ALATIKE AKO 23
KATIKO 28 Tou Kaumeʼa Mo Sehova
ʼE Fakaafe Tatou e Sehova Ki Tona Fale La
“ ʼE tuʼu anai toku fale la ia natou, ʼe au liliu anai ko tonatou ʼAtua.”—ESK. 37:27.
TE MANATU TAFITO
Ke fakatuputupu tatatou lotofakafetaʼi ki te fakaafe ʼo tatou e Sehova ki tona fale la fakata pea mo tana tokaga lelei ai kia tatou.
1-2. Kotea te pilivilesio ʼae ʼe foaki e Sehova ki ʼana kaugana agatonu?
KOTEA ʼae ʼe ke tali ki he tahi ʼe ina fehuʼi atu: “Kia koe la ko ai ia Sehova?” ʼE lagi ke ui: “Ko Sehova ʼe ko taku Tamai, mo toku ʼAtua pea mo toku Kaumeʼa.” Peʼe lagi ke manatu anai ki he tahi age ʼu faʼahi ʼo ʼuhiga mo Sehova. Kae ʼe ke iloʼi koa te faʼahi ʼaeni: Ko Sehova ʼe ina fakaafe koe ki tona fale la?
2 Neʼe fakata e te Hau ko Tavite te fakakaumeʼa ʼa Sehova mo ʼana kaugana, ki he tagata ʼe ina fakaafe ni hahaʼi ki tona fale la. Neʼe fai e Tavite te fehuʼi ʼaeni: “Sehova e, ko ai anai ka ke fakaafe ki tou fale la? Ko ai anai ʼae ka nofo ʼi tou moʼuga taputapu?” (Pes. 15:1) ʼE tou mahino ai ʼi te vaega ʼaeni ʼe feala ke tou kau ʼi te kau fakaafe ʼa Sehova ʼae ki tona fale la, ko tona fakaʼuhiga ke tou liliu ko ʼona kaumeʼa. ʼE mahino ia ko he toe pilivilesio ʼaia kia tatou!
ʼE FIA FAKAAFE TATOU E SEHOVA KI TONA FALE LA
3. Ko ai ʼae neʼe ʼuluaki fakaafe e Sehova ki tona fale la, pea neʼe feafeaʼi ʼanā felogoi?
3 ʼI muʼa ʼo te kamata fakatupu e Sehova ia meʼa fuli, neʼe maʼuli tokotahi. Pea neʼe ina fakatupu leva tona ʼAlo ʼulu tokotahi. Neʼe hage ia Sehova ʼi te temi ʼaia, ko he tagata ʼe ina fakatalitali ki tona fale la ia tana ʼuluaki fakaafe, pea neʼe fiafia ʼaupito ai. ʼE tou lau ʼi te Tohi-Tapu neʼe fakapelepeleʼi ʼosi e Sehova ia tona ʼAlo. Pea ko tona ʼAlo “neʼe . . . fiafia tuʼumaʼu pe” ia muʼa ʼo Sehova.—Taag. 8:30.
4. ʼAki te temi, ko ai ʼae neʼe fakaafe e Sehova ki tona fale la?
4 Pea neʼe fakatupu leva e Sehova te tahi ʼu ʼaselo, ʼo ina toe fakaafe natou ki tona fale la fakata. ʼE ui ʼi te Tohi-Tapu ko te ʼu ʼaselo ʼe ko “te ʼu foha . . . ʼo te ʼAtua” pea ʼe natou fiafia ʼi tanatou fakatahi mo Sehova. (Sopo 38:7; Tan. 7:10) Lolotoga he temi, neʼe fakakaumeʼa pe te ʼAtua mo natou ʼae ʼi selo. Ki muli age, neʼe ina fakatupu te tagata pea neʼe ina fakaafe natou ki tona fale la. ʼAki te temi, neʼe kau ia natou ʼaia ia Enoke, mo Noe, mo Apalahamo pea mo Sopo. ʼE ui ʼi te Tohi-Tapu ko te kau atolasio moʼoni ʼaia ʼa Sehova neʼe natou haʼele “mo te ʼAtua moʼoni” ko tona fakaʼuhiga neʼe natou kaumeʼa mo te ʼAtua.—Sen. 5:24; 6:9; Sopo 29:4; Esa. 41:8.
