1. Сарын 15:1—5 биске канайып болужар аргалу?

 ӦТКӦН јӧрмӧлдӧ, Иегова бойыныҥ байканына кандый улусты кычырып турганын билип алганыс. Ол кычырылган улус бойыныҥ јӱрӱмин Кудайга учурлап салган ла Кудайла најылажар арганы баалап турган. Је Иеговала јуук колбуларлу болорго нени эдер керек? Бу сурактыҥ каруузын билип аларга 15-чи Сарын болужар. (Сарын 15:1—5 кычырыгар.) Оныҥ учун оныҥ кажы ла ӱлгерин лаптап кӧрӱп, Иегова најыларынаҥ нени сакып турганын билип алактар.

2. Давид кандый байкан керегинде айткан болор?

² 15-чи Сарын мындый сӧстӧрлӧ башталат: «О Иегова, сениҥ байканыҥда кем айылчы болор? Сениҥ агару тууҥда кем јадар?» (Сар. 15:1). Давид «байкан» деп сӧслӧ канча да кире ӧйгӧ Гаваондо турган агару байкан керегинде айткан болор. А «агару туу» деп сӧстӧрлӧ Иерусалимдеги Сион деп кырды айткан болор. Бу кыр Гаваонноҥ тӱштӱк јаар канча да километр ыраак турган, шак ла мында Давид агару байканды ла јӧптӧжӱниҥ ковчегин тургускан (2 Сам. 6:17). Бу ковчег ӧргӧӧ тудулганча ондо турган.

3. 15-чи Сарын Иегованыҥ најызы болуп артарга канайып болужар? (Јурукты база кӧрӱгер.)

³ Агару байканда израильтяндардыҥ кӧп сабазы качан да иштебеген эмей. А јӧптӧжӱниҥ ковчеги турган кыпка тоолу ла улус кирер аргалу болгон. Је Иегованыҥ сӱрлеп айдылган байканында оныҥ кажы ла чындык ишчизи айылчызы ол эмезе најызы болор аргалу. Бу арганы бис ончобыс баалап јадыс! 15-чи Сарыннаҥ Иегованыҥ најызы болуп артарга, нени эдер керек деп билип аларыс.

 ЈЕК ЈОК БОЛУГАР, ЧЫНДЫК ЈӰРИГЕР

4. Иегованыҥ најызы болорго јӱк ле сууга чӧҥӱрилип калган болор керек пе? (Исайя 48:1).

⁴ Сарын 15:2-де Иегованыҥ најызы «јек јок» ло «чындык јӱрген» деп айдылат. Је толо кеминде эмес улуста јек јок болотон арга бар ба? Эйе, бар. Бис акту јӱрегистеҥ Иеговага сӧсуккур болорго албаданып турзаас, ол бисти јек јок деп кӧрӧт. Бис Иеговага јӱк ле кезикте эмес, је јаантайын сӧсуккур болодыс. Иеговага јӱрӱмисти учурлап, сууга чӧҥӱрилгенис — ол христиан јолдыҥ јаҥы ла башталганы болот. Не дезе биске чӧҥӱрилген де кийнинеҥ, Иеговага оноҥ ары чындык артар керек. Темдектезе, израильтяндар Иеговага учурлалып калган албаты болгон. Је олордыҥ кезигин Иегованыҥ айылчылары болгон деп айдып болбозыҥ. Нениҥ учун? Нениҥ учун дезе олор Иеговага акту јӱрегинеҥ мӱргӱбей туратан ла оны бойыныҥ керектериле ачындырып туратан. (Исайя 48:1 кычырыгар.) Је Иегованыҥ айылчызы болорго турган израильтяндарга оныҥ некелтелерин билер керек ле ол некелтелерле јӱрер керек болгон. Бӱгӱнги кӱнде база андый ла болот: сууга чӧҥӱрилип, Иегованыҥ Керечизи болуп калганысла болорзынбас керек. Биске «чындык јӱрер» керек. Бого не кирет?

5. Ӱзе немеде Иеговага сӧсуккур болоры дегени нени темдектейт?

