1, 2. ¿Ima oportunidadtataj charinchij?

 “¿JEHOVÁ DIOSCA cambajca imataj can?” nishpa tapujpica ¿imatataj cutichinguiman? Tal vez “Jehová Diosca ñuca alli amigo, ñuca Yaya, ñuca Diosmi can” nishpami cutichinguiman. Mana cashpaca Jehová Dios shujtaj sumaj cualidadcunata charishcatami ninguiman. Pero chashna tapujpica “Jehová Diosca paipaj carpa huasipi ñucata alli chasquijmi can” ¿nishpachu cutichinguiman?

² Rey Davidca: ‘Ima shinami huasiyujca paipaj invitadocunata alli tratan, chashnallatajmi Jehová Diosca paipaj alli amigocunataca alli tratan’ nircami. Shinallataj Davidca: “Mandaj Dioslla, cambaj carpa huasipica ¿maijantaj causagringari? Cambajlla urcupica ¿pitaj causagringari?” nircami (Salmo 15:1). David nishca shinaca Jehová Diospaj alli amigocuna cana oportunidadtami charinchij. Chaica shuj sumaj bendicionmi can.

JEHOVÁ DIOSCA PAIPAJ CARPA HUASIMANCA ÑUCANCHIJTAPISHMI INVITAN

3. a) ¿Jehová Diosca paipaj carpa huasimanca puntaca pitataj invitarca? b) ¿Jesús tiyai callarishcamantaca paipish, Jehová Diospish ima shinataj sintirircacuna?

³ Jehová Diosca Jesusta manaraj rurashpaca paillami causarca. Pero Jesús tiyai callarishpaca paimi Diospaj carpa huasipica punta invitado carca. Paipaj carpa huasipi chasquij shina Jesushuan alli apanacui tucushcamantami Jehová Diosca cushilla sintirirca. Bibliapi nishca shinaca Jehová Diosca ‘punllantami Jesusta cushichirca’. Ashtahuanpish Jesusca ‘Jehová  Diospaj ñaupajpi cashcamantami yallitaj cushilla carca’ (Proverbios 8:30).

4. ¿Jehová Diosca paipaj carpa huasimanca picunatataj invitashca?

⁴ Jesusta rurashca huashaca Jehová Diosca angelcunatami rurarca. Paica angelcunatapishmi paipaj carpa huasiman invitarca. Bibliapi nishca shinaca angelcunaca ‘Diospaj churicunami’ can. Paicunaca Jehová Diospaj cꞌuchullapi cashcamantami cushilla sintirincuna (Job 38:7; Daniel 7:10). Jehová Diosca achca huatacunatami jahua pachapi caj angelcunallahuan alli apanacurca. Chai huashaca cai Allpapi causaj gentecunatapishmi paipaj carpa huasiman yaicuchun invitarca. Por ejemplo, Enoc, Noé, Abrahán, Jobpish Jehová Diospaj alli amigocunami carca. Bibliapica maijancunamanta parlashpacarin ‘Jehová Dioshuanmi purircacuna’ ninmi (Génesis 5:24; 6:9; Job 29:4; Isaías 41:8).

5. ¿Ezequiel 37:​26, 27-pica imatataj yachachin?

⁵ Jehová Diosca paipaj carpa huasiman invitacuj shinami paipaj amigocuna cachun achca gentecunata invitacushca (Ezequiel 37:​26, 27-ta liyipai). Profeta Ezequiel huillashca shinaca Jehová Diosca paita alli sirvijcunahuanmi apanacunata munan. Chaimantami paica ‘paicunahuanca sumajta causanata ari ninacushca’. Ezequiel huillashca shimicunaca jahua pachapi shinallataj cai Allpapi causana esperanzata charijcunapish ‘shujlla shina’ Jehová Diosta adorajpimi pajtarina carca (Juan 10:16). Chai shimicunaca cunan punllacunapimi pajtaricun.

