TROQUIÑ ÑI CHILLCATUNGEAL 24
ÜLCANTUN 24 Cüpange Jehová tañi fütra huincul mu
Rumel mülenagaiñ Jehová ñi tolto ruca mu
“Ahuem Jehová, ¿inei am ta huitran-ngeafui tami tolto ruca mu?” (SAL. 15:1).
¿CHEM QUIMAIÑ?
Ngüneduamaiñ chem mülei taiñ femal taiñ rumel hueniyenieafiel Jehová. Cafei inaduamaiñ chem ayüniei Jehová chumngechi taiñ cümelcayafiel tañi pu hueni.
1. ¿Chumngechi quelluafeiñmu ñi feipin Salmo 15:1-5?
RUPACHI troquiñ mu inaduamiyiñ inei engün am conpuafui Jehová ñi tolto ruca mu: feiti hultuculu tañi mongen Jehová mu ca cüme hueniyequefilu. Feula ngüneduamaiñ ti Salmo 15, quelluaiñmu taiñ mülenagcüleal Jehová ñi tolto ruca mu ca taiñ doi fülconcüleal Jehová mu (papeltunge Salmo 15:1-5).
2. David nütramcalu Jehová tañi tolto ruca mu, ¿chem raquiduamcülefui chi?
2 Ti Salmo 15:1 feipi: “Ahuem Jehová, ¿inei am ta huitran-ngeafui tami tolto ruca mu? ¿Inei am mülenagafui tami fütra huincul mu?”. Huirintuculu tüfa, David ¿raquiduampelafui ti ngillatuhue tolto ruca mu mülelu Gabaón mu? Ca David feipilu Jehová ñi “fütra huincul”, ¿nütramcapelai Sion pingechi huincul mu Jerusalén mu mülelu? Tüfa mari kilometro camapulefui Gabaón mu. Petu ñi deumangenon Chau Dios ñi ruca, David pepicai quiñe tolto ruca Sion pingechi huincul mu, femngechi ñi müleal ti falin caja pengelquelu Chau Dios ñi eldungu (2 Sam. 6:17).
3. ¿Chumngelu am ayüqueiñ taiñ inaduamal ti Salmo 15? (Ca inaduamnge ti adentun).
3 Epe com pu Israel che turpu cüdauquelafuingün ngillatuhue tolto ruca mu, ca conpuquelafuingün rume ti tolto ruca cheu ñi mülen Chau Jehová ñi Falin Caja. Huelu com pu cüme hueniyequefilu ta Jehová conpuafuingün reque Jehová tañi tolto ruca mu. ¿Com iñchiñ ayünoafulu am taiñ femal? Feimu ti Salmo 15 feipi chem mülei taiñ femal taiñ hueniyenieafiel ta Chau Jehová.
Pu Israel che David ñi antü mu cüme entendequefuingün chem pengeli tañi conal Jehová ñi tolto ruca mu. (Inaduamnge parrafo 3).
MIYAHUAIÑ CULPAQUENON MU CA FEMAIÑ CÜMEQUE DUNGU
4. Taiñ ayühuelafiel Jehová, ¿mülei taiñ fautizahual müten? (Isaías 48:1).
4 Salmo 15:2 feipi Chau Dios ñi pu cümeque hueni ‘miyauquei ñi culpaquenon mu’ ca ‘femquei tati cümeque dungu’ quiñe rupa müten no, fentecünuquelai tañi femal. ¿Iñchiñ ca miyahuafuiñ reque culpaquenon mu? Fei llemai. Culpafengeliyiñ rume, huelu eluuliyiñ taiñ inayafiel Jehová ñi feipin, fei miyauquei culpaquenon mu piaiñmu ta Jehová. Feimu hultuculiyiñ taiñ mongen Jehová mu ca fautizauliyiñ, ¿fei müten duamfali taiñ miyahual Jehová ñi rüpü mu? Femlai. Cuifi Israel mu, pu che hueniyequelafui Jehová tañi Israel chengen mu müten. Quiñeque püramyequefuingün Jehová, huelu rüf piuque mu ca nor dungu mu no (papeltunge Isaías 48:1). Pu Israel che rüf piuque mu hueniyequefilu Jehová, mülefui ñi quimafiel ca inayafiel Jehová tañi huercün dungu. Ca femngechi mülei taiñ femal. Iñche fautizaucülen, testigongen, feimu hueniyequefiñ Jehová pilayaiñ. Taiñ ayühuelafiel ta Jehová, fentecünulayaiñ taiñ femal cümeque dungu. ¿Chumngechi am?