5. Kotea ʼae ʼe tou tokagaʼi ʼi te lea fakapolofeta ʼae ia Esekiele 37:26, 27?
5 ʼAki te alu ʼo te temi, neʼe hoko atu pe e Sehova tana fakaafe ʼona kaumeʼa ki tona fale la. (Lau ia Esekiele 37:26, 27.) Ohage la, ka tou lau te lea fakapolofeta ʼa Esekiele, ʼe tou tokagaʼi ai te loto moʼoni ʼa te ʼAtua ke felogoi lelei mo ʼana kaugana agatonu. ʼE ina fakapapau ʼe ina “fai . . . he fuakava ʼo te tokalelei mo natou.” Neʼe fakaha fakatomuʼa ai te temi ʼae ʼe logo tahi ai natou ʼae ʼe ʼamanaki olo ki selo pea mo natou ʼae ʼe ʼamanaki maʼuʼuli ʼi te kele, ʼo natou fakatahitahi ʼi tona fale la fakata ohage ko “he faga ovi ʼe tahi.” (Soa. 10:16) Kua hoko te faʼahi ʼaia ʼi te temi nei!
ʼE TOKAGA TE ʼATUA KIA TATOU ʼI HE POTU PE ʼE TOU NONOFO AI
6. Ko ʼafea ʼe tali ai e he tahi te fakaafe ʼa Sehova ki tona fale la, pea ʼe ʼi ai koa he koga meʼa ʼe tuʼu ai tona fale la?
6 ʼI te temi muʼa, neʼe ulu he tahi ki he fale la ke malolo pea ke malumalu ai. Pea ko ia ʼae neʼe ina fakaafe ia ia neʼe tokaga lelei ki ai. ʼI te temi ʼae neʼe tou foaki ai totatou maʼuli kia Sehova, neʼe tou tali tana fakaafe ʼae tatou ki tona fale la fakata. (Pes. 61:4) ʼE mahu ai te meʼa kai fakalaumalie pea ʼe tou fakatahi mo ʼihi atu neʼe fakaafe e Sehova. Kae ko tona fale la fakata ʼaia ʼe mole tuʼu moʼoni ia ʼi he koga meʼa. ʼE feala hau folau ki he fenua matapule lagi ke ke kau ai ki he fakatahi makehe, pea ʼe ke felaveʼi ai mo ni hahaʼi ʼe natou fiafia ʼi tanatou nonofo ʼi te fale la ʼo te ʼAtua. ʼI he potu pe ʼe nonofo ai ʼana kaugana agatonu ʼe tuʼu ai tona fale la.—Fkha. 21:3.
7. He koʼe ʼe feala ke tou ui ko te kau agatonu ʼae kua mamate ʼe kei natou kau ia natou ʼae neʼe fakaafe e Sehova ki tona fale la? (Vakaʼi mo te pāki.)
7 ʼE feafeaʼi ki te kau agatonu ʼae kua mamate? ʼE feala koa ke tou ui kei natou kau ia natou ʼae neʼe fakaafe e Sehova ki tona fale la? ʼEi. Kotea tona tupuʼaga? Koteʼuhi ʼe kei manatuʼi lelei natou e Sehova. Kia te ia ʼe hage pe ʼe kei natou maʼuʼuli. Neʼe ui fenei e Sesu: “Neʼe talanoa ia Moisese ki te fakatuʼuake ʼo te kau mate ʼi te fakamatala ʼae ʼo ʼuhiga mo te fuʼu ʼakau talatala, ʼi tana fakahigoaʼi ia Sehova ko ‘te ʼAtua ʼo Apalahamo, mo te ʼAtua ʼo Isaake pea mo te ʼAtua ʼo Sakopo.’ ʼE ko he ʼAtua ʼo natou ʼae ʼe maʼuʼuli, kaʼe ʼe mole ʼo te kau mate, koteʼuhi kia te ia, ʼe natou maʼuʼuli fuli.”—Luka 20:37, 38.
