1-2. Ncoolwe nzi cilibedelede ncobajisi bakombi ba Jehova basyomeka?

 KUTI muntu umwi wamubuzya kuti, ‘Ino Jehova nguni kuli ndinywe?’ Inga mwamwiingula buti? Mulakonzya kwiingula kuti, ‘Jehova ngu Taata, ngu Leza wangu alimwi Mweenzuma.’ Alimwi ambweni kuli mazina aambi aabulemu ngomukonzya kubelesya kumupandulula Jehova. Nokuba boobo, sena alimwi mumubona kuba Sikumutamba?

² Mwami Davida wakakozyanisya Jehova kuli sikutamba, mpoonya bakombi bakwe basyomeka wakabakozyanisya kuli basikutambwa. Wakabuzya kuti: “O Jehova, ino nguni uukonzya kuba mweenzu mutente lyako? Ino nguni uukonzya kukkala mucilundu cako cisalala?” (Int. 15:1) Mumajwi aaya aakasololelwa amuuya, twiiya kuti tulakonzya kuba beenzu ba Jehova, nkokuti balongwe bakwe. Eelo kaka ncoolwe cilibedelede kutambwa a Jehova!

JEHOVA UYANDA KUTI TUBE BEENZU BAKWE

3. Ino nguni wakali mweenzu wa Jehova wakusaanguna? Alimwi ino bakali kumvwana buti?

³ Katanalenga cintu cili coonse, Jehova wakali aalikke. Mpoonya wakalenga Mwanaakwe simuzyalwaalikke. Aboobo, Jehova wakali mbuli Sikutamba iwakatamba mweenzu wakusaanguna mutente lyakwe alimwi wakakkomana kapati kucita boobo. Bbaibbele lyaamba kuti Jehova wakali ‘kumuyanda  kapati’ Mwanaakwe. Mweenzu wakwe wakusaanguna awalo wakali “kukkomana kapati kumbele [lya Jehova] ciindi coonse.”—Tus. 8:30.

4. Ino mbaani abambi bakaba beenzu ba Jehova?

⁴ Jehova wakalenga bangelo akubatamba kuti babe beenzu bakwe abalo. Bbaibbele lyaamba bangelo kuti “bana ba Leza” alimwi litondezya kuti balikkomene kuba anguwe. (Job. 38:7; Dan. 7:10) Kwamyaka minji kapati, beenzu ba Leza bakali buyo baabo mbaakali kukkala limwi kujulu. Mukuya kwaciindi, wakalenga bantu abalo ibakaba beenzu bakwe. Beenzu bakwe bakali kubikkilizya a Enoki, Nowa, Abrahamu alimwi a Jobu. Bbaibbele litondezya kuti bakali balongwe ba Jehova akaambo kakuti bakali kumumvwida.—Matl. 5:24; 6:9; Job. 29:4; Is. 41:8.

5. Ncinzi ncotwiiya kubusinsimi bwaambidwe ku Ezekieli 37:​26, 27?

⁵ Kuzwa kaindi, Jehova wazumanana kutamba balongwe bakwe kuba beenzu bakwe. (Amubale Ezekieli 37:​26, 27.) Mucikozyanyo, kwiinda mubusinsimi bwaambidwe mubbuku lya Ezekieli, twiiya kuti Jehova uyanda kuti bakombi bakwe basyomeka babe acilongwe ciyumu anguwe. Usyomezya kupanga “cizuminano caluumuno ambabo.” Businsimi oobu bwaamba ciindi aabo bajisi bulangizi bwakuyoopona kujulu alimwi abaabo ibajisi bulangizi bwakuyoopona anyika, nobayookamantana mutente lya Jehova lyamaambilambali kabali “tanga lyomwe.” (Joh. 10:16) Eeci cilacitika mazuba aano!

LEZA ULATULANGANYA KUFWUMBWA NKOTUBEDE

6. Mbuti muntu mbwakonzya kuba mweenzu mutente lya Jehova? Alimwi ino tente eeli lijanika kuli?

⁶ Mu Bbaibbele, tente bwakali busena muntu mwaakali kukonzya kulyookezyela alimwi akulikwabilila kukucinca kwambobuca. Mweenzu wakali kulangila kulanganizyigwa kabotu asikumutamba mutente. Ciindi notwakalyaaba kuli Jehova, twakaba mutente lyakwe lyamaambilambali. (Int. 61:4) Tulijisi zyoonse ziyandika kutegwa cilongwe cesu a Jehova ciyume alimwi tulijisi cilongwe abamwi ibakaba beenzu ba Jehova. Bantu mumasena oonse aamunyika balakonzya kuba beenzu mutente lyakwe. Kweelede kuti mwakaluunkide kale kucisi cimbi, ambweni kutegwa mukajanike kumuswaangano wacooko waalubazu. Mwakaakubonana abantu bakkomene akaambo kakuba mutente lya Leza. Kuti twamubelekela Jehova cakusyomeka tulakonzya kuba beenzu mutente lyakwe kufwumbwa nkotubede.—Ciy. 21:3.

