NHLOKOMHAKA LEYI DYONDZIWAKA YA VU 23
RISIMU 28 Ku Va Munghana Wa Xikwembu
Yehovha Wa Hi Rhamba Leswaku Hi Va Vaendzi Vakwe
“Tende ra mina ri ta va na vona, ndzi ta va Xikwembu xa vona.”—EZEK. 37:27.
LESWI HI NGA TA SWI DYONDZA
Nhlokomhaka leyi yi ta hi pfuna leswaku hi ya hi tlangela xirhambo xa Yehovha xo va vaendzi etendeni rakwe ro fanekisela ni ndlela leyi a hi khathalelaka hayona tanihi leswi a hi rhambeke.
1-2. I xirhambo xihi lexi Yehovha a xi nyikaka vagandzeri vakwe vo tshembeka?
YEHOVHA i yini eka wena? U nga ha hlamula u ku, ‘Yehovha i Tata wa mina, Xikwembu xa mina ni Munghana wa mina.’ Ku ni tindlela tin’wana leti Yehovha hi nga n’wi hlamuselaka hatona. Hambiswiritano, xana u n’wi teka tanihi loyi u nga n’wi endzelaka?
2 Hosi Davhida u fanise vunghana lebyi Yehovha a nga na byona ni vagandzeri Vakwe vo tshembeka ni vuxaka lebyi vaendzi va nga na byona ni loyi a va rhambeke. U vutise a ku: “Yehovha Xikwembu xanga, i mani la nga vaka muendzi etendeni ra wena? I mani la nga tshamaka entshaveni ya wena yo kwetsima?” (Ps. 15:1) Eka marito lawa lama huhuteriweke, hi dyondza leswaku hi nga va vaendzi va Yehovha, leswi vulaka ku va vanghana vakwe. Mawaku xirhambo xo tano!
YEHOVHA U LAVA HI VA VAENDZI VAKWE
3. A ku ri mani muendzi wo sungula wa Yehovha naswona havambirhi va titwa njhani?
3 Loko Yehovha a nga si tumbuluxa swilo, a a ri yexe. Kambe hi ku famba ka nkarhi, u amukele N’wana wakwe wa mativula etendeni rakwe ro fanekisela. Yehovha swi n’wi tsakisile ku endzeriwa. Bibele yi vula leswaku Yehovha a a n’wi ‘rhandza swinene’ N’wana wakwe. Kasi N’wana wakwe a a “tsakile emahlweni ka [Yehovha] nkarhi hinkwawo.”—Swiv. 8:30.
4. I vamani van’wana lava Yehovha a va rhambeke hi ku famba ka nkarhi leswaku va va vaendzi etendeni rakwe?
4 Yehovha u tumbuluxe tintsumi ivi na tona a ti rhamba leswaku ti va vaendzi vakwe. Tintsumi ti vitaniwa “vana va Xikwembu” naswona ku hlamuseriwa leswaku ti tsakile ku va na Yehovha. (Yobo 38:7; Dan. 7:10) Ku ringana malembe yo tala, vaendzi va Xikwembu a ku ri tintsumi. Hi ku famba ka nkarhi, xi pfumelele vanhu emisaveni leswaku va va vaendzi va xona. Van’wana va vaendzi volavo a ku ri Enoko, Nowa, Abrahama na Yobo. Vagandzeri volavo va ntiyiso va hlamuseriwe tanihi vanghana va Xikwembu kumbe lava fambeke “ni Xikwembu xa ntiyiso.”—Gen. 5:24; 6:9; Yobo 29:4; Esa. 41:8.
5. Hi dyondza yini eka vuprofeta lebyi nga eka Ezekiyele 37:26, 27?
5 Hi ku famba ka nkarhi, Yehovha u ye emahlweni a rhamba vanghana vakwe leswaku va va vaendzi vakwe. (Hlaya Ezekiyele 37:26, 27.) Hi xikombiso, eka vuprofeta bya Ezekiyele hi dyondza leswaku Yehovha u lava vagandzeri vakwe vo tshembeka va va ni vuxaka lebyikulu na yena. U tshembisa ku endla “ntwanano wo va ni ku rhula na vona.” Vuprofeta byolebyo byi vulavula hi nkarhi lowu lava nga ni ntshembo wo hanya etilweni ni le misaveni va nga ta va swin’we etendeni ra Yehovha ro fanekisela tanihi “ntlhambi wun’we.” (Yoh. 10:16) Lowu hi wona nkarhi wolowo!
