1, 2. ¿Niku kinkamakgamakglhtinanitan Jehová chu tuku kilhchanima uma?

 KOMO xkgalhskinka tuku litaxtu Jehová mimpalakata, max xkgalhtinanti: «Jehová kiʼamigo, kinTlat chu kiDios». O max xmaklakaskinti atanu tuku lilakgapaskan Jehová. Pero ¿xwanti pi xla xmalana akgtum chiki tiku tlan makgamakglhtinanitan?

² Mapakgsina David wa pi Jehová katalalin xlakskujnin xtachuna la chatum xmalana chiki katalalin tiku kamakgamakglhtinan kxchik. Xla wa: «Oh, Jehová, ¿tiku tlan natamakgxtakga kminchik? ¿Tiku tlan nalatama kxasanto misipi?» (Sal. 15:1). Umakgolh tachuwin nema Jehová malakpuwanilh David pi xwa, kinkamasiyaniyan pi tlan natanuyaw chu natawilayaw kxchik Jehová, uma wamputun pi tlan xʼamigos nalitaxtuyaw. ¡Uma lu lanka talakgalhaman!

JEHOVÁ LAKASKIN PI KATAWILAW KXCHIK

3. ¿Tiku pulana makgamakglhtinalh Jehová kxchik, chu la xlimakgkatsikgo xchatiykan?

³ Jehová xʼakstu xwi asta akxni tlawalh xapulana xtamalakatsukin. Wa xlakata tiku pulana makgamakglhtinalh kxchik wa xapuxku xKgawasa. ¡Chu Jehová lu paxuwalh akxni makgamakglhtinalh! Biblia wan pi Jesús “lu xmakgapaxuwa” Jehová chu wan pi xaKgawasa, Jesús, na lu xpaxuwa kxlakatin Jehová (Prov. 8:30).

4. ¿Tiku atanu kamakgamakglhtinalh Jehová kxchik?

 ⁴ Alh kilhtamaku, Jehová kamalakatsukilh atanu espíritus, ángeles, tiku na kawanilh pi xtanukgolh kxchik. Biblia kalimapakuwi «xkamanan Dios» chu lichuwinan pi xlakan lu xpaxuwakgo akxni xtawilakgo Jehová (Job 38:7; Dan. 7:10). Akglhuwa ciento kata, kajwatiya ángeles xʼamigos xlitaxtukgo. Pero titaxtulh kilhtamaku, Jehová kamalakatsukilh latamanin chu na kawanilh pi xtanukgolh kxchik. Makgapitsi umakgolh xlakskujnin tiku kgalhikgolh uma talakgalhaman wa Enoc, Noé, Abrahán chu Job. Akxni Biblia kalichuwinan umakgolh xlakskujnin Jehová, wan pi xʼamigos Dios litaxtukgolh o “talatamakgolh xaxlikana Dios” (Gén. 5:24; 6:9; Job 29:4; Is. 41:8).

5. ¿Tuku kinkamasiyaniyan tuku wan Ezequiel 37:​26, 27?

⁵ Chuna la titaxtunit kilhtamaku, Jehová chuntiya kamakgamakglhtinanit kxchik tiku xʼamigos litaxtukgo. Kaʼakxilhwi tuku lichuwinalh palakachuwina Ezequiel (kalikgalhtawakga Ezequiel 37:​26, 27). Tuku Ezequiel lichuwinalh kinkamasiyaniyan pi Dios lakaskin pi kskujnin tiku ni makgxtakgkgo xʼamigos kalitaxtukgolh. Jehová malaknulh pi xʼama katatlawa «akgtum talakkaxlan xla takaksni». Umakgolh tachuwin xʼama kgantaxtu akxni tiku kgalhkgalhimakgo nalatamakgo kʼakgapun chu tiku kgalhkgalhimakgo nalatamakgo kkatiyatni «kgamputum borregos» xlitaxtukgolh kxchik Jehová (Juan 10:16). Chu uma kgantaxtuma kkinkilhtamakujkan.

