NÍ KASEMI 24
LA 24 Nyɛɛ Ba Yehowa Yoku ɔ Nɔ
Moo Hi Yehowa Bo Tsu ɔ Mi Daa!
“Oo Yehowa, mɛnɔ ma ba to o bo tsu ɔ mi?”—LA 15:1.
OTI NƐ NGƐ NÍ KASEMI Ɔ MI
Ní kasemi nɛ ɔ maa ye bua wɔ konɛ waa le nɔ́ nɛ e sa kaa waa pee bɔ nɛ pee nɛ waa pee Yehowa huɛmɛ daa. Wa maa ná bɔ nɛ Yehowa suɔ nɛ waa kɛ e huɛmɛ ɔmɛ nɛ hi si ha hulɔ.
1. Kɛ La 15:1-5 ɔ ma nyɛ maa ye bua wɔ ha kɛɛ?
NGƐ ní kasemi nɛ sɛ hlami ɔ mi ɔ, wa kase kaa nihi nɛ a jɔɔ a he nɔ kɛ ha Yehowa nɛ huɛ bɔmi kpakpa ngɛ a kɛ lɛ a kpɛti ɔ pɛ lɛ a ma nyɛ maa hi e we okadi peemi bo tsu ɔ mi. Se mɛni wa ma nyɛ maa pee konɛ wa nyɛ nɛ waa hi e bo tsu ɔ mi? La 15 ɔ tsɔɔ níhi fuu nɛ wa ma nyɛ maa pee. (Kane La 15:1-5.) La nɛ ɔ tsɔɔ níhi nɛ e sa nɛ waa pee konɛ huɛ bɔmi nɛ mi wa nɛ hi waa kɛ Mawu wa kpɛti.
2. Benɛ David wo Yehowa bo tsu ɔ ta a, eko ɔ, mɛni lɛ ngɛ e juɛmi mi?
2 La 15 ɔ je sisi ke: “Oo Yehowa, mɛnɔ ma ba to o bo tsu ɔ mi? Mɛnɔ maa hi o yoku klɔuklɔu ɔ nɔ?” (La 15:1) Benɛ David nɛ ji la polɔ ɔ wo Yehowa “bo tsu ɔ” nɔ ta a, eko ɔ, nɔ́ nɛ ngɛ e juɛmi mi ji kpe he bo tsu ɔ nɛ e hi Gibeon kɛ ya si be ko ɔ. David wo Mawu “yoku klɔuklɔu ɔ” hu ta. Eko ɔ, Zion Yoku ɔ nɛ ngɛ Yerusalem ɔ he munyu lɛ e ngɛ tue ɔ nɛ. Lejɛ ɔ kɛ Gibeon woyi je kɛ wawɛɛ. David ma bo tsu ngɛ lejɛ ɔ konɛ somi daka a nɛ hi mi lolo kɛ ya si benɛ a maa ma sɔlemi we ɔ.—2 Sam. 6:17.
3. Mɛni he je nɛ wa suɔ kaa waa nu La 15 ɔ sisi saminya a? (Hyɛ foni ɔ hulɔ.)
3 Ngɛ anɔkuale mi ɔ, Israelbi ɔmɛ a kpɛti nihi hiɛhiɛɛ be he blɔ nɛ a sɔmɔɔ ngɛ kpe he bo tsu ɔ mi. A ti nihi bɔɔ pɛ lɛ a ná he blɔ kɛ ya kpe he bo tsu ɔ mi he nɛ somi daka a ngɛ ɔ. Se ke Yehowa sɔmɔli anɔkualetsɛmɛ tsuo ha nɛ huɛ bɔmi nɛ mi wa ngɛ a kɛ Yehowa a kpɛti be fɛɛ be ɔ, a ma nyɛ maa hi e we okadi peemi bo tsu ɔ mi daa. Ngɛ anɔkuale mi ɔ, wɔ tsuo wa suɔ nɛ waa pee jã. La 15 ɔ tsɔɔ su komɛ nɛ e sa nɛ wa ná konɛ waa pee Yehowa huɛmɛ daa.
