1-2. Moovarihana ni Esalimo 15:​1, nlattulo xeeni Yehova onaavaha awe arumeyi awe oororomeleya?

 VAAKHANLE wiira mutthu mukina onookohani so: Yehova ti pani? Mwaarowa omwaakhula sai? Woonasa wene, mwaarowa omwaakhula wiira ‘Yehova Tiithi aka, Muluku aka ni Mpatthani aka’. Nave nyuwo pooti okhalana maihanelo aahiiso moolumo makina mukhanle anyu oorumeela mmuhimyaka Yehova. Niireke mootoko wuupuwela wiira Yehova Mulipa-oniwaakhelani?

² Mwene Davidi, onnimulikanyiha Yehova ntoko mulipa-oniwaakhela aletto. Nave onnaalikanyiha arumeyi oororomeleya, ntoko aletto a Yehova. Davidi aahikoha so: “Apwiya! Ophwanenle tani okhala [muletto] mpani mwanyu? Ophwanenle tani okhala vamwako anyu vowarya?” (Esal. 15:1) Yoolepa ela, enninikhaliherya wiiwexexa wiira vanniweryaneya hiyo okhala aletto a Yehova, eyo piiyo, okhala apatthani awe. Tthiri, nla nlattulo noohakalaliha ninkhuma wa Yehova!

YEHOVA ONIPHAVELA WIIRA NIKHALE ALETTO AWE

3. a) Tani ori muletto oopacerya a Yehova? b) Yehova ni muletto awe yaathokoreryana sai mukina ni mukhwaawe?

³ Ohinatthi opattuxa itthu sootheene, Yehova aakhala mekhawe. Nuuvira okathi, owo aahimpattuxa Mwanawe ompacerya. Okathi owo, Yehova aahooniherya okhala Mulipa-oniwaakhela aletto, omwaakhelaka Mwanawe owo ntoko muletto oopacerya a muheemani mwawe. Nto Yehova aahihakalala vanceene mwaha woopaka eyo. Biibiliya, onihimya wiira Yehova ‘aanimusiveliha’ mwanawe. Nave mwaana owo ori muletto oopacerya, onihimya so: “Wanikittela murima okhala vamaithoni vawe okathi p’ukathi”. — Mir. 8:30.

4. Muhoolo mwaya tani yaari aletto a Yehova?

⁴ Muhoolo mwaya, Yehova aahipattuxa malaikha yaawo nave ari aletto awe. Biibiliya onniitthana malaikha awo okhala ‘anamwane  a Muluku’. Nave, awo annooniherya wiira annihakalala mwaha wookhala vamosa ni Yehova. (Yoob. 38:7; Dan. 7:10) Mwa iyaakha sinceene, aletto a Yehova yaari yaale paahi yaakhala ni yena wiirimu. Moottharelana, Yehova aahincererya eheema awe, aapattuxa apinaatamu valaponi wiira nave akhale aletto awe. Akina a aletto awo, yaari ala: Enookhi, Nowe, Abrahamu ni Yoobi. Biibiliya onihimya wiira awo yaari apatthani eekeekhai a Muluku, okhala wiira yaanimwiiwelela aahiiso ‘yeetta ephiro ya Muluku’. — Maph. 5:24; 6:9; Yoob. 29:4; Yes. 41:8.

5. Eprofesia eri Ezekiyeli 37:​26, 27, enniixuttiha exeeni?

⁵ Okhuma khalai, Yehova khonihiya waalattula apatthani awe wiira akhale aletto awe. (Mmusome Ezekiyeli 37:​26, 27.) Mwa ntakiheryo, eprofesia ya Ezekiyeli, enniniixuttiha wiira Muluku onniphavela ni murima awe wootheene wiira arumeyi awe eekeekhai, ekhalane opatthani woolipa ni yena. Owo onnileiherya wiira onimwaavaha nivarihano aahiiso “watàna ohinimala, ontthuna waruhela murettele”. Eprofesia ela, ennihimya okathi arumeyi a Yehova ale arina nlipelelo na orowa wiirimu ni ale arina nlipelelo na okhala valaponi, anrowa aya okhalaka moowiirana muheemani mwa Yehova, ntoko “nikoto nimosa”. (Yoh. 10:16) Eprofesia ela enniiraneya olelo-va!

