XIINXALLOTE BIRXICHO 23
FAARSO 28 Yihowa Jaala Ikka
Yihowa Wosinasi Ikkinammora Koyisinonke
“Anino hakkiicho insa ledo heeˈreemmo. Ani Maganonsa ikkeemmo.”—HIZ. 37:27.
GUULCHO HEDO
Yihowahu lawishshu dunkaani giddo isi wosina ikkate yaa mayyaateronna hakkiicho isi towaatannonkehu hiittoonniitiro albinni roore huwanteemmo.
1-2. Yihowa ammanantino soqqamaanosi maaho koyisino?
YIHOWA atera maakkiiti yine xaˈminihero mayyaatto? ‘Isi Annaˈyaati, Maganoˈyaati hattono Jaalaˈyaati’ yite qolattoha ikkara dandaanno. Qoleno Yihowa wolu garinni xawisattoha ikkara dandaanno. Ikkirono Yihowa wosinsiˈrannohehu gede assite hedde egennoottoyya?
2 Moote Daawiti Yihowanna ammanantino soqqamaanosi mereero noo jaalooma wosinsiˈranno manchinna wosinisi mereero noo jaaloomi ledo heewisiisino. Isi “Kaaliiqa, minekki galannohu ayeti? Qullaawu Ilaalikki iima heeˈrannohu ayeti?” yiino. (Far. 15:1) Tenne qullaawu ayyaaninni borreessinoonni hedonni Yihowa wosina yaano jaallasi ikka dandiineemmota ronseemmo. Tini ninkera lowo ayirrinyeeti!
YIHOWA WOSINASI IKKINAMMORA HASIˈRANNO
3. Yihowa umo wosinsiˈrinohu ayeti? Hakkawoyite isinna wosinchisi hiitto ikkitino?
3 Yihowa baalanka coye kalaqara albaanni callisi heeˈranno. Hakkiinni umo Beettosi kalaqino; Yihowa mite yee dunkaanisi giddo iso wosinsiˈrino. Isi tenne assasinni lowo geeshsha hagiidhino. Qullaawu Maxaafi Yihowa Beettisinni ‘hagiidhinota’ kulanno. Umi wosinchisino Yihowa albaanni ‘tashshi yaannasi heeˈrino.’—Law. 8:30.
4. Yihowa sunu sununni dunkaanisira woloota koyisinohu hiittoonniiti?
4 Yihowa gedensoonni wole ayyaanu kalaqo kalaqino; insano wosinasi ikkitanno gede koyisino. Qullaawu Maxaafi sokkaasine “Maganu ooso” ikkitinota kulanno; hattono insa Yihowa ledo heeˈransanni hagiidhitino. (Iyo. 38:7, NW; Dan. 7:10) Mite yanna geeshsha, Maganu jaalla ikkite heedhinori iima isi heeˈrannowa heedhannore callaati. Gedensoonni isi uullate aana mannu ooso kalaqino; insano wosinasi ikka dandiitino. Kuri wosini giddo gamu Heenookiiti, Nohiiti, Abirihaamiitinna Iyyoobiiti. Kuri Magano halaalunni magansidhinoreeti Maganu jaallaati woy “halaalaanchu Magani ledo” qaaffinoreeti yinoonninsa.—Kal. 5:24; 6:9; Iyo. 29:4; Isa. 41:8.
5. Hiziqeeli 37:26, 27te noo masaalonni maa ronseemmo?
5 Yihowa lowo xibbe diro wosinasi ikkitanno gede jaallasi koyisanni keeshshino. (Hiziqeeli 37:26, 27 nabbawi.) Lawishshaho, Hiziqeeli masaalonni Maganu ammanantino soqqamaanosi Isi ledo kaajja jaalooma kalaqidhara hasiˈrannota ronseemmo. Isi “keere heedhanno gede hegere gondooro eˈˈeemmonsa” yee qaale eino. Tini masaalo, iimira haˈrate hexxo noonsarinna uullate aana heeˈrate hexxo noonsari lawishshu dunkaanisi giddo “mitte hoshsha” ikkitanno yanna leellishshanno. (Yoh. 10:16) Hatti yanna xaati!