Israelbi nɛ a hi si ngɛ David be ɔ mi ɔ nyɛ nɛ a po nɔ́ nɛ Yehowa bo tsu ɔ nɛ a maa hi mi ɔ tsɔɔ ɔ he foni (Hyɛ kuku 3)
MOO NYƐƐ NGƐ ANƆKUALE Ɔ MI NƐ O PEE NƆ́ NƐ DA
4. Kɛ wa plɛ kɛ le kaa pi baptisimi nɛ a maa baptisi wɔ ɔ pɛ nɛ Yehowa ngɛ hlae ngɛ wa dɛ ha kɛɛ? (Yesaya 48:1)
4 La 15:2 ɔ tsɔɔ kaa Mawu huɛmɛ “nyɛɛɔ ngɛ anɔkuale mi, nɛ [a] peeɔ nɔ́ nɛ da.” Munyu nɛ ji “nyɛɛɔ” kɛ “peeɔ” nɛ a kɛ tsu ní ɔ, tsɔɔ nɔ́ ko nɛ e sa nɛ waa ya nɔ nɛ waa hi pee. Se anɛ wa ma nyɛ maa ‘nyɛɛ ngɛ anɔkuale mi’ lo? Ee. Adesa ko be nɛ e ye mluku, se ke wa bɔ mɔde kaa wa maa bu Yehowa tue ɔ, e maa na wɔ kaa wa “nyɛɛɔ ngɛ anɔkuale mi.” Ke wa jɔɔ wa he nɔ ha Mawu nɛ a baptisi wɔ pɛ ɔ, lɔ ɔ tsɔɔ kaa waa kɛ Mawu bɔni nyɛɛmi. Mo kadi kaa blema a, ke Israelno ji nɔ ko ɔ, lɔ ɔ tsɔɔ we kaa doo ɔ, e maa hi Yehowa bo tsu ɔ mi, ejakaa a ti ni komɛ deɔ ke a ngɛ Yehowa jae, se ‘pi ngɛ anɔkuale mi.’ (Kane Yesaya 48:1.) E sa nɛ Israelbi nɛ a suɔ nɛ a ja Yehowa ngɛ anɔkuale mi ɔ nɛ a kase Yehowa mlaa amɛ nɛ a kɛ tsu ní. Jã kɛ̃ nɛ mwɔnɛ ɔ hu ɔ, ke wa ngɛ hlae nɛ Yehowa nɛ kplɛɛ wa nɔ ɔ, pi baptisimi nɛ a maa baptisi wɔ, kɛ Kristofohi a kpehi nɛ wa maa ya a pɛ kɛkɛ nɛ e he hia. Mohu ɔ, e sa nɛ waa ya nɔ nɛ waa ‘pee nɔ́ nɛ da.’ Mɛni blɔ nɔ wa maa gu kɛ pee jã?
5. Ke a ke waa bu Yehowa tue ngɛ nɔ́ fɛɛ nɔ́ mi ɔ, mɛni e tsɔɔ?
5 Ngɛ Yehowa hɛ mi ɔ, nyɛɛmi nɛ wa maa ‘nyɛɛ ngɛ anɔkuale mi’ kɛ ‘nɔ́ nɛ da nɛ wa maa pee ɔ’ biɔ babauu pe nɛ wa maa ya asafo mi kpehi be fɛɛ be. (1 Sam. 15:22) E sa nɛ waa bɔ mɔde nɛ waa bu Mawu tue ngɛ nɔ́ fɛɛ nɔ́ mi, ke nɔ ko nɔ ko nɛ wɔ po. (Abɛ 3:6; Fiɛɛ. 12:13, 14) E he hia nɛ waa bɔ mɔde nɛ waa bu Yehowa tue ngɛ ní nyafinyafihi a mi po. Ke wa pee jã a, lɔ ɔ tsɔɔ kaa wa suɔ lɛ niinɛ, nɛ lɛ hu e maa suɔ wɔ saminya.—Yoh. 14:23; 1 Yoh. 5:3.