YEHOVA ONNINIKHAPELELA KHULA OKATHI

6. a) Moota xeeni mutthu onikhala awe muletto a muheemani mwa Yehova? b) Mapuro xeeni eniphwanyaneya aya eheema ya Yehova?

⁶ Okathi wa Biibiliya, eheema waari opuro mutthu waaphumurya awe ni waakhapeleliwa awe mwaha wa oviha aahiiso oturukeya wa makhalelo a okathi. Atthu yaakhala muheemani mmo, yaakhala oovareleleya maana yaanikhapeleliwa. Hiyo ninnikhala aletto a muheemani mwawe ya nthoonyeryo, vaavo nniivahererya ahu wa Yehova. (Esal. 61:4) Muheemani-mmo, nookhalana eyoolya yinceene, yeeyo enlipiha waataana wahu ni Yehova ni wa atthu akina yaawo ari aletto a Yehova. Moohicikha mapuro ninkhala ahu, ootheene ahu vanooweryaneya okhala aletto a Yehova. Woonasa wene, nyuwo mootoko weetta mukwaha murowaka elapo ekina, waanyiheryasa mmurowelaka konkresu, nave mwaaphwanya atthu anihakalala vanceene mwaha wookhala muheemani mwa Muluku. Eheema ya Yehova, enniphwanyaneya mapuro ootheene ari aya arumeyi awe. — Wiis. 21:3.

7. Xeeni ninhimya ahu wiira arumeyi oororomeleya akhwiiye, nlelo aletto a muheemani mwa Yehova? (Nwehe efootu.)

⁷ Ankhi arumeyi a Yehova akhwiiye, niireke nihaana ohimya wiira awo nave aletto a muheemani mwawe? Aayo! Xeeni ninhimya  ahu siiso? Mwaha woowi nlelo atthu awo ari mmuupuweloni mwa Yehova. Yesu aatthokihenrye so: “Alipa-ookhwa annihihimuxiwa, hata Moise ohooniherya muliivuruni olavulaka mwaha wa mwiri waapatta mooro, okathi aamuhimya awe Yehova okhala ‘Muluku a Abrahamu, Muluku a Isarayeli ni Muluku a Isaakhi ni Muluku a Yakobe’ owo khahiyo Muluku a alipa-ookhwa, masi Muluku a atthu akumi, okhala wiira onniwoona ootheene okhala akumi”. — Luka 20:​37, 38.

MIRITTI NI MAREELIHO

8. Mireerelo xeeni nimphwanya ahu mwaha wookhala muheemani mwa Yehova?

⁸ Ntoko siisaale iheema olelo-va sikhanle aya oorumeeliwa ntoko opuro woophumurya ni sinaakhapelela ya ale anirumeela, mwa enamuna emosa-ru eheema ya Yehova ennaakhapelela ale anikhala-mo, wiira ehikhale etthu enrowa ovukula waamini waya ni ennaakhaliherya okhalana nlipelelo na muhoolo. Vaavo ninkhala ahu apatthani a Yehova, Satana pooti ohiwerya opaka etthu enrowa ohonona waamini wahu moomalela. (Esal. 31:23; 1 Yoh. 3:8) Nave elapo esya, Yehova khonrowa ohiya waakhapelela apatthani awe oororomeleya, ohiya paahi mwaha wa mixankiho sikhanle ooweehererya waamini waya, masi-tho khonrowa weemererya awo okhwa. — Wiis. 21:4.