5. ¿Chumngechi pengelafuiñ taiñ inaquefiel Jehová ñi feipin com taiñ mongen mu?
5 Fill semana amuliyiñ trahun mu, ¿feipiafuiñ taiñ ‘miyauquen culpaquenon mu’ ca ‘taiñ femquen cümeque dungu’? Femlai. Jehová ñi adquiñ mu fei müten duamfal-lai (1 Sam. 15:22). Com taiñ mongen mu mülei taiñ inayafiel Chau Jehová ñi feipin, penienoeliyiñmu rume pu che (Prov. 3:6; Ecl. 12:13, 14). Rume falin-ngei taiñ femal pichiquen dungu meu cütu, femngechi pengelaiñ taiñ rüf piuqueyeniefiel Chau Jehová ca quisu doi piuqueyeaiñmu (Juan 14:23; 1 Juan 5:3).
6. Jehová, ¿re falintuquepei mai taiñ femquefel cuifi mu? ¿Chumngelu am? (Hebreos 6:10-12).
6 Jehová rume falintuquefi com taiñ femquen taiñ cüdahuelafiel. Huelu ¿re taiñ femquefel ta cuifi mu mülenagcüleafuiñ reque Jehová tañi tolto ruca mu? Femlai, Hebreos 6:10-12 cüme feipi tüfa (papeltunge). Rüfcünu Jehová ngoimaquelai chumngechi taiñ serfiquefiel cuifi mu. Huelu mai, ayüquei taiñ rumel serfinieafiel com taiñ piuque mu. “Afeluunoliyiñ”, Jehová hueniyeaiñmu rumel mu (Gál. 6:9).
RÜF DUNGUAIÑ PIUQUE MU
7. ¿Chumngechi am rüf dunguafuiñ piuque mu?
7 Jehová tañi pu mangel ‘rüf dunguquei tañi piuque mu’ (Sal. 15:2). Jehová ayüquelai taiñ coilatual, huelu ayüquei taiñ nor chengeal com taiñ feipiqueel ca femqueel mu (Heb. 13:18). Tüfa rume falin-ngei, “Jehová üdeniefilu am tati ngünencaquelu, huelu cüme hueniyeniefi tati pu nor chengelu” (Prov. 3:32).
8. ¿Chem dungu famentuafiyiñ?
8 Quiñeque che inaquefi Chau Dios ñi feipin tañi penieteu caquelu pu che, huelu quisulen mu femquei huesaque dungu (Is. 29:13). Feitachi pu che ‘rüf dunguquelai tañi piuque mu’, epu rume piuquengei, tüfa rume cuñihun-ngei. Iñchiñ ayülelaiñ taiñ femngechi chengeal. Huelu, ¿chem yeafeiñmu taiñ epu rume piuquengeal? Quiñeque mu raquiduamafuiñ chi Jehová tañi huercün dungu müte cümequelai (Sant. 1:5-8). Femngechi raquiduamliyiñ, feyentulayafuiñ Jehová pichiquen dungu mu. Fei rupanole chem dungu rume, femürpuafuiñ doi huesaque dungu. Femngechi tunte serfifuliyiñ rume ta Jehová, huelu quisu lloulayai taiñ poyequefiel (Ecl. 8:11). Iñchiñ ayülelaiñ taiñ epu rume piuquengeal, huelu mai, ayüqueiñ taiñ nor chengeal itrocom dungu mu.
9. ¿Chem rupai hue quimfilu Jesús ta Natanael, fei chem quimeltueiñmu tüfa? (Ca inaduamnge ti adentun).
9 Rume falin-ngei taiñ nor piuquengeal. Peaiñ ñi feipin Jesús hue pefilu ta Natanael. Felipe mangelfi ta Natanael tañi quimafiel ta Jesús. Jesús turpu pequelafui ta Natanael, huelu Jesús feipi quisu meu: “Tüfei. Rüfcünu mai tüfachi Israel che nor huentrungei” (Juan 1:47). Jesús quimniefui tañi pu discipulo tañi nor huentrungen engün, huelu Natanael doi nor piuquengefui. Natanael culpafe chengefui, iñchiñ reque. Huelu quiñe rume piuque niefui, nor chengefui itrocom dungu mu. Jesús afmatufi ta Natanael ca saquifi. ¿Ayünoafulu am iñchiñ ca femngechi nor che piaeteu Jesús?
Hue quimfilu ta Natanael, Jesús feipi quisu meu tañi nor huentrungen. ¿Ca femngechi nor huentru, nor domo piafeiñmu mai Jesús? (Inaduamnge parrafo 9).