6. Ngɛ Hebri Bi 6:10-12 ɔ nya a, mɛni he je nɛ ke wa pee ní kpakpahi kɛ be po ɔ, lɔ ɔ pɛ pi ɔ?
6 Yehowa bua jɔ níhi tsuo nɛ wa pee ha lɛ be ko nɛ be ɔ he wawɛɛ. Se ke wa pee ní kpakpahi kɛ be po ɔ, tsa pi lɔ ɔ pɛ nɛ ma ha nɛ waa hi Yehowa bo tsu ɔ mi daa. Wa naa enɛ ɔ heii ngɛ Hebri Bi 6:10-12 ɔ mi. (Kane.) Yehowa hɛ ji ní kpakpahi nɛ wa pee kɛ be ɔ nɔ. Se e suɔ nɛ waa je wa tsui mi kɛ sɔmɔ lɛ “kɛ ya si nyagbe.” Yehowa maa jɔɔ wɔ nɛ wa maa pee e huɛmɛ kɛ ya neneene “ke pɔ tɔɛ wa he.”—Gal. 6:9.
MOO TU ANƆKUALE NGƐ O TSUI MI
7. Ke a ke waa tu anɔkuale ngɛ wa tsui mi ɔ, mɛni e tsɔɔ?
7 E sa nɛ nɔ fɛɛ nɔ nɛ e suɔ nɛ e hi Yehowa bo tsu ɔ mi ɔ nɛ ‘tu anɔkuale ngɛ e tsui mi.’ (La 15:2) Enɛ ɔ biɔ babauu pe lakpa pɛ nɛ wa be yee. Yehowa suɔ nɛ waa ye anɔkuale ngɛ nɔ́ fɛɛ nɔ́ mi. (Heb. 13:18) Enɛ ɔ he hia wawɛɛ, “ejakaa Yehowa hiɔ nɔ nɛ sisiɔ nɔ, se dali lɛɛ e kɛ mɛ nuɔ huɛ gbagbanii.”—Abɛ 3:32.
8. Mɛni ji su ko nɛ e sa nɛ waa yu wa he ngɛ he?
8 Nihi nɛ a ‘tuɔ anɔkuale ngɛ a tsui mi’ ɔ, pee we a ní kaa a yeɔ Mawu mlaa amɛ a nɔ ngɛ nihi a hɛ mi, se a peeɔ ní yayahi ngɛ laami mi. (Yes. 29:13) A sisi we nɔ. Behi fuu ɔ, nɔ nɛ sisiɔ nɔ ɔ yi mi ma nyɛ maa pee lɛ enyɔɔnyɔ ngɛ Yehowa mlaa amɛ ekomɛ a he. (Yak. 1:5-8) Eko ɔ, e kɛ Yehowa mlaahi nɛ e susu kaa a he hia we ɔ be ní tsue. Ke e na kaa nɔ́ yayami ko ji mi kɛ bɛ ɔ, e yaa nɔ nɛ e peeɔ níhi fuu kɛ gboɔ Mawu mlaa a nɔ tue. Nɔ ko kaa jã a ma susu kaa e ngɛ Yehowa jae, se ngɛ anɔkuale mi ɔ, Yehowa be e jami ɔ nɔ kplɛɛe. (Fiɛɛ. 8:11) Enɛ ɔ he ɔ, wa suɔ nɛ waa ye Yehowa anɔkuale ngɛ nɔ́ fɛɛ nɔ́ mi.
