DISOLO DI NDONGOKOLO 23
NKUNGA 28 Tózala baninga ya Yehova
Yehova wututedisidi muingi tuba banzenza bandi
‘Nzo’ama yi ngoto yela ba ayi bawu, ayi ndiela ba Nzambi’awu.’—YEH. 37:27.
MAMBU MO MADI MU KHATI DISOLO DIADI
Disolo diadi madi tusadisa tuyonzula phutudulu matondo’eto mu thedosolo yi Yehova yi banzenza mu khati nzo’andi yi ngoto yi mbonosono, ayi matu sudika phila yoyi keta tutanina bo katutedisidi.
1-2. Thedosolo mbi Yehova kalembo vani kuidi bisadi biandi bikuikama?
ENATI mutu wuyuvudi, Yehova nani kadi kuidi ngeyo? Mbi mawu tuba? Wulenda tuba ti: ‘Yehova widi Siama, Nzambi’ama ayi Nkundi’ama.’ Kuidi phe na zititre voti zithedolo zinkaka zio wulenda sadila mu diambu di Yehova. Vayi, ngeyo phe weta mona ti Yehova weta kutedisa ayi kuyakula?
2 Ntinu Davidi wudedikisa bukundi bu Yehova ayi bisadi biandi bikuikama na mutu nioni yakudi banzenza ku nzo’andi. Wuyuvula: “A Yehova, nani wulenda vuanda mu nzo’aku yi ngoto? Nani wulenda zinga ku mongo’aku wu Nlongo?” (Nku. 15:1) Mu nzila yi ziphova beni ziozi zisonimini mu lutuadusu lu pheve santu, tumueni ti tulenda ba banzenza ba Yehova—mu ba bakundi bandi. Yoyi yidi thedosolo yinneni yibedi kuidi Yehova, buawu ko buididi?
YEHOVA TIDI TUBA BANZENZA BANDI
3. Nani wuba nzenza yitheti kuidi Yehova, ayi phila mbi nzenza beni ayi niandi beba wizininanga?
3 Tuamina katona tsemono, Yehova wuba niandi veka. Vayi mu thangu mosi plina, wuyakula muan’andi wutheti mu nzo’andi yi ngoto yi mbonosono. Yehova wuyangalala buwombo kiyeko kiandi kimona kiba Nyakudi. Bibila kitumonisini ti Yehova “weba zolanga buwombo” Muan’andi. Nzenz’andi yitheti, mvandi phe, “weba yangalalanga thangu ka thangu ba va ntuala [Yehova].”—Zin. 8:30.
4. Banani diaka Yehova katedisa ku nzo’andi yi ngoto?
4 Kumanima, Yehova wuvanga bivangu binkaka bi kipheve, wubatedisa bawu phe baba banzenza ziandi. Bibila kitedidi bambasi “bana ba Nzambi” ayi mu zikhini bakala mu thangu badi ayi Yehova. (Yobi 38:7; Dan. 7:10) Mu mimvu miwombo, bakundi ba Nzambi baba kaka bo baba yandi ku diyilu. Kuntuala, wuyiza todisa nzo’andi yi ngoto muingi ka mu kotisa batu bo baba va mbata ntoto. Mu batu bobo babaka diluaku beni, yiba Enoki, Nowa, Abalahami, ayi Yobi. Bisadi beni bikiedika batedolo bakundi ba Nzambi, badiata “ayi Nzambi yi kiedika.”—1 Mo 5:24; 6:9; Yobi 29:4; Yes. 41:8.
5. Dilongi mbi tulenda baka mu mbikudulu yi Yehezekieli 37:26, 27?
5 Mu phiokosolo yi zikhama zi mimvu, Yehova wulembo tatamana tedisa bakundi bandi muingi baba banzenza ziandi. (Tanga Yehezekieli 37:26, 27.) Mu kifuani, mbikudulu yi Yehezekieli yitumonisini ti Nzambi tidi ti bisadi biandi bikuikama biba na nguizani yingolo ayi Niandi. Veni tsila yi ‘luwawanu lu ndembama ayi bawu.’ Mbikudulu beni yimonisini thangu yoyi bisadi bi Yehova bio bidi vuvu ki zingila ku diyilu ayi bio bidi vuvu ki zingila va mbata ntoto biela bela mu bumosi mu nzo yi ngoto yi mbonosono banga “nkangu wumosi.” (Yow. 10:16) Thangu beni yawu yayi!
