1-2. Jehova utamba bakombi bakwe basyomeka kuti bachiteenzi?

 KUTI UMWI wakubuzya kuti, ‘Umubona kalaani Jehova mubuumi bwako?’ Wayinoosandula kutyeni? Amwi walikunoowamba kuti, ‘Jehova nguTataangu, nguLeza wangu akuti Mweenzuma.’ Kulakonzeka kuti kuli aamwi mazina ngwayinoomwiitaawo. Nikuba oobo, kuli nwayinoowamba na kuti umubona kali Sikutamba wako?

² Mwaami Davida wakakozyanisya Jehova aSikutamba mpawo bakombi bakwe basyomeka wakabakozyanisya aabeenzu bakwe. Davida wakabuzya kuti: “O Jehova, ino nguni uukonzya kuba mweenzu mutente lyako? Ino nguni uukonzya kukkala mucilundu cako cisalala?” (Int. 15:1) Kuzwa kumajwi aaya, twiiya kuti tulakonzya kuba beenzu baJehova, nkukwaamba kuba beenzinyina bakwe. Nchilongezyo chipati kutambwa aaJehova.

JEHOVA UYANDA KUTI TUBE BEENZU BAKWE

3. Ngwani wakaba mweenzu waJehova wakusaanguna alubo Jehova amweenzu wakwe bakamvwa biyeni akubaamwi?

³ Jehova katanalenga zintu zyoonse, wakali aalikke. Mukuya kwachiindi, wakazoolenga Mwanaakwe wakusaanguna. Jehova wakaba mbuli Sikutamba wakatamba mweenzu wakwe wakusaanguna mutente lyakwe alubo wakabotelwa kuchita oobo. Bbayibbili lyaamba kuti Jehova wakali ‘kumuyanda kapati’ Mwanaakwe. Alubo mweenzu wakwe wakusaanguna, nkukwaamba  Jesu, anguwe ‘wakakkomana kapati kumbele lyaJehova ciindi coonse.’—Tus. 8:30.

4. Mbaani bamwi bakaba beenzu baJehova?

⁴ Mukuya kwachiindi, Jehova wakazoolenga ngilozi alubo wakazitamba kuti zibe beenzu bakwe. Ngilozi zyakwe zyaambwa kuti ‘mbana baLeza’ alubo zyaambwa kuti zilabotelwa kubaamwi aJehova. (Job. 38:7; Dan. 7:10) Kwaminyaka myiingi, beenzu baLeza bakali bakujulu kupela. Mukuya kwachiindi, wakazoolenga bantu alubo wakabatamba ambabo kuti babe beenzu bakwe. Bamwi babo ngu-Inokki, Nowa, Abbrahamu aJobu. Bakombi baJehova aaba basyomeka baambwa kuti mbeenzinyina baLeza naakuti ‘bakeenda aaLeza wakasimpe.’—Matl. 5:24; 6:9; Job. 29:4; Is. 41:8.

5. Twiiyaanzi kuzwa mubupolofita buli muli Ezekieli 37:​26, 27?

⁵ Kuzwa chiindi, Jehova ulikwiinkilila kunembo kutamba beenzinyina kuti babe beenzu bakwe. (Bala Ezekieli 37:​26, 27.) Muchikozyano, kuzwa mubupolofita bwa-Ezekkiyeli, twiiya kuti Leza uyanda kuti bakombi bakwe basyomeka babe aabweenzinyina buli aafwiifwi anguwe. Jehova usyomezya kuchita “cizuminano caluumuno ambabo.” Bupolofita oobu bwaamba chiindi aawo aabo bali aabulangilizi bwakuzooya kujulu abaabo bali aabulangilizi bwakuzoopona aanyika nibazoojatana akuba mutente lyaJehova lyakukozyanisya kabali “tanga limwi.” (Joh. 10:16) Chiindi eechino nchituli kupona nchinchicho chiindi chakaambwa mubupolofita bwa-Ezekkiyeli.

