LALENGOEN LALAKAW 24
RADIW 24 Tayra i Lotok ni Yihofa
Tahadaˈoc Malo Lafang ni Yihofa!
‘Yihofaaw, cima ko ngangaˈay malo lafang i pakopangan Iso?’—ˈOLIC 15:1.
KALIMLAAN NO LALAKAW
Cipinang to mamitoor kita to maanan a saali ngaˈ padotoc malo widang ni Yihofa, ato halamhamay ci Yihofa kitaanan misamaan micada to widang Ningra.
1. Miˈosi to ˈOlic 15:1-5, iraay ko maanan epoc kitaanan hani?
FAFEKANGAY a lalakaw milengoay, o patafangayto to tireng ci Yihofaan a sikawdan ano palahad to tangongolay a noka lawidang Cingranan, ngangaˈayto itini pakopangan Ningra a misalafang. Ano ihkalen ko sowal, mamisamaan ko demak ita ho ngaˈay tangongol ko kalawidang Cingranan hani? Nengnengen ko saka 15 fedengan no ˈOlic, mamafanaˈ to caˈof. (ˈOsien ko ˈOlic 15:1-5.) Ano sakadademaken ita ko mananamay a kimad itini tonini a ˈOlic i, ngangaˈayto padadotoc miingid ci Yihofaan.
2. Mitiliday to ˈOlic ci Tafiti masowal ko pakopangan ni Yihofa i, alatek maharatengay ko maanan hani?
2 Satapangan no ˈOlic saka 15 fedengan sanay ko sowal: ‘Yihofaaw, cima ko ngangaˈay itini pakopangan Iso misalafang? Cima ko ngangaˈay itini fangcalay lotok Iso mikilomaˈ?’ (ˈOlic 15:1) Mitiliday to ˈOlic a Tafitian somowal to ‘pakopangan’ ni Yihofa i, o itiniay i Kipiyon a fangcalay kopang ko maharatengay alatek. Roma i, na masowalay ni Tafiti ko ‘fangcalay lotok’ ni Yihofa, o maharatengay ningra o itiniay i Yirusalim Cion a lotok a pakopangan alatek. O Cion a lotok itiniay i katimol no Kipiyon to pina kongli ko raay, itiraay ci Tafiti patireng to cecay pakopangan miteli to katatelekan a lipa, ikorto padotocan miteli itira, tahira kalahcian patireng to fangcalay sefi.—2 Samuil 6:17.
3. Hano sakacipinangaw kita to lalakaw no ˈOlic saka 15 fedengan? (Nengnengen ko coka.)
3 ˈAlomanay a Israil tamdaw cowa ko ngangaˈay itini i fangcalay kopang matayal, edengan o pinapina a Israil tamdaw ko ngangaˈay micomod i pitelian to katatelekan a lipa a pakopangan. Kawra ano o madimadiay midoko ci Yihofaan a tamdaw, o ngangaˈay misalafang itira tora patinakoan a tatodong a pakopangan ni Yihofa misalafang, hanaca padadotoc malo widang Ningra. Tada o kalim ita maemin konini! Itini ˈOlic saka 15 fedengan masowalay, ano sakalawidangaw ko tamdaw ci Yihofaan i, oha mamipalahad ato paihkal to pina a capeling.
