KUYUUJI 23
WAAÑI 28 Cómo hacernos amigos de Jehová
Jehová tatɨʼppa iga tatɨgɨyiñ ityɨkjom
«Jeʼm antɨk ity kun jeʼeyaj y ɨch atsɨʼyba juʼuts iDios»(EZEQ. 37:27).
AN̈KEJAYOʼOYI
Yɨʼp kuyuuji tayooxpaʼtpa tantsoowaix iga Jehová tatɨʼpneʼ ityɨkjom simbólica iga wɨaiñ tanamigoja, tayooxpaʼtpatyim tan̈kutɨʼɨyɨy juutypɨk takuixñeʼ.
1, 2. ¿Juʼp wɨbɨk xaaja tachiʼiñeʼ Jehová?
SIIGA mikwaʼktaap juʼuts iñaʼm Jehová, wɨapsɨ iga miñɨmpa: «Jehová anamigo, anJaatun̈ y anDios». O Wɨapsɨ iga impɨkpa tun̈gak títulos. Pero ¿miñɨmpasɨ iga jeʼam mityɨʼpneʼ ityɨkjom simbólica?
2 Jeʼm rey David ikukiʼps jeʼm wɨnanɨgoʼoyi iniitywɨʼɨp Jehová kun jeʼm iyooxakɨʼɨwiñyaj kun algun i iga ityɨʼppa tun̈gakyaj ityɨkkɨʼɨm. Akwaʼgoy: «Oh, Jehová, ¿iapaʼap wɨap ityɨgɨy jeʼm impuʼktuktɨkjom? ¿Iapaʼap wɨap ityɨgɨy jeʼm in̈kotsɨkyuk kuaʼyñewɨʼɨp?» (Sal. 15:1). Yɨʼpyaj an̈matyiyaj tan̈kejayyajpa iga wɨap tanamigoja Jehová. ¡Tanaitytyaʼm tuum wɨbɨk xaaja!
JEHOVÁ TANTƗʼPPA IGA TANAMIGOJAIÑ
3. ¿Iapaʼap jeʼm wiñtyipɨk jempɨk moj tɨgɨɨyi jeʼm Jehová ityɨkjom simbólica, y juʼuts idyɨk in̈jaamyaj?
3 Wiñtyi iga iwadyiñ jeʼm iMaanɨk Jesús Jehová ity idyɨk ikutyum, jeʼam jempɨk moj tɨgɨɨyi jeʼm ityɨkjom simbólica. ¡Y tsaam maymaya jesɨgam tɨgɨy! Jeʼm Biblia nɨmpa iga Jehová maymaya kun jeʼm iMaanɨk y jeʼ juchixkej maymayatyim iwiñjom (Prov. 8:30).
4. ¿Ityam ityɨʼp Jehová iga iamigojaiñ?
4 Maaj okmɨ, Jehová iwat tun̈gak sɨn̈pɨxiñtyam y ityɨʼptyim iga tɨgɨyyajiñ jeʼm ityɨkjom simbólica. Jeʼm Biblia nɨmpa iga jeʼ jeʼm Dios imanɨktam y tsaam idyɨk maymayyaj jeʼm Jehová iwiñjom (Job 38:7; Dan. 7:10). Por jaʼyan̈ amtyɨy, Jehová numaaj wɨa mu iamigo jempɨk ityyaj sɨn̈yukmɨ. Pero maaj okmɨ ityɨʼp tun̈gakyaj, jempɨk ityyaj yɨʼp naxyukmɨ. Weeñi jempɨk ityɨʼp jeʼ Enoc, Noé, Abrahán y Job. Jeʼm Biblia nɨmpa iga tumtum de jeʼeyaj Dios iamigo idyɨk o iga «sɨʼɨba kun jeʼm nuntapɨk Dios» (Gén. 5:24; 6:9; Job 29:4; Is. 41:8).
5. ¿Tyi tan̈kejaʼyba jeʼm jɨychagoʼoyi itywɨʼɨp en Ezequiel 37:26, 27?
