23 CAJ YACHACHICUY
28 CAJ CANCIÓN Amigulä nimäshun Jehová
Jehová wasinman invitamanchi amiguncuna canapaj
“[Wasëcho] paykunawan täshaq. Noqami Diosnin kashaq” (EZEQ. 37:27).
¿IMATAJ YACHACUSHUN?
Yachacushun Jehová imano invitamanchi wasincho caycänapaj y tantiashunpis imano shumajmi cuidamanchi.
1, 2. Salmo 15:1 nishganno, ¿imapätaj Jehová wasinman invitamanchi?
PILAPIS tapushuptiqui gampaj Jehová pï cashganta, capaz ninquiman: “Jehovaga amigömi, Taytämi y Diosnëmi” nir. O capazchi jucnopapis gayanquiman. Y, ¿nishwanchuraj Jehová wasincho caycänapaj invitamajninchi cashganta?
2 Jehová mana jaguicoj sirvejnincunata invitaycun wasincho amiguncunano caycänanpaj, y rey David caytami nergan: “TAYTA DIOS, ¿piraq templuykiman [o wasiquiman] yaykunman? ¿Piraq sagrädu jirkannikicho sirvishunkiman?” (Sal. 15:1). Cay texto yachachimanchi Jehovapa wasincho amiguncunano imayyajpis cayta puedishganchita. ¡Cayga imawanpis tincunchu!
JEHOVÁ INVITAMANCHI WASINCHO CAYCÄNANCHIPAJ
3. ¿Pitataj Jehová wasinman puntata invitargan y imanotaj ishcancuna sienticurgan?
3 Jehová manaraj pilatapis camarga japalanmi caycargan. Nircur guechpa caj wamran Jesusta camargan wasincho caycänanpaj. ¡Jehovaga alapachi cushicurgan japalan manana caycaptin! Bibliaga wilacun Jehová alapa cushicushganta wamranwan caycar, Jesuspis ‘waran waran kushikurqan’ Jehovapa naupancho imaypis caycar (Prov. 8:30).
4. ¿Pïcunataj tiempuwan Jehovapa amiguncunaman ticrargan?
4 Tiempuwanna, Jehová achca angelcunatapis camargan y paycunata invitargan wasincho caycänanpaj. Bibliaga nin angelcunaga Diospa wamrancuna cashganta y paycunaga Diospa laduncho cushishga carcaycargan (Job 38:7; Dan. 7:10). Maychicaj watacunapa paycunawan Jehová cielucho amigo capäcurgan. Nircurna cay Pachacho runacunata camargan paycunapis Jehovapa amiguncuna cananpaj. Waquin Jehovapa amiguncuna cargan Enoc, Noé, Abrahán y Job. Paycunaga “Tayta Dios munashqannömi kawarqan” (Gén. 5:24; 6:9; Job 29:4; Is. 41:8).
5. ¿Imatataj yachachimanchi Ezequiel 37:26, 27 textucunacho nishganga?
5 Achca watacunapa Jehová amiguncunata invitaycan wasincho caycänanpaj. Chayta musyanapaj profeta Ezequiel wilacushganpita yachacushun (leiriy Ezequiel 37:26, 27). Cay profecía yachachimanchi Jehová alapa munaycan cäsucoj siervuncuna amigunman ticrar cushishga cananpaj, y nin “paykunawanmi jawka kawananpaq pactuta rurashaq”. Cayga cumplicunman cargan cielupaj acrashgacuna y Pachacho tiyananpaj shuyarajcunapis juntula carcaycaptin Diospa wasincho (Juan 10:16). Y canan wichan chaytami ricaycanchi.
MAY CHAYCHO CAYCAPTINCHIPIS JEHOVÁ CUIDAMANCHI
6. ¿Imata rurartaj Diospa wasinman yaycunchi, y maychotaj chay wasi caycan?
6 Unaycho runacuna tolduta o carpata ruraycur chaycho jamacärej y tamyapita o gasaypitapis pacacärej. Y pilapis chay tolduman posadacoj chayaptenga, shumaj atiendishga cananpämi shuyarargan. Noganchipis Jehovalata imayyajpis sirvinapaj auniptinchega, Diospa wasinman yaycushganchinomi caycanchi (Sal. 61:4). Chaychomi achca yanapacuycuna caycan Jehovawan más amigo canapaj y waquin siervuncunawanpis cushishga caycänapaj. Chay wasi japuyga manami juc sitiulachochu caycan, sinoga may chaycho Diospa siervuncuna cashganchomi caycan. Waquin hermanucunaga juc naciuncunaman asamblea cashganman aywar cuentata gocurgan chayga rasunpa cashganta, y chaychomi reguirgan Diospa wasincho caycaj waquin amiguncunata (Apoc. 21:3).
