NGANI JAKULIJIGANYA 23
NYIMBO NA. 28 Kuŵa Mjakwe Jwa Yehofa
Yehofa Akusaka Kuti Tuŵe Achalendo Ŵakwe
“Nyumba [tenti] jangu jichiŵa pasikati pawo. Une tinjiŵa Mlungu jwawo.”—ESEK. 37:27.
CHAKULINGA CHA NGANIJI
Kutukamuchisya kupikanichisya yayikusagopolela kuŵa achalendo mu chitenti cha Yehofa chakuwanichisya, nambosoni yakusatenda jwalakwe pakutusamalila mpela achalendo ŵakwe.
1-2. Ana Yehofa akutuŵenda kuti tutende chichi?
ANA mpaka ajanje uli naga mundu jwine ali ŵawusisye kuti ana akusamwona chamti uli Yehofa? Komboleka mpaka ajanje kuti, ‘Yehofa ali Atati ŵangu, ali Mlungu jwangu nambosoni ali mjangu.’ Nambotu kombolekasoni akusamwona Yehofa m’matala gakulekanganalekangana. Nambo ana akusamanyililasoni kuti wawojo ali mlendo jwa Yehofa?
2 Pakwamba ya unasi wawupali pasikati pa Yehofa ni ŵakutumichila ŵakwe ŵakulupichika, Mwenye Daudi jwalandenye yeleyi ni unasi wawukusapagwa pasikati pa msyene nyumba ni mlendo. Jwalakwe jwatite, “Ŵalakwe AMBUJE, ana ŵani ŵatajinjile m’Nyumba jawo? Ana ŵani ŵampaka apakombole kulambila petumbi lyawo lyeswela?” (Sal. 15:1) Maloŵegatu gakutukamuchisya kumanyilila kuti yili yakomboleka kuŵa achalendo ŵa Yehofa soni achimjakwe. Kusala yisyene, welewutu uli upile wekulungwa mnope watupele Yehofa.
YEHOFA AKUSASAKA KUTI TUŴE ACHALENDO ŴAKWE
3. Ana mlendo jwandanda jwa Yehofa jwaliji ŵani? Ana Yehofa pampepe ni mlendo jwakweju ŵapikanaga uli?
3 Yehofa mkanaŵe kupanganya chilichose jwaliji jika. Nambo kaneko jwalakwe jwampochele Mwanache jwakwe jwandanda kupagwa mu chitenti chakwe chakuwanichisya. Pelepatu Mwanache jwakwejo jwaliji mpela mlendo jwakwe. Mwamti Yehofa jwasangalele mnope ligongo lya yeleyi. Baibulo jikusasala kuti Yehofa “jwasangalele mnope” ligongo lya Mwanache jwakweju. Nombe najo mlendo jwakweju ‘jwaŵaga jwakondwa pameso pakwe ndaŵi syosope.’—Mis. 8:30.
4. Ana ŵani ŵaŵaŵelesoni achalendo mu chitenti cha Yehofa?
4 Kaneko Yehofa ŵapanganyisye yakupanganyikwa yausimu mwamti yaŵelesoni achalendo ŵakwe. Yakupanganyikwa yausimuyi yikusakolanjikwa kuti “ŵanache ŵa Mlungu,” mwamti akusaŵaga ŵakusangalala pakutenda yindu yimpepe ni Yehofa. (Yob. 38:7 NWT; Dan. 7:10) Mwamti kwa yaka yejinji malayikape ni gagaliji achimjakwe ŵa Mlungu kwinani. Kaneko pali papitile ndaŵi, Yehofa jwapanganyisye ŵandu. Mwamti jwalinganyisyesoni kuti jemanjaji aŵe achalendo ŵakwe mu chitenti chakwe. Ŵane ŵa jemanjaji ŵaliji Inoki, Nowa, Abulahamu soni Yobu. Ligongo lyakuti jemanjaji ŵamtumichilaga Mlungu mulitala lyakuŵajilwa, ŵakolanjidwaga kuti achimjakwe ŵa Mlungu kapena ŵandu ŵaŵajendaga “ni Mlungu jusyesyene.”—Gen. 5:24; 6:9; Yob. 29:4; Yes. 41:8.
