EKICWEKA KY’OKWEGA 23
EKIZINA 28 Kuba Munywani wa Yahwe
Yahwe Naturaaliza Kufooka Bagenyi Be
“Nehema yange erabaga nabo; kandi ndiba Ruhanga wabu.”—EZ. 37:27.
EBITURAYEGA
Nitwija kurora omulingo tusobora kweyongera kusiima Yahwe habw’okuturaaliza kuba bagenyi omu heema ye ey’akokurorraho, n’omulingo atufaaho nk’abagenyi be.
1-2. Kuraalizibwa ki Yahwe okwarukuha abaheereza be abesigwa?
KAKUBA omuntu akukaguza ngu Yahwe n’omweta ota? Nosobora kumugarukamu ngu ‘Yahwe nuwe Ise nyowe, Ruhanga wange kandi Munywani wange.’ Haroho n’ebitiinisa ebindi rundi ebigambo eby’osobora kukozesa kubazaaho Yahwe. Baitu, haroho n’obw’omurora nk’ow’Akuraalize?
2 Omukama Daudi akalengesaniza enkoragana enungi hagati ya Yahwe n’abaheereza be abesigwa, n’ey’omuntu ow’abungisize hamu n’abagenyi be. Akakaguza ati: “[Yahwe], noha alirara omu hema yawe? Noha aliikara ha rusozi rwawe orurukwera?” (Zab. 15:1) Kusigikirra ha bigambo binu ebyaterekereziibwe omwoyo ogurukwera nitwega ngu nitusobora kufooka bagenyi ba Yahwe—ekirukumanyisa banywani be. Mali gunu tiguli mugisa gw’amaani kuraalizibwa Yahwe?
YAHWE NAGONZA TUBE BAGENYI BE
3. Nooha ow’akaba mugenyi wa Yahwe ow’okubanza, kandi Yahwe n’omugenyi we, bakehurra bata?
3 Yahwe obwakaba atakahangire, akaba ali wenka. Baitu akasumi kakahika, yatangirra Omwana we ow’okubanza omu heema ye ey’akokurorraho. Kikasemeza muno Yahwe kuhikiriza obujunanizibwa bwe obuhyaka obw’okubungisa Omwana we. Baibuli egamba ngu Yahwe ‘yasemererwaga muno’ habw’Omwana we. Kandi omugenyi we ow’okubanza, nauwe ‘akakyanganukira omu maiso ga [Yahwe] obutoosa.’—Nfu. 8:30.
4. Bantu ki abandi Yahwe abayaraalize kuba bagenyi omu heema ye?
4 Hanyuma, Yahwe akahanga bamalaika kandi nabo yabaraaliza kuba bagenyi be. Bamalaika be nibetwa ‘abaana ba Ruhanga’ kandi babazibwaho nk’abasemeriirwe habw’okuba na Yahwe. (Yob. 38:7; Dan. 7:10) Kumara akasumi enkoragana ya Ruhanga yagarukiraga hali abo abayaikaraga nabo omu iguru. Hanyuma, akahanga abantu kandi nabo bakaba nibasobora kufooka bagenyi be hanu omu nsi. Bamu h’abagenyi abo bakaba nubo Enoka, Nuha, Iburahimu, hamu na Yobu. Abaheereza ba Ruhanga abo ab’amananu bakeetwa banywani ba Ruhanga, rundi abantu abaagendaga “hamu na Ruhanga.”—Kub. 5:24; 6:9; Yob. 29:4; Is. 41:8.
5. Kiki ekiturukwegera ha bunabbi oburukusangwa omu Ezekyeri 37:26, 27?
5 Kumara emyaka nyingi, Yahwe akagumizaamu naraaliza abanywani be kufooka bagenyi be. (Soma Ezekyeri 37:26, 27.) Ekyokurorraho, kusigikirra ha bunabbi bwa Ezekyeri, nitwega ngu Ruhanga mali nagonza abaheereza be abesigwa kuba n’enkoragana enungi nauwe. Naraganiza “[kuragaana] nabo ekiragano ekyobusinge.” Obunabbi obu nububazaaho akasumi nambere abo abaine okunihira okw’okugenda omu iguru hamu n’abo abaine okunihira okw’okwomeera ebiro n’ebiro omu nsi baliba hamu omu heema ye ey’akokurorraho ‘nk’igana limu.’ (Yoh. 10:16) Kandi akasumi ako, nuko akaturumu!
