1-2. Kal konviti ku Jeova fasi pa si adoraduris fiel?

 KUMA ku bu ta oja Jeova na bu vida? Talves bu pudi ruspundi: ‘Jeova i ña Pape, ña Deus i ña Amigu’. Ma sera ki bu ciga ja di pensa sedu un di si kumbidadus ki gosta ciu del?

² Rei Davi kompara amisadi di Jeova ku si servus fiel, ku amisadi ku ta ten entri kin ku ta risibi algin na si kasa ku kilis ku bin mora ku el. I punta: “SIÑOR, kin ku pudi mora na bu kasa? Kin ku pudi mora na bu monti sagradu?” (Sal 15:1) Ku es palabras nspiradu no aprindi di kuma, no pudi mora ku Jeova, ku signifika, sedu si amigus. Sera ki es i ka un konviti garandi ku bin di Jeova?

JEOVA KUMBIDANU PA NO MORA NA SI KAU

3. Kin ki purmeru algin ku Jeova kumbida na si kau, i kal relason ku tenba na se metadi?

³ Jeova staba el son antis di kumsa kumpu tudu kusas. Ma na un sertu mumentu, i risibi si purmeru Fiju na si kau di mora simboliku. Jeova kontentiba ku es nobu funson ki tene, ku sedu, di risibi jintis na si kau. Biblia fala di kuma Jeova teneba “kontentamentu” pa si Fiju. Pa utru ladu, Jesus “ta fikaba sempri ku pas si dianti.” — Dit 8:30.

4. Kuma ku Jeova aumenta si kau di mora puku-puku?

 ⁴ Dipus Jeova kumpu anjus, i kumbida elis pa e mora na si kau tambi. Anjus comadu di fijus di Deus, i e kontenti di sta juntu ku Jeova. (Jo 38:7; Dan 7:10) Pa manga di anus, amigus di Deus seduba so kilis ku mora na seu. Mas tardi i kumpu pekaduris, i elis tambi e pudiba mora ku Jeova. Ku tempu, alguns ku moraba ku Jeova seduba Enoki, Noe, Abraon ku Jo. Es adoraduris di bardadi comadu di amigus di Deus o kilis ku yandaba ku “Deus” di bardadi. — Kum 5:24; 6:9; Jo 29:4; Isa 41:8.

5. Ke ku no pudi aprindi di profesia ku sta na Ezekiel 37:​26, 27?

⁵ Pa manga di anus, Jeova kontinua kumbida si amigus pa e mora na si kau. (Lei Ezekiel 37:​26, 27.) Pur isemplu, na profesia di Ezekiel no aprindi di kuma, Deus misti pa si servus fiel tene un amisadi intimu ku el. I purmiti fasi “kontratu di pas ku elis”. Es profesia fala di tempu ku kilis ku tene speransa di vivi na seu ku kilis ku tene speransa di vivi na Tera, na sta unidu na kau di mora simboliku di Jeova i e na sedu ‘un rebañu son’. (Jon 10:16) No sta na vivi nes tempu!

DEUS TA KUIDA DI NOS NA KUALKER KAU KU NO STA NEL

6. Kuma ku un algin ta mora na kau di Jeova, i nunde ku si kau di mora sta nel?

⁶ Na tempus bibliku, un kau di mora i un lugar nunde ku un algin pudi diskansa i proteẑi kontra mau tempu. Un algin ku bai mora na un kau pudiba spera pa dunu di kasa kuida del diritu. Ora ku no dedika no vida pa Jeova, no ta pasa mora na si kau di mora simboliku. (Sal 61:4) No ta tene manga di kumida spiritual, i no ta tene amisadi ku utrus ku mora tambi na kau di Jeova. Kau di mora simboliku di Jeova ka sta so na un sertu zona. Talves bu ciga di bai pa utru tera, i mati kongresu nunde ku bu oja utrus ku kontenti di sta na kau di mora di Jeova. Es kau di mora pudi ojadu na kualker kau ku servus fiel di Jeova sta. — Apok 21:3.