5. Ana tukulijiganya yamti uli pa yakulochesya ya pa Esekiele 37:26, 27?
5 Kwa yaka yejinji Yehofa aŵele ali mkupitilisya kwaŵilanga achimjakwe kuŵa achalendo ŵakwe. (Aŵalanje Esekiele 37:26, 27.) Mwachisyasyo, mu yakulochesya ya Esekiele tukusalijiganya kuti Mlungu jwakuwona akusasaka kuti ŵakutumichila ŵakwe ŵakulupichika aŵeje paunasi wambone ni jwalakwe. Mwamti jwalakwe jwasasile kuti tachitenda nawo ‘chilanga chasambano chamtendele.’ Yakulochesya yeleyi yikusasala ya ndaŵi jele ŵandu ŵakwete chembecheyo chakwawula kwinani nambosoni ŵakwete chembecheyo chakutama pachilambo chapasi chachiŵa ŵakamulana mnope mu chitenti chakuwanichisya cha Yehofa mpela “gulu jimpepe.” (Yoh. 10:16) Yeleyitu ni yayikutendekwa apano.
MLUNGU AKUSASAMALA YA M’WEJI NDAŴI SYOSOPE
6. Ana mundu mpaka aŵe chamti uli mlendo mu chitenti cha Yehofa? Ana chitenti chakwechi mpaka tuchipate kwapi?
6 Mu ndaŵi ja m’Baibulo ŵandu ŵakolaga yitenti kuti ajuŵejemo soni kuti apumulejemo. Mwamti mlendo jwayiche mu chitenti chelechi jwajembecheyaga kuti chamsamalile chenene. Myoyo, mundu palipeleche kuti aŵe paunasi wambone ni Yehofa, akusaŵa mlendo jwakwe mu chitenti chakwe chakuwanichisya. (Sal. 61:4) Tukusasangalala ni chakulya chausimu chejinji nambosoni unasi watukwete ni ŵandu ŵanesoni ŵali achalendo ŵa Yehofa. Ŵandu ŵa m’yilambo yosope mpaka aŵesoni achalendo mu chitenti chakwe chakuwanichisya. Komboleka wawojo pakwete papite m’chilambo chine kukutenda msongano wa yilambo. Ngatukukayichila kuti kweleko ŵasimene ni ŵandu ŵane ŵakusangalala ligongo lyakuŵa mu chitenti cha Mlungu. Mwamti chitenti cha Yehofachi chikusasimanikwa kulikose kwali ŵakutumichila ŵakwe ŵakulupichika.—Chiw. 21:3.
7. Ligongo chichi mpaka tusale kuti ŵandu ŵaŵawile kalakala ali chiŵela achalendo mu chitenti cha Yehofa? (Alole chiwulili.)
7 Nambi uli pakwamba ya ŵandu ŵakulupichika ŵaŵawile? Ana mpaka yiŵe yakupikanika kusala kuti jemanjaji ali chiŵela achalendo mu chitenti cha Yehofa? Elo yili yakupikanika. Tukuŵecheta yeleyi ligongo lyakuti Yehofa akwakumbuchilape jemanjaji. Mwamti kwa jwalakwe jemanjajo ali ŵachiŵela chijumi. Panganiji Yesu ŵatite, “Pakwamba ya kwimuka kwa ŵandu ŵawe, ni ata Mose jwayikolasile yeleyi mungani ja liwukutu lya miŵa. Jwalakwe ŵasasile kuti Yehofa ali ‘Mlungu jwa Abulahamu, Mlungu jwa Isaki soni Mlungu jwa Yakobo.’ Jwalakwe ali Mlungu jwa ŵandu ŵaumi ngaŵaga ŵawe, pakuŵa kwa jwalakwejo wosope ali ŵaumi.”—Luk. 20:37, 38.