XIKWEMBU XA HI KHATHALELA HINKWAKO LAHA HI NGA KONA
6. Munhu u va muendzi etendeni ra Yehovha hi ndlela yihi naswona tende Rakwe ri kumeka kwihi?
6 Emikarhini ya Bibele, tende a ku ri ndhawu leyi munhu a a kota ku wisa eka yona ni ku sirheleleka eka maxelo. Muendzi etendeni rero a a langutele leswaku loyi a n’wi endzeleke a n’wi khathalela. Loko hi nyiketela vutomi bya hina eka Yehovha, hi va vaendzi etendeni rakwe ro fanekisela. (Ps. 61:4) Hi tiphina hi ndzalo ya swakudya leswi humaka eRitweni ra Xikwembu ni ku tlhela hi kuma vanghana lava na vona va nga vaendzi va Yehovha. Tende rakwe ro fanekisela a ro va endhawini yin’we ntsena. Swi nga endleka u ye etikweni rin’wana kumbexana a wu ye enhlengeletanweni yo hlawuleka naswona u fike u hlangana ni vanhu lava na vona va nga etendeni ra Xikwembu. Ri kumeka kun’wana ni kun’wana laha ku nga ni vagandzeri va xona vo tshembeka.—Nhlav. 21:3.
7. Hikwalahokayini hi vula leswaku vanhu vo tshembeka lava feke va ha ri vaendzi etendeni ra Yehovha? (Nakambe vona xifaniso.)
7 Ku vuriwa yini hi vanhu vo tshembeka lava feke? Xana hi nga vula leswaku va ha ri vaendzi etendeni ra Yehovha? Ina! Hikwalahokayini hi vula tano? Hikuva Yehovha a nga va rivali, eka yena va ha hanya. Yesu u te: “Hambi Muxe u swi kombisile leswaku lava feke va ta pfuxiwa, emhakeni ya xihlahla xa mitwa, loko a vula leswaku Yehovha i ‘Xikwembu xa Abrahama, Xikwembu xa Isaka ni Xikwembu xa Yakobo.’ A hi Xikwembu xa lava feke, kambe i xa lava hanyaka, hikuva eka xona hinkwavo va hanya.”—Luka 20:37, 38.
Vanhu vo tshembeka lava feke va ha ri vaendzi etendeni ra Xikwembu (Vona ndzimana 7)
MIKATEKO NI LESWI LANGUTERIWEKE EKA VAENDZI VA YEHOVHA
8. Vaendzi va Yehovha va vuyeriwa njhani hi ku va etendeni rakwe?
8 Ku fana ni tende leri sirhelelaka munhu eka maxelo a tlhela a kota ku wisa endzeni ka rona, tende ra Yehovha ri sirhelela vaendzi vakwe eka leswi nga onhaka vuxaka bya vona na yena ni ku va nyika ntshembo. Loko hi tshama hi ri ekusuhi na Yehovha, Sathana a nge swi koti ku hi vavisa hilaha ku nga heriki. (Ps. 31:23; 1 Yoh. 3:8) Emisaveni leyintshwa, Yehovha u ta ya emahlweni a sirhelela vanghana vakwe vo tshembeka eka leswi nga onhaka vuxaka bya vona na yena ni le ka rifu.—Nhlav. 21:4.
