ARTÍCULO RÍ MUʼNIGAJMAA 23
AJMÚÚ 28 Gambaxulúʼ gajmiúlú Jeobá
Jeobá naʼthúlúʼ rí makuwáanʼ náa guʼwá xtíin ndrígóo
“Guʼwá xtíin ndrígóʼ marigá náa ikhiin, ikhúún mani̱ndxu̱ʼ Dios ndrígún” (EZEQ. 37:27).
EDXU̱U̱
Náa artículo rígi̱ mambáyulú mbuʼyáá rí gíʼdoo numuu makuwáanʼ náa guʼwá xtíin ndrígóo Jeobá ga̱jma̱a̱ mambáyulú mbuʼyáá itháán májánʼ xú káʼnii eñawunlú náa guʼwá xtíin ndrígóo.
1, 2. Ndiéjunʼ eʼthúún Jeobá xa̱bi̱i̱ bi̱ nuguajún jmbu rá.
Á MU mbáa narajxa̱a̱ʼ xú káʼnii tayáá Jeobá ikháán, mbáa matriʼña̱a̱: “Jeobá nindxu̱u̱ bi̱ nambájxu̱ʼ ga̱jmu̱ʼ, Anu̱ʼ ga̱jma̱a̱ Dios ndrígóʼ”. O mbáa majmaaʼ i̱ʼwáʼ título o marata̱ xóo kaʼnii. Mú, lá mbá míʼtsú nitatsaʼwáminaʼ ga̱jma̱a̱ numaaʼ ikháán xóo mbáa bi̱ ikhaa naʼthúu̱n dí maʼga náa goʼwóoʼ rá.
2 Rey David niʼni mbríguíi xóo nimbájxuu ga̱jma̱a̱ Jeobá, ga̱jma̱a̱ mbáa xa̱bu̱ bi̱ nagruiguíin eʼwíinʼ náa goʼwóoʼ. Ikhaa nirajxi̱i̱: “Tátá Jeobá, tsáá gáxtáa náa guʼwáaʼ rá. Tsáá gáxtáa náa kúbá kaʼwu ndrígáaʼ rá.” (Sal. 15:1.) Ajngáa rí nigumaraʼmáʼ naʼsngúlú rí ma̱ndoo makuwáanʼ náa goʼwóoʼ Jeobá, xóo muʼthá, ma̱ndoo mambájxulú gajmiúlú ikhaa. ¡Ra̱ʼkhá tháán nagui̱i̱ rígi̱!
JEOBÁ NANDOO RÍ MAKUWÁANʼ NÁA GOʼWÓOʼ
3. Tsáá nindxu̱u̱ timbáa bi̱ Jeobá nigruiguíi náa goʼwóo ga̱jma̱a̱ xú káʼnii nikumu̱u̱ mámbáa dí ikhiin rá.
3 Nákhá Jeobá xóó tségi̱ʼdu̱u̱ maʼniwíi xúgíʼ dí rígá, ikhaa nixtáa mbáwíí. Mú nda̱wa̱á niʼni̱i̱ A̱ʼdióo bi̱ giʼnii. ¡Ninindxu̱u̱ timbáa bi̱ nigruiguíi náa guʼwá xtíin ndrígóo ga̱jma̱a̱ ra̱ʼkhá tháán nidxuu ga̱jma̱a̱ numuu rígi̱! Náa Biblia naʼthí rí Jeobá ra̱ʼkhá tháán “nindoo kaʼyoo” A̱ʼdióo ga̱jma̱a̱ dí ikhaa nixtáa gagi náa ikhaa xúgíʼ mbiʼi (Prov. 8:30).