Atamose ŵandu ŵakulupichika ŵaŵawile Mlungu akusiŵawona kuti ali achalendo mu chitenti chakwe (Alole ndime 7)
UMBONE WATUKUSAPA LIGONGO LYAKUŴA MLENDO JWA YEHOFA
8. Ana ŵandu ŵali achalendo mu chitenti cha Yehofa akusapata ma umbone gapi?
8 Mpela mwayikusaŵela ni chitenti chisyesyene kuti chikusaŵa malo gambone gakupumulila nambosoni gakuŵamo, nombe chitenti cha Yehofa chikusatuchenjela ku yindu yampaka yisokonasye unasi wetu ni jwalakwe, nambosoni chikusatupa chembecheyo cha msogolo. Naga tukupitilisya kuŵa paunasi ni Yehofa pangali chilichose champaka atende Satana champaka chijonanje sogolo jetu mpaka kalakala. (Sal. 31:23; 1 Yoh. 3:8) M’chilambo chasambano, Yehofa chachipitilisya kwachenjela achimjakwe ŵakulupichika ku yindu yampaka yisokonasye unasi wawo ni jwalakwe nambosoni chachipitilisya kwachenjela ku chiwa.—Chiw. 21:4.
9. Ana Yehofa akusajembecheya kuti achalendo ŵali mu chitenti chakwe chatendeje yindu yapi?
9 Kusala yisyene uli upile wekulungwa mnope kuŵa achalendo mu chitenti cha Yehofa. Mwamti yeleyi mpaka yitukamuchisye kuŵa paunasi wakulimba ni jwalakwe mpaka kalakala. Ana tukusosekwa kutenda chichi kuti tupitilisyepe kuŵa achalendo mu chitenti cha Yehofa? Naga mundu jwine jwaŵilasile kuti akaŵe mlendo kunyumba jakwe, mpaka asache kumanyilila yindu yampaka akasosekwe kutenda pakusaka kumsangalasya mundujo. Mwachisyasyo, jwalakwe mpaka asache kuti wawojo akawule sapato mkanajinjile m’nyumba. Pakusaka kumsangalasya msyenejo nganaŵa adandawile kutenda yeleyo. Mwakulandana ni yeleyi, m’wejisoni tukusasaka kumanyilila yindu yakusasaka Yehofa kuti atendeje ŵandu ŵakusaka kupitilisya kuŵa achalendo mu chitenti chakwe. Kumnonyela kwetu Yehofa kukusatutendekasya kuti tutendeje chilichose champaka tukombole pakusaka kumsangalasya “pa chilichose.” (Akolo. 1:10) Nambosoni kumanyilila kuti Yehofa ali mjetu, kukusatutendekasya kumanyilila kuti jwalakwe ali Mlungu jwetu, nambosoni Mtati jwetu jwatukusasosekwa kumchimbichisya. (Sal. 25:14) Ndaŵi syosope tukusosekwa kukumbuchilaga mfundo jeleji ni kumchimbichisyaga mnope jwalakwe. Patukumchimbichisya mnope Yehofa yichitukamuchisya kuti tuŵambale kutenda yiliyose yampaka yimsakalisye mnope jwalakwe. Mwamti ndaŵi syosope tuchilingalinga “kwenda mwakulinandiya” pameso pa Mlungu jwetu.—Mik. 6:8.
YEHOFA JWATENDAGA YINDU MWANGALI LUSAGU NI AYISALAYELI PAŴAJENDAGA M’CHIPULULU
10-11. Ana yindu yaŵatendelaga Yehofa Ayisalayeli paŵaliji m’chipululu cha Sinai yalosyaga chamti uli kuti ali jwangali lusagu?
10 Yehofa nganatendaga yindu mwalusagu ni Ayisalayeli ŵaŵaliji achalendo ŵakwe. (Alo. 2:11) Patukuganichisya muŵatendelaga yindu Yehofa ni Ayisalayeli paŵajendaga m’chipululu cha Sinai mpaka yitukamuchisye kumanyilila kuti jwalakwe jwangali lusagu.
