1, 2. Καγιά πρόσκληση ντέλα ο Ιεχωβά πι αφοσιωμέ υπηρετόντε;

 ΑΜΑ κάποιος κα πουτσέλ-τουμέν: “Σο ισί ο Ιεχωβά τουμένγκε;” σο κα βακερένας; Μπορεί τι βακερένας: “Ο Ιεχωβά ισί μο Ντατ, μο Ντεβέλ ντα μο Αμάλ”. Μπορεί επίσης τι σκεφτίνεν γιαβερά-ντα πράγματα ι Ιεχωβάσκε. Αλλά σκεφτιντέν ποτές ότι τουμέν ισινέν εκ κατά μισαφίρια λέσκε;

² Ο βασιλιάς Δαβίδ βακερντάς ότι ο Ιεχωβά ισί σαρ Οντουβά σο καλίνελα-αμέν ντα ο αφοσιωμέ υπηρέτες λέσκε ισί σαρ λέσκε μισαφίρια. Πουτσλάς: «Ιεχωβά, κον μπορίνελα τι αβέλ μισαφίρι τι τσαντιρίστε; Κον μπορίνελα τι μπεσέλ τι άγιε βεσέστε;» (Ψαλμ. 15:1) Ανταλέ εδαφιόσταρ σικλιάσα ότι μπορίνασα τι αβάς μισαφίρια ι Ιεχωβάσκε, δηλαδή λέσκε αμαλά. Νανέ μπουτ σουκάρ ανταγιά πρόσκληση σο ντέλα-αμέν ο Ιεχωβά;

Ο ΙΕΧΩΒΑ ΜΑΝΓΚΕΛΑ ΤΙ ΑΒΑΣ ΛΕΣΚΕ ΜΙΣΑΦΙΡΙΑ

3. Καβά ισινέ ο πρώτος μισαφίρι ι Ιεχωβάσκο, ντα σαρ νιωθίνελας ο εκ ι γιαβερέσκε;

³ Πριν τι λατσσαρέλ σαρέ ο πράγματα, ο Ιεχωβά ισινέ κορκορό. Αλλά σοράν λατσσαρντάς πι πρώτε Τσσαβές. Ο Ιεχωβά ισινέ σαρ τι καλιντάς πι πρώτε μισαφιρίς πι τσαντιρίστε. Ανταβά ισινέ κάτι νεβό λέσκε, ντα ανέλας λέσκε μπαρί χαρά. Η Αγία Γραφή βακερέλα ότι ο Ιεχωβά “μανγκέλας μπουτ” πι Τσσαβές. Αλλά να νιωθίνελας σάντε ο Ιεχωβά σουκάρ. Εμ ο πρώτος μισαφίρι λέσκο, δηλαδή ο Ιησούς, “χαιρίνελας πάντα ανγκλάλ κο Ιεχωβά”.—Παρ. 8:30.

4. Καλέ γιαβερέν καλιντάς ο Ιεχωβά πι τσαντιρίστε;

⁴ Πο σοράν, ο Ιεχωβά κερντάς ι αγγελόν, σο βον-ντα ισινέ λέσκε μισαφίρια. Ο άγγελοι βακέρντιβενα «τσσαβέ ι Ντεβλέσκε» ντα η Γραφή βακερέλα ότι ισί ευτυχισμέ πασέ κο Ιεχωβά. (Ιώβ  38:7· Δαν. 7:10) Για μπουτ μπρεσά, ο αμαλά ι Ντεβλέσκε ισινέ σάντε οντουλά σο μπεσένας κο ουρανός γιεκ λέσαρ. Σοράν, κερντάς ι τζενέν ντα καλιντάς λεν-ντα τι αβέν λέσκε αμαλά. Μερικοί ανταλέ μισαφιρίνταρ ισινέ ο Ενώχ, ο Νώε, ο Αβραάμ ντα ο Ιώβ. Οντουλά υπηρέτες ι Ντεβλέσκε βακέρντιλε λέσκε αμαλά, ή γιαβέρσοϊ, τζενέ σο πφιρντέ «ι αληθινέ Ντεβλέσαρ».—Γέν. 5:24· 6:9· Ιώβ 29:4· Ησ. 41:8.

