1, 2. ¿Imaraykutaj nisunman Jehovaj invitadosnin kayta atisqanchejta?

 JEHOVAMANTA wajkunaman willarispaqa ichapis nisunman: “Jehovaqa amigoy, tatay, Diosniytaj”, nispa. Chayri ichapis chayman rijchʼakoj waj palabrasta oqharisunman. Chaywanpis, ¿nisunmanchu pay Wajyarikuwajninchej kasqanta?

² Rey Davidqa nerqa Jehovaj kamachisnenqa invitadosnin jina kasqankuta. Pay nerqa: “Jehová Diosníy, ¿pitataj wasiykiman wajyarikuwajri? ¿Pitaj santo orqoykipi tiyakuyta atinmanri?”, nispa (Sal. 15:1). Chay nisqanpi reparanchej Jehovaj invitadosnin kayta atisqanchejta, nisunman amigosnin. Chaytaj may sumajpuni.

JEHOVÁ MUNAN INVITADOSNIN KANANCHEJTA

3. ¿Pitaj Jehovaj ñaupaj kaj invitadon karqa, chanta imaynataj iskayninku kasharqanku?

³ Jehovaqa niraj tukuy imata ruwashaspa sapitallan kasharqa. Chayrayku toldo wasinpi ñaupaj kay invitadonqa Jesús karqa, ñaupaj kaj Wawan kasqanrayku. Jehovataj chaymanta may kusisqapuni kasharqa. Bibliaqa nin Wawanqa “paypaj kusikunan” kasqanta, Jesustaj “paypa ñaupaqenpi tukuy tiempo kusisqa” kasqanta (Pro. 8:30).

4. ¿Pikunatawantaj Jehová toldo wasinman wajyarikullarqataj?

⁴ Aswan qhepaman Jehovaqa, angelestañataj ruwarqa, paykunatapis toldo wasinman wajyarikullarqataj. Bibliaqa  nin paykunaqa ‘Diospa wawasnin’ kasqankuta, ladonpi kaspataj may kusisqa kasqankuta (Job 38:7, sutʼinchaynin; Dan. 7:10). May chhika watasta Jehovaj amigosnenqa cielopi tiyakojkunalla karqanku. Aswan qhepamantaj Diosqa runastañataj ruwarqa, payta kasukoj runastataj toldo wasinman wajyarikorqa. Paykunamanta wakenqa karqanku: Enoc, Noé, Abrahán, Job ima. Bibliaqa sapa ujninkumanta nin Diospa amigosnin kasqankuta, chayri “cheqa Diosllawanpuni” purisqankuta (Gén. 5:24; 6:9; Job 29:4; Isa. 41:8).

5. ¿Imatá yachachiwanchej Ezequiel 37:26, 27 versiculospi kaj profecía?

⁵ Watas pasasqanman jina, Jehovaqa runasta toldo wasinman wajyarikullarqapuni amigosnin kanankupaj (Ezequiel 37:26, 27 leey). Ezequielpa profecianpeqa yachakunchej Diosninchejqa mayta munasqanta kamachisnin amigosnin kanankuta. Jehovaqa nerqa “paykunawan allinyakuy tratota” ruwananta. Chay profeciapeqa nerqa cielopi kausakuyta suyakojkunawan, kay jallpʼapi kausakuyta suyakojkunawan “uj tropalla” kanankuta (Juan 10:16). Chaytaj kay tiempopi juntʼakushan.

MAYPI KAJTINCHEJPIS JEHOVÁ CUIDAWANCHEJ

6. ¿Maykʼajtaj Jehovaj toldo wasinman yaykunchej, chanta maypitaj chay toldo wasi kashan?

⁶ Ñaupa tiempopi toldo wasisqa telamanta ruwasqas karqanku. Chaypi samarikuspa chirimanta, paramantawan jarkʼakoj kanku. Uj toldo wasiman yaykojkunaqa yacharqanku toldo wasiyojqa paykunawan kʼacha kananta. Noqanchejqa Jehovaj toldo ‘wasinman’ yaykunchej kausayninchejta payman qopuspa (Sal. 61:4). Chaypi kaspataj ashkha yachachiykunata mikhunata jina japʼinchej, Jehovaj waj invitadosninwanpis khuska karikuyta atinchej. Chanta, ¿maypí chay toldo wasi kashan? Mana uj lugarllapichu kashan, manachayqa maypichá Diosta kasukoj runas tiyan chaypi kashan. Chayta sutʼita repararqanku waj suyuman viajaj hermanosninchej. Wakenqa asamblea especialman rispa Diospa toldollanpitaj kaj runasta rejserqanku (Apo. 21:3).