9. Benɛ Yesu kɛ Natanael kpe kekleekle be ɔ, mɛni ya nɔ, nɛ mɛni wa kaseɔ ngɛ mi? (Hyɛ foni ɔ hulɔ.)
9 E he hia wawɛɛ kaa wa maa ‘tu anɔkuale ngɛ wa tsui mi.’ Wa naa enɛ ɔ ngɛ nɔ́ nɛ ya nɔ benɛ Filipo fɔ e huɛ nɛ ji Natanael nine kaa e kɛ Yesu nɛ ba kpe ɔ mi. E ngɛ mi kaa Yesu kɛ Natanael kpi gblee mohu lɛɛ, se benɛ Yesu na lɛ ɔ, e de ke: “Nyɛɛ hyɛ, Israelno ngmingmiingmi nɛ lakpa ko be e mi ji nɛ ɔ nɛ.” (Yoh. 1:47) Yesu le kaa e kaseli kpa amɛ yeɔ anɔkuale mohu lɛɛ, se e na kaa Natanael yeɔ anɔkuale saminya. E ngɛ mi kaa Natanael yi mluku kaa bɔ nɛ wa yi mluku ɔ mohu lɛɛ, se e pee we osato, nɛ e yeɔ anɔkuale ngɛ nɔ́ fɛɛ nɔ́ mi. Yesu bua jɔ su nɛ Natanael je kpo ɔ he, nɛ e je e yi. Ngɛ anɔkuale mi ɔ, wɔ tsuo wa suɔ nɛ Yesu nɛ e na wɔ jã!
Filipo nɛ e ngɔ e huɛ Natanael kɛ ngɛ Yesu tsɔɔe. Yesu de ngɛ Natanael he kaa e ji nyumu nɛ “lakpa ko be e mi.” Anɛ wɔ hu a ma nyɛ ma de jã ngɛ wa he lo? (Hyɛ kuku 9)
10. Mɛni he je nɛ e sa nɛ waa hyɛ saminya ngɛ bɔ nɛ waa kɛ wa lilɛ tsuɔ ní ha a he? (Yakobo 1:26)
10 Mlaahi nɛ a tu he munyu ngɛ La 15 ɔ a kpɛti babauu kɔɔ bɔ nɛ waa kɛ ni kpahi maa hi si ha a he. La 15:3 ɔ tsɔɔ kaa nɔ nɛ ngɛ Yehowa bo tsu ɔ mi ɔ “kɛ e lilɛ gbi nɔ he guɛ, e pee we e nyɛmi yayami, nɛ e pue we e huɛmɛ a hɛ mi si.” Ke wa tu munyu kɛ gbe ni kpahi a he guɛ ɔ, e ma nyɛ maa ye mɛ awi wawɛɛ. Nɛ lɔ ɔ hu ma ha nɛ wa be nyɛe maa hi Yehowa bo tsu ɔ mi.—Kane Yakobo 1:26.
11. Mɛni ji he guɛ gbemi, nɛ ke nɔ ko peeɔ jã nɛ e tsakee we e tsui ɔ, mɛni jeɔ mi kɛ baa?
11 La polɔ ɔ je blɔ nɛ e tu he guɛ gbemi he munyu. Mɛni ji he guɛ gbemi? E ji lakpa munyu nɛ a tuɔ kɛ puɛɔ nɔ biɛ. Nihi nɛ a gbeɔ nɔ he guɛ nɛ a tsakee we a tsui ɔ, a jeɔ mɛ kɛ jeɔ Kristofohi asafo ɔ mi.—Yer. 17:10.
12-13. Mɛni si fɔfɔɛ komɛ a mi nɛ wa ma nyɛ ma puɛ nɔ ko biɛ be mi nɛ wa ji blɔ? (Hyɛ foni ɔ hulɔ.)
12 La 15:3 ɔ hu kaiɔ wɔ kaa nihi nɛ a ngɛ Yehowa bo tsu ɔ mi ɔ pee we yayami kɛ si a nyɛmi adesa, nɛ a pue we a huɛmɛ a hɛ mi si. Mɛni nɛ enɛ ɔ tsɔɔ?