ÑUCANCHIJCUNA MAIPI CAJPIPISH JEHOVÁ DIOSCA CUIDANGAMI

6. a) ¿Ima horamantataj Jehová Diospaj carpa huasiman yaicunchij? b) ¿Diospaj carpa huasica maipitaj can?

⁶ Israelitacunaca tamyamanta, intimanta huaquichiringapajca carpa huasicunamanmi yaicujcuna carca. Shinallataj israelitacunaca paicunapaj carpa huasicunapi shujtajcunata chasquishpaca allimi tratajcuna carca. ¿Cutin ñucanchijcunaca ima horamantataj Yaya Diospaj carpa huasimanca yaicunchij? Ñucanchij causaita paiman mingarishca horasmantami paipaj ‘carpa huasimanca’ yaicunchij (Salmo 61:4). Chai carpa huasipi cashcamantami Jehová Diosmanta shamuj achca yachaicunata charinchij. Shinallataj chai carpa huasipica Jehová Dios invitashcacunahuanmi tandalla cai tucunchij. Pero ¿chai carpa huasica maipitaj can? Chai carpa huasica mana shuj lugarllapichu can. Ashtahuanpish Jehová Diosta cꞌuyajcuna maipimi can, Jehová Diospaj carpa huasica chaipimi can. Por ejemplo, maijan huauqui panicunaca caru llajtacunapi paseanaman rijpi o asambleacunaman rijpica chaipi causaj huauqui panicunaca  allimi chasquishcacuna. Paicuna alli chasquijpimi huauqui panicunaca Jehová Diospaj carpa huasipi cashca shina sintirishcacuna (Apocalipsis 21:3).

7. ¿Jehová Diosta alli sirvishpa huañujcunapish Diospaj carpa huasipi cashcataca imamantataj seguros canchij? (Fotomantapish parlapai).

⁷ ¿Jehová Diosta alli sirvishpa huañujcunapishchu Diospaj carpa huasipi can? Ari. Bibliapi nishca shinaca paicunaca Jehová Diospaj yuyaipimi can. Chaimantami Yaya Diospajca paicunaca mana huañushca shina can. Jesusca: “Moisespish rupacuj zarza yuramanta quillcashpaca huañushcacuna causarinamantapishmi parlarca. Paica Jehová Diostaca: ‘Abrahanpaj, Isaacpaj, Jacobpaj Diosmi can’ nircami. Paica huañushcacunapaj Diosca mana canchu. Ashtahuanpish causajcunapaj Diosmi can. Diospajca tucuicunami causacuncuna” nircami (Lucas 20:​37, 38).

BENDICIONCUNATA CHASQUISHPAPISH ESFORZARISHPAMI CATINA CANCHIJ

8. ¿Diospaj carpa huasipi cashcamantaca ima bendicioncunallatataj chasquinchij?

⁸ Ñajaman ricushca shinaca carpa huasicunaca intimanta, tamyamanta huaquichiringapajmi carca. Chai shinallatajmi Diospaj carpa huasica espiritualmente sinchi cachun, shamuj punllacunapaj shuj esperanzata charichunpish ayudan. Diosmanta mana caruyajpica Diabloca mana huiñaipajchu ñucanchijtaca llaquichi tucunga (Salmo 31:23; 1 Juan 3:8). Cai Allpa shuj Paraíso tucujpipish Jehová Diosca paipaj amigocunataca cuidashpami catinga. Huañuimantapishmi paicunataca quishpichinga (Apocalipsis 21:4).

9. ¿Jehová Diospaj carpa huasipi cajcunaca ima shinataj comportarina can?