10. ¿Chumngelu mülei taiñ cuñiutucuhual taiñ feipin mu? (Santiago 1:26).
10 Ñi feipin ti Salmo 15 raquiduamelqueiñmu chumngechi taiñ troquiafiel caquelu pu che. Ti Salmo 15:3 feipi chumquei quiñe che conpulu Jehová tañi tolto ruca mu: “Coila dunguyequelai tañi quehun mu, huesa femquelafi tañi chafche, ca dunguyequelafi tañi pu hueni” pi. Huitrameldungufiliyiñ caquelu che, rume huesalcayafuiñ. Fei Jehová huemünentuafeiñmu quisu tañi tolto ruca mu (papeltunge Santiago 1:26).
11. Quiñe che coilaque dungu feipile caquelu mu tañi huesalcayafiel fei repentiunole, ¿chumngeai?
11 Ti salmista cüme quimelcünui ngelai taiñ coilaque dungu feipial caquelu mu taiñ huesalcayafiel. Quiñe peñi, quiñe lamngen coilaque dungu feipile caquelu mu, fei repentiunole, huemünentungeai trahunche mu (Jer. 17:10).
12, 13. Ngüneduamnon mu, ¿chumngechi huesalcayafuiñ taiñ pu peñi ca pu lamngen? (Ca inaduamnge ti adentun).
12 Ti Salmo 15:3 feipi Jehová tañi pu mangel “huesa femquelafi tañi chafche, ca dunguyequelafi tañi pu hueni”. Doi inaduamafiyiñ tüfa.
13 Taiñ ngüneduamnon mu huesa entuafuiñ taiñ nütram. Peafiyiñ quiñeque dungu: 1) quiñe lamngen precursorangehuenole, 2) quiñe curehuen tripale Betel mu, ca 3) quiñe peñi loncolehuelai trahunche mu cam siervo ministerialngehuelai. ¿Dunguyepeafuiñ mai caquelu iñchiñ? ¿Huesa fempeingün mai piaiñ? Quiñeque dungu quimquelaiñ, feimu cümelayafui taiñ femngechi nütramcayal. Loncontucuaiñ: com feiti mülelu Jehová tañi tolto ruca mu, “huesa femquelafi tañi chafche, ca dunguyequelafi tañi pu hueni”.
Huesa dunguyefiliyiñ caquelu, coila huitrameldungurpuafuiñ. Tüfa cuñihun-ngei. (Inaduamnge parrafo 12, 13).
YAMNIEAFIYIÑ JEHOVÁ TAÑI PU HUENI
14. Jehová tañi pu mangel, ¿inei engün am famentuquefi?
14 Ti Salmo 15:4 feipi feiti hueniyequefilu Jehová “famentuquefi inei rume illamfalngechi chengelu”. ¿Chumngechi quimafuiñ quiñe che ñi illamfalngen? Iñchiñ quimquelaiñ. Juzgalayafuiñ quiñe che ñi illamfalngen. ¿Chumngelu am? Taiñ culpanchengen mu. Ayüqueiñ taiñ müleal caquelu che iñchiñ taiñ cüme duamelqueteu, huelu quiñeque che cüme duamelquelaeiñmu, feimu ayüquelaiñ taiñ müleal fei engün mu. ¿Fei engün famentupeafiyiñ mai? Femlayaiñ. Doi mai, famentuafiyiñ feiti pu che Jehová tañi illamcaqueel müten (1 Cor. 5:11). Quiñeque engün tüfa: feiti femquelu culpan dungu ca repentiuquenolu, feiti yamquenofilu taiñ feyentun, ca feiti ayülu taiñ hueniyehuenoafiel ta Jehová (Prov. 13:20).
15. ¿Chumngechi am yamafuiñ ta caquelu?
15 Ti Salmo 15:4 ca feipieiñmu taiñ falintuafiel tati “pu yamniequefilu ta Jehová”. Feimu quintuqueiñ reque chumngechi taiñ füreneafiel ca taiñ yamnieafiel Jehová tañi pu hueni (Rom. 12:10). ¿Chumngechi femafuiñ? Ti Salmo 15:4 feipi feiti mülelu Jehová ñi tolto ruca mu “femtriparpuquei ñi feipicünuel, cümenofule rume quisu mu”. Huechunenturpunoliyiñ taiñ feipiquen, huesa duamelafuiñ caquelu (Mat. 5:37). Quiñe dungu, Jehová ayüquei pu curehuen ñi huechunenturpual tañi feipicünuhun engu. Cafei pu chau mülei ñi femal chem tañi feipicünufiel tañi pu yall. Iñchiñ piuqueyefilu am Jehová ca taiñ chafche, chem rume femqueiñ taiñ huechunentual taiñ feipicünuel.
