1. Paano makakatabang sa sato an Salmo 15:​1-5?

 SA SINUNDAN na artikulo, naaraman niyato na an dusay na mga lingkod ni Jehova puwedeng magin mga bisita sa saiyang piguratibong tolda paagi sa pagkaigwa nin dayupot asin personal na relasyon sa saiya. Pero paano kita makukuwalipikar na magin mga bisita niya? Dakul an sinasabi kan Salmo 15 manungod sa bagay na ini. (Basahon an Salmo 15:​1-5.) An salmong ini nagtatao nin praktikal na mga leksiyon na makakatabang sa sato na magin mas harani sa Diyos.

2. Ano an posibleng nasa isip ni salmista David kan sambiton niya an tolda ni Jehova?

² An Salmo 15 nagpupuon sa mga hapot na: “O Jehova, siisay an puwedeng magin bisita sa tolda mo? Siisay an puwedeng mag-istar sa banal na bukid mo?” (Sal. 15:1) Kan sambiton ni salmista David an “tolda” ni Jehova, posibleng an nasa isip niya iyo an tabernakulo, na may panahon kaidto na nasa Gibeon. Sinambit man ni David an “banal na bukid” nin Diyos na tibaad nanunungod sa Sion sa Jerusalem. Sa lugar na iyan, na nagkapirang kilometro sa timog kan Gibeon, nagpatindog si David nin sarong tolda para magin irukan kan kaban kan tipan sagkod na makapagtugdok na nin mas permanenteng magigin irukan kaiyan.​—2 Sam. 6:17.

3. Taano ta dapat kitang magin interesado sa Salmo 15? (Hilingon man an ritrato.)

³ Siyempre, dai itinutugot sa kadaklan na Israelita na maglingkod sa tabernakulo, asin pipira sana an puwedeng maglaog sa tolda kun sain yaon an kaban kan tipan. Pero an gabos na maimbod na lingkod ni Jehova puwedeng magin bisita sa saiyang piguratibong tolda paagi sa pagigin nindang amigo niya asin pagdanay na amigo niya. Sarong bagay iyan na minamawot ta gabos. Sinambit  sa Salmo 15 an nagkapirang kuwalidad na kaipuhan tang kultibaron asin ipahiling tanganing magdanay kitang amigo ni Jehova.

MAGLAKAW NA DAING SÁLA ASIN GIBUHON AN TAMA

4. Taano ta masasabi tang bako lang pagpabawtismo an hinahagad sa sato ni Jehova? (Isaias 48:1)

⁴ Sa Salmo 15:​2, an sarong amigo nin Diyos ilinadawan na “saro na naglalakaw na daing sála, na naggigibo nin tama.” An mga terminong “naglalakaw” asin “naggigibo” nagpaparisa nin aksiyon na dapat na padagos tang gibuhon. Pero kaya ta daw talagang ‘maglakaw na daing sála’? Iyo. Totoo na mayo nin tawong perpekto, pero mamansayon kita ni Jehova na “naglalakaw na daing sála” kun ginigibo ta an satong pinakamakakaya na magkuyog sa saiya. Kan idusay ta an satong sadiri sa Diyos asin magpabawtismo, nagpupuon pa sana an paglakaw ta kaibanan nin Diyos. Mangnuhon na kan mga panahon kan Bibliya, an basta pagigin kabilang sa nasyon nin Israel dai awtomatikong nangangahulugan na kuwalipikado na an saro na magin bisita ni Jehova. An iba nag-aapod sa saiya pero “bakong uyon sa katotoohan asin katanusan.” (Basahon an Isaias 48:1.) Kaipuhan na maaraman kan sinserong mga Israelita an manungod sa mga kahagadan ni Jehova asin sunudon an mga iyan. Sa kaagid na paagi, para makamtan an pag-uyon nin Diyos ngunyan, bako lang pagpabawtismo asin pakikiasosyar sa Kristiyanong kongregasyon an dapat tang gibuhon. Dapat tang padagos na ‘gibuhon an tama.’ Ano an buot sabihon kaiyan?

