ADESŨA 23
DWEIN 28 Nea Yehowa Bɛfa No Adamfo
Yehowa To Yesa Frɛ Yɛ Kyɛ Yɛbra Ye Tena Sua Nanu
“Bɛ nu yeɛ m’atenaleɛ ne koso kogyina ɔ. Amba, ngɔyɛ bɛ Nyameɛ.”—HES. 37:27.
BƆ ADESŨA NE KƆHÃ YENWO DWIRƐ Ɔ
Sɛ bɛkã kyɛ Yehowa ato yesa afrɛ ebie awa ye tena sua nu a, yekonwu bɔ okyire ɔ. Afei koso, yekonwu atee bɔ Yehowa faso nea yɛ, mmerɛ bɔ yawa ye tena sua nanu ne.
1-2. Bɛbɔ bedi nahorɛ bɛma Yehowa ne, yenwo atee beni yeɛ wafa wama bɛ ɔ?
SƐ BEBISA wɔ kyɛ wɔ nzu yeɛ ole Yehowa a, ahaa ɛkɔye yenoa sɛɛ? Ebia ɛkɔha kyɛ, ‘Yehowa te me Baba, me Nyameɛ, ne me Damvo.’ Anaa ebia ɛkɔha Yehowa nwo dwirɛ wɔ atee foforɛ so. Nakoso ahaa ɔkɔwa wɔ tianu kyɛ wato yesa wafrɛ wɔ wawa ye tena sua nu anaa?
2 Bɛbɔ bedi nahorɛ bɛma Yehowa ne, kyɛbɔ bɛne ye afia si te ne, Ɔhene Dawide fa totole ebie bɔ wato yesa wafrɛ ye damvo biemɔ wawa ye awuro nanwo. Obisale kyɛ: “Ao AWURADE, nwa yeɛ okosikye wɔ tena sua ne anu ɔ? Nwa yeɛ ɔkɔtena wɔ bokaa krongron ne aso ɔ?” (Edw. 15:1) Sɔ dwirɛ ne maa yenwu ye kyɛ yɛkɔhora yɛkɔwa Yehowa tena sua nanu, kyire kyɛ yɛkɔhora yɛkɔyɛ ye damvo. Ɛhe te yenwo atee pirikua paa bɔ Yehowa afa ama yɛ ɔ!
YEHOWA PENA KYƐ YƐBA YE TENA SUA NANU
3. Nwa yeɛ ɔɔyɛle Yehowa damvo bɔ olimoa ɔ, na né b’afia te sɛɛ?
3 Koraka Yehowa hyɛ yebo ɔbɔ nningyein ne, ye ngome yeɛ né ɔwɔ berɛ ɔ. Ɛhene si ne, ɔbɔle ye Bamuɛbaa ne maa ɔɔbokale ye so. Yehowa nye gyele paa kyɛ wato yesa wafrɛ ye damvo bɔ olimoa wawa ye tena sua nanu ɔ. Bible ne kã kyɛ ne Ɔwa ne nwo yɛ ye “anika daa.” Ɔwa ne koso, né ‘odi ahurusi wɔ Yehowa nyunu mmerɛ biala.’—Any. 8:30.
4. Nwamɔ yeɛ nziɛen Yehowa maa benyane yenwo atee bɛwale ye tena sua nanu bie ɔ?
4 Yehowa sa bɔle abɔfo, na bɛ koso benyane yenwo atee bɛɛyɛle ye damvo. Bible ne kã kyɛ abɔfo nemɔ te ‘Nyameɛ mmaamɔ,’ na ɔyɛ bɛ fɛ paa kyɛ Yehowa afa bɛ awa ye tena sua nanu ɔ. (Yob 38:7 NWT; Dan. 7:10) Mmerɛ bie bɔ wapɛ nu ne, bɛbɔ bɛne Yehowa wɔ anwuro dɔ ne, bɛ ngome yeɛ né bɛte ye damvo ɔ. Nziɛen Yehowa bɔle mmenia guale aseɛ he aso, kyɛbɔ ɔkɔyɛ a, bɛ koso bekonya yenwo atee bɛkɔwa ye tena sua nanu bie ɔ. Bɛbɔ benyane yenwo atee bɔ ɔte sɔ ne, benu biemɔ yeɛ ole Henɔke, Nowa, Abraham, ɔne Yob. Bible ne kã kyɛ né bɛte Nyameɛ damvomɔ, na ‘bɛfale bɛnwo bɛbɔle’ ye.—Gye. 5:24; 6:9; Yob 29:4; Yes. 41:8.