⁵ Јек јок болоры ла «чындык јӱрери» јаҥыс ла јуунныҥ туштажуларын божотпой јӱрерин темдектебей јат (1 Сам. 15:22). Нениҥ учун дезе бис нени де этсеес, бисти кем де кӧрбӧй дӧ турза, Иеговага сӧсуккур болор учурлу (Укаа 3:6; Эккл. 12:13, 14). Керек дезе оок-теек те немелерде сӧсуккур болор керек. Анайып бис Кудайысты сӱӱп турганысты кӧргӱзерис, а Иегова дезе  бисти оноҥ тыҥ сӱӱр (Иоанн 14:23; 1 Иоанн 5:3).

6. Еврейлерге 6:10—12-ле болзо, Иегованыҥ байканында артарга, нениҥ учун јӱк ле алдындагы јакшы керектерисле болорзынбас керек?

⁶ Иегова бистиҥ ого болуп эткен ижисти баалап јат. Је бис оныҥ байканында јӱк ле алдындагы эткен јакшы керектерис учун артып болбозыс. Бис мыны Еврейлерге 6:10—12-деҥ (ЈТ кычырыгар) кӧрӧдис. Иегова бисти «учына јетире» ого акту јӱректеҥ иштезин деп кӱӱнзейт. Чӧкӧбӧзӧӧс, кайрал аларыс, ӧскӧртӧ айтса јажын-чакка Иеговага најы болорыс (Гал. 6:9).

ЈӰРЕГЕРДЕ ЧЫНДЫ АЙДЫП ТУРЫГАР

7. Јӱрегинде чынды айдары дегени нени темдектейт?

⁷ Иегованыҥ байканында айылчы болорго турган кижи «јӱрегинде чынды айдып турар» учурлу (Сар. 15:2). Бу не дегени? Ол јӱк ле тӧгӱндебей јӱрерин эмес, је бастыра јанынаҥ чындык јӱрерин темдектейт (Евр. 13:18). Ол јаан учурлу сурак, не дезе Агару Бичикте айдылганыла, «тӧгӱнчи кижи Иеговага јескинчилӱ, је чындык кижи оныҥ јуук најызы болот» (Укаа 3:32).

8. Биске кандый кылык-јаҥнаҥ кыйар керек?

⁸ «Јӱрегинде чынды айдып турган» кижи экијӱстенбей јат. Ол улустыҥ да кӧзинде Кудайга сӧсуккур јӱрет, јаҥыскан да артып калза, оныҥ јасактарын буспай јат (Иса. 29:13). Је кижи канай экијӱстенип баштайт? Озо баштап андый кижи Агару Бичиктиҥ нормаларына алаҥзып баштайт (Иак. 1:5—8). Оноҥ ол бойыныҥ кӧрӱмиле јаан эмес сурактарда Иегованыҥ сӧзин укпай барат. А качан сӧс укпаганынаҥ улам болуп турган каршуны кӧрбӧй турза, Кудайдыҥ нормаларын бузарга јаҥжыга берет (Эккл. 8:11). Андый бажырыш Кудайга јарабай јат. А бис дезе ончо јанынаҥ Кудайга чындык болорго кӱӱнзейдис.

9. Иисуска Нафанаилдиҥ кандый кылык-јаҥы сӱреен јараган, бис мынаҥ неге ӱренедис? (Јурукты база кӧрӱгер.)

⁹ Бастыра јанынаҥ чындык болор керек.  Бу дезе Филипп Нафанаил деп најызын Иисустӧӧн экелерде јакшы кӧрӱнген. Иисус Нафанаилди билбеген де болзо: «Израильдиҥ чын кижизи бу, ондо меке јок» — деп айткан (Иоанн 1:47). Иисус ӱренчиктериниҥ кемизинде де меке-тӧгӱн јок деп билер болгон. Је Нафанаилде бу кылык-јаҥ анчада ла тыҥ кӧрӱнген. Нафанаил бистий ле ок толо кеминде эмес кижи болгон до болзо, је ондо сӱмеленетен эштейтен санаа бир де болбогон. Иисуска оныҥ мындый кылык-јаҥы сӱреен јараган, оныҥ учун ол оны мактап ийген. Иисус бисти де анайып ла мактазын деп кӱӱнзеп јадыс!

10. Нени айдып турганыска нениҥ учун ајарып турар керек? (Иаков 1:26).

