1. ¿Kunjamsa Salmo 15:1-5 textojj yanaptʼistu?

 KHITINAKATÏ Jehová Diosar jakäwip katuyasipki, jupan amigopäpkaraki ukanakajja, Diosan carpapankañatak invitatäpjjaspawa sasaw pasïr yatichäwin yatjjataniwaytanjja. Ukampis ¿kunjamats Diosampejj sum apassna? Salmo 15 qellqataw uka jisktʼar jaysañatak yanaptʼistu, ukanjja Diosamp suma amigöñatakejj kunanaksa lursna ukwa qhanañchi (Salmo 15:1-5 liytʼäta).

2. Jehová Diosan carpapat parlasajj ¿kuna toqetsa Davidajj piensaskpachäna?

² Salmo 15 qellqatajj akham sasaw qallti: “Jehová Dios Tata, ¿khitirak carpaman suma katoqatäspasti? ¿Khitirak sagrado qolluman jakaspasti?” sasa (Sal. 15:1). Jehová Diosan ‘carpapat’ parlkasinjja, inas Salmo qellqeri Davidajj tabernaculot piensaskchïna; mä tiempojj tabernaculojj Gabaón markankänwa. Davidajj Diosan ‘sagrado qollupat’ aytarakïna, uk aytasajj inas Jerusalenankir Sion qollut parlaskchïna. Uka lugarajj Gabaón markat walja kilometronak aynach toqer sarañankänwa, ukanwa Davidajj templon lurasiñapkamajj pactor mantat arca uchasiñapatakejj mä carpa saytʼayäna (2 Sam. 6:17).

3. ¿Kunatsa Salmo 15 qellqatat yatjjatañasa? (Dibujo uñjjattʼarakïta).

³ Jilaparte israelitanakajj janiw kunapachas tabernaculon servipkänti, janirakiw pactor mantat arcajj imatäkäna uka carparus mantapkänti. Ukampis Jehová Diosat jan jitheqtir taqe servirinakapatï jupamp suma amigöpjjaspa ukhajja, carpapankañatakejj invitatäpjjaspawa. Cheqas taqeniw carpapankañ muntanjja. Salmo 15 qellqatanjja, Jehová Diosan amigopäskakiñatakejj kunjam chuymanïñasasa ukwa mä qhawqhanak qhanañchi.

 JAN JUCHANI SARNAQAPJJAÑÄNI KUNATÏ CHEQAPÄKI UK LURAPJJARAKIÑÄNI

4. Jehová Diosan amigopäñatakejj janiw bautisatäñakejj wakiskiti, ¿kunjamatsa uk yattanjja? (Isaías 48:1).

⁴ Salmo 15:2 textojja, Diosan amigopajj ‘jan juchaniw sarnaqe, kunatï cheqapäki uk luraraki’ sasaw qhanañchi. Sarnaqki ukat lurki siski uka arunakajja, jan qheparas luraskakiñatwa parli. Ukampis ¿cheqapunit ‘jan juchani sarnaqsna’? Jïsa, ukhamäspawa. Cheqas taqeniw pantjasirïtanjja, ukampis jiwasatï Jehová Diosar taqe kunan istʼañatak chʼamachasiñänejja, ‘jan juchanis sarnaqksna’ ukhamwa jupajj uñjistani. Diosar jakäwis katuyasitasasa bautisasitasas qalltakïskiwa. Amtañäni, Bibliajj qellqaskäna uka tiemponakanjja, Jehová Diosan carpapankañatakejj janiw israelitakïñajj wakiskänti. Yaqhepajj Diosar artʼasipkchïnsa, janiw “chuymatpachasa ni cheqaparjamas” artʼasipkänti (Isaías 48:1 liytʼäta). Diosan carpapankañ chuymatpach munapkäna uka israelitanakajja, Diosan leyinakapat yateqapjjañapänwa, ukarjam sarnaqapjjañaparakïnwa. Jichhürunakan ukhamarakiwa, Jehová Diosan amigopäñatakejj janiw bautisatäñakisa ni congregación taypinkañakis wakiskiti, ‘kunatï cheqapäki uk luraskakiñaw wakisi’. ¿Kunjamsa uk lursna?

5. ¿Jehová Diosatakejj ‘jan juchani sarnaqeri, kunatï cheqapäki uk lurir’ jaqejj kunjamasa?

