SEMANA 23
PIREKUA 28 ¿Nénachi uá Jeobaeri amigueni?
Tata Diosï Jeobajtsïni pʼímarhisïndi imeeri kʼumanchikuarhu
“Imeechaksï juchiiti kʼumanchikuarhu jauati; ji jindeuaka imeecheeri Tata Diosï” (EZEQ. 37:27).
AMBE ENGACHI JORHENGUARHIAKA
I jorhenguarhikuajtsïni jarhuataati sánderu jukaparharani indeni kóntperata engachi jatsika parachi Tata Diosï Jeobaeri kʼumanchikuarhu pakarani ka ístujtsïni jarhuataati sánderu sési kurhanguni na engajtsïni ima iámindu ambe íntskujka imeeri kʼumanchikuarhu.
1, 2. ¿Nanijtsïni pʼímarhixaki Tata Diosï Jeoba?
ENGAKSÏNI nema kurhamarhipiringa: “¿Chá néna exesïni Tata Diosï Jeobani?”. Jamberijtsï arhiapiringa: “Tata Diosï Jeoba juchiiti amiguesti, juchiiti Taati ka juchiiti Tata Diosï”. O jamberijtsï máteru títuluechani úraapiringa ojtsï arhini na enga jásïika ima. ¿Joperujtsï arhipirini eskaksïni Tata Diosï Jeoba pʼímarhiska imeeri kʼumanchikuarhu?
2 Rei Dabidi uandaspti eska Tata Diosï Jeoba ísï sési pájperasïnga imeeri marhuariicha jingoni komueska ima kʼuiripu enga pʼímarhiajka máteruechani paraksï imeecho pakarani. Ka kurhamarhispti Tata Diosïni: “Oh Jeoba, ¿né uá jindeeni enga pakaraaka chíti tiendarhu? ¿Né uá irekani chíti pímbinhasï juátarhu?” (Sal. 15:1). I uandakuechajtsïni jorhendasïndi eskachi uaaka Tata Diosï Jeobaeri kʼumanchikuarhu pakarani, jo, uaakachi imeeri amigueni. Ka no ambe uéjkiniisti engajtsïni Tata Diosï Jeoba íntskuni jaka, ¿a no?
TATA DIOSÏ JEOBA UÉKASÏNDI ESKACHI IMEERI KʼUMANCHIKUARHU PAKARAAKA
3. ¿Tata Diosï Jeoba néni ueenaspi pʼímarhini imeeri kʼumanchikuarhu ka nénaksï pʼikuarherasïreeni tsimarhani?
3 Tata Diosï Jeoba jandiajku irekaxapti imeeri kʼumanchikuarhu ante de kueraani imeeri orheta Uájpani. Ka kánikua tsípispti pʼímarhini nemani para imeeri kʼumanchikuarhu jarhani. Biblia uandasïndi eska Tata Diosï Jeoba kánikua tsípisïreenga jima jatsini imeeri Uájpani ka ístu eska imeeri Uájpa kánikua “tsípikua jingoni jarhasïrenga imeri orhepatini” jimbo (Prov. 8:30).
4. ¿Tátsekua néni ka néni pʼímarhispi Tata Diosï Jeoba imeeri kʼumanchikuarhu?
4 Tátsekua, Tata Diosï Jeoba kuerauaspti máteru ánjeliichani o espirituechani, ka ístu pʼímarhiasti imeeri kʼumanchikuarhu. Biblia uandasïndi eskaksï i ánjeliicha Tata Diosïiri Uájpeeska ka eskaksï kánikua sési pʼikuarherasïreenga Tata Diosï Jeoba jingoni jarhani (Job 38:7; Dan. 7:10). Uánikua uéxurhiniichani jimbo, Tata Diosï Jeoba solu imeecheeri amiguespti engaksï imani jingoni irekapka auandarhu, jo ánjeliichani jingontku. Joperu ísï tátsekua kuerauaspti kʼuiripuechani ka ístu pʼímarhiaspti máru paraksï imeeri kʼumanchikuarhu jarhani. Máruksï jindeespti Enoki, Noé, Abraáni ka Jobu engaksï méntkisï kurhajchapka Tata Diosïni ka niáranksï jatsini indeni kóntperatani. Biblia uandasïndi eskaksï jindeespka Tata Diosïiri amiguecha o eskaksï Tata Diosï jurhimbiti jingoni jámasïreenga (Gén. 5:24; 6:9; Job 29:4; Is. 41:8).