Itiniay lintad ni Tafiti maˈorip a Israil tamdaw madoloay a miharateng to pakayraan misalafang itini pakopangan ni Yihofa (Nengnengen ko saka 3 fatac)
AWA KO PATELAC, MOECEL KO WAYWAYAN
4. Ano ciharatengay malo lafang ni Yihofa, o pipatafang aca to tireng micada to paputisem cowaho ka edeng, hano saan ko sowal hani? (Isaya 48:1)
4 ˈOlic 15:2 somowalay o widang ni Yihofa i, ‘awaay ko patelac, moecelay ko waywayan.’ Cowa ko kinacecayay aca a pidemak, o ‘waywayan’ ita, paihkalay to padadotocay kita malo mahaenay a tamdaw. Kawrira ngangaˈay kita ‘awa ko patelac,’ awa ko dangoc han? O ngangaˈay. Manaokaniw, awaay ko malefotay a tamdaw, mamararaw kita. Kawra ano misaˈicel kita midofdof ci Yihofaan i, ‘awaay ko patelac’ hananayto ni Yihofa kita. Roma i, patafang to tireng micada to paputisem o satapangan aca, cowa ka pisawacay to ngangaˈay papadadotoc kita itini pakopangan ni Yihofa a misalafang. Haratengen hena, itini nolitengan, o tamdaw cowa ko nika o Israil tamdaw ko niyah, lonok sato a malo lafang ni Yihofa. Tinakoen, o romaroma Israil tamdaw soˈliˈlin milongocay ci Yihofaan, kawra ‘cowa ko soˈlinay ato moecelay ko falocoˈ,’ awaay ko tatodong nangra malo lafang ni Yihofa. (ˈOsien ko Isaya 48:1.) O misasoˈlinay ko falocoˈ malo lafang ni Yihofa a Israil tamdaw, oha cacipinang to maanan ko saali ni Yihofa, hanaca doedoen a midemak. Malecaday, ano sapilifokaw kita to pihayda ni Yihofa i, o picada aca to paputisem malo Misawacayay Tamdaw ni Yihofa, cowaho ka edeng, oha padadotoc kita malo ‘moecelay ko waywayan’ a tamdaw, sasamaan ko pidemak ita hani?
5. Itini i kaˈorip midofdof ci Yihofaan i maamaan a demakan, o manan ko tatodong hani?
5 Itini pinengneng ni Yihofa, ‘awa ko patelac, moecel ko waywayan’ cowa ko kararid aca tayra i Kasaˈopoan mirienang to saˈopo. (1 Samuil 15:22) Wa itini i kihcod no kaˈorip ita sarocoden a midofdof ko Kawas. Soˈlinto awa ko tamdaw i tatihi ita, ano kaemingayto a demakan, o mamisaˈicel kita mihaen to demak. (Taneng 3:6; Patnakay 12:13, 14) Paihkalay koni to soˈlinay a maolah kita to Kawas, mihaenay o mamatongalto ko kaolah no Kawas kitaanan.—Yohani 14:23; 1 Yohani 5:3.
6. Mikitini Hipray 6:10-12, o maanan ko mikikakaay to isaˈayaway noka madimadi ita a matayal hani?
6 Tada misalimlaay ci Yihofa to nano demak ita Cingranan. Kawra, cowa ka ngaˈay kita pakayni ka madimadi isaˈayaw a matayal, ciharateng to ngangaˈayto ko niyah padadotoc itini pakopangan ni Yihofa misalafang. Mikitini i Hipray 6:10-12 mahapinang konini. (ˈOsien.) Cowa ko mamapawan ci Yihofa to ngaˈayay a nidemakan ita isaˈayaw, kawra halamhamay Cingra kitaanan padadotoc miemin to falocoˈ, miemin to harateng matayal saki Cingranan, ‘tahira i tolas.’ ‘Ano caka toled’ kita i, salikor o mamilifok to sapalifon, ngaˈay tahadaˈoc malo widang ni Yihofa.—Kalatiya 6:9.
MISASOˈLIN KO FALOCOˈ A SOMOWAL
7. Soˈlin ko falocoˈ a somowal o maanan ko tatodong hani?
7 O tamdaw ano sapilifokaw to pihayda ni Yihofa, misalafang itini pakopangan Ningra i, ‘misasoˈlin ko falocoˈ a somowal’ wangaˈ. (ˈOlic 15:2) Cowa eca ka pisamangah ko sowal aca. Halamhamay ci Yihofa kitaanan itini kihcod a demakan soˈliˈlin ko falocoˈ. (Hipray 13:18) Tada masakalimlaan konini, samanen ‘mapiliˈay ci Yihofa to misafakofakoay a tamdaw, kawra makakedecay ko kalawidang to moecelay ko waywayan a tamdaw.’—Taneng 3:32.