9. Yehovha u langutele leswaku vaendzi vakwe va tikhoma njhani?
9 Hakunene i nkateko ku va vaendzi etendeni ra Yehovha hikuva hi kota ku va ni vuxaka lebyikulu na yena hilaha ku nga heriki. Hi fanele hi tikhoma njhani loko hi lava ku tshama hi ri vaendzi vakwe? Loko u rhambiwe ekaya ra munhu, u ta lava ku tiva leswi a swi languteleke eka wena. Hi xikombiso, a nga lava leswaku u hluvula tintangu u nga si nghena endlwini naswona u ta swi endla sweswo. Hilaha ku fanaka, hi lava ku tiva leswi Yehovha a swi languteleke eka lava lavaka ku tshama va ri vaendzi etendeni rakwe. Ndlela leyi hi rhandzaka Yehovha hayona yi hi susumetela ku endla hinkwaswo leswi nga ematimbeni ya hina leswaku hi “n’wi tsakisa hilaha ku heleleke.” (Kol. 1:10) Hambileswi hi tekaka Yehovha a ri Munghana wa hina, wa ha ri Xikwembu ni Tata wa hina loyi a faneriwaka hi ku xiximiwa. (Ps. 25:14) A hi fanelanga hi swi rivala sweswo, nileswaku mikarhi hinkwayo hi fanele hi n’wi xixima. Loko hi n’wi xixima hi ndlela yo tano, swi ta hi pfuna leswaku hi papalata ku n’wi khunguvanyisa. Hi navela ku “titsongahata” eka Xikwembu xa hina.—Mik. 6:8.
YEHOVHA A NGA VANGA NA XIHLAWUHLAWU EMANANGA
10-11. Ndlela leyi Yehovha a tirhisaneke hayona ni Vaisrayele emananga ya Sinayi yi swi kombise njhani leswaku a nga na xihlawuhlawu?
10 Yehovha u khoma vaendzi vakwe ku fana. (Rhom. 2:11) Sweswo hi swi vona eka ndlela leyi Yehovha a tirhisaneke ni Vaisrayele hayona emananga ya Sinayi.
11 Loko a ta va a tshunxe vanhu vakwe evuhlongeni eEgipta, Yehovha u hlawule vaprista leswaku va tirha etabernakeleni. U avele Valevhi ntirho wun’wana eka yona. Lava a va tirha etabernakeleni kumbe lava a va tshama ekusuhi na yona, xana Yehovha a a va khoma ku antswa ku tlula Vaisrayele lavan’wana? Doo! Yehovha a nga na xihlawuhlawu.
12. Ndlela leyi Yehovha a va khomeke hayona Vaisrayele emananga yi swi kombisa njhani leswaku a nga na xihlawuhlawu? (Eksoda 40:38) (Nakambe vona xifaniso.)
12 Muisrayele un’wana ni un’wana a a kota ku tiphina hi ku va munghana wa Yehovha swi nga ri na mhaka leswaku u tirha etabernakeleni kumbe u tshama ekusuhi na yona. Hi xikombiso, Yehovha u endle leswaku tiko hinkwaro ri kota ku vona papa ni ndzilo, leswi a swi ri ehenhla ka tabernakela. (Hlaya Eksoda 40:38.) Loko papa ri suka, hambi ku ri vanhu lava a va dzime mixaxa ekule swinene ni tabernakela a va kota ku ri vona, ivi va longalonga swilo swa vona ni ku hahlula mixaxa ya vona kutani va fambisana ni ntshungu. (Tinhl. 9:15-23) Vanhu hinkwavo a va twa mpfumawulo lowukulu wa timhalamhala timbirhi ta silivhere leti a ti lemukisa hinkwavo leswaku a va fanele va famba. (Tinhl. 10:2) Swi le rivaleni leswaku ku va munhu a tshama ekusuhi ni tabernakela a swi nga vuli swona leswaku u ni vuxaka lebyikulu na Yehovha. Ku ri na sweswo, Muisrayele un’wana ni un’wana a a kota ku va muendzi wa Yehovha ni ku tlhela a tiyiseka leswaku u ta kongomisiwa ni ku sirheleriwa hi Yena. Hilaha ku fanaka ni namuntlha, swi nga ri na mhaka leswaku hi tshama kwihi, Yehovha wa hi rhandza, wa hi khathalela ni ku tlhela a hi sirhelela.
