1, 2. ¿Bintik majtanil ya yakʼbotik te Jehová?

 TE AYUK machʼa ya sjojkʼoybat, ¿bin awutoj te Jehová?, jichniwan ya awal: «Te Jehová Jaʼ Kamigo, jTat sok jDios». O ayniwan yan te bin-utʼil ya awalbey skʼoplal. Pero, ¿yabal awal te jaʼ te machʼa ya x-ikʼawan ta sna?

² Te ajwalil David la spajaltay te Jehová te bitʼil ya yil te j-abatetik te jun yoʼtan, jich bitʼil te machʼa ya x-ikʼawan ta sna te lek yiloj sba sok te machʼatik ya yikʼtiklane. Jich la sjojkʼoy: «Jehová, ¿machʼa ya xhuʼ ya xnahin ta chʼul Templo awuʼun? ¿Machʼa ya xhuʼ ya xnahin ta chʼul wits awuʼun?» (Sal. 15:1). Jaʼ ini ya yakʼ jnoptik te ya xjuʼ ya kamigointik te Jehová. ¡Jaʼ kʼax tʼujbil majtanil kuʼuntik!

TE JEHOVÁ YA YIKʼOTIK TA LUM YUʼUN

3. ¿Machʼa nail la yikʼ ta sna te Jehová, sok bin yaʼiyel la yaʼiy sba te Jehová sok te machʼa la yikʼ ta snae?

³ Te Jehová stukel ay-a jaʼto te kʼalal la spas te Jesús. Jich yuʼun, te sbabial te machʼa la yikʼ ta nailpakʼ yuʼun jaʼ te sNichʼane. ¡Kʼax tseʼelnax yoʼtan la yaʼiy sba te bitʼil ay machʼa la yikʼ ta sna te Jehová! Te Biblia ya yal te bayal yutsil yoʼtan te Jehová ta stojol te sNichʼan sok te machʼa la yikʼ ta snae spisil-ora tseʼel yoʼtan ta stojol te Jehová (Prov. 8:30).

4. ¿Machʼatik la yikʼtiklan ta nailpakʼ yuʼun te Jehová?

⁴ Ta patil te Jehová la spas yantikxan chʼul-abatetik sok jaʼnix jich la yikʼtiklan ta nailpakʼ yuʼun. Te Biblia ya yal te jaʼ «snichʼnab te Diose», sok ya yal te tseʼelnax yoʼtan ya yaʼiy sbaik ta stsʼeel te Jehová (Job 38:7; Dan. 7:10). Ta bayal jaʼbil, te Jehová jaʼnax la yamigoin te machʼatik kuxinemik ta chʼulchan. Ta patil la spastiklan te ants winiketik sok ay chaʼoxtul la yikʼtiklan ta nailpakʼ yuʼun. Tey ochem skʼoplalik  te j-abatetik te jun yoʼtanik jich bitʼil te Enoc, Noé, Abrahán sok te Job. Ta jujuntul la yamigoinik te Dios o beenik sok «te smelelil Diose» (Gén. 5:24; 6:9; Job 29:4; Is. 41:8).

5. ¿Bin ya yakʼ jnoptik te albilkʼop te ay ta Ezequiel 37:​26, 27?

⁵ Te jayebix jaʼbil kʼaxem tale, te Jehová la yikʼtiklan te yamigotak yuʼun ya xnainik ta sna. Jich ya jtatik ta ilel ta albilkʼop ta Ezequiel 37:​26, 27 (kʼopona). Te albilkʼop ini, ya yakʼ jnoptik te Dios ya skʼan te ya x-amigoinot yuʼun te j-abatetik te jun yoʼtanik. Te Jehová la yal ta jamal te ya spas «chapbil-cʼop scuenta lamal qʼuinal ta stojolic». Jaʼ ini ya xkʼot ta pasel kʼalal te j-abatetik te tsabilik te ya xbajtik ta chʼulchan sok te machʼatik ya xkuxinik ta Balumilal jich «jtsojbnax ya xkʼotik» ta nailpakʼ yuʼun (Juan 10:16). Te albilkʼop-abi, yak ta kʼoel ta pasel ta ora ini.

TE JEHOVÁ YA SKANANTAYOTIK CHIKAN BANTI AYOTIK

6. ¿Bin-ora ya x-ochotik ta nailpakʼ yuʼun te Jehová sok banti ay?