7. Pabia ku no pudi fala di kuma servus fiel ku muri, kontinua mora na kau di Jeova? (Jubi tambi foto.)

 ⁷ Ke gora di servus fiel ku muri? Sera ki no pudi fala di kuma e kontinua mora na kau di Jeova? Sin! Pabia ku no pudi fala kila? Pabia Jeova ta lembra delis diritu. Jesus fala sin: “Moisés propi mostra kuma mortus na lanta, oca i sta pertu di ki arvurisiñu, i coma Siñor Deus di Abraon, Deus di Isaki, Deus di Jakó. Deus i ka Deus di mortus, ma di kilis ki bibu. Pa el tudu sta bibu.” — Luk 20:​37, 38.

BENEFISIUS KU RESPONSABILIDADIS KU NO TENE

8. Kal benefisius ku no tene di mora na kau di Jeova?

⁸ Un kau di mora normal, pudi sedu un kau di diskansu i proteson kontra mau tempu. Asin tambi ku kau di mora di Jeova ta da proteson kontra kualker kusa ku pudi dana se amisadi ku el, tambi i ta da elis speransa pa futuru. Ora ku no kontinua pertusi di Jeova, Satanas ka na pudi fasi nada ku pudi fasinu mal pa tudu tempu. (Sal 31:23; 1 Jon 3:8) Na nobu mundu, Jeova na kontinua proteẑi si amigus fiel i ka so kontra danu spiritual, ma tambi kontra mortu. — Apok 21:4.

9. Kuma ku Jeova misti pa kilis ku mora na si kau komporta?

⁹ Na bardadi, i un kusa garandi mora na kau di Jeova, ku sedu tene un amisadi intimu ku el, i ku ka ta kaba. Kuma ku no dibi di komporta si no misti kontinua mora na kau di Jeova? Si bu kumbidadu pa kau di un algin, bu na gostaba di sibi ke ki i misti pa bu fasi. Pur isemplu, i pudi misti pa bu tira sapatus antis di bu yentra, i bu na fasil di livri vontadi. Di mesmu manera, no gosta di sibi ke ku Jeova misti pa no fasi, si no misti kontinua mora na si kau. No amor pa Jeova na lebanu fasi tudu ku no pudi ‘pa i pudi kontenti ku nos na tudu’. (Kol 1:10) I bardadi di kuma Jeova i no Amigu, ma tambi i no Deus i no Pape, ku mersi no rispitu. (Sal 25:14) No ka dibi di diskisi nunka des, i no dibi di tene sempri rispitu garandi pa rel. Es rispitu na judanu ivita komportamentu ku na pul i fika mal. Sin duvida, no misti “yanda umildi” ku no Deus. — Mik 6:8.

JEOVA TRATA ISRAELITAS SIN FASI SKUJU

10-11. Ke ku ta mostra di kuma Jeova trata israelitas na lala di Sinai sin fasi skuju?

¹⁰ Jeova ka ta fasi skuju na manera ki ta trata kilis ku mora na si kau. (Rom 2:11) No pudi sibi des, na manera ki trata israelitas na lala di Sinai.

¹¹ Dipus di liberta si povu di skravidon na Ejitu, Jeova kuji saserdotis pa e sirbi na tabernakulu. Levitas kujidu pa fasi utrus tarbaju na tabernakulu. Sera ki Jeova mas ta kuida diritu di kilis ku ta sirbi na tabernakulu o di kilis ku mora pertu del? Nau! Jeova ka ta fasi skuju.

