NHLOKOMHAKA YA XIDONDZRO 23
LISIMU 28 I Mani Munghanu Wa Yehovha?
Yehovha A Hi Zramba Ku Va Vayeni Vake
‘A wuyaku byanga byi ta va ku vone; ndzri ta va Xikwembu Nkulukumba wavu.’—EZEK. 37:27.
NKONGOMETO
Ku kombisa ku tlangela ka xizrambu xa Yehovha xa ku va vayeni a tendeni dzrake ni ku kombisa ku tlangela ka ndlela leyi a hi hlayisaka ha yone swanga lweyi a hi Zrambaka.
1-2. He xini xizrambu lexi Yehovha a xi yentxelaka vagandzreli vake va ku dumbeka?
LOKO mhunu a ku vutisa leswaku i yini Yehovha kwaku, a u ta hlamulisa kuyini? Kumbexana u nga ha ku ‘Yehovha i Papayi wanga, Xikwembu Nkulukumba wanga ni munghanu wanga.’ Yehovha a ni swithopo swin’wana kumbe mavitanela man’wana lawa ma tlhamuxelaka wumhunu byake. Xana u same u yanakanya leswaku Yehovha a tlhela a va lweyi a ku Zrambaka leswaku u va tendeni dzrake?
2 Loko Hosi Davhida a vulavula hi ku va ni wunghanu na Yehovha, a fananise Yehovha ni n’winyi wa muti kambe vagandzreli vake swanga vayeni. Davhida a vutise leswi: ‘Yehovha, a muyeni waku a ta va mani a tendeni dzraku? A ta va mani xana, lwa taka yaka a nhaveni yaku ya ku xwenga?’ (Amaps. 15:1) A ndzrimana leyi yi hi yentxa hi twisisa leswaku hi nga va vayeni a tendeni dzra Yehovha kumbe hi va vanghanu vake. Xana a xizrambu lexi xa Yehovha a xi nyonxisi?
YEHOVHA A DJULA LESWAKU HI VA VAYENI VAKE
3. Hi mani muyeni wa ku sungula wa Yehovha nakone a va ti twisa kuyini hi mun’wana ni mun’wana?
3 Na a nga si tumbuluxa ntxhumu, Yehovha a a li wuswake. Kambe a game a tumbuluxa N’wanake wa mativula. Swi fane ni loko Yehovha a zrambe muyeni wake wa ku sungula a tendeni dzrake nakone a nyonxe ngopfu hi ku yentxa leswo. A Bibele dzri hlaya leswaku Yehovha a a ‘tsrhava’ hi n’wanake. Kambe hi tlhelo dzrin’wana a muyeni wake wa ku sungula ku nga N’wanake, ‘afa a tsrhava mahlweni ka [Yehovha] hi masiku’.—Amapr. 8:30.
4. Hi vamani vambeni lava viki vayeni tendeni dzra Yehovha?
4 Ntsrhaku ka leswo, Yehovha a tumbuluxe tintsrumi, leti na tone ti viki vayeni vake. A tintsrumi ti vitaniwa ‘vana va Xikwembu Nkulukumba’ nakone Bibele dzri tlhela dzri hlaya leswaku ti nyonxe ngopfu hi ku va tlhelweni ka Yehovha. (Yb. 38:7; Dan. 7:10) Ku dzringana malembe manyingi, vanghanu va Yehovha a ku li ntsena lava a va hanya na yene a matilweni. Kambe hi ku famba ka nkama, Yehovha a tumbuluxe vhanu lava a va yamukeliki swanga vayeni a tendeni dzrake. Van’we va vayeni volavo ku ve Enoki, Nowa, Abrahamu na Yobe. A Bibele dzri hlaya leswaku a va li vanghanu va Xikwembu Nkulukumba hikusa a va mu yingiseta.—Gen. 5:24; 6:9; Yb. 29:4; Eza. 41:8.
5. Hi nga dondzra yini ka wuprofeta lebyi nga ka Ezekiel 37:26, 27?
5 Ku dzringana malembe manyingi, Yehovha a ha tama a zramba vanghanu vake kuva va va vayeni vake. (Dondzra Ezekiel 37:26, 27.) Hi xikombiso, ka wuprofeta bya Ezekiyele hi dondzre leswaku Yehovha a djula leswaku vagandzreli vake lava ku dumbeka va va ni wuxaka bya le kusuhi na yene. A dumbisa ku hamba ‘xipfumelelanu xa ku zrula na vone’. A wuprofeta lebyi, byi khanela hi nkama lowu lava nga ni dumbo dzra ku ya hanya a matilweni ni lava nga ni dumbo dzra ku hanya lani misaveni va taka va xikan’we a tendeni dzrake dzra ku fanekisela swanga “ntlhambi wun’we”. (Yoh. 10:16) A wuprofeta lebyo bya hetiseka namunhla!
