1-2. Yehowa atumina balanguidi baaye ba sha lulamato luitanyino kinyi?

 Yehowa e na mudimo kinyi mu nshalelo oobe? We kualuula’shi, ‘Yehowa nshami, Efile Mukulu ande na kuuku ande.’ E na ingi miasu sunga bingi bishima biodi mulombene kufubisha bua kuleesha bi Yehowa. Biabia, omumonaa dingi bu Mukuitanyine su?

² Nfumu Davide bapuandikiishe kipuano kia Yehowa na balanguidi baaye ba sha lulamato na kipuano ki pankatshi pa muntu ayitanyina beenyi baaye. Nfumu Davide bayipuishe’shi: ‘Yehowa nnanyi okayitanyina mu Nshibo yobe? Nnanyi mulombene nkashaala pa mwengye oobe wa kishila?’ (Mis. 15:​1, NWT) Kukiila ku ano mayi ayokielue, tubalongo’shi tui balombene kuikala beenyi ba Yehowa, kuamba’shi, bu ba kuuku baaye. Luno nyi nduitanyino lukata lua Yehowa!

YEHOWA AKUMIINA’SHI TUIKALE BEENYI BAAYE

3. Nnanyi ababayitanyine bu muenyi a kumpala kui Yehowa, na booso babidi Yehowa na winyi muenyi aaye babapushiishe naminyi?

³ Yehowa baadi nka bupenka buaye kumpala kua’shi apangie bintu bioso. Anka pa bapangile muana aaye a kumpala, Yehowa baadi nka bu bayitanyiine muntu a kumpala mu Nshibo yaaye ya mu kinfuanyi. Na baadi na muloo wa kuibikita. Bible amba’shi, Yehowa baadi “Asangala kuifuku n’efuku” bua Muana aaye. Na muenyi aaye a kumpala namu, baadi ‘Asepêla n’ê [Yehowa] nsâ yoso.’—Nki. 8:30.

4. Kunyima Yehowa baadi muitanyine bantu kinyi buabadia kutuela mu nshibo yaaye?

⁴ Yehowa bapangile bipangua bia mu kikudi bitanyinue n’abio namu buabidia kuikala bu beenyi mu nshibo yaaye. Mbebitanyinue bu “baana b’Efile Mukulu” na mbebaleeshe bu be na muloo wa kuikala peepi na Yehowa. (Yob. 38:7; Nda. 7:10) Munda  mua bipua bi bungi, nka penda bipangua bia mu kikudi ngi bibaadi bu beenyi b’Efile Mukulu muiyilu mu Bufumu buaye. Kunyima batamiishe nshibo yaaye bua’shi na bantu ba pa nsenga namu b’emutuele. Mu kingi kipungo, munkatshi bua bano beenyi babaadi batuele mu nshibo yaaye mubaadi Enoke, Nowa, Abalahama, na Yobo. Bino bisaka bibidi bia balanguidi booso ba binyibinyi mbebileeshe mu Bible bu ba kuuku ba Yehowa, muanda babaadi abamukookiela.—Kib. 5:24; 6:9; Yob. 29:4; Yesh. 41:8.

5. Nkinyi ki’atulongiela kukiila ku butemuki buatupete mu mukanda wa Esekiele 37:​26, 27?

⁵ Kunyima kua siekele i bungi, Yehowa mmutungunukie na kuitanyina ba kuuku baaye be bungi buabadia kuikala bu beenyi baaye. (Badika Esekiele 37:​26, 27.) Bu kileshesho, kukiila ku butemuki bua Esekiele, atulongo’shi, Efile Mukulu baadi mukumiine binyibinyi’shi balanguidi baye ba sha lulamato bekale naaye mu kipuano ki buwa. Yehowa mmulee’shi: “Nankitshi nabo kilombeeno kia butaale.” Buno butemuki abuleesha kipungo kia baaba be na lukulupilo lua kuenda muiyilu na baaba bena lukulupilo lua kushaala pa nsenga buabadia kuikala mu buumune mu nshibo yaaye ya mu kinfuanyi bu “lombe lumune.” (Yo. 10:16) Bino ngi bikuete kukitshika lelo uno!