5. ¿Ambechi jorhenguarhisïni ambe enga uandajka Ezequiel 37:26, 27?
5 Tata Diosï Jeoba no méni jurajkusti pʼímarhiani kʼuiripuechani paraksï imeeri kʼumanchikuarhu jarhani. Pori ejemplu ju je exeni ambe enga uandajka Ezequiel 37:26, 27 (arhinta je). I profesia uandasïndi eska Tata Diosï Jeoba uékasïnga eskaksï imeeri marhuariicha meru sési pájperaaka imani jingoni. Ima uandaspti eska pakatperakua ma úpiringa imeecha jingoni paraksï sési pájperani. I profesia jiáni kumplirikuarhipirindi engaksï erakukateecha ka imeecha engaksï Echerirhu pakaraaka májku kʼériksï japiringia imeeri kʼumanchikuarhu, ísï eskaksï karichiicha na májku kʼéri jarhajka (Juanu 10:16). Ka úsïngachi exeni eska inde ambesï úkuarhini jaka ini jurhiatikuechani jimbo.
NANI UÉJKICHI JARHANI TATA DIOSÏ JEOBAJTSÏNI KUÁJCHAKUSÏNDI
6. ¿Na jatinchi inchaakusïni Tata Diosï Jeobaeri kʼumanchikuarhu ka nani jarhaski inde kʼumanchikua?
6 Biblia uandaasïndi máru kʼumanchikuecheeri engaksï takusïiripka ka jindeesïreendiksï para mintsikuarhini ka para kuájchakukuarhini enga no sési jánhaskuarhipiringa klima jimbo. Ka enga nema indeni kʼumanchikuarhu pʼímarhinheenga, seguru jarhasïreendi eskaksï sési kámapiringa. Jiáni engachi aiakukuarhejka Tata Diosï Jeobani, inchaakusïngachi imeeri kʼumanchikuarhu (Sal. 61:4). Jiminchi kánikua sési pʼikuarherasïnga jimbokajtsïni Tata Diosï jorhendasïnga imeeri ambe ka ístuchi úsïnga imeecha jingoni jarhani enga Tata Diosï Jeoba pʼímarhiaka. ¿Joperu nani jarhaski inde kʼumanchikua? I kʼumanchikua no mápurkusï jati, jimboka imani lugariichanisï arhikuekaajka engaksï erachiicha ka pirenchiicha jaka engaksï kurhajchajka Tata Diosï Jeobani. Ka uánikuechaksï exekuarhistia eska inde ambe ísïiska, jimboka jiáni engaksï máteru paisi jimbo nípka, pori ejemplu kʼéri tánguarhikua espesiali ma jimbo, úsptiksï míteani máteru erachiichani engaksï ístu Tata Diosïiri kʼumanchikuarhu jaka (Apok. 21:3).
7. ¿Andichisï uandajki eskaksï imeecha engaksï méntkisï sési marhuakupka Tata Diosï Jeobani uarhinksïa útasïksï imeeri kʼumanchikuarhu jarhaska? (Ístu exe je imajenini).
7 Ka imeecha engaksï méntkisï sési marhuakupka Tata Diosï Jeobani ka engaksï uarhikia, ¿útasïksï imeeri kʼumanchikuarhu jarhaski? Jo. ¿Andichisï ísï uandajki? Jimboka Biblia uandasïnga eskaksï tsípiti jarhaska Tata Diosï Jeobaeri eratsekuarhu. Ka ístu tata Jesukristu uandaspti: “Moisési jamberi uandantasti eskaksï uarhiriicha tsíntaaka, jima enga anhatapu sapichueri ambe uandantajka, jiáni enga uandapka eska Jeoba jindeeska ‘Abraániiri Tata Diosï, Isaakiiri Tata Diosï ka Jakobueri Tata Diosï’. Ima no uarhiriicheeri Tata Diosïisti, sino imeecheeri engaksï tsípiti jaka, jimbokaksï iámindu imeecha tsípiti jarhaska para ima” (Luk. 20:37, 38).