⁵ Jehová Diosan amuyuparjamajj ‘khititï jan juchani sarnaqki, kunatï cheqapäki uk lurkaraki’ ukajja, janiw tantachäwinakaruk sapa semanajj sarkiti (1 Sam. 15:22). Cristianonakajj sapäktan ukhas Diosar taqe kunan istʼañatakiw chʼamachasiñasa (Prov. 3:6; Ecl. 12:13, 14). Inas jiwasatak mä kunas jan importantëkchiti, ukampis ukhamanakans Diosar istʼañatakejj chʼamachasiñasawa. Ukhamtï lurañänejja, Diosar munasitaswa uñachtʼayañäni, jupasti munasirakistaniwa (Juan 14:23; 1 Juan 5:3).

6. Hebreos 6:10-12 textorjamajj ¿kunatsa nayra tiempon Diosar jan jitheqtas servitasakejj jan wakiski?

 ⁶ Kunanaktï jupa layku lurawayktan ukanak Jehová Diosajj wali valoranit uñji. Ukampis kunjamtï Hebreos 6:10-12 (liytʼäta) texton qhanañchkejja, Jehová Diosan carpapankaskakiñatakejj janiw nayra tiempon Diosat jan jitheqtas servitasakejj wakiskiti. Jehová Diosajj janis taqe luratanakasat armaskchejja, taqe almasamp “tukuykam” jupar serviskakiñaswa muni. “Janitï qarjtkañänejja”, Diosajj wiñayatakiw amigosäni (Gál. 6:9).

CHUYMASAN KUNATÏ CHEQÄKI UK PARLAÑÄNI

7. Chuymasan kunatï cheqäki uk parlañajj ¿kamsañsa muni?

⁷ Salmo 15:2 textojja, Jehová Diosajj carpapar invitki ukajj ‘chuymapan kunatï cheqäki uk parli’ sasaw qhanañchi. Janiw jan kʼarisiñakejj wakiskiti. Jehová Diosajj taqe kunan honradöñaswa muni (Heb. 13:18). Ukajj wali wakiskiriwa, kuna laykutejj “engañjir jaqenakatjja Jehová Diosajj ajjtasiwa, ukampis cheqap sarnaqer jaqenakan suma amigopawa” (Prov. 3:32).

8. ¿Kunsa jan lurañasäki?

⁸ ‘Chuymapan kunatï cheqäki uk parlir’ jaqejja, janiw mayninakan uñjatakejj Diosan leyinakap istʼir tukkiti, ukat sapäki ukhajj janirak istʼkiti (Is. 29:13). Ukham lurañajj janipuniw walïkaspati. ¿Kunjamatsa maynejj ukar purtʼasispa? Jehová Diosan yaqhep leyinakapajj janis walïkaspa ukham amuyasaw ukar purtʼasispa (Sant. 1:5-8). Kunanakatï amuyuparjam jan sinti importantëki ukanakan janiw Diosar istʼjjaspati. Diosar jan istʼatapat janis kuna jan walis paskaspa ukham amuyasajja, jan ajjsartʼasaw jukʼamp jan walinak lurañ qalltjjaspa. Diosarus sirvkaspa ukhamsa jupajj amuyaskchinejja, Jehová Diosajj janiw ukham adoratap katoqkaniti (Ecl. 8:11). Ukampis jiwasajj taqe kunanwa honradöñ muntanjja.

9. Jesusajj Natanaelar uñtʼkäna ukhajj ¿kunas pasäna, ukat kunsa ukajj yatichistu? (Dibujo uñjjattʼarakïta).

⁹ Chuymasan kunatï cheqäki uk parlañajj wali wakiskiriwa, ukaw Jesusajj Natanaelar uñtʼkäna ukhajj amuyasïna. Kunapachatï Felipejj Natanael amigopar uñtʼañapatak Jesusan  ukar irpkäna ukhajja, Jesusajj janis Natanaelar uñtʼkchïnjja jupat akham sänwa: “Uñtapjjam, cheqas jupajj mä israelitawa, janirakiw kuna engaños jupan utjkiti” sasa (Juan 1:47). Cheqas Jesusajj discipulonakapan chuymapan cheq parlirïpjjatap yatïnwa, ukampis Natanaelajj jupanakat sipans jukʼamp suma chuymanïnwa. Natanaelajj jiwasjam pantjasir chuymanïkchïnsa, janiw kʼari chuymanïkänti, taqe kuns cheqaparjamaw lurirïna. Ukham suma chuymanïtapat Jesusajj jupar felicittʼänwa. Jesusajj jiwasat ukhamarak saspa ukhajj walpun kusissna.

10. ¿Kunatsa lajjras controlañasa? (Santiago 1:26).