5 Dende jesɨgam, Jehová seguido ityɨʼpneʼ jeʼm iamigojyaj iga tɨgɨyyajiñ jeʼm ityɨkjom. Tan̈kujɨɨstaʼmiñ jeʼm jɨychagoʼoyi itywɨʼɨp en Ezequiel 37:26, 27 (maayɨʼ). a Yɨʼp jɨychagoʼoyi tan̈kejaʼyba iga Jehová tsaam ikusuʼnɨʼyba iniity tuum wɨnanɨgoʼoyi kun jeʼm iyooxakɨʼɨwiñyaj. Jehová iwat tuum trato de paz kun jeʼeyaj. Yɨʼpyaj an̈matyiyaj kupakyajpa jesɨk jeʼm kupin̈neyajtawɨʼɨp y jempɨk tsɨʼyyajpa yɨʼp Naxyukmɨ ityun̈ɨyyajpa «tu̱mt́i pastor» jeʼm ityɨkjom simbólica (Juan 10:16). Yɨʼp jɨychagoʼoyi kupakpa ixɨʼ.
DYAʼ TYI IJOO JUUTY TAITYPA JEHOVÁ TAKUIXPA
6. ¿Juchix tatɨgɨytyaʼmpa jeʼm Jehová ityɨkjom, y juuty ity?
6 Pekaʼ jesɨk dyaʼ wɨkoom idyɨk, jejnɨɨmpa y yamkataap idyɨk tuum puʼktuktɨk. Y jesɨk algun i tɨʼptaap, ijoodon̈ iga wɨpɨktson̈taap y chiʼityaap tyityam ityogoyay. Taɨchtyam tatɨgɨytyaʼmpa jeʼm Jehová ityɨkjom jesɨk tan̈kɨan̈kodaytyaʼmpa tañityi Jehová (Sal. 61:4). Jeem tanaitytyaʼm jaʼyan̈ wiʼkkuy espiritual y tanan̈pɨʼtsyajpatyim tun̈gakyaj iga ityɨʼpnetyim Jehová. Pero ¿juuty ity jeʼm ityɨk simbólica? Juutykej iga kupɨktaap Jehová. Jeʼam iaʼmneyaj tun̈gakyaj jesɨk oyñeyaj jeʼm mɨjpɨk an̈tuʼumaaji especial tun̈gak an̈eymɨ, y wɨaneʼ iixpɨkyaj tun̈gakyaj iga tɨgɨyñeyajtyim yɨʼp ityɨkjom simbólica (Apoc. 21:3).
7. ¿Tyi naspa kun jeʼm iyooxakɨʼɨwiñyaj kaʼayajwɨʼɨp wiñɨk jaama? (Aʼmɨtyim jeʼm imagen).
7 ¿Y tyi naspa kun jeʼm iyooxakɨʼɨwiñyaj kaʼayajwɨʼɨp wiñɨk jaama? ¿Seguido ityyaj jeʼm ityɨkjom? Jɨ. ¿Tyiʼiga tanɨmtaʼmpa jeempɨk? Jeʼm Biblia in̈kejpa iga jeʼm Jehová ijɨɨxian̈jom vivojyajnam. Jesús nɨm: «Jém Moisés, taŋquejayt́ámpa iga acpɨsta̱p jém caaneyajwɨɨp. Nɨmpa iga cuando jípspa jém xut́u cuy, Dios iñɨ́máy jém Moisés iga: ‹Ɨch jém Abraham [i]Dios, jém Isaac [i]Dios y jém Jacob [i]Dios›. Quejpa iga tanJa̱tuŋ Dios d́a je jém caanewɨ́ppɨc iDios, je jém vivopɨc iDios» (Luc. 20:37, 38).
Wɨap tannɨm iga jeʼm Jehová iyooxakɨʼɨwiñyaj kaʼaneyajwɨʼɨp wiñɨk ityyajnam jeʼm Jehová ityɨkjom. (Aʼmɨ jeʼm párrafo 7).