5. Ngɔmhyɛ bɔ ɔwɔ Hesekiel 37:26, 27 ne, nzu yeɛ ɔmaa yenwu ye ɔ?
5 Ofi tete ɔbaadwu ɛnnɛ mukoraati, Yehowa kɔso to yesa frɛ ye damvomɔ kyɛ bɛbra ye tena sua nanu. (Kenga Hesekiel 37:26, 27.) Sɛ yɛnea Hesekiel ngɔmhyɛ ne sɔa a, ɔmaa yenwu ye kyɛ, Nyameɛ pena kyɛ bɛbɔ bedi nahorɛ bɛma ye ne, ɔne b’afia yɛ kama. Wahyɛ bɔ kyɛ ‘ɔne bɛ kɔyɛ asomdwee apam.’ Sɔ ngɔmhyɛ ne hane kyɛ mmenia bɔ bɛnye la so kyɛ bɛkɔhɔ anwuro, ɔne bɛbɔ bɛnye la so kyɛ bɛkɔtena aseɛ he aso ne, mmerɛ bie kɔwa bɔ bɛkɔha bɛkɔbɔ nu kyɛ ‘mmoaen kure komapɛ’ wɔ Yehowa tena sua nanu. (Yoh. 10:16) Sɔ mmerɛ nala yeɛ yɛwɔ nu ne!
NEKAA BIALA BƆ YƐWƆ NE, NYAMEƐ MAA YƐSA KÃ BƆ YEHIA Ɔ
6. Nzu yeɛ ɔmaa ebie nya yenwo atee ba Yehowa tena sua nanu ɔ, na nisua yeɛ ye tena sua ne wɔ ɔ?
6 Tete ne, né ebie kora de ye nwomeɛ wɔ ye tena sua nu. Afei, sɛ nzue tɔ anaa eyia bɔ a, né ɔnga ye. Sɛ onya ɛwɔfoɛ koso a, né ɔfa ye kɔ ye tena sua nu, na ɔnea maa yesa kã bɔ ohia ɔ. Sɛ yɛhyɛ Yehowa bɔ kyɛ yɛkɔso ye a, ɔmaa yenya yenwo atee yɛba ye tena sua nanu. (Edw. 61:4) Nningyein bɔ ɔboka yɛ maa yɛne ye afia yɛ kama ne, ɛberɛ yeɛ yɛsa kã ye ɔ. Afei, aliemaamɔ bɔ bɛ koso bawa berɛ bie ne, yɛne bɛ kora fa adamvoa. Yehowa tena sua ne de, ɔnne nekaa pɔtee bie. Ebia yɛka ye, anya yenwo atee ahɔ nhyiamu wɔ maen foforɛ so, na enwuni aliemaamɔ bɔ bɛ koso bɛnye agye kyɛ bɛwɔ Nyameɛ tena sua nanu ɔ. Ɛhe maa yenwu ye kyɛ, sɛ yɛso Yehowa nahorɛ nu a, ɔmva yenwo ne nekaa biala bɔ yɛwɔ ne, yɛkɔhora yɛkɔwa ye tena sua nanu bie.—Nye. 21:3.
7. Mmenia bɔ bɛsone Yehowa nahorɛ nu bɔ bawu ne, nzuati yeɛ yɛkɔhora yɛkɔha kyɛ bɛté wɔ ye tena sua nanu ɔ? (Nea foto ne koso.)
7 Mmenia bɔ bɛsone Yehowa nahorɛ nu bɔ bawu ne, aso yɛkɔhora yɛkɔha kyɛ bɛté wɔ ye tena sua nanu anaa? Yóo! Nzuati yeɛ yɛkã sɔ ɔ? Ofikyɛ Yehowa té kae bɛ. Yesu hane kyɛ: “Ɔfa awufoɛ dwɔsolɛ nwo de, Mose koso maa yɛnwu ye wɔ ngyɛkyerɛ ne nwo dwirɛ ne anu, mmerɛ bɔ ɔfrɛ Awurade kyɛ: ‘Abraham Nyameɛ, Yisake Nyameɛ ne Yakob Nyameɛ’ ne. Yiti, ɔtte awufoɛ Nyameɛ, na mmom ɔte ateasefoɛ Nyameɛ; ofikyɛ bɛ mukoraa bɛte ase bɛma ye.”—Luka 20:37, 38.