¹⁰ Salmo 15 qellqatan parlki uka mayitanakata jan ukajj requisitonakat jilapartejja, kunjamsa mayninakar uñjtan uka toqetwa parli. Salmo 15:3 textonjja, Jehová Diosajj carpapar katoqki ukanakajj kunjamäpjjesa uk akham siwa: “Jupajj janiw khitirus kʼarintkiti, janiw jaqe masiparojj kuna jan walsa lurkiti, janirakiw amigonakapatsa kuna jan wals parlkiti” sasa. Jan wal parlatasajj janiw mayninakarukejj chuym ustʼaykiti, jan ukasti Jehová Diosan carpapankañatwa jarkʼarakistaspa (Santiago 1:26 liytʼäta).

11. ¿Kunas kʼarintañajja, ukat mä cristianotï maynir kʼarintasin jan arrepentiskchi ukhajj kunas pasaspa?

¹¹ ¿Kuna toqetsa salmistajj parlaskäna? Kʼarintañ toqetwa qhan parlaskäna. ¿Kunas kʼarintañajja? Maynir jan walit uñjayañatak kʼarinak parlañawa. Mä cristianotï maynir kʼarintchi ukat janirak arrepentiskchi ukhajja, congregacionat jaqsutaw uñjasispa (Jer. 17:10).

12, 13. Amigonakasat jan wal parlasajj jupanakaruw jan walit uñjaysna, ¿kunjamanakats ukhamar purtʼassna? (Foto uñjjattʼarakïta).

¹² Salmo 15:3 textojja, Jehová Diosan carpapankirejj “janiw jaqe masiparojj kuna jan walsa lurkiti, janirakiw amigonakapatsa kuna jan wals parlkiti” sasaw amtayistu. Amigonakasat jan wal parlasajj jan walitwa jupanakar uñjaysna. ¿Kunjamsa ukar purtʼassna?

 ¹³ Jan amuyasisaw mayninakat jan wal parlasajj jan walit uñjaysna. Aka toqenakat amuytʼañäni: 1) mä kullakaw precursorat serviñ jaytjje, 2) mä chacha warmiw Betelat sarjjapjje, 3) mä jilatajj janiw ancianöjjeti jan ukajj janiw siervo ministerialäjjeti sasaw yatiyasi. Jan walinaks jupanakajj lurapkaspa ukats ukham serviñ jaytjjapjjaspa ukham janiw mayninakar parlañasäkiti. Janiw uka jilat kullakanakan razonanakap sumpach yatktanti. Janipun ak armañäniti, Jehová Diosan carpapankirejj “janiw jaqe masiparojj kuna jan walsa lurkiti, janirakiw amigonakapatsa kuna jan wals parlkiti”.

JEHOVÁ DIOSAR AJJSARIRINAKAROJJ RESPETAPJJAÑÄNI

14. ¿Khitis ‘Diosan uñisit jaqejj’ uk kunjamatsa yatsna, ukat khitinakampis jan chikachasiñasäki?

¹⁴ Salmo 15:4 textojja, Jehová Diosan amigopajj janiw ‘Diosan uñisitäki uka jaqerojj katoqkiti’ siwa. Ukampis khitis Diosan uñisit jaqejja uk janiw amuyusarjamakejj yatksnati, kuna laykutejj pantjasir jaqëtanwa, khitinakampitï amuyusarjamajj sum apasiñjamäki ukanakakiw chuymar purtʼistaspa, yaqhepajj janirakiw chuymar purtʼkistaspati. Ukhamajj khitinakarutï Jehová Diosajj uñiski ukanakampikiw jan chikachasiñasäkiti (1 Cor. 5:11). Jupanakat yaqhepajj akanakawa: jucha lurasin jan arrepentisirinaka, Diosar confiyatasaru kunanakarutï creyktan ukar jan respetir jaqenaka, Diosamp sum apasitas aynachtʼayañ munirinaka (Prov. 13:20).

15. ¿Kunjamsa “Jehová Diosar ajjsarapki” ukanakar respetatas uñachtʼaysna?

¹⁵ Maysa toqetjja, Salmo 15:4 textojj “khitinakatï Jehová Diosar ajjsarapki ukanakarojj” respetañasawa sasaw qhanañchistu. Ukatwa Diosan amigonakapar khuyapayasiñampi respetomp uñjañatak chʼamachastanjja (Rom. 12:10). ¿Kunjamsa uk lursna? Salmo 15:4 textorjamajja, Jehová Diosan carpapankirejj “promesa luratapjja phoqewa, uka promesa phoqañatakejj jan walins uñjaskchejja phoqapuniwa”. Jiwasatï arsutas jan phoqksna ukhajja, mayninakaruw chuym usuchjsna (Mat. 5:37). Jehová Diosajj carpapankirinakajj ak phoqapjjaspa ukwa muni: casado chacha warminakajj kuntï casarasisajj arsupkäna uk phoqapjjaspa, awk taykanakajj kuntï wawanakapar arsupki uka promesanakap phoqañatak chʼamachasipjjaspa ukwa muni. Niyakejjay Diosampir jaqe masisampir munasstanjja, arsutas phoqañatakejj chʼamachasiñasapuniwa.