5. Ano an buot sabihon kan pagkuyog ki Jehova sa gabos na bagay?

⁵ Sa paghiling ni Jehova, an buot sabihon kan ‘paglakaw na daing sála’ asin ‘paggibo nin tama’ bako lang basta regular na pagpartisipar sa nagkapirang aktibidad sa lugar nin pagsamba. (1 Sam. 15:22) Dapat tang pagmaigutan na magkuyog sa Diyos sa lambang aspekto kan satong buhay, dawa pag nagsosolo kita. (Tal. 3:6; Ecl. 12:​13, 14) Mahalaga na hinguwahon tang  magkuyog ki Jehova dawa sa garo baga saradit na bagay. Sa paggibo kaiyan, ipinapahiling niyato na talagang namumutan ta siya, asin huli kaiyan mas mamumutan niya kita.​—Juan 14:23; 1 Juan 5:3.

6. Uyon sa Hebreo 6:​10-12, ano an mas mahalaga kisa sa ano man na mga gibo nin kaimbudan niyato kaidto?

⁶ Pinapahalagahan na marhay ni Jehova an mga ginibo ta kaidto para sa saiya. Pero dai buot sabihon na miling nagpahiling na kita kaidto nin mga gibo nin kaimbudan, kuwalipikado na kitang magdanay na mga bisita sa tolda ni Jehova. Malinaw ining ipinahiling sa Hebreo 6:​10-12. (Basahon.) Dai linilingawan ni Jehova an marahay na mga ginibo ta kaidto. Alagad gusto niyang padagos ta siyang sambahon nin bilog na kalag “sagkod sa katapusan.” Bilang balos, magigin amigo ta siya sagkod pa man “kun dai kita masuko” o mapundo.​—Gal. 6:​9, nota sa ibaba.

MAGTARAM NIN KATOTOOHAN SA SAIMONG PUSO

7. Ano an buot sabihon kan pagtaram nin katotoohan sa satong puso?

⁷ An siisay man na gustong magin bisita sa tolda ni Jehova dapat na “nagtataram nin katotoohan sa puso niya.” (Sal. 15:2) Bako lang basta dai pagputik an buot sabihon kaini. Gusto ni Jehova na magin sadiyosan kita sa gabos tang sinasabi asin ginigibo. (Heb. 13:18) Mahalaga iyan, “huli ta ikinakabaldi ni Jehova an tawong tuso, pero dayupot siyang nakikipag-amigo sa mga matanos.”​—Tal. 3:32.

8. Anong paggawi an dapat tang likayan?

⁸ An saro na ‘nagtataram nin katotoohan sa saiyang puso’ dai nagsasagin-sagin na makinuyog pag may mga nakakahiling pero binabalga an mga katugunan nin Diyos pag siya na sana. (Isa. 29:13) Dai siya minagawi nin may katusuhan. An sarong tawong tuso tibaad magpuon na magduda kun baga madunong na sunudon an nagkapira sa mga katugunan ni Jehova. (Sant. 1:​5-8) Tibaad suwayon niya si Jehova sa mga bagay na sa hiling niya bakong gayong mahalaga. Dangan kun garo baga mayo man nin maraot na mga konsekwensiya an pagsuway niya, tibaad magin mas desidido siyang lalo pang suwayon an mga pagbuot nin Diyos, asin magin sagin-sagin na sana an saiyang pagsamba. (Ecl. 8:11) Alagad kita, gusto tang magin sadiyosan sa gabos na bagay.

9. Ano an manunudan ta sa nangyari kaidtong inot na mahiling ni Jesus si Natanael? (Hilingon man an ritrato.)

 ⁹ Manungod sa kahalagahan kan pagkaigwa nin sinserong puso, may manunudan kita sa nangyari kaidtong ipabisto ni Felipe si Natanael ki Jesus. Dawa ngani ini pa lang an inot na beses na nahiling ni Jesus si Natanael, sinabi ni Jesus: “Hilinga, sarong tunay na Israelita na sa saiya mayong pandadaya.” (Juan 1:47) Siyempre para ki Jesus sadiyosan an iba pa niyang mga disipulo, pero ekstraordinaryong sinseridad an nahiling niya ki Natanael. Arog ta, bako man perpekto si Natanael. Pero mayo siya nin ano man na pagsagin-sagin o kawaran nin sinseridad. Hinangaan iyan ni Jesus asin kinomendaran niya si Natanael huli kaiyan. Dakulang onra nanggad kun arog man kaiyan an masasabi ni Jesus manungod sa sato!

