EMHUOGHAẠPH ITUUGHẠ PHỌ 24
AḌUỌR PHỌ 24 Itu Osiịny Eegbolhom Mọ AZihova
Tọl Li Siẹn Amarugh Phọ AZihova K’agee-pọ!
“Sey Zihova, anhiạn kụ edị nạ kamạgh oru oḍigh aani isiphẹ amarugh phọ anạ?”—PS. 15:1.
EGBON
Ipẹ aZihova rawạ bọ ḍighaạgh ayira orue oghiọm aghisigh oghelhọm asiya arighirị r’odị, ḅilhẹ r’ipẹ odị rawạ bọ mọ yira ozoọm righirị phọ odị.
1. Ika kụ idị aPsalm 15:1-5 ketue ilhoghonhaạn iyira ḍighaạgh?
EMHUOGHAẠPH phọ eten bọ, yira utuughạ ni mọ aZihova kamạgh ni rebenhẹ phọ odị abuphẹ oḅọgh bọ loor ongọ nyodị oru oḍigh aani isiphẹ amarugh phọ odị oghaạph bọ omaaniọm, esi omhoọgh asiya dị ekpạr r’odị. Kuolọ, yira koḍighi ika kụ oḍigh aani siphẹ amarugh phọ odị? Psalm 15 amaaghị ni iboom araraạr ilọ iphẹn phọ. (Bạl Psalm 15:1-5.) Esi aBaibul phọ ephẹn phọ ekaạph ni raraạr dị rewạ mọ yira oḍighi orue oḍigh arighirị r’Enhaạn.
2. Eeghe kụ inyu bọ okọ suọr phọ Devid oghaạph oghol esi amarugh phọ aZihova?
2 Psalm 15 emiighom r’asipuru phọ iphẹn: “Sey Zihova, anhiạn kụ edị nạ kamạgh oru oḍigh aani isiphẹ amarugh phọ anạ? Anhiạn kụ katọl siphẹ eeḅarạph iigbia phọ anạ?” (Ps. 15:1) Mem mọ okọ suọr phọ Devid rakaạph bọ ilọ “amarugh” phọ aZihova, eeni odị aatughiạn ghan ilọ ogbogo iiḅereghị phọ arọl bọ epẹ Gibeon mem mọ opọ phọ. ADevid aghol kẹn “eeḅarạph iigbia,” eeni aghaạph ghan ilọ eeḅarạph phọ aZion epẹ Jeruselem. Epẹ Zion, aDevid aphighi ni ogbogo kụ aseere igbe iyọ phọ siphẹ tutụ eteẹny mem dị olhọgh ogey otu dị igbe iyọ phọ ketọl. Kesighẹ ni ibadị itobi oḍuạ epẹ esoorom mọ aGibeon osi Eeḅarạph phọ aZion.—2 Sam. 6:17.
3. Eeghe kụ iḍighi kụ iḅeraạn bọ iyira ooḅeghiọn aPsalm 15? (Miịn kẹn afoto phọ.)
3 Ii, u/meera ghan mọ ogbogh opol abuọ Izrạl oḍigh aani ghan siphẹ ogbogo iiḅereghị phọ okumuan, kụ esugha oḅẹm mọ oḍigh epẹ oseere bọ igbe iyọ phọ. Kuolọ oomo arebenhẹ phọ aZihova okpẹ bọ oḍuomolhoghi kotue ni oḍigh siphẹ amarugh phọ aZihova oghaạph bọ omaaniọm, esi oḍigh arighirị r’odị kụ oghiọm aghisigh orọl idiphọ arighirị odị. Epẹ phọ iyaạr dị eḅeraạn ni oomo ayira. Aḍinyạ aPsalm 15 emaaghị ni iniin araagharạ dị ewạ dị yira komoọgh oḅilhẹ oḍighi oḍeenhaan, eḍighi maạr dị yira rowạ oghiọm aghisigh orọl idiphọ arighirị aZihova.