7. Diosta sirvispa wañupojkuna, ¿paypa toldo wasinpi invitadosllapunichu kanku? (Fototawan qhawariy).

⁷ Jehovaj kamachisninmanta wakenqa wañupunkuña. Paykunarí, ¿Jehovaj toldo wasinpi invitadosllapunichu kanku? Arí. ¿Imaraykú chayta ninchej? Bibliaqa  nin paykunaqa Jehovaj yuyaynillanpipuni kashasqankuta. Jesús nerqa: “Wañusqas kausarimunankutaqa, Moisespis sutʼincharqa khishkarara sachʼitamanta qhelqasqanpi, maypachachus Jehová Diosmanta nerqa ‘Abrahanpa Diosnin, Isaacpa Diosnin, Jacobpa Diosnin’ kasqanta. Payqa mana wañusqaspa Diosninchu, manachayqa kausajkunajta. Paypajqa tukuyninku kausashanku”, nispa (Luc. 20:37, 38).

BENDICIONESTA JAPʼINAPAJ, ¿IMATÁ RUWANANCHEJ TIYAN?

8. ¿Ima bendicionestataj japʼinchej Jehovaj toldo wasinpi kaspa?

⁸ Uj toldo wasipeqa chirimanta, paramanta jarkʼakunchej, samarikunchejtaj. Ajinallatataj Jehovaj toldo wasinpipis jarkʼasqa kanchej paypa amigollanpuni kanapaj. Chantapis uj sumaj suyakuyniyoj kanchej. Jehovaj qayllallanpipuni kajtinchej Satanasqa mana ni imanayta atiwanchejchu mana allinchayta atinapaj jinaqa (Sal. 31:23; 1 Juan 3:8). Paraisopipis Jehovaqa kasukoj amigosninta jarkʼallanqapuni paymanta mana karunchakunankupaj, paykunataqa wañuymantapis jarkʼallanqataj (Apo. 21:4).

9. ¿Imatataj ruwananchej tiyan Jehovaj invitadosnillanpuni kanapaj?

⁹ Jehová toldo wasinman yaykuchiwasqanchejqa may sumajpuni. Paywan wiñaypaj amigos kayta atinchej. Jinapis, ¿imatá ruwananchej tiyan invitadosnillanpuni kanapaj? Pillapis wasinman wajyarikuwajtinchejqa, imatachus wasiyoj ruwananchejta munan, chaytapuni ruwayta munanchej. Sichus wasiyoj mana zapatosnillayoj wasinman yaykunanchejta niwasunman chayqa, chaytaqa tukuy sonqo ruwasunman, ¿icharí? Ajinallatataj Jehovaj invitadosninpis yachayta munanchej imatachus pay ruwananchejta munasqanta, ajinamanta toldo wasillanpipuni kanapaj. Payta maytapuni munakusqanchejrayku tukuy ima ruwasqanchejwan kusichiyta munanchej (Col. 1:10). Jehovaqa mana amigollanchejchu, manachayqa Diosninchej, Tatanchejtaj. Chayrayku maytapuni respetananchej tiyan (Sal. 25:14). Chaytaqa ni jaykʼaj qonqapunanchejchu tiyan. Sonqonta nanachiyta manchachikusqanchejrayku, llimphu kausayniyoj kanapaj kallpachakusun. Chantapis Dioswan “purispa kʼumuykukoj sonqo” kayta munanchej (Miq. 6:8).

MANA WAKIN ISRAELITASLLATACHU ALLINPAJ QHAWARQA

10, 11. ¿Imataj sutʼita reparachiwanchej Jehová tukuy kamachisninta uj rejllata qhawasqanta?

¹⁰ Jehovaqa tukuy invitadosninta “uj rejllata qhawan” (Rom. 2:11). Ajina karqa israelitaswan Sinaí chʼin jallpʼapi kashajtinku.

¹¹ Israelitasta Egiptopi esclavos kasqankumanta kacharichiytawan, Jehovaqa sacerdotesta churarqa yupaychana toldonpi sirvinankupaj. Chantapis levitasta churarqa chay toldopi wakin ruwanasta ruwanankupaj. Chaywanpis, ¿aswan sumajtachu Jehová cuidarqa yupaychana toldopi sirvejkunata chayri chay qayllaspi tiyakojkunata? Mana. Payqa tukuyninkuta sumajta cuidarqa.

12. Israelitas chʼin jallpʼapi kashajtinku, ¿imaynatá Jehová rikucherqa tukuyninkuta uj rejllata qhawasqanta? (Éxodo 40:38; dibujotawan qhawariy).

