1-2. Ino ty fanasà ataon’i Jehovah ho an’ny mpanompony tsy mivaliky?

 AKORY ty havalinao laha misy olo manontany anao hoe: ‘Inonao moa Jehovah io?’ Mety hamaly iha hoe: ‘Jehovah zao Babako, Ndranahariko, sady Namako.’ Fe hainao va hoe azo ampitovizy amin’olo manasa vahiny io koa Jehovah, le manasa anao ie mba ho vahininy?

² Niresaky mikasiky ty fanasà ataon’i Jehovah amy ty mpanompony tsy mivaliky Davida. Nanontany ie hoe: “Nao lahy Jehovah, ia ro afaky mivahiny amy tranolainao ao? Ia ro afaky mipetraky amy vohitsinao masy ao?” (Sal. 15:1) Hitantsika baka amy safà reo fa afaky ho vahinin’i Jehovah tsika, zany hoe afaky ho namany. Zay ty fanasà baka amy Jehovah. Tsy hitanao baka amy zay va hoe tena voninahitsy miavaky raha zay?

MANASA ANTSIKA MBA HIVAHINY AMY TRANOLAINY AO JEHOVAH

3. Ia ty nasàn’i Jehovah amy tranolainy ao voalohany, le ino ty nitsapan-drozy roe?

³ Jehovah raiky avao ro teo talohan’ny namoronany ty raha iaby. Fe bakeo ie namoro an’ny Anakilahiny talanolo iny. Tsy ia io fa Jesosy. Manahaky Mpampiantrano vahiny, manasa ty vahininy an-tranolainy ao io Jehovah, le Anakilahiny iny ro vahininy voalohany. Tena tea mandramby vahiny Jehovah. Mivola ty Baiboly fa ‘tena niteany’ Anakilahiny io. Le ie koa moa “nifalifaly avao tanatrehany [Jehovah] teo.”​—Ohab. 8:30.

4. Ia koa ty nasàn’i Jehovah mba ho vahininy amy tranolainy ao tafara atoy?

⁴ Tsy nijano teo Jehovah fa namoro ty anjely ie, le nasàny ho amy tranolainy ao koa rozy. “Anaki-Ndranahary” ty ikaihan’ny Baiboly an’ny anjely reo, le volaniny ao fa falifaly rozy miaraky amy Jehovah. (Joba 38:7; Dan. 7:10) Azy miaraky mipetraky aminy an-danitsy any rey tse ro nivahininy, zany hoe ninamany,  tanatin’ny tao maro biby. Fe namoro ty olombelo ie tafara atoy, le afaky ho vahininy koa rozy. Anisan’ny nivahininy, ohatsy, ry Enoka, Noa, Abrahama, noho Joba. Hita amy Baiboly ao fa naman’i Jehovah olo reo satria nankatò azy. Mivola koa ty Baiboly fa niaraky nandeha tamy “Ndranahary marina iny” rozy.​—Gen. 5:24; 6:9; Joba 29:4; Isaia 41:8.

5. Ino ty ianarantsika baka amy faminania amy Ezekiela 37:26, 27 ao?

⁵ Fa tao maro zay Jehovah ro niezaky nanasa olo mba ho vahininy. (Vakio Ezekiela 37:26, 27.) Ianarantsika amy faminanian’i Ezekiela ao, ohatsy, fa tena tea-Ndranahary hifandramby marìny aminy ty mpanompony tsy mivaliky. Mampitamà ie fa “hanao fifanekeam-pilongoa amin-drozy.” Miresaky ty fotoa hampiharo raiky ty mpanompony mitamà hiay an-danitsy any noho hiay an-tany etoy faminania io. Hiharo raiky rozy amy tranolainy ao ka ho lasa “andiany raiky.” (Jaona 10:16) Tanteraky raha io henanizao!

