ECIGABI C’OKUYIGA CA 23
LWIMBO 28 Okuba Mwîra wa Yehova
Yehova Arhulalisire Rhube Bigolo Byage
“Ecihando cani cabera ekarhi kabo, naba Nyamuzinda wabo.”—EZE. 37:27.
EBI ECI CIGABI CISEGIZE
Carhurhabala rhushagalukire bwenene omulali gwa Yehova gw’okuba bigolo omw’ihema lyage ly’olwiganyo n’enjira arhushibiriramwo nka bigolo byage.
1-2. Mulali guhi Yehova ahîre abakozi bage bishwekerezi?
YEHOVA aba ndi omu kalamo kawe? Wanashuza erhi, ‘Yehova aba Larha, aba Mungu wani, na Mwîra wani.’ Nkaba hali ezindi nderho, erhi agandi mazino g’ecikono wakakolesa ly’oyerekana Yehova aba ndi kuli we. Cikone, ka wanabona Yehova nka muntu okuyegerezize omw’ihema lyage?
2 Mwami Daudi ashushanyize obwîra Yehova ajira haguma n’abakozi bage bishwekerezi n’obwîra buba ho egarhi k’omuntu oyegerezize ebigolo n’ebigolo byage. Adosa ntya: “Yagirwa Nyakasane [Yehova, NWT], ndi wankabêra omu bwami bwawe [omw’ihema lyawe, NWT]; ndi wankatwa ecirâlo oku ntondo yawe ntagatifu?” (Enna. 15:1) Kugerera ezo nderho zalongozibagwa n’iroho litagatifu, rhuciyigirizize oku rhwanaba bigolo bya Yehova, ko kuderha bîra bage. Ogo guli mulali munene bwenene kurhenga emwa Yehova.
YEHOVA ALONZIZE RHUBE BIGOLO BYAGE
3. Ndi wali cigolo cirhangiriza ca Yehova, na gurhi Yehova n’ecigolo cage baciyumvirhe ngasi muguma lugenda owabo?
3 Yehova ali yene embere arhondere okulema. Cikone kasanzi kalebe enyuma z’aho alema enfûla yage. Yehova aba nka muntu oyegerezize ecigolo cage cirhangiriza omw’ihema lyage ly’olwiganyo, anashagalukira bwenene okujira ntyo. Ebibliya eyerekine oku Yehova ‘asima’ oyo Mugala. Eco cigolo cage cirhanzi naco, ‘cakâcanacana [erhi kucishinga] emalanga gage ensiku zoshi.’—Mig. 8:30, Mashi Bible.
4. Bandi Yehova alalisire buzinda babe bigolo omw’ihema lyage?
4 Enyuma z’aho, Yehova alema ebindi biremwa by’ekiroho, anabilalika nabyo bibe bigolo byage. Ebibliya ehamagire ebyo biremwa by’ekiroho erhi bamalahika “bene Nyamuzinda” enayerekine oku banashagalukire okuba haguma na Yehova. (Ayu. 38:7; Dan. 7:10) Omu myaka minji, abalama empingu haguma na Yehova bone bali bîra bage. Buzinda alema bene bantu okw’igulu, nabo byaba bigolo omw’ihema lyage. Mw’ebyo bigolo byage, hali bantu baguma na baguma nka Henoki, Nuhu, Abrahamu, na Ayubu. Abo bakozi bage b’okunali baganiriwe nka bîra bage, erhi bantu balambagiraga omu ‘njira ya Nyumuzinda.’—Murh. 5:24; 6:9; Ayu. 29:4; Iz. 41:8.
5. Bici rhwakaciyigiriza kugerera obulebi buli omu Ezekiyeli 37:26, 27?
5 Omu magana g’emyaka, Yehova agendekire alalika abîra bage babe bigolo byage. (Osome Ezekiyeli 37:26, 27.) Kwa lwiganyo, obulebi bwa Ezekiyeli burhuyigirizize oku Nnâmahanga aba alonzize kobinali abakozi bage bishwekerezi babe n’obwîra bwa hofi-hofi haguma naye. Alaganyize oku ajira ‘endagano y’omurhûla boshi nabo.’ Obo bulebi buyerekire amango Abakristu bagwerhe obulangalire bw’okulama empingu n’abagwerhe obulangalire bw’okulama hanw’igulu bayish’ilungana haguma nka “buso buguma” omw’ihema lyage ly’olwiganyo. (Yn. 10:16) Oko kuli kwajirikana ene!
