LAHATSORATRA FIANARAN̈A 23
HIRA 28 Te ho Namanao Izahay, Jehovah
Jehovah Mikaiky Atsika Hanjary Vahininany
‘Ho amindrô iô tran̈olainaka, ke zaho ho hanjary Zan̈aharindrô.’—EZEK. 37:27.
HEVITRY HIDINIHIN̈Y
Lahatsoratra ty handrisiky atsika hankasitraka kaikin’i Jehovah, hanjary vahininany amy tran̈olainany ndreky hankasitraka fomba ikarakarany atsika.
1-2. Ino ma kaiky ataon’i Jehovah amy mpanomponany jiaby tsy mivadiky?
IZIKOA misy olo man̈ontany anao: ‘Inonao ma Jehovah?’ Anao mety hivolan̈a: ‘Jehovah Babako, Zan̈aharinaka aviô Kamaradinaka.’ Mety misy fomba hafa koa hikahianao Jehovah. Kanefa, asa anao mba efa nieritreritry fa Jehovah io mira tompin-tran̈o araiky, mikaiky anao hivahiny aminany?
2 Nampiran̈in’ny Mpanjaka Davida tamy fifandraisan’ny vahiny ndreky tômpin-tran̈o mandray izy, Jehovah mikamarady amy mpanomponany tsy mivadiky io. Ke Davida nan̈ontany: “A Jehovah, azôvy ma mety man̈ano vahiny amy tran̈olainao ao? Azôvy hikenao hipetraka amy bongonao masin̈y?” (Sal. 15:1) Haintsika baka amin’ny andininy io fa atsika mety hanjary vahinin’i Jehovah, ke ho kamaradinany. Tsy kaiky maventy baka amy Jehovah ma zen̈y?
TIAN’I JEHOVAH HANJARY VAHININANY ATSIKA
3. Azôvy vahinin’i Jehovah voanalohany, aviô karakôry raha tsapan’i Jehovah ndreky vahininany io?
3 Talohan’i Jehovah namôron̈o raha jiaby, mbala izy zaraiky fo antsendriky nisy. Jehovah baka tiô amy zay namôron̈o Zanany Lahitokan̈a. Izy voanalohany nampidiriny tamy tran̈olainany. Ravoravo mare Jehovah nan̈ano zen̈y. Koran̈in’ny Baiboly fa ‘tian’i Jehovah mare’ Zanany io. Vahininany voanalohany io koa ‘ravoravo fo, tankilan’i Jehovah.’—Ohab. 8:30.
4. Azôvy koa nikahin’i Jehovah han̈ano vahiny tamy tran̈olainany?
4 Jehovah baka tiô koa namôron̈o zavaboary hafa ara-pan̈ahy. Irô io koa nikahiny hivahiny tamy tran̈olainany. “Zanakan’ny Zan̈ahary” ikahiany irô anjelinany aby io, baka iô koa volan̈in’ny Baiboly, irô ravoravo miaraka amy Jehovah. (Joba 38:7; Dan. 7:10) Tan̈atin’ny taon̈o maro irô zavaboary ara-pan̈ahy aby io vahinin’i Jehovah, nipetraka niaraka taminany tan-dan̈itry tan̈y fo. Tafaran’izin̈y amin-jay, niraisiny ho vahininany koa olombelon̈o mipetraka ambony tany eto. An̈isan’olo niraisiny ho vahininany ohatra iry Enoka, Noa, Abrahama, aviô Joba. Kamaradin’ny Zan̈ahary ikahian̈a irô mpanompon’ny Zan̈ahary tsy mivadiky aby io, na koa olo nan̈ano dia araiky “tamy ten̈a Zan̈ahary.”—Gen. 5:24; 6:9; Joba 29:4; Isaia 41:8.
5. Ino raha ianarantsika baka amy faminanian̈a amin’ny Ezekiela 37:26, 27?
5 Tan̈atin’ny taonjato maro, Jehovah mbala tsy vôly nikaiky kamaradinany hanjary vahininany. (Vakia Ezekiela 37:26, 27.) Ohatra, haintsika baka amy faminanian̈an’i Ezekiela, fa ten̈a tian’ny Zan̈ahary irô mpanomponany tsy mivadiky aby io hifandray marikitry aminany. Izy nampan̈anten̈a fa han̈ano fifan̈ikiam-pihavan̈ana amindrô. Aboakan’ny faminanian̈a io fa hisy fotoan̈a irô man̈anten̈a hiain̈y an-dan̈itry an̈y ndreky irô man̈anten̈a hiain̈y ambony tany eto hiray sain̈y an̈atin’ny tran̈olainany, ke hanjary “andiany araiky fo.” (Jaona 10:16) Efa amy ziôty raha zen̈y!