5. Σο σικλιάσα κατά προφητεία σο ισί κο εδάφια Ιεζεκιήλ 37:26, 27;

⁵ Καζόμ νακχένας ο μπρεσά, ο Ιεχωβά συνεχίνελας τι καλίνελ πι αμαλέν τι αβέν λέσκε τσαντιρίστε. (Διαβάνεν Ιεζεκιήλ 37:26, 27) Για παράδειγμας, κατά προφητεία του Ιεζεκιήλ σικλιάσα ότι ο Ντεβέλ μανγκέλα μπαγιά σαρέ ο αφοσιωμέ υπηρέτες λέσκε τι τθερέν εκ λατσσί φιλία λέσαρ. Ντέλα πο λάφι τι “κερέλ συμφωνία λέντζαρ”. Οντιά προφητεία κα νικιόλας μπαγιά κάνα ο χρισμέ ντα ο γιαβερά μπρακέ κα αβένας ενωμέ κο τσαντίρι κι Ιεχωβάσκο σαρ «εκ κοπάδι». (Ιωάν. 10:16) Ανταβά αβέλα-πες ακανά!

Ο ΝΤΕΒΕΛ ΦΡΟΝΤΙΝΕΛΑ-ΑΜΕΝ ΚΑΪ-ΝΤΑ ΤΙ ΑΒΑΣ

6. (α) Σαρ αβέλα-πες εκ τζενό μισαφίρι κο τσαντίρι κι Ιεχωβάσκο; (β) Κατέ ισί ι Ιεχωβάσκο τσαντίρι;

⁶ Κο πουρανέ μπρεσά, ο τζενέ τθερένας ο τσαντίρια για τι ξεκουράντιβεν. Επίσης ο τσαντίρια αρακχαβένας-λεν κατά κχαμ ντα κατά μπρισίμ. Εκ μισαφίρι οντουλέ τσαντιρίστε τζανέλας ότι κα φροντίνεν-λες λατσσές. Κάνα ντάσα αμαρό λάφι τι τζουβντιάς ι Ιεχωβάσκε, αβάσα μισαφίρια λέσκε τσαντιρίστε. (Ψαλμ. 61:4) Τθεράσα μπερεκέτι πνευματικός χαμπέ ντα αμαλέν σο ισί βον-ντα μισαφίρια ι Ιεχωβάσκε. Ο τσαντίρι ι Ιεχωβάσκο νανέ εκχέ συγκεκριμέ τθανέστε. Μπορεί τι γκιλέν εκχέ γιαβερέ τθεμέστε, σε εκ ειδική συνέλευση, ντα τι γνωριντέν γιαβερέ-ντα τζενέν σο τθερένα ο προνόμιος τι αβέν κο τσαντίρι κι Ντεβλέσκο. Ο τσαντίρι ι Ιεχωβάσκο ισί κάι-ντα τι αβέν πιστοί υπηρέτες λέσκε.—Αποκ. 21:3.

7. Σόσκε βακεράσα ότι ο πιστοί σο μουλέ συνεχίνενα τι αβέν αντρέ κο τσαντίρι κι Ιεχωβάσκο; (Ντικχέν ι φωτογραφία-ντα)

⁷ Σο αβέλα-πες ι πιστέ τζενέντζαρ σο μουλέ; Συνεχίνενα τι αβέν αντρέ κο τσαντίρι κι Ιεχωβάσκο; Βα! Σόσκε βακεράσα-λες ανταβά; Επειδή ο Ιεχωβά θυμίνελα-λεν αζόμ λατσσές, σο λέσκε ισί ατζέ τζουβντέ. Ο Ιησούς βακερντάς: «Ο Μωυσής-ντα κερντάς λάφι ι μουλένγκε σο κα τζουβντιόν πάλι, κι ιστορία ι καντραλέ θαμνόσκε, κάνα βακερέλα ι Ιεχωβάσκε “Ντεβέλ ι Αβρααμίσκο ντα Ντεβέλ ι Ισαακίσκο ντα Ντεβέλ ι Ιακωβίσκο”. Βοβ νανέ Ντεβέλ ι μουλένγκο, αλλά ι τζουβντένγκο, σόσκε λέσκε σαρέ ισί τζουβντέ».—Λουκ. 20:37, 38.

