1. Aha do manfaatna molo taparsiajari Psalmen 15:​1-5?

 DI ARTIKEL sebelumna nungnga tabahas be, akka halak na mangalehon ngoluna tu Jahowa jala na marale-ale dohot Ibana boi gabe tamu di kemahna. Alai aha do na ikkon taulahon asa boi gabe tamu di kemah ni Jahowa? Dipaboa do carana di Psalmen 15.—Jaha Psalmen 15:​1-5.

2. Aha do hira-hira maksud ni si Daud tikki didok ibana taringot kemah ni Jahowa?

² Di mula ni Psalmen 15 didok do, “Ale Jahowa, ise do na boi gabe tamu di kemahmu?” (Ps. 15:1) Tikki didok si Daud taringot ‘kemah’ ni Jahowa, olo do ra maksudna tabernakel na hea di Gibeon. Jala tikki didok si Daud taringot ‘dolok ni Debata na badia’, olo do ra maksudna Dolok Sion na di Jerusalem. Hira-hira sappulu kilometer di sabola selatan ni Gibeon ma Dolok Sion i. Dibahen si Daud do disi kemah lao manippan poti parpadanan sahat tu na dipajongjong bagas joro.—2 Sam. 6:17.

3. Boasa lomo rohatta mamparsiajari Psalmen 15? (Ida gambar.)

³ Memang, godangan halak Israel dang hea marhobas di tabernakel. Jala holan otik do halak na hea masuk tu kemah na di Dolok Sion i. Alai sude naposo ni Jahowa na setia boi gabe tamu di kemah ni Jahowa molo toktong nasida marale-ale dohot Jahowa. Lomo do rohatta gabe ale-ale ni Jahowa. Di Psalmen 15, dipaboa do aha na ikkon taulahon asa gabe ale-ale ni Jahowa. Tabahas ma i di artikel on.

 TOKTONG MANGOLOI DEBATA JALA MANGULAHON NA SITTONG

4. Sian dia do taboto dang sae holan tardidi hita asa boi mambahen las roha ni Jahowa? (Jesaya 48:1)

⁴ Di Psalmen 15:2 didok do ale-ale ni Jahowa i, i ma halak na ‘toktong mangoloi Debata, jala na mangulahon na sittong’. Hata “toktong” lapatanna torus mangulahon i, dang marnaso. Alai memang boi do hita toktong mangoloi Debata? Memang, jolma na so sempurna do hita. Alai molo berupaya hita mangoloi Debata, dianggap Ibana do hita halak na toktong mangoloi. Najolo, dang otomatis halak boi gabe tamu ni Jahowa nang pe halak Israel nasida. Alana adong do halak Israel na manjou Jahowa, alai ‘dang sian ias ni roha ni nasida mangulahon i jala dang diulahon nasida na sittong’. (Jaha Jesaya 48:1.) Molo lomo roha ni halak Israel gabe tamu ni Jahowa, ikkon diboto nasida do aha na dipangido Jahowa jala diulahon nasida i. Suang songon i ma hita. Molo lomo rohatta asa las roha ni Jahowa tu hita, dang sae holan tardidi jala gabe Saksi Jahowa. Alana tikki talehon ngolutta tu Jahowa jala tardidi, baru mulana dope i. Dung tardidi hita, ikkon toktong do taulahon na sittong. Songon dia carana?

5. Aha do lapatanna mangoloi Jahowa di sasudena?

⁵ Asa dianggap Jahowa hita halak na ‘toktong mangoloi Ibana jala na mangulahon na sittong’, dang sae holan ro hita tu parpunguan. (1 Sam. 15:22) Alai ikkon marsitutu do hita mangoloi Debata di sude parngoluotta, nang pe dang adong halak na mangida hita mangulahon na sittong. (Poda 3:6; Pjm. 12:​13, 14) Adong do ra paretta ni Debata na idaon songon na so pola penting. Nang pe songon i, berupaya ma hita mangoloi paretta i. Molo taulahon songon i, on patuduhon na tahaholongi do Jahowa. Hasilna, gabe lam holong ma roha ni Jahowa tu hita.—Joh. 14:23; 1 Joh. 5:3.

