XANNAˈIYO HUUPHE YOHUWA 23
MAZAMURE 28 Yihoowa Dabbo Gidiyoogaa
Yihooway Nena Ba Dunkkaaniya Shoobbees
“[Ta dunkkaanee] etaara de7ana. Taani eta Xoossaa gidana.”—HIZ. 37:27.
TAMAARANABAA
Yihoowa dunkkaaniyan imatta gidiyogaa giyogee woygiyogaakko, qassi nuna Shoobbidaagee nuussi koshshiyabaa waati kunttiyakko akeekanaadan maaddana.
1-2. Yihooway ammanettidi awu goynniyageeta shoobbido shoobee aybee?
ISSI uri nena, ‘Yihooway neessi aybee?’ giidi oychchiyakko ne woyga zaaruutee? ‘Yihooway ta Aawaa, ta Xoossaanne ta Dabbuwa’ gaada zaarana danddayaasa. Neeni Yihoowa qonccissanawu harabaakka qoppennan aggakka. Shin I nena Shoobbidabadan qoppay?
2 Kawuwa Daawiti Yihoowa, imattaa shoobbidaagaadan, qassi awu ammanettidi goynniyageeta shoobettida imattatudan qonccissiis. I hagaadan giis: “Abeet GODAU, ne dunkkaaniyaa gelanau bessiyaagee oonee? Ne geeshsha deriyan nenaara de7anau bessiyaagee oonee?” (Maz. 15:1) Nuuni Yihoowa imattata, hegeekka A dabbota gidana danddayiyogaa ha xiqisiyappe akeekoos. Hagee nuussi keehi gita bonchcho!
YIHOOWAY BA DUNKKAANIYAN DEˈANAADAN NUNA SHOOBBEES
3. Yihooway koyro shoobbido imattay oonee, qassi Yihoowaynne I koyro shoobbido imattay waanidoonaa?
3 Yihooway ubbabaa medhdhiyogaa doommanaappe kase, barkka deˈiis. Guyyeppe, I ba bayra Naˈaa medhdhiis. Yihooway ba dunkkaaniyawu koyro ba Naˈaa shoobbiis; qassi I yaatidoogan keehi ufayttiis. Geeshsha Maxaafay Yihooway ba Naˈan keehi ‘ufayttidoogaa’ yootees. Qassi A Naˈaykka ubba gallassi Yihoowa ‘sinttan ufayttees.’—Lee. 8:30.
4. Yihoowa imatta gidida harati oonee?
4 Hegaappe guyyiyan Yihooway kiitanchchata medhdhiis. Yaatidi etakka shoobbiis. Geeshsha Maxaafay kiitanchchata “Xoossaa naata” yaagees; qassi hegee eti Yihoowara deˈiyogan ufayttiyogaa qonccissees. (Iyy. 38:7, NW; Dane. 7:10) Daro layttawu Xoossaa dabboti aara saluwan deˈiyageetu xalaala. Guyyeeppe, I asaa medhdhiis; qassi eti A dabbo gidana danddayidosona. A dabbotuppe amaridaageeti Heenooka, Noha, Abrahaamanne Iyyooba. Eti Yihoowawu azazettido gishshawu, A dabbo gididoogaa Geeshsha Maxaafay yootees.—Doo. 5:24; 6:9; Iyy. 29:4; Isi. 41:8.
5. Hizqqeela 37:26, 27n odettida hiraagaappe nuuni ay akeekana danddayiyoo?
5 Aadhdhida daro layttatun, Yihooway ba dabboti ba imattata gidanaadan shoobbiyogaa aggibeenna. (Hizqqeela 37:26, 27 nabbaba.) Leemisuwawu, Hizqqeela hiraagaappe nuuni akeekiyogaadan, Xoossay baassi ammanettidi goynniyageeti ba mata dabbo gidanaadan tumuppe koyees. I etaara ‘sarotettaa maachchaa maacettanaagaa’ yootiis. He hiraagay saluwa biyo hidootaynne saˈaa laattiyo hidootay deˈiyogeeti Yihoowa dunkkaaniyan ‘issi wude’ gidiyo wodiya qonccissees. (Yoh. 10:16) Haˈˈi hegaadan haniiddi deˈees!
