23. ČLANKO PROUČIBASE
ĐILI 28 Te ova e Jehovase amala
O Jehova vićini amen te ova olese gostija
Mo šatori ka ovel olencar hem me ka ovav olengo Devel (JEZEK. 37:27)
SO KA SIKLJOVA?
Akava članko ka pomožini amen te haljova so značini te ova gostija ko Jehovaso šatori hem sar ov ka brinini pe amendar sar domaćini.
1-2. Kaj o Jehova vićini pe verna slugen?
AKO neko pućela tut, soj tano tuće o Jehova? So bi tu pheneja? Šaj ka phene soj tano o Jehova to Dad, to Devel hem to Amal. Šaj ki godi ka peren tuće pana disave lafija kolencar bi opisujineja e Jehova. Ama, da li bi pheneja so o Jehova tano to domaćini?
2 O kralj David phenđa soj tano o Jehova sar jekh domaćini, a olese verna sluge tane olese gostija. Ov pućlja: „Jehova, ko šaj te ovel gosto ko to šatori? Ko šaj te ovel ki ti sveto gora?“ (Ps. 15:1). Kotar akava stih sikljovaja so amen šaj te ova e Jehovase gostija, olese amala. Odija tani ćaće bari čast.
O JEHOVA MANGELA TE OVA OLESE GOSTIJA
3. Ko hine e Jehovaso prvo gosto hem sar o Jehova hem oleso gosto osetinđe pe?
3 Angleder te počmini te stvorini, o Jehova hine kokri. Ama, palo disavo vreme stvorinđa pe prvobijande Ćhave. O Jehova hine sar domaćini kova vićinđa pe prvo gosto te khuvel ko oleso šatori hem but radujinđa pe sebepi odova. Ki Biblija pisini so oleso Ćhavo hine lese „bari radost“. Isto ađahar, oleso prvo gosto, oleso Ćhavo, radujinđa pe „anglo leste celo vreme“ (Posl. 8:30).
4. Ko pana hine gosto ko Jehovaso šatori?
4 Palo odova, o Jehova stvorinđa e anđelen hem olen vićinđa te oven gostija ko oleso šatori. Ki Biblija pisini soj tane o anđelija „e Devlese ćhave“ hem soj tane bahtale so šaj te oven e Jehovaja (Jov 38:7; Dan. 7:10). Beršencar e Jehovase gostija ko oleso šatori hine samo okola so živinđe ko nebo. Ama, kasnije ked ćerđa e manušen ki phuv hem on hine vićime te oven gostija ko oleso šatori. Disave olendar hine o Enoh, o Noje, o Avraham hem o Jov. Ki Biblija pisini so on šaj hine te oven olese amala odolese so šunđe le (Post. 5:24; 6:9; Jov 29:4; Is. 41:8).
5. So šaj te sikljova ando proročanstvo kotar Jezekilj 37:26, 27?
5 Sar nakhlje o berša, o Jehova nastavinđa te vićini pe amalen te oven olese gostija. (Čitin Jezekilj 37:26, 27.) Na primer, andi Jezekiljesi vizija sikljovaja so o Jehova ćaće mangela olese verna sluge te oven paše amala oleja. Ov obećini so ka ćerel olencar „savez ando mir“. Odova proročanstvo odnosini pe ko vreme ked e Jehovase pomazime sluge hem okola so isi len nada so ka živinen večno ki phuv ka oven ko jekhipe ko oleso šatori sar „jekh stado“ (Jov. 10:16). Odova desini pe akana!
O DEVEL BRININI PE AMENDAR BILO KAJ TE OVA
6. Sar šaj neko te ovel gosto ko Jehovaso šatori hem da li odova šatori tano ko disavo posebno than?
6 Ko purano vreme, o šatori hine than kuri o manuš šaj hine te odmorini pe hem te ovel zaštitimo ando nevreme. Ked neko hine gosto ko nekaso šatori, kotar po domaćini bi očekujini te brinini pe olestar (Ps. 61:4). Ked predajinaja amaro životi e Jehovase, tegani ovaja gostija ko oleso simbolično šatori. Odothe isi amen amala kola isto ulje e Jehovase gostija. O manuša kotar celo sveto šaj te oven ko Jehovaso šatori. Na primer, šaj hijan le ko disavo posebno kongres ki aver phuv hem odothe resljan okolen kola tane bahtale sose tane gostija ko Jehovaso šatori. Ako verno služinaja e Jehovase, amen šaj te ova ko oleso šatori bizo obzir kaj živinaja (Otkr. 21:3).