Nájkirukaksï máru Tata Diosï Jeobaeri marhuariicha uarhikia, útasïksï imeeri kʼumanchikuarhu jarhasti. (Exe je párrafu 7).
AMBE ENGACHI JATSIKA PARA ÚNI KA NA ENGAJTSÏNI MARHUACHEJKA TATA DIOSÏIRI KʼUMANCHIKUARHU JARHANI
8. ¿Nénajtsïni marhuachesïni Tata Diosï Jeobaeri kʼumanchikuarhu jarhani?
8 Májkueni eska ióntki anapu kʼumanchikua ma takusïiri na marhuauenga paraka ma kuájchakukuarhipiringa ka para mintsikuarhini, Tata Diosï Jeobaeri kʼumanchikuajtsïni kuájchakusïndi parachi méntkisï úni sési pájperani imani jingoni ka parachi erokuarhini jarhani ambakiti ambe para sánderu orhepani. Ísï jimbo, engachi Tata Diosï Jeoba jingoni jarhajka, Satanásijtsïni no úsïndi imani ambe úchini enga Tata Diosï no uaaka sési peentani (Sal. 31:23; 1 Juanu 3:8). Ka jimbanhi parhakpinirhu, Tata Diosï Jeoba seguiriini jauati kuájchakuani imeeri amiguechani parakaksï seguiriini jauaka sési pájperani imani jingoni ka ístu paraka uarhikua no ma ambe úkuauaka (Apok. 21:4).
9. ¿Nénachi jatsiski para jámani Tata Diosï Jeobaeri kʼumanchikuarhu?
9 Kʼéri kóntperata máesti Tata Diosï Jeobaeri kʼumanchikuarhu jarhani, o sési pájperani imani jingoni para méntkisï. Joperu engachi uéjka útasï imeeri kʼumanchikuarhu jarhani, ¿nénachi jatsiski para jámani? Ju je exeni ejemplu ma. Engajtsïni nema pʼímarhipiringa imeo, uékapiringachi míteni néna jámani para ima no no sési exeni. Jamberi ima uéjkajti eska imeeri kʼumanchikua méntkisï limpiu jauaka. Ísï jimbo, ¿a no eskachi no uékapiringa jájtakukuni? Májkueni, iámindu jucha engachi Tata Diosï Jeobaeri kʼumanchikuarhu jaka uékapiringachi míteni néna jámani parachi úni seguiriini imeeri kʼumanchikuarhu jarhani. Jo, juchachi jánguarhintasïnga iámindu ambe ísï úni eska ima na jaiapanhentajka jimbokachi xénchasïnga (Kol. 1:10). Ka nájkiruka ima juchaari amigueka, ístu juchaari Tata Diosïisti ka juchaari Taati jimbochisï jatsika para kánikua janhanharhini (Sal. 25:14). Ísï jimbo, nóchi méni jatsiska para mirikurhini neeski ima. Engachi chénharhiska Tata Diosï Jeobani, nóchi méni uaaka imani ambe enga no sési pʼikuastaaka ka kaxumbikua jingonchi jámaaka imani japarini (Miq. 6:8).
IÁMINDUECHANI MÁJKUENI KAASPTI DESIERTURHU
10, 11. ¿Náki ejemplu xarhatasïni eska Tata Diosï Jeoba májkueni kaasïnga iámindu imeeri marhuariichani?
10 Tata Diosï Jeoba méntkisï májkueni kaasïndi imeechani engaksï imeeri kʼumanchikuarhu jaka (Rom. 2:11). Ísï úspti iámindu israeliteecha jingoni jiáni engaksï Sinaíri desierturhu pakarani japka.