LEZA ULATULANGANIA KUFUMBWA NKUTUBEDE

6. Niinzi chipa kuti muntu akonzye kuba mweenzu mutente lyaJehova alubo tente lyaJehova lijanika kundawu iimwi kupela na?

⁶ Muchiindi chakalembwa Bbayibbili, bantu bakali kubelesya tente kuti bajane ndawu yakulyookezela akuti bakwabililwe kubwiime bwakunze. Chiindi muntu naakali kutamba mweenzinyina mutente lyakwe, mweenzu ooyo wakali kulangilila kuti sikumutamba amulanganie kabotu. Chiindi nitulipeda kuli Jehova, ngatwaba beenzu mutente lyakwe lyakukozyanisya. (Int. 61:4) Tuli aachakulya chamubukombi chiingi alubo tulamvwanana abamwi beenzu baJehova. Tente lyaJehova lyakukozyanisya talili aandawu iimwi kupela. Kulakonzeka kuti wakayinka kuliimwi nyika kuti ukanjile muswaangano wabbooma mpawo wakabonana aabamwi beenzu balikubotelwa kuba mutente lyaLeza. Eezi zitondeezya kuti tente lyaJehova lilajanika kufumbwa bakombi bakwe nkubabede.—Chi. 21:3.

7. Nkamboonzi nitukonzya kwaamba kuti bakombi baJehova bakafwa bachili beenzu mutente lyakwe? (Langa chifanikisyo.)

 ⁷ Kutegwani atala abakombi baJehova bakafwa? Bachili beenzu na mutente lyaJehova? Iiyi. Nkamboonzi nitukonzya kwaamba oobo? Nkaambo Jehova uchibayeeyede, kulinguwe bachili bawumi. Jesu wakaamba kuti: “Kunkani yakubusigwa kwabafwide, naaba Mozesi wakaziyubununa mumakani aali atala achiteyo chamaamvwa naakayita Jehova kuti ‘nguLeza wa-Abbrahamu aLeza wa-Izakka aLeza waJakkobo.’ NguLeza wabawumi kutali wabafwide pe nkaambo boonse mbawumi kulinguwe.”—Lk. 20:​37, 38.

ZILONGEZYO NZITUJANA AZINTU NZYAALANGILILA JEHOVA KUTI TUCHITE

8. Beenzu baJehova bagwasigwa biyeni akuba mutente lyakwe?

⁸ Mbuli tente mbulitugwasya kuti tujane ndawu yakulyookezela akutukwabilila kubwiime bwakunze, andilyo tente lyaJehova likwabilila beenzu bakwe kuti batapambanisigwi aazintu zipa kuti batabi aabweenzinyina anguwe alubo libagwasya kuti babe aabulangilizi bwachoonzyo. Kuti twakkala katuli aafwiifwi aJehova, Saatani taakwe nchakonzya kuchita pe kuti atuchise chakumaninina. (Int. 31:23; 1 Joh. 3:8) Munyika mpya, Jehova uzooyinkilila kunembo kukwabilila beenzinyina basyomeka kuzintu zipambanisya bweenzinyina bwabo alubo uzoobakwabilila kulufu.—Chi. 21:4.