⁹ Jehová Dios paipaj carpa huasipi chasquij shina paipaj amigo cachun saquishcamantaca cushillami sintirinchij. ¡Chaica sumaj bendicionmi can! Pero ¿Jehová Diospaj carpa huasimanta ama llujshingapajca imatataj rurana canchij? Caipi yuyashun. Pi ñucanchijta paipaj huasiman invitajpica respetotami ricuchina canchij. Por ejemplo, huasiyuj zapatocunata llujshichishpa paipaj huasiman yaicuchun mañajpica chaitaca cushicushpami ruranchijman. Chashnallatajmi Jehová Diospaj carpa huasimanta ama llujshingapajca pai imata munashcata rurana canchij. Jehová Diosta tucui shunguhuan cꞌuyashcamantami tucuipi paita cushichisha ninchij (Colosenses 1:10). Jehová Diosca ñucanchij alli amigomi can. Pero tucuimanta yallica ñucanchij Yayami can. Chaimantami paitaca tucuipi respetana canchij (Salmo 25:14). Jehová Dios ñucanchij Yaya cashcata yuyaipi charishpaca pai millashca ruraicunamantami caruyashun. Ashtahuanpish tucuipimi humildadta ricuchishun (Miqueas 6:8).

¿ISRAELITACUNA CHAQUISHCA PAMBAPI PURICUJPICA DIOSCA PAICUNATACA IMA SHINATAJ TRATARCA?

10, 11. ¿Jehová Diosca tucui israelitacunata por igual tratashcataca ima shinataj yachanchij?

¹⁰ Jehová Diosca paipaj carpa huasiman invitajcunataca tucuicunatami por igual tratan (Romanos 2:11). Por ejemplo, israelitacuna Sinaí chaquishca pambapi puricujpica Jehová Dios paicunata ima shina tratashcata ricushun.

¹¹ Israelitacunata Egiptomanta llujshichishca qꞌuipaca Jehová Diosca paipaj carpa huasipi sirvichunca sacerdotecunatami churarca. Shinallataj chaipi huaquin ruraicunata rurashpa ayudachunca levitacunatapishmi churarca. Pero ¿Jehová Diosca paipaj carpa huasipi ayudajcunata, shinallataj chai cꞌuchullapi causajcunataca ashtahuanchu cuidarca? Mana. Yaya Diosca tucui israelitacunatami por igual tratarca.

12. ¿Israelitacuna chaquishca pambapi causacujpica Jehová Diosca tucuicunata igual tratashcataca ima shinataj ricuchirca? (Éxodo 40:38; fotocunamantapish parlapai).

¹² Israelitacunaca levitacuna, sacerdotecuna  cashpapish, shinallataj Diosta carpa huasimanta carupi o cꞌuchullapi causashpapish tucuicunami Jehová Diospaj amigo cana oportunidadta charircacuna. Por ejemplo, Diospaj carpa huasi jahuapi jatun pꞌuyu o lunyacuj nina ricurijpica tucui israelitacunami chaicunataca ricui tucurcacuna (Éxodo 40:​38-ta liyipai). Shinallataj chai jatun pꞌuyu shujtaj ladoman ri callarijpica Diospaj carpa huasimanta carupi o cꞌuchullapi causaj israelitacunapishmi chaitaca ricui tucurcacuna. Chaita ricushpaca tucuicunami paicunapaj carpa huasicunata, paicuna imalla charishcacunata huaquichishpa shujtaj ladoman rijcuna carca (Números 9:​15-23). Shinallataj shujtaj ladoman rina cashcata tucuicuna yachachunca ishqui trompetacunatami sinchita tocajcuna carca. Chai trompetacunata tocashcataca tucui israelitacunami uyai tucurcacuna (Números 10:2). Caipi ricushca shinaca israelitacunaca Diospaj carpa huasi cꞌuchullapi causashcallamantaca mana Diospaj alli amigocunachu carca. Ashtahuanpish maipi causashpapish tucuicunami Diospaj pueblopaj parte carcacuna. Chaimantami paicunaca maipi causashpapish Jehová Diospaj amigo cana oportunidadta charircacuna. Cunan punllacunapipish ñucanchijcuna maipi causashpapish tucuicunami Yaya Diospajca valishca canchij. Chaimantami paica tucuicunata ayudan.

JEHOVÁ DIOSCA CUNAN PUNLLACUNAPIPISHMI TUCUICUNATA POR IGUAL TRATAN

13. ¿Cunan punllacunapica Jehová Diosca paita sirvijcunata igual tratashcataca ima shinataj ricuchishca?