NZAMBI WETA KUTUTUDILA THALU BUBA VOSO KUANDI TUIDI
6. Bue mutu keta kuiza bela nzenza mu nzo yi ngoto yi Yehova, ayi kue tulenda muena nzo’andi yi ngoto?
6 Mu Bibila, nzo yi ngoto kiba buangu kioki mutu kabe vundilanga ayi keba belanga mu lutanunu lu bivuka. Mutu nioni babe tedisanga mu nzo yi ngoto, weba banga na vuvu ki kipu bumboti. Mu thangu tukiveni kuidi Yehova, tueta ba banzenza mu nzo’andi yi ngoto yi mbonosono. (Nku. 61:4) Tulembo baki mamboti ma bidia biwombo bi kipheve, ayi mamboti ma bukundi bu batu bankaka bo bayika banzenza zi Yehova. Nzo’andi yi ngoto yi mbonosono, yisi ko kaka va buangu kimosi plina. Bulendakana wume teka kuenda mu tsi yi kinzenza, mu kue kutakana mu lukutukunu lunneni lu sipesiali, ayi wudengana na batu bankaka bo babaka lusakumunu luba mu nzo yi ngoto yi Nzambi. Tulenda kuyimona, muma moso momo muidi bisadi bikuikama bi Yehova.—Tso. 21:3.
7. Bila mbi tulenda tubila ti bisadi bikuikama bi Yehova bio bifua, bidi kaka mu nzo yi ngoto yi Yehova? (Tala phe photo.)
7 A buabu bisadi bikuikama bio bifua? Tulenda banzila ti badi kaka banzenza mu nzo yi ngoto yi Yehova? Ninga! Bila mbi tubutubidi? Bila badi bamoyo mu mayindu ma Yehova. Yesu wusudikisa ti: “Mose wutelama kimbangi ti bafua bela fuluka mu nzila yi mua nti fieba lema, bila kuna katedila Pfumu ti ‘Nzambi yi Abalahami, Nzambi yi Izaki, Nzambi yi Yakobi.’ Vayi niandi, kasi Nzambi yi bafua ko, vayi Nzambi yi batu badi moyo, bila kuidi niandi, bawu boso balembo zingi.”—Luka 20:37, 38.
Buba batu bakuikama bo bafua balenda tatamana ba batu batedesolo mu nzo yi ngoto yi Nzambi (Tala paragrafi 7)
MAMBOTI MOMO TUETA BAKA AYI MAMBU MOMO META TOMBANA MUINGI TUTEDUSU KUIDI YEHOVA
8. Mamboti mbi batu bobo batedusulu kuidi Yehova mu ba mu nzo’andi yi ngoto beta baka?
8 Bobuawu kuandi phila yoyi nzo yi ngoto yeta monikina mu meso yilenda bela buangu ki phundulu ayi kisuamina bivuka, nzo yi ngoto yi Yehova phe yeta tanina batu bo katedisidi mu yawu mu mambu momo malenda vonda kipheve ki mutu ayi mu kambu ku vuvu. Beto tatamana ba pfika pfika kuidi Yehova, Satana kalendi ko kutuvangila mambu mambimbi momo malenda kututovula mvu ka mvu. (Nku. 31:23; 1 Yow. 3:8) Mu nza yimona, Yehova wela tatamana tanina bisadi biandi bikuikama bika kaka mu bivonza bi phevi zimbimbi vayi ayi mu lufua phe.—Tso. 21:4.