7. Sose šaj te phena so okola kola mulje tane pana ko Jehovaso šatori? (Dikh i slika.)
7 Sar tano okolencar so mulje? Šaj li te phena soj tane on pana ko Jehovaso šatori? Ja! Sose? Odolese soj tane pana ko Jehovaso sećanje. O Isus phenđa: „A so ka ušten o mule, mothovđa hem o Mojsije ko zapis ando grm kuri e Jehovase phenela soj tano ’e Avrahameso Devel, e Isakeso Devel hem e Jakoveso Devel‘. Ov nane Devel ando mule, nego ando đivde, sose olese tane on sare đivde“ (Luka 20:37, 38).
Čak hem o verna manuša kola mulje šaj te oven gostija ko Jehovaso šatori (Dikh o 7. odlomko)
TE OVA E JEHOVASE GOSTIJA TANI ČAST AMA HEM ODGOVORNOST
8. Sose tano šukar okolenđe soj tane ko Jehovaso šatori?
8 Sar so ko doslovno šatori o manuš šaj te odmorini pe hem te ovel zaštitimo ando nevreme, e Jehovaso šatori šaj te zaštitini amen andi duhovno opasnost hem te del amen nada asi budućnost. Ked aćhovaja paše e Jehovaja, o Satana našti te ćerel amenđe trajno šteta (Ps. 31:23; 1. Jov. 3:8). Ko nevo sveto, o Jehova na ka zaštitini pe slugen samo ando odova so šaj te rumini olengo amalipe oleja, nego hem ando meribe (Otkr. 21:4).
9. So o Jehova očekujini ando pe gostija?
9 Ćaće tani bari čast so šaj te ova gostija ko Jehovaso šatori. Amen šaj te ova paše amala oleja hem odova amalipe šaj te trajini ki celo večnost. So valjani te ćera te šaj hem ponodri te ova olese gostija? Na primer, ako neko vićini tut ko gostija, tu mangeja te đane so ov očekujini tutar. Šaj ka valjani te huljave te kundre angleder te khuve andre hem tu odova ćereja. Isto ađahar, amen mangaja te đana so o Jehova očekujini ando okola so mangena hem ponodri te oven gostija ko oleso šatori. O mangipe premalo Jehova podstaknini amen te ćera sa so šaj te bi ćeraja le „te ovel bahtalo“ (Kol. 1:10). O Jehova tano amaro Amal, ama ov tano hem amaro Dad hem Devel kova zaslužini amaro poštovanje (Ps. 25:14). Amen niked na valjani te bistra odova hem odolese valjani te ovel amen strahopoštovanje premalo leste. Odova ka pomožini amen te na ćera diso so ka razočarini le. Amen mangaja uvek te ova skromna đi živinaja premali Devlesi volja (Mih. 6:8).
O JEHOVA NA HINE PRISTRASNO PREMALO IZRAELCIJA
10-11. So mothovi so o Jehova na hine pristrasno premalo pe sluge?
10 O Jehova nane pristrasno premalo pe gostija (Rimlj. 2:11) Odova đanaja sose o Jehova ađahar ponašinđa pe premalo Izraelcija đi hine ki pustinja Sinaj.
11 Palo odova so izbavinđa pe narodo ando Egipat, o Jehova ćhivđa e sveštenikonen te služinen lese ko sveto šatori. O Levitija kola služinđe sar sveštenikija hine len odgovornost te brininen pe ando buća kola hine ko sveto šatori. Da li o Jehova okolendar kola služinđe ko šatori hem okolendar kola živinđe uzo šatori brininđa pe pobuter nego ando avera? Na! O Jehova nane pristrasno!