16. ¿Kunjamatsa Jehová Diosan amigonakapar respetatas uñachtʼayaraktanjja?

¹⁶ Maysa toqetjja, katoqtʼasirïsa wajjtʼasirïsaw Diosan amigonakapar respetatas uñachtʼaysna (Rom. 12:13). Jilat kullakanakasamp kusistʼañatak tantachtʼasktan ukhajja, jupanakampis Jehová Diosampis jukʼamp sum apastanjja. Ukhamarus katoqtʼasirïsajja, Jehová Diosat yateqasitaswa uñachtʼayasktanjja.

JAN SINT QOLLQ MUNAPJJAÑÄNITI

17. ¿Kunatsa Salmo 15 qellqatan qollqet parli?

¹⁷ Salmo 15 qellqatanjja, Jehová Diosan carpapankirejj “qollqepjja jan interesampiw maytʼi, janirakiw jan juchani jaqe contra saytʼañatakejj mä kunampis chilltayaskiti” sasaw qhanañcharaki (Sal. 15:5). ¿Kunatsa uka salmojj qollqet parlpacha? Kuna laykutejj facilakwa qollqe munañampejj apayasjjsna. Jiwasatï ukamp apayasjjsna ukhajja, mayninakat sipans ukakiw nayrankjjaspa, janirakiw Diosampejj sum apasjjsnati (1 Tim. 6:10). Bibliajj qellqaskäna uka tiemponakanjja, qollqe maytʼirinakat yaqhepajj interesamp kuttʼayasjjasaw pisin jakasir jilanakapat aprovechasipjjerïna.  Jan juchanïpki ukanakar juchañchañatakejja, qollqemp chilltayasir juezanakas utjarakïnwa. Ukampis Jehová Diosajj taqe ukanak uñisiwa (Ezeq. 22:12).

18. ¿Kamsasas jisktʼasiñasa? (Hebreos 13:5).

¹⁸ Kunjam chuymampis qollqer uñjtan uk amuytʼasiñasajj wali askiwa. Akham sasaw jisktʼassna: “¿Qollqetakt piensasktjja, kunsa alasirista ukakt piensasktjja? Maynit qollq maytʼasisajj ¿janiw uka qollq necesitkpachat sasin amuyasakit jan jankʼas kuttʼayktjja? ¿Qollqenïsajj jukʼamp importantëkiristsa ukhamt amuyastjja? ¿Wajjtʼasirïñajj nayatak chʼamakiti? ¿Qollqen jilat kullakanakajj qollqe chuymäpkaspas ukhamt amuytjja? ¿Qollqeninakan amigopäñ munasajj janit pobrenakan amigopäñ munktjja?” sasa. Cheqas Jehová Diosan carpapankañajj mä jachʼa bendicionawa. ¡Janipun uk aptʼasiñäniti! Ukhamajj jan qollq sinti munañamp apayasipjjañäniti. Ukhamtï lurañänejja, Jehová Diosajj janipuniw jaytjkistaniti (Hebreos 13:5 liytʼäta).

JEHOVÁ DIOSAJJ AMIGONAKAPAR MUNASIWA

19. Salmo 15 qellqatankir requisitonak ¿kunatsa Jehová Diosajj churistu?

¹⁹ Salmo 15 qellqatajj aka arunakampiw tuktʼayi: “Khititï ukanak lurki ukajja suma saytʼatäniwa” sasa (Sal. 15:5). Jehová Diosajj kusisitäñaswa muni, ukatwa Salmo 15 qellqatankir mayitanaksa jan ukajj requisitonaks churistu. Ukatarakwa bendicionap katoqañatakisa jupan jarkʼaqatäñatakis kunanaksa lurañasa uk yatichistu (Is. 48:17).

20. ¿Jehová Diosan carpapankirinakajj kuna bendicionanaks jutïrin katoqapjjani?

²⁰ Khitinakatï Jehová Diosat jan jitheqtas carpapankasipkakini ukanakajja, jutïrin walja bendicionanakwa katoqapjjani. Ajllitanakajj alajjpachan suma katoqatäpjjaniwa, Jesusaw jupanakan ‘jakapjjañapatakejj walja lugaranak’ wakichtʼawayi (Juan 14:2). Mayni cristianonakajja, aka oraqenwa Apocalipsis 21:3 texton parlki uka bendicionanak katoqapjjani. Jehová Diosajj wiñayatak carpapankañaswa muni, ¡ukajj mä jachʼa bendicionapuniwa!