¹⁰ 15-чи Сарында бичилген некелтелердиҥ кӧп сабазында улуска канайып баштанар керек деп айдылган. Сарын 15:3-те айдылганыла, Иегованыҥ најызы «јабарлабай јат, јуугына каршу јетирбей јат, најыларын јамандабай јат». Бис нени айдып турганысты сананбай турзаас, улуска јаан каршу јетирердеҥ айабазыс. Ол тушта Иегованыҥ байканында артатан аргабысты јылыйтып саларыс. (Иаков 1:26, ЈТ кычырыгар.)

11. Јабарлаш ол не? Кемди-кемди јабарлаган кижи кинчегин алынбай турза, оныла не болот?

¹¹ Сарнаачыныҥ айтканыла болзо, Иегованыҥ айылчызы «јабарлабай јат». Јабарлаш ол не дегени? Бу дезе кемниҥ-кемниҥ ады-јолын ӱреерге, тӧгӱн јетирӱ јайганы. Кемди-кемди јабарлаган кижи јастыразын алынбаза, јууннаҥ чыгардырып салат (Иер. 17:10).

12, 13. Бис билбей калала, најыларысты канай јамандап ийердеҥ айабазыс? (Јурукты база кӧрӱгер.)

¹² Анайда ок Сарын 15:3-те Иегованыҥ најызы «јуугына каршу јетирбей јат, најыларын јамандабай јат» деп  айдылат. А бис канайып најыларысты јамандап ийердеҥ айабазыс?

¹³ Билбей калала, бис кемди-кемди јамандап ийердеҥ айабазыс. Темдектезе, мындый ӱч айалганы сананып ийектер: 1) эје пионер болбой барган, 2) бир биле Бет-Элде иштебей барган, 3) ака аксагал эмезе јуунныҥ болушчызы болбой барган. Нениҥ учун андый болгон деп сананып, улусла бу керегинде куучындажып турзаас, јастыра болор. Нениҥ учун дезе олордыҥ јӱрӱминде мындый солынталар чыннаҥ ла недеҥ улам болгонын бис билбезис не. А Иегованыҥ айылчызы «јуугына каршу јетирбей јат, најыларын јамандабай јат». Биске мыны ундыбас керек.

ИЕГОВАНАҤ АЙАП ТУРГАНДАРГА ТООМЈЫЛУ БАШТАНЫГАР

14. Кандый кижинеҥ «тууралаар» керек деп, Иегованыҥ најылары канайып оҥдоп ийет? Јартап беригер.

¹⁴ Сарын 15:4-тӧ айдылганыла, Иегованыҥ најызы «кара санаалу улустаҥ тууралап јӱрет». Је кижини кара санаалу деп кем айдар аргалу? Бу суракта бис бойыстыҥ кӧрӱм-санаабысла башкарынбай јадыс, нениҥ учун дезе бис кинчектӱ улус. Мынаҥ улам биске та кем де јарап јат, та кем де ичиске кирбей јат. Оныҥ учун јӱк Иегова бу кижи «кара санаалу» оноҥ кыйар керек деп айдар аргалу (1 Кор. 5:11). Андый улустыҥ тоозына кинчегин алынбай турган улус, бистиҥ бӱдӱмјибисти тообой турган эмезе Кудайла колбуларысты бузарга турган улус кирет (Укаа 13:20).

15. «Иегованаҥ айап тургандарга» тоомјыбысты канайып кӧргӱзерис?

¹⁵ Сарын 15:4-ти оноҥ ары кӧрзӧ, биске «Иегованаҥ айап тургандарды» тоор керек деп айдылат. Оныҥ учун бис Иегованыҥ најыларына јалакай ла тоомјылу баштанарга албаданадыс (Рим. 12:10). Бу недеҥ кӧрӱнет? База ла Сарын 15:4-тӧ айдылганыла, Иегованыҥ айылчызы «айткан сӧзин, бойына каршу да болотон болзо, буспай јат». Берген сӧзиске турбазаас, кижиниҥ јӱрегин шыркалап ийердеҥ айабазыс (Матф. 5:37). Темдектезе, Иегова оныҥ најылары эш-нӧкӧрине берген сӧзине турар деп сакыйт. Ол эмезе ада-энелер балдарына берген сӧзин бӱдӱрип турза, Иеговага сӱреен тыҥ јарап јат. Айдарда, бис Иегованы ла улусты сӱӱп турзаас, сӧзисти берердеҥ озо јазап сананып турарыс.

