STÙDIO 23
CÀNTICO 28 Come esser amigo de Geovà
Geovà el vol esser nostro amigo
‘La me tenda la sarà con lori. Mi sarò el so Dio.’ — EZE. 37:27.
COSSA CHE NDAREMO IMPARAR?
Questo stùdio el ndarà giutarne a capir come l’è bel star rento la tenda de Geovà, o sia, esser so amighi, e come che lu el ne tende tanto ben.
1-2. Che bela oportunità Geovà el ne dà?
METEMO dir che qualchedun el te domandesse: “Chi che l’è Geovà par ti?” Fursi te risponderissi: “Lu l’è el me Pare, el me Dio e el me Amigo.” Pol esser che te ghè pensà anca in altre robe. Ma fursi no te ghè mia pensà che lu l’è quel che el te riceve nte una tenda.
2 Varda quel che Davi el ga dito sora la amicìssia intrà noantri e Geovà. Lu el ga comparà Geovà come el paron de una tenda e noantri come quei che lu el riceve. Davi el ga dito: “Ò Geovà, chi che pol esser òspede nela to tenda? Chi che pol viver nel to santo monte?” (Sal. 15:1) Par meso de questo testo, capimo che podemo star rento la tenda de Geovà, o sia, esser so amighi. No l’è mia bel saver che podemo esser amighi de Geovà?
GEOVÀ EL VOL CHE STEMO RENTO LA SO TENDA
3. (a) Chi che l’è stà la prima persona che Geovà el ga convidà par vegner rento la so tenda? (b) Che sentimenti Geovà e Gesù i gavea de star insieme?
3 Vanti de scominsiar a crear tute le robe, Geovà l’era lu lu sol. Ma, quando el ga creà Gesù, l’era come se el fusse drio convidar la prima persona a vegner rento la so tenda. Sicuro che Geovà l’è restà tanto contento de ricever so Fiol. La Bìblia la dise che Gesù l’era “la so pi granda alegria”. E anca Gesù l’era stà tanto contento parché la Bìblia la dise che lu ‘el se contentea davanti de Dio tuto el tempo’. — Pro. 8:30.
4. Chi ancora ga podesto vegner rento la tenda de Geovà?
4 Quando Geovà el ga creà i àngeli, anca lori i ze stati convidadi a vegner rento la tenda de Geovà. La Bìblia li ciama de “fioi de Dio” e ne mostra che lori i ze tanto contenti de star insieme a Geovà. (Giò 38:7; Dan. 7:10) Par tanto tempo, Geovà el ga assà che sol quei che i vivea in cielo i restesse rento la so tenda. Ma dopo, Geovà el ga sgrandà la so tenda quando el ga assà che anca umani i vegnesse rento, o sia, i fusse so amighi. Par esémpio, la Bìblia la mostra che Enoche, Noè, Abraon e Giò i ga podesto vegner rento la tenda de Geovà parché i ghe ga sempre obedio. — Gén. 5:24; 6:9; Giò 29:4; Isa. 41:8.
5. Cossa che noantri imparemo cola professia de Ezechiel 37:26, 27?
5 Fà belche sentene de ani che Geovà el convida i so adoradori a vegner rento la so tenda. (Ledi Ezechiel 37:26, 27. a) Par esémpio, la professia de Ezechiel la mostra che Geovà el volea che i so servi i gavesse una amicìssia forte con lu e che el faria ‘un acordo de pace con lori’. Questa professia la parlea de un tempo che i untadi e quei che i gavea la speransa de viver nela Tera i deventaria un sol grupo e i podaria star insieme rento la tenda de Geovà. (Gio. 10:16) Semo sicuri che quel che Ezechiel el ga dito l’è drio suceder ancoi.
GEOVÀ EL TENDE DE NOANTRI, NO IMPORTA NDOVE STEMO
6. (a) Quando che una persona la vien rento la tenda de Geovà? (b) Sarà che la tenda de Geovà la ze nte un posto sol?
6 Nela època che la Bìblia la ze stata scrita, una persona che la fusse rento una tenda la podaria riposar e protegerse del tempo bruto che ghen’era fora. Ela anca la podaria restar tranquila parché el paron dela tenda el ndaria tenderla tanto ben. Ancoi, podemo dir che Geovà el ga una tenda, e noantri ndemo rento questa tenda quando se dedichemo a lu. (Sal. 61:4) E parché che l’è tanto bel star rento dela tenda de Geovà? Parché ghemo tuto quel che ne ocore par far pi forte la nostra amicìssia con lu. E rento questa tenda noantri anca ghemo una bela amicìssia con tuti i altri servi de Dio. Alora, podemo dir che la tenda de Geovà la ze in tuti i posti ndove ghen’è servi soi. (Apo. 21:3) Alora, se te sì belche ndato a un congresso internassional o far un viaio in nantro paese, te ghè cognossesto persone che anca lore le ze rento la tenda de Geovà.
