1, 2. ¿Imapaqtan Jehovä invitamantsik?

 “QAMPAQQA, ¿imëkitan Jehovä?” nir tapuyäshuptiki, ¿ima ninkimanraq? Capazchi ninkiman amïguyki, Teytëki y Diosniki kanqanta. Peru ¿posadatsishoqniki kanqantaqa ninkimantsuraq?

² ¿Imawantan gobernanti Davidqa Jehovä nunakunawan amïgu kanqanta igualatsirqan? Juk wayiyoq nunatawan y invitädunkunatawanmi. Kënömi nirqan: “Teyta Jehovä, ¿imanö nunatataq wayikiman chaskinki? ¿Imanö nunatan sagrädu jirkëkichö täkunqa?” (Sal. 15:1). Tsënö ninqanwanmi entiendintsik, Jehoväqa invitädun o amïgun kanantsikpaq invitamanqantsikta. ¡Tsëqa alläpa shumaqmi!

JEHOVÄQA INVITÄDUNKUNA KANANTSIKTAM MUNAN

3. ¿Pitan Jehoväpa punta kaq invitädun karqan, y imanötan ishkampis sientikuyarqan?

³ Imatapis manaraq kamarqa, Jehoväqa japallanllam karqan. Tsëpitam Jesusta kamarqan y pëmi punta kaq invitädun karqan. Jesusta wayinman chaskinqampitaqa, ¡alläpam kushikurqan! Y Jesuspis Teytanwan alläpa kushishqam karqan (Prov. 8:30).

4. Tiempuwanqa, ¿pikunatataq Jehovä wayinman invitarqan?

 ⁴ Tiempuwannam Jehoväqa angelkunatapis kamarqan y pëkunam invitädunkuna kayarqan. Pëkunapaqmi Bibliachöqa nin “Teyta Diospa tsurinkuna” kayanqanta y Jehoväpa lädunchö kushishqa sientikuyanqanta (Job 38:7; Dan. 7:10). Mëtsika watakunapam Jehoväqa ciëluchö kaqkunallawan amïgu karqan. Peru tiempuwannam nunakunata kamarqan, y wakintam wayinman o amïgun kayänampaq invitarqan. Tsë invitädunkunaqa kayarqan Enoc, Noë, Abrahan y Jobmi. Pëkunapaqmi Bibliachöqa nin Dios munanqannö imëpis kawakuyanqanta (Gen. 5:24; 6:9; Job 29:4; Is. 41:8).

5. ¿Imatataq entienditsimantsik Ezequiel 37:26 y 27?

⁵ Mas watakuna pasaptinnam, Jehoväqa mas amïgunkunata invitarqan wayinchö kayänampaq. Tsënö kanqantam nimantsik Ezequiel 37:26 y 27 (leyi). Kë textuchö ninqanwanmi entiendintsik Jehovä Diosnintsikqa, pëwan amïgu karnin sirweqninkuna kushishqa kayänanta munanqanta. ¿Imatataq kë versïculuchö Jehovä änikurqan? Alli kawakuyänampaq sirweqninkunawan acuerduta ruranampaqmi. Y ¿imanötan tsë änikunqankunaqa cumplikänan karqan? Ciëlupaq akrashqa kaqkuna y Patsachö kawakuyänampaq kaqkuna wayinchö juk grüpunöllana tikrariyaptinmi (Juan 10:16). Y tsë cumplikaqtam kanan witsan rikëkantsik.

MËCHÖ KËKASHQAPIS JEHOVÄQA CUIDAMANTSIKMI

6. ¿Imëtan Jehoväpa wayinman yëkuntsik, y tsë wayiqa mëchötan këkan?

⁶ Bibliata qellqayanqan witsanchöqa, carpa wayikunaqa tëlapita rurashqam karqan, y alläpa tamyapitam nunakunata tsapaq, y allim descansaritapis puëdiyaq. Pipa carpa wayinmampis juk nuna chäriptinqa, carpa wayiyoqkunaqa allim atiendiyaq. Noqantsikpis Jehovällatana sirwinapaq änikurninqa, Jehoväpa wayinman yëkushqa cuentam këkantsik (Sal. 61:4). Tsëchömi Jehoväqa tukuynöpa yachatsimantsik y wakin invitädunkunawanmi kushishqa kawakuyta puëdintsik. Peru Jehoväpa wayinqa, ¿mëchötan këkan? Manam juk sitiullachötsu këkan; Jehoväpa cäsukoq sirweqninkuna kayanqanchöqa mëchöpis këkanmi. Tsënö kanqantam juk  nacionkunachö asamblëakuna kaptin viajaqkuna cuentata qokuyashqa, tsëchömi pëkunaqa Jehoväpa carpa wayinchö këkaq wakin invitädunkunawan juntu kushishqa këta puëdiyashqa (Apo. 21:3).