6. Nang pe nungnga taulahon akka na denggan di tikki naung salpu, alai aha do na uppetting sian i? (Heber 6:​10-12)

 ⁶ Massai diargai Jahowa do akka naung marhasil taulahon. Alai akka naung marhasil taulahon, dang cukkup mambahen hita toktong gabe tamu di kemah ni Jahowa. Takkas do i dipaboa di Heber 6:​10-12. (Jaha.) Memang dang dilupahon Jahowa akka na denggan na taulahon. Alai lomo do rohana asa sian ias ni rohatta hita manomba Ibana “sahat tu ujungna”. Boi do hita gabe ale-alena salelengna molo “dang marnaloja” hita mangulahon akka na sittong.—Gal. 6:9.

SAI MAKKATAHON NA SITTONG DI BAGASAN ROHA

7. Aha do lapatanna sai makkatahon na sittong di bagasan rohatta?

⁷ Halak na gabe tamu di kemah ni Jahowa ‘sai makkatahon na sittong do di bagasan rohana’. (Ps. 15:2) Alai sae do holan dang margabus na dimaksud disi? Daong. Lomo do roha ni Jahowa asa jujur hita di sude na tahatahon dohot na taulahon. (Heb. 13:18) Massai penting do on, alana “sogo do roha ni Jahowa tu pangoto-otoi, alai marale-ale do Ibana tu halak na tigor marroha”.—Poda 3:32.

8. Sikap na songon dia do na ikkon tabolokkon?

⁸ Akka halak na ‘makkatahon na sittong di bagasan rohana’ dang olo gabe halak na munafik. Halak na munafik dioloi nasida do Debata holan tikki diida halak. Alai diulahon nasida do na sala tikki dang adong na mangida ibana. (Jes. 29:13) Halak na makkatahon na sittong di bagasan rohana pe, dang olo gabe pangoto-otoi. Sahalak pangoto-otoi marpikkir dang sai sittong sude aturan ni Jahowa. (Jak. 1:​5-8) Jadi molo didok rohana piga-piga aturan ni Jahowa hira na so pola penting idaon, dang diulahon ibana i. Dung i molo hira na so adong dihilala ibana akibatna ala dang dioloi ibana aturan i, gabe barani do ibana mangulahon na upparah sian i. Jadi nang pe didok rohana na manomba Jahowa ibana, alai dang dijalo Jahowa ibadatna i. (Pjm. 8:11) Tottu dang olo hita gabe halak sisongon i. Lomo do rohatta asa jujur di sasudena.

9. Aha do na boi taparsiajari sian hata ni Jesus tikki pajuppang dohot si Natanael? (Ida gambar.)

 ⁹ Massai penting do makkatahon na sittong di bagasan rohatta. Songon i do sikap ni si Natanael, tikki dipatandahon si Pilippus ibana tu Jesus. Nang pe dang hea Jesus pajuppang dohot si Natanael didok Jesus do, “Ida ma, ibana do halak Israel na tutu jala dang adong gabus di ibana.” (Joh. 1:47) Memang sisean ni Jesus na asing pe halak na jujur do. Alai luar biasa do kejujuran ni si Natanael on. Nang pe dang sempurna si Natanael songon hita, alai dang munafik ibana. Gariada jujur do ibana di sasudena. I do alana lomo do roha ni Jesus mangida si Natanael, jala dipuji Jesus do ibana. Ikkon songon i ma nian Jesus mangida hita.