MIKARAKARA ANTSIKA NDRANAHARY NDRE AIA NDRE AIA TY MISY ANTSIKA

6. Akory ty hahavy olo raiky ho vahinin’i Jehovah, le aia ty misy an’ny tranolainy io?

⁶ Tamy andron’ny Baiboly, le anisan’ny pilasy azon’olo itofatofà ty tranolay. Voaro amy toetsandro raty koa rozy lafa ao. Lafa misy vahiny nasàn’olo ho an-tranolainy ao, le matoky ie fa hikarakara soa azy olo nanasa azy iny. Lafa manoka ty vatantsika ho an’i Jehovah tsika, le lasa vahiny amy tranolainy ao. (Sal. 61:4) Mahazo ze raha ilàntsika tsika mba hahavy antsika hinama soa amy Jehovah avao. Maro koa ty olo lasa vahinin’i Jehovah le lasa mpinama amintsika. Fe aia tranolain’i Jehovah an’ohatsy io? Amy pilasy raiky va? Aha. Afaky ho vahininy iaby ty olo an-tany etoa. Mety nandeha an-tany hafa any vasa iha na an-dafy any mba hanatriky fivoriamben’ny vondrom-paritsy manoka, le nifankahita tamin’olo falifaly satria mipetraky amy tranolai-Ndranahary ao. Afaky ho vahinin’i Jehovah amy tranolainy ao avao tsika laha tsy mivaliky, ndre aia ndre aia ty misy antsika.​—Apok. 21:3.

7. Manino tsika ro afaky mivola fa mbo vahinin’i Jehovah amy tranolainy ao azy mpanompony fa nimaty rey? (Henteo koa sary io.)

⁷ Ka manao akory mpanompon’i Jehovah fa nimaty rey? Mbo vahininy amy tranolainy ao va rozy? Eka! Fa manino tsika ro mivola ani-zay? Satria mbo tiaron’i Jehovah soa rozy, sady mbo velo rozy aminy. Nanazava Jesosy hoe: “Ndre Mosesy aza niresaky hoe hovelomy ty maty, tamy fitantarà mikasiky an’ny  voarointsilo iny, lafa ie nikaiky an’i Jehovah hoe ‘Ndranaharin’i Abrahama noho Ndranaharin’i Isaka noho Ndranaharin’i Jakoba.’ Tsy Ndranaharin’olo maty ie, fa ahi-ty velo, satria aminy le velo iaby rozy iaby reo.”​—Lioka 20:37, 38.

INO TY SOA AZONTSIKA, LE INO TY TSY MAINTSY ATAONTSIKA?

8. Ino ty soa azontsika lafa tsika amy tranolain’i Jehovah ao?

⁸ Afaky mitofatofa ty olo lafa anatin’ny tranolay ara-bakiteny sady voaro amy toetsandro raty. Manahaky ani-zay koa ty tranolain’i Jehovah. Miaro ty mpanompony amy ze raha mety hanimba ty fifandrambesan-drozy aminy raha io sady manampy an-drozy hana raha tamany. Tsy ho vitan’i Satana ty hanao raha mba hisakana antsika tsy hiay mandrakizay lafa mifandramby soa amy Jehovah avao tsika. (Sal. 31:23; 1 Jaona 3:8) Mbo hiaro ty namany avao Jehovah amy tontolo vaovao any, le tsy hoe amy ze raha mety hanimba ty finaman-drozy avao fa hiaro an-drozy tsy ho maty koa.​—Apok. 21:4.