7. Jehoväta sirwikar wanushqakunaqa, ¿Jehoväpa wayinchö invitädu këta sïguiyanku? (Rikäri fötuta).

⁷ ¿Y llapan shonqunkunawan Jehoväta sirwikar wanushqakunaqa Jehoväpa wayinchö invitädu këta sïguiyanku? Awmi. Bibliachöqa clärum nimantsik tsë wanushqakunataqa imëka kawëkaqtanö Jehovä yarparëkanqanta. Jesusmi kënö nirqan: “Wanushqakuna kawariyämunampaq kaqtaqa, rawrëkaq o lunyëkaq kashapaq qellqanqanchömi Moisespis parlarqan. Tsëchömi Teyta Jehoväqa ‘Abrahanpa Diosnin, Isaacpa Diosnin y Jacobpa Diosnin’ kanqanta nirqan. Pëqa manam wanushqakunapa Diosnintsu, sinöqa kawëkaqkunapa Diosninmi. Awmi, pëpaqqa llapampis kawëkäyanmi” (Lüc. 20:37, 38).

¿IMANÖTAN DIOSPA WAYINCHÖ KËQA YANAPAMANTSIK Y IMAKUNATATAQ RURANANTSIK?

8. ¿Imanötan Jehoväpa wayinchö kanqantsikqa yanapamantsik?

⁸ Imanömi carpa wayiqa tamyapita tsapäkoq y alli descansariyänampaq yanapakoq, tsënöllam Jehoväpa wayinchö kanqantsikpis pëpita ni imapis mana rakimänapaq y änikunqankunata shuyaränapaq yanapamantsik. Jehoväta imëpis mana dejashqaqa Satanas imata ruramashqapis Jehoväqa altsamunqam (Sal. 31:23; 1 Juan 3:8). Shumaq Patsachöpis Jehoväqa manam permitinqatsu pëpita imapis rakimänantsikta, ni manam permitinqatsu wanunantsiktapis (Apo. 21:4).

9. Jehoväpa invitädun këkarqa, ¿imanötan portakushwan?

⁹ Jehoväpa invitädun karnin imëyaqpis amïgun këqa, ¡alläpa kushikuypaqmi! Peru ¿imanötan wayinchöqa portakushwan? Këllaman pensarishun: pipis wayinman invitamashqaqa, imata ruranantsikta munanqantam musyëta munantsik. Capaz niramashwan imatapis manaraq yatarnin makintsikta yakuwan awikunapaq o mayllakunapaq, tsëqa ¿manatsuraq kushishqa awikushwan? Tsënöllam Jehoväpa invitädun karpis imata ruranantsikta munanqanta musyëta munantsik. Pëtaqa alläpam kuyantsik, tsëmi imatapis allita rurëta munantsik (Col. 1:10). Yarpänantsikmi Jehovä Diosnintsikqa amïguntsik karpis, Diosnintsik y Teytantsik kanqanta. Tsëmi imëpis llapan shonquntsikwan respetanantsik (Sal. 25:14). Yarpänantsikmi poderösu Dios kanqanta. Y respetarninqa, imëpis allim portakushun y rikëninchömi imëpis humildi kashun (Miq. 6:8).

TSUNYAQ SITIUCHÖMI ISRAELÏTAKUNATA IGUALPA TRATARQAN

10, 11. ¿Imanötan musyantsik Jehoväqa llapan sirweqninkunata igualpa cuidanqanta?

¹⁰ Jehoväqa llapan invitädunkunatam imëpis alli cuidashqa (Rom. 2:11). Tsëta entiendirinapaq Sinaï jirkachö këkäyaptin israelïtakunata imanö cuidanqanman pensarishun.

¹¹ Israelïtakunata Egiptupita libramunqampita tiempu pasariptinmi, Jehoväqa carpa wayinchö trabajayänampaq sacerdötikunata churarqan. Y tsë wayichö trabajayaptin yanapayänampaqmi levïtakunatapis churarqan. Peru ¿Jehoväqa carpa wayichö trabajaqkunallataku o tsë carpa wayi lädunchö täkoqkunallataku mas alli cuidarqan? Manam, llapan israelïtakunatam igualpa cuidarqan.

12. ¿Imanötan Jehoväqa llapan israelïtakunata igualpa tratarqan? (Exodu 40:38; rikäri dibüjukunata).