MUNGU ANARHUSHIBIRIRE NGASI HOSHI RHULI
6. Gurhi omuntu abamwo cigolo omw’ihema lya Yehova, na ngahi ihema lyage lyakapatikana?
6 Omu mango ga mîra, ihema hali hantu omuntu akarhamukire n’okucilanga n’izuba, enkuba, n’emboho. Ecigolo ciri omw’ihema lya muntu mulebe cakalangalire oku ociyegerezize acishibirira bwinja. Erhi rhuhâna akalamo kirhu emwa Yehova, rhunabe bigolo omw’ihema lyage ly’olwiganyo. (Enna. 61:4) Rhunashagalukire okuba n’ebiryo binji bwenene by’ekiroho n’obwîra haguma n’ abandi bantu bali bigolo bya Yehova. Cikone, ihema lyage ly’olwiganyo lirhaba hantu halebe hone. Wanaba wabalamire omu cindi cihugo, nkaba ly’oja oku ntimanano yago-yago, wanarhimanana n’abandi bashagalukire okuba omw’ihema lya Mungu. Lyanapatikana ngasi hoshi abakozi bage bamurhumikira bakaba bali.—Maf. 21:3.
7. Bulya gurhi rhwakaderha oku abantu bishwekerezi bafîre biciri bigolo omw’ihema lya Yehova? (Olole n’enfoto.)
7 Gurhigi lugenda abantu bishwekerezi bafîre? Ka bipatine n’obwenge okuderha oku nabo baciri bigolo omw’ihema lya Yehova? Neci! Bulya gurhi rhwakaderha ntyo? Bulya abo bantu bacizine omu bukengere bwa Yehova. Yezu adesire ntya: “Musa ayerekine n’obwalagale okw’abafîre banacifûke. Omu cihimbi c’amandiko, cirya cidesire ogw’ishaka liri lyagulumira, aderha oku Nyamuzinda ye Nnâmahanga w’Abrahamu, Nnâmahanga wa Isaki, na Nnâmahanga wa Yakobo. Nnâmahanga aba Nnâmahanga wa bantu bazine, cikwone arhaba w’abafîre, bulya kw’abona nk’abantu boshi bazine.”—Lk. 20:37, 38, Mashi Bible.
Ciru n’abantu bishwekerezi bafîre banabonwa nka bigolo omw’ihema lya Mungu (Olole ecifungo ca 7)
OBUNGUKE BW’OKUBA BIGOLO BYA YEHOVA N’EBIHÛNYIRWE KULI BO
8. Gurhi ebigolo bya Yehova biyungukamwo omu kuba omw’ihema lyage?
8 Nka kula ihema ly’okunali lyakaba hantu omuntu akarhamukira n’okumulanga okw’izuba, enkuba, n’emboho, ihema lya Yehova linalange ebigolo byage oku kantu koshi-koshi kakashereza obwîra bwabo haguma na Yehova linanabahe obulangalire bw’okunali. Erhi rhwakabêra hofi na Yehova, nta kantu Shetani akarhujirira kakarhushereza loshi-loshi. (Enna. 31:23; 1 Yn. 3:8) Omw’igulu lihyahya, Yehova agendekera alanga abîra bage bishwekerezi oku bintu byakashereza obwîra bwabo haguma naye n’oku lufû.—Maf. 21:4.
