1, 2. ¿Imapaqmi Jehova Dios invitawanchik?

 JEHOVA DIOSMANTA pipas tapuwaptinchikqa ichapas nichwan: “Payqa amistadniymi, taytaymi hinaspapas Diosniymi”, nispa. Ichaqa, ¿nichwanchu “payqa samaykachiwaqniymi” nispa?

² Kamachiq Davidmi Jehova Dios serviqninkunawan imayna kasqanmanta rimaspan nirqa samaykachiwaqninchik kasqanta, ñuqanchikñataq samapakuqnin kasqanchikta. Davidmi nirqa: “Jehova Dioslláy, ¿pitaq carpaykipiqa samapakunman? ¿Pitaq yachanman sapaqchasqayki muqupiqa?”, nispa (Sal. 15:1). Davidpa chayna nisqanwanmi yachanchik Jehova Diosqa samapakuqnin utaq amistadninkuna kanapaq invitawasqanchikta, ¡chayqa mayna kusikunapaqmi!

JEHOVA DIOSMI INVITAWANCHIK SAMAPAKUQNIN KANAPAQ

3. ¿Pitaq samapakunanpaq Jehova Diospa punta invitasqan karqa? ¿Imaynataq iskayninku karqaku?

³ Jehova Diosqa sapallanraqmi karqa tukuy imata manaraq unanchachkaspanqa. Chaymantam ichaqa churin Jesusta unancharqa, chayqa karqa carpanpi samapakunanpaq invitachkaq hinam. Arí, paymi karqa Diospa punta kaq samapakuqnin. Bibliapim niwanchik Jehova Diosqa churinwan anchata kusikusqanta chaynataq Jesuspas ancha kusisqallaña kasqanta (Prov. 8:30).

4. ¿Pikunatawanmi Jehova Diosqa invitarqa samapakuqnin utaq amistadnin kanankupaq?

 ⁴ Chaymantam Diosqa angelkunata unancharqa, paykunatapas samapakuqnin kanankupaqmi invitarqa. Paykunamantam biblia niwanchik “Diospa churinkuna” kasqankuta hinaspa Diospa ladonpi ancha kusisqa tarikusqankuta (Job 38:7 willakuynin; Dan. 7:10). Pachaknintin watakunam Jehova Diosqa hanaq pachapi kaqkunallawan amistad karqa, chaymantam ichaqa kay pachapi runakunata unancharqa, hinaspanmi paykunatapas invitarqa amistadnin kanankupaq. Paykunamanta wakinmi karqa Enoc, Noey, Abrahan hinaspa Job. ¡Mayna kusisqachá paykunaqa tarikurqaku Diospa amistadnin kasqankuwanqa! Bibliam sapakamamanta niwanchik Diospa amistadnin kasqanta utaq ‘Diospa munasqanman hina kawsakusqanta’ (Gen. 5:24; 6:9; Job 29:4; Is. 41:8).

5. ¿Imatam yachachwan Ezequiel 37:​26, 27 nisqanmanta?

⁵ Watakuna pasasqanman hinam Jehova Diosqa kuyasqan runakunata hinalla invitarqa samapakuqnin kanankupaq. Chaypaq rimarisunchik Ezequielwan ima qillqachisqanmanta (leey Ezequiel 37:​26, 27). Chaywanmi yachanchik Jehova Diosqa payman sunqu serviqninkuna amistadnin kanankuta munasqanta. Diosmi nirqa ‘paykunawan hawkayay kananpaq contratota ruwananmanta’. Chayna nisqanmi cumplikunan karqa hanaq pachapaq kaqkuna kay pachapi kawsakuyta suyaqkunawan “huk kanchallaña” hina huk sunqulla kaptinku (Juan 10:16). Chayna nisqanmá kunan cumplikuchkan.

MAYPIÑA KAPTINCHIKPAS JEHOVA DIOSQA CUIDAWANCHIKMI

6. ¿Haykapim Diospa carpanman utaq wasinman yaykurqanchik?

⁶ Bibliata qillqasqanku tiempopi carpakunam servikuq samarinankupaq hinaspa paramanta utaq rupaymanta amparakunankupaq. Invitasqa runapas manam iskayrayaqchu sumaqta atiendeykunankumantaqa. Ñuqanchikñataqmi Jehova Diospa ‘carpanman’ utaq wasinman yaykunchik payllapaqña kawsakunapaq prometekusqanchik punchawmanta (Sal. 61:4). Imaynam carpanman invitaq runapas samapakuqninta sumaqta atiendeq, chaynam ñuqanchikmanpas Diosninchikqa sumaq yachachikuykunata achkanpi quwanchik. Hinaspapas paypa wakin invitasqankunawanmi kanchik. Chaynaqa, ¿huk sitiollapichu Diospa carpanqa utaq wasinqa kachkan? Manam. Chayqa manam cierto  wasichu, aswanqa maypipas Diosta kasukuq serviqkunapa kasqanmi. Huklaw nacionta riq iñiqmasinchikkunapas cuentatam qukurqaku maypi kaptinchikpas Jehova Dios cuidawasqanchikta, riqsirqakutaqmi Diospa carpanpi samapakuq wakin iñiqmasinchikkunatapas (Apoc. 21:3).