10. Taano ta dapat tang likayan na gamiton sa salang paagi an regalong kakayahan na magtaram? (Santiago 1:26)

¹⁰ An kadaklan sa mga kahagadan na sinambit sa Salmo 15 konektado sa kun paano niyato tinatratar an iba. Sinasabi sa Salmo 15:3 na an sarong bisita sa tolda ni Jehova ‘dai nagpapakaraot gamit an saiyang dila, dai naggigibo nin maraot sa saiyang kapwa, asin dai pinapakaraot an saiyang mga amigo.’ An arog kaiyan na salang mga paagi nin paggamit sa satong dila makakadanyar na marhay sa iba asin magigin dahilan na madiskuwalipikar kita bilang mga bisita sa tolda ni Jehova.​—Basahon an Santiago 1:26.

11. Ano an pagpakaraot, asin ano an ginigibong aksiyon sa mga dai nagsusulsol na mga parapakaraot?

¹¹ Espesipikong sinambit kan salmista an pagpakaraot. Ano iyan? Sa pangkagabsan, iyan an pagtaram nin bakong totoong impormasyon na makakaraot sa reputasyon nin saro. An dai nagsusulsol na mga parapakaraot hinahali sa Kristiyanong kongregasyon.​—Jer. 17:10.

12-13. Ano an nagkapirang sitwasyon na diyan tibaad dai ta aram pinapakaraot ta na palan an satong mga amigo? (Hilingon man an ritrato.)

¹² Ipinapagirumdom man sa sato kan Salmo 15:3 na an mga bisita ni Jehova dai naggigibo nin maraot sa saindang kataraid asin dai  pinapakaraot an saindang mga amigo. Sa anong paagi ta iyan tibaad magibo?

¹³ Puwede tang dai tuyong mapakaraot an iba paagi sa pagpalakop nin negatibong impormasyon manungod sa sainda. Halimbawa: (1) sarong sister na nagpundo na sa paglilingkod nin bilog na panahon, (2) sarong mag-agom na dai na naglilingkod sa Bethel, o (3) sarong brother na dai na naglilingkod bilang elder o ministeryal na lingkod. Tama daw na magbana-bana kita sa mga dahilan kan mga pagbabagong ini asin na iistorya sa iba an opinyon ta diyan? Tibaad dakul kitang dai aram manungod sa dahilan kan mga pagbabagong iyan. Saro pa, an sarong bisita sa tolda ni Jehova “dai . . . naggigibo nin maraot sa saiyang kapwa, asin dai niya pinapakaraot an saiyang mga amigo.”

TAWAN NIN ONRA AN MGA MAY PAGKATAKOT KI JEHOVA

14. Paano isisikwal kan mga bisita ni Jehova an “siisay man na makababaldi”?

¹⁴ Sinasabi kan Salmo 15:4 na an sarong amigo ni Jehova “isinisikwal . . . an siisay man na makababaldi.” Paano ta iyan magigibo? Bilang bakong perpektong mga tawo, bako kitang kuwalipikado na magdeterminar kun baga an sarong tawo makababaldi. Taano? Tibaad mamati tang pasil makadayupot an partikular na mga tawo base sa saindang personalidad mantang sa iba naiiritar kita. Kun siring, an dapat tang isikwal iyo sana idtong ibinibilang ni Jehova na “makababaldi.” (1 Cor. 5:11) Kaiba digdi an dai nagsusulsol na mga naggigibo nin maraot, mayong paggalang sa satong pagtubod asin mga paniniwala, o an mga nagpupurbar na paluyahon an satong espirituwalidad.​—Tal. 13:20.

15. Ano an sarong paagi na matatawan ta nin onra “an mga may pagkatakot ki Jehova”?

¹⁵ Sa kabaliktaran, sinasabi kan Salmo 15:4 na tawan ta nin onra “an mga may pagkatakot ki Jehova.” Huli kaiyan, naghahanap kita nin mga paagi para magpahiling nin kabuutan asin paggalang sa mga amigo ni Jehova. (Roma 12:10) Paano? Basado sa Salmo 15:​4, an sarong paagi iyo na an sarong bisita sa tolda ni Jehova “dai . . . binabawi an panuga niya, dawa kun magin disbentaha iyan sa saiya.” Kun dai ta uutubon an satong mga panuga, siguradong makukulgan an iba. (Mat. 5:37) Halimbawa, inaasahan ni Jehova sa saiyang mga bisita na uutubon ninda an saindang sumpaan sa kasal. Nauugma man siya pag ginigibo kan mga magurang an pinakamakakaya ninda tanganing utubon an mga panuga ninda sa saindang mga aki. Papahiruon kita kan satong pagkamuot sa Diyos asin sa kapwa na utubon an satong mga panuga sa abot kan satong pinakamakakaya.