NUUNI AWAN DEˈIKKOKKA XOOSSAY NUUYYO QOPPEES
6. Issi uri Yihoowa dunkkaaniyan waanidi imatta gidana danddayii, qassi A dunkkaanee awan deˈii?
6 Beni wode dunkkaanee issi uri shemppiyosanne qohuwappe attiyosa. He dunkkaaniyan deˈiya issi imattay shoobbidaagee ayyo qoppiyogaa erana danddayees. Nuuni nuna Yihoowawu sheedhdhiyo wode, A dunkkaaniyan imatta gidoos. (Maz. 61:4) Nuuni kumi palahiya ayyaanaa qumaa demmoosinne Yihoowa imatta gidida haratuura dabbotoos. A dunkkaanee issi heera xalaalan deˈenna. Geella neeni dumma gita shiiquwa shiiqanawu kare biittaa biikko, Xoossaa dunkkaaniyan deˈiya ufayttiya haratuura gayttana danddayaasa. Nuuni awan deˈikkokka, Yihoowawu ammanettidi haggaazikko, A dunkkaaniyan deˈiya imattata gidana danddayoos.—Ajj. 21:3.
7. Ammanettidi hayqqidaageeti haˈˈikka Yihoowa dunkkaaniyan shoobettida imatta gidiyogaa nuuni aybin eriyoo? (Misiliyakka xeella.)
7 Ammanettidi hayqqidaageeti shin? Eti haˈˈikka Yihoowa dunkkaaniyan shoobettida imattee? Ee! Nuuni hegaadan giyoy aybissee? Yihoowa xeelan eti paxa deˈiyo gishshataassa. Yesuusi hagaadan giis: “Muusee daran hanidabaa xaafidoban Yihoowa, ‘Abrahaama Xoossaa, Yisaaqa Xoossaa, qassi Yaaqooba Xoossaa’ giido wode, hayqqida asay denddanaagaa erissiis. Eti ubbay ayyo paxa deˈiyo gishshawu, I paxa deˈiyageetu Xoossaappe attin, hayqqidaageetu Xoossaa gidenna.”—Luq. 20:37, 38.
Ammanettidi hayqqidaageetikka Xoossaa dunkkaaniyan shoobettidabadan qoppana danddayoos (Mentto 7 xeella)
NUUNI DEMMIYO GOˈˈAANNE NU OOTTANA KOSHSHIYABATA
8. Yihoowa dunkkaaniyan A imattata gidiyogan nuuni waani goˈettiyoo?
8 Yihoowa dunkkaanee A imattati aara dabbotido dabbotaa moorana danddayiya aybippenne naageesinne etawu ammanttiya hidootay deˈanaadan oottees. Nuuni Yihoowakko shiiqidi deˈikko, Seexaanay nuna merinawu qohiyabaa oottana danddayeenna. (Maz. 31:23; 1 Yoh. 3:8) Yihooway ooratta alamiyan ammanettida ba dabbota ayyaanaabaa qohuwappe xalla gidennan, hayquwappekka ubbatoo naagana.—Ajj. 21:4.