YEHOVHA AWA HI HLAYISA KUN’WANA NI KUN’WANA LOMU HI NGA KONE
6. Xana mhunu a nga va muyeni tendeni dzra Yehovha hi ndlela yini nakone tende ledzro dzri kumeka kwini?
6 A minkameni ya khale, a tendeni a ku li mbangu wa ku wisela ka wone kumbe ku tumbela mpfula ni xidzedze. Loko mhunu a zruzreliwa a tendeni a a tiyiseka leswaku n’winyi wa muti a a ta mu hlayisa ha hombe. Nkama lowu hi tinyiketeliki ka Yehovha, hi ve vayeni a tendeni dzrake dzra ku fanekisela. (Amaps. 61:4) A tendeni ledzro dzra moya, hi ni mixaka hinkwayu ya swakuda leyi hi yi vilelaka akuva hi tama hi va vanghanu va Yehovha ni ku va vanghanu va lava na vone va nga vayeni a tendeni dzra Yehovha. Kun’wana ni kun’wana lomu hi tsrhamaka kone, hi nga va vayeni a tendeni dzra Yehovha. Swi nga yentxeka u same u yendzrela tiko dzrin’wana, hi xikombiso loko u ya ka kongresu dzra ku hlawuleka, ni ku tiva van’wana lava na vone va nyonxaka hi ku va tendeni dzra Yehovha. A tende dzra Yehovha dzri kumeka kun’wana ni kun’wana lani ku nga ni vagandzreli vake.—Mpful. 21:3.
7. Ha yini hi hlaya leswaku malandzra ya ku dumbeka lama fiki ma ha li vayeni a tendeni dzra Yehovha? (Tlhela u vona ni mufoto.)
7 Swi li yini hi malandzra ya Yehovha lama fiki? Xana hi nga hlaya leswaku ma ha li vayeni a tendeni dzra Yehovha? Ina! Ha yini hi hlaya leswo? Hikusa vhanu lava va ha hanya a miyanakanywini ya Yehovha. Yesu a tlhamuxele leswi: “Mayelanu ni ku pfuka ka vafi, nambi Moxe a swi kombisile ka dzrungula dzra mayelanu ni xinsinyana xa mitwa, loko a hlaye leswaku Yehovha i ‘Xikwembu Nkulukumba wa Abrahamu, Xikwembu Nkulukumba wa Izaki ni Xikwembu Nkulukumba wa Yakobe’. Yene a hi Xikwembu Nkulukumba wa lava fiki, kambe i Xikwembu Nkulukumba wa lava hanyaka, hikusa kwake hinkwavu va hanya.”—Luk. 20:37, 38.
Nambi malandzra ya ku dumbeka lama fiki, ma nga ha tama ma voniwa swanga vayeni a tendeni dzra Yehovha (Vona yava 7)
MATOVOKO NI LESWI HI FANELAKA KU SWI YENTXA
8. He wani matovoko lawa lava nga vayeni a tendeni dzra Yehovha va nga na wone?
8 Swanga hi leswi a tende dzra ha kakunene ku nga mbangu wunene wa ku wisela ka wone kumbe ku tumbela mpfula ni xidzedze, a tende dzra Yehovha na dzrone dzri sizrelela vayeni vake ka ntxhumu wun’wana ni wun’wana lowu wu nga ha honaka wuxaka byavu na yene ni ku tlhela dzri va nyika dumbo dzra wumundzruku. Sathana a nge yentxi ntxhumu lowu nga hi vavisaka hi lani ku nga helikiki. (Amaps. 31:23; 1 Yoh. 3:8) Nakone a misaveni leyimpshwa, Yehovha a ta tama a sizrelela vanghanu vake va ku dumbeka ku nga li ka mintxhumu leyi nga honaka wuxaka byavu na yene ntsena kambe ni le ka lifu.—Mpful. 21:4.