ZAN̈AHARY MIKARAKARA ATSIKA FO NA AIA NA AIA TANY MISY ATSIKA
6. Akôry hahavy olo araiky hanjary vahiny amy tran̈olain’i Jehovah, aviô aia mety ahitan̈a tran̈olainany io?
6 Tamy fotoan̈a nanoratan̈a Baiboly, tran̈olay io tany fangalan̈a kajo ndreky fialofan̈a lera misy andra ratsy ndreky hafanan̈a mare. Man̈anten̈a ho voakarakara tsara olo araiky izikoa vahiny an̈atin’ny tran̈olay zen̈y. Lera atsika manokan-ten̈a amy Jehovah, atsika lôso vahiny amy tran̈olainany. (Sal. 61:4) Atsika ravoravo mankafy hanin̈y ara-pan̈ahy ndreky mifandray amin’olo hafa vahinin’i Jehovah koa. Aviô, na aia na aia tany misy atsika, atsika mety ho lôso vahinin’i Jehovah fo. Anao mety efa nan̈aton̈o fivoriamben’ny vondrom-paritry manokana tantany hafa, ke tan̈y anao nahita olo ravoravo tan̈atin’ny tran̈olain’ny Zan̈ahary koa. Atsika koa tsy mivadiky amy Jehovah, mety man̈ano vahiny amy tran̈olainany fo atsika, na aia na aia tany misy atsika.—Apok. 21:3.
7. Nan̈ino atsika mivolan̈a fa irô olo tsy nivadiky kanefa naty aby in̈y mbala vahiny amy tran̈olain’i Jehovah fo? (Zahava koa sary.)
7 Akôry fo momba olo tsy nivadiky, kanefa naty? Irô in̈y ma mbala vahiny an-tran̈olain’i Jehovah fo? Ia! Nan̈ino ma atsika mivolan̈a zen̈y? Fôtony irô in̈y mbala tsy adin̈an’i Jehovah. Karaha ty nazavain’i Jesosy: “Mosesy lastiô nivolan̈a fa mbala hivilômin̈y olo maty, tamy fitantaran̈a momba voarointsilo in̈y, izikoa izy fa nikaiky Jehovah karaha ty: ‘Zan̈aharin’i Abrahama, ndreky Zan̈aharin’Isaka, aviô Zan̈aharin’i Jakoba.’ Izy tsy Zan̈aharin’olo maty fa nin’ny velon̈o, fôtony aminany irô jiaby io velon̈o aby.”—Lioka 20:37, 38.
Ndray olo aby tsy nivadiky efa naty aby in̈y mbala konten’i Jehovah vahiny amy tran̈olainany fo (Zahava fehintsoratra 7)
INO HATSARAN̈A AZONTSIKA AVIÔ INO RAHA TSY MAINTSY ATAONTSIKA?
8. Ino hatsaran̈a azontsika nohon’ny atsika an̈atin’ny tran̈olain’i Jehovah?
8 Karaha ataon’ny tran̈olay mety hangalan̈a kajo ndreky ialofan̈a lera misy toetrandra ratsy in̈y, tran̈olain’i Jehovah io koa nataony hiarovan̈a irô vahininany aby io, amy raha handrobaka fifandraisandrô aminany ndreky han̈ampy irô hanan̈a ten̈a fan̈antinan̈a momba ny amaray. Izikoa atsika mifandray marikitry amy Jehovah fo, Satana tsy hahavita han̈ano raha handrobatan̈a fihavan̈antsika amy Jehovah mandrakizay. (Sal. 31:23; 1 Jaona 3:8) Amy donia vaovao, Jehovah mbala han̈ano raha hiarovan̈a kamaradinany fo, tsy amy raha mety handrobaka fifandraisandrô aminany fo fa hiaro irô tsy hofoaty koa.—Apok. 21:4.
