1-2. Naasë Jehovah ta kai dee dinima fëën u de ko?

 EE WAN sëmbë bi o hakisi taa: „Unfa i ta si Jehovah?” Nöö kandë i bi o piki ën taa: ’Jehovah da mi Tata, mi Gadu, ku mi Mati.’ Kandë woto fasi dë fa i bi o kai Jehovah tu. Ma i ta si ën kuma wan sëmbë di kai i ko nëën pisi tu ö?

² Könu Dafiti bi tei di fasi fa Jehovah ta dë mati ku dee dinima fëën, maaka ku di fasi fa wan sëmbë ta libi ku wan sëmbë di a kai ko nëën pisi. A bi hakisi Jehovah taa: „Jehovah o, ambë seei sa ko tan ku i a di tenti fii? Ambë sa ko tan a di santa kuun fii?” (Ps. 15:1) Di tëkisi aki ta lei u taa u sa dë a di tenti u Jehovah. Hën da u ku ën sa ko dë mati. An ta bigi da i taa Jehovah kai u fuu ko a di tenti fëën u?

JEHOVAH KË FUU KO A DI TENTI FËËN

3. Ambë da di fosu sëmbë di Jehovah kai ko a di tenti fëën, nöö unfa Jehovah ku di sëmbë dë bi ta si deseei?

³ Jehovah bi dë hën wanwan ufö a mbei hii soni a mundu. Ma bakaten hën a mbei di fosu Womi Mii fëën. Ku gaan piizii seei Jehovah bi tei ën a di tenti fëën. Di Bëibel ta taki taa di Womi Mii fëën bi ta „mbei a ta piizii seei”. Boiti di dë, di fosu sëmbë di bi ko a di tenti fëën ’bi ta dë waiwai hii juu, u di a bi dë makandi ku Jehovah’.​—Nöng. 8:30.

4. Ambë ku Jehovah bi ko dë mati bakaten?

 ⁴ Bakaten Jehovah bi mbei woto ëngëli, hën a kai de ko a di tenti fëën tu. Di Bëibel ta kai dee ëngëli „dee womi mii u Gadu”, nöö a ta lei tu taa deseei ta wai u dë makandi ku Jehovah (Jöpu 38:7; Dan. 7:10). Dee ëngëli wanwan bi dë mati u Jehovah wan hii pisiten. Bakaten hën a mbei libisëmbë, nöö deseei ko dë sëmbë u di tenti fëën tu. Wantu u dee mati fëën aki da Enöku, Noa, Abahamu, ku Jöpu. Di Bëibel ta lei taa de ku Jehovah bi ko dë mati u di de bi ta piki hën buka.​—Ken. 5:24; 6:9; Jöpu 29:4; Jes. 41:8.

5. Andi u sa lei a di tjabukama woto di sikifi a Ezekiëli 37:26, 27?

⁵ Jehovah ta kai dee mati fëën u ko a di tenti fëën te kuma tide jeti. (Lesi Ezekiëli 37:26, 27.) Di tjabukama woto u Ezekiëli ta lei u taa Jehovah kë fëën ku dee dinima fëën dë gaan mati. A paamusi de taa a o mbei ’wan buka ku de taa a o libi fiifii ku de’. Di tjabukama woto dë ta taki soni u di pisiten ka dee salufuwan ku dee woto dinima u Jehovah o dë „wan kodo hipi” a di tenti fëën (Joh. 10:16). Di soni dë hën ta pasa nöunöu aki!

GADU TA SÖLUGU U ALUWASI TE KA U DË

6. Naasë di tenti u Jehovah dë, nöö andi u musu du fuu sa ko nëën?

⁶ A di Bëibel, wan tenti da wan kamian ka i sa go tjubi tjuba ku sonu, nasö ka i bi sa go böö dendu. Ee wan sëmbë ko a di tenti fii, nöö a o dë ku di mëni taa joo sölugu ën bunu. Te u buta u libi a Jehovah maun, nöö u ta ko a di tenti fëën (Ps. 61:4). U ta feni hii soni di u abi fanöudu fuu ku Jehovah ko dë möön gaan mati, söseei u ku dee woto sëmbë dee dë a di tenti fëën ta ko dë mati tu. Hii pei sëmbë u goonliba sa ko a di tenti aki. Kandë i bi go a wan gaan könklësi a wan woto köndë kaa, nöö i bi miti woto sëmbë di bi ta wai u di deseei dë a di tenti u Gadu tu. Di tenti aki dë u feni a hii së ka dee dinima u Jehovah dë.​—Ako. 21:3.