HEEˈNEEMMOWI IKKIWANO IKKIRO MAGANU TOWAATANNONKE
6. Mittu manchi Yihowa dunkaani giddo wosincho ikkannohu hiittoonniiti? Yihowa dunkaani noohu hiikkooti?
6 Hundi waro mittu manchi dunkaana qasiˈrannohu fooliishshiˈranno basenna agarooshshe afiˈrateeti. Hakko dunkaanira eara koyinsoonnisi manchi dancha gede towaantannisita hexxanno. Heeshshonke Yihowara sayinse uyineemmo woyite, isihu lawishshu dunkaani giddo wosinasi ikkineemmo. (Far. 61:4) Falakkinota ayyaanaamittete sagale afiˈneemmo; hattono Yihowa wosina ikkitinori wolootu ledo jaalooma kalaqiˈneemmo. Yihowahu lawishshu dunkaani mitte basera calla nooha diˈˈikkino. Baxxino gambooshshira wole gobba haˈroottohanna Yihowa dunkaani giddo heeˈransanni hagiirraamma ikkitinori wolootu ammanate roduuwikkinni xaadoottoha ikkara dandaanno. Hajajantanno soqqamaanosi noowa baalankawa Yihowa dunkaani no.—Aju. 21:3.
7. Ammanante reyitinori Yihowa soqqamaano xaa geeshsha Yihowa dunkaani giddo wosina ikkite no yineemmohu mayiraati? (Misileno lai.)
7 Ammanante reyitinori Yihowa soqqamaano hiikkitannoyya? Insa xaa geeshsha Yihowa dunkaani giddo wosina ikkite no yine heda dandiineemmo? Ee! Hatto yineemmohu mayiraati? Korkaatuno insa Yihowa albaanni lubbotenni nooreeti. Yesuusi togo yiino: “Ikkollana Muse nafa citu daafira kultanno xaggera Yihowa, ‘Abirihaami Magano, Yisaaqi Maganonna Yaaqoobi Magano’ yii woyite, reyitinori kaˈannota egensiisino. Isi lubbote noori Maganooti ikkinnina reyitinori Magano diˈˈikkino; korkaatuno baalunku isi illera lubbote nooreeti.”—Luq. 20:37, 38.
Ammanante reyitinori nafa Maganu dunkaani giddo wosina ikka dandiitanno (Gufo 7 lai)
AFIˈNEEMMO ATOOTENNA ASSA HASIISSANNONKERE
8. Yihowa dunkaani giddo heeˈrankenni afiˈneemmo horo maati?
8 Hundi yannara mannu dunkaana qasiˈrannohu heeˈratenna agarooshshe afiˈrate ikkinonte gede, Yihowa dunkaani giddo heeˈranno mannino ayyaanaamittensa gawajjanno coyinni gatanno, hattono hexxo heedhannonsa. Yihowawa gamba yine heeˈneemmoha ikkiro Sheexaanu hegerera gawajjannonkere assa didandaanno. (Far. 31:23; 1 Yoh. 3:8) Yihowa haaro alamerano ammanantino jaallasi ayyaanaamittensa gawajjanno coyinni agarannonsa; hattono hatte yannara reyo hoolanno.—Aju. 21:4.