9. Ino ma raha takin’i Jehovah amin’olo man̈iry han̈ano vahininany?
9 Ten̈a voninahitry maventy vahiny an̈atin’ny tran̈olain’i Jehovah zen̈y, fôtony atsika mahavita mifandray aminany mandrakizay. Ke akôry tôkony hataontsika izikoa tiantsika hanjary vahininany fo? Ohatra, anao koa vahiny antran̈on’olo, tianao hay ino raha tian’olo io hataonao. Mety ho tiany izikoa anao man̈adoso kiraro, alohan’ny anao hiditry antran̈onany, aviô anao vôn̈ono han̈araka zen̈y. Karaha zen̈y koa, tiantsika hay ino raha takin’i Jehovah amin’olo man̈iry han̈ano vahiny amy tran̈olainany. Fitiavantsika Jehovah mandrisiky atsika han̈ano eraka angôvontsika ‘hamparavoravo izy tsarabe.’ (Kol. 1:10) Ten̈a kamaradintsika Jehovah, fa izy koa Zan̈aharintsika ndreky Babantsika, ke man̈eva hajaintsika. (Sal. 25:14) Izikoa atsika mangala onon̈o zen̈y fo, atsika han̈aja izy mare fo ndreky tsy han̈adin̈a foeky azôvy izy. Atsika koa man̈aja izy mare, atsika tsy hasaky han̈ano raha mampameloko izy. Tiantsika fo ‘hanetry ten̈a, izikoa fa man̈ano dia araiky’ amy Zan̈aharintsika.—Mika 6:8.
JEHOVAH TSY NAN̈AVAKAVAKA OLO TAMY TANY PAIKY TAN̈Y
10-11. Nan̈ino fomba nitondrasan’i Jehovah irô Israelita tamy tany paiky ta Sinay tan̈y man̈aboaka fa izy tsy man̈avakavaka?
10 Jehovah tsy man̈avakavaka vahininany. (Rom. 2:11) Haintsika raha zen̈y baka tamy fitondrasany irô Israelita aby io, tamy tany paiky ta Sinay tan̈y.
11 Jehovah koa fa baka nan̈adoso vahoakanany andevo ta Ezipty, izy nanendry mpisôron̈o nanompo tamy tran̈olay tao. Fa irô Levita aby io nifidiny han̈ano asa hafa tamy tran̈olay masin̈y. Ke zen̈y ma mivolan̈a fa irô olo nanompo tamy tran̈olay tao fo ndreky irô narikitry izio tiô fo ten̈a nikarakarain’i Jehovah tozay olo hafa? Ehe. Jehovah tsy man̈avakavaka karaha zen̈y.
12. Akôry koa nan̈aboahan’i Jehovah fa izy tsy man̈avakavaka tamin’irô Israelita aby io tamy tany paiky tan̈y? (Eksodosy 40:38) (Zahava koa sary.)
12 Irô Israelita tsiaraikiaraiky samy nety nanjary kamaradin’i Jehovah aby, na irô nanompo tamy tran̈olay masin̈y na tsy nanompo tao, aviô na taia na taia tany nisy irô. Ohatra, nataon’i Jehovah azo antoko tsara fa olo jiaby tamy firenena io samy nahita rôndro ndreky môtro natevin̈y be tan̈abon’ny tran̈olay io. (Vakia Eksodosy 40:38.) Ke izikoa fa nanomboko niteky nifindra tantany hafa rôndro io, ndray olo nipetraka faran’ny lavitry tany nisy tran̈olay io, mbala nahita izio fo. Ke irô mba nan̈amboatra pakendrô koa, nan̈olon̈o tran̈olay nipitrahandrô, aviô niaraka niala tamin’olo jiaby. (Nom. 9:15-23) Baka iô koa, olo jiaby samy naharen̈y izikoa fa nitsofin̈y trompety volafotsy aroe nan̈ambara fa irô jiaby efa mila nandeha. (Nom. 10:2) Hita baka amy zen̈y fa tsy olo nipetraka narikitry tran̈olay masin̈y fo ten̈a nifandray marikitry tamy Jehovah, fa irô Israelita tsiaraikiaraiky samy nety nanjary vahinin’i Jehovah aby, aviô samy natoky fa Jehovah nitariky irô ndreky niaro irô. Karaha zen̈y koa amy ziôty. Na aia na aia tany ipitrahantsika ambony tany eto, Jehovah tia atsika fo, mikarakara atsika, baka iô miaro atsika.