¹² Tukuy israelitas Jehovaj amigosnin kayta aterqanku, yupaychana toldopi sirvispapis manapis, chay qayllapi tiyakuspapis manapis. Jehovaqa yupaychana toldo patapi chhoqo phuyunta churarqa, chhoqo ninatawan. Chaytataj churarqa tukuy israelitas rikunankupaj jina (Éxodo 40:38 leey).  Chay phuyu oqharikojtintaj, tukuynin israelitas chayta rikoj kanku, karupi kajkunapis. Phuyu oqharikusqanta rikuspataj, tukuy imasninkuta qʼepichakoj kanku, toldo wasisninkuta phaskaraj kanku, tukuyninkutaj ujllapi purirej kanku (Núm. 9:15-23). Chantapis puririnankupajqa qolqe metalmanta iskay cornetasta sinchʼita waqachej kanku, chaytataj tukuy israelitas uyarej kanku (Núm. 10:2). Reparanchej jina, mana yupaychana toldo qayllapi tiyakojkunallachu Jehovaj sumaj amigosnin kayta aterqanku. Astawanpis tukuy israelitas Jehovaj invitadosnin kayta aterqanku, Jehovataj tukuyninkuta pusaj, jarkʼajtaj. Kunanpis ajinallataj: Maypi tiyakojtinchejpis Jehová munakuwanchej, cuidawanchej, jarkʼawanchejtaj.

JEHOVAQA KUNANPIS TUKUYTA UJ REJLLATA QHAWAN

13. ¿Imaynatataj Jehová rikuchin kay tiempopipis tukuy kamachisninta uj rejllata qhawasqanta?

¹³ Wakin hermanosninchejqa centralninchej qayllapi chayri uj sucursal qayllapi tiyakunku, wakintajrí chaypi sirvinku. Chayrayku paykunaqa imastachus chaypi ruwakusqanpi yanapakunku, Diospa llajtanta ñaupajman apaj hermanoswan khuskataj kanku. Wakin hermanostaj congregacionesta waturejkuna kanku chayri tiempo juntʼasqata Jehovapaj llankʼanku. Chaywanpis ashkha hermanosninchejqa mana ajinasmanta yanapakuyta atinkuchu. Qanpis chay jinasmanta mana yanapakuyta atinkichu chayqa, ama iskayrayaychu Jehová munakususqanmanta, invitadonta jina japʼikususqanmanta, cuidasusqanmantapis (1 Ped. 5:7). Diosninchejqa tukuy kamachisninman jinallataj cheqa yachachiykunata mikhunata jina qosonqa, pusasonqa, jarkʼasonqataj.

14. ¿Imaynamantataj Jehová rikuchillantaj tukuyta uj rejllata qhawasqanta?

¹⁴ Jehovaqa tukuyta uj rejllata qhawasqanta rikuchillantaj Bibliata tukuy runasman chayachispa. Diospa Palabranqa hebreopi, arameopi, griegopi ima qhelqakorqa.  Chay parlaykunapi Diospa Palabranta leeyta atejkuna, ¿astawanchu Diosman qayllaykunku? Mana ajinachu (Mat. 11:25).

15. ¿Imataj rikuchillawanchejtaj Jehová tukuyta uj rejllata qhawasqanta? (Fotostawan qhawariy).

¹⁵ Jehová allinpaj qhawanawanchejpajqa mana profesionniyojpunichu kananchej tiyan, nitaj ima parlaykunapichus Biblia qhelqakorqa chay parlaykunatachu parlananchej tiyan. Jehovaqa tukuy runasman yachayninta qon, mana letrayoj kajkunamanpis. Palabran Bibliaqa may chhika parlaykunamanña traducikun. Chayrayku tukuy suyusmanta runas Bibliamanta yachakuyta atinku, ajinamantataj Diospa amigosnin kayta atinku (2 Tim. 3:16, 17).

JEHOVAJ ÑAUPAQENPI ‘ALLINPAJ QHAWASQALLAPUNI’ KANA

16. ¿Pikunatataj Jehová toldo wasinman wajyarikun? (Hechos 10:34, 35).

¹⁶ Jehovaj toldo wasinpi kayqa may sumajpuni. Jehovaqa may kʼacha, tukuy sonqo munakuwanchej, wajyarikuwanchejtaj, pay jinaqa mana waj kanku. Payqa tukuyta uj rejllata qhawawanchej. Mana maymantachus kasqanchejtachu, suyunchejtachu, ima culturayojchus kasqanchejtachu, nitaj profesionniyojchus manachus kasqanchejtachu qhawan, nillataj ima rijchʼayniyoj kasqanchejtachu, ima edadniyojchus kasqanchejtachu chayri qharichus, warmichus kasqanchejtachu. Chaywanpis Jehovaqa munan tukuy invitadosnin kamachiykunasninta kasukunankuta (Hechos 10:34, 35 leey).

17. ¿Imatataj qhepan yachaqanapi yachakusun?

¹⁷ Salmo 15:1 versiculopi Davidqa kay tapuykunata ruwarqa: “Jehová Diosníy, ¿pitataj wasiykiman wajyarikuwajri? ¿Pitaj santo orqoykipi tiyakuyta atinmanri?”, nispa. Chantá Jehová yuyaychasqanman jina payllataj chay tapuykunaman kuticherqa. Qhepan yachaqanapi yachakusun imatachus ruwananchej kasqanta Jehovaj invitadosnillanpuni kanapaj.