11 Yehofa ali ŵagopwele ŵandu ŵakwe ku ukapolo ku Iguputo jwasagwile ŵambopesi kuti atumichileje mu chitenti chakwe. Mwamti jwalakwe ŵasagwile Alefi kuti akamuleje gane mwa masengo mu chitenti chakwechi. Ana ŵandu ŵaŵatumichilaga ku chitenti cha Mlunguchi kapena ŵandu ŵane ŵaŵatendaga ma utumiki gane pa nyumbaji ŵaliji ŵakusosekwa mnope kwapunda ŵandu ŵane? Iyayi, Yehofa nganatendaga lusagu.
12. Ana litala line lyapi liŵalosisye Yehofa kwa Ayisalayeli kuti ali jwangali lusagu? (Ekisodo 40:38) (Alole chiwulili.)
12 Ayisalayeli wosope ŵaliji ŵakusosekwa mnope pameso pa Yehofa. Chinga ŵatumichilaga ku chitenti cha Mlungu kapena iyayi, nambosoni chinga ŵatamaga mwakuŵandichila chitentichi kapena ŵatamaga mwakutalichilana nacho. Mwachisyasyo, Yehofa jwalinganyisye yakuti mtundu wosope wa Ayisalayeli ukomboleje kulola chipilala cha liwunde soni chipilala cha moto yayajimaga penani pa chitenti cha Mlungu. (Aŵalanje Ekisodo 40:38.) Naga liwunde litandite kwinjilila mbali jine, atamose ŵandu ŵaŵatamaga kwakutalichila mnope ni chitenti cha Mlunguchi ŵakombolaga kulola. Mwamti ŵalonganganyaga katundu jwawo, kupasulanya yitenti yawo ni kunyakuka soni kwendelaga yimpepe ni mtundu wosopewo. (Num. 9:15-23) Mwamti jwalijose jwakombolaga kupikana kulila kwa malipenga gaŵili ga silifa kuti anyakuche. (Num. 10:2) Yeleyitu yigamba kulosya kuti kutama mwakuŵandichila chitenti cha Mlungu nganikuŵa umboni wakulosya kuti mundujo ali paunasi wambone ni Yehofa kupunda ŵandu ŵaŵatamaga kutali. Mmalomwakwe, Ayisalayeli wosope ŵaliji achalendo ŵa Yehofa. Soni ŵaliji ŵakusimichisya kuti jwalakwe chiŵalongoleleje soni kwachenjela. Mwakulandana ni Ayisalayeliŵa, masiku aganosoni mwangasamala kandu ya malo gatukusatamaga pachilambopa, Yehofa mpaka atunonyele, kutulolela, kutusamalila nambosoni kutuchenjela.
Dongosolo jiŵalinganyisye Mlungu pa chitenti chakwe jikusalosya kuti jwalakwe ali jwangali lusagu (Alole ndime 12)
YAKUTENDA YEHOFA PAKULOSYA KUTI ALI JWANGALI LUSAGU
13. Ana ni litala limo lyapi lyakusalosya Yehofa masiku agano kuti ali jwangali lusagu?
13 Ŵakutumichila ŵane ŵa Yehofa masiku agano akusatamaga chiŵandika likulu lyetu lya pachilambo chosope kapena chiŵandika ma ofesi ga nyambi ga Mboni sya Yehofa. Sonitu pana ŵandu ŵakusatumichila mmalo gelega. Yeleyi yikusatendekasya kuti ŵandu ŵeleŵa akole upile wakutenda nawo yindu yine yayikusatendekwa mmalo gelega nambosoni upile wakumanyigana ni abale ŵakusalongolela m’guluji. Pele ŵandu ŵane akusatumichila mpela ŵakulolela madela kapena kutenda ma utumiki gane gapadela gandaŵi syosope. Naga wawojo apano nganakola upile wakutenda nawo yindu yeleyi aŵe ŵakusimichisya kuti Yehofa akusiŵanonyela ŵandu wosope ŵali achalendo mu chitenti chakwe. Mwamti jwalakwe akusammanyilila mundu jwalijose pajika soni kumpa yiliyose yakusosechela. (1 Pet. 5:7) Kusala yisyene ŵakutumichila wosope ŵa Mlungu akusapochela yindu yakwakamuchisya kuŵa paunasi wambone ni jwalakwe, akusapochela malangiso, nambosoni akusiŵachenjelaga.