9. Yehova oniphavela wiira aletto awe asuwele ni apakeke exeeni?

⁹ Tthiri eparakha yuulupale okhala muheemani mwa Yehova, maana ninnikhalana ohakalala ni opatthani ohinimala ni yena. Exeeni nikhanle ahu oopaka wiira nihihiye okhala aletto awe? Nkuupuwelani mwaalattuliwe etthoko ya mutthu mukina, mwaarowa opaka exeeni? Moohaanyiherya nyuwo mwamphavelasa osuwela etthu mwaakhanle anyu oopaka wiira muhimunyoonyihe mwaneene etthoko. Mwa ntakiheryo, mwaneene etthoko pooti ophavelaka wiira murule isapato muhinatthi ovolowa mpaani. Nto nyuwo muhaana weemererya. Moolikanasa, hiyo nihaana osuwela etthu Yehova oniphavela awe wiira ale anikhala muheemani mwawe apakeke. Omphenta wahu Yehova, onniniiriha ootheene ahu opaka itthu sikhanle ‘oomusiveliha mwa itthu sootheene’. (aKol. 1:10) Ekeekhai wiira Yehova mpatthani ahu, masi nihiliyale wiira owo Muluku ahu ni Tiithi ahu, nto nihaana omuttittimiha. (Esal. 25:14) Vaavo nnuupuwelela ahu eyo, enooniiriha khula okathi ohihiya omuttottopela. Niira siiso, eyo enoonikhaliherya osyaka opaka itthu sikhanle oomuriipiha murima Yehova. Tthiri khula okathi nihaana ‘weetta moowiiyeviha ohoolo wa Muluku’ ahu. — Mik. 6:​8, Piipiliya Emakhuwa.

YEHOVA AAHIWOONIHERYA AISARAYELI WIIRA KHONIMUTHANLA MUTTHU

10-11. Moota Yehova aathokorenrye awe aisarayeli okathi yaari aya woothakoni oSinayi, oonihenrya sai wiira khonimuthanla mutthu?

¹⁰ Yehova onnaakhapelela aletto awe ohimuthanlaka mutthu. (aRom. 2:11) Nnoowerya wiixutta wiira Yehova khonimuthanla mutthu, nuupuwelelaka moota yena aakhapelenle awe aisarayeli okathi yaari aya moothakoni oSinayi.

¹¹ Nuumala Yehova owoopola arumeyi awe yaari ipottha wExiitu, owo aahaathanla anamukuttho wiira arumeeleke mutabernaakulu. Alevi yaahithanliwa wiira akhapeleleke miteko sikina opuro woowaarya wa mutabernaakulu. Niireke ale yaarumeela mutabernaakulu ni atthu yaakhala waattamana naawo, Yehova aathokorerya okhala a faita waavikana atthu akina? Nnaari! Yehova onaathokorerya atthu ootheene mwa enamuna emosaru.

12. Yehova oonihenrye sai nloko na Isarayeli wiira khonimuthanla mutthu? (Okhuma 40:38) (Nwehe eteseenyo.)

¹² Aisarayeli ootheene yaahikhalana eparakha  ya okhala apatthani a Yehova, moohicikha akhala wiira yaarumeela otabernaakulu aahiiso yaakhala waattamela otabernaakulu. Mwa ntakiheryo, Yehova aahiiriha wiira nloko nootheene niweryeke oweha neeku naakhala vasulu va etabernaakulu nenno ohiyu nooneya ntoko mooro. (Mmusome Okhuma 40:38.) Okathi neeku nlo neetta aya nirowaka mpantta mukina, hata ale yahaattamenle otabernaakulu yaaniwerya woona. Nto eyo yaanaakhaliherya othukumanya mireerelo saya, okumiha iheema saya ni enapacerya weetta mukwaha. (Mooth. 9:​15-23) Ohiya-vo, atthu ootheene yaaniwerya wiiwa oruma wa malope manli a eparatha yaawo yaamukhaliherya khula mmosa osuwela wiira aahaana opacerya weetta. (Mooth. 10:2) Okhala waattamela otabernaakulu, eyo khiyaataphulela wiira mutthu owo aahikhalana waataana woolipa ni Yehova waavikana ale yaakhala ottaiwene. Nto khula mutthu a nloko nle naivaherenrye wa Yehova, vaaniweryaneya okhala muletto awe, waakhela malakiheryo ni okhapeleliwa mwa enamuna emosa-ru. Moolikanasa, ootheene ahu moohicikha mapuro ninkhala ahu, Yehova onniniphenta, onikhaliherya ni onikhapelela mwa enamuna emosa-ru.