12. Sar o Jehova mothovđa so na ćerđa razlika maškaro Izraelcija ki pustinja? (Izlazak 40:38; dikh i slika.)
12 Sare ko izraelsko logor hine len prilika te oven amala e Jehovaja, bizo obzir ko odova da li služinđe ko sveto šatori ili živinđe paše uzo leste. Na primer, o Jehova pobrininđa pe celo nacija te dikhel o stubo ando oblako hem o stubo andi jag kova hine upro sveto šatori. (Čitin Izlazak 40:38.) Ked o stubo počminđa te pomerini pe, čak okola kola hine but dur ando sveto šatori šaj hine te dikhen le. Palo odova, on počminđe te ćeden pe buća, pe šatorija hem te pođinen averencar (Br. 9:15-23). Isto ađahar, sare šaj hine te šunen o zvuk ando trube kola dinđe znak so valjani te pođinen (Br. 10:2). Kotar akava dikhaja so odova so neko živinđa paše uzo sveto šatori na značinđa so hine popaše e Jehovaja. Umesto odova, sare šaj hine te oven e Jehovase gostija hem te oven uverime so o Jehova ka vodini len hem ka brinini pe olendar. Slično tano hem avdije, bizo obzir kaj živinaja o Jehova mangela amen, brinini pe amendar hem zaštitini amen.
Odova so o šatori hine maškaro logor hine dokaz so o Jehova na hine pristrasno (Dikh o 12. odlomko)
O JEHOVA NI AVDIJE NANE PRISTRASNO
13. Sose šaj te phena so hem avdije o Jehova nane pristrasno?
13 Neko ando Jehovaso narodo živini uzo amaro glavno sedište ja uzi podružnica. Avera služinena ko odola thana. Odolese šaj te učestvujinen ko but buća kola ćerena pe odothe. Čak šaj lično družinena pe okolencar kola predvodinena. Disave služinena ki pokrajinsko služba ja ko avera oblikija andi specijalno punovremeno služba. Ako sebepi te okolnostija našti te služine e Jehovase ko asavko način, ov sigurno so tu pana hijan gosto ko Jehovaso sveto šatori hem so ov mangela tut. Isto ađahar, ov šukar đanela ko hijan tu hem dela tut odova so valjani tuće (1. Petr. 5:7). Sare ko Jehovaso narodo dobinena duhovno hrana, uputstvija hem zaštita koja valjani lenđe.
14. Sar o Jehova pana mothovđa so nane pristrasno?
14 Aver način sar o Jehova mothovđa so nane pristrasno tano ađahar so ćerđa i Biblija te ovel dostupno sa e manušenđe. O sveta spisija prvo hine pisime ko trin ćhibja: ki hebrejsko, ki aramejsko hem ki grčko. Da li o manuša kola šaj te čitinen i Biblija ko odola ćhibja tane popaše e Jehovaja ando okola kola našti? Na (Mat. 11:25).
15. Kova dokaz isi amen so o Jehova nane pristrasno? (Dikh i slika.)
15 O Jehova na vićini amen te ova olese amala samo sose završinđam bari škola ja đanaja o ćhibja ko kola hine pisimi i Biblija. Andi Jehovasi mudrost šaj te sikljon sa o manuša ki phuv, a na samo okola so završinđe bari škola. Oleso Lafi, i Biblija, tani prevodimi ko prekalo 1 000 ćhibja. Odolese, o manuša ko celo sveto šaj te sikljon olestar hem te oven olese amala (2. Tim. 3:16, 17).
Sar odova soj tani i Biblija prevodimi ko but ćhibja tano dokaz so o Jehova nane pristrasno? (Dikh o 15. odlomko)
AĆHOV E JEHOVASO GOSTO
16. Premalo Dela apostolska 10:34, 35, sar šaj te aćhova gostija ko Jehovaso šatori?
16 Ćaće tani bari čast te ova e Jehovase gostija ko oleso šatori. Ov but mangela amen, but tano šukar hem gostoljubivo. Isto ađahar, nane pristrasno hem prihvatini sarinen bizo obzir kaj živinena, kotar avena, savi rasa tane, kobor berš isi len ili da li tane murša ja đuvlja. Ama, te šaj te oven ko oleso šatori, on mora te oven lese poslušna. (Čitin Dela apostolska 10:34, 35.)
17. Sar šaj te đana kas o Jehova prihvatini te ovel gosto ko oleso šatori?
17 Ko Psalam 15:1 o David pućlja: „Jehova, ko šaj te ovel gosto ko to šatori? Ko šaj te ovel ki ti sveto gora?“ Palo odova, o Jehova prekalo David odgovorini ko pućiba kola tane ko 15. psalam. Ko aver članko ka vaćera ando disave buća kola valjani te ćera te šaj te ugodina e Jehovase hem te aćhova olese amala.
ĐILI 32 Ov ki Jehovasi strana!