14. Ana ni chisyasyo chine chapi chachikusalosya kuti Yehofa ali jwangali lusagu?
14 Chisyasyo chine chakulosya kuti Yehofa ali jwangali lusagu chili chakuti jwalakwe alinganyisye yakuti jwalijose pachilambopa akole upile wakola Baibulo. Malemba geswela galembedwe mu yiŵecheto yitatu yandanda yayili Chihebeli, Chigiliki nambosoni Chialamu. Ana ŵandu ŵakusakombola kuŵalanga Baibulo m’yiŵecheto yeleyi ni ŵali paunasi wambone ni Yehofa kwapunda ŵandu ŵane? Iyayi. Nganiyiŵa myoyo.—Mat. 11:25.
15. Ana chichi chachikusapeleka umboni wakulosya kuti Yehofa ali jwangali lusagu? (Alole chiwulili.)
15 Kuti tuŵe paunasi wambone ni Yehofa yangadalila majiganyo gapenani gatukwete, kapena lunda lwatukwete lwakumanyilila yiŵecheto yejinji. Mmalo mwakuti Yehofa agambe kwapa lunda ŵandu ŵalijiganyepe, jwalakwe jwapelechesoni lunda kwa ŵandu wosope pachilambopa chinga ali ŵalijiganye mnope kapena iyayi. Mwamti Baibulo jajili Maloŵe gakwe jigopoleledwe m’yiŵecheto masausande gejinji. Yeleyitu yikamuchisye kuti ŵandu pachilambopa akole upile wakulijiganya soni kumanyilila yampaka atende kuti aŵe achimjakwe ŵa Mlungu.—2 Tim. 3:16, 17.
Ana kusimanikwa kwa Baibulo m’yiŵecheto yejinji masiku agano kukusalosya chamti uli kuti Mlungu ali jwangali lusagu? (Alole ndime 15)
APITILISYE KUTENDA YINDU “YAKUŴAJILWA” PAMESO PA YEHOFA
16. Mwakamulana ni Masengo 10:34, 35, ana tukusosekwa kutenda chichi kuti Yehofa apitilisye kutujitichisya pameso pakwe?
16 Kusala yisyene uli upile wekulungwa mnope kutama mu chitenti cha Yehofa chakuwanichisya. Jwalakwe ali jwachinonyelo soni jwakwapochela chenene achalendo. Konjechesya pelepa jwalakwe ali jwangali lusagu, mwamti akusampochela mundu jwalijose mwangasamala kandu ya malo gakusatamaga, mtundu wakwe, chiŵecheto chakwe, majiganyo gakwete, yaka yakwete nambosoni chinga ali jwamkongwe kapena jwamlume. Nambotu Yehofa akusiŵapochela ŵandu ŵelepewo ŵakusampikanilaga.—Aŵalanje Masengo 10:34, 35.
17. Ana mungani jakuyichisya tuchikambilana chichi?
17 Pa Salimo 15:1, Daudi jwawusisye yiwusyo yakusosekwa mnope yakuti, “Ŵalakwe AMBUJE, ana ŵani ŵatajinjile m’Nyumba jawo? Ana ŵani ŵampaka apakombole kulambila petumbi lyawo lyeswela?” Mwamti Daudiju jwasalilidwe kwanga kwa yiwusyoyi mu chaputala chichichi. Mungani jakuyichisya tuchikambilana yindu yakusasosekwa kutenda mundu kuti Yehofa amjitichisyeje.
NYIMBO NA. 32 Aŵe ku Mbali ja Yehofa