9. Bue Yehova keta tombila batu bo katedisidi kuidi niandi bazingila?
9 Luidi lukumu lunneni mu tedoso mu nzo yi ngoto yi Yehova—mu ba nguizani ayi niandi ayi tatamana ba kithuadi ayi niandi. Bikadulu mbi tufueti ba na biawu enati tutidi tatamana ba batu bo katedisidi? Bawu kutedisa ku nzo yi mutu, mawu tomba zaba bue bukadila ku nzo beni. Mu kifuani, kalenda kulomba wuvula maphapa tuamina wukota, ayi mawu butudila mu luzolo loso. Bobuawu phe, matu tomba zaba mambu mo Yehova keta tomba kuidi bobo batidi tatamana ba banzenza mu nzo’andi yi ngoto. Luzolo lueto mu diambu di Yehova, lueta kututuma tuvanga mamoso momo tulenda vanga “mu kummonisa khini mu mambu moso.” (Kol. 1:10) Ayi mu thangu tueta tadila Yehova banga Nkundi’eto, buawu tueta luta bue sudikila bumboti mboti ti widi Nzambi’eto, ayi Disa dieto, nioni fueni tambula luzitu lueto. (Nku. 25:14) Beto ba mayindu ma phila yoyi, tulendi ko zimbakana nani kadi, ayi matu tatamana kun’zitisa buwombo. Beto ba luzitu luphila yoyi yawu mayi tusadisa tubika vanga mambu momo ma kumfuemisa. Tuidi na phuila “yi diatila mu kukikulula” ayi Nzambi’eto.—Mika 6:8.
MU DIKANGA YEHOVA KASI BA KO THALU ZIZI
10-11. Mu phila mbi bio mambu mo Yehova kavangila bana ba Iseli mu dikanga di Sinayi mamonisini ti kakala ko thalu zizi?
10 Yehova kakala ko thalu zizi mu nguizani yo kakala na batu bo katedisidi kuidi niandi. (Lom. 2:11) Tulenda baka diyindu mu kambu ku thalu zizi ku Yehova mu phila yoyi kavangila bana ba Iseli mambu mu dikanga di Sinayi.
11 Kumanima makula batu bandi mu buvika ku Ngipiti, Yehova wusobula zinganga zinzambi muingi basala ku tabernakle. Balevi bawu babaka kiyeko kisala bisalu biobi biba mu nzo beni yi ngoto yi busantu. Batu bobo beba salanga ayi bobo beba vuandanga ku tabernakle, bawu beba luta bakanga mamboti kuidi Yehova viokila batu bankaka? Nana! Yehova kakala ko thalu zizi.
12. Phila yo Yehova kavangila bana ba Iseli mambu mu dikanga, bue yimonisina ti kasi ko thalu zizi? (Wanzole wa Mose 40:38) (Tala phe foto.)
12 Kadika muana Iseli wuba na diluaku diba na kikundi kingolo ayi Yehova, buba ti kasi sadila ko ku tarbenakle, voti nzo’andi yisi ba ko pfika pfika ayi tarbenakle. Mu kifuani, Yehova wutula ti dikanda dioso di bana ba Iseli dibaka diluaku di mmona dituti dingitukulu ayi dikunzi di mbazu dio ditulu va mbata tabernakle. (Tanga Wanzole wa Mose 40:38.) Mu thangu yoyi dituti dieba nikukinanga mu kuenda ku ndambusu yinkaka, buba na bobo baba kielo ayi tabernakle, baba na diluaku di mmona dituti beni, yawu yibe kubasadisanga bakupika bima biawu, zinzo ziawu zingoto, ayi landakana phila yinkuendila batu bankaka. (4 Mo. 9:15-23) Batu boso baba na diluaku di wa biyoko bi batu, ayi bivindu biviakana bi ziphungi ziwadi zipalata ziozi zibe monisanga kuidi batu boso mfunu wutelama muingi babaka bukuendila. (4 Mo. 10:2) Yimonikini bumboti mboti ti vuanda pfika pfika ayi tabernakle, kiawu ko kiba dimbu kieba monisanga ti mutu bukundi bungolo kadi ayi Yehova. Kutu kadika muana Iseli, wuba na diluaku ditedoso kuidi Yehova ayi ba sikididi ti maka ntuadisa ayi maka ntanina. Phila mosi phe lumbu kiaki, buba koso kuandi ko tueta vuanda, tulenda baka mamboti ma luzolo, ayi lutanunu lu Yehova.