12. Ke ku Jeova fasi pa judanu ntindi di kuma i trata israelitas sin fasi skuju? (Saida 40:38) (Jubi tambi diseñu.)

¹² Kada israelita pudiba tene amisadi intimu ku Jeova, i ka mporta si  ta sirbiba na tabernakulu o si moraba pertu del o nau. Pur isemplu, Jeova fasi pa tudu nason pudiba oja kuluna di nuven ku kuluna di fugu riba di tabernakulu. (Lei Saida 40:38.) Ora ku nuven kumsa ku bai pa utru ladu, te mesmu kilis ku moraba lunju di tabernakulu ta konsigi ojal. Asin e pudiba ruma se kusas, dismonta se tendas i bai juntu ku utrus. (Num 9:​15-23) Tudu jintis pudiba obi son forti di dus korneta di prata ku ta daba sinal pa tudu jintis kumsa ku bai. (Num 10:2) Pa kila, mora pertu di tabernakulu ka signifika di kuma un algin tene amisadi mas forti ku Jeova di ki kilis ku moraba lunju. Pa kontrariu, tudu israelita pudiba mora na kau di Jeova, i konta ku si orientason ku proteson. Di mesmu manera, i ka mporta nunde ku no sta na vivi na Tera, Jeova na amanu, i na kuida di nos i proteẑinu.

AOS TAMBI JEOVA KA TA FASI SKUJU

13. Kal ki un di manera ku Jeova mostra kuma i ka ta fasi skuju aos?

¹³ Aos, alguns di povu di Deus mora pertu di sedi mundial o di skritoriu di filial di Tustumuñas di Jeova. Utrus sta na sirbi nes kaus. Pa kila, e pudi partisipa na manga di atividadis ku ta fasidu nes kaus i sta juntu ku kilis ku ta toma diantera. Alguns ta sirbi suma superintendentis viaẑanti o partisipa na utru tipu di sirvisu spesial di tempu kompletu. Si bu ka fasi parti des jintis, tene sertesa di kuma bu kontinua mora na kau di Jeova, tambi i amau. I kunsiu diritu, tambi i na dau ke ku bu pirsisa del. (1 Ped 5:7) Tudu povu di Deus ta risibi kumida spiritual, orientason ku proteson ke pirsisa del.

14. Kal ki utru isemplu ku ta mostra di kuma Jeova ka ta fasi skuju?

 ¹⁴ Utru isemplu ku ta mostra di kuma Jeova ka ta fasi skuju, i manera ki disa pa Biblia sta dispunivel pa jintis na mundu ntidu. Na kumsada, Skrituras Sagradu skirbiduba na tris lingua: Ebraiku, Aramaiku ku Gregu. Sera ki kilis ku pudi lei Biblia nes linguas, tene amisadi mas forti ku Jeova di ki kilis ku ka pudi leil nes linguas? Nau, e ka tene. — Mat 11:25.

15. Ke ku ta mostra di kuma Jeova ka ta fasi skuju? (Jubi tambi fotos.)

¹⁵ Jeova ka ta kumbidanu pa no sedu si amigus, so pabia di kuma no tene skola kumpridu, o no sibi papia linguas ku Biblia skirbidu nel. Jeova ka ta da si jiresa so pa jintis ku tene skola kumpridu, ma tambi i ta dal pa jintis na mundu ntidu, mesmu se tene skola kumpridu o nau. Si Palabra, Biblia, traduzidu na manga di linguas. Asin, jintis na tudu mundu pudi benefisia di si nsinus i aprindi kuma ke pudi sedu amigus di Deus. — 2 Tim 3:​16, 17.

KONTINUA MORA NA KAU DI JEOVA

16. Di akordu ku Atus 10:​34, 35, kuma ku no pudi kontinua mora na kau di Jeova?

¹⁶ I un kusa garandi dimas di risibidu pa Jeova na si kau di mora simboliku. I ka ten algin suma el ku mas ta mostra bondadi, amor, i risibi utrus diritu. Fora di kila, i ka ta fasi skuju, i ta risibi tudu jintis, i ka mporta anos i di kal zona, kultura, edukason ku no risibi, no rasa, no etnia, no idadi o si no sedu macu o femia. Ma, Jeova ta seta risibi so kilis ku ta sigi si normas. — Lei Atus 10:​34, 35.

17. Ke ku no na fala del na studu ku na bin?

¹⁷ Suma ki faladu na Salmu 15:​1, Davi fasi es purguntas: “SIÑOR, kin ku pudi mora na bu kasa? Kin ku pudi mora na bu monti sagradu?” Dipus Jeova usa Davi, pa ruspundi es purguntas. Na studu ku na bin, no na fala di kusas ku no dibi di fasi pa kontenta Jeova i kontinua sedu si amigus.