16. Бис Иегованыҥ најыларына база канайып тоомјылу баштанадыс?

¹⁶ Анайда ок бис Иегованыҥ најыларына кӱндӱзек болодыс ла бары-јогысла ӱлежип јадыс (Рим. 12:13). Бис ака-эјелерисле јаҥыс ла јууннаҥ озо ло јуунныҥ кийнинде, анайда ок јарлаар иште куучындажып турган эмезис. Је олорло кожо амырап та јадыс, а бу дезе биске бой-бойысла, Иегова Кудайысла јуук болорго болужат. Је эҥ керектӱзи — ака-эјелериске кӱндӱзек болзоос, Кудайыстаҥ тем алып јадыс.

АКЧА СӰӰБЕГЕР

17. Нениҥ учун 15-чи Сарында акча керегинде айдылат?

¹⁷ Иегованыҥ айылчызы «акчазын процентке бербей јат, буру јок кижини бурулаарга, акчага садынбай јат» (Сар. 15:5). Бу мындый кыска сарында нениҥ учун акча керегинде айдылат? Нениҥ учун дезе бис ӧйинеҥ ӧткӱре акча керегинде кӧп санана берзеес, биске акча улустаҥ, керек дезе Кудайдаҥ  да баалу боло берердеҥ айабас (1 Тим. 6:10). Јебрен ӧйлӧрдӧ кезик улус бойыныҥ ака карындаштарына процентке акча берип, байып туратан. А јаргычылар акчага садынып, буру јок кижини бурулап салатан. Мындый керектер Иеговага јескинчилӱ болот (Иез. 22:12).

18. Акчага кандый кӧрӱмдӱ болгонысты билерге, кандый сурактар болужар? (Еврейлерге 13:5).

¹⁸ Акчага мениҥ кӧрӱмим кандый деп билип аларга, мындый сурактарды сананып кӧрӱгер: «Мен акча керегинде ле ол акчага нени садып алары керегинде канча кире сананадым? Тӧлӱӱмди ӧйинде бередим бе? Эмезе мынай сананадым ба: ол кижи меге тӧлӱге акча берип турган болзо, айдарда ол акчалу, тӧлӱзин сакып алза да кем јок? Акчанаҥ улам бийиркенбейдим бе, ачынатыбайдым ба? Ака эмезе эје акчалу иштӱ болзо, оныҥ санаазы бастыра акчада деп сананбайдым ба? Јӱк ле бай ака-эјелерле најылажып, јокту ака-эјелердеҥ тууралабайдым ба?» Иегова айылчы болор арганы кажыбыска ла берген. Ол бисти качан да артыргыспас. Је Иегованыҥ најызы болуп артарга, акчаны сӱӱбес керек. (Еврейлерге 13:5 кычырыгар.)

ИЕГОВА БОЙЫНЫҤ НАЈЫЛАРЫН СӰӰП ЈАТ

19. Нениҥ учун Иегова бисти 15-чи Сарында айдылганыла јӱрзин деп кӱӱнзейт?

¹⁹ 15-чи Сарын мындый сӧстӧрлӧ божойт: «Мынайып эдип турган кижи бӱдӱрилбей, чактарга бек турар» (Сар. 15:5). Мында сарнаачы Иегова бистерди нениҥ учун бу сӧстӧрди бӱдӱрип јӱрзин деп айтканын јартап берет. Нениҥ учун дезе бис анайып ырысту болорыс. Кудайдыҥ башкартузын бӱдӱрип турзаас, оныҥ алкыжын ла корузын аларыс (Иса. 48:17).

20. Иегованыҥ најыларын кандый ӧй сакыйт?

²⁰ Иегованыҥ айылчыларын сӱреен јакшы ӧй сакыйт. Оныҥ майлаткан ишчилери теҥериде јадар, анда Иисус олорго «јер белетеп» салган (Иоанн 14:2). А јерде јадатан ишчилери Ачылта 21:3-теги судурдыҥ бӱдерин сакып јат. Иегова биске сӱреен јаан кӱндӱ эткен — бис оныҥ најылары болуп, оныҥ байканында јажын-чакка јӱрер аргалу!