4. Tsíín nijkha raʼthún Jeobá rí maguwáʼ náa guʼwá xtíin ndrígóo rá.
4 Nda̱wa̱á Jeobá niʼniwíin ángeles ga̱jma̱a̱ niʼthúún rí makuwá náa guʼwá xtíin ndrígóo. Náa Biblia naʼthí rí nindxu̱ún “e̱ji̱i̱n Dios” ga̱jma̱a̱ nasngájmaa rí kúwíin gagi gajmiún Dios (Job 38:7; Dan. 7:10). Mbayuʼ tsiguʼ bi̱ i̱ndó nimbájxu̱u̱ gajmíi̱n Dios ninindxu̱ún bi̱ nikúwíin náa mekhuíí, mú nda̱wa̱á niʼniwíin xa̱bu̱ ga̱jma̱a̱ tikhuun dí ikhiin kúwá náa guʼwá xtíin ndrígóo. Tikhuun xa̱bi̱i̱ bi̱ niguájun jmbu bi̱ nikúwá náa guʼwá xtíin ndrígóo, ninindxu̱u̱ Enoc, Noé, Abrahán ga̱jma̱a̱ Job. Náa Biblia naʼthí rí ikhiin nimbájxu̱u̱n ga̱jma̱a̱ Dios o ‹nijngruigu̱u̱n ga̱jma̱a̱ Dios bi̱ gajkhun› (Gén. 5:24; 6:9; Job 29:4; Is. 41:8).
5. Ndiéjunʼ eʼsngúlú profecía dí na̱ʼkha̱ náa Ezequiel 37:26, 27 rá.
5 Mbayuʼ má tsiguʼ Jeobá naʼthúún bi̱ nambájxu̱u̱ gajmíi̱n rí makuwá náa guʼwá xtíin ndrígóo. Mbá xkri̱da, guʼyáá profecía ndrígóo Ezequiel 37:26, 27 (atraxnuu). Profecía rígi̱ naʼsngúlú rí Jeobá ra̱ʼkhá tháán nandoo rí xa̱bi̱i̱ bi̱ naguájun jmbu mambajxúu gajmíi̱n. Ikhaa naʼthí: “Mambanúʼ gajmíʼ dí makuwá tsímáá”. Profecía rígi̱ naʼthí ga̱jma̱a̱ numuu mbá mbiʼi índo̱ bi̱ naguáʼthi̱i̱n makuwá mekhuíí ga̱jma̱a̱ bi̱ naguáʼthi̱i̱n makuwá náa Ku̱ba̱ʼ makuwá mbá jnduʼ, ikhú “muwi̱i̱n mugu̱” (Juan 10:16). ¡Profecía rígi̱ nambánuu mbiʼi xúgi̱!
ASNDU NÁA MÁ KUWANLÚ JEOBÁ NAÑEWU̱NLÚ
6. Nguáná e̱jkha̱nú ekuwáanʼ náa guʼwá xtíin ndrígóo Jeobá ga̱jma̱a̱ náá rígá rá.
6 Nákhá wájyúuʼ mbá guʼwá xtíin nambáyúu xa̱bu̱ mbayáa jxu̱u̱ʼ ga̱jma̱a̱ mañewumínáʼ á mu nindxu̱u̱ mbiʼi mingíjyúuʼ. Ma̱ngaa índo̱ mbáa na̱jkha̱ náa guʼwá xtíin ndrígóo imba̱a̱, ma̱ndoo mbaʼyoo gajkhun rí mundriguíi májánʼ. Ikháanʼ natuʼulú náa guʼwá xtíin ndrígóo Jeobá índo̱ nuxnájximíjna̱ náa ikhaa (Sal. 61:4). Ikhí guáʼdáá mbá xúgíʼ dí ndayóoʼ mu mambájxulú májánʼ gajmiúlú Jeobá ga̱jma̱a̱ nambájxulú gajmiúlú bi̱ kúwá ikhí bi̱ Jeobá nigruiguíin. Guʼwá xtíin ndrígóo Jeobá náa naʼtúlúʼ muʼguá, nda̱a̱ náa mbá xuajin kiejuunʼ, guʼwá xtíin ndrígóo Jeobá ma̱ndoo marigá asndu náa má kúwá xa̱bi̱i̱ bi̱ naguajún jmbu á mu ikháanʼ nuʼni má xúʼko̱ ñajuunʼ, ma̱ndoo makuwáánʼlú náa guʼwá xtíin ndrígóo, tséʼniuu asndu náa má kúwáanʼ. Xígi̱ kaʼnii naguánu nduyáá a̱ngiu̱lú bi̱ nagún náa i̱mba̱ xuajin, mbáa mu magún náa mbá asamblea kiejuunʼ ga̱jma̱a̱ ikhí nuniʼnúnʼ eʼwíinʼ bi̱ kúwíin náa guʼwá xtíin ndrígóo Dios (Apoc. 21:3).