11 Enga na petantapkia imeeri iretani Ejiptu uératini, Tata Diosï Jeoba erakuaspti saserdotiichani parakaksï tabernakulurhu marhuapiringa. Ístu arhiaspti lebiteechani eskaksï jima marhuapiringa paraksï máteru jásï ánchikuarhita ambe úni. ¿Jiájkani Tata Diosï Jeoba sánderu sési kuidariuasïreeni imeechani engaksï tabernakulurhu marhuani japka ka imeechani engaksï jima no iauani irekapka ka eska máteruechani? Nómbe, ima májkueni kaasïreendi iáminduechani ka kuájchakuani.
12. ¿Tata Diosï Jeoba néna xarhataspi eska májkueni kaaspka iámindu israeliteechani engaksï desierturhisï jámani japka? (Éxodo 40:38; ístu exea je imajeniichani).
12 Iámindu israeliteecha engaksï kampamenturhu japka, úpirindiksï Tata Diosï Jeobaeri amigueni náki uéjkiksï ánchikuarhita ma jatsini tabernakulurhu oksï jima no iauani irekani jarhani. Pori ejemplu, Tata Diosï Jeoba úspti eska iámindu ireta exepiringa nubeni ka ístu nube chpiriirini enga tabernakulurhu karhakua xarhareenga (arhinta je Éxodo 40:38). Ísï jimbo, jiáni enga Tata Diosï ueeneenga manatani nubeni para máteru naniisï móskuni, iáminduechaksï exesïreendi asta imeecha jamberi engaksï sánderu iauani japka tabernakulurhu uératini, ísïksï úsïreendi tákuarhintani iámindu ambe ka xereantanksï kʼumanchikuechani takusïiri paraksï úni iáminduecha mótsini (Núm. 9:15-23). Ka ístuksï iáminduecha úsïreendi kurhauani tsimani trompeteechani plateeri engaksï kústanheenga paraksï mótsinia (Núm. 10:2). Eskachi na exekia, tabernakulurhu no iauani irekani no arhikuekasïreendi eska ma sánderu ambakiti pájperakua ma jatsipiringa Tata Diosï Jeobani jingoni. Sánderu sési, iámindu israeliteechaksï úpirindi Tata Diosï Jeobaeri kʼumanchikuarhu jarhani, para ima jarhuataani ka para kuájchakuani. Ka májkueniisti iásï, nani uéjkichi irekani jarhani, Tata Diosï Jeobajtsïni xénchasïndi, jarhuatasïndijtsïni ka kuájchakusïndijtsïni.
Enga tabernakulu ísï terujkanikuarhu japka, xarhatasïreendi eska Tata Diosï Jeoba májkueni kaasïreenga iáminduechani. (Exe je párrafu 12).
IÁSÏJTU TATA DIOSÏ JEOBA MÁJKUENI KAASÏNDI IÁMINDUECHANI
13. Ini jurhiatikuechani jimbo, ¿néna xarhataxaki Tata Diosï Jeoba eska májkueni kaasïnga iáminduechani?
13 Máru erachiichaksï jima no iauani irekasti Kʼumanchikuarhu nani engaksï Interu Parhakpini anapu Jeobaeri Testiguecheri Ánchikuarhita Exejka o jima no iauani enga Beteli ma jaka. Ka máruksï indeni kʼumanchikuecha jimbo marhuaxati. Ka úsïndiksï mámaru jarhuajpeni ka májku kʼéri jarhani imani erachiichani jingoni engaksï indeni kʼumanchikuecharhu orhejtsïkujka. Ka máteru erachiichaksï sirkuitueri orhejtsïkutiisti oksï tiempu kompletueri marhuani jarhani. Joperu sáno iámindu erachiichaksï no úsïndi xárhati kóntperateechani jatsiani. Ísï jimbo, enga chá no jatsika xásï kóntperata ma, asï komu pʼikuarhera je, uaakajtsï seguru jarhani eskaksïni Tata Diosï Jeoba xénchasïnga, eska uékasïnga eska chá imeeri kʼumanchikuarhu jauaka, imaksïni kánikua sési mítesti ka íntskuatiksïni ambe engajtsï chá uétarhinchajka (1 Ped. 5:7). Jo, Tata Diosï Jeobaksïni jorhendaati imeeri ambe, jarhuataatiksïni ka kuájchakuatiksïni ísï eska na újka iámindu imeeri marhuariicha jingoni.
