1, 2. ¿Kʼusi xuʼ staik li buchʼutik tukʼ chtunik ta stojolal Jeovae?

 ATI oyuk buchʼu xi sjakʼbote: «¿Kʼusi avutoj li Jeovae?». Xuʼ van xi chatakʼe: «Jaʼ kamigo, jaʼ Jdios xchiʼuk jaʼ Jtot». Pe ¿mi anaʼoj ti xuʼ xchʼamot Jeova ta skarpana jech kʼuchaʼal tspas jun yajval nae?

² Li ajvalil Davide laj yal kʼu yelan tstak ta ikʼel ta skarpana Jeova li buchʼutik tukʼ chtunik ta stojolale. Xi la sjakʼe: «Kajval Jeova, ¿buchʼu van xuʼ xnaki li ta akarpanae? ¿Buchʼu van xuʼ xnaki li ta chʼul vits avuʼune?» (Sal. 15:1). Taje chakʼ ta aʼiel ti xuʼ xij-och ta skarpana Jeovae, jaʼ xkaltik, ti xuʼ xijkʼot ta yamigoe. ¡Toj kʼupil sba li kʼusi chale!

LI JEOVAE TSKʼAN TI XIJNAKIUTIK TA SKARPANAE

3. ¿Buchʼu baʼyel la xchʼam ta skarpana li Jeovae, xchiʼuk kʼu yelan laj yaʼi sbaik ti jmoj oyike?

³ Li Jeovae stuk toʼox oy kʼalal muʼyuk toʼox buchʼu spasoje. Jaʼ yuʼun, li buchʼu baʼyel och li ta skarpana xkaltike jaʼ li baʼyel Xnichʼone. ¡Xmuyubaj van tajek Jeova ti jaʼ chʼamvane! Li Vivliae chal ti Jeovae skʼanoj tajek li Xnichʼone. Li Jesus eke muyubaj skotol ora ta yeloval li Stote (Prov. 8:30).

4. ¿Buchʼutik la xchʼam ta tsʼakal ta skarpana li Jeovae?

⁴ Ta tsʼakale, li Jeovae la spas yan anjeletik xchiʼuk te laj yakʼ nakiuk li ta skarpana xkaltik eke. Li Vivliae  xnichʼnabtak Dios tsbiiltas xchiʼuk chal ti xmuyubajik tajek ti te oyik xchiʼuk Jeovae (Job 38:​7, tsʼib ta yok vun; Dan. 7:10). Ta epal jabiletik, li Jeovae jaʼ noʼox laj yamigoin li buchʼutik tey ta vinajele. Pe ta tsʼakale, la spas krixchanoetik xchiʼuk laj yakʼ ochuk ta skarpana junantik. Taje te skʼoplal li yajtuneltak ti tukʼ laj yakʼ sbaik jech kʼuchaʼal Enok, Noe, Abraan xchiʼuk Job. Ta jujuntal li viniketik taje chichʼ alel ti jaʼ yamigo Diose o ti xanavik xchiʼuk li melel Diose (Jen. 5:24; 6:9; Job 29:4; Is. 41:8).

5. ¿Kʼusi chakʼ jchantik li albil kʼop ta Esekiel 37:​26, 27?

⁵ Ta epal jabiletik, li Jeovae la stak ta ikʼel yamigotak sventa xuʼ te xnakiik li ta skarpanae. Kalbetik skʼoplal li kʼusi chal li albil kʼop ta Esekiel 37:​26, 27 (kʼelo). Li albil kʼop taje chakʼ kiltik ti oy tajek ta yoʼonton Jeova ti lekuk xil sbaik xchiʼuk li yajtuneltake. Li Jeovae jamal laj yal ti tspas «jun trato xchiʼukik ti chakʼ jun oʼontonale». Taje jaʼo chkʼot ta pasel mi jmoj xa ox te oyik ta skarpana Jeova xkaltik li buchʼutik tʼujbil chbatik ta vinajel xchiʼuk li buchʼutik liʼ chnakiik ta balumile (Juan 10:16). Li albil kʼop taje yakal xa chkʼot ta pasel li ta jkʼakʼaliltike.

