1-2. O le ā le valaaulia ua faasafua mai e Ieova i ona tagata tapuaʻi faamaoni?

 O LE ā le auala e te vaai ai iā Ieova? Atonu e te faapea mai, ʻO Ieova o loʻu Tamā, o loʻu Atua, ma o laʻu Uō.’ E iai foʻi isi taʻu po o faalupega e mafai ona faamatala ai Ieova. Peitaʻi, pe e te vaai foʻi iā te ia o Sē e talimālō?

² Na faatusatusa e Tavita le faiā a Ieova ma ona tagata tapuaʻi faamaoni, i le faiā a sē e talimālō ma ana mālō. Na fesili o ia, “Ieova e, o ai e fai ma mālō i lou faleʻie? O ai foʻi e mafai ona nofo i lou mauga paia?” (Sala. 15:1) Ua tatou aʻoaʻoina mai i lenā mau, e mafai ona avea i tatou ma mālō a Ieova, po o ana uō. O se matuā faaeaga lava le valaaulia o i tatou e Ieova!

E FINAGALO IEOVA E AVEA I TATOU MA ANA MĀLŌ

3. O ai le uluaʻi mālō a Ieova, ma o ā faalogona o le tasi i le isi?

³ A o leʻi foafoaina e Ieova mea uma, sa na o ia lava na iai i le amataga, ona ia foafoaina lea o lona Alo ulumatua o Iesu. Na matuā olioli Ieova i lana matafaioi fou o le avea ma Sē e talimālō. Ua faailoa mai i le Tusi Paia, na “matuā fiafia” Ieova i lona Alo. Na ʻolioli foʻi i luma o Ieova i taimi uma’ lona Alo, o lana uluaʻi mālō lea.—Faata. 8:30.

4. O ai isi na mulimuli ane valaaulia e Ieova e avea ma ana mālō i lona faleʻie?

 ⁴ Na sosoo ai ma le foafoaina e Ieova o isi foafoaga agaga, ma valaaulia i latou e avea foʻi ma ana mālō. Ua taʻua agelu o ʻatalii o le Atua,’ ma e latou te fiafia e faatasi ma Ieova. (Iopu 38:7; Tani. 7:10) Na umi se taimi, e na o i latou i le lagi sa talimālō ai Ieova. Mulimuli ane, na ia talimālō foʻi i tagata i le lalolagi. Na aofia ai tagata faamaoni e pei o Enoka, Noa, Aperaamo, ma Iopu. Na taʻua na auauna faamaoni o uō a le Atua, po o ē na savavali “ma le Atua moni.”—Kene. 5:24; 6:9; Iopu 29:4; Isa. 41:8.

5. O le ā ua tatou aʻoaʻoina mai i le valoaga o loo i le Esekielu 37:​26, 27?

⁵ A o faagasolo senituri, na faaauau ona valaaulia e Ieova ana uō e avea ma ana mālō. (Faitau le Esekielu 37:​26, 27.) O se faaaʻoaʻoga, ua tatou aʻoaʻoina mai i le valoaga a Esekielu, e finagalo Ieova ia atiaʻe e ona tagata tapuaʻi se faiā māfana ma ia. Ua ia folafola mai o le a ia osia “se feagaiga o le filemu ma i latou.” E faasino atu lenā valoaga i le taimi e autasia ai i lona faleʻie faafaatusa, i latou e faamoemoe e ola i le lagi ma i latou e faamoemoe e ola i le lalolagi o se “lafu e tasi.” (Ioa. 10:16) O le mea tonu lenā o loo tupu i le taimi lenei.

E TAUSIA E IEOVA I TATOU PO O FEA LAVA E TATOU TE IAI

6. (a) E faapefea ona avea se tasi ma mālō i le faleʻie o Ieova? (e) Pe e iai se nofoaga patino po o se atunuu e maua ai le faleʻie o Ieova? Ia faamatala.

⁶ I taimi o le Tusi Paia, na avea le faleʻie ma mea e mālōlō i ai tagata ma puipuia ai mai i le timu ma le lā. O le tulaga masani lava, o mālō e nonofo i nei faleʻie, e tausia lelei i latou. O le taimi lava e tuuina atu ai i tatou iā Ieova, ua avea foʻi i tatou ma ana mālō i lona faleʻie faafaatusa. (Sala. 61:4) Ua tatou maua le anoanoaʻi o meaʻai faaleagaga, faapea faauōga ma isi ua avea foʻi ma mālō a Ieova. Talu ai e faafaatusa le faleʻie o Ieova, e lē faapea la e maua i se nofoaga patino po o se atunuu. Nai lo o lenā, e mafai e so o se tasi ona avea ma mālō i lona faleʻie, po o fea lava le mea e nofo ai. Atonu na e malaga atu i se isi atunuu ina ia e auai i se tauaofiaga faapitoa, ma feiloaʻi ai ma isi o loo olioli i le iai i le faleʻie o le Atua. Po o fea lava e iai auauna faamaoni a Ieova, e iai foʻi ma lona faleʻie.—Faaa. 21:3.