9. Bici Yehova aba ahûnyire ebigolo byage bijire?
9 Kobinali, luli lukengwa lunene okuba cigolo omw’ihema lya Yehova, okushagalukira obwîra bwago-bwago haguma naye bwakagendekera ensiku n’amango. Bicigi rhushinganine rhujire lyo rhugendekera rhwaba bigolo omw’ihema lyage? Erhi muntu mulebe akakulalika omu mwage, wanalonza omanye ebi alonzize ojire. Kwa lwiganyo, nkaba anakuhûna ohogole ebirato embere oje omu mwage, wananaba mubidu okujira ntyo. Ko n’oko, buzira karhinda rhulonzize rhumanye ebi Yehova ahûnyire abalonzize okugendekera baba bigolo omw’ihema lyage. Obuzigire bwirhu kuli Yehova bunarhushumye rhujire ngasi kantu rhwakanahasha ‘lyo rhumusimisa muli byoshi.’ (Kl. 1:10) Na ciru akaba rhunabone Yehova nka Mwîra wirhu, kandi rhuba rhuhugûsirwe oku aba Mungu wirhu na Larha wirhu, oshinganine obukenge bwirhu. (Enna. 25:14) Omu kukengera ntyo, ensiku zoshi rhushinganine rhumukenge bwenene, rhurhanahiraga rhukayibagira aba ndi. Obukenge bwa ntyo bwanarhurhabala rhuyake olugenzi lwakamugayisa. Kobinali, rhulonzize “okugenda n’obwirhohye [erhi lugero],” haguma na Nyamuzinda wirhu.—Mik. 6:8.
YEHOVA AJIRIRE ABAISRAHELI BUZIRA KABÔLO OMW’IRUNGU
10-11. Gurhi oku Yehova ajiriragamwo Abaisraheli omw’irungu ly’e Sinai kwayerekinemwo oku arhajira kabôlo?
10 Yehova anajirire ebigolo byage omu njira erhali ya kabôlo. (Rm. 2:11) Oku Yehova ajiriraga Abaisraheli omw’irungu ly’e Sinai kwanarhurhabala rhuhugûkwe oku arhaba wa kabôlo.
11 Enyuma z’okurhenza abantu bage omu buja e Misri, Yehova ahiraho abakuhani lyo bakola omw’ihema ly’entimanano. Ahiraho Bene-levi lyo bakola oku yindi mikolo eyerekire ihema litagatifu. K’abakag’ikola omw’ihema ly’entimanano erhi abal’igwisire akambi hofi nalyo bo Yehova akag’ishibirira bwinja kulusha abandi? Nanga! Yehova arhajira kabôlo.
12. Kundi gurhi Yehova ayerekinemwo oku arhajira kabôlo lugenda ishanja lyage lihyahya? (Olubungo 40:38) (Olole n’enfoto.)
12 Ngasi muntu omu kambi al’igwerhe obulyo bw’okushagalukira obwîra haguma na Yehova, abe al’igwerhe omukolo gwago-gwago erhi nanga, erhi abe al’ilamire hofi erhi kulî n’ihema ly’entimanano. Kwa lwiganyo, Yehova ajijire abantu b’omw’ishanja lyoshi babe n’obulyo bw’okubona omutungo gw’ecitu n’ogw’omuliro ahiragaho omu njira y’ecisomerine oku nyanya z’ihema ly’entimanano. (Osome Olubungo 40:38.) Erhi eco citu cakarhondire cagenda olundi lunda, ciru n’abali kulî bwenene n’ihema ly’entimanano bal’igwerhe obuhashe bw’okubona ntyo, okushweka ebirugu byabo, okushabûla amahema g’emilala yabo, n’okuhama haguma n’abandi bantu b’omw’ishanja. (Mib. 9:15-23) Abantu boshi bakayumvirhe amazu abirhi gali lubero g’emishekera ibirhi y’amarhale yakag’imanyisa ngasi muntu obulagirire bw’okurhondera okuhama. (Mib. 10:2) Bibonekine n’obwalagale oku, okulama hofi-hofi n’ihema ly’entimanano arhali kone kwakayerekine oku omuntu agwerhe obwîra bwa hofi-hofi haguma na Yehova. Lubero n’oko, ngasi muntu wa mw’er’ishanja lihyahya lya Yehova akabire cigolo cage n’okuyegemera obulongozi n’obulanzi bwage. Ko n’oko ene, ciru rhwakaba rhulamire ngahi okw’igulu, Yehova anarhuzigira, anarhushibirira n’okurhulanga.