10. Boasa ikkon jolo tapikkirhon aha na naeng tahatahon? (Jakobus 1:26)

¹⁰ Taringot carana maradoppon halak na asing do na gumodang dipaboa di Psalmen 15. Misalna di Psalmen 15:3 didok, halak na gabe tamu di kemah ni Jahowa ‘dang olo mandok hata so tutu, dang olo mambahen na jahat tu donganna, jala dang pailahon donganna’. Molo tadok hata na so tutu taringot halak na asing manang memfitnah, gabe haccit do roha ni nasida jala dang boi be hita gabe tamu di kemah ni Jahowa.—Jaha Jakobus 1:26.

11. Aha do fitnah i? Aha do akibatna molo adong halak na memfitnah donganna jala dang olo bertobat?

¹¹ Dipaboa panurat psalmen do taringot halak na memfitnah donganna. Aha do fitnah? Fitnah, i ma hata na so tutu na boi mambahen hancur reputasi ni halak na asing. Molo adong halak na memfitnah donganna jala dang olo bertobat, ikkon dipakaluar do ibana sian huria.—Jer. 17:10.

12-13. Tikki situasi songon dia do hita boi gabe pailahon donganta? (Ida gambar.)

¹² Di Psalmen 15:​3, dipaingot do hita akka halak na gabe tamu ni Jahowa dang olo mambahen na jahat tu donganna jala dang olo pailahon donganna. Aha do maksudna?

 ¹³ Didok do hita halak na mambahen na jahat tu donganta molo takarang-karang cerita na sala taringot nasida jala tapaboa i tu na asing. Tabayakkon ma tolu situasi on: (1) sahalak donganta borua dang gabe perintis be, (2) suami istri na so karejo be di Betel, manang (3) sahalak donganta bawa dang gabe sintua be manang parhobas di huria. Denggan do molo tadok tu halak na asing, adong na sala na diulahon akka donganta i, umbahen na muba tugas ni nasida? Dang denggan songon i! Taingot ma, godang do alasan na so taboto na mambahen muba tugas ni nasida. Takkas ma, halak na gabe tamu di kemah ni Jahowa ‘dang olo mambahen na jahat tu donganna jala dang olo pailahon donganna’.

MANGARGAI HALAK NA MAKKABIARI JAHOWA

14. Patorang ma ise do ‘halak na so hasea’ na so boi didongani tamu ni Jahowa.

¹⁴ Di Psalmen 15:​4, didok do dongan ni Jahowa ‘dang olo mardongan tu halak na so hasea’. Ise do maksudna halak na so hasea? Ala jolma na so sempurna hita, dang boi hita manottuhon sasahalak hasea manang na dang. Alana biasana las do rohatta mardongan holan tu halak na tahalomohon sifatna. Jadi, akka halak na so hasea menurut Jahowa ma na so tadongani. (1 Kor. 5:11) Akka halak na so hasea, i ma akka halak na mangulahon na jahat jala dang olo bertobat, halak na so mangargai haporseaotta, dohot halak na berupaya manegai hubungatta tu Jahowa.—Poda 13:20.

15. Boha do carana mangargai “halak na makkabiari Jahowa”?

¹⁵ Di Psalmen 15:4 dijujui do hita asa mangargai “halak na makkabiari Jahowa”. Jadi ikkon talului do cara lao makkaholongi jala mangargai akka ale-ale ni Jahowa. (Rom 12:10) Sada carana dipaboa do tong di Psalmen 15:4. Didok do disi, halak na gabe tamu di kemah ni Jahowa, ‘ditepati ibana do janjina nang pe rugi ibana’. Molo dang olo hita menepati janjitta, boi do gabe haccit roha ni halak tabahen. (Mat. 5:37) Jadi tatepati ma janjitta. Misalna, diparettahon Jahowa do asa suami dohot istri dang melanggar janji perkawinan ni nasida. Asing ni i, las do roha ni Jahowa molo marsitutu natua-tua menepati janji ni nasida tu ianakkon ni nasida. Ala holong do rohatta tu Debata dohot tu akka halak, pasti marsitutu do hita menepati janjitta.