8. Cowa ka ngaˈay ira ko masamaanay a waywayan ita hani?
8 ‘Misasoˈlinay ko falocoˈ a somowal’ a tamdaw sa i, i kaˈayaw no tamdaw makalimay a mitoor to sarikec no Kawas a midemak, ano awato ko tamdaw pakaˈaraway kamayan a midofdof. (Isaya 29:13) Cowa ko mamisamangah misafakofako cangra. Misamangahay a tamdaw alatek cisasaay to taneng ni Yihofa, cowa ka tatodong ko pina saˈosi ni Yihofa saan miharateng. (Yakop 1:5-8) Itini cowa ko masakalimlaan a demakan wa misafelit cingra to saˈosi ni Yihofa alatek. Ano cowa ka tatiih ko teloc, mamatongal ko pikasimaan ningra alatek, misatapangto midemak to ikakaay ko nika tatiih a demak, telocto i, o sapaˈaraw aca to tao ko pidoko ningra. (Patnakay 8:11) Aka a mitodong kita to mahaenay a tamdaw, itini kihcod a demakan makalimay kita misasoˈlin ko waywayan ato falocoˈ.
9. Mikitini i sakinacecay ni Yis masasoˈaraw aci Natanailan a maˈoningay, ngaˈay mahapinang ita ko maanan hani? (Nengnengen ko coka.)
9 Mikitini i sakinacecay masasoˈaraw ni Yis aci Natanail a maˈoningay, mahapinangay ita o misasoˈlinay ko falocoˈ tada masakalimlaan. Tiya ˈorongen ni Filip ko widang ci Natanail a miˈaraw ci Yisan i, pakahemekan ni Yis ci Natanail sanay ko sowal: ‘Nengnengen, o soˈliˈlinay a Israil tamdaw konini, i falocoˈ ningra awaay ko misafakofakoay.’ (Yohani 1:47) O pinengneng ni Yis i, misasoˈliˈlinay ko falocoˈ no romaroma nisawawaan, kawra mikiriwiˈay misasoˈliˈlin ci Natanail sanay cingra minengneng. Cowa ko malefotay a tamdaw ci Natanail, kawra awaay ko miming aca a mangah ningra. Tada masemeray ci Yis tonini, mansa pakahemek ci Natanailan. Halamhamay kita mahaen ko pinengneng ni Yis kitaanan.
Miˈorongay ci Filip to widang ci Natanailan miˈaraw ci Yisan i, sowal ni Yis ci Natanail o cowa pisafakofako ko falocoˈ a tamdaw. Mahaenay ko pinengneng ni Yis kitaanan han? (Nengnengen ko saka 9 fatac)
10. Hano sasongilaˈen ita miˈimer ko sema no niyah hani? (Yakop 1:26)
10 Itini ˈOlic saka 15 fedengan somowalay to pakayniay to sasamaan kita micada to tao. Tinakoen ˈOlic 15:3 sanay ko sowal, o misalafangay i pakopangan ni Yihofa a tamdaw ‘cowa ka tano sema a milikaf to tamdaw, cowa ka pikariˈang midokaˈ to cafay, cowa ka pakadit to ngangan no widang.’ Ano eca ka piˈimer kita to sema, latek ˈaˈangongol ko pidokaˈ to tao, latek mamalahdaw ita ko hatatodong, caayto ka ngaˈay misalafang i pakopangan ni Yihofa.—ˈOsien ko Yakop 1:26.
11. (1) O manan ko milikafay hananay hani? (2) O milikafay to tao a tamdaw ano caka pasasiyor i, wa ira ko masamaanay a teloc hani?
11 Masowalay no mitiliday to ˈOlic ko milikafay a demak. O manan ko milikafay hani? Tatodong i, o somowalay to pina misamangahay a sasowalen, pakaditay to ngangan no tao. Mihaenay ko demak a tamdaw ano caka pasasiyor i, o mamafalah no kasakopang.—Yirimiya 17:10.
12-13. Itini maanan a pakayraan, caay ka harateng mamapakadit ita ko ngangan no widang alatek? (Nengnengen ko coka.)
12 Itini ˈOlic 15:3 patalipaˈelalayho kitaanan, o lafang ni Yihofa cowa ko mamikariˈang a midokaˈ to cafay, cowa ko mamipakadit to ngangan no widang. O manan ko tatodong nonini hani?