 ΚΑΛΑ ΛΑΤΣΣΙΜΑΤΑ ΤΘΕΡΑΣΑ ΝΤΑ ΣΟ ΠΡΕΠΕΙ ΤΙ ΚΕΡΑΣ

8. Καλά λατσσίματα τθεράσα επειδή ισινάμ κο τσαντίρι κι Ιεχωβάσκο;

⁸ Τζανάσα ότι εκχέ τσαντιρίστε τσσουβάσα-αμέν για τι ξεκουράντιβας ντα τι αρακχαβάς-αμέν κατά κχαμ ντα κατά μπρισίμ. Αντικάς ο τσαντίρι ι Ιεχωβάσκο-ντα αρακχαβέλα αμαρί φιλία λέσαρ ντα ντέλα-αμέν εκ σουκάρ ελπίδα για το μέλλον. Κάνα ατσσάσα πασέ κο Ιεχωβά, ο Μπενγκ ναστί κερέλα αμένγκε ζιάνι σο κα ατσσικιαρέλ για πάντα. (Ψαλμ. 31:23· 1 Ιωάν. 3:8) Κο νεβό ντουνιάς, ο Ιεχωβά κα συνεχίνελ τι αρακχαβέλ πι πιστέ αμαλέν για μα τι χαλάντιβελ η φιλία σο τθερένα λέσαρ. Επίσης, κα αρακχαβέλ-λεν κατά μεριπέ.—Αποκ. 21:4.

9. Σαρ μανγκέλα ο Ιεχωβά τι συμπεριφερίντιβεν λέσκε μισαφίρια;

⁹ Ισί αμένγκε μπαρό προνόμιος τι αβάς μισαφίρια κο τσαντίρι κι Ιεχωβάσκο, δηλαδή τι τθεράς εκ φιλία λέσαρ σο μπορίνελα τι ατσσικιαρέλ για πάντα. Σαρ πρέπει τι συμπεριφερίντιβας άμα μανγκάσα τι συνεχίνας τι αβάς λέσκε μισαφίρια; Άμα κάποιος κα καλίνελ-τουμέν πι κχερέστε, μανγκένα τι τζανέν σο μπεσέλα τουμένταρ. Για παράδειγμας, μπορεί τι μπεσέλα τουμένταρ τι νικαβέν τουμαρέ τεραχά πριν τι αβέν αντρέ, ντα σίγουρα κα κερένας-λες. Αντικάς-ντα, μανγκάσα τι τζανάς σο μπεσέλα ο Ιεχωβά οντουλένταρ σο μανγκένα τι συνεχίνεν τι αβέν λέσκε τσαντιρίστε. Αμαρί αγάπη ι Ιεχωβάσκε κα τσσίντελ-αμέν τι κεράς σο νακχέλα αμαρέ βαστέσταρ για τι ανάς λέσκε χαρά. (Κολ. 1:10) Παρόλο σο ο Ιεχωβά ισί αμαρό Αμάλ, ισί επίσης αμαρό Ντεβέλ ντα αμαρό Ντατ, σο αξίνελα τι σεβάνας-λες. (Ψαλμ. 25:14) Δεν πρέπει ποτές τι μπιστράς κον ισί ο Ιεχωβά, ντα μανγκάσα πάντα τι τθεράς μπαρό σεβασμός λέσκε. Ανταβά κα βοηθίνελ-αμέν τι ατσσάς ντουρ κατά πράγματα σο κα προσβαλίνενας-λες ντα “τι πφιράς με μετριοφροσύνη”.—Μιχ. 6:8.

Ο ΙΕΧΩΒΑ ΝΑ ΞΕΧΩΡΙΝΕΛΑΣ ΚΑΕΚΧΕΣ ΚΑΤΑ ΙΣΡΑΗΛΙΤΕΣ

10, 11. Σο σικαβέλα ότι ο Ιεχωβά να ξεχωρίνελας καεκχές κι έρημος κο Σινά;

¹⁰ Ο Ιεχωβά συμπεριφερίντιβελα σαρέ κο τζενέ σο τθερέλα πι τσαντιρίστε ι ίδιε τροπόσαρ. (Ρωμ. 2:11) Μπορίνασα τι αγαβάς ατζέ πο λατσσές ότι ο Ιεχωβά να ξεχωρίνελα καεκχές κατά τρόπος σο συμπεριφερισάλο κο Ισραηλίτες κι έρημος κο Σινά.

¹¹ Κο πουρανέ μπρεσά, ο υπηρέτες ι Ιεχωβάσκε ισινέ δούλοι κι Αίγυπτος. Κάνα ο Ιεχωβά ελευθερωντάς-λεν, διοριντάς ιερείς τι υπηρετίνεν κι σκηνή της μαρτυρίας. Κο Λευίτες ντινάς γιαβερά μπουτιά τι κερέν κι σκηνή. Μερικά τζενέ υπηρετίνενας αντρέ κι σκηνή της μαρτυρίας ή τσσουβένας πουμαρό τσαντίρι μπουτ πασέ λάτε. Μήπως ο Ιεχωβά φροντίνελας-λεν πο λατσσές κατά γιαβερά; Όχι! Ο Ιεχωβά να ξεχωρίνελας καεκχές.