Maʼia mo te kau agatonu ʼae kua mamate, ʼe kei natou kau ʼi te kau fakaafe ʼa te ʼAtua (Vakaʼi te palakalafe 7)
TE ʼU LELEI ʼAE ʼE TOU MAʼU PEA MO ʼOTATOU MAʼUA
8. Kotea te ʼu lelei ʼe tou maʼu ʼi tatatou nonofo ʼi te fale la ʼo Sehova?
8 Ohage pe ko he fale la ʼe feala ke malolo pea mo malumalu ai he tahi, ʼo toe feia aipe ko natou ʼae ʼe nonofo ʼi te fale la ʼo Sehova ʼe puipui ai ʼanatou felogoi mo ia pea mo foaki kia natou he ʼamanaki moʼoni ki te ka haʼu. Ka tou nonofo ovi kia Sehova, ʼe mole feala ke fai mai e Satana he meʼa ʼe feala ke fua kovi kia tatou ʼo talu ai. (Pes. 31:23; 1 Soa. 3:8) ʼI te malama foʼou, ʼe haga puipui anai e Sehova ʼona kaumeʼa agatonu mai ni aluʼaga ʼe fakatupu kovi kia natou ʼi te faʼahi fakalaumalie, ʼo feia mo te mate.—Fkha. 21:4.
9. Kotea ʼae ʼe loto e Sehova ke fai e natou ʼae ʼe ina fakaafe ki tona fale la?
9 ʼE ko he toe pilivilesio lahi te fakaafe ʼo tatou e Sehova ki tona fale la, ke tou kaumeʼa mo ia ʼo talu ai. Pea ʼe tonu ke feafeaʼi tatatou aga mo kapau ʼe tou fia nonofo ʼi tona fale la? Kapau ʼe fakaafe koe e he tahi ki tona ʼapi, ʼe mahino ia ʼe ke fai anai ia meʼa fuli ke fiafia ai. Ohage la, ka ina kole atu ke ke huʼi ʼou sulie ʼi tuʼa, pea ʼe ke fiafia anai ʼi tona fai. ʼO toe feia pe, ʼe tou fia iloʼi pe kotea ʼae ʼe loto e Sehova ke fai e natou ʼae ʼe fia nonofo ʼi tona fale la. ʼUhi ʼae ʼe tou ʼoʼofa ia Sehova, ʼe tou fia fai ai ia meʼa fuli ʼae ʼe tou lavaʼi “moʼo fakafiafiaʼi tona loto.” (Kol. 1:10) Pea ʼe moʼoni ʼe tou felogoi mo Sehova ohage pe ko hotatou Kaumeʼa. Kae ʼe tou toe fakaʼapaʼapa foki kia te ia he ʼe ko totatou ʼAtua mo Tamai. (Pes. 25:14) ʼE mole tonu ke tou galoʼi ʼi he temi te faʼahi ʼaia pea ke tou fakaʼapaʼapa tuʼumaʼu kia te ia. Ka tou manatuʼi te faʼahi ʼaia, pea ʼe mole tou fai he aga ʼe fakalotomamahi anai kia te ia. ʼE mahino ia ʼe tou fia “haʼele mo [totatou] ʼAtua ʼaki he agavaivai!”—Mik. 6:8.
NEʼE ʼOFA FAKATATAU IA SEHOVA KI TE KAU ISELAELE
10-11. Kotea te faʼifaʼitaki ʼe ha ai ko Sehova ʼe mole fakapalatahi?
10 ʼE ʼofa fakatatau ia Sehova kia natou fuli ʼae ʼe ina fakaafe ki tona fale la. (Loma 2:11) ʼE tou iloʼi feafeaʼi te faʼahi ʼaia? ʼUhi ko tana aga ʼae ki te kau Iselaele ʼi te temi ʼae neʼe natou nonofo ai ʼi te toafa ʼo Sinai.