TA ONOʼOX XCHABIUTIK JEOVA MU VENTAUK BU OYUTIK

6. ¿Kʼusi ora lij-och ta skarpana li Jeovae, xchiʼuk bu oy li karpana taje?

⁶ Li ta voʼnee, li jun karpana pasbil ta pokʼe jaʼ sventa te xkux yoʼontonik xchiʼuk xchabiatik sventa mu kʼusi snuptanik. Kʼalal oy buchʼu ch-och li ta karpanae, snaʼoj ti lek chchʼamate. Jaʼ yuʼun, li voʼotike jaʼo lij-och ta karpana kʼalal laj kakʼ jkuxlejaltik ta stojolal Jeovae (Sal. 61:4). Tee te ta jtatik epal veʼlil ta mantal xchiʼuk xuʼ jchiʼintik li buchʼutik te oyik li ta skarpana Jeova eke. Pe ¿bu oy li karpana taje? Maʼuk noʼox jun yavil oy; jaʼ te oy ti bu oy li yajtuneltak Jeova ti chchʼunik mantale. Taje jaʼ jech yakʼoj venta skotol li buchʼutik ayemik ta yan lume, xuʼ van ayemik ta junuk asamblea rejional ti bu laj yojtikinik ermanoetik ti te oyik ta skarpana Dios eke (Apok. 21:3).

7. ¿Kʼu yuʼun xuʼ xkaltik ti te oyik-o ta skarpana Jeova li yajtuneltak ti chamemik xae? (Kʼelo xtok li lokʼole).

⁷ ¿Kʼusi xuʼ xkaltik ta stojolal li yajtuneltak Jeova ti chamemike? ¿Mi te  van oyik-o li ta skarpanae? Tey. ¿Kʼu yuʼun ti jech chkaltike? Yuʼun li ta Vivliae chakʼ ta ilel ti kuxul ch-ilatik-o yuʼun li Jeovae. Xi laj yal li Jesuse: «Chchaʼkuxi li buchʼutik chamemike, laj yalbe skʼoplal Moises ek kʼalal la stsʼiba ta sventa li jpets chʼixe, kʼalal laj yalbe skʼoplal Jeova ti jaʼ ‹li Sdios Abraane, li Sdios Isaake xchiʼuk li Sdios Jakobe›. Leʼe jaʼ li Dios yuʼun li buchʼutik kuxulike, maʼuk li buchʼutik chamemike, yuʼun kuxul chil skotolik» (Luk. 20:​37, 38).

LI KʼUSITIK SKʼAN JPASTIK XCHIʼUK LI SBALIL TA JTABETIKE

8. ¿Kʼusi sbalil ta jtabetik kʼalal te oyutik li ta skarpana Jeovae?

⁸ Jech kʼuchaʼal jun karpana ti chchabi sventa mu kʼusi snuptan xchiʼuk sventa xkux li buchʼu te ch-oche, li skarpana Jeova eke chchabiutik ta mantal xchiʼuk chakʼ spatobil koʼontontik. Kʼalal nopol oyutik ta stojolal Jeovae, mu kʼusi xuʼ chopol spasbutik Satanas ti mu xa xchapaj jsetʼuke (Sal. 31:23; 1 Juan 3:8). Li ta achʼ balumile jech-o me chchabi ta mantal li yamigotak Jeovae xchiʼuk chchabiatik sventa mu xchamik (Apok. 21:4).

9. ¿Kʼu yelan skʼan jtalelaltik kʼalal te oyutik li ta skarpana Jeovae?

