئی استمال ہوندا سی۔ اوہنے اپنے ایس پاک خیمے چ کجھ ہور کم کرن لئی لاویاں نُوں وی مقرر کیتا۔ کیہہ یہوواہ نے صرف اوہناں اِسرائیلیاں دا چنگی طرحاں خیال رکھیا جیہڑے خیمے چ خدمت کردے سن یاں جنہاں دے خیمے یہوواہ دے خیمے دے نیڑے سن؟ نئیں، کیونکہ یہوواہ کسے دی طرف‌داری نئیں کردا۔‏

12.‏ یہوواہ نے بنی‌اِسرائیل نُوں کیویں وکھایا کہ اوہ کسے دی طرف‌داری نئیں کردا؟ (‏خروج 40:‏38‏)‏ (‏تصویر نُوں وی ویکھو۔)‏

¹² ہر اِسرائیلی یہوواہ دا قریبی دوست بن سکدا سی فیر بھانویں اوہ خیمے چ خدمت نہ وی کردا ہوندا یاں فیر اوہدا خیمہ یہوواہ دے خیمے توں دُور ہوندا۔ مثال لئی، یہوواہ نے ایس گل دا خاص خیال رکھیا کہ پوری قوم اوس بدّل تے اَگ دے ستون نُوں ویکھ سکے جیہڑا یہوواہ دے خیمے دے اُتے ہوندا سی۔ ‏(‏خروج 40:‏38 نُوں پڑھو۔)‏ جدوں بدّل کسے پاسے مُڑنا شروع کردا سی تے اوہ لوک وی ایہنوں اسانی نال ویکھ سکدے سن جنہاں دے خیمے سب توں دُور لگے ہوندے سن۔ اِنج اوہ وی اپنا سامان بنھ سکدے سن، اپنے خیمے بند کر سکدے سن تے باقی لوکاں نال مِل کے سفر چ اَگے ودھ سکدے سن۔ (‏گنتی 9:‏15-‏23‏)‏ ایہدے علاوہ جدوں لوکاں نُوں چلن دا اشارہ دین لئی چاندی دے دو نرسنگے پھونکے جاندے سن تے  ایہدی اواز ساریاں تک پونچ دی سی۔ (‏گنتی 10:‏2‏)‏ ایہناں ساریاں گلاں توں صاف پتہ چلدا اے کہ جیہڑے اِسرائیلیاں دے خیمے یہوواہ دے خیمے دے نیڑے سن، اوہ یہوواہ دے زیادہ قریبی دوست نئیں سن تے نہ ای اوہناں لوکاں دی یہوواہ نال دوستی کمزور سی جنہاں دے خیمے یہوواہ دے خیمے توں دُور سن۔ ایہدی بجائے ہر اِسرائیلی یہوواہ دا مہمان بن کے ایس گل دا پکا یقین رکھ سکدا سی کہ یہوواہ اوہدی رہنمائی تے حفاظت کرے گا۔ ایہہ گل اَج وی بالکل سچ اے۔ بھانویں اَسی دُنیا دے جیہڑے وی کونے چ رہندے ہوئیے، یہوواہ سانوں پیار کردا اے تے ساڈی فکر تے حفاظت کردا اے۔‏

یہوواہ اَج وی کسے دا طرف‌دار نئیں اے

13.‏ اِک طریقہ کیہہ اے جدے ذریعے اَج یہوواہ ظاہر کردا اے کہ اوہ کسے دا طرف‌دار نئیں اے؟‏

¹³ اَج یہوواہ دے بندیاں وچوں کجھ ساڈے ہیڈکوارٹر یاں فیر ساڈی کسے برانچ دے نیڑے رہندے نیں۔ نالے کجھ تے ایہناں وچ کم وی کردے نیں۔ ایس وجہ توں اوہ ایہناں دفتراں چ ہون والے کماں چ حصہ لے سکدے نیں تے اوہناں لوکاں دے بوہت نیڑے نیں جیہڑے یہوواہ دی تنظیم چ پیشوائی کردے نیں۔ کجھ بھین بھرا کسے ہور طریقے نال کُل‌وقتی طور تے خدمت کردے نیں جیویں کہ خاص پہل‌کار یاں حلقے دے نگہبان دے طور تے۔ زیادہ‌تر بھین بھراواں کول ایہہ ذمے‌داریاں نئیں نیں پر فیر وی اوہ پکا یقین رکھ سکدے نیں کہ یہوواہ اوہناں نال وی اوناں ای پیار کردا اے جِنّاں اوہ اپنے باقی دوستاں نال کردا اے۔ اوہ اپنے ہر مہمان نُوں چنگی طرحاں جان دا اے تے ہر اِک دا بڑا خیال رکھدا اے۔ (‏1-‏پطرس 5:‏7‏)‏ یہوواہ اپنے ہر بندے نُوں روحانی کھانا دیندا اے تے اوہدی رہنمائی تے حفاظت کردا اے۔‏