KAXANIKAWA NIKU LAMAW, JEHOVÁ KINKAKUENTAJTLAWAYAN

6. ¿Tuku kilhtamaku tanuyaw kxchik Jehová, chu niku wi uma chiki?

⁶ Makgasa kilhtamaku, kʼakgtum aktsu chiki nema xlitlawakanit lhakgat tlan xjaxkan, tlan xkasnankan chu kskgekgnankan. Chu akxni chatum lataman xmakgamakglhtinankan kʼakgtum aktsu chiki, liwana xkatsi pi xʼamaka maxkikan putum tuku xmaklakaskilh. Akinin tanuyaw kxchik Jehová akxni makamaxkiyaw kilatamatkan (Sal. 61:4). Anta kgalhiyaw lhuwa tuku matliwakglha kintakanajlakan chu akxtum katawilaw amakgapitsin tiku Jehová na kamakgamakglhtinanit kxchik. Pero ¿niku wi uma chiki? Ni kaj lakatum niku wi, wi kaxanikawa niku wilakgolh xlakskujnin Jehová. Chu makgapitsin kskujnin Jehová tiku ankgonit kʼalakatanu kachikinin, akxilhkgonit pi uma xlikana. Max akxni kilakgolh kʼakgtum asamblea, kalakgapaskgolh amakgapitsin latamanin tiku Jehová na kamakgamakglhtinanit kxchik (Apoc. 21:3).

7. ¿Tuku xlakata wanaw pi xlakskujnin Jehová tiku nikxni makgxtakgkgolh chu nikgonita chuntiya wilakgo kxchik? (Na kaʼakxilhti dibujo).

 ⁷ ¿Chu tuku tlan nawanaw xlakata xlakskujnin Jehová tiku nikgonita chu nikxni makgxtakgkgolh? ¿Chuntiya wilakgo kxchik? Chuna. ¿Tuku xlakata chuna wanaw? Biblia masiya pi xtachuna la nikxni nikgolh xlakata wilakgo kxtalakapastakni Jehová. Jesús lichuwinalh: «Pero xlakata nalakastakwanankgo tiku nikgonita, asta Moisés na masiyalh ktatsokgni xlakata aktsu kiwi nema xkgalhi xalhtukun, akxni limapakuwi Jehová “xDios Abrahán chu xDios Isaac chu xDios Jacob”. Xla ni xDioskan tiku nikgonita, wata xDioskan tiku staknankgo, xlakata kxlakatin putum staknamakgolh» (Luc. 20:​37, 38).

TASIKULUNALIN CHU TALAKGATAY

8. ¿Tuku tasikulunalin makglhtinanaw xlakata wilaw kxchik Jehová?

⁸ Xtachuna la kʼakgtum chiki tlan jaxaw, tlan kasnanaw chu tlan skgekgnanaw, xchik Jehová kinkamakgtayayan xlakata nitu nalaktlawa kintakanajlakan chu kinkamakgtayayan nakanajlayaw pi nakgalhiyaw tlakg xatlan latamat. Akxni ni tamakgatliniyaw Jehová, Satanás nila kinkatlawaniyan tuku Jehová nila nalakkaxtlawa (Sal. 31:23; 1 Juan 3:8). Chu kxasasti kakilhtamaku, Jehová chuntiya nakakuentajtlawa xʼamigos xlakata nitu nalaktlawa xtakanajlakan, chu linin nialhtu katikatlawanilh (Apoc. 21:4).

9. ¿Tuku kilitlawatkan tiku wilaw kxchik Jehová?