⁶ Ta namey kʼinal, jun nailpakʼ ya xkoltaywan yuʼun ay machʼa ya skux yoʼtan sok kanantaybil ya yaʼiy sba. Kʼalal ay machʼa ya yichʼ otsesel ta nailpakʼ, snaʼoj ta lek te ya xkanantayot sok te ya x-akʼbot te bin ya xtuun yuʼun. Te joʼotik ochotik ta «nahilpacʼ» yuʼun te Jehová te kʼalal la kakʼbeytik te jkuxlejaltik ta stojol (Sal. 61:4). Tey ya jtatik bayal weʼelil ta swenta schʼuunel koʼtantik sok te ya jokintik yantik ants winiketik te ikʼbilik yuʼun te Jehová. Pero, ¿banti ya xjuʼ ya jtatik te nailpakʼ ini? Jaʼ te banti ay te j-abatetik yuʼun Jehová te ya schʼuunik mantal, ma jaʼuknax ta jun lugar. Jich staojik ta ilel spisil te machʼatik baemik ta yan nación ta swenta jun mukʼul tsoblej, sok juʼem yuʼunik snaʼbeyel sba yantik ants winiketik te ayik ta nailpakʼ yuʼun te Dios (Apoc. 21:3).

7. ¿Bin yuʼun ya xjuʼ ya kaltik te machʼatik lajemikix ya xjuʼ ya xnainik ta nailpakʼ yuʼun te Jehová? (Jaʼnix jich ilawil te foto).

⁷ ¿Bin ya xjuʼ ya kaltik ta stojol te j-abatetik te lajemikix te jun yoʼtan la yakʼ sbaik ta stojol te Jehová? ¿Ayiktobal ta nailpakʼ yuʼun te Jehová? Ay. ¿Bin yuʼun te jich ya kaltik? Melel te Biblia ya yakʼ ta naʼel te kuxulik ta sit te Jehová. Te Jesús, jich la yal: «Ta swenta te chaʼkuxajel yuʼun te machʼatik lajemike, jaʼnix jich la yakʼ ta naʼel te Moisés te kʼalal la scholbey skʼoplal ta swenta te jpejt chʼixe, jich la  yal ta stojol te Jehová te jaʼ ‹Dios yuʼun Abrahán, Dios yuʼun Isaac sok Dios yuʼun Jacob›. Te Diose ma jaʼuk Dios yuʼun te machʼatik lajemikixe, jaʼ Dios yuʼun te machʼatik kuxulike, melel spisil kuxulik ta sit stukel» (Luc. 20:​37, 38).

TE LEKILAL YA JTATIK SOK TE BIN AY TA JWENTATIK SPASEL

8. ¿Bin lekilal ya jtatik te bitʼil ayotik ta nailpakʼ yuʼun te Jehová?

⁸ Jich bitʼil te ya skanantayotik te nailpakʼ sok te ya yakʼ te ya jkux koʼtantik tey-a, te nailpakʼ yuʼun te Jehová ya skanantay te schʼuunel koʼtantik sok ya yakʼbotik smukʼul koʼtantik. Kʼalal nopol ayotik ta stojol te Jehová, maʼyuk bin ya xjuʼ ya spasbotik te Satanás (Sal. 31:23; 1 Juan 3:8). Ta achʼ balumilal te Jehová ya xbajt skanantay te yamigotak te jun yoʼtanik ta swenta te bintik ya xjuʼ ya x-utsʼinbot te schʼuunel yoʼtanik, sok ma jaʼuknax ta swenta te lajele (Apoc. 21:4).

9. ¿Bin talelil ya skʼan ya yakʼik ta ilel te machʼatik ayik ta sna te Jehová?

⁹ ¡Jaʼ jun mukʼul majtanil kuʼuntik te ya yakʼ x-ayinotik ta nailpakʼ yuʼun te Jehová sok te ya jmulantik yamigoinel ta sbajtelkʼinal! Teme ya jkʼantik te ya x-ayinotik ta sna te Jehová, ¿bintik talelil ya skʼan ya kakʼtik ta ilel? Teme ay machʼa ya yikʼotik ta sna, ¿mabal jichuk te ya jkʼantik te ya yalbotik te bin ya skʼan ya jpastike? Yaniwan skʼan te ya jlokʼestik te jteptik o jxanabtik, sok ya jpastik sok spisil koʼtantik. Jaʼnix jich te joʼotik te ayotik ta sna te Jehová ya jkʼan ya jnaʼtik te bin ya smaliy te ya jpastik yuʼun ya x-ayinotik ta nailpakʼ yuʼun. Kʼux ta koʼtantik, jaʼ yuʼun ya jpastik tulan yuʼun lek ya yil spisil te bintik ya jpastik (Col. 1:10). Melelnix-a te kamigotik te Jehová, pero jaʼnix jich jaʼ jDiostik sok jTatik, jaʼ yuʼun snujpʼ te ya kichʼtik ta mukʼe (Sal. 25:14). Jaʼ yuʼun-abi, ma skʼan ya xchʼay ta koʼtantik machʼa-a te Jehová. Te xiʼel te Jehová ya skoltayotik yuʼun ya jpʼajtik biluk talelil te ya xjuʼ ya kakʼbeytik smel yoʼtan yuʼune, sok ya skʼan te pekʼel ya kakʼ jbatik ta stojol te Dios kuʼuntike (Miq. 6:8).