14.‏ اِک ہور طریقہ کیہہ اے جدے توں پتہ چلدا اے کہ یہوواہ اپنے کسے وی مہمان دی طرف‌داری نئیں کردا؟‏

¹⁴ اِک ہور گل توں پتہ چلدا اے کہ یہوواہ کسے دی طرف‌داری نئیں کردا۔ اوہنے پوری دُنیا دے لوکاں لئی ممکن بنایا اے کہ اوہ اوہدا کلام پڑھ سکن۔ خدا دا کلام اصل چ ایہناں تِن زباناں چ لکھیا گیا سی:‏ عبرانی، ارامی تے یونانی۔ کیہہ جیہڑے لوک ایہناں زباناں چ خدا دے کلام نُوں پڑھ سکدے نیں، بس اوہناں دی خدا دے نال قریبی دوستی اے؟ نئیں، ایہہ گل نئیں اے۔—‏متی 11:‏25‏۔‏

15.‏ ایس گل دا کیہہ ثبوت اے کہ یہوواہ کسے دی طرف‌داری نئیں کردا؟ (‏تصویر نُوں وی ویکھو۔)‏

 ¹⁵ یہوواہ صرف اوہناں لوکاں نُوں ای اپنا دوست نئیں بناندا جیہڑے بوہت پڑھے لکھے ہوندے نیں یاں جیہڑے اوہ زباناں پڑھ سکدے نیں جنہاں چ اوہدا کلام لکھیا گیا سی۔ ایہدی بجائے یہوواہ پوری دُنیا چ لوکاں نُوں ایہہ موقع دیندا اے کہ اوہ اوہدے کولوں سمجھ حاصل کرن فیر بھانویں اوہ پڑھے لکھے ہون یاں نہ ہون۔ اوہنے اپنے کلام بائبل دا ہزاراں زباناں چ ترجمہ کرایا اے تاکہ سارے لوک ایہدے چ لکھیاں گلاں توں فائدہ حاصل کر سکن تے ایہہ جان سکن کہ اوہ اوہدے دوست کیویں بن سکدے نیں۔—‏2-‏تیمُتھیُس 3:‏16، 17‏۔‏

یہوواہ دے مہمان بنے رہوو

16.‏ اعمال 10:‏34، 35 دے مطابق سانوں یہوواہ دے مہمان بنے رہن لئی کیہہ کرنا چاہی دا اے؟‏

¹⁶ ساڈے لئی بڑے مان دی گل اے کہ یہوواہ سانوں اپنے مہمان بنن دی دعوت دیندا اے۔ یہوواہ کائنات دا سب توں زیادہ مہربان، پیار کرن والا تے مہمان‌نواز میزبان اے۔ ایہدے علاوہ اوہ کسے دی طرف‌داری نئیں کردا۔ سگوں سانوں ساریاں نُوں اپنا دوست بنن دی دعوت دیندا اے فیر بھانویں اَسی مرد ہوئیے یاں عورت، اَسی جتھے وی رہندے ہوئیے، پڑھے لکھے ہوئیے یاں نہ ہوئیے، کسے وی نسل یاں قبیلے توں تعلق رکھدے ہوئیے یاں کسے وی عمر دے ہوئیے۔ پر اوہ صرف اوہناں نُوں ای اپنے مہماناں دے طور تے قبول کردا اے جیہڑے اوہدے معیاراں مطابق چلدے نیں۔‏‏—‏اعمال 10:‏34، 35 نُوں پڑھو۔‏

17.‏ یہوواہ دے خیمے چ مہمان بنن بارے سانوں ہور زیادہ معلومات کتھوں مِل سکدی اے؟‏

¹⁷ زبور 15:‏1 دے مطابق داؤد نے ایہہ سوال کیتے:‏ اَے یہوواہ!‏ کون تیرے خیمے دا مہمان بن سکدا اے؟ کون تیرے مُقدس پہاڑ تے وَس سکدا اے؟ داؤد نے یہوواہ دی پاک روح دی رہنمائی نال ایہناں سوالاں دے جواب دِتے۔ اگلے مضمون چ اَسی کجھ ایہو جہے خاص کماں تے غور کراں گے جیہڑے یہوواہ نُوں خوش کرن تے اوہدا دوست بنے رہن لئی ضروری نیں۔‏