¹² Israelïtakunaqa carguyoq karpis o carpa  wayipa lädunchö täkurpis, llapankunam Jehoväpa amïgun këta puëdiyaq. Këllaman pensarishun: Jehoväqa llapan israelïtakunatam permitirqan junaqpa shëkaq pukutëta y paqaspa lunyëkaq pukutëta carpa wayin jananchö këkaqta rikäyänanta (leyi Exodu 40:38). Tsëmi tsë pukutë mëpapis ëwar qallaptinqa, llapankuna rikëta puëdiyaq y cösasninkunata y carpa wayinkunata ëllurkur qepanta ëwëta puëdiyaq (Nüm. 9:15-23). Tsënöllam, ëwar qallayänampaq trompëtata tocayaptimpis llapankuna wiyëta puëdiyaq (Nüm. 10:2). Tsëqa, ¿carpa wayipa lädunchö kayanqampitaku wakin israelïtakunaqa Jehoväpa mas amïgun këta puëdiyaq? Manam. Tsëpa rantinqa, llapan israelïtakunam Jehoväpa invitädun kayaq y pë cuidaptin y pushaptinmi kushishqa kawakuyta puëdiyaq. Tsënöllam kanan witsampis pasakun; mëchö kawashqapis Jehovä Diosnintsikqa llapantsiktam kuyamantsik, cuidamantsik y mana allikunapita tsapämantsik.

JEHOVÄQA LLAPAN SIRWEQNINKUNATAM KANAN WITSAMPIS IGUALPA CUIDAN

13. ¿Imanötan Jehoväqa kanan witsampis llapan sirweqninkunata igualpa tratan?

¹³ Kanan witsampis, wakin Testïgukunaqa Jehoväpa testïgunkunapa principal oficïnankunapa o sucursalkunapa amänunchömi täkuyan. Y wakin Testïgukunaqa tsë oficïnakunachömi trabajayan y dirigimaqnintsik wawqikunawanmi reqinakuyan. Y wakinkunanam congregacionkunata watukarnin o juk rurëkunachö llapan tiempunkunawan yanapakuyan. Peru Jehoväpa wakin sirweqninkunaqa manam tsënö yanapakuyta puëdiyantsu y alläpa karu markakunachömi täkuyan. Y qamqa, ¿tsënö yanapakuyta mana puëdirku y alläpa karu markachö kawarku llakikunki? Manam llakikunëkitsu. Segürum kanëki Jehovä kuyashunqëkita, invitädun kanqëkita y cuidashunqëkita (1 Pëd. 5:7). Kuyakoq Diosnintsikqa wakin sirweqninkunatanöllam yachatsishunki, consejashunki y wananqëki  hörakuna mana allikunapita tsapäshunki.

14. ¿Imanö mastan Jehoväqa llapan nunakunata igualpa tratanqanta rikätsikun?

¹⁴ Juknöpaqa llapan nunakunata igualpa tratanqanta Jehovä rikätsikun, Palabranta llapankuna musyayänanta munarmi. Jehoväqa Palabranta qellqatsirqan hebreu, arameu y griëgu idiömakunallachömi. Peru ¿tsë idiömakunachö Bibliata leyita puëdeq kaqkunallatsuraq Jehoväpa mas amïgun këta puëdiyan? Manam (Mat. 11:25).

15. ¿Imanö mastan Jehoväqa rikätsikushqa llapan nunakunata igualpa rikanqanta? (Rikäri fötukunata).

¹⁵ Jehoväqa manam alli estudiashqa nunakunallatatsu ni Bibliata qellqayanqan idiömakunata yachaq nunakunallatatsu amïgunkunatanö rikan. Tsëpa rantinqa, estudiashqa o mana estudiashqa kayaptimpis entëru Patsachö nunakunatam igualpa rikan. Tsëmi Palabran Bibliata mëtsika idiömakunaman traduciyänanta permitishqa, tsënöpa Palabranta yachakurnin amïgun tikrayänampaq (2 Tim. 3:16, 17).

AMA JEHOVÄPA INVITÄDUN KËTA DEJASHUNTSU

16. ¿Pikunatataq Jehoväqa wayinman chaskin? (Hëchus 10:34, 35).

¹⁶ Jehoväpa wayinchö invitädu këqa alläpa shumaqmi. Pëqa alläpam kuyamantsik, tsëmi shumaq tratamantsik y alli atiendimantsik. Tsëtanöqa manam mëchöpis tarishwantsu. Pëqa më nacionpita kashqa, ima costumbriyoq kashqa, estudiädu o mana estudiädu kashqa, awkin o jövin kashqa, o warmi o ollqu kashqapis llapantsiktam igualpa chaskimantsik. Peru ¿imatataq noqantsikpita shuyaran? Mandakunqankunata cäsukunantsikllatam (leyi Hëchus 10:34, 35).

17. ¿Imatataq qateqninchö yachakushun?

¹⁷ Salmus 15:1 textuchömi David kënö nirqan: “Teyta Jehovä, ¿imanö nunatataq wayikiman chaskinki? ¿Imanö nunatan sagrädu jirkëkichö täkunqa?”. Jehovä yanapaptinmi, tsënö tapunqanta kikinlla contestarqan. Qateqninchömi yachakurishun Jehoväpa invitädun imëpis këkänapaq imakunata ruranantsikpaq kaqta.