7. Nkaambo nzi ncotukonzya kwaamba kuti bantu ibakafwa kabasyomeka bacili beenzu mutente lya Jehova? (Amubone acifwanikiso.)

 ⁷ Ino mbuti kujatikizya bantu bakali kusyomeka ibakafwa? Sena inga twaamba cakusinizya kuti bacili beenzu mutente lya Jehova? Inzya! Nkaambo nzi ncotwaambila boobu? Nkaambo kakuti Jehova ucibayeeyede. Jesu wakaamba kuti: “Makani aakuti bafwide bayoobuka, Musa awalo wakacisalazya mucibalo caamba citewo camamvwa, naamba Jehova kuti ngu ‘Leza wa Abrahamu a Leza wa Izaka a Leza wa Jakobo.’ Tali Leza wabafwu, pele ngwabaumi, nkaambo boonse mbaumi kulinguwe.”—Lk. 20:​37, 38.

MBUBOTU NZI MBOTUJANA ALIMWI NCINZI NCOTWEELEDE KUCITA?

8. Mbubotu nzi mbotujana akaambo kakuba mutente lya Jehova?

⁸ Tente lya Jehova lilabakwabilila beenzu bakwe kucintu cili coonse cikonzya kunyonganya cilongwe cabo anguwe alimwi akubapa bulangizi bwini-bwini bwakumbele. Ciindi notujisi cilongwe ciyumu a Jehova, kunyina cintu cili coonse Saatani ncakonzya kucita icikonzya kunyonganya cilongwe cesu a Jehova mane kukabe kutamani. (Int. 31:23; 1Joh. 3:8) Munyika mpya, Jehova uyoobakwabilila balongwe bakwe basyomeka ikutali buyo kumuuya pele alimwi akulufwu.—Ciy. 21:4.

9. Ncinzi Jehova ncalangila kuti kabacita beenzu bakwe?

⁹ Eelo kaka ncoolwe cilibedelede kuba mweenzu mutente lya Jehova, akaambo kakuti tulakonzya kuba acilongwe ciyumu anguwe, calo cinooliko lyoonse mane kukabe kutamani. Ncinzi ncotweelede kucita kutegwa tuzumanane kuba beenzu bakwe? Ikuti muntu umwi wamutamba kuŋanda yakwe, inga mwayanda kucita zintu zimukkomanisya. Mucikozyanyo, ulakonzya kulangila kuti mulalindila kutegwa mupegwe cuuno naa aakukkala. Tacidoonekwi buya kuti inga mwalindila. Mbubwenya buyo, andiswe tulayanda kuzyiba Jehova ncalangila kuli baabo ibayanda kuzumanana kuba beenzu mutente lyakwe. Luyando ndotujisi kuli Jehova lulatukulwaizya kucita kufwumbwa ncotukonzya kutegwa ‘tumukkomanisye cakumaninina.’ (Kol. 1:10) Masimpe kuti Jehova mulongwe wesu, pele alimwi ngu Leza wesu a Taata iweelela kupegwa bulemu. (Int. 25:14) Tatweelede kukaluba kaambo aaka alimwi lyoonse tweelede kumulemeka kapati. Kumulemeka kuyootugwasya kutacita zintu zikonzya kumunyemya. Tujisi makanze “akweenda cakulibombya” a Leza wesu.—Mik. 6:8.

JEHOVA WAKATONDEZYA KUTI TASALULULI MUNKANDA

10-11. Mbuti Jehova mbwaakabeendelezya bana Israyeli nobakali munkanda ya Sinai? Ino eeci citondezya buti kuti Jehova tasalululi?

¹⁰ Jehova ubeendelezya cakutasalulula beenzu bakwe. (Rom. 2:11) Tulakonzya kwiiya bube bwa Jehova oobu, ciindi notulanga-langa mbwaakeendelezya bana Israyeli nobakali munkanda ya Sinai.

¹¹ Naakamana kugusya bantu bakwe mubuzike mu Egepita, Jehova wakasala bapaizi kuti kababelekela mutente lyakukombela. Wakapa ba Levi kuti kabalanganya milimo imwi mutente lyakukombela. Sena Jehova wakali kubalanganya kabotu aabo ibakali kubelekela atente lyakukombela naa aabo ibakali kukkala afwaafwi, kwiinda baabo ibatakali kukkala mpawo naa ibakali kukkala kulamfwu? Peepe! Jehova tasalululi pe.

12. Ino Jehova wakatondezya buti kuti tasalululi ciindi bana Israyeli nobakali munkanda? (Kulonga 40:38) (Amubone acifwanikiso.)