16. Ano an saro pang paagi na matatawan ta nin onra an mga amigo ni Jehova?

¹⁶ An saro pang paagi na matatawan ta nin onra an mga amigo nin Diyos iyo an pagigin mapag-istimar asin bukas-palad. (Roma 12:13) An paglilibang kaibanan kan mga tugang nakakapakusog kan satong pakikiamigo sa sainda asin ki Jehova. Dugang pa, kun mapag-istimar kita, inaarog ta si Jehova.

MAGDANAY NA MAYONG PAGKAMUOT SA KUWARTA

17. Taano ta sinambit sa Salmo 15 an manungod sa kuwarta?

¹⁷ Mababasa niyato na an sarong bisita ni Jehova “dai . . . nagpapautang nin kuwarta na may patubo, asin dai siya nag-aako nin suhol tanganing akusaran an daing sála.” (Sal. 15:5) Taano ta sinambit sa halipot na salmong ini an manungod sa kuwarta? Huling an bakong balanseng pagmansay sa kuwarta puwedeng makakulog sa iba asin makaraot sa pakikiamigo niyato sa Diyos. (1 Tim. 6:10) Kan mga panahon kan Bibliya, may mga indibidwal na inaprobetsaran an saindang tios na mga tugang paagi sa pagpautang nin may interes. May mga hukom man na nag-aako nin suhol dangan hinuhusgaran nin  bakong makatanusan an mga daing sála. An siring na mga gibo makababaldi ki Jehova.​—Ezek. 22:12.

18. Anong mga hapot an makakatabang sa sato na siyasaton an satong personal na pagmansay sa kuwarta? (Hebreo 13:5)

¹⁸ Marahay na siyasaton ta an satong personal na pagmansay sa kuwarta. Haputon an sadiri: ‘Parati na sana daw na kuwarta an nasa isip ko asin kun ano an mga puwede kong mabakal kaiyan? Pag nag-utang ako, haloy daw ako bago magbayad, na iniisip na dai man iyan kaipuhan kan nagpautang sako? Pag dakul akong kuwarta, namamatian ko daw na importante ako pero masakit man sako na magin bukas-palad? Ibinibilang ko daw na materyalistiko an sakong mga tugang huli sana ta makuwarta sinda? Mas nakikipag-amigo daw ako sa mga mayaman kisa sa mga tios?’ Tinawan kita kan pambihirang oportunidad na magin mga bisita ni Jehova. Maiingatan ta an pribilehiyong iyan kun magdadanay kitang mayong pagkamuot sa kuwarta. Kun gigibuhon ta iyan, dai kita nuarin man babayaan ni Jehova!—Basahon an Hebreo 13:5.

NAMUMUTAN NI JEHOVA AN SAIYANG MGA AMIGO

19. Ano an pinakaobheto kan mga kahagadan ni Jehova?

¹⁹ Nagtatapos an Salmo 15 sa panugang: “An siisay man na naggigibo kan siring na mga bagay dai nuarin man matatanyog.” (Sal. 15:5) Ihinahayag digdi kan salmista an pinakaobheto kan mga kahagadan nin Diyos. Gusto ni Jehova na magin maugma kita. Kaya tinatawan niya kita nin paggiya na makakatabang sa sato na makamtan an saiyang bendisyon asin proteksiyon.​—Isa. 48:17.

20. Sa ano makakalaom an mga bisita ni Jehova?

²⁰ An mga bisita ni Jehova makakalaom sa sarong magayon na puturo. An maimbod na mga linahidan papalaugon sa “dakul na irukan” na inandam ni Jesus para sa sainda sa langit. (Juan 14:2) An mga igwa nin paglaom na mabuhay digdi sa daga hinahalat-halat an panuga na nasa Kapahayagan 21:3. Iyo, dakulang onra nanggad para sa sato na mag-ako kan mamumuton na imbitasyon ni Jehova na magin mga amigo niya, asin magin mga bisita sa saiyang tolda sagkod lamang!