13 Ano sasowal sa kita to masofaway a sowal i, latek mapakaditay ko ngangan no tao. Haratengen ko tolo a pakayraan: (1) caayto pisakafah ko cecay fafahiyan salikaka, (2) cecay mararamoday misawaday matayal i Pitil, (3) cecay faˈinayan salikaka caayto ka mala malohemay malitengay anca dama sikawdan. Ano hahantang sa kita a miharateng to midemakay cangra to maanan a raraw, anoca sowalen ita ko tao to pihantang ita a miharateng i, tada mararawayto mihaen. Soˈlinay haw i, o nika falic nora demak adihayay ko cowa ko kafanaˈan ita a lalangian alatek. Mansa haratengen ita, o lafang ni Yihofa ‘cowa ka pikariˈang midokaˈ to cafay, cowa ka pakadit to ngangan no widang.’
Ano eca ka pinaˈon milengo kita to tao i, mamihadak to masofaway a sowal, o hatiniay a sowal o mamalo milikafayto alatek (Nengnengen ko saka 12-13 fatac)
KANGODOEN KO MIDOKOAY CI YIHOFAAN A TAMDAW
14. O lafang ni Yihofa sasamaan mafanaˈ to cima ko aˈepecen nangra a ‘pakidemay ko kariˈang a tamdaw’ hani?
14 ˈOlic 15:4 sanay ko sowal, o widang ni Yihofa ‘miˈepec cingra to pakidemay ko kariˈang a tamdaw.’ O cima ko ‘pakidemay ko kariˈang a tamdaw’ hani? Haratengen, sahtoay cowa ko malefotay kita, awaay ko hatatodong misawkit to o cima ko ‘pakidemay ko kariˈang a tamdaw.’ Alatek o roma tamdaw ngaˈayay kalawidangen, hato maolahay kita cangranan, alatek cowa ka olah kita to pinangan no roma tamdaw a mapiliˈen cangranan. Mihaenay i, o miˈepecan ita a tamdaw i, edengan oya ‘pakidemay ko kariˈang’ i pinengneng ni Yihofa a tamdaw, tinakoen oya mararaway ko demak caay pasasiyor a tamdaw, cowa pisakangodo to pihakelongan ita a tamdaw, anoca sapipalakaw to nika pakasoˈlin ita a tamdaw.—Taneng 13:20; 1 Korinto 5:11.
15. Sasamaan kita ‘mikangodo to midokoay ci Yihofaan a tamdaw’ hani?
15 Dotoc i, ˈOlic 15:4 pakalalokay kitaanan mikangodo to ‘midokoay ci Yihofaan a tamdaw.’ Mankora, mamisaˈicel kita mikangodo to widang ni Yihofa, paihkal to damsayay i cangranan. (Loma 12:10) Ano hatiraay i, mamisamaan ko pidemak ita hani? Sanay ko sowal no ˈOlic 15:4, tooren ko mikiˈokan, ‘soˈlinto masipon i, cowa ko mamakesem ko falocoˈ.’ Ano caay ka pitoor kita to mihayian a demak i, oha mamidokaˈ to tao. (Matay 5:37) Halamhamay ci Yihofa to lafang Ningra mitoor to miketonan a sowal to raramod. Roma i, halamhamay Cingra to wama wina tooren ko mihayian a sowal to wawa. Maolahay kita ci Yihofaan ato tao, mansa mamisaˈicel kita mitoor to na mihadakan a sowal.
16. Mikangodo to widang no Kawas o roma pakayraan o maanan hani?
16 O cecay hapakayraan a mikangodo to widang no Kawas i, hinapaladaˈ ato hinalafang. (Loma 12:13) Cowa aca itini i kasaˈopoan ato pitosilan, aitini kita i romaroma tatokian mikalacafay to salikaka, mihaen i, mamatongal ko kalawidang, hanaca papatanoktok to kalalaˈed aci Yihofa. Hinapaladaˈ ato hinalafang kita o mitodongay ci Yihofaan.
AKA MAˈANOF TO PAYCI
17. ˈOlic saka 15 fedengan hano somowal to pakayniay i payci a demak hani?