7. ¿Imanasqam nichwan Diosman sunqu wañuqkunapas Diospa carpanpi hinalla samapakusqankuta? (Qaway fotota).

⁷ ¿Ima nichwantaq Diosman sunqu wañukuq iñiqkunamantaqa? ¿Hinallachu Diospa carpanpi samapakuchkanku? Arí. ¿Imanasqataq chaynata ninchik? Bibliapim niwanchik paykunata Jehova Dios allinta yuyasqanmanta. Chayraykum Diospaqqa hinallaraq kawsachkanku. Jesuspas kaynatam nirqa: “Wañuqkuna kawsarimunankumantaqa Moisespas willakurqam kichkayuq taksa sachamanta willakuypi. Chaypim Jehova Diosta suticharqa ‘Abrahanpa, Isaacpa hinaspa Jacobpa Diosnin’ nispa. Payqa manam wañuqkunapa Diosninchu, aswanqa kawsaqkunapa Diosninmi. Diospaqqa llapallankum paykunaqa kawsachkanku”, nispa (Luc. 20:​37, 38).

ALLIN CUIDASQA KASQANCHIKMANTAWAN IMAKUNA RUWANANCHIKMANTA

8. ¿Imanasqataq Diospa carpanpi kayqa ancha allin?

⁸ Imaynam carpapas utaq wasipas servikun samarinapaq hinaspa rupaymantawan paramanta amparakunapaq, chaynam Jehova Diospa carpanpi kaspapas iñiyninchikpi amparasqa kanchik, hinaspapas hamuq tiempopaq sumaq kawsakuytam suyanchik. Kunan tiempopi satanas imawanña sasachawaptinchikpas Jehova Diosmi hamuq tiempopi chaykunamanta librawasun paymanta mana karunchakuptinchikqa (Sal. 31:23; 1 Juan 3:8). Kay pacha sumaq huerta kaptinqa Diosqa hinallam payman sunqu serviqninkunataqa iñiyninchikpi yanapawasun, hinaspapas wañuymantam librawasun (Apoc. 21:4).

9. ¿Imaynam kananchik Diospa carpanpi samapakuqkunaqa?

⁹ ¡Ancha kusikunapaqmi wiñaypaq amistadnin kanapaq carpanman Jehova Diospa qayaykuwasqanchikqa! Ichaqa ¿imaynam kananchik hinalla carpanpi samapakunapaq? Pipas wasinman invitaykuwaptinchikqa munachwanmi wasinpi imayna kananchikta niykuwananchikta. Ichapas niwachwan wasinman manaraq yaykuchkaspa zapatonchikta hurqukunapaq, hinaptinqa kasukusunmi. Chaynam Diospa carpanpi samapakuyta munaspapas imayna kananchikpaq paypa nisqanta yachayta munanchik. Diosta anchata kuyasqanchikraykum tukuyta ruwanchik paypa munasqanman hina kawsakunapaq (Col. 1:10). Manam haykapipas qunqananchikchu Jehova Diosqa amistadninchik kaspapas Diosninchik hinaspa taytanchik kasqanmantaqa, chayraykum anchata respetananchik (Sal. 25:14). Diosta respetaspaqa manamá haykapipas mana munasqantaqa ruwasunchu. Chaymi munanchik “mana hatuntukuspa” Diospa munasqanman hina kawsakuyta (Miq. 6:8).

ISRAEL RUNAKUNATAM CHAYNALLATA YANAPARQA

10, 11. ¿Pikunamanta yachaspam cuentata qukusun Diosqa mana pimanpas sayapakuspa lliw serviqninkunata yanapasqanmanta?

¹⁰ Jehova Diosqa ñawpaqmantapacham carpanpi kaqkunataqa utaq amistadninkunataqa mana pimanpas sayapakuspan lliwta yanaparqa (Rom. 2:11). Chaypaqyá yachaykusun Sinai chunniqpi Israel runakuna kachkaptinku Dios imayna yanapasqanmanta.

¹¹ Paykunata Egipto nacionpi ñakarisqankumanta hurquruspanmi Diosqa  sacerdotekunata churarqa carpapi yanapakunankupaq. Chaymantapas Leviy ayllumanta kaqkunatam nirqa wakin ruwaykunapi yanapakunankupaq. Chaynaqa, ¿yaqachu nichwan carpapi yanapakuqkunata utaq hichpanpi yachaqkunata Jehova Dios astawan cuidasqanta? Manam. Payqa llapallankutam chaynallata cuidarqa.

12. ¿Imanasqam ninchik Israel runakunaqa llapallanku Jehova Diospa yanapasqan hinaspa cuidasqan kasqankuta? (Rimarimuytaq Exodo 40:38 nisqanmanta, qawaytaq dibujotapas).