14. ¿Ístu néna xarhatasïni Tata Diosï Jeoba eska iáminduechani májkueni kaasïnga imeeri kʼumanchikuarhu?
14 Ístu, Tata Diosï Jeoba xarhatasïndi eska iáminduechani májkueni kaasïnga imeeri kʼumanchikuarhu jimboka úska eskaksï interu parhakpini anapuecha uaaka Bibliani jatsini. Ka nájkiruka Tata Diosïiri Karakata tanimu idioma jimbo karanhaka: ebreu, arameu ka griegu jimbo, ka jarhanksï kʼuiripuecha engaksï újka indeni idiomechani jimbo arhintani, inde ambe no arhikuekasïndi eskaksï imeecha uaaka sánderu sési pájperani Tata Diosï Jeoba jingoni (Mat. 11:25).
15. Uanda je máteru ambe enga ístu xarhatajka eska Tata Diosï Jeoba iáminduechani májkueni kaasïnga? (Ístu exea je imajeniichani).
15 Tata Diosï Jeoba no solu imeechani jaiapanheantasïndi engaksï ióni jámaka eskuelarhu, o engaksï újka arhintani Bibliani imani idiomechani jimbo enga karanhaka. Ima uékasïndi jarhuataani iáminduechani paraksï jánhaskatiini ia sea engaksï nika eskuelarhu o nómbe. Imeeri Karakata, Biblia, uánikua idiomeecha jimbo tradusirikuarhistia parakaksï nani uéjkisï anapu kʼuiripuecha uaaka jorhenguarhini imeeri ambe ka únksï Tata Diosïiri amigueni (2 Tim. 3:16, 17).
Biblia uánikua idiomechani jimbo tradusidu jarhasti, i ambe xarhatasïndi eska Tata Diosï Jeoba iáminduechani májkueni kaasïnga. (Exe je párrafu 15).
JU JE SEGUIRIINI TATA DIOSÏ JEOBAERI KʼUMANCHIKUARHU JARHANI
16. ¿Neechani jiókaasïni Tata Diosï Jeoba imeeri kʼumanchikuarhu? (Úkuecha 10:34, 35).
16 Kʼéri kóntperata máesti Tata Diosï Jeobaeri kʼumanchikuarhu jarhani. Nójtsïni nema xáni xénchasïndi eska ima, sésijtsïni kámani ka sésijtsïni erokani. Ima no exesïndi nani uéjkichi anapueni, na uéjkichi tʼarhexeranhani, sinchi niraski eskuelarhu o nómbe, na uéjkichi jatiriini o sinchi tatakeeski o nanakeeski, imajtsïni sési erokasïndi iáminduechani. Ambe engajtsïni kʼóru kurhachejka, jindeesti eskachi uaaka ambe engajtsïni ima juramuchijka imeeri kʼumanchikuarhu (arhinta je Úkuecha 10:34, 35).
17. ¿Ambechi exea máteru jorhenguarhikua jimbo?
17 Salmo 15:1 jimbo Dabidi ísï kurhamarhispti Tata Diosïni: “Oh Jeoba, ¿né uá jindeeni enga pakaraaka chíti tiendarhu? ¿Né uá irekani chíti pímbinhasï juátarhu?”. Ka tátsekua Tata Diosïiri jarhuajperata jimbo, ima mismu mókuantaspti ini kurhamarhikuechani. Máteru jorhenguarhikua jimbo, exenchi jauaka máru ambe engachi jatsika para úni parachi seguiriini Tata Diosï Jeobaeri kʼumanchikuarhu jarhani.
PIREKUA 32 ¡Jeobani jingoni jáma!