7. Faandi mbei u sa taki taa dee dinima u Jehovah dee lasi libi, dë a di tenti fëën jeti? (Luku di peentje tu.)

⁷ Unfa soni dë da dee dinima u Jehovah dee lasi libi? U sa taki taa de dë a di tenti u Jehovah jeti ö? Wë aai! Faandi mbei u sa taki sö? Wë u di dee sëmbë aki dë ku libi jeti a Jehovah wojo. Jesosi bi taki taa: „Mosesi seei bi lei a di woto ka a bi si di faja ta kisi a  di uwii, taa dee sëmbë dee dëdë o weki ko a libi baka. A bi taki taa Jehovah da ’di Gadu u Abahamu, di Gadu u Isaki, ku di Gadu u Jakopu’. An dë wan Gadu u dee sëmbë dee dëdë, ma a dë di Gadu u dee sëmbë dee dë a libi, biga hii de tuu dë ku libi jeti nëën wojo.”​—Luk. 20:37, 38.

U TA FENI WINI, MA U ABI WAN GAAN FAANTIWÖUTU TU

8. Un wini dee dinima u Jehovah ta feni, u di de dë a di tenti fëën?

⁸ Wan tuutuu tenti sa tjubi u da sonu ku tjuba, söseei a sa dë wan kamian ka u sa go böö dendu. Wë sö nöö di tenti u Jehovah ta tjubi u da hiniwan soni di sa mbei u ku ën an dë mati möön. Söseei a ta heepi u fuu sabi taa woo feni gaan bunu a di ten di ta ko. Ee u dë zuntu ku Jehovah, nöö Saatan an o sa du soni ku u di o hati u fu nöömö (Ps. 31:23; 1 Joh. 3:8). A di njunjun goonliba, Jehovah o tjubi dee dinima fëën go dou u dëdë an kii de, söseei u soni an mbei de ku ën poi.​—Ako. 21:4.

9. Unfa Jehovah kë taa dee sëmbë dee dë a di tenti fëën musu libi?

⁹ A dë wan gaandi seei u dë a di tenti u Jehovah, ka u ku ën o sa dë mati u nöömö. Ma andi u musu du fuu sa tan a di tenti u Jehovah? Wë, ee wan sëmbë kai i fii ko nëën pisi, nöö i bi o kë sabi unfa di sëmbë bi o kë fii libi. Kandë a bi o kë fii puu di susu fii ufö i denda go a wosu, nöö an dë u taki taa i bi o dë kabakaba u du andi a taki. Wë sö nöö u kë sabi andi Jehovah kë fuu du, sö taa u sa fika a di tenti fëën. U di u lobi Jehovah, mbei u kë du hii soni u mbei a fii bunu (Kol. 1:10). A dë sö tuu taa Jehovah da u mati, ma a dë di Tata fuu ku di Gadu fuu tu, nöö u musu abi gaan lesipeki dëën (Ps. 25:14). Wa musu fëëkëtë di soni dë möönsö, söseei wa musu fëëkëtë ambë Jehovah dë. Di soni dë o heepi u fuu wa du soni di o mbei a fii tjali. U kë du bunu soni, söseei u kë abi sakafasi fa u ta waka ku di Gadu fuu aki.​—Mik. 6:8.

JEHOVAH AN BI TA PAATI BËË A DI TEN U DEE ISAËLI SËMBË

10-11. Unfa di fasi fa Jehovah bi libi ku dee Isaëli sëmbë a di sabana u Sinai, ta lei taa an ta paati bëë?

¹⁰ Jehovah an lobi so u dee sëmbë dee a kai ko a di tenti fëën möön dee wotowan (Lom. 2:11). Te u luku fa Jehovah bi libi ku dee Isaëli sëmbë a di sabana u di pisiwata de kai Sinai, nöö u ta si taa an ta paati bëë.

¹¹ Baka di Jehovah bi puu dee sëmbë fëën a katibo a Egepiti, hën a bi buta mindima u wooko dëën a di tenti fëën. A bi buta dee Leifi sëmbë u du woto wooko a di tenti fëën tu. A dë sö taa Jehovah bi ta sölugu dee sëmbë dee bi ta wooko dëën a di tenti, ku dee bi ta libi zuntu ku di tenti fëën bunu möön dee woto sëmbë u? Wë, nönö! Jehovah an ta paati bëë.

12. Unfa di fasi fa Jehovah bi ta libi ku dee Isaëli sëmbë ta lei taa an ta paati bëë? (Ëkisodesi 40:38) (Luku di peentje tu.)