Khubukulu yi Nzambi mu diambu ditedi tarbenakle yimonisa ti kasi ko thalu zizi (Tala paragrafi 12)
BIFUANI BI THANGU YAYI BIOBI BIMMONISA TI YEHOVA KAKALA KO THALU ZIZI
13. Mu phila mbi lumbu kiaki Yehova keta monisina kondo ku thalu zizi?
13 Lumbu kiaki, bisadi binkaka bi Nzambi bieta zingila pfika pfika yi bilu kinneni voti yi Beteli yi Bambangi zi Yehova. Bankaka beta sadila ku bilu beni kinneni voti mu zi Beteli. Yawu yeta tula ti batu beni bana babaka diluaku disala bisalu biwombo bio bilembo salama mu bibuangu beni, ayi beta baka diluaku disala va kimosi ayi batu bo balembo tuadisa bisalu beni. Bankaka badi minkengi mi zunga, ayi bankaka badi mu bisalu binkaka bisipesiali bi thangu ka thangu. Enati wisi ko mu khati batu beni bana lumbu kiaki, ba sikididi ti, Yehova nio wututedisidi ti weta zola batu boso bo katedisidi kuidi niandi. Ayi baboso weta kubatanina. (1 Pi. 5:7) Bisadi bioso bi Nzambi bieta baka bidia bi kipheve, lutuadusu, ayi lutanunu lo lufueni.
14. Kifuani mbi kinkaka kimmonisa ti Yehova kakala ko thalu zizi bo katutedisidi kuidi niandi?
14 Kifuani kinkaka kio kimmonisa ti Yehova kasi ko thalu zizi bo katutedisidi kuidi niandi, kidi ti veni batu boso mu nza yimvimba diluaku dibaka Bibila. Masonoko ma santu mo masonimina mu zimbembo zitatu: Mu ki Ebelewo, mu ki Armeye ayi mu ki Ngeleki. Batu bo bazebi tanga Bibila mu zimbembo ziozi kisonimina, bawu balutidi nguizani yingolo ayi Yehova viokila bo basi zaba ko zimbembo beni? Nana, buawu ko buididi.—Mat. 11:25.
15. Mbi bimmonisa ti Yehova kasi ko thalu zizi? (Tala phe foto.)
15 Muingi Yehova katuyangalala yisi tombana ko ti, tuteka kota zinzo nkanda zi kinsuni, voti tuba na maluaku mazaba zimbembo bumboti mboti. Va buangu kivana ndueng’andi kuidi batu bo bakota zinzo nkanda, Yehova tudidi ti batu boso mu nza yimvimba babaka bubakila diluaku dibaka nduenga buba ti bakota zinzo nkanda voti nana. Mbembo Nzambi yo yisonimini mu lutuadusu lu pheve santu’andi Bibila, yibangulu mu zimili ki zimbembo; diawu mu nzila yi Bibila, batu boso mu nza yimvimba balenda baka mamboti ma malongi beni, ayi longuka bue balenda bela bakundi bandi.—2 Tim. 3:16, 17.
Bue phila yoyi Bibila kime mana tembikinina mu nza yimvimba yilembo monisina ti Yehova kasi ko thalu zizi? (Tala paragrafi 15)
TATAMANA “KIKUNUNU” KUIDI YEHOVA
16. Mu tadila Mavanga 10:34, 35, bue tulenda tatiminina kikinunu kuidi Yehova?
16 Luidi lukumu lunneni mu tedoso kuidi Yehova mu nzo’andi yi ngoto yi mbonosono. Widi na zanti, luzolo luwombo, ayi weta tuyakula kuidi niandi viokila phila yoyi tulenda yindudila. Mu buela, kakala ko thalu zizi, weta tuyakula beto boso mu kambu tadila bibuangu bio tuidi, phila yo tuyonzukila, buba zinzo nkanda zio tukota, nkand’eto wu nitu, dikanda dieto, mimvu mieto, voti buba widi bakala voti widi nketo. Vayi baboso bo beta tumukina minsiku miandi, bawu beta kikununu kuidi niandi.—Tanga Mavanga 10:34, 35.
17. Kue tufueti zabila mambu mankaka muingi tutedusu mu nzo yi ngoto yi Yehova?
17 Banga phila buididi mu Minkunga 15:1, Davidi wuyuvula biuvu ti: “A Yehova, nani wulenda vuanda mu nzo’aku yi ngoto? Nani wulenda zinga mu mongo’aku wunlongo?” Nsoniki wu Mikunga mu lusadusu lu pheve santu, wuvana mimvutu mu biuvu beni biobi. Mu disolo dinkuiza tuela tadila mambu mamfunu mo tufueti vanga muingi tutatamana kikununu va meso ma Yehova.
NKUNGA 32 Poná nde Yehova!