7. ¿Imanirtaj ninchi Diospa siervuncuna wanushgana caycaptinpis Diospa wasincho caycanraj? (Garancho caycaj fotuta ricay).
7 Y, ¿ima nishwantaj unay mana jaguicoj Diospa siervuncuna wanushgana caycaptin? ¿Paycunaga Diospa wasincho caycanchuraj? Aumi. ¿Imanirtaj chayta ninchi? Bibliaga nin Jehovapa yarpaynincho paycuna caycashganta. Jesús wilacurgan: “Wanushkuna kawarimunanpaq kashqantaqa Moiséspis qelqashqancho tantiyatsimantsimi. Paytami rupaykaq shirakacho yuriparkur Tayta Dios kayno nirqan: ‘Noqaqa Abrahampa, Isaacpa y Jacobpa Diosninmi kaykä’. Tayta Diosqa manami wanushkunapa Diosnintsu kaykan, sinöqa kawaykaqkunapa Diosninmi. Paypaqqa wanushkunapis kawaykanmi” (Luc. 20:37, 38).
Diospa cuyashga siervuncuna wanushgana caycaptinpis Jehovapa yarpaynincho caycan. (7 caj parrafuta ricay).
IMATA CHASQUISHGANCHICUNA Y IMATA RURANAPAJ CAJPIS
8. ¿Ima bendiciuncunataj chasquinchi Diospa wasincho caycar?
8 Imanomi juc toldu o carpa yanapacun jamacunapaj y imapitapis pacacunapaj, chaynolami Diospa wasincho cashpanchega yanapämanchi amistäninta mana ogranapaj y shamoj tiempucho ali cawaytapis tarinapaj. Jehovapa laduncho imaypis caycarga, Satanás ushacächimänanchita manami puedingachu (Sal. 31:23; 1 Juan 3:8). Mushoj Pachachoga, Jehová cuyashga siervuncunata espiritual cajcho cuidanga y wanuypitapis libranga (Apoc. 21:4).
9. ¿Imanotaj Jehovapa invitaduncuna wasincho comportacunman?
9 ¡Diosga munan wasincho caycar imaycamapis amiguncuna canapaj y chayga imawanpis tincunchu! Pero, ¿imanotaj comportacunanchi Diospa wasincho amiguncunano caycar? Pilapis wasinman invitamaptinchega capaz wasiyojga munanman zapatunchita limpiapacurir-raj yaycunapaj y chayta musyar cushishgachi rurashun. Chaynolami, Jehovapis cushicunanpaj ali comportacunanchi wasincho imayyajpis caycänapaj. Payta cuyashpanchimi alapa calpachacunanchi imaypis alicunalata ruranapaj (Col. 1:10). Jehová Dios amigunchi captinpis, Taytanchi y Diosninchimi captin alapa respetananchi (Sal. 25:14). Chaymi pay pï cashganta imaypis gongashwanchu, payta alapa respetarga manchacushwanmi mana alita mana ruranapaj y laquichiytapis munashunchu. Jehovapa ricaynincho humilde cayta munanchi (Miq. 6:8).
LAPAN ISRAELITACUNATA IGUALPA TRATARGAN
10, 11. ¿Imanotaj unay israelitacunata Jehová lapancunata igualpa tratargan?
10 Jehová lapan sirvejnincunata igualpa ricargan (Rom. 2:11). Sinaí chunyaj jircacho Jehová imano israelitacunata tratashganta yarpäshun.
11 Israelitacuna Egiptupita librina yargupäcuptin, Jehová sacerdoticunata churargan sagrado tolducho sirvinanpaj. Jina levitacunatapis juc aruycunata gorgan rurananpaj. Chaura, ¿nishwanchuraj sagrado tolducho arojcunalata y chaypita cerca caycajcunalata Jehová cuidashganta? Manami, Jehovaga lapancunata igualpa cuidargan.
12. ¿Imanirtaj ninchi chunyaj jircacho israelitacunata Jehová lapancunata igualpa ricashganta? (Éxodo 40:38; dibujucunatapis ricay).