7. Ndíjkha ma̱ndoo muʼthá rí xa̱bi̱i̱ Jeobá bi̱ niguájun jmbu bi̱ nikháñún, kúwá má xúʼko̱ náa guʼwá xtíin ndrígóo rá. (Atayáá ma̱ngaa xtiʼkhu.)
7 Ndiéjunʼ gáʼni Jeobá ga̱jma̱a̱ numún xa̱bu̱ bi̱ niguájun jmbu bi̱ nikháñún rá. Lá kúwá má xúʼko̱ náa guʼwá xtíin ndrígóo Jeobá xá. Xúʼko̱, náá numuu nuʼthá rí xúʼko̱ rá. Numuu rí náa Biblia naʼthí rí Jeobá narmáʼáan májánʼ a̱jkiu̱u̱n kaʼñún, ikha jngóo ndaʼyoo rí kaʼníí xóó kúwá ruya. Jesús niʼthí: “Bi̱ nikháñun nagabiín, asndu Moisés niʼnirámáʼ rí ndiʼyoo náa xtáʼdu̱u̱ iná tsuwanʼ. Náa Jeobá niʼthúu̱n ‹Dios ndrígóo Abrahán, Dios ndrígóo Isaac ga̱jma̱a̱ Dios ndrígóo Jacob› Ikhaa nindxu̱u̱ Dios ndrígu̱ún bi̱ nduya raʼkháa bi̱ nikháñun, ikhaa ndaʼyoo rí xúgíinʼ ikhiin ka̱ʼníí xóó kúwá ruya” (Luc. 20:37, 38).
Ma̱ndoo muʼthá rí xa̱bi̱i̱ Jeobá bi̱ nikháñún kúwá xóó náa guʼwá xtíin ndrígóo. (Atayáá kutriga̱ 7).
XÚ KÁʼNII EMBÁYULÚ GA̱JMA̱A̱ NDIÉJUNʼ KAʼYULÚ MU̱ʼNI̱ RÁ.
8. Ndiéjunʼ rí májánʼ ekhánulú índo̱ kúwáanʼ náa guʼwá xtíin ndrígóo Jeobá rá.
8 Ikháá má xóo mbá guʼwá xtíin nañewu̱nlú náa mbiʼi mingíjyúuʼ, ga̱jma̱a̱ nindxu̱u̱ náa ma̱ndoo mbuya̱a̱ jxu̱lú. Guʼwá xtíin ndrígóo Jeobá nañewu̱nlú náa gamíi maʼni gachúu rí nambájxulú gajmiúlú ga̱jma̱a̱ naxnúlú mbá rí muguáʼthi̱i̱n nda̱wa̱á. Índo̱ nakuwáanʼ mijngii náa Jeobá, Gixa̱a̱ xáʼngo̱o̱ gaʼni rí mumíniiʼ kámuu (Sal. 31:23; 1 Juan 3:8). Ma̱ngaa náa numbaaʼ nuxi̱ʼ Jeobá mañewu̱u̱n má xúʼko̱ xa̱bi̱i̱ bi̱ naguájun jmbu, náa xúgíʼ rí gamíi maʼni gachúu rí nambájxu̱u̱ gajmíi̱n ma̱ngaa náa rí gamíi maʼni makhañún (Apoc. 21:4).