⁹ ¡Jaʼ jun mukʼta matanal ti xuʼ xij-och li ta skarpana Jeovae xchiʼuk ti xuʼ xkamigointike! Pe ¿kʼu yelan skʼan xkakʼ ta ilel jtalelaltik mi ta jkʼantik te oyutik-o li ta skarpana Jeovae? Kʼalal oy buchʼu chalbutik ti xijbat ta snae, oy ta koʼontontik ti xalbutik kʼusi skʼan jpastike, jech kʼuchaʼal ti xkikta jxonobtik ta spate. Kʼalal jech chalbutike, ta sjunul koʼontontik ta jpastik. Jaʼ jech li buchʼutik te oyutik li ta skarpana Jeovae. Ta jkʼan ta jnaʼtik kʼusi skʼan jpastik sventa teuk oyutik-oe. Ta skoj ti jkʼanojtik tajeke, chkakʼ kipaltik sventa jaʼuk jpastik li kʼusi lek chile (Kol. 1:10). Melel onoʼox ti jaʼ kamigotik li Jeovae, pe jaʼ Jdiostik xchiʼuk Jtotik xtok, jaʼ yuʼun sta-o ti xkichʼtik ta mukʼe (Sal. 25:14). Mu me xchʼay ta joltik taje. Li xiʼtael Jeovae jaʼ tskoltautik sventa mu jpastik li kʼusi xuʼ chopol-o xaʼi sba kuʼuntike xchiʼuk ti bikʼituk xkakʼ jbatik ta stojolal li Jdiostike (Mik. 6:8).

MUʼYUK XTʼUJVAN LI TA TAKIXOKOL BALUMILE

10, 11. ¿Kʼuxi laj yakʼ ta ilel Jeova ti mu snaʼ xtʼujvane?

¹⁰ Li Jeovae muʼyuk tstʼuj li buchʼu chchabi ta skarpanae (Rom. 2:11). Kalbetik skʼoplal ti kʼu yelan la xchabi j-israeletik ti te spasoj skarpanaik li ta takixokol balumil ta Sinaie.

¹¹ Kʼalal laj xa ox spoj lokʼel ta mosoinel ta Ejipto li steklumale, li Jeovae la svaʼan paleetik sventa te xtunik li ta axibalnae. Jech xtok, laj yalbe jlevietik ti akʼo spasik yan abtelaletik li ta ch’ul axibalnae. ¿Mi mas van lek chabibilik li buchʼutik te chtunik li ta axibalnae o li buchʼutik te nopol nakalike? Moʼoj. Li Jeovae parejo la xchabian.

12. Kʼalal te oyik ta takixokol balumil li j-israeletike, ¿kʼuxi laj yakʼ ta ilel Jeova ti mu snaʼ xtʼujvane? (Eksodo 40:38; kʼelo xtok li lokʼoletike).

¹² Li j-israeletik ti te oyik ta takixokol balumile skotolik xuʼ xamigoinik li Jeovae, mu ventauk li kʼusi sbainojike o mi nopol nakalik li ta axibalnae. Kalbetik junuk skʼelobil, li Jeovae laj yakʼbe yil j-israeletik li jvol tok xchiʼuk li jvol kʼokʼ ti te oy ta sba axibalnae (kʼelo  Eksodo 40:38). Kʼalal tstots lokʼel li jvol toke, chil skotolik. Vaʼun, ta stsob batel li kʼusitik oy yuʼunike, ta stuki li skarpanaike xchiʼuk chbat skotolik, mu ventauk bu spasoj skarpanaik (Num. 9:​15-23). Jech xtok, xuʼ xaʼiik skotolik kʼalal chichʼ jupanel li chib okʼes ti pasbil ta plata ti jaʼ senyail ti skʼan stotsik batele (Num. 10:2). Jamal xvinaj ti akʼo mi nopol nakalik li ta axibalnae, maʼuk skʼan xal ti mas xa lek xil sbaik xchiʼuk li Jeovae. Yuʼun skotol li j-israeletike xuʼ te oyik li ta skarpana Jeovae, ti xchabiatik xchiʼuk ti xbeiltasatike. Jaʼ jech li avi eke, mu ventauk ti bu nakalutike, li Jeovae skʼanojutik, tskʼelutik xchiʼuk chchabiutik.

LI JEOVAE MUʼYUK CHTʼUJVAN LI AVI KʼAKʼAL EKE

13. ¿Kʼuxi chakʼ ta ilel Jeova avi ti mu snaʼ xtʼujvane?