PAJAL LA YILTIKLAN TA SPISIL TA JOCHOL TAKIN KʼINAL

10, 11. ¿Bin-utʼil ya jnaʼtik te pajalnax ya yil spisil te j-abatetik yuʼun te Jehová?

¹⁰ Te Jehová jun pajal la yil te machʼatik ya yikʼ ta sna (Rom. 2:11). Kiltik bin-utʼil la yil te israeletik te kʼalal la spas scampamentoik ta jochol takin kʼinal Sinaí.

¹¹ Te kʼalal la skoltay lokʼel ta Egipto te lum yuʼune, te Jehová la yakʼ sacerdoteetik yuʼun ya x-aʼtejik ta nailpakʼ templo. Jaʼnix jich la yakʼbey te levitaetik te akʼa spasikxan yantik aʼteliletik te snitojbey sba skʼoplal sok te chʼul nailpakʼ. ¿Jaʼbal lekxan kanantaybilik te machʼatik ya x-aʼtejik ta nailpakʼ templo o te machʼatik nopol ayik ta kuxinel tey-a? Maʼuk, te Jehová pajalnax la skanantay ta spisilik.

12. ¿Bin-utʼil la yakʼ ta ilel te Jehová te maba tsaawan te kʼalal kuxinik ta jochol takin kʼinal te Israeletik? (Éxodo 40:38; jaʼnix jich ilawil te dibujoetik).

¹² Ta campamento yuʼun te israeletik, spisil ya xjuʼ ya yamigoinik te Jehová. Ma jaʼuk mukʼ skʼoplal te bin yaʼtel yichʼojik, teme namal ayik o ta stsʼeel te nailpakʼ templo. Te Jehová, la yakʼ te spisil te nación ya xjuʼ ya sta ta ilel te balal kʼajkʼ sok te balal tokal te ya xchiknaj ta nailpakʼ templo (kʼopona Éxodo 40:38). Jaʼ yuʼun, te kʼalal te tokal ya xjajch snik sba spisilik ya xjuʼ ya yilik, —jaʼnix jich ya yilik-euk te machʼatik namal nainemik ta  nailpakʼ templo— ya xjuʼ ya yilik, ya stsob te sbilukik, sok te ya xbajtik sok spisil te yantik israeletik (Núm. 9:​15-23). Jaʼnix jich spisil ya xjuʼ ya yaʼiyik te kʼalal ya xbajtikixe, melel tulan ya x-okʼesinot te cheb trompetaetik te pasbilik ta plata (Núm. 10:2). Jamal chikan ta ilel te machʼatik kuxinemik ta stsʼeel te nailpakʼ templo maba ya skʼan ya yal te jaʼ lekxan yamigoinojik te Jehová. Te bin ya skʼan ya yale, jaʼ te spisil te machʼatik nainemik ta nación yuʼun te Jehová ya xjuʼ ya xnainik ta lum yuʼun, te ya smulanik te tojobtesel sok te kanantayel yuʼune. Jaʼnix jich ta kʼajkʼal ini: chikan te banti kuxinemotik, te Jehová kʼux ya yaʼiyotik sok ya skanantayotik.

TE JEHOVÁ YA YAKʼ TA ILEL TE MABA YA STSAAWAN TA KʼAJKʼAL INI

13. ¿Bin-utʼil ya yakʼ ta ilel te Jehová te maba ya stsaawan ta ora ini?