9. Ndiéjunʼ gíʼma mu̱ni̱ bi̱ kúwá náa goʼwóo Jeobá rá.
9 ¡Ra̱ʼkhá tháán mitsaanʼ rí Jeobá naniñulú rí makuwáanʼ náa guʼwá xtíin ndrígóo, rí naniñulú mambájxulú gajmiúlú ikhaa asndu kámuu! Mú, xú káʼnii gíʼma muʼni mu makuwáanʼ má xúʼko̱ náa guʼwá xtíin ndrígóo Jeobá rá. Á mu mbáa naʼthúlú rí muʼguá náa goʼwóo, manigulúʼ mbuʼyáá ndiéjunʼ gíʼthu̱u̱n ikhaa rí muʼni. Mbá xkri̱da, mbáa ikhaa maʼthúlú rí muraʼwíi chádúluʼ nákhá xóó tsétu̱ʼu̱lú ga̱jma̱a̱ ikháanʼ muʼni rí niʼthúlú. Ikháá má kayuuʼ bi̱ kuwáanʼ náa guʼwá xtíin ndrígóo Jeobá nandulúʼ mbuyáá ndiéjunʼ gíʼthún ikhaa rí muʼni mu makuwáanʼ má xúʼko̱ náa goʼwóoʼ. Nandulúʼ kuʼyáá wéñuuʼ ikha jngóo nuʼni tsiaki̱i̱ mu muʼni rí naniguuʼ (Col. 1:10). Gajkhun má rí Jeobá nindxu̱u̱ bi̱ nambájxu gájmiulúʼ, mú ikhaa ma̱ngaa nindxu̱u̱ Dios ndrígulú, Anu̱lú, bi̱ gíʼma mbuʼyamajkuíí (Sal. 25:14). Xámbumulú tsáá nindxu̱u̱ ikhaa, rí mbuyamajkuíí Jeobá nambáyulú mu xúʼni̱ mbá rí tsénigu̱u̱ʼ ga̱jma̱a̱ manindxu̱lú xa̱bu̱ guabaaʼ índo̱ gajngruigulú gajmiúlú ikhaa (Miq. 6:8).
JEOBÁ TÁRAʼWÍIN ISRAELITAS NÁA KU̱BA̱ʼ MIJXOOʼ
10, 11. Ndiéjunʼ xkri̱da esngájmulú ga̱jma̱a̱ numuu dí Jeobá tséraʼwíin xa̱bi̱i̱ rá.
10 Jeobá tséraʼwíin xa̱bu̱ bi̱ naʼthúún maguwáʼ náa goʼwóo (Rom. 2:11). Guʼyáá xú káʼnii niʼniún israelitas índo̱ nikúwíin náa ku̱ba̱ʼ mijxooʼ ndrígóo Sinaí.
11 Nda̱wa̱á rí Jeobá niʼni kríyaaʼ xuajñuu náa Egipto náa ninindxu̱ún ñumbáá, ikhaa nigíinʼ ndxajkun mu muñajunʼ náa guʼwá xtíin ndrígóo ma̱ngaa nixnúún levitas mu muñajunʼ náa guʼwá xtíin ndrígóo. Lá itháán májánʼ nixtie̱wu̱u̱n bi̱ niñejunʼ o bi̱ kúwá mijngii náa guʼwá xtíin ndrígóo xá. Na̱nguá, Jeobá mbrígún niñewu̱nʼ xúgíinʼ.