EFILE MUKULU KUETE ETUPASUKILA SUNGA TUEKALA MBALO KINYI

6. Bangi bantu mbafikie mu kuikala bu beenyi mu nshibo ya Yehowa mushindo kinyi, na nshibo ya Yehowa i mbalo kinyi?

⁶ Mu mafuku a kala, nshibo ya muntu i baadi mbalo ya kushaala na i baadi ayimukaluila ku ingi mianda. Muenyi ooso baadi afikila mu nshibo ya muntu, baadi atengiela’shi sha nshibo amupasukile kalolo. Nsaa y’atuilambula bua kuikala mu kipuano ki buwa na Yehowa, atuikala bu beenyi mu nshibo yaye ya mu kinfuanyi. (Mis. 61:4) Atusangeelaa bidibua bi bungi bia mu kikudi na bakuuku batudi nabo abafikaa n’abo namu bu beenyi ba Yehowa. Bantu ba mawumbo ooso mbalombene kufika bu beenyi mu nshibo ya Yehowa. Pangi toboyile mu luendo ku dingi eumbo bua nkatuela mu kikongeno ki pa buakio, na okafumankana na bangi bantu be na muloo wa kuikala mu nshibo y’Efile Mukulu. Su tubafubila Yehowa na lulamato, atuikala beenyi mu nshibo yaye sunga tuekala mbalo kinyi.—Kbf. 21:3.

7. Buakinyi tui kuamba’shi bantu ba sha lulamato babafuile ba ki nka beenyi mu nshibo ya Yehowa? (Tala dingi kifuatulo.)

⁷ Tui kuamba naminyi bua bantu ba sha lulamato babafuile? Tui kuamba’shi bano bantu ba ki nka beenyi mu nshibo ya Yehowa su?  Oolo! Buakinyi tui kuamba biabia? Muanda mu binangu bia Yehowa, bano booso baki’abatala. Yesu baadi mupatuule’shi: “Pa muanda wa kusanguka kua bafue, mpa na Moyise baadi muibileshe mu muisambo utale ebuula dia kaalo, p’ayitanyina Yehowa bu ‘Efile Mukulu a Abalahama, n’Efile Mukulu a Isaake, n’Efile Mukulu a Yakobo.’ Aye ta Efile Mukulu a bafue nya, kadi nga be na muwa, muanda kuadi, boso be na muwa.”—Luk. 20:​37, 38.

ATUPETAA MIABI KINYI NA ABITUNGU TUKITE KINYI?

8. Mmiabi kinyi y’atupetaa p’atue kuikala mu nshibo ya Yehowa?

⁸ Nka bu abikalaa nshibo ya binyibinyi bu mbalo ya kuikiisha na kukaluila bantu ku mianda i bungi, nshibo ya Yehowa ayikaluilaa beenyi baye ku masaku ooso alombene kuluisha kipuano kiabo naye, na kuibapa lukulupilo lua binyibinyi lua mafuku aafiki. Su tuashaala mu kipuano ki buwa na Yehowa, Satana t’anetukitshine muanda wa kuitukalakasha bua losoo nya. (Mis. 31:23; 1 Yo. 3:8) Mu nsenga ipia, Yehowa akatungunuka na kukaluila ba kuuku baye ba sha lulamato kushi nka penda mu kikudi kadi na ku lufu.—Kbf. 21:4.