12 Campamentuchoga lapan israelitacuna Jehovawan amigo cayta puedirganmi. Ima carguta charaptinpis o carucho caycaptinpis lapan israelitacuna ricargan sagrado toldo janancho nina rataraycajta y pucutaytapis (leiriy Éxodo 40:38). Chay pucutay cuyur galaycuptin, lapan israelitacuna imaycancunata alistacur galaycurgan pucutay mayninpa aywaptin guepanta aywananpaj (Núm. 9:15-23). Jina lapancuna ishcay trompetacuna wagaycajta wiyar, musyapäcurgan horana cashganta yargunanpaj (Núm. 10:2). Pipis sagrado toldupa cercalancho tiyarga, manami niycarganchu Jehovapa más amigun cashganta. Chaypa trucan, Jehovaga lapan israelitacunata cuidargan y chaparganpis; lapancuna Jehovapa amigun cayta puedipäcurganmi. Canan wichanpis, maycho tiyaptinchipis Jehovaga lapanchita cuyamanchi, cuidamanchi y chapämanchipis.
Campamentupa chaupincho sagrado toldo caycaptin Jehová musyachicurgan lapancunata igualpa ricashganta. (12 caj parrafuta ricay).
CANAN WICHANPIS JEHOVÁ LAPANCUNATA IGUALPA RICAN
13. ¿Imacunachotaj ricacämun Jehová lapan sirvejnincunata igualpa ricashganta?
13 Waquin hermanucunaga Betelpa cercalancho tiyapäcun. Y juccunaga chaycho arupäcun. Paycunaga chaycho imaycacunata rurar yanapacun y pushacoj hermanucunatapis reguipäcun. Waquincunana congregaciuncunata watucamojno yanapacun y juccunaga waquin ruraycunacho lapan tiempunwan yanapacärin. Pero achcajmi chay ruraycunacho yanapacuyta puedinchu. Chayno captinpis, ama gongaychu Jehová lapan sirvejnincunata igualpa ricashganta, yanapashganta y cuyashgantapis (1 Ped. 5:7). Chaymi seguro caycäshun Jehová lapan sirvejnincunata imaypis pushananpaj, cuidananpaj y imapitapis chapänanpaj.
14. ¿Imano mastaj Jehová musyachicun lapan runacunata igualpa ricashganta?
14 Ricashun imano masta Jehová musyachicun lapan runacunata igualpa ricashganta. Puntalachoga hebreo, griego y arameo rimaycunalacho Biblia escribishga caycargan. Chaura ¿nishwanchuraj chay rimaycunacho leiyta yachajcunala Diospa amigun cashganta? Manami. Payga camacächergan lapan runacunapa rimaynincunacho Biblia traducishga cananpaj (Mat. 11:25).
15. Wilacamuy imano mastaj Jehová musyachicun lapancunata igualpa ricashganta (fotucunatapis ricay).
15 Jehovapa amigun canapäga manami alapa estudiashgarächu cananchi, ni unaycho Bibliata guelgashgan rimaycunataräpis musyananchichu. Estudiashga o mana estudiashga captinchipis, Jehovaga lapanchita yachayta gomanchi. Chaymi Palabran Bibliaga, maychicaj rimaycho traducishga caycan. Chaynopa pï may runacunapis Bibliapita yachacur amigunman ticrananpaj (2 Tim. 3:16, 17).
Jehová munan lapan runacuna payta reguinanpaj, chaymi Bibliaga maychicaj rimaycunacho traducishga caycan. (15 caj parrafuta ricay).
JEHOVAPA WASILANCHO IMAYPIS CAYCÄSHUN
16. ¿Pïcunatataj Jehová wasincho chasquipan? (Hechos 10:34, 35).
16 Jehovapa wasincho cashpanchega manami imawanpis tincunchu. Payga ali shongumi, pipitapis más cuyacoj y pï maytapis ali chasquipan. Lapan runacunata igualpa rican estudiashga o mana estudiashga captinchipis, ayca watayoj captinchipis o may chaypita captinchipis ali chasquimanchi. Pero shuyaran wasincho caycajcuna mandätuncunata respetananpaj (leiriy Hechos 10:34, 35).
17. ¿Imataj ricashun gatejnin caj yachachicuycho?
17 Salmo 15:1 textucho David cayno Jehovata tapucur galaycun: “TAYTA DIOS, ¿piraq templuykiman [o wasiquiman] yaykunman? ¿Piraq sagrädu jirkannikicho sirvishunkiman?”. Nircur, Jehová Davidta musyachin pïcuna amiguncuna cananpaj. Gatejnin yachachicuycho ricashun imacunata rurashwan Jehovapa wasincho caycashganno amiguncuna canapaj.
32 CAJ CANCIÓN ¡Diosninchilawan caycäshun!