MATAKIHERYO A OLELO-VA ANOONIHERYA WIIRA YEHOVA KHONIMUTHANLA MUTTHU

13. Mwa enamuna xeeni Yehova onooniherya awe wiira khonimuthanla mutthu olelo-va?

¹³ Arumeyi a Muluku olelo-va, akina, anikhala waattamela oseedi ya olumwenku wootheene nave akina waattamela oBeteli. Nave-tho akina anirumeela ni anikhala mapuro yaawo. Nto ti vookhweya awo okhaliherya miteko sinivariwa mapuro awo ni otthekula ni anna anihoolela. Akina anivara muteko wa Muluku wa okathi wootheene ntoko axitokweene a esirkwiitu aahiiso miteko sikina. Masi akhala wiira khamunikhala waattamela oseedi ya olumwenku wootheene wala oBeteli, aahiiso khamunivara muteko wa Muluku wa okathi wootheene, mukupaliki wiira Yehova yoowo ori Mwaneene eheema, onniniphenta ootheene ahu mwa enamuna emosa-ru. Nave owo onimoovahani itthu sootheene munipirisari  anyu. (1 Ped. 5:7) Ootheene ale aniirela mpantta mutthenkeso wa Muluku, onnaavaha eyoolya enilipiha waamini waya, malakiheryo, waakhapelela ni onnaavaha itthu anipirisari aya.

14. Ntakiheryo xeeni nikina nnooniherya wiira Yehova Mulipa-oniwaakhela aletto ohinimuthanla mutthu?

¹⁴ Ntakiheryo nikina nnooniherya wiira Yehova khonimuthanla mutthu, ni Mulipa-oniwaakhela saana aletto, okhala wiira owo ohiiriha wiira Biibiliya ophwanyaneyeke elapo yootheene wiira khula mutthu oweryeke omusoma. Wanipacerya, Soolempwa Soowaarya saalempwe mattaava mararu: EHeeberi, Aramaiku ni Ekereku. Niireke ale aniwerya omusoma Biibiliya ni mattaava awo oopacerya, aakhalana waataana wooloka ni Yehova waavikana ale ahiniwerya? Nnaari, khahiyo ti yeeyo. — Math. 11:25.

15. Etthu xeeni ekina enooniherya wiira Yehova khonimuthanla mutthu? (Nwehe efootu.)

¹⁵ Wiira nikhale mpatthani a Yehova, khivanipirisari okhala oosomexa aahiiso wiixutta olavula mattaava manceene. Yehova onnaavaha ankhili awe atthu ootheene a valaponi, ohiya paahi ale asomme iskola suulupale. Yehova oheemererya wiira Nuulumo nawe, Biibiliya, nitaphuleliwe mattaava manceene. Mwa enamuna eyo, atthu a olumwenku wootheene pooti ottottela mureerelo soowiixuttiha sa mbiibiliyani, ni wiixutta moota akhanle aya okhala apatthani awe. — 2 Tim. 3:​16, 17.

MUHIHIYE OKHALA MULETTO A YEHOVA

16. Moovarihana ni Miteko 10:​34, 35, Ninrowa owerya sai ohihiya okhala aletto a Yehova?

¹⁶ Tthiri eparakha yuulupale olattuliwa ni Yehova wiira nikhale aletto a muheemani mwawe ya nthoonyeryo. Khokhanle mutthu mukina onisuwela owaakhela aletto mooreera murima ni oophenta onvikana Yehova. Owo khonimuthanla mutthu ni atthu ootheene arina efaita emosaru moohicikha mapuro anikhala aya, mahuweliwo aya, osoma waya, eraasa aya, nloko naya, iyaakha saya, aahiiso akhala wiira mulopwana wala muthiyana. Nto ootheene ale ahinihiya omwiiwelela, Yehova onniwaakhela ntoko aletto awe. — Musome Miteko 10:​34, 35.

17. Exeeni enrowa ahu othokorerya mwaha onittharelana?

¹⁷ Moovarihana ni Esalimo 15:​1, Davidi aakonhe so: “Apwiya! Ophwanenle tani okhala mpani mwanyu? Ophwanenle tani okhala vamwako anyu vowarya?”. Yehova aahaakhula makoho ale omurumeelaka Davidi yoowo. Mwaha onittharelana, nnoothokorerya itthu Yehova onnivekela awe opaka wiira nihihiye okhala apatthani awe.