9. Yihooway ba imattati ay oottanaadan koyii?
9 Yihoowa dunkkaaniyan imatta gidiyogee tumukka nuuyyo gita bonchcho. Nuuni merinawu aara mata dabbo gididi deˈana danddayoos. Nuuni A imatta gididi deˈanawu koyikko, waatana koshshii? Neeni issi ura son imatta gidada shoobettikko, loˈˈo imatta gidanawu koyaasa. Leemisuwawu, neeni caammaa kessada gelanaadan I koyana danddayees, qassi neenikka hegaadan oottaasa. Hegaadankka, Yihooway A dunkkaaniyan ubbatoo deˈiyageetuppe koyiyobaa nu oottanawu koyiyogee qoncce. Nuuni Yihoowa siiqiyo siiqoy A loytti ‘ufayssanawu’ nuussi danddayettida ubbabaa oottanaadan denttettees. (Qol. 1:10) Yihooway nu dabbuwa gidikkokka, I bonchchoy bessiyo nu Xoossaanne nu Aawa. (Maz. 25:14) Nuuni hegaa mule dogana koshshenna, qassi nuuni ubbatoo A wozanappe bochchana bessees. Hegaadan bonchchiyogee A azzanttiyabaa oottennan agganaadan nuna maaddees. Nuuni ‘ashkketettan nu Xoossaara hemettanawu’ ubbatoo koyoos.—Mik. 6:8.
YIHOOWAY ISRAAˈEELATA UBBAA ISSI AYFIYAN XEELLIIS
10-11. Yihooway Israaˈeelati Siinaa bazuwan deˈiyo wode etassi ay oottidee, qassi hegee I asa asappe shaakkennaagaa waati bessii?
10 Yihooway ba dabbota issi ayfiyan xeellees. (Roo. 2:11) Yihooway Siinaa bazzuwan Israaˈeelatuyyo oottidoogaappe hegaa akeekana danddayoos.
11 Yihooway ba asaa Gibxxe aylletettappe kessi simmidi, dunkkaaniyan oottana mala qeeseta sunttiis. Qassi dunkkaaniyan hara oosota oottanaadan I Leewata sunttiis. Yihooway dunkkaaniyan oottiyageetussi woy hegaa matan deˈiyageetussi haratuppe aaruwan qoppii? Chii! Yihooway asa asappe shaakkenna.
12. Yihooway bazzuwan Israaˈeelatussi oottidobay I asa asappe shaakkennaagaa waati bessii? (Kessaabaa 40:38) (Misiliyakka xeella.)
12 Israaˈeela asa gidida issi uri Xoossaa dunkkaaniyan oottin aggin, qassi A dunkkaaniya matan deˈin aggin Israaˈeelati ubbay Yihoowa dabbo gidana danddayoosona. Leemisuwawu, shaaraynne tamaa tuussay maalaaliya hanotan Xoossaa dunkkaaniya kammiyogaa Israaˈeelati ubbay beˈanaadan Yihooway oottiis. (Kessaabaa 40:38 nabbaba.) Shaaray denddiyo wode Xoossaa dunkkaaniyappe haahuwan dunkkaanidaageetikka hegaa beˈana danddayoosona. Eti he wode banttabaa shiishshi qachchoosona, bantta dunkkaaniya wottoosonanne haratuura he sohuwappe boosona. (Qoo. 9:15-23) Eti ubbay baana koshshiyogaa erissiya biraappe giigida naaˈˈu xurumbbatuppe kiyiya wolqqaama cenggurssaa siyana danddayoosona. (Qoo. 10:2) Issi uri Xoossaa dunkkaaniya matan deˈiyo gishsha xallawu, haahuwan deˈiyageetuppe aaruwan Yihoowara loytti dabbotees giyogaa gidenna. Israaˈeelati ubbay Yihoowa imatta, qassi I eta kaalettiyogaanne naagiyogaa eti ammanettana danddayoosona. Hegaadan, nuuni ha wodiyan saˈan awa heeran deˈikkokka, Yihooway nuna siiqees, nuussi koshshiyabaa kuntteesinne nuna naagees.