TYI TAN̈WADYIÑ Y JUʼPTAM KUMAYKEDOʼOYIYAJ TAMPƗKTSON̈BA
8. ¿Juutypɨk tawɨwadaʼyba iga taity jeʼm Jehová ityɨkjom?
8 Juʼutstyim tuum tɨk iga wɨap tanyamkaʼ jesɨk chijoʼyba tuj y wɨap tanjej, jeʼm Jehová ityɨk simbólica takupujpa iga odoy tamalwadaytyaiñ espiritualmente y tachiʼiba an̈jogoʼoyi. Siiga dyaʼ tanjagan̈tsakpa Jehová, jeʼm Wookkɨʼɨwiñ dyaʼ wɨap tamalwaday (Sal. 31:23; 1 Juan 3:8). Y jesɨk taitytyaʼmum jeʼm jomnaxyukmɨ Jehová seguido ikuixpa jeʼm iamigojyaj iga odoy malwadayyajtaiñ espiritualmente y odoy kaʼayajiñ (Apoc. 21:4).
9. ¿Tyi iwatyajiñ jempɨk Jehová ityɨʼpneʼ ityɨkjom?
9 ¡Tanaity tuum wɨbɨk xaaja iga Jehová tatɨʼpne iga tatɨgɨyiñ jeʼm ityɨkjom y wɨaiñ tanamigoja! Pero ¿tyi tan̈wadyiñ iga seguido taidyiñ jeem? Siiga algun i tatɨʼppa ityɨkkɨʼɨm tansunba iga tanɨʼmaʼyiñ tyi ikusuʼnɨʼyba iga tan̈wadyiñ. Wɨapsɨ tawaʼgay iga odoy tatɨgɨyiñ kun tanzapato, tan̈watpa jempɨk jeʼ ikusuʼnɨʼyba. Jeempɨktyim naspa kun Jehová, tatɨʼpnetaʼm ityɨkjom y tansunba iga tanɨʼmaʼyiñ tyi tan̈wadyiñ, y tan̈watpa jempɨk jeʼ ikusuʼnɨʼyba iga tantoyba (Col. 1:10). Tanjoodon̈ iga Jehová tanamigo, pero jeʼ tanDios y tanJaatun̈, jeʼyukmɨ tanakwiñkejaʼyiñ respeto (Sal. 25:14). Odoy keman tan̈kujaʼamaʼyiñ iapaʼap jeʼ. Jeʼm kɨɨn̈i tanaidyaywɨʼɨp Jehová tayooxpaʼtpa iga odoy tan̈wadyiñ jempɨk jeʼ dyaʼ ikusuʼnɨʼyba. Tanakwiñkejtoʼoba modestia jesɨk tasɨʼɨba kun Dios (Miq. 6:8).
JEHOVÁ DYAʼ IÑEEJAIX NI TUUM ISRAELITA JEʼM TƗTSƗNAXYUKMƗ
10, 11. ¿Juutypɨk ikwiñkejneʼ Jehová iga dyaʼ iñeeixpa jeʼm iyooxakɨʼɨwiñyaj?
10 Jehová dyaʼ iñeeixpa jempɨk ityɨʼpneʼ ityɨkjom (Rom. 2:11). Tan̈kɨʼpin̈taʼmiñ tyi iwat Jehová kun jeʼm israelitajyaj jesɨgam jaʼy ityiyaj jeʼm tɨtsɨnaxyukmɨ Sinaí.
11 Okmɨ iga jeʼm israelitajyaj topyajta de Egipto, Jehová ichak panijyaj iga kuyooxaoyyajiñ en jeʼm tabernáculo. Jeʼm levitajyaj nɨʼmayyajtatyim iga kuyooxaoyyajiñtyim idyɨk jeem. ¿Maaj wɨɨ kuixñeyajta jempɨk kuyooxaoyyajpa idyɨk en jeʼm tabernáculo o jempɨk toomi ityyaj idyɨk jeem? Dyaʼ, Jehová kuixpa idyɨk ityumpɨyyaj.