¹² Muna Israyeli uuli woonse wakali kukonzya kuba acilongwe ciyumu a Jehova,  tacikwe makani amilimo njaakali kubeleka naa nkwaakali kukkala. Mucikozyanyo, Jehova wakali kuba masimpe kuti muna Israyeli uuli woonse wakali kukonzya kuubona musumpululu wakkumbi lyamaleele alimwi amusumpululu wamulilo atala aatente lyakukombela. (Amubale Kulonga 40:38.) Ciindi kkumbi nolyakali kutalika kweenda kuunka kubusena bupya, nobaba baabo ibakakkede kulamfwu atente lyakukombela bakali kukonzya kulibona, aboobo bakali kubunganya zintu zyabo, kumwaya matente aamikwasyi yabo mpoonya akutalika kweenda ankamu yabantu boonse. (My. 9:​15-23) Bantu boonse bakali kukonzya kumvwa kulila kwamyeembo yansiliva yobilo, calo cakali kubayeezya kuti bakeelede kutalika kweenda. (My. 10:2) Aboobo, akaambo buyo kakuti muntu wakali kukkala afwaafwi atente lyakukombela, tiicakali kwaamba kuti ngowakajisi cilongwe ciyumu a Jehova kwiinda baabo ibakakkede kulamfwu. Muciindi caboobo, muna Israyeli uuli woonse wakali kukonzya kuba mweenzu wa Jehova akuba masimpe kuti wakali kuyoomusololela alimwi akumukwabilila. Mbubwenya buyo amazuba aano, tacikwe makani ankotukkala, Jehova ulatuyanda, ulatulanganya kabotu alimwi akutukwabilila.

JEHOVA TASALULULI AMAZUBA AANO

13. Nkaambo nzi ncotunga twaamba kuti Jehova tasalululi amazuba aano?

¹³ Bamwi akati kabantu ba Leza mazuba aano, bakkala kufwaafwi amaofesi mapati naa kufwaafwi amitabi ya Bakamboni ba Jehova. Kumane bamwi babelekela mumasena aaya. Aboobo, balakonzya kutola lubazu mumilimo iicitwa mumasena aaya alimwi akuyanzana cacigaminina abaabo basololela. Ibamwi balabeleka kabali balangizi bamabazu naa mumbazu zimwi zyamulimo waciindi coonse. Nokuba kuti tacili boobu kulindinywe, mulakonzya kuba masimpe kuti mucili beenzu bakwe akuti ulamuyanda. Jehova ulimuzyi umwi aumwi kumugama. (1Pet. 5:7) Ulamupa cakulya cakumuuya mubelesi wakwe  umwi aumwi alimwi ulamusololela akumukwabilila.

14. Ninzila nzi aimbi Jehova mbwatondezya kuti ngu Sikututamba uutasalululi?

¹⁴ Nzila imwi Jehova mwatondezya kuti tasalululi nkwiinda mukupa kuti bantu munyika yoonse kababala Bbaibbele. Magwalo Aasalala akasaanguna kulembwa mumyaambo yotatwe: Chihebrayo, Chiaramu alimwi a Chigiriki. Sena aabo bacikonzya kubala Bbaibbele mumyaambo yakusaanguna mbambabo bakonzya kuba acilongwe ciyumu a Jehova kwiinda baabo batakonzyi? Peepe, tacili boobo.—Mt. 11:25.

15. Ncinzi citondezya kuti Jehova tasalululi? (Amubone acifwanikiso.)

¹⁵ Jehova tatutambi kuba balongwe bakwe akaambo buyo kakuti tuliyiide kapati naa akaambo kakuti tuliizyi myaambo yakusaanguna ya Bbaibbele. Jehova upa kuti busongo bwakwe buzyibwe kubantu boonse munyika, ikutali buyo kuli baabo bayiide kapati. Ijwi lyakwe Bbaibbele, lyasandululwa mumyaambo minji kapati; bantu boonse munyika balakonzya kugwasyigwa anjiisyo zijanika mulindilyo alimwi akwiiya mbobakonzya kuba balongwe ba Leza.—2Tim. 3:​16, 17.

AMUZUMANANE KUBA BANTU ‘BATAMBULIKA’ KULI JEHOVA

16. Kweelana alugwalo lwa Milimo 10:​34, 35, mbuti mbotukonzya kuzumanana kuba bantu batambulika kuli Jehova?

¹⁶ Ncoolwe cilibedelede kutambulwa a Jehova katuli beenzu bakwe mutente lyakwe lyamaambilambali. Ngusikutamba wiinda kutondezya luzyalo, luyando alimwi akusamausya. Kuyungizya waawo, tasalululi, ulatutambula toonse tacikwe makani tuli mwaalumi naa mukaintu, nkotukkala, mbotwakakomezyegwa, lwiiyo, mubala, musyobo naa ciimo. Nokuba boobo, Jehova utambula buyo baabo bamumvwida.—Amubale Milimo 10:​34, 35.

17. Nkookuli nkotuyoojana makani aambi aajatikizya mbotukonzya kuba beenzu mutente lya Jehova?

¹⁷ Kweelana ambokulembedwe ku Intembauzyo 15:​1, Davida wakabuzya kuti: “O Jehova, ino nguni uukonzya kuba mweenzu mutente lyako? Ino nguni uukonzya kukkala mucilundu cako cisalala?” Jehova wakabelesya Davida kupa bwiinguzi kumibuzyo eeyi iili ku Intembauzyo caandaano 15. Mucibalo citobela, tuyoolanga-langa zintu zimwi nzyotweelede kucita kutegwa tumukkomanisye Jehova alimwi akuzumanana kuba balongwe bakwe.