12. Xú káʼnii nisngájma Jeobá dí táraʼwíin israelitas náa ku̱ba̱ʼ mijxooʼ rá. (Éxodo 40:38; atayáá ma̱ngaa xtiʼkhuu.)
12 Xúgíinʼ israelitas ma̱ndoo mambájxuun májánʼ gajmiún Jeobá, tséʼniuu á mu nuñajunʼ náa guʼwá xtíin ndrígóo o na̱nguá, o á mu kúwíin mijngii o tsínguáʼ. Mbá xkri̱da Jeobá niʼni rí mbá xúgíinʼ xa̱bu̱ xuajin mbuyáá du̱u̱n ga̱jma̱a̱ aguʼ rí nakujmaa náa tsu̱du̱u̱ guʼwá xtíin (atraxnuu Éxodo 40:38). Ikha jngóo índo̱ du̱u̱n nagíʼdu̱u̱ najkha, xúgíinʼ ma̱ndoo mbuyáá tséʼniuu á mu kúwi̱i̱n mitsínguánʼ náa gíʼ guʼwá xtíin, ma̱ndoo murajxi̱i̱ dí kuáʼdáá, murajxi̱i̱ guʼwá náa kúwá, ga̱jma̱a̱ magún gajmiún eʼwíinʼ xa̱bu̱ xuajin (Núm. 9:15-23). Ikháá má kayuuʼ, xúgíinʼ xa̱bu̱ xuajin ma̱ndoo mudxawíín índo̱ mbaʼyóoʼ magún, numuu rí nawán kaʼwu ga̱jma̱a̱ gakhi̱i̱ a̱jma̱ trompeta dí plata (Núm. 10:2). Nakujmaa kaʼwu dí maraxtaa mijngii náa guʼwá xtíin, tsíyoo gáʼthúu̱n rí nambájxa̱a̱ʼ itháán májánʼ ga̱jma̱a̱ʼ Jeobá, numuu rí xúgíinʼ israelitas ma̱ndoo makuwá náa guʼwá xtíin ndrígóo Jeobá ga̱jma̱a̱ makánún ikha ndrígóo ga̱jma̱a̱ ikhaa má mañewu̱u̱n. Ikháá má rígá rí mbiʼi xúgi̱, tséʼniuu náa kuwáánʼlú Jeobá nandoo kaʼyulú, ndaʼyoo xóo kuwáánʼlú ga̱jma̱a̱ nañewu̱nlú.
Dí guʼwá xtíin ndrígóo Jeobá rígá náa ta̱pho̱o̱ xuajin nasngájmaa rí ikhaa tséraʼwíin xa̱bi̱i̱. (Atayáá kutriga̱ 12).
JEOBÁ TSÉRAʼWÍIN XA̱BU̱ RÍ MBIʼI XÚGI̱
13. Xú káʼnii esngájma Jeobá rí tséraʼwíin xa̱bu̱ rí mbiʼi xúgi̱ rá.
13 Tikhuun cristianos kúwíin mijngii náa guʼwá rí phú na̱ʼkha̱ ikha ndrígún testigos de Jeobá o mijngii náa mbá Betel ga̱jma̱a̱ nuyambáá ikhí. Rígi̱ naʼni rí mayambáá náa mbaʼa ñajunʼ dí narígá ikhí ga̱jma̱a̱ nuniʼnúuʼ a̱ngiu̱lú bi̱ nuñegún edxu̱u̱ náa ñajunʼ dí narígá ikhí. Ma̱ngaa tikhuun nindxu̱ún superintendente ndrígóo circuito o nuni kájxi̱ ñajuunʼ Jeobá. Mú, maski ajndu ikháán na̱nguá xtaa xígi̱ kaʼnii, ma̱ndoo matayaa rí Jeobá nagruiguíin náa guʼwá xtíin ndrígóo, ikhaa naʼni nuwíínʼ májánʼ ga̱jma̱a̱ maxnáʼ rí ndayáaʼ (1 Ped. 5:7). Xúʼko̱: Dios maxnáʼ ganitsu rí na̱ʼkha̱a̱ náa ikhaa, ikha ga̱jma̱a̱ mañewa̱a̱n xó má eʼni gajmíi̱n xúgíinʼ xa̱bi̱i̱.