12. ¿Juutypɨk ikwiñkej Jehová iga dyaʼ iñeejaix jeʼm israelitajyaj jesɨgam jaʼy ityiyaj jeʼm tɨtsɨnaxyukmɨ? (Éxodo 40:38; aʼmɨtyim jeʼm imagenyaj).
12 Tumtum israelita wɨap idyɨk iamigoja Jehová. Dyaʼ tyi ijoo siiga kuyooxaoʼyba idyɨk en jeʼm tabernáculo o dyaʼ. Tan̈kujɨɨstaʼmiñ, Jehová iaʼmchiʼ iga ityumpɨyyaj wɨaiñ iaʼmyaj jeʼm uʼksɨʼ y jeʼm juktɨ iga ity idyɨk yukmɨ juuty ity jeʼm tabernáculo (maayɨʼ Éxodo 40:38). b Jeʼyukmɨ ityumpɨyyaj wɨap idyɨk iaʼmyaj juchix tsɨʼgoʼyba yɨʼp uʼksɨʼ, jeempɨgam wɨap idyɨk ipin̈yaj jempɨk iniityyaj y iktsukumyaj jeʼm ipuʼktuktɨk iga wɨaiñ ityun̈ɨyyaj (Núm. 9:15-23). Ityumpɨyyaj ijoodon̈ayajpa idyɨk juchix nɨkyajpa tun̈gak an̈eymɨ iga iwɨkumaton̈yajpa jesɨk pɨɨmi tɨʼkstaap ikwɨstɨk jeʼm trompetas de plata (Núm. 10:2). Wɨkejpa iga ityumpɨyyaj wɨap idyɨk iamigojyaj Jehová, ityɨgɨyyaj ityɨkjom, ikuixyajta y jɨɨxian̈chiyajtaap idyɨk, dyaʼ tyi ijoo siiga ityyaj idyɨk toomi o dyaʼ. Jeempɨktyim naspa sɨɨ: dyaʼ tyi ijoo juuty taitytyaʼm, Jehová tatoyba, takuixpa y takupujpa.
Iga jeʼm tabernáculo kukmɨ idyɨk ity ikwiñkejpa iga Jehová dyaʼ neejaixoʼyba. (Aʼmɨ jeʼm párrafo 12).
JEHOVÁ IKWIÑKEJPA IGA DYAʼ NEEJAIXOʼYBA
13. ¿Juutypɨk ikwiñkejpa Jehová yɨʼp jaama iga dyaʼ neejaixoʼyba?
13 Weeñi tɨwɨtam ityyaj toomi juuty ity jeʼm sede mundial de jeʼm Jehová itestigojyaj o de tuum sucursal. Y tun̈gakyaj kuyooxaoyyajpa jeem y wɨap in̈pɨʼtsyaj jeʼm tɨwɨtam iga yooxpadoyyajpa iga wattaiñ jeʼm an̈matkuy. Tun̈gakyaj kuyooxaoyyajpa juʼuts superintendentes de circuito o a tiempo completo. Pero jaʼyan̈yaj dyaʼ iniityaj yɨʼpyaj kumaykedoʼoyiyaj. Siiga mich dyatyim sɨʼ in̈kuyooxaoy yɨʼɨmpɨk, kupɨɨkɨ iga Jehová mityoyba, mityɨʼpneʼ ityɨkjom y mikuixpa (1 Ped. 5:7). Dios ichiʼiba ityumpɨy jeʼm iyooxakɨʼɨwiñyaj jeʼm wiʼkkuy espiritual, ijɨɨxian̈chiʼiba y ikupujpa.
14. ¿Tyityam ikwiñkejpa iga Jehová dyaʼ neejaixoʼyba?
14 Jehová iaʼmchiʼiñeʼ iga ityumpɨyyaj iniityyajiñ tuum Biblia yɨʼɨmpɨgam ikwiñkejpatyim iga dyaʼ neejaixoʼyba. Jeʼm Santas Escrituras jaytya en tukuteen an̈matyiimɨ: hebreo, arameo y griego. ¿Maaj iniityyaj tuum wɨnanɨgoʼoyi kun Jehová jempɨk imayyajpa jeʼm Biblia yɨʼpyaj an̈matyiimɨ? Dyaʼ jesaneʼ (Mat. 11:25).