Mmenia bɔ bɛsone Yehowa nahorɛ nu bɔ bawu ne po, yɛkɔhora yɛkɔhã kyɛ bɛté wɔ Nyameɛ tena sua nu (Nea ngyekyɛmuɛ 7)
MVASOƐ BENI YEƐ YENYA YE Ɔ, NA NZU YEƐ ODIKYƐ YƐYƐ Ɔ?
8. Bɛbɔ bɛba Yehowa tena sua nanu ne, mvasoɛ beni yeɛ benya ye ɔ?
8 Sɛ ebie wɔ ɛtena sua nu a, ɔkora bɔ yenwo waen fi nningyein bɔ okopira ye nanwo, na osa de ye nwomeɛ wɔ berɛ. Sɔ ala yeɛ Yehowa tena sua ne koso te hɔ ɛne. Sɛ yɛba nu a, Yehowa bɔ yɛnwo waen fi nningyein bɔ ɔkɔsɛkye yɛne ye afia nanwo, na yesa yenya anyelasoɛ. Sɛ yɛkɔso yedi nahorɛ yɛma Yehowa a, Satan ngɔhora ngɔfa ɔhaw ngɔwa yɛ so afebɔɔ. (Edw. 31:23; 1 Yoh. 3:8) Wɔ ewiase foforɛ nanu ne, Yehowa kɔhɔso kɔbɔ ye damvomɔ nwo waen, kyɛbɔ ɔkɔyɛ a nikyefee ngɔsɛkye bɛne ye afia, na okole bɛ kofi ewue sanu.—Nye. 21:4.
9. Bɛbɔ bawa Yehowa tena sua nanu ne, nzu yeɛ ɔpena kyɛ bɛyɛ ɔ?
9 Ɔte yenwo atee pirikua paa kyɛ yɛkɔwa Yehowa tena sua nanu, ofikyɛ ɔmaa yɛne ye fa adamvoa bɔ ɔkɔtena berɛ daa ɔ. Sɛ yɛkɔhɔso yɛkɔtena Yehowa tena sua nanu a, nzu yeɛ odikyɛ yɛyɛ ɔ? Sɛ ebie to yesa frɛ wɔ ba ye awuro a, wɔnye kɔgye yenwo kyɛ, ɛkɔyɛ bɔ sona ne kuro ɔ. Ebie yeɛ ole kyɛ, sɛ ɔkã kyɛ ɛye wɔ mmaboa kora né awura ye sua nanu a, ɛkɔye. Sɔ ala yeɛ yɛ koso yɛpena kyɛ Yehowa kyire yɛ bɔ odikyɛ yɛyɛ, na wamaa yahɔso yatena ye tena sua nanu ɔ. Ɔnate ɔdɔ bɔ yele yɛma Yehowa nati, yɛpena kyɛ yɛyɛ bɔ yɛkɔhora biala kyɛ, yɛkɔyɛ bɔ “ɔsɔ ye nye” ɔ. (Kol. 1:10) Ɔwɔ nu kyɛ Yehowa te yɛ damvo, nakoso osa te yɛ Nyameɛ ne yɛ Baba. Yeti odikyɛ yɛfa anidie yɛma ye. (Edw. 25:14) Afei koso, odikyɛ yesuro ye, na yɛmaa onwu ye kyɛ yebu ye. Ɛhene kɔboka yɛ maa yɛkɔhwe yɛnwo yekofi nikyee biala bɔ onguro nanwo. Yɛnye gye yenwo paa kyɛ yɛne yɛ Nyameɛ ne ‘kɔnate anwobrɛaseɛ nu ɔ.’—Mik. 6:8.
YEHOWA MAA YISRAELFOƐ NEMƆ NWUNI KYƐ ƆNYƐ NYEYEMUƐ
10-11. Bɔ Yehowa yɛ mane Yisraelfoɛ nemɔ wɔ Sinai serɛ so ne, sɛɛ yeɛ ɔmaa yenwu ye kyɛ ɔnyɛ nyeyemuɛ ɔ?
10 Bɛbɔ bɛba Yehowa tena sua nanu ne, ɔmaa benwu ye kyɛ, okuro ebiala dwirɛ, na ɔnnea sona nyunu, kyire kyɛ ɔnyɛ nyeyemuɛ. (Rom. 2:11) Bɔ Yehowa yɛ mane Yisraelfoɛ nemɔ mmerɛ bɔ ne bɛnate Sinai serɛ so ne, ɔmaa yenwu ye kyɛ sɔ dwirɛ he te nahorɛ.