13 Ke wa hyɛ we nɛ hi ɔ, wa ma puɛ nɔ ko biɛ be mi nɛ wa ji blɔ kɛ gu e he munyu nɛ e be mi nɛ wa maa gbɛ kɛ fĩa a nɔ. Kaa nɔ hyɛmi nɔ́ ɔ, ngɔɔ lɛ kaa (1) nyɛmiyo ko sɔmɔ we kaa daa blɔ gbalɔ hu, (2) nyɛminyumu ko kɛ e yo sɔmɔ we ngɛ Betel hu, kɛ (3) nyɛminyumu ko sɔmɔ we kaa asafo mi nɔkɔtɔma loo asafo mi sɔmɔlɔ hu. Anɛ e sa kaa wa de ni kpahi kaa nyɛmimɛ nɛ ɔmɛ pee nɔ́ ko nɛ dɛ, nɛ lɔ ɔ he je nɛ a si fɔfɔɛ ɔ tsake ɔ lo? Eko ɔ, a si fɔfɔɛ ɔ tsake ngɛ yi mi tomi fuu a he je, nɛ pi tsuo nɛ wa le. Jehanɛ ɔ hu ɔ, nɔ nɛ e ngɛ Yehowa bo tsu ɔ mi ɔ, “pee we e nyɛmi yayami, nɛ e pue we e huɛmɛ a hɛ mi si.”
E he wɛ kulaa kaa wa maa gbe ni kpahi a he guɛ kɛ gu a he munyu yaya nɛ wa maa gbɛ kɛ fĩa a nɔ (Hyɛ kuku 12-13)
MOO WO NIHI NƐ A YEƆ YEHOWA GBEYE Ɔ A HƐ MI NYAMI
14. Moo tsɔɔ nɔ́ nɛ nihi nɛ a ngɛ Yehowa bo tsu ɔ mi ɔ peeɔ kɛ tsɔɔ kaa a yuɔ a he ngɛ ‘yaka nimli’ a he.
14 La 15:4 ɔ tsɔɔ kaa nɔ nɛ e ji Yehowa huɛ ɔ “yuɔ e he ngɛ yaka nɔmlɔ he.” Kɛ wa ma plɛ kɛ pee jã kɛɛ? Akɛnɛ wa yi mluku he je ɔ, wa be he blɔ kaa wa tsɛɛ nɔ ko ke yaka nɔmlɔ. Mɛni he je? E ma nyɛ maa ba kaa wa suɔ ni komɛ wawɛɛ ngɛ bɔ nɛ a ngɛ ha a he je, se ni kpa komɛ lɛɛ wa sume mɛ ejakaa a ní peepee woɔ wa mi mi la. Enɛ ɔ he ɔ, nihi nɛ Yehowa naa mɛ kaa a ji ‘yaka nimli’ ɔ pɛ nɛ e sa nɛ waa yu wa he ngɛ a he. (1 Kor. 5:11) Nihi kaa jã a yaa nɔ nɛ a peeɔ níhi nɛ dɛ, nɛ a be bumi ko ha wa tsɔɔmi ɔmɛ, nɛ a bɔɔ mɔde hu kaa a ma puɛ waa kɛ Yehowa wa kpɛti.—Abɛ 13:20.