¹³ Ay chaʼoxtul j-abatetik yuʼun te Jehová te kuxinemik ta stsʼeel te banti ya yichʼ ilel te aʼtelil yuʼun te testigoetik yuʼun Jehová ta Warwick o ta stsʼeel yantik Beteletik. Sok ay machʼatik ya x-abatinik tey-a ta swenta-abi, ya xkoltaywanik ta spasel te aʼteliletik tey-a sok te ya sjokinik te hermanoetik te ya swentainik te aʼtelile. Jaʼnix jich, ay yantik hermanoetik te ya x-abatinik ta superintendente yuʼun circuito o ya spasik yantik aʼteliletik ta servicio especial ta tiempo completo. Pero jteb ma spisil te hermanoetik maba kuxinemik ta stsʼeel te Beteletik o te ya spasik te aʼtelil te la yichʼix alele. Teme jich ay ta atojole, ya xjuʼ ya schʼuun awoʼtan te kʼuxat ta yoʼtan te Jehová, te yikʼojat ta sna sok te ya skanantayate (1 Ped. 5:7). Jich bitʼil te spisil te j-abatetik yuʼun te Jehová, ya smakʼlinat ta swenta te schʼuunel awoʼtan, ya stojobtesat sok ya skanantayat.

14. ¿Binxan-utʼil ya yakʼ ta ilel te Jehová te maba ya stsa te machʼatik yikʼtiklanoj ta snae?

¹⁴ Yanxan te bin-utʼil ya yakʼ ta ilel te Jehová  te maba tsabiluknax yuʼun te machʼa yikʼoj ta sna, jaʼ te kʼalal ya yakʼbey ta skʼopiknix te Biblia te ants winiketik ta swolol balumilal. Te sKʼop Dios la yichʼ tsʼibayel ta oxchajp kʼopiletik, ta hebreo, ta arameo sok ta griego. ¿Yabal skʼan ya yal-abi te jaʼ yamigoinojikxan te Jehová te machʼatik ya skʼoponik te sKʼop Dios ta kʼopil te la yichʼ tsʼibayele? Maʼuk (Mat. 11:25).

15. Ala junuk prueba te ya yakʼ ta ilel te maba ya stsaawan te Jehová (jaʼnix jich ilawil te fotoetik).

¹⁵ Te bitʼil lek ya yilotik te Jehová ma jaʼuk ta swenta teme bayal jnopojtik jun o te jayebto ya jnaʼtik ta swenta te kʼopiletik te la yichʼ tsʼibayel-a te Biblia. Te Jehová ma jaʼuknax ya yakʼbey spʼijil te ants winiketik te bayal snopojik june, ya yakʼbey spisil te ants winiketik chikan teme snopojik jun o maʼuk. Te Biblia yichʼoj kʼasesel ta bayal ta chajp kʼopiletik. Jaʼ yuʼun, spisil te ants winiketik ta swolol balumilal, ya xjuʼ ya sta slekilalik ta swenta te nojptesel ya yakʼ sok te ya snopik yamigoinel te Diose (2 Tim. 3:​16, 17).

AYINUKOTIK TA SNA TE JEHOVÁ

16. ¿Machʼatik ya yikʼ ta snailpakʼ te Jehová? (Hechos 10:​34, 35).

¹⁶ Jaʼ jun mukʼul majtanil te ayotik ta nailpakʼ yuʼun te Jehová. Te skʼuxul yoʼtan te ya yakʼ ta ilel te bitʼil yikʼojotik ta sna sok te slekil yoʼtane, maʼyuk bin pajal sok. Jpisiltik ya yikʼotik tey-a, ma jaʼuk ya yichʼ ta wenta te banti talemotik, te jnaciontik, te jcostumbreetik, teme jnopojtik jun o maʼuk, te jtsʼumbaltik, te kaʼbilaltik o teme ants o winik. Te bin-nax ya skʼanbey te Jehová te machʼatik ya yikʼ ta snailpakʼe jaʼ te yakuk yichʼik ta mukʼ te mantaliletik te ya yakʼ ta snae (kʼopona Hechos 10:​34, 35).

17. ¿Bin ya kilbeytik skʼoplal ta yan artículo?

¹⁷ Ta Salmo 15:​1, te David jich la sjojkʼoy: «Jehová, ¿machʼa ya xhuʼ ya xnahin ta chʼul Templo awuʼun? ¿Machʼa ya xhuʼ ya xnahin ta chʼul wits awuʼun?». Ta patil, akʼbot snaʼ yuʼun te Jehová te sujtib te jojkʼoyeletik-abi. Ta yan artículo ya kiltik te bin ya skʼan ya jpastik yuʼun ya xjuʼ ya xkuxinotikxan ta nailpakʼ yuʼun te Jehová.