7. Aiseā e mafai ai ona tatou faapea atu, o loo avea pea auauna faamaoni a Ieova ua maliliu o ni mālō i lona faleʻie? (Tagaʻi foʻi i le ata.)

 ⁷ Ae e faapefea auauna faamaoni a Ieova ua maliliu? Pe e mafai ona tatou faapea atu o loo avea pea i latou ma mālō i le faleʻie o Ieova? Ioe. Aiseā? Auā i le silafaga a Ieova o loo latou feola pea. Na fetalai Iesu: “E tusa ai ma le toetutū mai o ē ua oti, e oo lava iā Mose na ia faailoaina mai e ala i le tala i le laau tuitui, ina ua ia taʻua Ieova o ʻle Atua o Aperaamo, o le Atua o Isaako, ma le Atua o Iakopo.’ O ia o le Atua o ē e ola, ae lē o ē ua oti, auā o loo latou feola uma iā te ia.”—Luka 20:​37, 38.

O AOGĀ MA MEA E FAATALITALIA MAI IĀ I TATOU

8. O ā aogā e tatou te maua mai i le iai i le faleʻie o Ieova?

⁸ E pei ona avea le faleʻie o se mea e mālōlō ai ma puipuia ai mai i le timu ma le lā, ua avea foʻi le faleʻie o Ieova ma puipuiga mo ana mālō mai i lamatiaga faaleagaga ma le leai o se faamoemoe. Pe a tatou vavalalata atu pea iā Ieova, e lē mafai e Satani ona faia se mea e tumau ona tatou afāina ai. (Sala. 31:23; 1 Ioa. 3:8) I le lalolagi fou, o le a faaauau ona puipuia e Ieova ana uō faamaoni e lē gata mai i lamatiaga faaleagaga, ae faapea foʻi le oti.—Faaa. 21:4.

9. O ā mea e faatalitalia e Ieova mai i ana mālō?

⁹ Maʻeu se faaeaga o le avea ma mālō i le faleʻie o Ieova, lea ua tatou maua ai se faiā māfana ma ia! Pe afai e tatou te mananaʻo e avea pea i tatou o ni ana mālō, o le ā le auala e tatau ona tatou amioaʻi ai? Pe afai e valaaulia oe e se tasi i lona fale, e te manaʻo e iloa mea o loo faatalitalia e lenā tagata mai iā te oe. O se faataʻitaʻiga, e na te faatalitalia e aveese ou seevae a o leʻi ulu atu i totonu o le fale, ma e mautinoa o le mea lenā e te faia. I se tulaga talitutusa, e tatou te mananaʻo foʻi e iloa mea o loo faatalitalia e Ieova, pe afai e tatou te mananaʻo e avea pea i tatou ma ana mālō. O lo tatou alofa mo Ieova ua uunaʻia ai i tatou e faia taumafaiga uma ina ia ʻmatuā faafiafiaina o ia.’ (Kolo. 1:10) E ui o Ieova o la tatou Uō, ae o ia foʻi o lo tatou Atua ma lo tatou Tamā, e tatau i ai le faaaloalo. (Sala. 25:14) O lea, e tatau ona tatou faaalia pea le migao iā te ia. O le faia faapea, o le a tatou ʻalofia ai le faia o so o se mea e faatigā ai iā te ia. E mautinoa, o lo tatou faanaunauga o le “savavali ma le faamaulalo” ma lo tatou Atua.—Mika 6:8.

NA FAAALIA E IEOVA LE LĒ FAAILOGA TAGATA I LE TOAFA O SINAI

10-11. Na faapefea ona atagia mai le lē faailoga tagata o Ieova, i le auala na feutagaʻi ai ma le nuu o Isaraelu i le toafa o Sinai?

¹⁰ E tutusa le auala e feutagaʻi ai Ieova ma ana mālō uma. (Roma 2:11) E faamaonia le lē faailoga tagata o Ieova, i le auala na feutagaʻi ai ma le nuu o Isaraelu i le toafa o Sinai.

¹¹ Ina ua laveaʻiina e Ieova ona tagata mai i le nofo pologa i Aikupito, na ia tofia ni ositaulaga ina ia auauna i le faleʻie paia. Na tofia le ʻau sā Levī e fesoasoani i isi tiute na faia i le faleʻie paia. Pe na sili atu le auala na tausia ai e Ieova i latou na auauna i le faleʻie paia pe nonofo latalata i ai, nai lo o isi? E leai. E lē faailoga tagata Ieova.

12. Na faapefea ona faaalia e Ieova le lē faailoga tagata i le auala na feutagaʻi ai ma le nuu o Isaraelu? (Esoto 40:38) (Tagaʻi foʻi i le ata.)