Fan̈apitrahan’i Jehovah tran̈olay masin̈y tan̈ivon’ny tobindrô Israelita aby io man̈aporofo fa izy tsy man̈avakavaka (Zahava fehintsoratra 12)
IZIÔTY KOA JEHOVAH TSY MAN̈AVAKAVAKA
13. Ino fomba araiky an̈aboahan’i Jehovah fa izy tsy man̈avakavaka ankitin̈y iziôty?
13 Sasany amy vahoakan’i Jehovah iziôty mipetraka marikitry foibe eran-tany an̈y, aviô sasany marikitry birôn’ny sampan̈an’ny Vavolombelon̈on’i Jehovah. Sasany mipetraka an̈atin’ny tany aby io ao foeky, ke afaka man̈ano asa maro atao ao ndreky mifandray marikitry koa amindrô rahalahy mitariky atsika aby io. Sasany koa mpiandraikitrin’ny faritry ndreky man̈ano karazan̈a fanompoan̈a manontolo andra hafa. Izikoa anao an̈atindrô olo maro tsy an̈isandrô olo aby voakoran̈a tiô in̈y, matokisa fa Jehovah tia lan̈iany olo jiaby nikeny ho vahininany. Izy mahay tsarabe anao ndreky mikarakara raha ilainao. (1 Pet. 5:7) Aviô, vahoakan’i Jehovah jiaby samy mahazo hanin̈y ara-pan̈ahy, tari-dalan̈a ndreky fiarovan̈a ilaindrô.
14. Ino koa fomba hafa an̈aboahan’i Jehovah fa izy tsy man̈avakavaka?
14 Ino koa fomba hafa an̈aboahan’i Jehovah fa izy tsy man̈avakavaka? Izy man̈amia Baiboly, ke olo jiaby eran-tany mety mamaky izio aby. Tamy voanalohany, Soratra Masin̈y io tamy volan̈a telo fo: Hebreo, aramanin̈y ndreky griky. Izio ma irô olo mahay mamaky Soratra Masin̈y amy volan̈a aby io fo mety mifandray marikitry amy Jehovah? Ehe, tsy karaha zen̈y.—Mat. 11:25.
15. Ino koa raha momba Baiboly ahitan̈a fa Jehovah tsy man̈avakavaka? (Zahava koa sary.)
15 Tsy miankiny amy fianaran̈a vitantsika ndreky volan̈a haintsika andraisan’i Jehovah atsika ho kamaradinany. Ke tsy olo nahita fianaran̈a fo amezany fahendrena fa olo jiaby eran-tany, na manam-pahaizan̈a na tsy manam-pahaizan̈a. Baiboly volan̈anany io nadika amy volan̈a andrivony aby. Ke olo jiaby eran-tany samy mahazo hatsaran̈a baka amy raha ampianarin’izio aby ndreky samy mety mianatra akôry hahavy irô hanjary kamaradin’ny Zan̈ahary.—2 Tim. 3:16, 17.
Nan̈ino ma fandikan̈a Baiboly amy volan̈a andrivony, ahitan̈a fa Jehovah tsy man̈avakavaka? (Zahava fehintsoratra 15)
MIFEN̈A BAKA JEHOVAH ‘HANKASITRAKA’ ANAO FO
16. Eraka raha volan̈in’ny Asan’ny Apostoly 10:34, 35, akôry hahavy atsika ho ankasitrahin’i Jehovah fo?
16 Ten̈a voninahitry maventy raisin’i Jehovah ho vahiny amy tran̈olainany zen̈y. Izikoa mbala fandraisan̈a vahiny edy, tsisy mandilatra Jehovah. Izy baka faran’ny tsara fan̈ahy sady ten̈a tia olo. Aviô koa, izy tsy man̈avakavaka, ke olo jiaby raisiny aby na aia na aia tany misy irô, na karakôry fombandrô, fianaran̈a vitandrô, karazan̈andrô, foko naviandrô, taon̈ondrô, baka iô na lelahy izy na man̈angy. Fa ndray zen̈y, lan̈iany olo man̈araka volan̈anany fo ikeny ho vahininany.—Vakia Asan’ny Apostoly 10:34, 35.
17. Aia ahitantsika fan̈ampin’ny fan̈azavan̈a mikasiky fan̈anaovan̈a vahiny an-tran̈olain’i Jehovah?
17 Amy Salamo 15:1, Davida nan̈ontany karaha ty: “A Jehovah, azôvy ma mety man̈ano vahiny amy tran̈olainao ao? Azôvy hikenao hipetraka amy bongonao masin̈y?” Mbala Davida fo koa nampiasain’i Jehovah hamaly fan̈ontanian̈a zen̈y. Lahatsoratra fan̈araka ty han̈azava ino raha tsy maintsy hataontsika baka atsika hanjary kamaradin’i Jehovah fo.
HIRA 32 Miandania Amin’i Jehovah!