Awe phọ Izrạl orọl bọ mem mọ aDevid kotue ni ootughiạn idị remạ ghan oḍighi aani oye dị aZihova kamạgh oru isiphẹ amarugh phọ odị (Miịn ekpịgh phọ 3)
OPỌ U/MOỌGH BỌ ḌIKPALHẠM ḄILHẸ RAḌIGHI GHAN BỌ RARAẠR ELHIOM
4. Yira ulhegheri ika mọ oḍiiny amuụm bịn kụ ko/ginha iyaạr dị aZihova rawạ ḍighaạgh ayira? (Isaiah 48:1)
4 Aḍinyạ aPsalm 15:2, ekaạph mọ oyaghirị Enhaạn pọ oye dị u/moọgh ḍikpalhạm ḅilhẹ raḍighi ghan raraạr elhiom. Iduọn phọ pọ odị kakiọm ghisigh aḍighi ghan iphẹn phọ. Kuolọ yira kotue ni otọl dị yira u/moọgh ḍikpalhạm ḍughụm? Ii. Ghalhamọ r’iduọn oye dị amhunhughan u/lo bọ, aZihova kumhiịn ni iyira idiphọ awe dị u/moọgh ḍikpalhạm, eḍighi maạr dị yira oḍighi oomo ipẹ yira kotue bọ onhaghanhạn odị. Mem dị yira oḅọgh ghuḍum ayira ongọ aZihova kụ oḅilhẹ oḍiiny muụm, pọ yira momhiigh orelean r’Enhaạn. Lọgh elhegh mọ mem aBaibul phọ, oḍighi olọ Izrạl bịn i/mạ imiteom mọ oye phọ masianhaan oḍigh aani isiphẹ amarugh phọ aZihova. Buniin uuḅereghị ghan ni nyodị kuolọ bidị u/ḍighinhom ghan r’oomo ekpom ḅilhẹ u/ḍighi ghan idị enhighẹ. (Bạl Isaiah 48:1.) Onyọ Izrạl dị asighẹ oomo olhoghi odị kụ raaḅereghiọm aZihova atuughạ ghan iilhogh phọ aZihova kụ aḅilhẹ adaphạn ghan. Iniin phọ kẹn kụ edị ewạ rodon, oḍighi oyaghirị Enhaạn epelhom ni oḍiiny amuụm r’omheera mọ nạ onyọ Ogbaanhaạn AZihova. Iduọn phọ pọ, yira omoọgh oghiọm aghisigh oḍighi ghan ipẹ eḍighi bọ elhiom. Ika kụ edị yira kotue bọ oḍighi iduọn phọ?
5. Onhaghanhạn ghan aZihova esi oomo araraạr eḅaramaạm eeghe?
5 Ghisigh aZihova, orọl adọl dị oye phọ “u/moọgh ḍikpalhạm” ḅilhẹ “roḍighi ghan araraạr dị eḍighi elhiom” epelhom ni ogbor ghan oghị ituughạ. (1 Sam. 15:22) Esi iduọn phọ, yira okparaghạ ghan oḍighi ipẹ Enhaạn rawạ bọ siphẹ oomo adọl aghuḍum mọ ayira, ghalhamọ r’amem dị oginha ayira odi esi. (Prov. 3:6; Eccl. 12:13, 14) Emạn ni maạr dị yira koḍighi oomo ipẹ yira kotue bọ onhaghanhạn ghan aZihova, ghalhamọ r’araraạr dị yira osighẹ mọ i/mạn maạr. Yira oḍighi ghan iduọn phọ kekạr eḍeenhaan mọ yira opomhoghiạn ni nyodị, kụ eḅilhẹ eḍighi iyaạr dị yira koḅeraạn ghan nyodị bịn.—Jọn 14:23; 1 Jọn 5:3.
6. Odaphạn Hibru 6:10-12, eeghe kụ iyaạr dị emhạn maạr epu imạ araraạr phọ yira moḍighi ghan bọ igbaany?
6 AZihova akạr kụ asereghiạn ipẹ yira mokumuan ghan bọ ongọ nyodị. Toroboiperolbọ, igey arukumuan dị yira mokumuan ghan ongọ nyodị epẹ omhạn bịn kụ ki/yaạr dị odị katuạn usighẹ iyira alọgh aani siẹn amarugh phọ odị. Iphẹn phọ ekạr kụ eegholhaan siphẹ Hibru 6:10-12. (Bạl) Ii, aZihova k”oye dị kabulha iiḍighi phọ ayira. Kuolọ odị rawạ mọ yira ogholhoghọl siphẹ arukumuan phọ yira rongọ bọ nyodị tutụ “eteẹny epẹ eekuna phọ.” Odị kaḍighi ni oyaghirị ayira k’agee-pọ eḍighi maạr dị iyira i/phẹr.—Gal. 6:9.