11 Mmerɛ bɔ Yehowa yele Yisraelfoɛ nemɔ filli ngoasom nu wɔ Egypt ne, ɔyele ebiemɔ maa bɛsone kyɛ asɔfo wɔ ɛtena sua nanu. Lewifoɛ nemɔ koso, ɔfa wurale bɛsa kyɛ, bɛyɛ adwuma ahoroɛ biemɔ wɔ ɛtena sua nanu. Bɛbɔ né bɛte bepingye ɛtena sua ne, ɔne bɛbɔ ne bɛyɛ adwuma wɔ berɛ ne, aso Yehowa maa yenye hɔle bɛnwo trale Yisraelfoɛ bɔ ne baha né anaa? Daabi, ofikyɛ Yehowa de, ɔnyɛ nyeyemuɛ.
12. Mmerɛ bɔ né Yisraelfoɛ nemɔ wɔ ɛserɛ naso ne, sɛɛ yeɛ Yehowa lale ye ali kyɛ okuro benu biala dwirɛ ɔ? (Ɛksadɔso 40:38) (Nea foto ne koso.)
12 Né Yisraelfoɛ nanu biala ne Yehowa kɔhora kɔfa adamvoa bɔ nu yɛ se ɔ, ɔmva kyɛ ebia ɔso wɔ ɛtena sua nanu, ɔte pingye ye, anaa ombingye ye ne. Ebie yeɛ ole kyɛ, Yehowa nea nwuni ye kyɛ maen ne mukoraati konwu munungum pila, ɔne see pila bɔ né ɔbakata ɛtena sua naso ne. (Kenga Ɛksadɔso 40:38.) Sɛ munungum ne hyɛ yebo kyɛ ɔma yenwo so fi ɛtena sua naso a, né Yisraelfoɛ bɔ bɛwɔ dede ne po kora nwu ye. Ne ɛhene boka bɛ maa bɛboa bɛ nningyein noa, betutu bɛ tena sua, na afei betu bɛbo bɛne maen ne bɔ nu kɔ. (Num. 9:15-23) Ɛdwetɛ totorobɛndo nyɔ ne koso, sɛ behu a, né ɔkɔ dede paa. Yeti né ebiala kora te, kyɛbɔ ɔkɔyɛ a ɔkɔboa yenwo kotu yebo kofi asikyeleɛ berɛ ɔ. (Num. 10:2) Sɛ né ebie te pingye ɛtena sua ne a, né ɛhene ngyire kyɛ ɔne Yehowa afia kɔyɛ kama paa kɔtra bɛbɔ bɛwɔ dede ne. Né Yisraelniɛ biala kɔhora konya gyidie kyɛ Yehowa kɔnea ye, ná wabɔ yenwo waen. Sɔ ala yeɛ yɛ koso, ɔnate kyɛ Yehowa kuro yɛ dwirɛ nati, ɔkɔnea yɛ, na ɔkɔbɔ yɛnwo waen, ɔmva yenwo ne nekaa biala bɔ yɛwɔ ne.
Yehowa tena sua bɔ né ɔwɔ Yisraelfoɛ nemɔ afia ne, né ɔte adanzeɛ bɔ okyire kyɛ ɔnyɛ nyeyemuɛ ɔ (Nea ngyekyɛmuɛ 12)
BƆ ƆMAA YENWU KYƐ ƐNNƐ KOSO, YEHOWA NYƐ NYEYEMUƐ Ɔ
13. Ɛnnɛ, nzu yeɛ Yehowa yɛ fakyire kyɛ ɔnyɛ nyeyemuɛ ɔ?
13 Aliemaa biemɔ wɔ berɛ a, bɛte bepingye Yehowa Adanzefoɛ adwumayɛbeati, anaa Bɛtɛl bɔ ɔwɔ bɛ maen nu ne, na ebiemɔ koso yɛ adwuma wɔ berɛ. Yesɔ nati, sɔ aliemaa hemɔ kora nya yenwo atee ne bɛbɔ beli nningyein nyunu wɔ asafo nanu ne bɔ fekue, na ebiemɔ koso ne bɛ bɔ nu yɛ adwuma. Asa koso, aliemaa biemɔ te manzini soneafoɛ, na ebiemɔ wora bɛyɛ mmerɛ mukoraati soen adwuma titire ne bue foforɛ. Sɛ elle yenwo atee sɔ ne bie po a, ma w’ahone tɔ wɔ kunu, ofikyɛ bɛbɔ bɛwɔ Yehowa tena sua nanu ne, okuro bɛ mukoraati dwirɛ. Afei koso, ɔse bɔ ehia ɔ, yeti ɔkɔboka wɔ maa wɔsa kɔha ye. (1 Pet. 5:7) Ebieku koso, bɛbɔ bɛso Nyameɛ ne mukoraati, ɔnate Bible naso ma bɛ akwangyerɛ, na ɔbɔ benu biala nwo waen.