14. Ndiéjunʼ i̱mba̱ esngájmulú rí Jeobá tséraʼwíin xa̱bu̱ índo̱ nagruiguíin náa goʼwóo rá.
14 I̱mba̱ xóo Jeobá esngájma rí tséraʼwíin xa̱bu̱ índo̱ naʼthúún maguwáʼ náa goʼwóo, nindxu̱u̱ rí naʼni dí xúgíinʼ xa̱bu̱ ma̱ndoo muraxnuu Biblia. Ajngáa rawuunʼ nigumaʼramáʼ náa mbá atsu ajngáa: Hebreo, arameo, ga̱jma̱a̱ griego. Lá rígi̱ eyoo gáʼthúu̱n rí bi̱ nuthi ajngáa rígi̱ nambájxu̱u̱n itháán májánʼ gajmiún Jeobá rá. Na̱nguá (Mat. 11:25).
15. Aratá i̱mba̱ xkri̱da ga̱jma̱a̱ numuu rí Jeobá tséraʼwíin xa̱bu̱ (atayáá ma̱ngaa xtiʼkhuu).
15 Jeobá raʼkháa i̱ndó naʼthúún mambajxúu gajmíi̱n bi̱ nigúun mitsídaanʼ escuela o bi̱ najmañún ajngáa rí nigumaraʼmáʼ Biblia, Jeobá tséxnún ku̱ma̱ i̱ndó xa̱bu̱ bi̱ ninigajma̱a̱, naxnún xúgíʼ xa̱bu̱ tséʼniuu ndiéjunʼ ninigajma̱a̱. Ajngáa rawuunʼ rí nindxu̱u̱ Biblia, najuiʼtájuíi náa itháán dí mil ajngáa. Ikha jngóo xúgíinʼ xa̱bu̱ ma̱ndoo majmañún rí nasngáa Biblia ga̱jma̱a̱ majmañún xóo mambajxúún gajmiún Dios (2 Tim. 3:16, 17).
Rí nijuiʼtájuíi Biblia náa mbaʼa ajngáa nasngájma rí Jeobá tséraʼwíin xa̱bu̱. (Atayáá kutriga̱ 15).
GÁKUWÁANʼ MÁ XÚʼKO̱ NÁA GOʼWÓO JEOBÁ
16. Tsíín nindxu̱ún bi̱ Jeobá naniñuuʼ makuwá náa guʼwá xtíin ndrígóo rá. (Hechos 10:34, 35.)
16 Ra̱ʼkhá tháán nagui̱i̱ rí makuwáanʼ náa guʼwá xtíin ndrígóo Jeobá. Numuu rí ikhaa májánʼ a̱jkiu̱u̱n, nandoo kaʼyulú ga̱jma̱a̱ nagruiguáanʼ májánʼ, ndáwáa i̱mba̱ xóo ikhaa. Tsérawánʼlú ga̱jma̱a̱ ikhaa nagruiguáanʼ xúgiáanʼ tséʼniuu má náá xuajñulú, xóo nigajáánʼ, rí niʼnigajmaa, xóo kaʼniáanʼ, tsigulúʼ o á mu nindxu̱lú xa̱bekha o gu̱ʼu̱. I̱ndó rí na̱nda̱ʼa̱a̱ rí mbuʼyamajkuíí ikha ndrígóo (atraxnuu Hechos 10:34, 35).
17. Ndiéjunʼ gúʼyáá náa i̱mba̱ artículo rá.
17 Náa Salmo 15:1 David nirajxi̱i̱ rígi̱: “Tátá Jeobá, tsáá gáxtáa náa guʼwáaʼ rá. Tsáá gáxtáa náa kúbá kaʼwu ndrígáaʼ rá.” Ga̱jma̱a̱ nda̱wa̱á Jeobá má niʼni rí ikhaa mariʼñaa. Náa i̱mba̱ artículo mbuʼyáá, ndiéjunʼ eyóoʼ muʼnimbánii mu makuwáanʼ má xúʼko̱ náa goʼwóo Jeobá.
AJMÚÚ 32 ¡Añajún níjniúu Dios!