GBẠ GHAN AGEY SIPHẸ OLHOGHI PHỌ ANẠ
7. Ogbạ ghan agey siphẹ olhoghi phọ ayira eḅaramaạm eeghe?
7 Oye dị rawạ mọ aZihova asighẹ aani nyodị alhọgh siphẹ amarugh phọ odị “kagbạ ghan igey siphẹ olhoghi phọ odị.” (Ps. 15:2) Iphẹn phọ epelhom ni oḅẹm mọ okpẹ ku/gbạ ghan. AZihova rawạ mọ yira ogbạ ghan agey esi oomo araraạr, emhiigh ikpo onhụ kụ esi iḍighinhom araraạr. (Hib. 13:18) Iphẹn phọ ekạr kụ emạn maạr “loor esi dị aZihova akel li we iikelheghian, kuolọ odị rakuraam ghan ni we elhiom eḍighinhom iyaạr.”—Prov. 3:32.
8. Eeghe eegharạ kụ edị ewạ mọ yira oghel?
8 Oye dị ‘ragbạ ghan agey siphẹ olhoghi phọ odị’ ra/ḍeenhaan ghan esi ogbo bịn mọ onọ ranaghanhạn ni Enhaạn, kụ kaḍighi inhọn epẹ ogbạl. (Isa. 29:13) Rakel ghan iikelheghian. Oye iikelheghian eeni atue ni amiigh ootughiạn isiphẹ olhoghi odị mọ iniin iiḅakiọm mọ aZihova i/ḍeenhaan osụ olhoghi. (Jems 1:5-8) Odị atue ni agbagharạn aZihova esi iniin araraạr dị odị aatuughiạn mọ i/kạr imạn maạr. Kụ eḍighi maạr dị iyaạr i/mitenhaan nyodị loor esi iilhogh phọ Enhaạn odị agbagharạn bọ, odị atue ni amiigh oḍighi araraạr dị eeph iboom. Kụ iphẹn phọ keḍighi idị aZihova ka/sighẹ mun iiḅereghị phọ odị. (Eccl. 8:11) Toroboiperolbọ, yira ogbạ ghan agey esi oomo araraạr.
9. Yira otuughạ eeghe esi ipẹ emite bọ eḅẹl amem mọ aZizọs r’aNataniẹl omhiinhạn bọ? (Miịn kẹn afoto phọ.)
9 Ipẹ emite bọ eḅẹl amem mọ aNataniẹl r’aZizọs omhiinhạn bọ ketue ni ilhoghonhaạn iyira ḍighaạgh olhegheri idị ogbạ ghan agey k’ekpom emhạn maạr esi. Mem mọ aFilip asighẹ bọ oyaghirị phọ odị Nataniẹl aru oḍeenhaan aZizọs, iyaạr dị eḍighan elhegh imite ni. Ghalhamọ r’iduọn aZizọs ko/mhiịn ghan bọ aNataniẹl enhọn amem, odị aghaạph ni mọ: “Imiịn aani ni, ophọn phọ okaraghị onyọ Izrạl, iigbegheḍiom loor odị i/lo.” (Jọn 1:47) AZizọs alhegheri ni mọ abuerị phọ abumatuạn phọ odị rogbạ ghan ni agey, kuolọ odị amhiịn mọ aNataniẹl amoọgh olhoghi ogbạ ghan agey dị agbatanhaạn. Ii, aNataniẹl o/mhunhughan aani idiphọ ayira. Kuolọ odị agbạ ghan agey siphẹ olhoghi phọ odị esi oomo araraạr. AZizọs amhiịn ni iphẹn phọ loor aNataniẹl kụ asẹph nyodị loor esi iphẹn phọ. P’eeghe idị keḍighi eghuan eḍighi maạr lọ aZizọs amhiịn aani imạ eegharạ phọ ephen phọ loor ayira.