¹² Hiniwan u dee Isaëli sëmbë bi sa dë gaan mati u Jehovah, aluwasi ee de an bi ta du wan apaiti wooko dëën, nasö aluwasi ee de bi ta libi longi ku di tenti fëën. Jehovah bi mbei taa hii dee Isaëli sëmbë bi sa si di gaan bundji ku di gaan faja di a bi buta a di tenti fëën liba. (Lesi Ëkisodesi 40:38.) Te di gaan bundji bi ta bigi pusa go a wan woto kamian, nöö dee sëmbë dee bi dë te a longi seei bi ta si ën. A sö wan fasi de bi ta seeka  dee lai u de, söseei de bi ta booko dee tenti u de, nöö de bigi waka go ku dee wotowan (Nöb. 9:15-23). Hii sëmbë bi sa jei te de bi ta böö dee tu tutu, u mbei de sabi taa de o bigi waka (Nöb. 10:2). A dë gbelingbelin u si taa na te wan sëmbë bi ta libi zuntu ku di tenti u Jehovah, nöö di soni dë bi kë taki taa hën ku Jehovah bi dë gaan mati möön dee sëmbë dee bi ta dë a möön longi. Ma hii dee Isaëli sëmbë bi sa dë seiki taa Jehovah bi o ta tii de, söseei taa a bi o ta tjubi de. A di ten aki, Jehovah lobi u tu. A ta sölugu u, söseei a ta tjubi u, aluwasi naasë u goonliba u ta libi.

JEHOVAH AN TA PAATI BËË A DI TEN AKI TU

13. Faandi mbei u sa taki taa Jehovah an ta paati bëë a di ten aki tu?

¹³ A di ten aki, so u dee dinima u Jehovah ta libi zuntu ku di hedikantoo u dee Jehovah Kotoigi, nasö ku wan bëikantoo. Wotowan dë di ta wooko a dee kamian aki. Nöö an ta taanga da de u go a dee kamian aki te de ta hoi wan soni, nasö u miti ku dee sëmbë dee ta tei fesi. Wotowan dë tu di dë keling-gaanwomi, nasö di ta du di apaiti hii-ten diniwooko. Aluwasi ee ja abi na wan u dee gaandi aki, tökuseei i sa dë seiki taa Jehovah, di Sëmbë di kai u ko a di tenti fëën, lobi hii dee sëmbë dee a kai. Nöö a ta sölugu hiniwan u de (1 Pet. 5:7). Hii dee dinima u Jehovah ta feni dee soni di de abi fanöudu u de ku ën sa dë mati go dou. A ta tii de, nöö a ta tjubi de tu.

14. Andi da wan woto soni di ta lei taa Jehovah an lobi wan sëmbë möön wan wotowan?

¹⁴ Wan woto fasi fa Jehovah ta lei taa an lobi wan sëmbë möön wan wotowan, da di mbei a mbei taa hii sëmbë a goonliba sa lesi di Bëibel. Bigibigi di Bëibel bi sikifi a dii töngö nöö. Dee töngö dë da: Hebelejëntöngö, Alamëitöngö, ku Giikitöngö. A dë sö taa  dee sëmbë dee sa’ u lesi dee töngö dë wanwan nöö sa dë gaan mati ku Jehovah u? Wë, nönö.​—Mat. 11:25.

15. Andi ta lei u gbelingbelin taa Jehovah an lobi wan sëmbë möön wan wotowan? (Luku di peentje tu.)

¹⁵ Na u di u go a hei siköö, nasö u di u sabi dee dii töngö di di Bëibel bi sikifi a de bigibigi, mbei u ku Jehovah ko dë mati. Jehovah seti soni sö taa hii sëmbë sa ko sabi dee soni dee sikifi a di Wöutu fëën, aluwasi ee u go a hei siköö, nasö ee wa go a siköö. Di Bëibel puu ko a dusudusu töngö, sö taa hii sëmbë u goonliba sa ko sabi unfa de ku Jehovah sa ko dë mati.​—2 Tim. 3:16, 17.

NA KUMUTU A DI TENTI U JEHOVAH

16. Andi u musu du u Jehovah sa hoi u a di tenti fëën, te u luku Tjabukama 10:34, 35?

¹⁶ A dë wan gaandi seei taa Jehovah kai u ko a di tenti fëën. Jehovah da di möön bunu sëmbë di bi sa kai u ko nëën pisi. A abi bunufasi, a lo’ sëmbë, söseei a ta tei sëmbë ku wai nëën wosu. Boiti di dë, an ta paati bëë. Ma a ta kai hii sëmbë u ko a di tenti fëën, aluwasi naasë u goonliba u ta libi, aluwasi unfa de kiija u nasö na un siköö u go, aluwasi un mëni jaa u abi nasö un pei nasiön sëmbë u dë, nasö aluwasi ee u dë womi nasö mujëë. Ma dee sëmbë dee ta piki hën buka nöö a ta kai ko a di tenti fëën.​—Lesi Tjabukama 10:34, 35.

17. Naasë u sa feni woto soni di sa heepi u fuu sa dë a di tenti u Jehovah?

¹⁷ Dafiti bi hakisi Jehovah a Psalöm 15:1 taa: „Jehovah o, ambë seei sa ko tan ku i a di tenti fii? Ambë sa ko tan a di santa kuun fii?” Wë, Jehovah bi mbei Dafiti seei piki di hakisi aki a Psalöm 15. A di woto di ta ko, woo taki u wantu u dee soni dee u musu du, u Jehovah sa hoi u a di tenti fëën.