¹² Na mafai e tagata Isaraelu taʻitoʻatasi  ona avea ma uō a Ieova, e tusa pe na auauna i le faleʻie paia pe leai, ma pe nonofo latalata foʻi i ai pe leai. O se faaaʻoaʻoga, na faamautinoa e Ieova e iloa atu e le nuu atoa le ao faaniutū ma le afi faaniutū sa i luga aʻe o le faleʻie paia. (Faitau le Esoto 40:38.) O i latou na nonofo mamao ese mai i le faleʻie paia, na latou iloa atu le taimi na alu aʻe ai le ao, ma amata loa ona tāpena a latou meatotino ma o latou faleʻie, ma malaga ese atu loa ma le nuu atoa. (Nu. 9:​15-23) Pe a faalogoina e le nuu le iliina o pū siliva e lua, o le faailoga lenā e iloa ai, ua tatau loa ona tāpena e malaga ese. (Nu. 10:2) Ua manino mai, o le nofo latalata o se tasi i le faleʻie paia e lē faapea ai e sili atu le māfana o lana faiā ma Ieova, nai lo o i latou e nonofo mamao ese mai i le faleʻie paia. Nai lo o lea, na mafai ona avea tagata uma ma mālō a Ieova ma mautinoa i lana taʻitaʻiga ma lana puipuiga. E faapena foʻi i aso nei, po o fea lava e tatou te nonofo ai, ae e mafai ona tatou maua aogā mai i le taʻitaʻiga alofa a Ieova ma lana puipuiga.

FAAAʻOAʻOGA I ASO NEI O LE LĒ FAAILOGA TAGATA O IEOVA

13. I aso nei, o le ā se auala e tatou te iloa ai le lē faailoga tagata o Ieova?

¹³ I aso nei, o nisi o auauna a Ieova, e nonofo latalata i le ofisa ulu, po o se ofisa o le lālā a Molimau a Ieova. Ae o isi e galulue i na nofoaga. E faia so latou sao i le tele o galuega o loo faia ai, ma faifaimea faatasi ma i latou o loo taʻimua i le galuega. O loo auauna foʻi isi o ni ovasia matagaluega, pe auai foʻi i isi vala o le auaunaga faapitoa faataimi atoa. Peitaʻi, pe afai e lē mafai ona faia sou sao i na vala, ia e mautinoa o loo avea pea oe ma mālō a Ieova, ma e alofa faapelepele o ia i ana mālō uma. E na te saunia foʻi mea e latou te manaʻomia. (1 Pete. 5:7) E maua e tagata uma o Ieova meaʻai faaleagaga, le taʻitaʻiga, ma le puipuiga e latou te manaʻomia.

14. O le ā se isi faaaʻoaʻoga o le lē faailoga tagata o Ieova?

 ¹⁴ O se isi faaaʻoaʻoga o le lē faailoga tagata o Ieova, o lona faamautinoa lea e maua e tagata uma o le lalolagi le Tusi Paia. Na tusia le Tusi Paia i uluaʻi gagana e tolu: o le Eperu, Arama, ma le Eleni. Pe e sili atu la ona māfana le faiā a Ieova ma i latou e malamalama i na gagana nai lo o i latou e lē malamalama i ai? E leai.—Mata. 11:25.

15. O le ā se isi faamaoniga o le lē faailoga tagata o Ieova? (Tagaʻi foʻi i le ata.)

¹⁵ E lē faalagolago lo tatou mauaina o le finagalo malie o Ieova, i lo tatou tulaga tauaʻoaʻoga po o le malamalama i uluaʻi gagana na tusia ai le Tusi Paia. E lē na o i latou e maualuluga aʻoaʻoga e faailoa atu i ai e Ieova lona atamai, ae e na te faailoa atu foʻi i tagata uma e tusa pe e maualuluga aʻoaʻoga pe leai. Ua faaliliuina lana Afioga i le faitau afe o gagana. O lea, ua mafai ai e tagata uma o le lalolagi ona maua aogā mai i aʻoaʻoga o le Tusi Paia, ma aʻoaʻoina le auala e avea ai ma uō a Ieova.—2 Timo. 3:​16, 17.

IA “TALIA” PEA I TATOU E IEOVA O NI ANA MĀLŌ

16. E tusa ai ma le Galuega 10:​34, 35, e faapefea ona talia pea i tatou e Ieova o ni ana mālō?

¹⁶ O se matuā faaeaga le valaaulia o i tatou e Ieova o ni ana mālō i lona faleʻie faafaatusa. E sili atu lona agalelei, lona alofa, ma e lē mafaatusalia lona agaga talimālō. Talu ai e lē faailoga tagata Ieova, e na te valaaulia so o se tasi e tusa lava po o le ā lona atunuu, tulaga tauaʻoaʻoga, alii pe tamaʻitaʻi, po o le ā foʻi lona matua. Peitaʻi, e na o i latou e ola e ōgatusa ma ana tapulaa, e na te taliaina o ni ana mālō.—Faitau le Galuega 10:​34, 35.

17. O fea e mafai ona tatou maua ai nisi faamatalaga e faatatau i le avea ai ma mālō a Ieova i lona faleʻie?

¹⁷ I le Salamo 15:​1, na fesili ai Tavita e faapea: “Ieova e, o ai e fai ma mālō i lou faleʻie? O ai foʻi e mafai ona nofo i lou mauga paia?” Na faaaogā e Ieova Tavita e taliina na fesili. O le a talanoaina i le mataupu o loo sosoo mai, nisi o vala patino e ao ona tatou iloaina ina ia talia ai pea i tatou e Ieova o ni ana mālō.