9. Yehowa atekie’shi beenyi baye bekale na muikeelo kinyi?

⁹ Mu binyibinyi kino nyi nkineemo kikata kiatudi nakio kia kuikala mu nshibo ya Yehowa, kuamba’shi kusangeela kipuano kia pa bupenka kiatudi naye bua losoo. Abitungu tuikale na muikeelo kinyi su atukumiina kutungunuka na kuikala bu beenyi baye? Su muntu kampanda akuitanyina kuaye, okumiina kukita mianda ayimusankisha. Bu kileshesho, e kutengiela’shi okatushe bilaato kumpala kua kutuela mu nshibo, obe namu okumiina kuibikita. Mu mushindo umune, atukumiinaa kuuka kiakia akitekaa Yehowa kui baaba booso abakumiina kutungunuka na kuikala bu beenyi mu nshibo yaye. Kifulo kietu bua Yehowa akitutakulaa bua kukita kintu kioso ki’etutekie bua “kumusankisha mu mianda yoso.” (Kol. 1:10) Na nsaa y’atumono Yehowa bu Kuuku eetu, atumuiwuku dingi bu Efile Mukulu eetu na bu Nshetu, mulombene kineemo. (Mis. 25:14) Na uno muanda mu binangu, abitungu tuikale atumutshinyi efuku dioso, kushi kuluba kumupa kineemo kimulombene. Kino kineemo akiketukuasha buatudia kuikala na muikeelo ush’aumufitshisha munda. Abitungu tuikale binyibinyi na lukalo lua “kutambuka mu kuipeelesha n’Efile Mukulu eetu.”—Mik. 6:8.

YEHOWA BAADI AKITSHINA BENA ISALELE MIANDA KUSHI NTONDO

10-11. Yehowa baadi mukitshine bena Isalele mianda mu kabaaka ku muengie wa Sinayi bua kulesha’shi te na ntondo naminyi?

¹⁰ Yehowa akitshinaa beenyi baye mianda kushi ntondo. (Lom. 2:11) Tui kuuka bino’shi Yehowa te na ntondo, ku mushindo ubaadi mukitshine bena Isalele mianda mu kabaaka ku muengie wa Sinayi.

¹¹ Kunyima kua kutuusha muilo waye mu bupika mu Ejipitu, Yehowa baadi mutuule batshite muakuidi buabadia kufuba mu tabernakele. Baadi mupe bena Levi bushito bua kupasukila ingi midimo ya mu tabernakele. Yehowa baadi apasukila baaba babaadi abafubu mu tabernakele, sunga’shi baaba babaadi bashaale mu buipi muaye kukila bangi su? Nya! Yehowa te na ntondo.

12. Yehowa baadi muleshe’shi te na ntondo ku mushindo ubaadi mukitshine bena Isalele mianda mu kabaaka naminyi? (Efilu 40:38) (Tala dingi kifuatulo.)

¹² Muina Isalele ooso baadi na kia kuikala mu kipuano ki buwa na Yehowa sunga ekala’shi t’afubaa ku tabernakele sunga ekala mushaale kula na tabernakele. Bu kileshesho, Yehowa baadi mushinkamishe muilo ooso’shi ubaadi  na mushindo wa kumona ekumbi dia kilengieleeshi na kaalo kabaadi akayimana kunundu kua tabernakele. (Badika Efilu 40:38.) Nsaa ibaadi ekumbi adiibo bua kuenda lungi lupese, sunga baaba booso babaadi bashaale kula na tabernakele babaadi abedimono, ngi buakinyi booso babaadi abakongola bintu biabo na kushimuna tushibo tuabo tua mapema na kubanga luendo na bangi bantu booso pamune. (Mb. 9:​15-23) Booso babaadi abapusha mayi e bukopo a mpungi ibidi ilekeene bua kuukisha bantu nsaa ya kuilumbuula na ya kubanga luendo. (Mb. 10:2) Mu binyibinyi, kushaala peepi na tabernakele ta ngi kubaadi akulesha’shi muntu e mu kipuano ki buwa na Yehowa kukila baaba babaadi kula na tabernakele nya. Mu kuilekeena na biabia, muina Isalele ooso baadi mulombene kuikala muenyi a Yehowa na kuikala mushinkamishe’shi Yehowa amukunkusha na kumukaluila. Mu mushindo umune lelo uno, sunga tu’ekala bashaale mbalo kinyi, tui balombene kukuashibua na kifulo kia Yehowa, tuamona bi’etupasukila na kuitukaluila.