11 Hili te fakaʼateainaʼi e Sehova tana hahaʼi mai tanatou popula ʼi Esipito, neʼe ina fakanofo te kau pelepitelo ke natou gaue ʼi te Tapenakulo. Neʼe ina hinoʼi te kau Levite ke natou tokakaga ki te tahi ʼu gaue ʼi te fale la taputapu ʼaia. Neʼe tokaga lelei age koa ia Sehova kia natou ʼaia neʼe gaue ʼi te tapenakulo peʼe kia natou ʼae neʼe fakatuʼu ovi ki ai ʼonatou fale la? Kailoa. ʼE mole fakapalatahi ia Sehova.
12. Neʼe ha feafeaʼi te ʼofa fakatatau ʼo Sehova ki te kau Iselaele ʼi tanatou nonofo ʼi te toafa? (Ekesote 40:38) (Vakaʼi mo te pāki.)
12 Ko te kau Iselaele fuli ʼi te foʼi nofoʼaga neʼe natou maʼu tatau te faigamalie ʼae ke natou felogoi lelei mo Sehova, tatau aipe pe neʼe natou gaue ʼi te tapenakulo peʼe kailoa, peʼe natou nonofo ovi ki te tapenakulo peʼe kailoa. Ohage la, neʼe tokaga ia Sehova ke lava sio te puleʼaga katoa ki te ʼao pea mo te pou afi ʼae neʼe ha fakamilakulo ʼi te fuga tapenakulo. (Lau ia Ekesote 40:38.) ʼI te temi ʼae neʼe malaga ai te ʼao, neʼe feala kia natou ʼae neʼe nonofo mamaʼo ke natou sisio ki ai. Neʼe natou tanaki ai ʼanatou meʼa, mo vete ʼonatou fale la, pea mo natou mavae fakatahi fuli. (Num. 9:15-23) Neʼe feala ke natou logo fuli ki te fakatatagi malohi ʼo te ʼu fakatagi pupuhi siliva ʼe lua, ʼo natou iloʼi fuli ai ʼe tonu ke natou mavae. (Num. 10:2) ʼE ha lelei ai, ko natou ʼae neʼe nonofo ovi ki te tapenakulo neʼe mole malohi age ʼanatou felogoi mo Sehova ia natou ʼae neʼe nonofo mamaʼo. Kailoa ia, kae neʼe ko te kau Iselaele fuli ʼae neʼe fakaafe ki te fale la ʼo Sehova pea ke takitaki mo puipui ai natou. ʼO toe feia pe ia ʼaho nei, tatau aipe he potu ʼe tou nonofo ai kae ʼe ʼofa pe ia Sehova ia tatou, mo tokaga pea mo puipui tatou.
Ko te tapenakulo ʼae neʼe fakatuʼu ʼi te lotomalie ʼo te nofoʼaga, neʼe ko he fakamoʼoni ʼo te ʼofa fakatatau ʼo Sehova (Vakaʼi te palakalafe 12)
ʼE ʼOFA FAKATATAU IA SEHOVA IA ʼAHO NEI
13. ʼE fakaha feafeaʼi e Sehova ia ʼaho nei ia tona ʼofa fakatatau?
13 Ia ʼaho nei, ko ʼihi ʼi te hahaʼi ʼa te ʼAtua ʼe natou nonofo ovi ki ʼatatou pilo fakamalamanei peʼe ki he Petele ʼa te kau Fakamoʼoni ʼa Sehova. ʼE gaue pe la ʼihi ʼi te ʼu fale ʼaia. ʼE feala ai kia natou ʼaia ke natou tokoni ki he ʼu fakatuʼutuʼu gaue peʼe natou gaue fakatahi mo natou ʼae ʼe takitaki. Pea ko ʼihi atu leva ʼe natou taupau feoloʼaki peʼe natou kau ʼi he selevisi makehe temi katoa. Kapau ʼe mole ke kau ia natou ʼaia, ke ke tui papau ko Sehova ʼae ʼe ina fakaafe tatou ki tona fale la, ʼe ʼofa ia tatou fuli. Pea ʼe tokaga kia tatou takitokotahi. (1 Pet. 5:7) ʼE maʼu e te hahaʼi fuli ʼa te ʼAtua te meʼa kai fakalaumalie, te takitaki pea mo te puipui ʼae ʼe ʼaoga kia natou.