15. ¿Juutypɨknam ikwiñkejneʼ Jehová iga dyaʼ neejaixoʼyba? (Aʼmɨtyim jeʼm imagenyaj).
15 Jehová dyaʼ ityɨʼppa iga iamigojayajiñ numaaj jempɨk wɨap immayyaj jeʼm Biblia en hebreo, arameo y griego. Jeʼ ixunba iga tantumpɨytyam tanaitytyaʼmiñ joodon̈oʼoyi dyaʼ tyi ijoo siiga tawɨkuyujneʼ o dyaʼ. Jeʼyukmɨ jeʼm Biblia jaytya jaʼyan̈ an̈matyiimɨ. Ityumpɨyyaj wɨap ijoodon̈ayaj jempɨk in̈kejpa y juutypɨk wɨap iamigojayaj Dios (2 Tim. 3:16, 17).
Iga jeʼm Biblia jayñeta jaʼyan̈ an̈matyiimɨ ikwiñkejpa iga Jehová dyaʼ neejaixoʼyba. (Aʼmɨ jeʼm párrafo 15).
TATSƗʼYTYAʼMIÑ JEʼM JEHOVÁ ITYƗKJOM
16. ¿Ityam ipɨktson̈ba Jehová jeʼm ityɨkjom? (Hechos 10:34, 35).
16 Tuum wɨbɨk xaaja iga taitytyaʼm jeʼm Jehová ityɨkkɨʼɨm. Dyaʼ i tun̈gak juʼuts jeʼ, takwiñkejaʼyba yaʼachan̈jamoʼoyi, tatoyba y tawɨpɨktson̈ba. Dyaʼ iñeejaixpa ni tuum, dyaʼ tyi ijoo juuty mɨjaneʼ, juuty tsukumneʼ, juʼtspɨy kuyujneʼ, juʼtsan̈ iamtyɨy y siiga pɨɨxiñ o yoomoʼ. Jehová ixunba iga ityumpɨy jempɨk ityɨʼpneʼ ikupɨgayyajiñ ian̈kiʼmayoʼoyiyaj (maayɨʼ Hechos 10:34, 35).
17. ¿Tyi tan̈kɨʼpin̈taʼmpa jeʼm tun̈gak kuyujijom?
17 En Salmo 15:1, David iwat yɨʼpyaj akwagoʼoyiyaj: «Oh, Jehová, ¿iapaʼap wɨap ityɨgɨy jeʼm impuʼktuktɨkjom? ¿Iapaʼap wɨap ityɨgɨy jeʼm in̈kotsɨkyuk kuaʼyñewɨʼɨp?». Y okmɨ, Jehová ijɨɨxian̈chiʼ iga ikutson̈iñ yɨʼpyaj akwagoʼoyiyaj. Jeʼm tun̈gak kuyujijom tan̈kɨʼpin̈taʼmpa tyityam tan̈wadyiñ iga juchixkej tatsɨʼyiñ jeʼm Jehová ityɨkjom.
WAAÑI 32 ¡Ponte de parte de Dios!
a Ezequiel 37:26, 27: 26 «‹«Y an̈watpa kun jeʼeyaj tuum pacto de paz; y dyaʼ anaktogoʼyba. Antsakyajpa, anjaʼyan̈watyajpa y anakkaʼmpa jeʼm santuario kukmɨ juuty ityyaj jeʼeyaj y jemum tsɨʼyba. 27 Jeʼm antɨk itypa kun jeʼeyaj; ɨch atsɨʼyba juʼuts iDios y jeʼeyaj tsɨʼyyajpa juʼuts an̈kumun.
b Éxodo 40:38: Jesɨgam jeʼm israelitas jaʼy sɨʼiyaj yɨʼɨm jeexɨk ityumpɨyyaj iaʼmyajpa idyɨk jeʼm Jehová iuʼksɨʼ iga ity yukmɨ de jeʼm tabernáculo y tsuʼukɨʼɨm jeʼm juktɨ.