¹³ Maijan huauqui panicunaca testigo de Jehovacunapaj central mundial o shujtaj Betelcunapaj cꞌuchullapimi causancuna. Cutin shujtaj huauquicunaca Betelpimi sirvincuna. Chaimi paicunaca Diospaj obra ñaupajman catichun chꞌican chꞌican ruraicunata rurashpa ayudancuna. Shinallataj Diospaj pueblota pushaj huauquicunata rijsina oportunidadtami charincuna. Cutin shujtaj huauquicunaca superintendentecunami can o shujtaj privilegiocunatapishmi charincuna. Pero la mayoría huauqui panicunaca chai privilegiocunataca mana charincunachu. Canpish chai privilegiocunata  mana charishpapish Jehová Dios cantapish achcata cꞌuyashcatami yuyarina cangui. Shinallataj canpish Diospaj carpa huasipi cashcamantami Jehová Diosca cantapish tucuipi cuidaracun (1 Pedro 5:7). Caipi ricushca shinaca Jehová Diosca tucui paipaj sirvijcunamanmi sumaj yachaicunata cun. Shinallataj paicunataca tucuipimi cuidacun.

14. ¿Jehová Diosca tucuicunata igual trataj cashcataca ima shinataj ricuchishca?

¹⁴ Shinallataj Jehová Dios tucuicunata igual trataj cashcamantami cunan punllacunapica muyundij allpapi causaj gentecunaca Bibliataca paicunapaj propio shimipi liyi tucuncuna. Yuyashun. Bibliata quillcajcunaca Bibliataca hebreo, arameo y griego shimipimi quillcarcacuna. Pero ¿chai shimicunapi Bibliata liyijcunallachu Jehová Dioshuan ashtahuan alli apanacui tucuncuna? Mana (Mateo 11:25).

15. ¿Jehová Diosca estudiashca gentecunallamanchu paimanta yachana oportunidadta cushca? (Fotocunamantapish parlapai).

¹⁵ Estudiashca cashcallamanta o ñaupa hebreo, griego, arameo shimicunata yachashcallamanta Jehová Diospaj ñaupajpi alli ricuri tucushcataca mana yuyanachu canchij. ¿Imamanta? Jehová Diosca paimanta yachana oportunidadtaca mana estudiashca gentecunallamanchu cushca. Ashtahuanpish estudiashca cashpapish o mana estudiashca cashpapish tucuicunami Diosmanta yachana oportunidadta charinchij. Shinallataj tucui llajtacunamanta gentecuna Diosmanta yachana oportunidadta charichunca Jehová Diosca Bibliataca huaranga huaranga shimicunapimi traducichishca (2 Timoteo 3:​16, 17).

JEHOVÁ DIOSPAJ CARPA HUASIPI SAQUIRISHUNCHIJ

16. ¿Jehová Diosca paipaj carpa huasipica picunatataj chasquin? (Hechos 10:​34, 35).

¹⁶ Jehová Diospaj carpa huasipi canaca sumaj bendicionmi can. Jehová Dios shina cꞌuyaj, llaquij, alli chasquijca pi mana tiyanchu. Paica maimanta cajpipish, ima culturata charijpipish, estudiashca o mana estudiashca cajpipish, ima raza, ima edadta charijpipish, cꞌari o huarmi cajpipish, tucuicunatami alli chasquin. Paica paipaj huasiman yaicujcunataca caillatami rurachun mañan: paipaj mandashcacunata cazuchun (Hechos 10:​34, 35-ta liyipai).

17. ¿Catij yachaipica imatataj yachashun?

¹⁷ Salmo 15:​1-pica Davidca: “Mandaj Dioslla, cambaj carpa huasipica ¿maijantaj causagringari? Cambajlla urcupica ¿pitaj causagringari?” nishpami tapurca. Jehová Dios yuyaita cujpimi Davidllataj chai tapuicunata cutichirca. Catij yachaipimi Jehová Diospaj carpa huasipi saquirisha nijcuna ima shina causana cashcata ricushun.