BILESHESHO BIA ANO MAFUKU EETU ABILESHA’SHI YEHOWA TE NA NTONDO

13. Lelo uno mmushindo kinyi umune ukuete Yehowa kulesha’shi te na ntondo?

¹³ Bangi ba munkatshi mua muilo w’Efile Mukulu mbashaale peepi na biro bietu bikata bia nsenga ishima sunga peepi na biro bia filiale bia Tumonyi tua Yehowa. Bua bangi binobino bakuete kufuba mu ano ma mbalo. Ngi buakinyi, bano bantu booso be kufuba midimo i bungi na kukuatshishena pa bupenka baaba bakuete kukunkusha. Dingi bangi bakuete kufuba bu bakunkushi ba bifunda sunga mu ingi mishindo ya mu mudimo wa nsaa yooso. Sunga tue munkatshi mua bano bantu be na ino nshalelo, ikala mushinkamishe’shi we nka muenyi a Yehowa na mmukufule. Na akuuku kalolo na akupa kioso kiodi nakio lukalo. (1 Mp. 5:7) Muilo ooso wa Yehowa aupetaa bidibua bia mu kikudi, bukunkushi, na bulami buabadi nabo lukalo.

14. Ngungi mushindo kinyi auleshaa Yehowa’shi te na ntondo bu biadi Muituitanyine?

 ¹⁴ Ungi mushindo aulesha Yehowa’shi te na ntondo bu biadi Muituitanyine lelo uno ngua’shi, bantu booso be mu nsenga be na mushindo wa kubadika Bible. Bifundue bi selele bia ku kibangilo bibaadi bifundibue penda mu ndimi isatu: Kiina Ebelu, Ki Arameya, na Kiina Greke. Baaba booso babaadi ababadika Bible mu ndimi ya ku kibangilo, babaadi mu kipuano ki buwa na Yehowa kukila baaba bangi bashi baadi bia kumubadika su? Nya, ta babaadi na kipuano ki buwa na Yehowa, kuibakila nya.—Mat. 11:25.

15. Nkinyi akishinkamisha’shi Yehowa te na ntondo? (Tala dingi kifuatulo.)

¹⁵ Yehowa t’ayitanyinaa muntu pa muanda wa’shi mulongie ngofu, sunga’shi auku ndimi ibaabadi bafunde Bible ku kibangilo nya. Anka mmutuule binangu biaye bua bantu booso mu nsenga ishima, kushi penda bua baaba balongie ngofu. Eyi diaye diyokielue, Bible, mbedialuule mu ndimi ikile pa kinunu, bua’shi bantu ba mu nsenga ishima bapete bukuashi ku malongiesha aatukila muanka na bawukie bia kufika bu ba kuuku b’Efile Mukulu.—2 Ti. 3:​16, 17.

TUNGUNUKA NA “KUKUMINYIBUA” NA YEHOWA

16. Muyile mukanda wa Bikitshino 10:​34, 35, tui kutungunuka na kukuminyibua na Yehowa naminyi?

¹⁶ Nyi kineemo kikata bu Abitukukila Yehowa bu beenyi mu nshibo yaaye ya mu kinfuanyi. E na kalolo kakile, Kifulo kikile, na mmuikale akukilaa beenyi ngofu mu mushindo wa kukaanya. Kukatusha biabia, akileesha’shi te na ntondo, etukukilaa booso kushii kutala mbalo yatudi bashaale, mushindo watudi bakule, kilongielo, elangi di’ekoba, kabila, bipua, na kushi kutala’shi awu mulume sunga’shi mukashi. Kadi muntu ooso akookiela ku mayi aaye a kulonda, akuminyibua bu muenyi mu nshibo yaaye.—Badika Bikitshino 10:​34, 35.

17. Mbalo kinyi yatudi balombene kupeta ingi mianda pabitale kuikala bu beenyi mu nshibo ya Yehowa?

¹⁷ Muyile Misambo 15:​1, Davide ebuesha ino nkonko ayilondo: ‘Yehowa nnanyi okayitanyina mu Nshibo yobe? Nnanyi mulombene nkashaala pa mwengye oobe wa kishila?’ Kayimba ka misambo baadi muyokielue bua kualuula ku ino nkonko. Muisambo aulonda atukesambila ingi mianda kantu pa kantu ayitungu’shi tukite buatudia kutungunuka na kukuminyibua na Yehowa.