⁹ ¡Akgtum lanka talakgalhaman pi Jehová kinkamaxkinitan talakaskin natawilayaw kxchik chu chuna tlan natalalinaw putum kilhtamaku! Pero ¿tuku kilitlawatkan xlakata chuntiya natamakgxtakgaw kxchik Jehová? Komo wi tiku xkinkawanin pi xʼaw kxchik, xlakaskiw pi xkinkawanin tuku tlan xtlawaw xlakata tlan xtanuw. Akgtum liʼakxilhtit, max nalakaskin pi natatuxtunanaw, chu akinin xatapaxuwan chuna xtlawaw. Xtachuna la uma, tiku wilaw kxchik Jehová katsiputunaw tuku xla lakaskinaw pi natlawayaw xlakata chuntiya natamakgxtakgaw kxchik. Lu paxkiyaw chu wa xlakata tlawaputunaw putum tuku matlaniyaw xlakata namakgapaxuwayaw (Col. 1:10). Xlikana pi xla kiʼamigojkan, pero na kiDioskan chu kinTlatkan, chu lakgchan namaxkiyaw kakni (Sal. 25:14). Wa xlakata, nikxni kapatsankgaw tiku litaxtu Jehová. Xlakata ni makgalipuwamputunaw, nikxni katitlawaw tuku xla ni lakgati chu ankgalhin nalimasiyayaw pi “ni putum matlaniyaw” kxlakatin kiDioskan (Miq. 6:8).

NI KALAKSAKPAXKILH ISRAELITAS KDESIERTO

10, 11. ¿Tuku liʼakxilhtit limasiya pi Jehová ni kalaksakpaxki kskujnin?

¹⁰ Jehová nikxni kalaksakpaxkinit tiku kawani pi kaminkgolh kxchik (Rom. 2:11). Kalilakpuwaw la kalikatsinilh israelitas akxni xwilakgo kdesierto xalak Sinaí.

¹¹ Akxni lakgmaxtulh xkachikin kʼEgipto, Jehová kalaksakli makgapitsi lakchixkuwin xlakata sacerdotes xlitaxtukgolh chu kskujkgolh ktabernáculo. Na kalakgayawalh levitas makgapitsi taskujut kʼuma xasanto chiki. Pero uma ni wamputun pi Jehová tlakg xkakuentajtlawa tiku kskujkgo ktabernáculo o tiku lakatsu xwilakgo anta. Jehová putum lakxtum xkakuentajtlawa.

12. ¿La kalimasiyanilh Jehová israelitas pi ni laksakpaxkinan? (Éxodo 40:38; na kaʼakxilhti dibujos).

¹² Akxni israelitas xlamakgo kdesierto, putum tlan xʼamigos Jehová xlitaxtukgo; maski ni xlakgayakgo akgtum xlakaskinka taskujut o maski tlakg lakgamakgat xwilanikgo tabernáculo. Akgtum liʼakxilhtit, Jehová  tlawalh pi putum kachikin tlan xʼakxilhkgolh puklhni chu lhkuyat nema xtawila kxʼakpun tabernáculo (kalikgalhtawakga Éxodo 40:38). Wa xlakata, akxni puklhni xtsuku tatsuwi, putum israelitas, asta maski tiku tlakg lakgamakgat xwilanikgo tabernáculo, tlan xʼakxilhkgo, xmakikgo tuku xkatapakgsini, xlaktlawakgo laktsu xchikkan chu tlan akxtum xkataʼankgo amakgapitsin israelitas (Núm. 9:​15-23). Nachuna, putum tlan xkgaxmatkgo akxni xmakatsininankan pi xchanit kilhtamaku naʼankgo alakatanu, xlakata xmatasikan akgtiy trompetas nema xlitlawakanit plata (Núm. 10:2). Uma limasiya pi ni xtalakaskin pi chatum israelita lakatsu xtawilanilh tabernáculo xlakata tlan xtalalilh Jehová. Wata putum israelitas tlan xtawilakgolh kxchik Jehová, tlan xkapulalilh chu xla tlan xkakuentajtlawalh. La uku nachuna kitaxtu: kaxanikawa niku lamaw, Jehová kinkapaxkiyan, kinkakuentajtlawayan chu kinkamakgtakgalhan.

JEHOVÁ LIMASIYA LA UKU PI NI LAKSAKPAXKINAN

13. ¿La limasiya Jehová la uku pi ni laksakpaxkinan?