9. Yihowa, wosinisi maa assara hasiˈranno?
9 Yihowa dunkaani giddo wosina ikka, yaano isi ledo geedote jaalooma kalaqiˈra ninkera lowo ayirrinyeeti! Wosinasi ikkine heeˈra hasiˈneemmoha ikkiro maa assa hasiissannonke? Mittu manchi minisira koyisihero isi maa assattora hasiˈrannoro afa hasiˈratto. Lawishshaho, isi minira eatto woyite caamma fushshiˈrattora hasiˈrannoha ikkara dandaanno; atino umikki fajjonni hatto assatto. Hatteente gede ninkeno Yihowa dunkaanisi giddo wosina ikke heeˈranno manni maa assara hasiˈrannoro afa hasiˈneemmoti egennantinote. Yihowara noonke baxilli woˈmante doogonni ‘iso hagiirsiisate’ dandiinummore baala assineemmo gede kakkayisannonke. (Qol. 1:10) Yihowa Jaalinke gede assine laˈneemmoha ikkirono, isi ayirrinyu hasiisannosiha Maganonkenna Annanke ikkinotano dideˈneemmo. (Far. 25:14) Tenne wodanaho wodhine woˈmanka woyite iso ayirrisa hasiissannonke. Yihowa konni garinni ayirrisanke iso dadillisannore qorophineemmo gede kaaˈlitannonke. Woˈmanka woyite Maganinke ledo ‘dhukanke anfe’ heeˈra hasiˈneemmo.—Mik. 6:8, NW.
YIHOWA HALALLA MALLAADANNOKKIHA IKKASI LEELLISHINO GARA
10-11. Yihowa Siina halallira Israeelete assinori mallaadannokkiha ikkasi leellishinohu hiittoonniiti?
10 Yihowa wosinasi dimallaadanno. (Rom. 2:11) Yihowa Siina halallira Israeelete assinorinni isi mallaadannokkiha ikkinota huwanteemmo.
11 Yihowa mannasi Gibitsete borojjimmanni fushshihu gedensaanni, xaadooshshu dunkaaniwa kakkalaano ikkite soqqantannore shoomino. Qullaawu dunkaani ledo xaadooshshe afiˈrinoha wole looso loossanno gede Leewaawoota gaammoonni. Xaadooshshu dunkaanira soqqantannore woy dunkaanansa xaadooshshu dunkaani mule qasidhinore Yihowa wolootunni roorse towaatinoni? Ditowaatino! Isi dimallaadannoho.
12. Yihowa haarote xintantino dagasira mallaadannokkiha ikkasi leellishinohu hiittoonniiti? (Fulo 40:38) (Misileno lai.)
12 Soqqamannohu xaadooshshu dunkaani giddo ikkirono ikka hoogirono woy dunkaana qasiˈrinohu xaadooshshu dunkaani mule woy xeertote ikkirono, kaampete giddo heeˈrannohu mittu mittunku Israeelichi Yihowa ledo muli jaalooma kalaqiˈra dandaanno. Lawishshaho, Yihowa xaadooshshu dunkaanira umoonni nooti gomichu heelliichonna giirate heellicho baalunku Israeelete mannira leeltanno gede assino. (Fulo 40:38 nabbawi.) Gomichu haˈra hanafanno woyite dunkaanansa xaadooshshu dunkaaniwiinni xeertiˈre qasiˈrino mannino laˈˈa dandaanno; hakkiinni insa uduunnensa gamba assiˈra, dunkaanansa diiganna wolu Israeelete manni ledo taalo haˈra dandiitanno. (Kir. 9:15-23) Mannu noowiinni haˈra hanafanno gede, birra daashshine seekkinoonniha lame xurumba ufuunfanni woyite baalunku macciishsha dandaanno. (Kir. 10:2) Hakko daafira xaadooshshu dunkaaniwa heeˈra calla Yihowa ledo muli jaalooma kalaqiˈnanni gede diassitanno. Hatteentenni haarote xintantinote Yihowa daga giddo noohu mittu mittunku Yihowa wosincho ikka hattono biddishshanna agarooshshe afiˈra dandaanno. Hatteente gede, ninkeno xaa yannara heeˈneemmo bayichi ikkihano ikkiro, Yihowa baxannonke, towaatannonke hattono agarannonke.