12. Σαρ σικαντάς ο Ιεχωβά ότι να ξεχωρίνελας καεκχές πι λαόσταρ; (Έξοδος 40:38) (Ντικχέν ι φωτογραφία-ντα)

¹² Κάθε Ισραηλίτης μπορίνελας τι αβέλ λατσσό αμάλ ι Ιεχωβάσκο. Να τθερέλας σημασία άμα υπηρετίνελας αντρέ κι σκηνή ή άμα μπεσέλας πασέ λάτε. Για παράδειγμας, ο Ιεχωβά κανονιντάς ο πράγματα για τι μπορίνελ σαρό ο λαός τι ντικχέλ ο σύννεφος ντα ι γιακχ σο ισινέ οπράλ κατά σκηνή της μαρτυρίας. (Διαβάνεν Έξοδος 40:38) Κάνα ο σύννεφος αρχίνελας τι τζαλ γιαβερτθέ, ατζέ-ντα οντουλά σο μπεσένας μπουτ ντουρ κατά σκηνή της μαρτυρίας μπορίνενας τι ντικχέν-λες. Σοράν γκίντενας πουμαρέ πράγματα, πουμαρέ τσαντίρια ντα νασένας γιεκ σαρέ ι λαόσαρ. (Αριθ. 9:15⁠-23) Σαρέ μπορίνενας τι ασουνέν ο ζουρανό ήχος σο νικαβένας ο ντούι ασημένιες σάλπιγγες ντα σικαβέλας λένγκε  ότι έπρεπε τι ετοιμάνεν-πες για τι νασέν. (Αριθ. 10:2) Οτθάρ, επειδή εκ τζενό μπεσέλας πασέ κι σκηνή, ανταβά να μανγκέλας τι βακερέλ ότι ισινέ πο λατσσό αμάλ ι Ιεχωβάσκο οντουλένταρ σο μπεσένας πο ντουρ. Οκιά μπάνταρ, σαρέ ο τζενέ κο λαός κι Ιεχωβάσκο μπορίνενας τι αβέν λέσκε τσαντιρίστε ντα τι αβέν σίγουροι ότι Βοβ κα οδηγίνελ-λεν ντα κα αρακχαβέλ-λεν. Αντιβές-ντα, κάι-ντα τι τζουβντιάσα κι πφουβ, ο Ιεχωβά μανγκέλα-αμέν, φροντίνελα-αμέν ντα αρακχαβέλα-αμέν.

ΣΑΡ ΣΙΚΑΒΕΛΑ Ο ΙΕΧΩΒΑ ΟΤΙ ΝΑ ΞΕΧΩΡΙΝΕΛΑ Ι ΤΖΕΝΕΝ ΑΝΤΙΒΕΣ

13. Καβά ισί εκ τρόπος σο ο Ιεχωβά σικαβέλα ότι να ξεχωρίνελα ι τζενέν αντιβές;

¹³ Αντιβές, μερικοί κατά λαός ι Ντεβλέσκο τζουβντιόνα πασέ κο παγκόσμια κεντρικά γραφεία ή κο Μπέθελ. Γιαβερά υπηρετίνενα κο Μπέθελ. Οτθάρ, ανταλά τζενέ κερένα μπουτ κατά μπουτιά σο αβένα-πες οτθέ ντα ντικχένα πασάλ ι πφραλέν σο οδηγίνενα-αμέν. Γιαβερά ισί επίσκοποι περιοχής ή τθερένα εκ γιαβέρ διορισμός κι ειδική ολοχρόνια υπηρεσία. Τζανάσα όμως ότι ο πο μπουτ πφραλά να τθερένα εκ ασακό προνόμιος. Άμα ισινέν τουμέν-ντα εκ ανταλένταρ, τι αβέν σίγουροι ότι ο Ιεχωβά μανγκέλα σαρέ πι μισαφιρίν. Μα μπιστρέν ποτές ότι τζανέλα-τουμέν μπουτ λατσσές ντα κα ντελ-τουμέν σο-ντα χρειαζίντιβενα. (1 Πέτρ. 5:7) Ο Ιεχωβά ντέλα πνευματικός χαμπέ σαρέ πι υπηρετόντε. Επίσης οδηγίνελα-λεν ντα αρακχαβέλα-λεν.