RUHANGA ATUFAAHO KATUBE TULI NKAHA
6. Omuntu afooka ata mugenyi omu heema ya Yahwe, kandi eheema ye n’esobora kusangwa nkaha?
6 Omu busumi bwa Baibuli, eheema, kyali kiikaro omuntu ekiyahumurramuga kandi ekyamulindaga hali enyikara ez’obwire. Omugenyi obuyaijaga, ow’amubungisize yanihiirwamuga kumufaaho. Obutuhayo obwomeezi bwaitu hali Yahwe, tufooka abagenyi be omu heema ye ey’akokurorraho. (Zab. 61:4) Twegondeza omu byokulya ebingi eby’omwoyo, hamu n’okuba n’enkoragana enungi n’abo ababa bafookere bagenyi ba Yahwe. Eheema ye ey’akokurorraho, terukusangwa omu kiikaro kimu. Nosobora kuba wagenzere omu ihanga erindi obundi kuba ha rusorrokano orukooto orw’embaganiza, kandi wasangayo abantu abandi abaine okusemererwa habwokuba bali omu heema ya Ruhanga. Eheema ye nesobora kusangwa hoona nambere abaheereza be abamworobera bali.—Kus. 21:3.
7. Nitukimanya tuta ngu abantu abesigwa abaafiire bakyali bagenyi omu heema ya Yahwe? (Rora n’ekisisani.)
7 Baitu kandi obukirukuhika h’abaheereza be abesigwa abaafiire? Nitusobora kugamba ngu nabo bakyali bagenyi omu heema ya Yahwe? Ego! Habwaki nitugamba tuti? Habwokuba hali Yahwe, abantu nk’abo bakyali bomeezi. Yesu akagamba ati: “Baitu okuhumbuka okwabafu, na Musa akakwoleka ha Rusaka obuyayesere [Yahwe] Ruhanga wa Iburahimu, na Ruhanga wa Isaka, na Ruhanga wa Yakobo. Nukwo, tali Ruhanga wa bafu, baitu wabomezi: baitu bona bomiire habwe.”—Luk. 20:37, 38.
N’abantu abesigwa abaafiire nibasobora kuba bagenyi omu heema ya Ruhanga (Rora akacweka 7)
EBINTU EBIRUKWETAAGISA KUFOOKA BAGENYI BA YAHWE HAMU N’EBIRUNGI EBITWEGONDEZAAMU
8. Birungi ki ebitutunga habwokuba omu heema ya Yahwe?
8 Nk’oku eheema eya buli kiro esobora kuba kiikaro eky’okuhumurramu, n’okulinda abantu hali enyikara ez’obwire, n’eheema ya Yahwe erinda abantu hali ekintu kyona ekisobora kusiisa enkoragana yabo nauwe, kandi ebaha n’okunihira kwonyini okw’akasumi ak’omu maiso. Obutwikara haihi na Yahwe, Sitaani tasobora kutuhikyaho akabi ak’ebiro n’ebiro. (Zab. 31:23; 1 Yoh. 3:8) Omu nsi empyaka, Yahwe tarukwija kugarukira ha kulinda abanywani be hali akabi ak’eby’omwoyo kyonka, baitu na hali okufa.—Kus. 21:4.