7. Parché che podemo dir che i servi fedeli de Geovà che i ze morti i ze ancora nela so tenda? (Varda anca el ritrato.)
7 Ma fursi se domandemo: ‘Sarà che anca quei che i ze belche morti i pol restar rento la tenda de Geovà?’ Si. Parché che podemo dirlo? Parché Geovà el se ricorda tanto ben dei so servi che i ze morti come se i fussi ancora vivi. Gesù el ga dito: ‘Quando Moisè el ga ciamà Geovà de “Dio de Abraon, el Dio de Isache e el Dio de Giacò”, nela stòria del spiner, lu el ga parlà che i morti i sarà ressussitadi. Lu l’è Dio dei vivi, nò dei morti, parché par lu tuti i vive.’ — Luc. 20:37, 38.
Fin i servi fedeli de Geovà che i ze morti i pol seitar rento la so tenda (Varda el paràgrafo 7.)
CHE BELE ROBE GHEMO E COSSA GHEMO DE FAR?
8. Parché che l’è tanto bon par noantri esser rento la tenda de Geovà?
8 Una tenda la ze un bel posto par protegerse del tempo bruto che ghen’è fora e par riposar. Dela stessa maniera, la tenda de Geovà la ne protege de tuto quel che pol rovinar la nostra amicìssia con lu e la ne dà speransa par el futuro. Se restemo amighi de Geovà, Sàtana no’l ne farà gnanca un mal che sìpia par sempre. (Sal. 31:23; 1 Gio. 3:8) E in Paradiso, Geovà el ndarà protegerne anca de nantra maniera: lu no’l assarà che morimo. — Apo. 21:4.
9. Cossa che Geovà el speta che femo par restar nela so tenda?
9 L’è tanto bel star rento la tenda de Geovà, o sia, poder esser so amighi par sempre. Ma cossa che ghemo de far par seitar rento la so tenda? Proa pensar sora questo: Se te sì stà convidà par ndar ala casa de un amigo tuo, sicuro che te volarè saver quel che ghe piase a lu. Par esémpio, se ghe piase che la persona la cave via le scarpe prima de ndar rento la casa, te ndarè cavarle via. Dela stessa maniera, noantri volemo saver cossa che Geovà el vol che femo par seitar nela so tenda. E come lo amemo tanto, ndaremo “far tuto quel che ghe piase a lu”. (Col. 1:10) Ghemo de ricordarse che Geovà l’è el nostro Amigo, ma anca l’è el nostro Dio e Pare. Alora, ghemo de mostrarghe rispeto. (Sal. 25:14) Cossita, volemo gaver tanto rispeto par Geovà e mai desmentegarse che lu l’è una persona tanto importante. Se pensemo cossita, ndaremo obedirghe con umiltà e mai faremo qualcossa che ndarà ofenderlo. — Mic. 6:8.
COME CHE GEOVÀ EL GA TRATÀ I ISRAELITI?
10-11. Come che Geovà el ga tratà i israeliti, e come che questo ne giuta a capir che lu el trata tute le persone compagno?
10 Geovà el trata quei che i ze nela so tenda tuti dela medèsima maniera. (Rom. 2:11) Studiar sora la maniera che lu el ga tratà i israeliti nel deserto del Sinai ne giuta a esser pròpio sicuri de questo.
11 Dopo che Geovà el ga liberà i israeliti del Egito, lu el ga scoliesto sasserdoti par servir nel tabernàcolo, e i leviti par far altri laori del tabernàcolo. Ma sarà che Geovà el tratea queste persone o i israeliti che i stea darente del tabernàcolo meio che i altri? Nò, parché lu el trata a tuti dela medèsima maniera.
12. De che nantra maniera Geovà el ga mostrà che el tratea tuti i israeliti dela medèsima maniera? (Ésodo 40:38) (Varda anca la ilustrassion.)
12 Tuti i israeliti, anca quei che i era de star distante del tabernàcolo, i podea gaver una forte amicìssia con Geovà. Varda un per de robe che ne giuta a esser sicuri de questo. Geovà el ga volesto che tuta la nassion la fusse bona de veder la colona de nùvola e la colona de fogo che ghen’era sora el tabernàcolo. (Ledi Ésodo 40:38. b) Cossita, quando la nùvola la scominsiea a moverse, tuti i era boni de vederla, de scominsiar a rangiar le so robe, de meter via le so tende e de ndar via tuti insieme. (Nùm. 9:15-23) E quando sonea le due trombete de argento par dirghe che ghe tochea scominsiar a ndar via, tuti i era boni de scoltar, anca quei che i era de star distante del tabernàcolo. (Nùm. 10:2) Alora, tuti i israeliti i podea esser amighi de Geovà e gaver la so protession, e nò sol quei che i vivea darente del tabernàcolo. La medèsima roba la sucede ancoi parché, no importa ndove vivemo, Geovà el ama, el tende e el protege a tuti noantri.