9. Jehova uyanda kuti beenzu bakwe bachiteenzi?

⁹ Tuli aachilongezyo chipati chakuba beenzu mutente lyaJehova nkaambo tulakonzya kuba aafwiifwi anguwe kusikila kukabe kutamani. Niinzi nzitweelede kuchita kuti tukkale katuli beenzu baJehova? Kuti umwi muntu wakutamba kung’anda yakwe, kulakonzeka kuti anduwe nga uyanda kuziba zintu nzulangililwa kuchita kuti wayinka. Muchikozyano, amwi sikukutamba nga ulangilila kuti chiindi nwaasika aamuunzi wakwe, ulindile akupe chuuno, anduwe nga weelede kutobelezya nzyayanda. Munzila iikozyenie, tuyanda kuziba zintu Jehova nzyalangilila kuti beenzu bakwe bakkale kabachita. Kuyanda Jehova kupa kuti tuchite zyoonse nzitukonzya kuchitila kuti ‘tumubotezye munzila iizwide.’ (Kol. 1:10) Nichoonzyo kuti Jehova mweenzuma wesu, pesi atuzibe kuti nguLeza wesu alubo nguTaateesu weelela kuti tumulemeke. (Int. 25:14) Tatweelede kuziluba pe eezi alubo chiindi choonse tweelede kumulemeka kazizwa aansi aamoyo. Kumulemeka munzila eeyi kutugwasya kuti tutachiti zintu zimunyemya. Chiindi choonse, tuyanda ‘kweenda cakulibombya’ aLeza wesu.—Mik. 6:8.

JEHOVA TAKABASALUULA PE MA-ISRAYELI

10-11. Nzila Jehova njakabajataayo ma-Israyeli nibakali munkanda yaSinayi itondeezya biyeni kuti tasaluuli pe?

¹⁰ Jehova tabasaluuli pe beenzu bakwe. (Rom. 2:11) Tulazibona eezi munzila njakabajataayo ma-Israyeli nibakali munkanda yaSinayi.

¹¹ Chiindi Jehova naakanununa bakombi bakwe kuzwa mubuzike ku-Ijipita, wakasala bapayizi kuti babeleke aatente lyakukombela. MaLevi bakapegwa iimwi milimu yakuchita aatente lyakukombela. Jehova wakali kubabona kabayandikana loko na aabo bakali kubeleka aatente lyakukombela naakuti bakali kukkala aafwiifwi andilyo kwiinda bamwi? Peepe, Jehova tasaluuli pe.

12. Jehova wakatondeezya biyeni kuti taakali kubasaluula pe ma-Israyeli nibakali munkanda? (Kulonga 40:38) (Langa chifanikisyo.)

¹² Ma-Israyeli boonse bakali kukonzya kuba aabweenzinyina buli aafwiifwi aJehova kazitakwe ndaba kuti bakali kubelekela aatente  lyakukombela na naakuti pe alubo kazitakwe ndaba kuti bakali kukkala aafwiifwi atente lyakukombela na naakuti pe. Muchikozyano, Jehova wakaba aachoonzyo chakuti chisi choonse chama-Israyeli chakali kukonzya kubona chigambyo chamusumpuululu wajoba amusumpuululu wamulilo aajulu aatente lyakukombela. (Bala Kulonga 40:38.) Chiindi joba nilyakali kusaanguna kweenda kalitozya kulilimwi bbazu, nibaba aabo bakali kukkala kule loko atente lyakukombela bakali kukonzya kulibona, mpawo bakali kusaanguna kubamba zintu zyabo, kudilisya matente aabo akweendaamwi abamwi. (My. 9:​15-23) Ma-Israyeli boonse bakali kwiimvwa myeembo iibili yansiliva yakali kubazibisya kuti basaangune kulonga. (My. 10:2) Zilaantanganana kuti kukkala aafwiifwi atente lyakukombela teechakali chitondeezyo chakuti mu-Israyeli uli aabweenzinyina busimide loko aJehova kwiinda ooyo wakali kukkala kule andilyo. Pesi, ma-Israyeli boonse bakali kukonzya kuba beenzu baJehova alubo bakali kuba aachoonzyo chakuti Jehova ulabazulwida akubakwabilila. Munzila iikozyenie, mazubaano Jehova ulatuyanda, ulatulangania alubo ulatukwabilila kazitakwe ndaba kuti tukkala kuli.