9. Ino ty tean’i Jehovah hataon’ny vahininy?

⁹ Tena tombotsoa bevata ty hoe mivahiny amy tranolain’i Jehovah ao. Afaky hinama aminy tsika, le tsy hoe amy zao avao fa mandrakizay mihintsy. Ino ty tokony hataontsika laha teantsika ty ho vahininy avao? Laha misy olo manasa anao an-tranony any, le teanao ty hahay hoe ino ty raha tean’ny tompon-trano iny hataonao. Mety ho teany, ohatsy, laha ajanonao amonto eo ty kapanao fa tsy andesy militsy an-trano any. Laha mivola ani-zay ie, le azo antoky fa hanao ani-zay iha. Manahaky ani-zay koa fa tena teantsika ho hay hoe ino ty raha takin’i Jehovah amy ze olo ta hivahiny amy tranolainy ao avao. Teantsika Jehovah le zay ro mandrisiky antsika hanao ze fara herintsika mba “hampifalifaly azy tanteraky.” (Kol. 1:10) Marina fa Namantsika Jehovah. Fe Ndranaharintsika noho Babantsika koa ie ka maeva hohajàntsika. (Sal. 25:14) Tsy tokony hohalinontsika mihintsy zay. Tena hanaja azy avao tsika laha manao ani-zay. Laha tena manaja azy tsika, le hanalavitsy ze fandaisam-bata tsy teany sady ‘hiambany lafa miaraky mandeha’ amy Ndranaharintsika iny.​—Mika 6:8.

TSY NANAVAKAVAKY AN’NY ISRAELITA REY JEHOVAH

10-11. Ino ty mampiseho hoe tsy nanavakavaky Jehovah laha hentea ty fomba nanandesany ty Israelita tamy liomonton’i Sinay tany?

¹⁰ Tsy manavakavaky Jehovah fa mitovy iaby ty fomba anandesany ty vahininy. (Rom. 2:11) Akory ty ahaizantsika ani-zay? Ndao hodinihintsika ty fomba nanandesany ty Israelita, tamy liomonton’i Sinay tany.

¹¹ Lafa baka nanafaky ty vahoakiny tsy ho andevo ta Ejipta any Jehovah, le nanendry mpisoro ie mba hanompo tamy tranolay masy tao. Nitendreny hiandraikitsy ty asa tamy tranolay masy tao ty Levita. Fe ze nanompo tamy tranolay masy tao, na nitoby narìny azy mbeny avao va ro nikarakaran’i Jehovah soa? Aha! Tsy nanavakavaky Jehovah.

12. Ino ty raha nataon’i Jehovah tamy Israelita rey ka ahitantsika fa tsy nanavakavaky ie? (Eksodosy 40:38) (Henteo koa sary io.)

¹² Afaky ho naman’i Jehovah ty Israelita kiraidraiky ndre nanompo tamy tranolay masy tao ie ndre tsy nanompo tao, ndre narìny mbeny ty tranolainy ndre nilavitsy. Nanao fahagagà, ohatsy, ie ka nasiany andry rahona noho andry afo tambonin’ny tranolay masy teo, le nataony azo antoky hoe hitan’ny vahoaky iaby raha iny. (Vakio Eksodosy 40:38.) Lafa nikisaky rahona iny, le afaky nahita azy ndre azy nitoby lavitsin’ny tranolay masy rey. Afaky nangoro ty entan-drozy rozy, nangoro ty  lain-drozy, ka niaraky nandeha tamy vahoaky rey. (Nom. 9:15-23) Nisy trompetra volafoty roe nampiasà mba hanambarà amy vahoaky rey hoe handeha rozy. Afaky naharè ty feon’ny trompetra reo ty olo iaby. (Nom. 10:2) Ka manao akory laha misy olo mitoby marìny an’ny tranolay masy iny, midika va zay hoe ie ro tena naman’i Jehovah laha ampitovizy amy azy lavitsy rey? Tsy zay mihintsy. Afaky ho vahinin’i Jehovah ty Israelita kiraidraiky sady afaky matoky ie hoe hitari-dala noho hiaro azy Jehovah. Manahaky ani-zay koa henanizao. Tea antsika avao Jehovah ndre aia ndre aia ty misy antsika. Mikarakara antsika ie sady miaro antsika.