9. Yahwe nanihirramu abagenyi be kwetwaza omu mulingo ki?
9 Mali guli mugisa gw’amaani kuba mugenyi omu heema ya Yahwe—kandi eki nikyo kuba n’enkoragana enungi nauwe kandi ey’esobora kwikaraho ebiro n’ebiro. Tusemeriire kwetwaza tuta obuturaaba nitugonza kwikara tuli bagenyi be? Kakuba omuntu akuraaliza omu ka ye, wakugondeze kumanya ebintu eby’osemeriire kukora omu ka ye bikamusemeza. Ekyokurorraho, nasobora kukunihirramu kwihamu enkaito zaawe otakataahire omu nju, kandi eki naiwe nikyo wakugondeze kukora. Omu mulingo nugwo gumu, naitwe nitugonza kumanya Yahwe ebyarukwetaagisa abo abarukugonza kugumizaamu bali bagenyi omu heema ye. Okugonza okutwiniire Yahwe kutuleetera kukora kyona ekirukusoboka kurora ngu twamusemeza omu bwijwire. (Bak. 1:10) Ky’amananu ngu Yahwe munywani waitu, baitu kandi ali Ruhanga waitu kandi Isiitwe outusemeriire kuteekamu ekitiinisa. (Zab. 25:14) Habw’ensonga egi, tusemeriire kwikara nitumuteekamu ekitiinisa, kandi tuteebwa ali muntu wa mulingo ki. Kumuteekamu ekitiinisa ekya mulingo ogu, nikiija kutukonyera kwetantara kukora ekintu kyona ekisobora kumubiihiza. Hataroho kugurukyagurukya, nitugonza “kugenda nobuculezi” na Ruhanga waitu.—Mik. 6:8.
YAHWE AKABA ATARUKUSOROORA ABAISALERI OMU IRUNGU
10-11. Yahwe akatwaza ata Abaisaleri omu irungu lya Sinai, kandi kinu nikyoleka kita ngu tasoroora?
10 Yahwe tasoroora abagenyi be. (Bar. 2:11) Kinu nitusobora kukimanyira ha mulingo yatwaizeemu Abaisaleri omu irungu lya Sinai.
11 Hanyuma y’okujuna abantu be kuruga omu bwiru omu ihanga lya Misiri, Yahwe akakoma banyakatagara kuheereza ha heema ey’okutangatanganiramu. Abalevi bakaheebwa obujunanizibwa obw’okukora emirimo endi ha heema egi ey’erukwera. Hati tugambe ngu abo abaheerazaaga ha heema ey’okutangatanganiramu, hamu n’abo abaikaraga haihi nayo Yahwe yabafaahoga muno kukira abandi? Nangwa! Yahwe tasoroora.
12. Ntekaniza ki ezirukutukonyera kukirora ngu Yahwe akaba atarukusoroora Abaisaleri? (Okuruga 40:38) (Rora n’ekisisani.)
12 Buli omu omu nkambi yayegondezaaga omu kuba n’enkoragana enungi na Yahwe, k’abe aine obujunanizibwa obw’embaganiza rundi nangwa, rundi k’abe naikara haihi n’eheema rundi hara nayo. Ekyokurorraho, Yahwe akakigumya ngu ihanga lyona likaba nirisobora kurora enyomyo ey’ekicu hamu n’enyomyo ey’omurro ebyabaga eruguru y’eheema. (Soma Okuruga 40:38.) Enyomyo ey’ekicu obuyatandikaga kugenda omu kiikaro ekihyaka, n’abo abaikaraga hara n’eheema baabaga nibasobora kugirora kandi bagendere hamu n’abantu abandi. (Kubar. 9:15-23) Boona baahurraga amaraka ag’engwara ibiri, ezaaterwaga kumanyisa abantu ngu basemeriire kutandika kugenda. (Kubar. 10:2) Nikyeyoleka kurungi ngu kwikara haihi n’eheema, tikyamanyisaga ngu oine enkoragana enungi na Yahwe kukira abandi. Oihireho, buli omu omu ihanga lya Yawhe linu erihyaka, akaba nasobora kuba mugenyi wa Yahwe kandi akigumye ngu Yahwe akaba namwebembera kandi namulinda. Omu mulingo nugwo gumu kasumi kanu katube nitwikara nkaha, nitukigumya ngu Yahwe natugonza, natufaaho, kandi natulinda.