16. Aha do muse cara na asing lao mangargai ale-ale ni Jahowa?

¹⁶ Cara na asing lao mangargai ale-ale ni Jahowa, i ma mangalehon na adong di hita tu akka dongan jala mangundang nasida tu jabutta. (Rom 12:13) Molo olo hita bergaul dohot akka donganta dang holan tikki marpungu manang marbarita, gabe lam jonok ma hita tu nasida dohot tu Jahowa. Jala molo taundang nasida tu jabutta, na maniru Jahowa do hita disi.

DANG HOLONGAN DI HEPENG

17. Boasa ditaringoti panurat Psalmen 15 taringot hepeng?

¹⁷ Di Psalmen 15 tajaha do, tamu ni Jahowa “dang pabungahon hepengna jala dang olo manjalo suap lao mangalo halak na so marsala”. (Ps. 15:5) Boasa ditaringoti panurat psalmen on taringot hepeng? Alana molo holongan di hepeng hita, gabe uppetting ma hepeng i sian hubungatta dohot halak na asing, tarlumobi dohot Jahowa. (1 Tim. 6:10) Najolo adong do halak na mambuat uttung sian donganna na pogos na maminjam hepeng tu nasida. Timbo hian do dibahen nasida bunga ni hepengna. Asing ni i, adong piga-piga hakim na manjalo suap jala dihukum nasida do  halak na so marsala. Sogo do roha ni Jahowa tu halak na mangulahon sisongon i.—Hes. 22:12.

18. Sukkun-sukkun aha do na boi tapikkirhon lao mamareso songon dia sikapta taringot hepeng? (Heber 13:5)

¹⁸ Denggan do molo tapareso songon dia sikapta taringot hepeng. Tasukkun ma tu diritta, ‘Aha do na sai hupikkirhon, taringot hepeng dohot akka na boi hutuhor do? Molo hupinjam hepeng ni halak, hupaleleng-leleng do manggarar i ala didok rohakku dang porlu di ibana hepeng i? Gabe unjago do huhilala dirikku sian na asing ala godang hepengku, jala holit do au? Gabe huanggap do akka donganta na mora halak na holongan di hepeng? Holan tu halak na mora do au olo mardongan, jala dang parduli tu halak na pogos?’ Massai penting do tapikkirhon sukkun-sukkun on. Alana nungnga dilehon Jahowa kesempatan na luar biasa tu hita lao gabe tamuna. Alani i, taargai ma i jala unang ma holongan di hepeng hita. Molo taulahon i, dang tadikkonon ni Jahowa hita.—Jaha Heber 13:5.

DIHAHOLONGI JAHOWA DO ALE-ALENA

19. Boasa lomo roha ni Jahowa taulahon sude na didok di Psalmen 15?

¹⁹ Di ujung ni Psalmen 15 didok do, “Manang ise na mangulahon i sude, togu ma ibana saleleng ni lelengna.” (Ps. 15:5) On ma alasanna boasa lomo roha ni Jahowa taulahon sude na didok di Psalmen 15 on. Lomo do rohana asa marlas ni roha hita. Molo taulahon aha na dipangido Jahowa tu hita, gabe denggan ma ngolutta jala linggomanna do hita.—Jes. 48:17.

20. Aha do na dipaima-ima tamu ni Jahowa?

²⁰ Tarpaima do tamu ni Jahowa boi mandapot masa depan na luar biasa. Akka halak na miniahan lao mangolu do di surgo, i ma inganan naung diparade Jesus tu nasida. (Joh. 14:2) Molo akka halak na naeng mangolu salelengna di tano on, tarpaima do nasida tu janji na dipaboa di Pangungkapon 21:3. Tottu sada hasangapon do di hita, ala diundang gabe tamu di kemah ni Jahowa salelengna!