JEHOVA TASALUULI PE NIKUBA MAZUBAANO

13. Jehova utondeezya biyeni kuti tasaluuli pe nikuba mazubaano?

¹³ Bamwi bakombi baLeza mazubaano bakkala aafwiifwi amawofesi mapati naakuti amawofesi aamitabi aaBakamboni baJehova. Bamwi babelekela kumawofesi aaya. Bantu aaba bachita milimu myiingi aandawu eezi alubo bamwi babelekaamwi abakwesu bazulwida. Bamwi mbalangizi bamabazu alubo bamwi bachita iimwi milimu yachiindi choonse iiyandikana. Kuti kutakkali aafwiifwi andawu eezi naakuti kutabelekeli mpawo naakuti kutali mumulimu wachiindi choonse uuyandikana, baachoonzyo chakuti Sikututamba, Jehova, ulabayanda boonse beenzu bakwe. Alubo Jehova ulikuzi kukupalama alubo ulakupa zintu  zyoonse nzuyanda. (1 Pet. 5:7) Jehova upa bakombi bakwe boonse chakulya chamubukombi alubo ulabazulwida akubakwabilila.

14. Njiili imwi nzila iitondeezya kuti Jehova tasaluuli pe?

¹⁴ Chimwi chikozyano chitondeezya kuti Jehova tasaluuli pe nchakuti ubaachoonzyo chakuti bantu boonse bajana Bbayibbili. Magwalo Aasalala akasaanguna kulembwa mumilaka iitatu iiswaanizya mulaka wachiHebberu, chi-Aramayikki achiGrikki. Aabo bakonzya kubala milaka eeyi yakabelesegwa kukulemba Bbayibbili mbabo bali aafwiifwi loko na aJehova kwiinda aabo batakonzyi kwiibala? Peepe, teembubo pe.—Mt. 11:25.

15. Mbuubuli bukamboni butondeezya kuti Jehova tasaluuli pe? (Langa chifanikisyo.)

¹⁵ Jehova tatutambi kuti tube beenzinyina akaambo kakuti tuli aalwiiyo lwaajulu naakuti tuzi milaka yakusaanguna yakabelesegwa kukulemba Bbayibbili. Pesi Jehova upa kuti bantu boonse bajane busongo bwakwe. Jwi lyakwe, Bbayibbili lyakasandululwa mumilaka myiingi kuchitila kuti bantu bali munyika yoonse bagwasigwe aanjiisyo zili mumo akuti bayiye mbubakonzya kuba beenzinyina bakwe.—2 Tim. 3:​16, 17.

KKALA ‘KUTAMBULIKA’ KULI JEHOVA

16. Kweendelana alugwalo lwa Milimu 10:​34, 35, niinzi chikonzya kutugwasya kuti tukkale katutambulika kuli Jehova?

¹⁶ Nchilongezyo chipati kuba beenzu mutente lyaJehova lyakukozyanisya. Jehova nguwe uulaaluzyalo aluyando kwiinda bantu boonse alubo nguwe uutambula beenzu kwiinda bantu boonse. Mukuyungizya, Jehova tasaluuli pe, ulatutambula toonse kazitakwe ndaba kuti tukkala kuli, tuli aamaponeno aali biyeni, tuli aalwiiyo luli biyeni, tuli bamusyobo uuli, twaambuula mulaka uuli, tuli aaminyaka iingane akuti tuli baalumi na naakuti tuli banakazi. Pesi aabo baswiilila milawu yakwe mbabo mbatambula kuti babe beenzu bakwe.—Bala Milimu 10:​34, 35.

17. Tuzoolanga-langaanzi muchiiyo chitobela?

¹⁷ Muli Intembauzyo 15:​1, Davida wakabuzya mibuzyo yakuti: “O Jehova, ino nguni uukonzya kuba mweenzu mutente lyako? Ino nguni uukonzya kukkala mucilundu cako cisalala?” Sintembawuzyo ooyu wakazulwidwa kuti asandule mibuzyo eeyi. Muchiiyo chitobela, tuzoolanga-langa zintu Jehova nzyayanda kuti tuchite kuchitila kuti tukkale katutambulika kulinguwe.