Eheema ey’ekaba eri hagati y’enkambi bwali bwakaiso oburukwoleka ngu Yahwe tasoroora (Rora akacweka 12)
EBYOKURORRAHO EBY’AKASUMI KANU EBIRUKWOLEKA NGU YAHWE TARUKUSOROORA
13. Mulingo ki ogumu, Yahwe ogwayoleka ngu tarukusoroora kasumi kanu?
13 Bamu h’abantu ba Ruhanga kasumi kanu nibaikara haihi n’ekitebe ekikuru rundi haihi na ofiisi y’itaagi ey’Abakaiso ba Yahwe. Abandi bakorra omu biikaro ebyo. Ekirugamu, abantu nk’abo nibasobora kwejumbira omu mirimo nyingi ey’ekorrwa omu biikaro ebi kandi baba banywani b’ab’oruganda abarukwebembera. Abamu baheereza omu mulimo ogw’okubungira ebitebe rundi omu buheereza obundi obw’akasumi koona obw’embaganiza. Baitu n’obworaaba otali omu h’abantu banu, kigumye ngu Yahwe agonza abagenyi be boona, nakumanya kurungi kandi nakuha buli kimu kyona eky’orukwetaaga. (1 Pet. 5:7) Abantu ba Ruhanga boona batunga ebyokulya eby’omwoyo, oburagirizi, hamu n’obulinzi ebibarukwetaaga.
14. Kyokurorraho ki ekindi ekirukwoleka ngu Yahwe tasoroora?
14 Ekyokurorraho ekindi ekirukwoleka ngu Yahwe tasoroora omu kuraaliza kwe nukwo kukigumya ngu abantu boona omu nsi nibasobora kutunga Baibuli. Ha kubanza Ebyahandiikirwe Ebirukwera bikahandiikwa omu ndimi isatu: Oruheburaniya, Oruramaiki, hamu n’Oruyonaani. Hati tugambe ngu abo abarukusobora kusoma endimi Baibuli eziyahandiikirwemu ha kubanza, baine enkoragana enungi na Yahwe kukira abo abatarukusobora kuzisoma? Nangwa.—Mat. 11:25.
15. Bwakaiso ki obundi oburukukwata ha Baibuli oburukwoleka ngu Yahwe tasoroora? (Rora n’ekisisani.)
15 Yahwe taturaaliza kufooka banywani be ngu habwokuba tusomere muno rundi ngu habwokuba tumanyire endimi ezakozesiibwe omu kuhandiika Baibuli ha kubanza. Omu kiikaro ky’okuha amagezi ge abantu abasomere bonka, Yahwe akigumize ngu gahika hali abantu boona omu nsi yoona kababe basomere muno rundi nangwa. Ekigambo kye Baibuli, kihindwirwe omu nkumi n’enkumi z’endimi; nahabweki, abantu omu nsi yoona nibasobora kugasirwa omu nyegesa zakyo kandi bakafooka banywani be.—2 Tim. 3:16, 17.
Baibuli kuhindurwa omu ndimi nyingi kasumi kanu nikyoleka kita ngu Ruhanga tasoroora? (Rora akacweka 15)
IKARA ‘N’OSIIMWA’ YAHWE
16. Kusigikirra ha Engeso Ezabakwenda 10:34, 35, nitusobora tuta kwikara nitusiimwa Yahwe?
16 Guli mugisa gw’amaani kuba bagenyi ba Yahwe omu heema ye ey’akokurorraho. Nuwe arukukirrayo kimu embabazi, okugonza, hamu n’amakune. Ekindi, tarukusoroora, naturaaliza itwena katube nitwikara nkaha, nituraga nkaha, tusomere kwingana nkaha, tuli berangi ki, ruganda ki, twine emyaka ingaha, rundi tuli basaija, rundi bakazi. Baitu eki n’obukiraaba nukwo kiri, abo bonka aborobera endengo ze, nubo aikiriza kuba bagenyi be.—Soma Engeso Ezabakwenda 10:34, 35.
17. Ninkaha nambere turukwija kusanga ebintu ebirukukiraho ebirukukwata ha mulingo tusobora kuba bagenyi omu heema ya Yahwe?
17 Nk’oku kyolekerwe omu Zabuli 15:1, Daudi akakaguza ati: “[Yahwe], noha alirara omu hema yawe? Noha aliikara ha rusozi rwawe orurukwera?” Omuhandiiki wa zabuli akaterekerezebwa omwoyo ogurukwera kugarukamu ebikaguzo ebi. Ekicweka ekirukuhonderaho nikiija kubazaaho bimu ha bintu ebi ebitusemeriire kukora kusobora kusemeza Yahwe kandi tukaikara tuli banywani be.
EKIZINA 32 Heereza Yahwe n’Obwesigwa!