¹² Israel runakunaqa sapakamam Jehova Dioswan amistad kayta atinmanku karqa carpapi yanapakuspankupas utaq mana yanapakuspankupas, chaynataq carpapa hichpanpi utaq karupi kaspankupas. Arí, Israel runakunaqa llapallankum rikurqaku carpapa hawanpi punchaw puyu kasqanta, tutanñataq nina kanchasqanta (leey Exodo 40:38). Chay puyu huqarikuyta qallaykuptinqa llapallankum alistakuyta qallaykuspanku carpankuta paskaqku huklla pasanankupaq (Num. 9:​15-23). Lluqsinankupaq iskay cornetillata tocasqankutapas llapallankum uyariqku (Num. 10:2). Chaynaqa, llapallankum Diospa cuidasqan hinaspa yachachisqan kayta atinmanku karqa, manamá carpapi yachaqkunallachu. Llapankum chayllaraq Diospa akllasqan llaqtapi karqaku. Chaynam kunanpas maypiña yachaptinchikpas Jehova Diosqa kuyawanchik hinaspa cuidawanchik.

KUNANPAS CHAYNALLATAM YANAPAWANCHIK

13. ¿Imaynatam yachanchik Jehova Diosqa kunanpas llapanchikta chaynallata yanapawasqanchikta?

¹³ Wakin iñiqkunaqa Estados Unidos betelpa utaq wakin betelkunapa hichpanpim yachanku. Wakinkuqa betelpim llamkanku. Chaypim imapas ruwaykunapi yanapakunku, hinaspapas punta apaqkunawanmi kuska llamkanku. Chaymantapas wakinkuqa llaqtan-llaqtan watukuqmi kanku, utaqmi tukuy tiemponkuwan Diospa llaqtanpi imapipas yanapakunku. Ichaqa manamá llapallan iñiqmasinchikkunachu chaykunapiqa yanapakunku.  Chaykunapi mana yanapakuptikipas Jehova Diosqa kuyasunkim, chaskisunkim hinaspa cuidasunkim (1 Ped. 5:7). Arí, llapallan serviqninkunata hinam Jehova Diosqa sapakamatapas yachachiwasun, yanapawasun hinaspa cuidawasun.

14. ¿Imataraqtaq Jehova Diosqa ruwarachin lliwta yanapayta munawasqanchikrayku?

¹⁴ Diosqa chaynallata lliwta yanapayta munawasqanchikraykutaqmi bibliatapas achka idiomapi ruwarachin. Bibliataqa qillqarqaku hebreopim, arameopim hinaspa griegopim. Chaynaqa, ¿yaqachu chay idiomakunapi bibliata leeqkunalla Jehova Dioswan allin amistad kanmanku? Manam (Mat. 11:25).

15. ¿Imaynatawanmi yachanchik Diosqa llapanchikta chaynallata yanapawasqanchikta? (Qawaytaq fotokunatapas).

¹⁵ Jehova Diospa amistadnin kanapaqqa manamá allin educacionniyuqraqchu kananchik nitaq bibliata qillqasqanku idiomataraqchu yachananchik. Jehova Diosqa llapallanchikmanmi yachayta quwanchik, manam educacionniyuqkunallamanchu. Bibliapas waranqantin idiomaman traducisqam kachkan, chayraykum may nacionpiña yachaspapas lliw runakuna bibliamanta yachaspanku Diospa amistadnin kayta atinmanku (2 Tim. 3:​16, 17).

HINALLAYÁ JEHOVA DIOSPA MUNASQANMMAN HINA KAWSAKUSUN

16. ¿Pikunatam Diosqa carpanpi samapakunankupaq chaskin? ¿Imatam paykunamanta munan? (Rimarimuytaq Hechos 10:​34, 35 nisqanmantapas).

¹⁶ Jehova Diospa carpanpi utaq wasinpi kayqa ancha kusikunapaqmi. Manamá pay hina kuyakuq, qukuykuq hinaspa samaykachikuqqa kanchu. Payqa llapallanchiktam chaskiykuwanchik may llaqtayuqña kaptinchikpas, imayna educacionniyuqña kaptinchikpas, hayka watayuqña kaptinchikpas chaynataq qari utaq warmi kaptinchikpas. Diosqa munan carpanpi samapakuqkuna kamachikuyninkunata kasukunallankutam (leey Hechos 10:​34, 35).

17. ¿Imamantam qatiqninpi yachasun?

¹⁷ Davidmi Salmos 15:1 nisqanpi nirqa: “Jehova Dioslláy, ¿pitaq carpaykipiqa samapakunman? ¿Pitaq yachanman sapaqchasqayki muqupiqa?”, nispa. Chaymantam Jehova Diospa yanapakuyninwan kikillan contestarqa. Qatiqnin yachachikuypim yachasun Jehova Diospa carpanpi hinalla kanapaq imakunata ruwanamanta.