15. Mɛni wa ma nyɛ maa pee kɛ wo “nihi nɛ a yeɔ Yehowa gbeye ɔ” a hɛ mi nyami?
15 Jehanɛ hu ɔ, La 15:4 ɔ de wɔ kaa waa wo “nihi nɛ a yeɔ Yehowa gbeye ɔ” a hɛ mi nyami. Enɛ ɔ he ɔ, wa hlaa blɔhi a nɔ nɛ wa maa gu kɛ je mi mi jɔmi kɛ bumi kpo kɛ tsɔɔ Yehowa huɛmɛ. (Rom. 12:10) La 15:4 ɔ tsɔɔ kaa ke Yehowa huɛ ko ‘wo si nɛ lɔ ɔ maa pee nyagba ha lɛ po ɔ, e kpale we e nya se.’ Ke wa wo si nɛ wa yi nɔ ɔ, e ma nyɛ maa hao ni kpahi. (Mat. 5:37) Kaa nɔ hyɛmi nɔ́ ɔ, Yehowa hyɛɔ blɔ kaa nihi nɛ a ngɛ e bo tsu ɔ mi nɛ a sɛ gba si himi mi ɔ nɛ a ye kita nɛ a kã a sibi ɔ nɔ. Jehanɛ hu ɔ, Yehowa bua jɔɔ ke fɔli bɔ mɔde kaa a maa ye si nɛ a woɔ a bimɛ ɔmɛ a nɔ. Suɔmi nɛ wa ngɛ kɛ ha Mawu kɛ ni kpahi ɔ woɔ wɔ he wami nɛ wa yeɔ wa si womi nɔ.
16. Mɛni ji blɔ kpa nɔ nɛ wa ma nyɛ maa gu kɛ je bumi kpo kɛ tsɔɔ wa nyɛmimɛ ɔmɛ?
16 Blɔ kpa nɛ wa ma nyɛ maa gu nɔ kɛ je bumi kpo kɛ tsɔɔ wa nyɛmimɛ ɔmɛ ji kaa wa maa pee mɛ nubwɔ loo wa ma ná be kɛ ha mɛ. (Rom. 12:13) Ke waa kɛ wa nyɛmimɛ ɔmɛ pee kake kɛ je wa hɛ ja a, lɔ ɔ ma ha nɛ huɛ bɔmi nɛ ngɛ waa kɛ mɛ kɛ Yehowa wa kpɛti ɔ mi maa wa. Jehanɛ hu ɔ, ke wa peeɔ wa nyɛmimɛ nubwɔ ɔ, lɔ ɔ tsɔɔ kaa wa ngɛ Yehowa kasee.
KO HA NƐ SIKA NƐ PEE NƆ́ TITLI NGƐ O SI HIMI MI
17. Mɛni he je nɛ La 15 ɔ tu sika he munyu ɔ?
17 Baiblo ɔ tsɔɔ kaa ke nihi nɛ a ngɛ Yehowa bo tsu ɔ mi ɔ ‘pa sika ha nɔ ko ɔ, a he we hekpa. Jehanɛ hu ɔ, a ngɔɛ nyɔ mi ní nɛ a kɛ po munyu kɛ fɔ nɔ ko nɛ sane ko be e he ɔ nɔ.’ (La 15:5) Mɛni he je nɛ a tu sika he munyu ngɛ La nɛ ɔ mi ɔ? Ejakaa ke wa suɔ sika a, e ma nyɛ ma puɛ huɛ bɔmi nɛ ngɛ waa kɛ ni kpahi kɛ Mawu wa kpɛti ɔ. (1 Tim. 6:10) Blema a, nihi kɛ a nyɛmimɛ nɛ a ji ohiatsɛmɛ ɔ hí si saminya. Ke a pa sika ha mɛ ɔ, a heɔ kɛ e he kpa. Jehanɛ hu ɔ, kojoli nɛ a hi si ngɛ jamɛ a be ɔ mi ɔ ngɔɔ nyɔ mi ní, nɛ a yi dami sane. Ngɛ anɔkuale mi ɔ, Yehowa sume ní peepee nɛ ɔmɛ.—Eze. 22:12.