¹³ Makgapitsi natalan lakatsu wilakgo lata niku pulalinkan kintaskujutkan o lakatsu kʼakgtum sucursal. Makgapitsi asta makgtayanamakgo anta, chu uma kamaxki talakaskin namakgtlawakgo tipalhuwa taskujut nema tlawakan anta chu akxtum nakatatawilakgo natalan tiku pulalinkgo kintaskujutkan. Nachuna, makgapitsi superintendentes de circuito litaxtukgo o wi atanu tuku lakgayakgo kxkachikin Jehová. Pero lhuwa natalan ni kgalhikgo umakgolh tasikulunalin. Komo wix ni kgalhiya uma tasikulunalin, liwana kakatsi pi Jehová paxkiyan, makgamakglhtinanitan kxchik chu kuentajtlawayan (1 Ped. 5:7). Jehová namaxkiyan putum tuku maklakaskina, chuna la kamaxki putum amakgapitsin xlakskujnin. Namaxkiyan tuku nalimatliwakglha mintakanajla chu napulalinan.

14. ¿Tuku atanu tlawa Jehová nema limasiya pi ni kalaksakpaxki tiku kawaninit pi kaminkgolh kxchik?

 ¹⁴ Atanu la Jehová limasiya pi ni kalaksakpaxki tiku kawaninit pi kaminkgolh kxchik, wa pi mastanit talakaskin pi latamanin xalak tanu tanu kachikinin nakgalhikgo Biblia. XaSanto Tatsokgni tsokgwilika kʼakgtutu tachuwin: hebreo, arameo chu griego. ¿Tlakg tlan talalinkgo Jehová tiku katsinikgo likgalhtawakgakgo Biblia kʼumakgolh akgtutu tachuwin? Nichuna (Mat. 11:25).

15. Kalichuwinanti atanu tuku limasiya pi Jehová ni laksakpaxkinan (na kaʼakxilhti dibujos).

¹⁵ Xlakata Jehová tlan nakinkamakgamakglhtinanan, ni talakaskin nakatsiniyaw tachuwin nema xapulana xtsokgwilikanit Biblia chu ni kinkaskiniyan nakgalhtawakgayaw klaklanka escuelas. Jehová ni kajwatiya kamaxki xliskgalala latamanin tiku lhuwa kgalhtawakgakgonit, wata putum latamanin kamaxki. Xtachuwin, Biblia, matitaxtikanit klhuwa tanu tanu tachuwin. Wa xlakata latamanin xalak tanu tanu kachikinin tlan nakatsinikgo tuku masiya Biblia chu nakatsinikgo la xʼamigos Dios nalitaxtukgo (2 Tim. 3:​16, 17).

CHUNTIYA KATAMAKGXTAKGWI KXCHIK JEHOVÁ

16. ¿Tiku kamakgamakglhtinan Jehová kxchik? (Hechos 10:​34, 35).

¹⁶ Akgtum lanka talakgalhaman pi wilaw kxchik Jehová. Ni anan atanu tiku tlakg tlan kinkamakgamakglhtinanan kxchik nixawa Jehová. Xla lu kinkalakgalhamanan, tlan kinkalikatsiniyan chu kinkamaxkiyan putum tuku maklakaskinaw. Nachuna, xla ni kinkalaksakpaxkiyan, wata kimputumkan kinkamakgamakglhtinanan. Ni wa kuenta tlawa kinkilhtsukutkan, kinkachikinkan, kintalismaninkan, kincolorkan, kinkatakan, komo lhuwa kgalhtawakganitaw o ni, o komo puskat o chixku akinin. Kajwatiya kinkaskiniyan pi kakgalhakgaxmatwi xlimapakgsin (kalikgalhtawakga Hechos 10:​34, 35).

17. ¿Tuku naʼakxilhaw kʼatanu artículo?

¹⁷ Anta kSalmo 15:​1, David kgalhskilh Jehová: «Oh, Jehová, ¿tiku tlan natamakgxtakga kminchik? ¿Tiku tlan nalatama kxasanto misipi?». Chu alistalh, xlakata Jehová malakpuwanilh, David wa xatakgalhtin. Kʼatanu artículo naʼakxilhaw tuku chuntiya kilitlawatkan xlakata natamakgxtakgaw kxchik Jehová.