9. Xana Yehovha a djula leswaku hi yentxa yini swanga vayeni vake?
9 I ntiyiso leswaku swi nandzrika ngopfu ku va muyeni a tendeni dzra Yehovha akuva hi va ni wuxaka lebyi nga helikiki na yene. I yini leswi hi fanelaka ku swi yentxa akuva hi tama hi va vayeni vake? Loko u zrambiwa kaya ka mhunu, u ta yentxa hinkwaswu akuva u nyonxisa n’winyi wa muti. Hi xikombiso, a n’winyi wa muti a nga ha ku kombela kuva u hlivila swifambu na u nga si nghena ndlwini nakone u ta swi yentxa leswo. Hi lani ku fanaka, na hine hi djula ku tiva leswi Yehovha a djulaka leswaku hi tama hi swi yentxa akuva hi va vayeni a tendeni dzrake. Lizrandzru ledzri hi nga na dzrone ha Yehovha dzri hi susumetela ku yentxa hinkwaswu leswi hi nga swi kotaka akuva hi “mu nyonxisa”. (Kol. 1:10) Yehovha i munghanu wezru, kambe hi fanela ku dzrimuka leswaku i Xikwembu Nkulukumba ni Papayi wezru, xileswo hi fanela ku mu hlonipha. (Amaps. 25:14) Na hi ni leswo miyanakanywini, hi fanela ku mu hlonipha minkama hinkwayu nakone hi nga dzrivali leswaku hi yene mani. Ku yentxa leswo swi ta hi pfuna ku va hi nga yentxi ntxhumu lowu nga mu khunguvanyisaka. Handle ka leswo, “hi djula ku famba hi ku titsrongahata” na Xikwembu Nkulukumba wezru.—Mik. 6:8.
YEHOVHA A NGA VA KOMBISANGA XIHLAWUHLAWU VAISRAYELE
10-11. Ndlela leyi Yehovha a kongomisiki ha yone Vaisrayele a mananga ya Sinayi, yi swi kombisise kuyini leswaku a nga na xihlawuhlawu?
10 Yehovha a nga va kombisi xihlawuhlawu vayeni vake. (Rom. 2:11) Hi nga ku twisisa ha hombe ku kala xihlawuhlawu ka Yehovha loko hi vona ndlela leyi a kongomisiki ha yone Vaisrayele loko va li mananga ya Sinayi.
11 Ntsrhaku ka loko Yehovha a humese vhanu vake a wukazraweni a Egipta, a hlawule vaprista akuva va tizra a tabernakeleni. A Valevhi va yaveliwe kuva va yentxa mintizro yin’wana a tabernakeleni. Xana Yehovha a a va tovokisa ngopfu vhanu lava a va tizra a taberkeleni kumbe lava a va tsrhama kusuhi na dzrone ku tlula lavan’wana? Im-him! Yehovha a nga na xihlawuhlawu.
12. Xana Yehovha a swi kombisise kuyini leswaku a nga na xihlawulawu loko a kongomisa tiko dzra Israyele? (Eksoda 40:38) (Tlhela u vona mufoto.)
12 Muisrayele mun’wana ni mun’wana a a ta va ni wuxaka bya le kusuhi na Yehovha, swi nge na mhaka leswaku a tizra kumbe a tsrhama kusuhi ni tabernakele. Hi xikombiso, Yehovha a hambe malulamiselo akuva tiko hinkwadzru dzri kota ku vona pilari dzra tlavi kumbe pilari dzra ndzrilo ledzri a dzri le henhla ka tabernakele. (Dondzra Eksoda 40:38.) Loko tlavi dzri sungula ku txintxa dzri ya ka mbangu wun’wana, nambi lava a va tsrhama kule ni tabernakele a va swi kota ku dzri vona, va va va hohlotela matende yavu, va tsrimba mintsrhwalu yavu ni ku famba kun’we ni vambeni. (Atinhl. 9:15-23) Handle ka leswo, hinkwavu a va ta kota ku wu yingela ha hombe mpfumawulu wa tinanga tibidzri ta prata, lowu a wu li xikombiso ka tiko hinkwadzru xa leswaku a va fanela ku hohlota matende, va tsrimbelela mintsrhwalu va va va suka va famba. (Atinhl. 10:2) Leswi liki, kuva mhunu a tsrhama kusuhi ni tabernakele a swi nga hlayi swone leswaku a ta va ni wuxaka bya le kusuhi na Yehovha ku tlula vambeni. Handle ka leswo, vhanu hinkwavu va tiko ledzriyani ledzri a dzri tinyiketelile ka Yehovha, a va ta va vayeni va Yehovha, va yamukela nkongomiso ni nsizrelelo wake. Hi lani ku fanaka namunhla, a swi na mhaka leswaku hi tsrhama kwini, Yehovha awa hi zrandzra, awa zron’weka ha hine nakone awa hi sizrelela.