18. Mɛni sane bimihi maa ye bua wɔ konɛ waa na bɔ nɛ wa peeɔ wa ní ngɛ sika he ha? (Hebri Bi 13:5)
18 E he hia wawɛɛ nɛ waa hyɛ bɔ nɛ wa peeɔ wa ní ngɛ sika he ha. Mo bi o he ke: ‘Anɛ be fɛɛ be nɛ ɔ, i susuɔ sika kɛ nɔ́ nɛ ma nyɛ ma ngɔ sika kɛ he ɔ he lo? Anɛ ke i pa sika ngɛ nɔ ko dɛ ɔ, e heɔ be loko i kpaleɔ kɛ haa lɛ, nɛ i susuɔ kaa e he be lɛ hiae lo? Anɛ ke i ngɛ sika a, i susuɔ kaa ye nɔ kuɔ pe ni kpahi, nɛ e he waa ha mi kaa ma ha nɔ nɔ́ lo? Ke i na nyɛmimɛ komɛ nɛ a ngɛ sika a, anɛ i susuɔ kaa a suɔ sika pe Yehowa lo? Anɛ i suɔ kaa i kɛ niatsɛmɛ pɛ nɛ bɔ, nɛ i yuɔ ye he ngɛ nihi nɛ a be nɔ́ ko ɔ a he lo?’ E he hia nɛ wa bi wa he sane nɛ ɔmɛ ejakaa e ji he blɔ ngua nɛ wa ná kaa wa maa hi Yehowa bo tsu ɔ mi. Ke wa ha we nɛ sika suɔmi nɛ hi wa si himi mi ɔ, lɔ ɔ maa ye bua wɔ konɛ waa ya nɔ nɛ waa hi Yehowa bo tsu ɔ mi. Jehanɛ hu ɔ, Yehowa be wɔ kuae kɔkɔɔkɔ!—Kane Hebri Bi 13:5.
YEHOWA SUƆ E HUƐMƐ
19. Mɛni he je nɛ Yehowa suɔ kaa waa pee níhi tsuo nɛ a tu he munyu ngɛ La 15 ɔ mi ɔ?
19 La 15 ɔ mwɔ nya kɛ si womi nɛ ji: “Nɔ fɛɛ nɔ nɛ peeɔ ní nɛ ɔmɛ ɔ be mimiɛɛe gblegbleegble.” (La 15:5) La polɔ ɔ tsɔɔ nɔ́ he je nɛ Yehowa suɔ nɛ waa pee níhi tsuo nɛ ngɛ La nɛ ɔ mi ɔ. Ngɛ anɔkuale mi ɔ, Yehowa suɔ nɛ wa bua nɛ jɔ. Enɛ ɔ he ɔ, ke wa pee níhi tsuo nɛ Mawu tsɔɔ kaa waa pee ɔ, e maa jɔɔ wɔ, nɛ e maa po wa he piɛ.—Yes. 48:17.
20. Mɛni nɛ nihi nɛ a ngɛ Yehowa bo tsu ɔ mi ɔ ma nyɛ maa hyɛ blɔ?
20 Nihi nɛ Yehowa kplɛɛ a nɔ kaa a hi e bo tsu ɔ mi ɔ ma nyɛ ma ná bua jɔmi hwɔɔ se. Nihi nɛ a pɔ mɛ nu ɔ maa ya hiɔwe, he nɛ Yesu dla kɛ to mɛ ɔ. (Yoh. 14:2) Nihi nɛ a ngɛ hɛnɔkami kaa a maa hi zugba a nɔ ɔ hu hyɛɔ blɔ kaa si womihi nɛ ngɛ Kpo Jemi 21:3 ɔ maa ba mi. Ngɛ anɔkuale mi ɔ, wɔ tsuo wa bua jɔ wawɛɛ kaa Yehowa wo wa hɛ mi nyami nɛ e fɔ wɔ nine kaa wa ba hi e bo tsu ɔ mi kɛ ya neneene!
LA 39 Mo Ná Biɛ Kpakpa Ngɛ Mawu Hɛ Mi