14. ʼE toe ha feafeaʼi te ʼofa fakatatau ʼo Sehova?
14 ʼE toe ha te ʼofa fakatatau ʼo Sehova ʼi tana tokaga ʼae ke maʼu e te hahaʼi fuli ʼi te kele katoa ia te Tohi-Tapu. ʼI te kamata, neʼe tohi te ʼu Tohi Taputapu ia lea ʼe tolu: te Fakahepeleo, mo te Fakaalamea, pea mo te Fakakeleka. Ko natou ʼae ʼe natou iloʼi te ʼu lea ʼaia ʼe malohi age koa tanatou felogoi mo Sehova ia natou ʼae ʼe mole mahino ki ai? Kailoa ia.—Mat. 11:25.
15. Kotea ʼae ʼe fakamoʼoni ai ʼe ʼofa tatau ia Sehova ki te hahaʼi fuli? (Vakaʼi mo te pāki.)
15 ʼE mole ʼofa pe ia Sehova kia natou ʼae neʼe ako ʼi he ʼu fale ako lalahi, peʼe ko natou ʼae ʼe mahino ki te ʼu lea ʼae neʼe tohi ai te Tohi-Tapu ʼi te kamata. Kae ʼe ina foaki tona poto ki te hahaʼi fuli ʼi te kele, feia mo natou ʼae neʼe mole ako ʼi he ʼu fale ako lalahi. Kua fakaliliu ia tana Folafola, te Tohi-Tapu ia lea ʼe lauʼi afe. Koia, ʼe feala ke fua lelei ki te hahaʼi ʼi te malamanei katoa te ʼu akonaki ʼae ʼe tuʼu ai pea ke natou iloʼi pe feafeaʼi hanatou kaumeʼa mo te ʼAtua.—2 Tim. 3:16, 17.
He koʼe ko te fakaliliu ʼo te Tohi-Tapu ia lea ʼe lauʼi afe ʼe ha ai te ʼofa fakatatau ʼo Sehova? (Vakaʼi te palakalafe 15)
KE HAGA “TALI LELEIʼI” PE KOE E SEHOVA ʼI TONA FALE LA
16. ʼO mulimuli kia Gaue 10:34, 35, kotea ʼae ʼe tonu ke tou fai ke haga tali leleiʼi pe tatou e Sehova ʼi tona fale la?
16 ʼE ko he toe pilivilesio te fakatalitali ʼo tatou e Sehova ʼi tona fale la fakata. ʼE mole he tahi ʼe agalelei, mo ʼofa pea mo tali kaiga ohage ko ia. Pea ʼe ʼofa fakatatau he ʼe ina fakatalitali ia tatou fuli ʼo mole ina lauʼia totatou fenua, totatou haʼuʼaga, tatatou ako, totatou telepi, totatou taʼu peʼe ko tatou ko he tagata peʼe ko he fafine. Kae ke feala hana tali leleiʼi tatou pea mo tou nonofo ʼi tona fale la, ʼe tonu ke tou mulimuli ki ʼana lekula.—Lau ia Gaue 10:34, 35.
17. ʼE tou lava iloʼi feafeaʼi he tahi ʼu faʼahi ʼe kole mai e Sehova ke tou fai ke tou nonofo ai ʼi tona fale la?
17 Ia Pesalemo 15:1, ʼe fai e Tavite te ʼu fehuʼi ʼaeni: “Sehova e, ko ai anai ka ke fakaafe ki tou fale la? Ko ai anai ʼae ka nofo ʼi tou moʼuga taputapu?” Pea ʼaki te takitaki ʼa Sehova, neʼe toe tali ia Tavite ki te ʼu fehuʼi ʼaia ʼi te Pesalemo pe ʼaia. ʼE tou vakaʼi anai ʼi te alatike ka hoa mai he ʼu faʼahi ʼe kole mai e Sehova ke tou fai ke fiafia ai tona loto pea ke hoko atu tatatou fakakaumeʼa mo ia.
KATIKO 32 Filifili Ia Sehova