Maganu xaadooshshu dunkaani kaampete mereero heeˈranno gede assasi isi mallaadannokkiha ikkinota leellishshanno (Gufo 12 lai)
YIHOWA MALLAADANNOKKIHA IKKASI LEELLISHANNOHA YANNANKERA NOO LAWISHSHA
13. Yihowa xaa yannara mallaadannokkiha ikkasi leellishinoti mitte doogo hiittenneeti?
13 Xaa yannara Maganu manni giddo mitu heeˈrannohu Yihowa Farciˈraasinete qara biiro woy sinu biiro qooxeessiraati. Mitu roduuwi isinni soqqantannohu hakkooti. Hakko daafira insa hakko loonsanniha batinye looso loossanno hattono albisa ikkite soqqantannori ledo muli jaalooma kalaqidhara dandiitanno. Wolootu woradu aliidi laˈˈaano ikkite woy wolu garita baxxitinota woˈma yanna soqqansho soqqantanno. Atino xaa yannara kuri qoosso afiˈrinokkihu rooru manni wido ikkoottoha ikkiro wosinsiˈrannonkehu Yihowa iso hagiirsiissannore baalanka baxannota deˈooti. Isi mitto mittonka egenninonke hattono towaatannonke. (1 Phe. 5:7) Baalunku Maganu manni ayyaanaamittete sagale, biddishshanna hasiisannonsa agarooshshe afiˈranno.
14. Yihowa mallaadannokkiha ikkasi leellishinoti wole doogo hiittenneeti?
14 Yihowa mallaadannokkiha ikkasi leellishinoti wole doogo, alamete aana noo manni baalunku Qullaawa Maxaafa afiˈranno gede asseeti. Umo Qullaawa Borro borreessinoonnihu Ibiraawootu, Aremayiketenna Giriikete afiinniiti. Umo Qullaawa Maxaafa borreessinoonni afoo nabbawa dandiitannori konne afoo dandiitannokkirinni roore Yihowa ledo muli jaalooma kalaqidhannoni? Deeˈni.—Mat. 11:25.
15. Yihowa mallaadannokkiha ikkasi leellishshanno taje maati? (Misileno lai.)
15 Yihowa jaallasi ikkineemmo gede koyisannonkehu lowo roso ronsoommo daafira woy hunda Qullaawa Maxaafa borreessinoonni qaale dandiineemmo daafira diˈˈikkino. Yihowa lowo roso rosino manni calla ikkikkinni, alamete aana noohu baalunku manni isi aanno hayyo afiˈranno gede assino. Qullaawu ayyaaninni borreessinoonniha Qaalesi yaano Qullaawa Maxaafa lowo kume ikkanno afiinni tirroonni; hakko daafira alamete aana noo manni Qullaawu Maxaafi rosiisanno rosinni horo afiˈranna Maganu jaalla ikkinanni gara rosa dandaanno.—2 Xim. 3:16, 17.
Maganu Qullaawa Maxaafa baalunku manni afiˈranno gede assasi isi mallaadannokkiha ikkinota leellishshannohu hiittoonniiti? (Gufo 15 lai)
YIHOWA HAGIIRSIISSINANNI HEEDHE
16. Soqqamaasinete Looso 10:34, 35 yitanno garinni Yihowa hagiirsiinsanni heeˈra dandiineemmohu hiittoonniiti?
16 Yihowahu lawishshu dunkaani giddo wosina ikka lowo ayirrinyeeti. Isi shaqqadoho, baalunkunni roore baxillaanchoho hattono wosina adhate taalle dinoosiho. Hakkiino sae isi dimallaadannoho; heeˈneemmo bayichi, budinke, rosinke deerri, sirchinke, gaˈrenke, dirinke ikkihano ikkiro labbaaha woy meyatano ikkinummoro isi anga fane haaˈrannonke. Ikkirono Yihowa anga fane wosinimma haaˈrannohu isira hajajantannore callaati.—Soqqamaasinete Looso 10:34, 35 nabbawi.
17. Yihowa dunkaani giddo wosincho ikkate daafira wole taje afiˈra dandiineemmohu hiikkiinniiti?
17 Faarso 15:1 Daawiti, “Kaaliiqa, minekki galannohu ayeti? Qullaawu Ilaalikki iima heeˈrannohu ayeti?” yee xaˈmino. Faarsaanchu qullaawu ayyaani massageennasi kuri xaˈmuwara dawaro qolino. Aananno birxichira Yihowa hagiirsiinsanni heeˈrate assa hasiissannonkeha mito coye ronseemmo.
FAARSO 32 Yihowa Wido Ikki!