14. Nikyee foforɛ beni yeɛ Yehowa ayɛ bɔ okyire kyɛ ɔnyɛ nyeyemuɛ ɔ?
14 Nikyee foforɛ bɔ Yehowa ayɛ bɔ okyire kyɛ ɔnyɛ nyeyemuɛ yeɛ ole kyɛ, wamaa ebiala sa kora kã Bible ne bie. Belimoa bɛhworɔle Tworɔ Krongron ne wɔ dwudwolɛ nza nu. Yeɛ ole Hebri, Aramaeke, ɔne Greek. Yede, bɛbɔ bɛkenga Bible ne wɔ sɔ dwudwolɛ hemɔ nu ne, bɛne Yehowa afia te kama tra bɛbɔ bɛkenga ye wɔ dwudwolɛ foforɛ nu ne anaa? Daabi, ɔtte sɔ koraa.—Mat. 11:25.
15. Adanzeɛ beni yeɛ okyire kyɛ Yehowa nyɛ nyeyemuɛ ɔ? (Nea foto ne koso.)
15 Nna nekaa bɔ yahɔ sukuu yadwu, anaa dwudwolɛ horɛ bɔ yɛkã ne yeɛ ɔkɔmaa Yehowa kole yɛ kɔto nu ɔ. Afei nná bɛbɔ basua nwomaa bahɔ siɛ ne ngome, yeɛ Yehowa maa benya yenwo nimdeɛ ɔ. Na mmom, ɔmaa ebiala kora nya yenwo nimdeɛ, ɔmva yenwo kyɛ sona ne ahɔ sukuu, anaa wangɔ bie ne. Bahyire Bible nabo bahɔ dwudwolɛ pee nu, kyɛbɔ kɔyɛ a mmenia bɔ bɛwɔ ewiase nekaa biala konya bie kɔkenga, na waboka bɛ maa bɛne Yehowa ahora afa adamvoa.—2 Tim. 3:16, 17.
Bible ne bɔ ebiala kora nya bie kenga ne, sɛɛ yeɛ okyire kyɛ Nyameɛ nyɛ nyeyemuɛ ɔ? (Nea ngyekyɛmuɛ 15)
BƆ ƆKƆMAA YEHOWA KƆHƆSO ‘KOLE YƐ KƆTO NU’ Ɔ
16. Kyɛbɔ Asomafoɛ 10:34, 35 kã ne, nzu yeɛ ɔkɔmaa Yehowa kole yɛ kɔto nu ɔ?
16 Ɔte yenwo atee pirikua paa kyɛ Yehowa ato yesa afrɛ yɛ awa ye tena sua nanu ɔ. Sona fee nne berɛ bɔ yɛkɔhora yɛkɔfa ye yɛkɔtoto yenwo ɔ, ofikyɛ ye tianu nyɛ se, okuro yɛ dwirɛ, na ɔmaa yɛsa kã bɔ yehia ɔ. Afei koso, ɔmva yenwo ne nekaa bɔ yɛte, y’amammerɛ, nekaa bɔ yahɔ sukuu yadwu, maen anaa abusua bɔ yefi nu, afoɛ bɔ yali, ɔne kyɛ yɛte brienzua anaa brasua ne, wamaa yenu biala atee kyɛ yɛkɔhora yɛkɔfa ye adamvoa. Nakoso, bɛbɔ bɛyɛ bɔ okuro ne ngome yeɛ ode bɛ to nu ɔ.—Kenga Asomafoɛ 10:34, 35.
17. Yehowa tena sua bɔ ebie kɔtena nu ne, sɛ yɛpena nanwo dwirɛ pee a, nisua yeɛ yekonwu ye ɔ?
17 Wɔ Edwein 15:1 nanu ne, Dawide bisale kyɛ: “Ao AWURADE, nwa yeɛ okosikye wɔ tena sua ne anu ɔ? Nwa yeɛ ɔkɔtena wɔ bokaa krongron ne aso ɔ?” Yehowa maa Dawide bɔbɔ mane sɔ dwirɛ nemɔ nwo mmuayɛɛ. Adesua bɔ oli berɛ nanu ne, yekonwu bɔ yɛyɛ a, ɔkɔmaa Yehowa kole yɛ kɔto nu, ná yahɔso yatena ye tena sua nanu ɔ.
DWEIN 32 Gyina Yehowa Afã!