Omupango gwa Mungu gw’ihema ly’entimanano gwayerekine oku arhajira kabôlo (Olole ecifungo ca 12)
ENYIGANYO Z’ENE ZIYEREKINE OKU YEHOVA ARHAJIRA KABÔLO
13. Ene, njira nguma ehi Yehova ayerekanamwo oku arhajira kabôlo?
13 Baguma na baguma omu bantu ba Mungu ene baba balamire hofi n’ebiro bikulu erhi hofi n’ebiro by’etawi by’Abahamirizi ba Yehova. Abandi banakolere aho hantu. Muli ntyo, abo bantu banashangira omu mikolo minji ejirwa aho hantu erhi kukola haguma n’abali balongoza. Abandi banakole nka bangalizi b’omuzunguko erhi omu yindi mikolo yago-yago y’akasanzi koshi. Erhi akaba oli muguma w’omu bantu banji barhagwerhi obulyo bwa ntyo, ogendekere wayemera n’obwalagale oku Yehova ye orhuyegerezize n’oku aba azigire ebigolo byage byoshi. Na kandi, aba amanyire ngasi muguma wirhu ananarhushibirire rhweshi. (1 Pt. 5:7) Abakozi ba Yehova boshi banahâbwe ebiryo by’ekiroho, obulongozi, n’obulanzi balagirireko.
14. Yindi njira ehi Yehova ayerekanamwo oku arhajira kabôlo?
14 Olundi lwiganyo luyerekine oku Yehova orhuyegerezize arhajira kabôlo oku bigolo byage byoshi, kuli kubona oku ajijire abantu boshi omw’igulu ene babe n’obulyo bw’okusoma Ebibliya. Amandiko matagatifu gayandisirwe burhangiriza omu ndimi isharhu: Ecihabraniya, Eciharamiya, n’Ecigiriki. K’abantu bakahasha okusoma endimi ntangiriza z’Ebibliya bajira obwîra bwa hofi-hofi haguma na Yehova kulusha abarhakahasha okujira ntyo? Nanga ciru n’ehitya.—Mt. 11:25.
15. Bici biyerekine n’obwalagale oku Yehova arhajira kabôlo? (Olole n’enfoto.)
15 Yehova arhakarhulalika oku rhube bigolo byage mpu bulya kone rhwasomire bwenene erhi bulya rhumanyire endimi ntangiriza Ebibliya yayandikagwamwo. Ahali h’okuha obwenge bwage abantu basomire bwenene bone, Yehova anabuhe abantu boshi okw’igulu, babe basomire bwenene erhi nanga. Ebibliya, Kanwa kage kalongozibagwa n’iroho litagatifu, yahindwirwe omu bihumbi by’endimi; muli ntyo, abantu omw’igulu lyoshi banayunguka n’enyigirizo zayo n’okuyiga gurhi bakabamwo bîra bage.—2 Tm. 3:16, 17.
Okuhindulwa kw’Ebibliya omu bihumbi by’endimi, gurhi kuyerekinemwo oku Mungu arhajira kabôlo? (Olole ecifungo ca 15)
OGENDEKERE ‘WASIMWA’ NA YEHOVA
16. Kushimbana n’Ebijiro by’Entumwa 10:34, 35, gurhi rhwakajira lyo rhugendekera rhwayemerwa na Yehova?
16 Luli lukengwa lunene okuyegerezibwa na Yehova nka bigolo omw’ihema lyage ly’olwiganyo. Ye muntu w’olukogo bwenene, w’obuzigire bwenene, n’oyegereza ebigolo bwenene wakabaho. Na kandi, bulya arhajira kabôlo, arhuyegerezize rhweshi buzira kulola ahantu rhulamire, aha rhwakuliraga, amasomo girhu, irangi lirhu ly’omubiri, obûko bwirhu, emyaka rhugwerhe, na buzira kulola erhi rhuli balume erhi bakazi. Ciru akaba ntyo, abantu barhumikira amakanuni gage bone ayemera babe bigolo byage.—Osome Ebijiro by’Entumwa 10:34, 35.
17. Ngahi rhwabona eyindi myanzi lugenda ebi rhugwasirwe rhujire lyo rhugendekera rhwayemerwa na Yehova?
17 Kushimbana n’Ennanga 15:1, Daudi adosize aga madoso: “Yagirwa Nyakasane [Yehova, NWT], ndi wankabêra omu bwami bwawe [omw’ihema lyawe, NWT]; ndi wankatwa ecirâlo oku ntondo yawe ntagatifu?” Oyo muzihi w’ennanga alongozibwe n’iroho litagatifu ly’ashuza ago madoso. Ecigabi cikulikire caganirira bintu biguma na biguma rhugwasirwe rhujire lyo rhugendekera rhwayemerwa na Yehova.
LWIMBO 32 Oje Eluhande lwa Yehova!