¹³ Junantik yajtsʼaklomtak Kristoe te nopol nakalik li ta smeʼ nail abtelal yuʼun stestigotak Jeovae o ta junuk Betel. Jlome te chtunik. Jaʼ yuʼun, te tspasik epal abtelaletik xchiʼuk xuʼ xchiʼinik li ermanoetik ti jaʼ tsbeiltasik li abtelale. Jech xtok, junantike chtunik ta jkʼelvanej ta sirkuito o jeltos kʼu yelan chtunik ta tsʼakal ora. Pe mu skotolikuk jech yakal chtunik. Mi jech kʼotem ta atojolale, teuk ta ajol ti skʼanojot li Jeovae, ti chchʼamot li ta skarpanae xchiʼuk ti chchabiote (1 Ped. 5:7). Jech xtok, li Diose tsmakʼlinot ta mantal, tsbeiltasot xchiʼuk chchabiot jech kʼuchaʼal tspas ta stojolal skotol li yajtuneltake.

14. ¿Kʼuxi to yan chakʼ ta ilel Jeova ti mu snaʼ stʼuj li buchʼutik chakʼ ochuk ta skarpanae?

¹⁴ Yan ti kʼu yelan chakʼ ta ilel Jeova ti mu snaʼ xtʼujvane, jaʼ ti yakʼojbe Svivlia li krixchanoetik ta spʼejel balumile. Li Chʼul Tsʼibetike laj yichʼ tsʼibael ta ebreo kʼop, ta arameo xchiʼuk ta griego. ¿Mi jaʼ van mas lek xil sbaik xchiʼuk Jeova  li buchʼu tskʼelik li Skʼop Dios ta ebreo, arameo o ta griegoe? Mu jechuk (Mat. 11:25).

15. Albo to yan sprevail ti chakʼ ta ilel ti mu snaʼ xtʼujvan li Jeovae (kʼelo xtok li lokʼoletike).

¹⁵ Sventa lekuk xilutik li Jeovae, maʼuk tstsak ta venta mi lek chanunajemutik o mi jnaʼtik li kʼopetik laj yichʼ tsʼibael-o li Vivliae. Jech xtok, maʼuk noʼox chakʼbe spʼijil li buchʼutik lek chanunajemike, yuʼun chakʼbe spʼijil skotol krixchanoetik mu ventauk ti bu to kʼalal chanunajemike. Li Skʼope yichʼoj jelubtasel ta smilal xa noʼox jeltos kʼopetik. Jaʼ yuʼun, li krixchanoetik ta skotol lumetike xuʼ stabeik sbalil li chanubtaseletik tee xchiʼuk ti xkʼotik ta yamigotak li Diose (2 Tim. 3:​16, 17).

TEUK OYUTIK-O LI TA SKARPANA JEOVAE

16. ¿Buchʼutik chchʼam ta skarpana li Jeovae? (Echos 10:​34, 35).

¹⁶ ¡Jaʼ jun mukʼta matanal ti te oyutik li ta skarpana Jeovae! Li Jeovae stuk noʼox jech ti kʼu yelan chakʼ ta ilel li slekil yoʼontone, ti chkʼuxubinvan xchiʼuk ti lek chchʼamvane. Yuʼun maʼuk tstsak ta venta bu slumal, kʼu yelan stalel xkuxlejal, mi chanunajem o mi muʼyuk, sjabilal, mi vinik o mi ants. Li kʼusi noʼox tskʼan li Jeovae jaʼ ti xchʼunbat li smantaltake (kʼelo Echos 10:​34, 35).

17. ¿Kʼusi ta jchantik li ta yan xchanobile?

¹⁷ Li ta Salmo 15:1 xi la sjakʼ li Davide: «Kajval Jeova, ¿buchʼu van xuʼ xnaki li ta akarpanae? ¿Buchʼu van xuʼ xnaki li ta chʼul vits avuʼune?». Ta tsʼakale akʼbat snaʼ yuʼun Jeova li stakʼobile. Li ta yan xchanobile, ta jkʼeltik kʼusitik skʼan jpastik sventa teuk oyutik-o li ta skarpana Jeovae.