Asay dunkkaanidosan giddo heeran deˈiya Xoossaa dunkkaanee Yihooway asa asappe shaakkennaagaa bessees (Mentto 12 xeella)
YIHOOWAY HA WODIYANKKA ASA ASAPPE SHAAKKENNA
13. Yihooway ha wodiyan asa asappe shaakkenna gaana danddayiyoy aybisee?
13 Ha wodiyan Xoossaa asaappe amaridaageeti Yihoowa Markkatu waanna biiruwa woy macara biiruwa matan deˈoosona. Harati qassi yan haggaazoosona. Hegaappe denddidaagan, eti yan deˈiya daro oosota oottananne aawatettay deˈiyogeetuura laggetana danddayoosona. Amaridaageeti yuuyidi xomoosiyageeta woy dumma ubba wode haggaazuwa haggaaziyageeta. Neeni etappe issuwa gidana xayikkokka, nena Shoobbiday Yihoowa gidiyogaanne I nena siiqiyogaa ammanettana danddayaasa. I nena loytti ereesinne neessi koshshiyabaa immees. (1 PHe. 5:7) Yihooway ba ashkkaratussi ubbawu ayyaanaabaa qumaa immees, eta kaaletteesinne naagees.
14. Yihooway asa asappe shaakkennaagaa bessiya hara ogee aybee?
14 Kumetta saˈan deˈiya asay Geeshsha Maxaafaa demmanaadan oottiyogankka, Yihooway asa asappe shaakkennaagaa bessiis. Geeshsha Maxaafay koyro heezzu doonatun xaafettiis; Ibraawettuwan, Aramayke doonaaninne Giriikettuwan xaafettiis. Geeshsha Maxaafay koyro xaafettido doonaa nabbabana danddayiyageeti danddayennaageetuppe aaruwan Yihoowara mata dabboo? Chii, gidokkona.—Mat. 11:25.
15. Yihooway asa asappe shaakkennaagaa bessiya naqaashay aybee? (Misiliyakka xeella.)
15 Yihooway nuuni A dabbo gidanaadan shoobbidoy nu loytti tamaarido woy Geeshsha Maxaafay koyro xaafettido doonaa eriyo gishshataassa gidenna. Yihooway loytti tamaaridaageetuyyo xalla gidennan, kumetta saˈan deˈiya asa ubbawu ba aadhdhida eratettaa immees. A Qaalay Geeshsha Maxaafay daro shaˈu doonatun birshshettiis; yaatiyo gishshawu, kumetta saˈan deˈiya asay A timirttiyappe goˈettanaanne Yihoowa dabbo waani gidana danddayiyakko tamaarana danddayees.—2 Xim. 3:16, 17.
Geeshsha Maxaafay daro shaˈu doonan birshshettidoogee Yihooway asa asappe shaakkennaagaa waati bessii? (Mentto 15 xeella)
UBBATOO YIHOOWA UFAYSSA
16. Oosuwaa 10:34, 35y yootiyogaadan, nuuni ubbatoo Yihoowa waati ufayssana danddayiyoo?
16 Yihooway ba dunkkaaniyan nuna mokki ekkiyogee nuussi keehi gita bonchcho. I ooppenne aaruwan keha, siiqiyagaanne Shoobbiyagaa. Hegaa bollikka, I asa asappe shaakkenna. I nu heeray, wogay, eray, zaree, qommoy, layttay woy mattumay ayba gidikkokka, nuna ubbaa mokki ekkees. Shin Yihooway mokki ekkiyoy baayyo azazettiyageetu xalaala.—Oosuwaa 10:34, 35 nabbaba.
17. Yihoowa dunkkaaniyan imatta gidiyogaa xeelliyagan gujo qofaa awuppe demmana danddayiyoo?
17 Mazamure 15:1n Daawiti hagaadan giidi oychchiis: “Abeet GODAU, ne dunkkaaniyaa gelanau bessiyaagee oonee? Ne geeshsha deriyan nenaara de7anau bessiyaagee oonee?” Daawiti ayyaanay denttettin he oyshata zaariis. Nuuni Yihoowa ufayssanawunne A dabbo gididi deˈanawu oottana bessiyabatuppe amaridaageeta kaalliya huuphe yohoy qonccissees.
MAZAMURE 32 Yihoowa Bagga Gida!