Mem mọ aFilip asighẹ bọ oyaghirị phọ odị NataniẹI aghị aḍeenhaan Zizọs, aZizọs aḅẹm mọ odị oye dị iigbegheḍiom loor i/lo. Kotue ni okaạph aani iduọn phọ ilọ ayira ḍughụm? (Miịn ekpịgh phọ 9)
10. Uḍighi ika kụ ewạ bọ mọ ogona loor esi ikpo-onhụ phọ ayira? (Jems 1:26)
10 Ibadị araraạr phọ aZihova rawạ bọ ḍighaạgh ayira edi bọ Psalm 15 ekạr egbolhomaam ipẹ yira rozoọm ghan bọ bunhọn. Psalm 15:3 eḅẹm mọ oye dị aZihova katue amạgh mọ aḍigh siphẹ amarugh phọ odị pọ oye “dị ra/sighẹ ghan nem mọ odị kaghalhaghiọm ikalhaghiạn, ra/ḍighi ghan matuman odị ikarạph, ḅilhẹ raa/tuuny ghan we.” Osighẹ anem mọ ayira oḍighinhom areten phọ iphẹn phọ ketue ni ekọm iiḅaghamhị engọ bunhọn eḅilhẹ eḍighi idị yira ko/sianhaan oḍigh aani isiphẹ amarugh phọ aZihova.—Bạl Jems 1:26.
11. Ikalhaghiạn p’eeghe, kụ roḍighi ghan ika oye ikalhaghiạn dị u/meera ukiton?
11 Okọ suọr phọ akạr kụ akaạph akol ikalhaghiạn. Ikalhaghiạn p’eeghe? Ikalhaghiạn pọ araghaạph dị i/tu inẹ dị oghaạph ogbạl ḅilhẹ kepuẹ ḍien oye. Roporogh ghan ni oye dị rakalhaghiạn ghan ikalhaghiạn dị u/meera ukiton siẹn ookpomhoghan phọ.—Jer. 17:10.
12-13. Ighẹn asidọl kụ ketue ekọm idị yira kokalhaghiạn oye eten dị yira u/legheri? (Miịn kẹn afoto phọ.)
12 Psalm 15:3 ighiọm kẹn iyira olhoghi mọ aZihova ra/mạgh ghan kalhọgh siphẹ amarugh phọ odị oye dị raḍighi ghan ikarạph matuman odị ḅilhẹ raatuuny ghan we. Iphẹn phọ eḅaramaạm eeghe?
13 Yira otue ni okalhaghiạn oye eten dị yira u/legheri, esi oghaaphọgh araraạr dị i/tu inẹ ilọ oye phọ. Esi omaạm, yira otue ni okalhaghiạn: (1) onyọ umaranhi dị akọy ghan eten opọ oomo amem mọ kụ mawilhẹ, (2) olom r’anhịr dị okumuan ghan Betẹl kụ u/lo mun Betẹl, obobọ (3) onyọ umor dị aḍighi ghan okumor oye ookpomhoghan obobọ odị raloghonhaạn ḍighaạgh ikumor awe phọ kụ nyiidiphọ u/ḍighi mun. Kebeeph ni eḍighi maạr dị yira omhiigh oghaaphọgh mọ abumor r’abumaranhi phọ abuẹn phọ moḍighi iyaạr dị i/nighẹ kụ oboọr bọ roopoogh phọ. Olhọgh elhegh mọ ariphigh dị yira u/legheri etue ni ekọm ipẹ emite bọ. Oḅarạm isiphẹ, oye dị aZihova kamạgh alọgh marugh phọ odị pọ oye “dị ra/ḍighi ghan ikarạph matuman odị, ḅilhẹ raa/tuuny ghan we.”
Ikalhaghiạn ketue ni eḍighi idị yira kokaạph ikarạph ilọ abunhọn oḅilhẹ oleenye elheeny (Miịn siikpịgh phọ 12-13)