14. Καβά ισί εκ γιαβέρ παράδειγμας σο σικαβέλα ότι ο Ιεχωβά να ξεχωρίνελα ι τζενέν;

¹⁴ Εκ γιαβέρ παράδειγμας σο σικαβέλα ότι ο Ιεχωβά να ξεχωρίνελα ι τζενέν ισί ότι ντέλα ι Αγία Γραφή τζενέντε σαρί κι πφουβ αντιβές. Η Αγία Γραφή γραφισάλι τρινέ τσσιμπέντε: κο εβραϊκά, κο αραμαϊκά ντα κο μπαλαμανές. Μήπως ο τζενέ σο μπορίνενα τι διαβάνεν ι Γραφή κο τσσιμπά σο γραφισάλι κο πουρανέ μπρεσά, τθερένα πο ζουρανί φιλία ι Ιεχωβάσαρ κατά τζενέ σο να μπορίνενα τι κερέν-λες ανταβά; Όχι, ανταβά νανέ μπαγιά.—Ματθ. 11:25.

15. Σο γιαβέρ σικαβέλα ότι ο Ιεχωβά να ξεχωρίνελα ι τζενέν; (Ντικχέν ι φωτογραφία-ντα)

 ¹⁵ Για τι αβέλ εκ τζενό αμάλ ι Ιεχωβάσκο, να χρειαζίντιβελα τι αβέλ μορφωμέ ή τι τζανέλ ο τσσιμπά σο γραφισάλι η Γραφή. Ο Ιεχωβά ντέλα πι σοφία σαρέ ι τζενέντε κι πφουβ, είτε ισί μπουτ μορφωμέ είτε όχι. Λέσκο Λάφι μεταφρασάλο χιλιάδες τσσιμπέντε. Οτθάρ, τζενέ σαρί κι πφουβ μπορίνενα τι ντικχέν λατσσιπέ κατά πράγματα σο βακερέλα η Γραφή ντα τι σικλιόν σαρ μπορίνενα τι αβέν λέσκε αμαλά.—2 Τιμ. 3:16, 17.

ΚΕΡΕΝ Ι ΙΕΧΩΒΑΣΚΟ ΓΚΙ ΝΤΑ ΑΤΣΣΟΝ ΛΕΣΚΕ ΤΣΑΝΤΙΡΙΣΤΕ

16. Σαρ σικαβένα ο εδάφια Πράξεις 10:34, 35, σαρ κα ατσσάς κο τσαντίρι κι Ιεχωβάσκο;

¹⁶ Ισί μπαρό προνόμιος τι καλίνελ-αμέν ο Ιεχωβά πι τσαντιρίστε. Σικαβέλα αμένγκε μπουτ αγάπη ντα λατσσιπέ ντα μανγκέλα τι νιωθίνας σουκάρ. Επίσης, ο Ιεχωβά να ξεχωρίνελα καεκχές. Δεχτίνελα-αμέν σαριλέν κάι-ντα τι μπεσάσα, σαρ-ντα τι ισινέ αμαρί ζωή πο τζανγκλέ, κατάρ-ντα τι αβιλάμ ή καλέ φαράταρ-ντα τι ισινάμ. Λέσκε, να τθερέλα σημασία άμα ισινάμ μορφωμέ ή όχι, καζόμ μπρεσένγκε ισινάμ, ή άμα ισινάμ μουρσά ή τζουβλιά. Ενώ ο Ιεχωβά μανγκέλα τι αβάς λέσκε τσαντιρίστε, δεχτίνελα σάντε οντουλέν σο ντένα καν λέστε.—Διαβάνεν Πράξεις 10:34, 35.

17. Σο κα ντικχάς κο γιαβέρ μάθημας;

¹⁷ Σαρ σικαβέλα ο εδάφιος Ψαλμός 15:1, ο Δαβίδ πουτσλάς: «Ιεχωβά, κον μπορίνελα τι αβέλ μισαφίρι τι τσαντιρίστε; Κον μπορίνελα τι μπεσέλ τι άγιε βεσέστε;» Σοράν ο Ιεχωβά, αντράλ κατά Δαβίδ, απαντιντάς οντουλέ ερωτησιέντε κο γιαβερά εδάφια σο ισί κο Ψαλμός 15. Κο γιαβέρ μάθημας, κα ντικχάς μερικά κατά πράγματα σο πρέπει τι κεράς για τι ανάς χαρά κο Ιεχωβά ντα τι συνεχίνας τι αβάς λέσκε αμαλά.