TSY MANAVAKAVAKY KOA JEHOVAH AMY HENANIZAO

13. Manino tsika ro afaky mivola fa tsy manavakavaky Jehovah amy androntsika zao?

¹³ Mipetraky marìny foibe na biròn’ny sampan’ny Vavolombelon’i Jehovah, ty sisany amy vahoaki-Ndranahary henanizao. Manompo ao mihintsy aza ty sisany. Lasa afaky mandramby anjara amy ze asa atao amy pilasy reo amy zay rozy sady afaky mifandramby amy azy mitariky reo. Misy koa manao ty asan’ny faritsy na manao karaza fanompoa manontolo andro manoka hafa. Ka manao akory laha tsy mpanompo manontolo andro manoka iha, na tsy miasa amy foibe any na amy biròn’ny sampana? Matokisa fa mbo vahinin’i Jehovah avao iha sady tea anao ie. Tean’i Jehovah ze olo iaby nasàny. Hainy soa iha sady ameany anao ze raha ilànao. (1 Pet. 5:7) Amean’i Jehovah hany ara-panahy ty mpanompony kiraidraiky. Mitari-dala noho miaro an-drozy koa ie.

14. Akory koa ty ampisehoan’i Jehovah fa tsy manavakavaky ie?

¹⁴ Akory koa ty ampisehoan’i Jehovah fa tsy manavakavaky ie fa teany ho vahininy ty olo iaby? Ataony azo antoky hoe afaky mamaky ty Baiboly ty olo amy tany toy iaby. Nisoraty tamy fivolana telo retoa tse ty Soratsy Masy tamy voalohany: Hebreo, Aramianina, noho  Grika. Fe ze olo afaky mamaky Baiboly amy fivolana reo avao va ro mifandramby soa amy Jehovah laha ampitovizy amin’olo hafa? Aha, tsy zay.​—Mat. 11:25.

15. Ino ty manaporofo fa tsy manavakavaky vatany Jehovah? (Henteo koa sary io.)

¹⁵ Tsy mianky amy hoe nahita fianara tsika na mahay ty fivolana nanorata ty Baiboly tam-boalohany any, le zay ro mahavy an’i Jehovah manasa antsika mba ho namany. Tsy ze olo nahitahita fianara avao ro ameany ty fahendreany, fa ataony ze hahavy ty olo iaby amy tany toy hahazo an’ny raha io, ndre manam-pahaiza be ie ndre olo tsotra. Fa misy amy fivolana arivo mahery zao ty Safàny, zany hoe ty Baiboly. Lasa afaky mandramby soa baka amy ty raha ampianarin’ny Baiboly amy zay ty olo maneran-tany, sady afaky mianatsy hoe akory ty hahavy an-drozy ho lasa namany.​—2 Tim. 3:16, 17.

MIEZAHA MBA ‘HANKASITRAHAN’I JEHOVAH’ AVAO

16. Laha hentea ty Asan’ny Apostoly 10:34, 35, ino ty azontsika atao mba hahavy antsika hankasitrahan’i Jehovah avao?

¹⁶ Tombotsoa bevata ty hoe asàn’i Jehovah mba ho vahininy amy tranolainy an’ohatsy iny ao. Tsy misy olo soa fanahy, be fitiava, noho tena tea mandramby vahiny mandilatsy azy. Tsy manavakavaky koa ie. Rambesiny soa iaby tsika ndre aia ndre aia ty misy antsika, ndre ino ndre ino ty raha iainantsika, ty fianara vitantsika, ty volon-koditsintsika, ty karazantsika, ty taontsika, na lahilahy tsika na ampela. Fe ze olo mankatò ty fitsipikiny avao ro asàny ho vahininy.​—Vakio Asan’ny Apostoly 10:34, 35.

17. Ino ty hodinihintsika amy lahatsoratsy manaraky ao?

¹⁷ Nanontany ho zao Davida amy Salamo 15:1 ao: “Nao lahy Jehovah, ia ro afaky mivahiny amy tranolainao ao? Ia ro afaky mipetraky amy vohitsinao masy ao?” Bakeo nampean’i Jehovah Davida mba hamaly an’ny fanontanea reo, amy Salamo faha-15 ao. Hiresaky raha sisany tsy maintsy ataontsika ty lahatsoratsy manaraky, mba hahavy antsika hanao raha mampifalifaly an’i Jehovah noho ho namany avao.