KUENHI BUPHẸ ROKIILHAAN BỌ AZIHOVA
14. Gbạ ipẹ arighirị aZihova rokel ghan bọ oye dị aZihova maghel.
14 Psalm 15:4 eḅẹm mọ oyaghirị aZihova “rakel ghan” bulọ aZihova aghel. Yira kolegheri ika oye lọ akpẹ oghel? Yira awe dị u/munhughan, yira u/moọgh elhiom oḅẹm mọ opeẹr akpẹ ni oghel. Eeghe kụ iḍighi? Loor esi dị eḍighi ni eseeriom oḍuraan otuman awe dị araagharạ abidị iḅeraạn iyira kụ oghel abulọ araagharạ abidị iyira i/ḅeraạn. Esi iduọn phọ, yira oghel ghụn oginha abuphẹ aZihova “maghel bọ.” (1 Kọr. 5:11) Abudọ awe phọ yira kokel bọ pọ awe dị u/meera ukiton esi ekarạph eḍighinhom iyaạr phọ abidị, u/lọgh eegu omheeraam mọ r’itughemhị phọ ayira, obobọ rokparaghạ ghan ophuẹ asiya phọ ayira r’aZihova.—Prov. 13:20.
15. Eghẹn kụ eniin eten dị yira kotue okuenhi buphẹ “rokiilhaan bọ aZihova”?
15 Ḍieriphọ aḍighaạgh phọ, aPsalm 15:4 iḅenhị iyira mọ oghuenhi ghan “buphẹ rokiilhaan bọ aZihova.” Loor esi iduọn phọ yira rowạ ghan ni roopoogh oḍeenhaan onmạ ighirigiir righirị phọ aZihova ḅilhẹ r’oghuenhi ghan abidị. (Rom 12:10) Ika? Aḍinyạ aPsalm 15:4 ekaạph ni eniin eten dị yira kotue oḍighi iduọn phọ. Esi phọ eḅẹm mọ oye dị odi siphẹ amarugh phọ Enhaạn “ra/bilhẹ ghan oḍighi ilọ odị aguan, ghalhamọ r’amem dị araraạr i/kị ipẹ odị awạ bọ.” Abi oguan o/nhighẹ, rakọm ghan iiḅaghamhị kengọ bunhọn. (Mat. 5:37) Esi omaạm, aZihova rawạ mọ torobọ olom r’anhịr dị odi siphẹ amarugh phọ odị kopamanhạm ikunya apinien phọ abidị. Odị rawạ kẹn dị aburudẹ r’aburunhiin koḍighi oomo ipẹ bidị kotue bọ oḍighi ghan ilọ bidị oguanhaan ibạm anmụny phọ abidị. Ephomhoghiạn phọ yira omhoọgh bọ oghị esi Enhaạn r’amatuman phọ ayira kinyu iyira oghiọm aghisigh oḍighi ghan ipẹ eḍuạ bọ onhụ ayira emite.
16. Eghẹn kụ enhọn eten dị yira koḍeenhaan mọ yira rokuenhi ni righirị phọ aZihova?
16 Enhọn eten oghuenhi ghan arighirị phọ Enhaạn pọ okọ ghan abidị igoni ḅilhẹ r’onmo ghan abidị inmo. (Rom 12:13) Mem dị yira osighẹ ghan mem ophooghian ayira orọl r’abumor r’abumaranhi phọ kilhoghonhaạn iyira ḍighaạgh okparamhị ogọ arighirị phọ ayira r’aZihova. Idị epelhom siẹn, okọ ghan igoni reḍeenhaan ghan mọ yira rotuughaạny ghan aZihova.
KA/MOỌGH EPHOMHOGHIẠN IKPOKI
17. Eeghe kụ iḍighi kụ oghaạph ikpoki amite bọ siẹn ḍinyạ aPsalm 15?
17 Yira aạl siphẹ ḍinyạ aPsalm mọ oye dị aZihova kameera mọ aḍigh siphẹ amarugh phọ odị pọ oye dị “ra/lọgh ghan oḅạr ikpoki dị odị aalhẹ oye, ḅilhẹ ra/sighẹ ghan oti omhạn kasoph aphume oye dị u/piomạn.” (Ps. 15:5) Eeghe kụ iḍighi kụ oghaạph ikpoki amite bọ siẹn aPsalm mọ ophọn phọ? Loor esi dị, eḍighi maạr dị yira ophomhoghiạn ikpoki pọ yira komoọgh ghan ni iiḅaghamhị r’awe, kụ ipẹ phọ kepuẹ ni siya phọ ayira r’aZihova. (1 Tim. 6:10) Mem mọ rogẹ bọ Baibul phọ, abuniin awe uzoọm ghan bumor abidị dị oḍighi rukulhom eten dị i/nighẹ, esi okpaariọm ghan abidị olhọgh ghan oḅạr ikpoki dị bidị aalhẹ bidị. Ḅilhẹ kẹn abuniin abuugboom iiruẹn usighẹ ghan oti omhạn kụ osoph ghan ooruẹn ophume we dị u/piomạn. AZihova alọgh ḍien raraạr phọ iphẹn phọ.—Ezek. 22:12.