17 O lafang ni Yihofa i, ‘pacaliw to payci i tamdaw caay ka piala to wawa no payci, caay ka picada to sapaˈalofo a mikariˈang to awaay ko raraw a tamdaw.’ (ˈOlic 15:5) Itini tonini ˈapotoay a ˈolic hano somowal ci Tafiti to pakayniay i payci hani? Samanen ano maˈanof kita to payci i, aikaka ko pisakareteng to payci to nika pisakareteng to tamdaw ato ci Yihofaan alatek, telocto i, mamadokaˈ ko tao, hanaca mamipalak to kalawidang ita aci Yihofaan. (1 Timoti 6:10) Itini nolitengan a lintad, o romaroma tamdaw pacaliway to payci i manikaway a tamdaw mialaay to wawa no payci, mihaen sapiˈafasaw to payci no tao. O romaroma misawkitay tapang micadaay to sapaˈalofo, misawkit to ciraraway ko awaay ko raraw a tamdaw sanay. O mahaenay a waywayan sahtoay o kaˈintehan ni Yihofa.—Icikil 22:12.
18. Haratengen ita ko maanan a salicay, cacipinangto ko niyah pakayni i payci iraay ko masamaanay a harateng hani? (Hipray 13:5)
18 Songilaˈen ita a mifolfol samaanay ko pinengneng no niyah to payci, o masakalimlaan konini. Saharateratengen ita: “Marariday kako miharateng to payci anca sapicakayaw to maanan han? Ano micaliway kako to payci no tao i, hato cowa ka pisaali cingra toniya payci nengnengen, nayar hanto ita eca ka patikol han? Pakayni noka adihay no payci ako, misaidahidahi ko niyah han? Pasangaray kako paihkal to hinapaladaˈay i taowanan han? Ano cihafayay ko roma salikaka, misaaretengay cangra to pakadafongay, wa saan ko harateng ako han? O cihafayay aca a tamdaw ko misawidangan ako, kawra caay ka pikihar to manikaway a tamdaw han?” Ira ko tatodong ita micada to satahidang ni Yihofa, misalafang itini pakopangan Ningra, tada o kalikoan konini, mansa falahen ita ko maˈanofay to payci a harateng. Ano mihaen i, ngangaˈayto kita padadotoc materek i pakopangan ni Yihofa, ano Cingrato co:wa ko mamifalah kitaanan!—ˈOsien ko Hipray 13:5.
TANGONGOLAY KO OLAH NI YIHOFA TO WIDANG NO NIYAH
19. Hano mihadak ci Yihofa to saali no ˈOlic saka 15 fedengan hani?
19 ˈOlic saka 15 fedengan salikoray mikiˈokay ko sowal: ‘O mahaenay ko demak a tamdaw co:wa ko mamangiyangi,’ sanay. (ˈOlic 15:5) Onini a sowal padamaay kitaanan a mihapinang, misaali ci Yihofa kitaanan midemak to masowalay no ˈOlic a demak, sakakaay lalangian i, halamhamay Cingra kitaanan lipahak ko kaˈorip. Edeng ano tooren ita ko sowal Ningra a midemak i, o mamacada ita ko pidipot ato sapalemed Ningra.—Isaya 48:17.
20. O lafang ni Yihofa iraay ko maanan a ˈodingaray a hatokel hani?
20 O lafang ni Yihofa iraay ko ˈodingaray a hatokel noikor. Mapanilnilay no fangcalay saocor a Krisciyang tatayra i kakarayan, maharekayto ci Yis patado cangranan misaday to ‘adihayay kamaroˈan.’ (Yohani 14:2) Aitini i fafekang no sera midaˈocay maˈorip a tamdaw, wa pakaˈaraw to kasongilaˈ a malaˈosi no sapairasol i Paˈarawan 21:3. Damsayay ci Yihofa mitahidang kitaanan malo widang Ningra, midaˈoc a misalafang itini pakopangan Ningra, tada malikoay kita tonini!
RADIW 39 Patireng to Makapahay Ngangan i Kaˈayaw no Kawas