16. ¿Ca chumngechi pengelqueiñ taiñ yamniefiel pu peñi ca pu lamngen?
16 ¿Ca chumngechi pengelafuiñ taiñ yamniefiel Jehová ñi pu hueni? Duamtuniefiliyiñ engün ca misauliyiñ taiñ nieel fei engün mu (Rom. 12:13). Mülei taiñ quiñe mu rupayal taiñ pu peñi, pu lamngen iñchiñ, trahun mu ca amuldungun mu müten no. Femngechi doi fülmaucüleaiñ fei engün mu ca Jehová mu. Misahun mu taiñ nieel, inayentuquefiyiñ ta Jehová.
DIÑMATULAYAFIYIÑ PLATA
17. Ti Salmo 15, ¿chumngelu am nütramcai plata mu?
17 Ti Salmo 15:5 ca feipi Jehová tañi pu mangel “arelquelai plata fei ñi doi cullitungeal, llouquelai chem cullitu no rume ñi huesalcayafiel ti culpaquenochi che”. ¿Chumngelu nütramcai plata mu tüfa? Rume diñmatufiliyiñ plata, famentuafuiñ caquelu pu che ca Jehová cütu (1 Tim. 6:10). Biblia ñi antü mu, quiñeque che arelquefuingün pu pofre, fei hula doi cofraquefuingün tunten tañi arelfiel. Ca quiñeque juez llouquefuingün cullitu ñi condenayafiel culpaquenochi che. Femngechi dungu Jehová ta üdequefi (Ezeq. 22:12).
18. ¿Chumngechi am ngüneduamuhuafuiñ taiñ chem raquiduamquen plata mu? (Hebreos 13:5).
18 Mülei taiñ ngüneduamuhual chem raquiduamqueiñ plata mu. Ramtuhuaiñ: “¿Re raquiduamcülequen plata mu ca chem tañi ngillacayal? Arelngeli plata, ¿alüñmaquen tañi huiñoltuafiel? ¿Duamnielafi piquen? Nieli fentren plata, ¿rume mallmauquen? ¿Cüdautuquen ñi eluafiel ta caquelu chem tañi nieel? Pefili quiñe peñi, quiñe lamngen ñi rume nien ta plata, ¿raquiduamfemquen tañi doi falintuquefiel plata Jehová mu? ¿Hueniyequefiñ nielu plata müten? ¿Pu pofre quiñepülecünuquefiñ?”. Rume falin-ngei taiñ ngüneduamuhual. Acordanieaiñ, Jehová com iñchiñ mangelqueiñmu taiñ müleal quisu tañi tolto ruca mu. Rume falintufali ta tüfa. Cuñiutucuhuaiñ taiñ diñmatunoafiel plata, femngechi Jehová chumcaunorume elcünulayaiñmu (papeltunge Hebreos 13:5).
JEHOVÁ PIUQUEYENIEFI TAÑI PU HUENI
19. ¿Chumngelu am Jehová ayülei taiñ femal com ñi feipilen ti Salmo 15?
19 Ti Salmo 15:5 af meu feipi: “Chuchi femquelu tüfachi dungu turpu quisucünungelayai”. Tüfa pengeli Jehová ayüquei taiñ femal chem pilen ti Salmo, ¿chumngelu am? Quisu ayüniei taiñ ayühun chengeal. Feimu femliyiñ taiñ feipieteu ta Jehová, doi cümelcaleaiñ ca Jehová cuñiutucuaiñmu (Is. 48:17).
20. Jehová tañi pu mangel, ¿chumngechi cümelcangeaingün?
20 Pu mülenagcülelu Jehová tañi tolto ruca mu, llohuaingün fentren cümeque dungu. Pu dullinque cristiano cüme lloungeaingün huenu meu, fei mu Jesús pepicaleyu cümeque mülehue engün (Juan 14:2). Caquelu pu cristiano müleaingün mapu mu, ca rume cümelcangeaingün chumngechi ñi feipilen Apocalipsis 21:3. Rume mañumniefiyiñ ta Jehová taiñ mangeleteu tañi tolto ruca mu. ¡Mülenagcüleafuiñ fei mu rumel mu!
ÜLCANTUN 39 Cüme üitun chengeaiñ Jehová mu