Geovà el ga fato che el tabernàcolo el restesse in meso el acampamento dei israeliti. Questo el mostra che tuti israeliti i podaria esser so amighi. (Varda el paràgrafo 12.)
COME CHE GEOVÀ EL TRATA I SO SERVI ANCOI?
13. Come che Geovà el mostra che el trata tuti compagno ancoi?
13 Ancoi, arquanti servi de Geovà i vive nela sede mondial o nte un Betel. Altri i ze de star lì darente. Par quela, lori i pol giutar tanto in questi posti e restar insieme de quei che i tende dela organisassion. Altri fradei i serve come superintendenti de sircuito o i fà altri laori nel tempo integral spessial. Ma pol esser che no te fè mia queste robe. Anca cossita, sìpia sicuro che tuti i pol esser rento la tenda de Geovà, e che lu el ama a tuti. Alora, sìpia sicuro che Geovà el te ama e el te tende. (1 Pie. 5:7) Geovà el dà a tuti noantri aiuto, protession e quel che ne ocore par seitar esser so amighi.
14. De che nantra maniera Geovà el mostra che el trata tuti compagno?
14 Savemo che Geovà el trata tuti compagno anca parché la Bìblia la ze tradusida par persone de tuta la Tera. Le Scriture le ze state scrite in ebraico, aramaico e greco. Alora, sarà che quei che i sa parlar queste léngue i ga una amicìssia pi forte con Geovà che quei che no i le sa mia? Sicuro che nò! — Mat. 11:25.
15. Cossa anca ne giuta a capir che tuti i pol esser amighi de Geovà? (Varda anca el ritrato.)
15 Par esser amighi de Geovà, no ne ocore mia esser persone studiade o che le capisse le léngue che la Bìblia la ze stata scrita. Geovà el giuta persone de tuto el mondo a capir la so Parola, e nò sol quei che i ze studiadi. La Parola de Dio la ze tradusida in miliari de léngue parché Geovà el vol che persone de tuto el mondo le sìpia bone de obedirghe e de deventar so amighi. — 2 Tim. 3:16, 17.
Parché che la tradussion dela Bìblia in tante léngue mostra che Geovà el ama tute le persone? (Varda el paràgrafo 15.)
SEITA A FAR QUEL CHE GEOVÀ EL GHE PIASE
16. De acordo con Ati 10:34, 35, come che podemo seitar restar nela tenda de Geovà?
16 Sicuro che restemo tanto contenti de star nela tenda de Geovà, o sia, esser so amighi. Lu el ne ga ricevesto tanto ben e el ne ga sempre tratà con tanto amor e bontà. E lu el trata a tuti dela medèsima maniera, no importa ndove i vive, come i ze stati slevadi, quanto stùdio i ga, la so rassa, tribo, se i ze veci o gióveni, òmini o done. Ma ghemo de ricordarse che sol quei che sempre i obedisse a Geovà i pol seitar nela so tenda. — Ledi Ati 10:34, 35. c
17. Cossa che ndaremo imparar nel pròssimo stùdio?
17 Nel Salmo 15:1, Davi el ga dito: “Ò Geovà, chi che pol esser òspede nela to tenda? Chi che pol viver nel to santo monte?” E Geovà lo ga doperà par risponder a questa domanda. Nel pròssimo stùdio, ndaremo veder cossa che ghemo de far par seitar rento la tenda de Geovà, o sia, seitar a esser so amighi.
CÀNTICO 32 Resta dela banda de Geovà!
a (Ezechiel 37:26, 27) “‘“Vao far con lori un acordo de pace e questo acordo el durarà par sempre. Vao farli restar in quela tera e deventar tanti, e vao meter el me santuàrio intrà de lori par sempre. 27 La me tenda la sarà con lori. Mi sarò el so Dio e lori i sarà i me servi.
b (Ésodo 40:38) Tuti i israeliti i podea veder quel che ghen’era sora el tabernàcolo. De di ghen’era la nùvola e de note ghen’era un fogo. L’è stà cossita durante tuto el so viaio.
c (Ati 10:34, 35) Dopo de questo, Piero el ga scominsià a parlar: “Adesso si go capio ben che Dio el trata compagno tute le persone. 35 Alora no importa de ndove che lore le ze, parché lu el aceta tute le persone che lo rispeta e le fà quel che l’è giusto.