Lunghiselelo ra Xikwembu ra tabernakela a ri kombisa leswaku a xi na xihlawuhlawu (Vona ndzimana 12)
NINAMUNTLHA YEHOVHA A NGA NA XIHLAWUHLAWU
13. Namuntlha Yehovha u swi kombisa hi ndlela yihi leswaku a nga na xihlawuhlawu?
13 Namuntlha van’wana va vanhu va Xikwembu va tshama ekusuhi ni ntsindza wa misava hinkwayo kumbe hofisi ya rhavi ra Timbhoni ta Yehovha. Kasi van’wana va tirha eka tindhawu leti. Hikwalaho ka sweswo, vanhu volavo va katseka eka mitirho yo tala leyi endliwaka etindhawini toleto naswona va tirha swin’we ni lava rhangelaka. Van’wana i valanguteri va miganga kumbe va le ka ntirho wo hlawuleka wa nkarhi hinkwawo. Hambiloko u nga ri un’wana wa vanhu lava, u nga tiyiseka leswaku Yehovha u rhandza vaendzi vakwe hinkwavo. U ku tiva kahle naswona u ku nyika leswi u swi lavaka. (1 Pet. 5:7) Vanhu va Xikwembu hinkwavo va kuma swakudya leswi humaka eRitweni ra xona, va kongomisiwa ni ku tlhela va sirheleriwa.
14. Hi yihi ndlela yin’wana leyi Yehovha a swi kombisaka hayona leswaku a nga na xihlawuhlawu?
14 Xikombiso xin’wana xa ndlela leyi Yehovha a nga riki na xihlawuhlawu hayona, hileswi a endlaka leswaku vanhu emisaveni hinkwayo va kota ku hlaya Bibele. Eku sunguleni, Matsalwa yo Kwetsima a ma tsariwe hi tindzimi tinharhu ku nga: Xiheveru, Xiaramu na Xigriki. Xana lava kotaka ku hlaya Bibele hi tindzimi leti eku sunguleni a yi tsariwe hatona, va ni vuxaka lebyikulu na Yehovha ku tlula lava nga swi kotiki? Doo, a swi tano.—Mat. 11:25.
15. I yini lexi kombisaka leswaku Yehovha a nga na xihlawuhlawu? (Nakambe vona xifaniso.)
15 Yehovha a nga hi rhambi ku va vanghana vakwe hileswi hi dyondzekeke kumbe hileswi hi tivaka tindzimi leti Bibele a yi tsariwe hatona eku sunguleni. Yehovha u nyika vanhu hinkwavo vutlhari byakwe emisaveni hinkwayo ku nga ri lava phendleke tibuku ntsena. Rito rakwe ku nga Bibele ri hundzuluxeriwe hi tindzimi ta magidi; hikwalaho, vanhu va kota ku vuyeriwa eka tidyondzo ta yona ni ku dyondza ndlela leyi va nga vaka vanghana va Xikwembu hayona.—2 Tim. 3:16, 17.
Hikwalahokayini ndlela leyi Bibele yi kumekaka hayona namuntlha yi kombisa leswaku Xikwembu a xi na xihlawuhlawu? (Vona ndzimana 15)
TSHAMA U RI KARHI U “AMUKELEKA” EKA YEHOVHA
16. Hi ku ya hi Mitirho 10:34, 35, hi nga tshama hi ri karhi hi amukeleka eka Yehovha hi ndlela yihi?
16 I nkateko lowukulu ku amukeriwa hi Yehovha tanihi vaendzi etendeni rakwe ro fanekisela. U ni musa, rirhandzu ni malwandla. Ku engetela kwalaho, a nga na xihlawuhlawu, wa hi amukela hinkwerhu swi nga ri na mhaka leswaku hi tshama kwihi, hi kurisiwe njhani, hi dyondzeke ku fikela kwihi, hi va rixaka rihi, hi ni malembe mangani kumbe hi va rimbewu rihi. Nilokoswiritano, u amukela ntsena lava yingisaka milawu yakwe leswaku va va vaendzi vakwe.—Hlaya Mitirho 10:34, 35.
17. Hi ta ri kuma kwihi rungula leri engetelekeke hi ku va muendzi etendeni ra Yehovha?
17 Hilaha swi tsariweke hakona eka Pisalema 15:1, Davhida u vutise a ku: “Yehovha Xikwembu xanga, i mani la nga vaka muendzi etendeni ra wena? I mani la nga tshamaka entshaveni ya wena yo kwetsima?” Mupisalema u huhuteriwe ku hlamula swivutiso sweswo. Nhlokomhaka leyi landzelaka yi ta vulavula hi swilo swin’wana leswi hi faneleke hi swi endla leswaku hi tshama hi ri karhi hi amukeleka eka Yehovha.
RISIMU 32 Yima Na Yehovha!