A tabernakele ledzri a dzri li makazri ka matende ya Vaisrayele, a ku li xikombiso xa leswaku Yehovha a nga na xihlawuhlawu (Vona yava 12)
NI NAMUNHLA YEHOVHA A NGA NA XIHLAWUHLAWU
13. Xana Yehovha a swi kombisisa kuyini leswaku a nga na xihlawuhlawu namunhla?
13 Man’we ya malandzra ya Xikwembu Nkulukumba namunhla, ma tsrhama kusuhi ni ntsindzra wa misava hinkwayu wa Timboni ta Yehovha kumbe a mabetele. Van’we va tizra ka mimbangu yoleyo. Xileswo, van’we vavu va nga ha pfunisa ka mintizro leyi yentxiwaka ka mimbangu leyo nambi ku va kun’we ni lava zrangelaka a nhlengeletanwini. Van’we va tizra swanga valaviseli va miganga kasi van’wana va le ka mintizro yin’wana ya ku hlawuleka ya nkama hinkwawu. Kambe nambi u nga li kone ka yin’we ya mintizro leyi, u nga tiyiseka leswaku Yehovha, lweyi a ku Zrambaka, a zrandzra vayeni vake hinkwavu ku patsra na wene. Nakone a ta ku nyika hinkwaswu leswi u swi vilelaka. (1 Pet. 5:7) Hinkwavu vhanu va Yehovha, va yamukela swakuda swa moya, nkongomiso ni nsizrelelo lowu va wu vilelaka.
14. I yini swin’wana leswi kombisaka leswaku Yehovha a nga na xihlawuhlawu?
14 Xin’wana lexi kombisaka leswaku Yehovha a nga na xihlawuhlawu swanga lweyi a hi Zrambaka, hi leswaku a yentxa leswaku vhanu hinkwavu a misaveni va va ni Bibele. Matsralwa ya ku sungula a ma tsraliwe hi tindzrimi tizrazru, ku nga Xiheberu, Xiharamayika ni Xigriki. Xana leswo swi hlaya leswaku lava kotaka ku dondzra hi tindzrimi leto, hi vone ntsena va nga ni wuxaka lebyi tiyiki na Yehovha ku tlula lava kalaka va nga swi koti? Im-him.—Mat. 11:25.
15. He xini xikombiso xa leswaku Yehovha a nga na xihlawuhlawu? (Tlhela u vona ni mufoto.)
15 Akuva hi va vanghanu va Yehovha a swi djuli hi va lava dondzriki ngopfu kumbe ku va ni wuswikoti bya ku vulavula tindzrimi tinyingi. Yehovha a djula leswaku vhanu hinkwavu a misaveni va va vanghanu vake, a tlhela a nyika wutlhazri ku nga li ntsena vhanu lava dondzriki ngopfu kambe hinkwavu. A Zritu dzra Xikwembu Nkulukumba ledzri huhuteliwiki, ku nga Bibele, dzri ndzruluteliwe hi tindzrimi tinyingi; xileswo vhanu hinkwavu a misaveni va nga dondzra ku yingiseta Yehovha ni ku va vanghanu vake.—2 Tim. 3:16, 17.
Ku va Bibele dzri ndzruluteliwe hi tindzrimi tinyingi, i xikombiso xa leswaku Yehovha a nga na xihlawuhlawu hi ndlela yini? (Vona yava 15)
TAMA “U VA MUYENI” WA YEHOVHA
16. Hi ku ya hi Mintizro 10:34, 35, i yini leswi hi fanelaka ku tama hi swi yentxa akuva hi va vayeni va Yehovha?
16 I tovoko dzrikulu ku yamukeliwa hi Yehovha leswaku hi va vayeni a tendeni dzrake dzra ku fanekisela. Yene a ni wunene, lizrandzru ni ku tlhela a Yamukela vayeni hi malwandla. Handle ka leswo, vhanu hinkwavu va fana kwake. A yamukela vhanu hinkwavu swi nge na mhaka leswaku va pfa kwini, va wundlisiwe kuyini, va dondzrile, i va nhlonge muni, ntanga muni, i va xinuna kumbe i va xisati. Lava yingisetaka Yehovha, hi vone ntsena lava nga vaka vayeni vake.—Dondzra Mintizro 10:34, 35.
17. Hi nga byi kuma kwini wudzrunguli byin’wana mayelanu ni ku va muyeni a tendeni dzra Yehovha?
17 Hi lani swi kombisiwiki ha kone ka Amapsalma 15:1, Davhida a hamba xivutiso lexi: ‘Yehovha, a muyeni waku a ta va mani a tendeni dzraku? A ta va mani xana, lweyi a taka yaka a nhaveni yaku ya ku xwenga?’ Yehovha a tlhele a tizrisa yene mupisalema Davhida akuva a hlamula swivutiso leswo. Ka xidondzro lexi landzrelaka hi ta vona leswi hi fanelaka ku swi yentxa akuva hi tama hi va vayeni a tendeni dzra Yehovha.
LISIMU 32 Yima Na Yehovha!