18. Ighẹn asipuru kụ kilhoghonhaạn iyira ḍighaạgh ooḅeghiọn eten phọ epẹ yira omhiịn bọ ikpoki? (Hibru 13:5)
18 Kenighẹ ni dị yira kooḅeghiọn siphẹ aloor phọ ayira eten phọ epẹ yira ropogh ghan bọ ikpoki. Puruan loor anạ mọ: ‘Mị ragbor ghan ni kaatughiạn ilọ ikpoki ḅilhẹ r’araraạr phọ ketue bọ eko ḍughụm? Mem dị mị alhe omhụgh, mị raabinya ghan ni okpẹ omhụgh phọ esi ootughiạn ghan mọ opọ aalhẹ bọ imhị o”kạr omhoọgh iyaạr oḍighinhom ikpoki phọ nyiidiphọ? Ikpoki phọ mị amhoọgh bọ reḍighi ghan ni idị mị raatughiạn ghan mọ mị amạn maạr apu bunhọn ḍughụm? Rikparanhaạn ghan ni imhị ongọ aani abunhọn ikpoki amhị ḍughụm? Mị ramiịn ghan ni bumor r’abumarani dị omhoọgh ikpoki idiphọ awe dị roporogh eelạ ḍughụm? Mị raḍigh ghan righirị r’awe dị omhoọgh ikpoki bịn, kawilhẹ rukulhom mọ?’ Ekpẹ ni dị yira kopuruan loor ayira sipuru phọ iphẹn phọ, loor esi dị yira omoọgh eboom eepoogh orọl aani isiẹn amarugh phọ aZihova. Yira kotue ni okoph emạ phọ eepoogh phọ ephẹn phọ esi omhiịn mọ yira u/pomoghiạn ikpoki. Yira oḍighi iduọn phọ, pọ aZihova r’amem r’amem iyira ku/wilẹ!—Bạl Hibru 13:5.
AZIHOVA APOMOGHIẠN RIGHIRỊ PHỌ ODỊ
19. AZihova atụ eeghe kụ rawạ bọ mọ yira oḍighi ipẹ ogẹ bọ siphẹ Psalm 15?
19 Aḍinyạ aPsalm 15 ekureriom r’oguan phọ aḅẹm bọ mọ: “Torobọ oye dị raḍighi ghan iphẹn phọ, ko/gboton nyodị dọl.” (Ps. 15:5) Esi phọ isiẹn phọ eḍeenhaan iyaạr phọ Enhaạn atụ bọ rawạ mọ yira oḍighi oomo ipẹ aPsalm 15 aghaạph bọ. AZihova rawạ mọ yira omhoọgh oḅaạl olhoghi. Esi iduọn phọ, odị ungọ iyira iiḅakiọm dị kesighẹ ḍisẹph r’oghoph phọ odị iruomaan iyira.—Isa. 48:17.
20. Eeghe iyaạr kụ edị abuẹn aZihova mamhạgh bọ alhọgh siphẹ amarugh phọ odị rogon?
20 Buphẹ aZihova amhạgh bọ mọ oru siphẹ amarugh phọ odị omoọgh ni ookiạ oḍuomolhoghi epẹ ghisigh. Abuphẹ osagharạn bọ uwaloor iigbia phọ kokeel k’akẹ kụ otọl siphẹ aZizọs aakolhobianhaan bọ bidị. (Jọn 14:2) Abuphẹ omhoọgh bọ oḍuomolhoghi orọl isiẹn ade phọ, opogh ni rokiọm ghisigh omhiịn amem dị aruguanhaan phọ edi bọ Ogananami 21:3 kemunughan. Okạr agey, eḍighi ni eboom eepoogh dị aZihova mumhạgh iyira oru isiẹn amarugh phọ odị kụ orọl k’agee-pọ!
AḌUỌR PHỌ 39 Make a Good Name With God
